أولاً الشكـر الجزيل للأخ بكـري ... على إستضافته لنا و مزيـداً من التقـدم و النجاح ... و انا مع لخمة الشغل و الدوام .. و الدوام لله نسيت أن أنقل البوست دة و لذلك هنالك ردود كثيرة من الإخوة المتداخلين و متوقع منهم الحضور و هم كذلك متوقعين مني المزيد و عليه سوف أواصل و أقوم بنقل الطرائف البهناك حبة حبة حتى تكون عاملة ماتشينق أو تناسق مع موضوع البوست ... و لهذا أكرر أسفي....
المعـروف ان المجتمع الســودانــي مجتمـع بالرغـم من طابع الجدية التي تســوده في معاملاتـه اليوميـة داخـل الســودان بل عُــرف بهـا بالخـارج بأن الســودانيـــون متجهمـــون و عبــوســين و ما بجامـلو يعني إلا تســرق الإبتســامــة منهم خلسـة... إلا أن ذلك لا يمنــع بأن تكون هنالك بعض الطُرف والفكـاهـات و القفشــات التــي نتـــداولهــا في مجتمعـاتنــا أو حتى في حياتنا اليومية من صباح الرحمن سوى كان في المواصلات أو بيوت الأعراس أو بيوت العزاء أو بيوت الختان إذا كانت هنالك مناسبة ختان أو حتى في المدرسة أو الجامعات أو في الأسـواق و كذلك في مجال الرياضة يعنــي في شتــى ضــروب حياتنا اليومية و بالأخص في مجتمعنـا ... و أكيــد كلٌ منــا مــرً بموقف أضحكه في بيت مأتم أو أبكاه من الضحك في بيت عرس و القائمـة تطــول .. فأنا سـوف أحاول أن أســرد لكم بعض المواقف التي مرت بي في حياتي في مختلف هذه المناسبات و انتـم كذلك مدعــوون لكي تنثـروا بعض المواقف سوى أكانت مضحكة أو مبكية و التي مرت بكـم في حياتكــم أو مرت بأحد أصـدقاؤكـم أو أحـداً من معارفكــم....
* عنــدي ود أختــي مشــى يعــزي صاحبوا في وفاة خالو ... و كان الكلام دة زي الساعة الثانية ظهراً ... و بعـد ما شال الفاتحة و قعد بتونس معاهو كالعادة في الكورة و التمرين بتاع أمبارح كان كيف و هلمجــرا ... بعـد شوية جابوا الغداء قاموا أكلوا و شبعـوا .. اها ود أختي بعد ما إتغداء و جايي طالع بدل ما يقول لصاحبو حسًن الله عزاؤكـم .. قال ليهو أهـا عامريـــن مع السلامة ...
و البقيــة في الحلقـة القادمـة... و سـوف أواصــل بإذن الله.....
أيــام البـرد الشـديـد داك في الثمانينات و بداية التسعينات .. جيرانا جاهـم ليك حرامي .. قامو قبضو الأبو و ولدو .. و كبو ليك فيهـو جردل مـويـة باااارد .. الحرامي عمل فيها ميت و ما بتحرك أصلو .. أهـا أمهــم جات من هنـااااك و قالت ليهـم خليكـم ماسكنــو النمش نجيب الشطـة و نحشــرا ليهـو في (.....) وحـاتكـم الحرامــي لمن سمع الكلمـة دي قام فوووق و شال ليك الولد و أبو ضرب بيهم الواطـة و قام ناطي الحيطة و جرى...
الرد الجايي دة لقريبي فيصل محمد خليل:
Quote: قريبي هيثم
Quote: نجيب الشطـة و نحشــرا ليهـو في (.....) وحـاتكـم الحرامــي لمن سمع الكلمـة دي قام فوووق و شال ليك الولد و أبو ضرب بيهم الواطـة و قام ناطي الحيطة و جرى...
استمخاخ في خشم الزمزمية ....
