حجي جو الروح .. وطوفي .../... إهداء إلى تماضر الخنساء حمزة

(عدل بواسطة مهند الجيلي بادي on 01-12-2007, 02:21 PM)

Quote: عشم الحروف الجايه منك وماشه ليك تلقاك في الزمن الحلو والتائه تسجد بين ايديك وممدودة يدي علي السلام لو السلام يمسك يديك يكفيني قلبي اللسه حي ودواخلو تتشحتف تجيك

Quote: ستفت شوقي مع الصبر ملهوف جريت .. سلّحت قلبي حروف وفا وهشيت خواطر الحزن غادي وانتشيت .. وما كنت صارف من شبابيك الحنين غير بعض زخات لا بتبل حلق الكلام لا بتصَرِّح بالغنا أعمل شنو لو مل ضهر الدفتر الصابر شيل همومي وانبساطي؟؟ لو مل فكرة شوقي هادي وانتحر ؟؟ قدمت حزني علي البحر لزيتو في مغرق ظنونك وقعدت أرتب ابتسامات للزمن وانتظرتك وكت بفكر كيف أشوفك لم تنزلي من علاك يا ضل ورقراقك مطر الفكرة إنك تدخلي بي كل صباحاتك براح الفضفضة أو بي مسائك عتمة الإلفة وضراي رايك شنو ؟؟؟

Quote: إرتضيت بالإلفة منك وكل حس منك دفق وسكت لامن إنتشى الوتر البرافق كلمتك ونسيت زماني ورحت ليك مشتهيك ساكت أظني والقوافي الطالعة مني واصفة حال الشوق إليك

Quote: أقتراح ... ما تيجي نشيل الجراح!! ....!!!

Quote: مُرَتَّبْ .. كلامك بنكهة مزاج البنفسك سلامك مُشَحْتِفْْ .. حواسي مُدَوْزِنْ صباح السفر في الخواطر مُحَلّى .. بلهجك . . . غُناك يا صبية ملانة برحيق الشِعِر يا عصارة زهور غُناك صوت دواخلك ورنّة كلام في الدواخل بتعدل مساير عِصِيرنا المميل بحاول شرود من عيون النهار الكلام ما كمل بس حواسك بتربّط غناي عن مروقو بيخجل يجيك

(عدل بواسطة مهند الجيلي بادي on 01-16-2007, 03:33 PM)

Quote: أقتراح ... ما تيجي نشيل الجراح!! ....!!!

(عدل بواسطة عبدالله وداعه الامين on 01-17-2007, 04:02 AM)

Quote: لو نحنا بس شلنا الجراح مين يدي لي العقل النصاح؟ الكسرة ساكيها الكلب والعضمة تشحد لي الملاح طاحونة الوجع العفن تلقاها تطحن لي الصباح والناس تكابس للقرش والبنك هو المفتاحو راح يا الله سترك في البشر قبال يقاسمونا النكاح واصلنا راجين الفرج بس انت اهدينا الصلاح

(عدل بواسطة مهند الجيلي بادي on 01-17-2007, 05:51 PM)

Quote: وقع الكلام الجايي منك فيني أكبر من صدى لتَّق دواخل أرهقا الوعد البراشي القمرة لامن تكتمل أو .... لامن يطل أول رشاش وتكضب المطر الرياح يا زولة يا مليانة باللون البشارة ناديتك : تعالي علي الوليدات الشُتر علميهم كيف يغنو مع الحواس غنية الوعد النضِر يا زولة يا دافقة الصباح في كل مواقيت السنة أدي الوليدات المضلمة في عينيهم كل تفاصيل النهار طاقة شعاع علميهم كيف يلونوا ذكرياتم بالخضرة واللون البِسُر الناظرين

Quote: عِتِرتَ .. إستنيتك تعدلي خطو العين إترجيتك .. تقيفي قصاد ممشاي وأنا أعرج شوف يا بنية من الزمن الصالح ما تشربي مِنِّي جواي مالح ماسخ وملان بسواد الدنيا وجواك أبيض مرتوق بسماحة مليون ميل يا ضل تنجم عليهو طيور بتهاجر بين الغنوة ولهفة مشتاق لبلاد ما شافا أنهار مخضرة بعشب الحِنْ مدفوق في ضفافا ونيلين وطرب مسكين المسا ونجمات الليل اللسة بنرمي عليهو حمول وسهرانة نجومو معانا بتحنس إجفان الأرق القاسي بتبتب على خد الشوق وبتربت في قلوب مليانة جراح يا وجه الليل أدينا صباحك وأغفر غلطان الضو وافتح لبراح

