شكرنين- ناذر الخليفة , بيان , حيدر حسن ميرغني , والقارئة هبة عبد الله عبد الرحمن , وبكري (صور)

Quote: اها يا ناس اهل الكهف دي رسالتي الأخيرة ليكم عشان الاسبرينق بريك بتاعي بنتهي بكرة ....يعني دي اعتبروها ضربة الوداع أو قرصة الوداع ((دي طبعا حركات شفع)) عارفين المرة الفاتت قلت ليكم المنبر ده والناس الفيهو بذكروني بي أهل الكهف وكده....اتم ليكم باقي القصة ...اها بعد االبوليس يجي يحاوط الكهف بتاعكم ..تجي وكالات الأنباء وتعمل لقاءات معاكم....تقومو تحكو قصتكم وانو عمر البشير وعصابتو كيف كرهوكم البلد ...يقوم المذيع يتدخل ..يقول للمشاهدين..طبعا المشاهد ما حضر الزمن بتاع عمر البشير البتتكلم عنو ده..لانه عمر البشير حكم السودان قبل اربعمية وخمسين سنة...وبعد داك طبعا يختوكم في متحف كده ويجو شفع المدارس يزوروكم من كل أنحاء السودان..وبالذات شفع الخرطوم ..متكييفين يازول من أشكالكم..واحد يسأل بشاشة ..انت يا عمو يا بتاع الكهف ..انت كنت قاعد تعمل شنو في الكهف ده اربعمية سنة؟؟؟والكان بيطبخ ليك منو؟؟ بشاشة ينطط عيونو!!!يقول ليه يعني حيكون منو يعني ؟؟ في غيرها ؟؟ ما تراجي !!!!!يقوم الشافع يقول ليه: ياي يا عمو الآكسنت بتاعك اوريجنال خالص....المهم يمشي يخادو جولة يتفرجو علي الكمبيوترات بتاعتكم..يقوم يلقو ليك الكمبيوترات مليانه بزاق ((الله يقرفك)) وده كلو من الشكل والنبذ والتفتفة علي بعض وشئ مخاخيت ..بالله الكمبيوتر زي التقول مشت !!!فيهو سوسيوة رجلينها مليانة طين المهم ما عليينا خلونا في المهم...عارف موضوع ناس مناوي وعبد الواحد..الانتين ديل دقسو ليك الحكومة دقسة السنين..قولي كيف؟؟ ده سؤال منقة عدل كده!!!!!عارف هم الاتنين اتفقو مع بعض ..عبد الواحد قال لي مني : انت وافق علي الاتفاقية وامشي اتجدع في القصر الجمهوري ومعاك شلة كده من القوات بتاعتك...وبعدين باقي القوات خليها تبقي معاي ..وبي كده انت تشتغل من جوه وانا من برة وبعد داك لما تجي ساعة الصفر نخليهم يشربو ما يروو...طبعا عبد الواحد ده من جماعة عمك الترابي..يعني فقري شديد وعارفة اللعبة كويس وقواعدها.... المهم ما علينا خلونا في المهم: عارف المنبر ده مش قلت ليكم عنو: المنبر واليمن ضياع زمن؟؟ يعني ما تستفيد منو أي حاجة ..بالعكس خمسة الف عضو يصرفو في كهرباء واشتراك نت في الفاضي ..تلقي الواحد ناس بيتهم مالاقين حق العشاء ولا حتي حق الفطور!!!! لكن في حاجة واحدة بس انا استفدتها منو...لو كنت عشت مية سنة ما كنت حأعرفها...ببساطة لأني انسان علي نياتي وما عندي علاقة لا بالسياسة ولا العاملين فيها سياسيين....مواطن بسيط ..همومه بسيطة...الحاجة العرفتها من المنبر ده هي: الحقد والكراهية القاتلة التي يحملها البعض والعنصرية البغيضة والغتاتة المبالغ فيها...يعني أنا كنت بتعامل مع كل الناس بحسن نية..اتاري القلوب فيها حاجة تانية ..الناس تبتسم في وشك ..لكن جواها شي كعب خلاص...الواحد فعلا بطنو طمت من السودان والسودانيين بسبب الكراهية والعنصرية ........الفي المنبر ده والله يا بكري أبوبكر انت قدمت لي خدمة العمر ما حأنساها ليك مدي الحياة....وبصراحة أكتر... منبرك ده استنفذ أغراضو....حقو تقفلو علي كده وكل قرد يطلع شجرتو وكل فارة يرجعو حفرتو....غير انو اثمو بقي اكتر من نفعو..الالفاظ النابية والتشهير والاساءة والقذف ...وحاجات تانية حامياني ..مع أحترامي الأكيد لي كثيرين هنا..الا انو منبرك ده بقي مكان لدعاة الفساد وانت طبعا سيد العارفين..حسب القانون انت المسئول الأول خاصة أمام القانون الجنائي السوداني عن كل كلمة نتشر هنا فيها اساءة ولا سباب ولا قذف ولا أفعال فاضحة !!هسة في اللحظة دي في بوست من البوستات المفتوحة فيهو صورة لي بت شبه عريانة!!!...ودي كلها مواد واضحة جدا في القانون الجنائي لسنة 1991 وما بعفيك تقولي المواد المنشورة في المنبر تعبر عن وجهة نظر كاتب المقال ولا يعبر بالضرورة عن رأي صاحب الموقع ..بقول ليك كدة من واقع خبرة قانونية شخصية طويلة جدا في المحاكم السودانية والأمريكية...وانت عارف في أمريكا أي دعوي تحت مسمي المسئولية التقصيرية المحامين بفتشو علي ما يعرف ب ((الدييب بوكت)) يعني بالواضح كده انت ده ما زول تاني...دحين يا أخوي كتر خيرك وبارك الله فيك لحدي هنا ما قصرت... الموقع ده أقفلو ولا أعملو مطعم أحسن ليك علي رأي الحلفاويين....بعدين ما تنسي الموضوع ده فيهو جانب المسئولية قدام رب العالمين يوم لا ينفع مال ولا بنون الا من أتي الله بقلب سليم :غرزة أخيرة وطبزة أخيرة الأخوة الأعضاء والقراء في سودانيز أون لاين الكلمة أمانة ومسئولية....حاولو أن تقتلو الحقد والكراهية التي في نفوسكم...حكمو عقولكم وضمائركم....السودان أعرف انه لن ينصلح حاله أبدا ..ببساطة لأنه خلق علي اساس قبلي بحت......القبلية هي آفته..الانتماء الحزبي الضيق والمصلحة الشخصية ومن بعدها المصلحة الحزبية هي أساس كل شئ...السودان حيعيش دولة الكراهية والحقد والعنصرية الي أن يرث الله الأرض ومن عليها...والفساد المنتشر في كل أرجاءه بسببو حيجي اليوم وربنا يسلطكم في بعض وكل شئ يتنهي في ثانية... وصدقوني اليوم ده قريب شديد .....فأعتبرو يا أولي الألباب لذيذ شكلي لما أكون جادي..مش كده بالله؟؟؟؟؟ لقيتني كيف بالله؟؟؟؟؟؟؟؟