12-21-2006, 04:39 PM
Haytham Abdulaziz Haytham Abdulaziz
تاريخ التسجيل: 05-28-2006
مجموع المشاركات: 2899
عـزيزي فيصــل قلت لي في خشــم الزمزميــة ... و حاتك الشطــة دي قــربت تصـــل خشـــم (القـ) أقصـد خشم القـ ـربـة بــس تقول شنــو ..دي شــدة الحرامــي زاااتـا... دة حرامي و لا عتـالــي القًلب الناس ديل...
12-21-2006, 04:44 PM
Haytham Abdulaziz Haytham Abdulaziz
تاريخ التسجيل: 05-28-2006
مجموع المشاركات: 2899
Quote: الغالي هيثم علي بالطلاق بوست لزيز جنس لزازة ،، انا زاتي قربت الحق محمد موسى زاتو تسلم يا غالي...
واديك دي برضو
موقف كان عجيب وغريب ،، عندنا واحد عندو سلك فاكي وجنو اكل بس ما يشوف ليهو صيوان يا زول يوم من الايام في ناس كان عندهم مناسبة زواج صاحبنا شاف الناس شغالين بيركبو في الصيوان يا دوبهم المهم كانوا تعبانين من الحفر وقعدو يتونسو شوية صاحبنا طبعا لقاهم قاعدين جا داخل عليهم وقال ليهم الفاااااتحة ههههههههه الناس احتاروا زاتو وقعدو يضحكو فيهو طبعا المناسبة كانت زواج بس لسا الكراسي ما جابوها وصاحبنا عايز يصاحبهم لزوم السفاسف بعدين وكدا
12-21-2006, 04:47 PM
Haytham Abdulaziz Haytham Abdulaziz
تاريخ التسجيل: 05-28-2006
مجموع المشاركات: 2899
الأغـلى و العزيز معتــز... شكــراً لييك كتيير على المرور و المداخلة الظريفة دي ... صـاحبكــم دة بُطينـــي بدرجــة فــارس ... يعني حتى من التفكيـر الشديد في العضـة قًلب العرس بكاء و اللاي دة زول لـذيــذ...
Quote: فتكم بي عافية وراجعين....
الله يعافيك و يخليـك ... و منتظــرين رجعنـــالـــك زي ما قالو البلابـل ... و ما تنقطــع...
كـل الـــود....
12-21-2006, 04:54 PM
Haytham Abdulaziz Haytham Abdulaziz
تاريخ التسجيل: 05-28-2006
مجموع المشاركات: 2899
يوم في مباراة في دار الريــاضـة أيام زمــان ... أهــا في بـــاك لايوووق كــدة و ضعيييف ... و حاشــي ليك ساقو دة كمية من الجرائد .. الوكت داك لا في شنكارات لا أناكل زمن الكدارة البربطوها من تحت ... أها الباك اللايوووق دة يشيل و يركب ليك ردم في ود الجاك ... كرهو ليك الكورة ... ود الجاك زهج ليك منو و قال ليو تعــرف واللاي أنا أضــربك ضربة واحــدة أخلــي دار الرياضــة دي كلها تقرا جرايـــد.....
12-22-2006, 02:40 PM
Haytham Abdulaziz Haytham Abdulaziz
تاريخ التسجيل: 05-28-2006
مجموع المشاركات: 2899
يوم ضارباني ليك نزلة تقيلة لامن إضنيني مقفلة و جسمي هلكان... اها كنت في السوق العربي .. و ما لقيت مواصلات مباشرةَ للقوز .. قلت أركب مواصلات الشجرة و أنزل قصاد نادي النيل ... لأني تعبته و ما قادر أقيف ... أها لمن جيت داير أركب .. في كمساري معروف شين كدة و مسمنو هيثم و لقبو الكحنوت .. قلت ليهو بلاي بعدين انا نازل نادي النيل ... اها مع التعب .. شالتني ليك نومة قوية.. اها محطتي جات و الكمساري .. يكورك .. المجاري يا في حد نازل... المجاري يا في حد نازل.. فجأة صحيت و لقيت ليك البص قرب يصل اللاماب ... قلت ليهو أيوا .. أيوا نازل يـا... قام بزعل كدة و قال لي : سمع و عرفناك أضانك تقيلة .. شم كمان ما بتشـم .. الباص كلو قنب يضحـك....
