|
|
 ابراهيم الفراش صوت من بربر
|
ابراهيم الفراش شاعر بربر
لايعرفة الكثيرين من غير اهل بربر
يمتاز شعره بالبساطة والعفوية والإنسجام وعذوبةالعبارات
كانت اهتماماته تغطي جميع ضروب الحياةوكانت اشعاره
مصدراً مهماً للوضع الذي كانت عليه مدينة بربرانذاك
فشعره كان صادقايعكس كل ما يدور بين حناياه
وما حوله في دقة وصدق، يقول في بعض ذلك:
بَشُوفْ بَرْبَرْ بَشُوفْ جوخَا وحَرِيرَا
بَشُوفْ الميَضَنَه الوَسْطَ الجَزِيرَه
بَشُوفْ رَكْبَ العَبَابْدَه البَيْ خَبِيرَا
تَرَى البُرْدَينْ كَسَحْ فَاتْ القَطَيرَه
بَشُوفْ تَرَبَيزَه فِيهَا تَمَانْيَّه بِيرَه
كان معتدا بنفسه وكثيرا ماتبدا
اشعاره بكلمة اناومنها يوما كان
يهم بعبور نهر عطبره قبل انشاء خزان
خشم القربة وكان يعج حينها بالتماسيح
وقبل ان يرمي نفسه بالماء سمع بعض الاعراب
يتهامسون انه خاف فرجع وانشد فيهم
ليه بتقولو هم
انا ابراهيم اخو اللابسة اللازمة
انا اتحصنت بي ياسين وعم
والتمساح بشيل الاجله تم
وهي جزء من قصيدته التي غناها
خلف الله حمدومطلعها
ماني الهوين في ضل السروب والدوم بقيل
ويقول فيها
انا الظل الظليل لداير يقيل
انارحل الكحل وكتين يميل
وان الرمد البخلي العين تسيل
ولنا عودة للفراش
|
|
 
|
|
|
|
|
|
|
|
Re: ابراهيم الفراش صوت من بربر (Re: عمر المهدى)
|
سلامات يا ناس
ود المهدى ...سلام
ودالفراش مش لا يعرفه الكثيرون
لايعرفه القليل...اى زول بيتذوق الغنا الطاعم
بعرفو....
لو ثبتّ لينا على بوست واحد وكرّبتو بيكون كويس
يعنى اغنيات ود الفراش بالراحة بتفك الدبرسة..
| |
|
|
|
|
|
|
|
|
|
Re: ابراهيم الفراش صوت من بربر (Re: عمر المهدى)
|
سلامات يا ناس
Quote: وأنا المأمون على بنات فريقه
|
دى يا ود المهدى امانة صعبة ...والزول
البيقدر عليها ما اظنو بضيع امانة غيرا
بعدين الشطرة متداولة بين السودانيين بصورة
كبيرة..ويستشهد بها الكثيرون...
ناس النضيف ديل تكتبا ليهم زى ده:
انا المامون على بنّوت فريقو..الواو دى توضحا
ليهم حيقروها ( ها) ويجو يقولوا ليك الشطرة فيها خلل
تحياتى ومنتظرين ...