Quote: وصولك عشية صباي صباح لي شباب منور بوصلك وبعض الحزن بيفرش دموعو وبيفتح يدين شان يضمك ويبلل كتوف الغنى أقيفي النميز ملامحك أقيفي النسبت غنواي الفرح وأحزن معاك قدر ما تشيل الخدود الدموع نَصَفِّي الزمان الملان البخطايا ونَكَفِّر ذنوب

Quote: اتْوهْدبْتَ ما بين الدخــول والوقفة فى حرم الجمال مفتون أعاين من بعــيد ما كان متاقه الباب ولا طالت عتيبات المحنَّة الهاشَّة فى وجه الوصـول لكن خِجِلْ حرف القصـيد وانضارى خلف الارتجال وادَّحَّرتْ غيمة الهطـول يا بادِى عينتَك بالسيـول خضَّرت وديان الحواس وادفَّقتْ غابة النشــيد طالتْ طوابق أُسَّهـا وكنت الأســاس لا اتوشَّح الفجُر الضباب لا اتوسَّد الليل النعـاس ودخلت فى ساحة غُنـاكـ بشَّرت للفـال بالجــريد جات القصيدة وتاوقتْ واتْبلَّمتْ واضَّايرتْ واتراجعتْ فى الدارة كان ترقص خنـاس ..!

Quote: يااااااااااااااه ... !! قُبّال مروقك علي العوينات المضلمة إلا منك صبِّحي الورق المساهر ختي فوقو كم حرف من وعد باكر وكم وتر من طنابير المواسم وبرضي شاكر إنقسامك مرتين بتبتبي الوجع اللفيني وتقُشي طافرات الدموع

Quote: دا كلام جميل ومعبر في الزمن الاغبر ده ، زمن الجهل المقرؤ والمسموع . والله العظيم لو خليتوا عبدالله اخوي دا يشيل الجراح براه الا الزميل بكري ابوبكر يشوف ليه سيرفر تاني أو سيرفر خاص لجراح شوقي براها!!!! تخريمة : تماضر الخنساء انتي وطنية البال توك !!!! مع خالص الود والتقدير ،،، فيصل محمد

Quote: ويسلم مجانين البوست دا

Quote: ختي فوقو كم حرف من وعد باكر وكم وتر من طنابير المواسم

Quote: زينة النَّضم المعَزَّل من حروف الإلفة والمطر البدفق من عيون الغيمة منبئة بالخدار . . أقيفي النشتهيك أو ... أرسم فصولك بي طريقتي أو ... أشرح ملامحك لي عيوني عشان أشوفك وفق ذاكرة الحروف . . معليش إذا كان الغياب فرض البعاد عيني والشوق لي حروفك بس ياني جيتك وشايل الشوق و ...... كلام .. كتيييييييييييير

Quote: أصلي من أول بديت بالدهشة واستنيت مسارب الكلمة تفتح طاقة من وهج الحنين غنيت كلامك مرتين مسيت حواسك وانتكيت كيَّفت (خَرْمَةْ) شوقي للنضم الرزين وما شهِدتَّ على المروق كنت قاصر رغم إنو اللهفة أكبر من صدى والغنوة رنات الوتر أوضح من الشمس النهار لكن شِهادَةْ الزول الصغير ما بتفيد لحظة تكون البينة رتلين من سطوع والصدح أعمق من قسم محلوف على القمح البنادي الموية خُشي إستبنتك وإنتِ بينات الخلوق مليانة بالكوراك (تعال) حلقك ملازم للغُنا والقيفة ما فترت تردد دخلتك النيل وكت شافك سكت الغيمة لامن شافت الموج جاري ليك إتمحّْنت والغنوة ما زالت بداية إنكفيت في لهفة الخوف من مداخل ساكتة بتراجع حِصص أول شعاع طل من تال البروق يا زول أقيف