12-22-2006, 04:53 PM
Haytham Abdulaziz Haytham Abdulaziz
تاريخ التسجيل: 05-28-2006
مجموع المشاركات: 2899
كنـت بــدرس في مـدرسة العروبة الثانوية .. و الوكت داك كانت في العُشــرة ... و طبعاً أولاد العشش بجـو فاطرين عسلية و كجومرو .. واللاي الواحد لمن يكرًع جنبك التقول خروف بس ... أهـا كان بقرا معانا عارف أحمد آدم و لقبو كابوس شقيق كابتن الهلال طارق احمد آدم ... بعدين هو راجل ظريف و دمو خفيف أها يوماتي على الله إجي داخل الحصة بعد ربع ساعة ... عندنا ناظرنا ظريف إسمو أستاذ أنور الله يديه العافية ... قال لي كابوس إنت طوااالي جايني متأخـر ... كابوس قال ليهو يعني أجيك الساعـة كـم ... أستاذ أنور قال ليهو تعال أربعـة صباحـاً ... كابوس قال ليهو يااخ أنا أصلو حرامـي .. و الفصل كلو قرررررررررر...
12-22-2006, 05:17 PM
Haytham Abdulaziz Haytham Abdulaziz
تاريخ التسجيل: 05-28-2006
مجموع المشاركات: 2899
بعـد ما لاعب الهلال السابق صديق الرميلة شطبو من الهلال .. و جا سجل في القوز .. كنا بنتفرج على تمرين القوز .. و القوز عندهم لاعب ألجن كدة بنطق الرا (ل) إسمو لمضان (رمضان) .. قام صديق الرميلة جدع ليهو باص طويل لرمضان .. و رمضان وقف قبلو .. صديق قال ليهو يا كابتن ما تجري ... رمضـان قاليهو ياااخ انا حــلامـــي (حرامــي) و طبعـاً الميدان كلـو قررررر...
12-22-2006, 05:51 PM
Haytham Abdulaziz Haytham Abdulaziz
تاريخ التسجيل: 05-28-2006
مجموع المشاركات: 2899
عندنا في الحلة راجل مكجن مرتو ... و كلو يوم بطلع بعد المُغرب و بجي راجع بالليل سكران و مسطول.. أها يوم جا راجع .. لقى كديستم جم باب الشارع .. قام شالا و بمسح في شعرا و خش أوضة النوم.. و مرتو صاحية .. قام قال رايك شنو في الغوريلا دي .. المرة قالت ليهو ياراجل إنت جنيت و لا شنو .. دي كديسة .. قال ليها .. هسع أنا سألتـك ...
12-22-2006, 07:04 PM
Haytham Abdulaziz Haytham Abdulaziz
تاريخ التسجيل: 05-28-2006
مجموع المشاركات: 2899
عندي واحد دنقلاوي صاحبي من أولاد الإمتداد.. يوم عزمتو يمشي معاي حلفا الجديدة لأنو كان عندنا عرس هناك.. اها أول ما وصلنا حلفا كدة عجبتو شديد... و الربة كانت بالليل و طبعاً كلكم عارفين رقيص الحلفاويين البمسكو فيهو اليدين و بمشو قدام و برجعو وري (زي تجربة الفرامل في الترخيص جم الإستاد).. اها صاحبي عجبو ليك الحال الكان بشوفو في التلفزيون داك الليلا ألايــف ... تاني يوم مسكتو ليك ملاريا داير يموت ... و زهجان و بطرش .. قام عاين لي كدة و متشائم و قال لي واللاي مشاوير امبارح الرقصناها في الحفلة دي كان تودينـي الخرطــوم .. الجماعة كلهم قرررقررر ...