| |
|
|
|
|
|
|
|
|
|
Re: ابراهيم الفراش صوت من بربر (Re: محمد صديق)
|
كان تكتب فى العنوان ممنوع لاقل من 50 سنة
قدر ما فتشت فى البوم الاغانى بتاعى لاغنية ليهو ما لقيت
ده الا من مكتبة الاذاعة السودانية
فكرت قلت انزل ليك اغنية الفراش الحائر
ووواصل يا عجوز
| |
|
|
|
|
|
|
|
|
Re: ابراهيم الفراش صوت من بربر (Re: عبد الدائم سيد أحمد)
|
ياعبد الدايم فراش القاش ماتنفع
تحياتي وامنياتي للجميع بالخير
كان الفراش فتيا وسيما جمع من اصلية
السوداني والمصري وقد افـتتنت به النساء
ويقال انه عندما يمر بالشارع تتلصص الحسناوات
للنظر اليه عبرثـقوب الابواب الموصدة مما جعله
يتبع نصف قول الشاعر نقل فوادك حيث شئت من الهوى
وقد كان يصرح بغرامياته ومن اقواله في ذلك
قَامْ بَيَّ هَمَّ
مِتِلْ وَدْ الغَزَالْ يَاخُدْلُو خَمَّه
يِقُولْ لَيَّ انْعَدِلْ وجُرْ فَوقِي نَمَّه
المبَيِتْ نَاسْ سَارَه في قَلَعْ المَتَمَّة
ويقول:
مُرْبَيتي بَاجَّه
تَجَابِدْ في الرَسَنْ خَارْتَاهُ دَاجَّه
وَكْتَ الليلْ بَرَدْ والقَمْرَه فَاجَّه
تَخُبْ بَاجَاتْ على نَاسْ آمنَه حَاجَّه
ويقول:
أزْمَنْتَ غَايِبْ
بلا مَالْ إنْ رَجَعْ بِيقُولُو خَايِبْ
بَخَافْ شَمْتَ العِدا ولَومْ القَرَايِبْ
حِليلْ سَعْدِيَّه دَيفَةْ أُماتْ حَقَايِبْ
ومن غزله الرصين ووصفه البليغ قوله:
صَايْدَانِي حَراً
مِن الفُومْ مِنْ الزرْقِي الَمقَرَّنْ
طِرِيتْ الْ بالِمزَاحْ دَمَاعَا فَرَّنْ
تَقُولْ طَافَاتْ عَرْد أورَاكَا صَرَّنْ
| |
|
|
|
|
|
|
|
|
|
Re: ابراهيم الفراش صوت من بربر (Re: أبوبكر حامد الأمين)
|
سلامات يا ناس
Quote: مِتِلْ وَدْ الغَزَالْ يَاخُدْلُو خَمَّه
يِقُولْ لَيَّ انْعَدِلْ وجُرْ فَوقِي نَمَّه
المبَيِتْ نَاسْ سَارَه في قَلَعْ المَتَمَّة |
ده الكلام...
ذكرنى نمآ عملتو مرة...لما فاض بى عظيم شوق
شديت على ماصعآ رهيف بخبر دروب الليل
وشقيت البطانة باريت دروب السيل
ولمن لاح لى فى الضلمة الخديدو اسيل
قتلو الكع ..ارح جبنتنا فى توتيل
| |
|
|
|
|
|
|
|
|
|
Re: ابراهيم الفراش صوت من بربر (Re: محمد صديق)
|
كان ود الفراش جامحا في حبه
وكثيرا مايترك عمله ويهاجر حيث
كانت من يحب وكان دائم الانشغال
بِقِيتْ في جَلْجَله وشِيتاً يِكَفِّرْ
كُلْمَا طِرِيتْ أَشِدْ واركَبْ وادَفِّرْ
أَتَاوِقْ بالحَيطْ وادُورْ أطَفِّرْ
نَعَلْتَ ابْلِيسْ نَزَلْ في اللرِضْ أَحَفِّرْ
ونراه حيناً يندفع مع تيار الحب والشباب
فلا يتورع أن يحوم في حبه حول الحمى:
وَلَّفْ حَكَاوِي
نَارِكْ يا امْ رَشَومْ في الجَوفْ تَكَاوِي
كَانْ عَقْلِي انْسَلَبْ إِيَانِي غَاوِي
بَحْلِفْ باليَمِينْ رِيقِكْ يِدَاوِي
وكان لايفرق في اختياراته مابين فقيرة وغنيه
أومابين حرة وجارية أومابين أجنبية أو مواطنة
فعندما خلبت لبه فتاة تركية حسناء قال:
عَايِنْ قَعْدَتَا وعاينْ زَمَانَا
تُوغِلْ فِينَا مَا بْتَنْضُمْ مَعَانَا
تُرْكَاوِيَه مَا بْتَعْرِفْ لُغَانَا
مُوَرِدْ لَونَا يَعَجِبْ شِنْتِيَانَا
الحبيب محمد صديق نامل
مدنا بمزيد عطور الخزامي
ووسائد النال ومنتظرينك في ام هبج
| |
|
|
|
|
|
|
|
|
|
Re: ابراهيم الفراش صوت من بربر (Re: عمر المهدى)
|
نماذج من اشواق ودالفراش
مرضان أب على مرضاًّ يعيّب
مراًّ يحضّر ومراًّ يغيّب
من شندى الصباح كان ابقَ طيّب
مِخِيرف النُور على الهِضْليم قِريّب (بربر القديمة)
ود الأريَل الضارب لُه باجَه
مُرعاة الخريف ما شاف عَجَاجَة
كمَّلت المعاى ما عندى حَاجَة
دحين سافرت قفِّل يا خَواجَه
عجاجة : غبار
طلع العنقريب نَجماتُه شَبّن
حلاةُ ظَهَر التِلوبْ ساعة يَخبّن
حِسارن فى الضمير راقد مَغَبّن
طريت خُمرة وجَلاداً ليهُ كبّن
طَولتَ طُولاً
مانى مُجَرَّب اتحمَّل حِمولاً
عوجات الزمن لابُد يزولَن
بعد دا الحال نَشُوف عُقلاً يجُولَن
****
دايماً بهادِى
واسدَّد فى الشُقوق الباقية وادى
حِسار ام زين ترى الحاِرق فؤادى
اخير الموت ولا شَمَت الأعادى
دِيسَة كابى
تقول جُبَّينة بَكرَة إيريابِى
انا جنيت وكثرت عذابى
ماخد ذنبى ليه يا ابوها مابى
إيريابى: البشارية اصحاب البشرة الفاتحة
ود الأريل الضَارِب وَهَايدُة
شَاغِل فِكرى دايماً قلبى رايدُه
وَكْت الفومْ يركْرِك فوق فَنَايدُة
يهْرد الكَبْدة واب دَمَامى صَايدُة
ولف حكيه
ياقلبى المريض مابِى الهَديَّة
دحين يا بُقَة العسل الرَويَّة
بعد باصُور بقيت بركب حويَّة
باصور: سرج زينة . الحوية:سرج للتحميل
11) قصيبةً فى أب عََدَار واديها نسَّمْ
طويل الليل على والنوم مقسَّم ْ
طريت فى البنات اللابسة المرسَّمْ
مَسِيخ الجيل بلا ام خَداً موسَّمْ
| |
|
|
|
|
|
|
|
|
|
Re: ابراهيم الفراش صوت من بربر (Re: عمر المهدى)
|
رغم ان ود الفراش صنف بانه كثير العشيقات
وكان يتنقل بين الحسان وترغب في محبته ووداده
الا انه سقط صريعا لغرام ومحبة جارية حسناء
اخذت لبه بجمالها فتعالو معي لنرحب بمحبوبة ود الفراش كما رحب بها
الدون حبابه
ام شعراً متل وتر الربابة
يا فراش ابوي كان شُف جِعابا
تجرد المال تخلي الحوش خرابه
وقد كانت محور الكثير من شعره وقد نزهها
من كثير من العيوب والصفات واسبغ عليها
صفات لايراها توجد عند غيرها فقال
ما ها السمينة
عناق التوتو الخضر عسينة
تقرد الديس علي الروبة الدهينة
بتتسند تقول ما سكاها طينة
ماها أم تموكه
عناق التيتل الخضر تبوكه
تقود الديس علي الروبة الدهوكه
بتتسند تقول طاعاناها شوك.
ما ها أم كراشة
عناق أم سومر الخضر رشاشة
شبيهة الدون جدية ضارب قشاشة
ليج الدون بيروي اتنين عطاشة
ود الأريل الضارب مخبه
البارح ورد والليل غبه
كفيل المنتني وعلاه ربه
يناتل فيه داير يتقلبه
..............................