12-26-2006, 09:56 AM
Haytham Abdulaziz Haytham Abdulaziz
تاريخ التسجيل: 05-28-2006
مجموع المشاركات: 2899
يوم كان عندنا مباراة في جبيل الطينة بعد جبل أولياء ... أهـا بعد المباراة إنتهت الجماعة أهل العوض أصروا نبيت هناك لأنو هسع الرجعة صعبة و كدة ... و الوكت داك لا في موبايلات لا سجم رماد ... اها بعد ما إتعشينا .. الجماعة قالو لينا الوصايا العشرة و من ضمنها:
* أعمـلو حسابكـم من الدبايب ...
* الداير إمشي الأدبخانة يشيل معاهو الرتينة...
أهـا عندنا نفرين كدة خوافييين ... واحـد بخاف من الدبايب و التاني من الصرصار ... أها عندنا واحد كدة شقي خلاس ... ىمن سمع الكلام دة قام براحة في الضلام لفة ليك حبل كدة في شكل دائرة و ختاهو في رقبة صاحبنا البخاف من الدبيب دااك ... طبعاً صاحبنا قنب يكورك الدبيب ..الدبيب في رقبتي و فكة البولـة ...
التاني قال ماشي المُستراح .. و شال معاهو الرتينة .. و أثناء ما شغال بعمل إئح .. فجأة جاهو ليك صرصار و هبشو ليك في مؤخرته .. و طبعاً صاحبنا من الخوف قام نطة و دقش الرتينة لامن تشتـو ليكم في عجـزه....
12-26-2006, 10:05 AM
Haytham Abdulaziz Haytham Abdulaziz
تاريخ التسجيل: 05-28-2006
مجموع المشاركات: 2899
يوم كنا داكين من المدرسة و الوكت داك بنقرا في مدرسة المقرن ... كنا أنا و صحباني واحد مننا زول ظريف و بتاع مقالب أها فجأة شاف ليك واحـد عريان و مجنون بعمل زي الناس في كوشة في السوق العربي و حالياً بناية الإمارات ... أها صاحبنا دة شبك ليك المجنون إئح أفووو... إئح أفووو... وحاتكم المجنون دة قام ساكينا بي حالتو ديك في السوق العربي و الضبان جاري وراهو زي عربية الباسطة البفسحوها ديك...
12-26-2006, 10:12 AM
Haytham Abdulaziz Haytham Abdulaziz
تاريخ التسجيل: 05-28-2006
مجموع المشاركات: 2899
يوم عندنا صاحبنا شغـال نقـاش ... أها في رمضـان السخن داك .. و الساعة يادوب عشرة صباحاً .. لامن وصل أبوحمـامـة لمو فيهو ناس الإلـزاميـة و رفعــو ليك في الدفار السخن و كمية من الناس و سخانة تلحم .. صاحبنا طوااالـي طًلع كيس صعـوتـو و ختة سفة .. و قال خلي بالك الظاهر يومنا دة طويييل...
المعروف إنو الكوتش محمد حسن نقد ما بشوف من بعيد و راجل بتاع نكتة .. اها يوم في مبارة ودية بين النيل و الزومة .. و الزومة عندهم واحد شوااات إسمو خالد جادالله ... قام الكوتش وصى كابتن خالد حلبي إنو يكون مراقب خالد جادالله دة و ما يشوت و لا شوتة .. بعد شوية واحد من لعيبة الزومة شات ليو كورة خطرة دقت في العراضة .. نقد صرخ في خالد حلبي .. با خالد انا مش قلت ليك الزول دة ما يشوت.. خالد حلبي قال ليو يا كوتش خالد جادالله دة طردو زماااان ... و فعلاً كان خالد جادالله سب الدين للحكم و طردو من بداية الشوط التاني ... قام نقد قال ليو خلاس شوف ليك أي واحد شوات و أقيف جمبو...
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Haytham Abdulaziz
فيس بوك
تويتر
انستقرام
يوتيوب
بنتيريست