سلبت لحمي أنا وقلًت رياي
كل ما تهف لي بركب براي
جنيبة موسي باشا الفي السراية
جليدك طاقة القطن اب شراية
جنيبة موسي:مهرة موسي
لا مانع من الاجابةعلى بعض معاني مايستعصي من كلمات لغير الناطقين بها
| |
|
|
|
|
|
|
|
|
|
Re: ابراهيم الفراش صوت من بربر (Re: محمد صديق)
|
من رحلات ود الفراش الكثيرة بسبب العمل كساعي بريد
او رحلات للحبايب والصحاب ***رحلة الى كسلا
كَربِت يا جمل شايف لى نسوَّن
لابسات كيد فَقير جَنْفًس مَلوَّن
على كسلا ام تََقَاق كان ربَّى هوَّن
شَقَا المرَّاح على الفى الحوش مجوَّن
أم تقــاق : كسلا
مجوَّن: صعب المنال
*كترت الجفيل انا ايه عملَّك
قبيل مشغول دحين دابى انعدلَّك
سروبات الدقا وكتين بدنلَّك
بشوف ناس ستنا بيشرَّفن لك
من هندوب غرب شُفت الصَراية
بَشُم طيباً عَبَق مِسكَ الجَدايَة
بشوف ناساً سلامُن لى دَبَايَا
ترى البُنيان أهل نعمة وعرايا
صايــدني همّــكْ
متل نار العويش حارقني سمَّك
متين يا ديـفة الراتعات ألمِّك
وأجدِّع فوق جرايد إيــدي كمِّك
أمان يا الدهب صادفاني غية
تهرج في الضمير نيرانا حية
أكان مو خوف مديرنا أب خمسماية
بكمل باقي عمري مع البنية
انشغالة مع المحبوبة وغيابه فرض
عليه مديره 500 جلده
| |
|
|
|
|
|
|
|
|
|
Re: ابراهيم الفراش صوت من بربر (Re: عمر المهدى)
|
سلامات يا ناس
Quote: ما قلنا غير مسموح لاقل من 50 سنة
كان نفي الي جزيرة سرنديب
زي مافي كتاب الاساطير
نحن قلنا لو عاوزين درس خصوصي ماف مانع
والكوتش موجود ومعاهو درجة استاذ |
ود المهدى سلام ...
مش قلت ليك زى عبد الدائم دا بتتعب معاهو
مصطفى محمد الحسن عندو واحد صاحبو زى النضيف ده وكان عندهم
جلسات مسائبة بجى واحد كن ناسنا بتاعين البطانة ديل يقوم
ينم ليهم وزولك الزى النضيف يضحك...اها زولك بعد يتم النمة
يختما ليك بى هيييييييييع ويعاين للزول يقول ليه...
اهاااا آللخو شيتآ زى دا بتعرفو؟
| |
|
|
|
|
|
|
|
|
|
Re: ابراهيم الفراش صوت من بربر (Re: محمد صديق)
|
زاد تعلق الفراش بمعشوقته الدون لحق
وكثيرا مايتخيلها عروسته ولكن ممانعة
الاهل حالت دون زواجه منها ولكن لم تحل
من زيادة تعلقه وشغفه بهاويطنب في وصفها
مَاهَا امْ جَفَايِنْ
تَقُولْ بالحَدَبْ وَغَلاً بِعَايِنْ
شَبِيهةَ الدُونْ جِدَيةً بالعَسَايِنْ
خُدُودْ الدُونْ مِتِلْ عِنَبْ الجَنَايِنْ
وينشد متاثرا بمرضها
الدُونْ بَرِيَّه
فَوقْ الدُونْ لِحِقْ يَا ميرغَنِيَّه
أماسي الدُونْ ولا تَزْعَلْ عَليَّا
واصابحَ الدُون بَلاشْ العَسْكَرِيَّه
جِيبْ لَيْ مِتُونَا
نَامَتْ وانْتَكَتْ تَعْجِبْ عِيونَا
قِصَيبةَ المُرْنَيعَه الفي مُرُونَا
تَلِمْ الدُونْ عَلَيْ يَا وَدْ حِسُونَه
كانت رغبتة في الدون تغض مضجعه
وتصيبه بالحرقه والهموم
صَايدني هَمِكْ
مِتِلْ نَارْ العِوَيشْ حَارِقْنِي سِمِكْ
مِتَينْ يَا دَيفَةْ الرَاتْعَاتْ أَلِمِكْ
واجدعْ فوقْ جَرَايدْ إِيدِي كُمِكْ
ويشطح بخياله بعد الممات
يرى أنها ستكون معه بعد الحياة،
وستسكن معه القبر وتحميه من سؤال منكر ونكير!!
الدون إيَّاهَا دُوني
راحةْ بَدني نُوارةْ عِيوني
مُنْكَرو نكير ساعة يجوني
ويَلقُوا الدُون مَعاي ما بسألوني !!
يبقو لي رباعه يآنسوني(اصدقاء)
كما كانت أشواق الدون تهجس له في حله وترحاله
فعندما تبقيه دواعي العمل بعيداً عن الحبيبة يفر النوم من عينيه ويقول:
كُلْ مَا أدورْ أنُوم آخُدْ لِي هَجْعَه
أحِسْ بالليلْ كِلاي يَدَنِى وَجْعَه
بِعِدْنَا مِنْ البلدْ ونَجَعْنَا نَجْعَه
عَليْ البـُرَيبْ مِتَينْ يَا رَبِي رَجْعَه
وكان شاعرنا في مهمة عسكرية في منطقة كرري
لقي فيها مشقة وعنت فذكر الدون
أشْكِي عَليكْ يا مَولاي ضَرَرِي
حَشِيشْ القَشْ غَداي وعَشاي مَرَرِي
أقعْ في النيلْ أعومْ مابَرِدُو حَرَرِي
عَدِمت الدُون وجِيتْ قَابلتَ كَرَرِي
فيتضرع لله بوصال الدون ولقائها بعد هذه الشدة:
بالقُرآن سألتَكْ يا رَؤوفُو
ويَومْ الحَجَّه والناسْ البِطُوفُوا
بَرَكةَ الفَاتحَه والناسِ وحرُوفُو
أزورْ أب شله بيتْ الدُونْ أشُوفُو
وحدث ذات يوم أن لدغتها عقرب وفي ذلك قال:
جَاتْ الجَدايَه
تِتْبَكَى وتَقُولْ أنَا وَا رَدَايا
اتلومتَ فِي بالمرَه غَايَه
تَقرصِي حَبيبتي يا عَقْرَبَايَه
وقال:
جَاتْ العَقْرَبَاي اتعذرتْ لِي
قالتْ ما دَنيتْ لَها هِي الدَنتْ لِي
جِيتكْ يا لبِيبْ كَانْ تَرْضَى كَتْلِي
بَدُورْ الدُونْ أكانْ اشَفَعتْ لِي
ومازال في الدون بقية
| |
|
|
|
|
|
|
|
|
|
Re: ابراهيم الفراش صوت من بربر (Re: عمر المهدى)
|
سلامات يا ناس
Quote: صَايدني هَمِكْ
مِتِلْ نَارْ العِوَيشْ حَارِقْنِي سِمِكْ
مِتَينْ يَا دَيفَةْ الرَاتْعَاتْ أَلِمِكْ
واجدعْ فوقْ جَرَايدْ إِيدِي كُمِكْ |
ود المهدى الغنّاى ...سلام
انت عارف انا اليومين دى حايمة فى راسى
المقارنات والمشابهات...اها زولك ود الفراش
ده ذكرنى فى تشبيبو ده بى مجنون ليلى بالذات
فى شطحتو حقت القبر دى..
مستمتع جدآ
فى بوست عن الدوبيت والمجادعات والربط فى المنبر
العام ...بوست خطير وفيهو فطاحلة حتستمتع لو خشيتو.
| |
|
|
|
|
|
|
|
|
|
Re: ابراهيم الفراش صوت من بربر (Re: محمد صديق)
|
ازيكم يا الزقازيقاب من جم...وعساكم عافية...
نديكم من شعر جدكم الفراش...من بقايا الذاكرة القديمة
وعلي فكرة احفظ له شعرا...لا يمكن كتابته في المنتديات
الداير يسمعو يديني اضانو بس...
وبعدين الفراش لديه قدرة عجيبة علي استعمال كلمات من لهجات
اخري...في شعره...
كدي شوفو دي
طرقت الباب علي جضّن كلابا
تري ام كرّاب محكرا فوق سنابا
........................
تقول لي ايلامن قون داي ارابا
وعندو شعر كتير في (الدون) كتابته تحتاج الي عبارة (ممنوع اصطحاب
اقل من سن 25 للبورد)
| |
|
|
|
|
|
|
|
|
|
Re: ابراهيم الفراش صوت من بربر (Re: nazar hussien)
|
العزيز نزار
نور بيتنا
وشارع بيتنا يوم ماجيتنا
تسعدني مداخلتك واضافاتك عن ود الفراش
وعن النم الطاعم كما يقول الكوتش محمد صديق
والدون حبابه
ام شعرا متل وتر الربابه
يالفراش ابوي كان شف جعابا
تجرد المال تخلي الدار خرابه
ماعندك عوجة هنا كلو فوق 25 سنة
| |
|
|
|
|
|
|
|
|
|
Re: ابراهيم الفراش صوت من بربر (Re: nazar hussien)
|
ولف قصيده
عناق أم سومر الولدت فريده
تخنق الطنة ساعة اتوسد إيده
أموت بشوق ست الريد بعيده
ولف غناها :
عناق التيتل المفرود جناها
تطن تتخازز التيس إن دناها
العجب ياخوى أكان الزول لواها
سلبت لحمى خلت عضمى شيره
مابشقينى الشباب غير أم جبيره
من أيدى اليمين وشمال بديره
بقيت فى جلجلة وشيتا كتيره
| |
|
|
|
|
|
|
|
|
|
Re: ابراهيم الفراش صوت من بربر (Re: عمر المهدى)
|
خمسة شهور تمام والهل طوبة
روحي مشحتفة وياربي توبة
عبلوجة التري القلبت هبوبا
ردودة روحي أنا إن لافحه توبا
..............................
خمسة شهور تمام والهل سايق
روحي مشحتفة وأنا ماني فايق
ليج المشرق العند الشوايق
ردودة روحي أنا وكت أبق طايق
..............................
خمسة شهور قاعد أعاين
يبقن في نيران الغباين
لهيج الفي المحس جلب الزباين
ردودة روحي يا عنب الجناين
..............................
كربت يا جمل الليلة يومك
علي دغس العيون كارب شيومك
وكت الليل برد كترن همومك
أرح يا البارقدم ستك تلومك
العبلوجة :قصب حلو مثل قصب السكر
البارقدم :جمل ود الفراش
| |
|
|
|
|
|
|
|
|
|
الفرمالات (Re: عمر المهدى)
|
بسم الله الرحمن الرحيم السلام عليكم ورحمة الله وبركاته ود المهدي الله عليك حاجاتك من بيت الكلاوي ومداخلتك السابقة ذكرتني فرمالات الزقازيق وناس عاطف علي وزكي ودحقوق وسامية اسماعيل واسامه زراعة ومبارك جادين وكثر لكن الكتابة البلقطوها حرف حرف نجضتني
| |
|
|
|
|
|
|
|
|
|
Re: الفرمالات (Re: مشاعر بدوي)
|
سلامات يا ناس
Quote: كربت يا جمل الليلة يومك
علي دغس العيون كارب شيومك
وكت الليل برد كترن همومك
أرح يا البارقدم ستك تلومك
|
تعرف يا ود المهدى اهم حاجة تكون فى
ترجمة على الشريط...
هسة زى توتة دى شن عرَّفَا بى كَرْبِتْ ودغس العيون
والزولة ما قريبتى انا عارفا ليك تب..
وضحكت لما قالت الكلام طاعم ..على الطلاق ما فهمت اى حاجة
عشان كده الناس ديل ترجم ليهم ...او حولهم لى عبدالدايم الهمباتى اقصد النضيف.
تسلم يا حبيب.
| |
|
|
|
|
|
|
|
|
 Re: الفرمالات (Re: محمد صديق)
|
أماتك عزاز دايمن يصلن
ما شربن خمر زريعه بلن
جنيبة موس ب المزيقتو رتن
براطم الدون تقول كبدة حملن
مازال ود الفراش يمدح محبوبته الدون
بامهاتها المصليات ولا يشربن الخمر
ولا يصنعن المريسه(زريعه)
ويشبهها بمهرة موسى التي تتقافز مع الموسيقى
ويشبه لون شفايفه بكبدة الحملان
قريبا الخصام بين الدون وود الفراش
| |
|
|
|
|
|
|
|
|
|
Re: الفرمالات (Re: عمر المهدى)
|
قال الشاعر ود الفراش ،، يهجو معشوقته الدون بعد الخصام
كجنت بيتك وكجنت ضلو
كجنت وشك المتل ام بعلو
،،،،،،،،،،،،،،،،،،،،الو
اهو الفراش طفش بي جملوا كلو
****
بعد ما كنتي زينه ورزينه
بفاخر بيك بنات عرب الكنينة
كترت المساخة بقيتي شينة
تشبهي العشرة الوسط الجنينة
| |
|
|
|
|
|
|
| |
عمر المهدى
محمد صديق
عفاف علي ميرغني
أبوبكر حامد الأمين
عبد الدائم سيد أحمد
زهير الزناتي
nazar hussien
مشاعر بدوي
فيس بوك
تويتر
انستقرام
يوتيوب
بنتيريست