دعواتكم لزميلنا المفكر د.الباقر العفيف بالشفاء العاجل
|
|
 العام 2009 أهم الاحداث الزقازيقية العامة ، والشخصية لكافة الزقازيقيين
|
الاخوات العزيزات بنات الزقازيق
الاخوان الاعزاء ابناء الزقازيق
السلام عليكم ورحمة الله وبركاته ،،،
وكل عام وأنتم بخير والف عافية وربنا يحقق امانيكم جميعا انشاء الله
هذا البوست لنسجل فيه أهم الاحداث الزقازيقية التى تمت بيننا كزملاء
على الاطار الرسمي
وعلى الاطار الشخصي
الغرض من البوست هو الشخبته على جدار الذاكرة
حتى يمكن الرجوع يوما ما الى هذا البوست بإعتباره ملخصا لعام مضى
الاجتماعات الزقازيقيةالرسمية تعبتر حدث مهم في عام 2009
الزيارات العائلية بين أحباء الماضي الزقازيقيين تعتبر حدثا مهما في عام 2009 وانا هنا أسجل أول حدث في هذا البوست
زارني الاخ محمد ( حاج الركز ) والاخت عفاف في عيد الاضحي الماضي في بيتي
وكانت زيارتهم أجمل مفاجأة لي في العيد الفات
والحدث الزقازيقي المهم عندي في العام الماضي هو تجديد باسووردي مرة اخرى والشكر مرة اخرى هنا للاخ زهير الزناتي
منصور عبد الرازق يفترض يدخل ويسجل زيارة العيد لجده ومقابلة الاحباب هناك
لمة ناس الرياض الاخيرة ودي المفروض يكتب عنها المجموعة اللي رتبت لليوم الحلو ده
لمات ناس السودان الكثيرة في السنة الماضية
الولدلوهو ولد والله بت يجسلو لينا هنا
الاتنقل من مدينة لمدينة أو من بلد لبلد يسجل لينا هنا برضو
والاعضاء الجدد في البوست الانضمو للبوست خلال عام 2009
خلاص فهمتو الفكرة صح ؟
يا الله خشو وادونا ملخص السنة الفاتت
|
|
 
|
|
|
|
|
|
|
|
Re: العام 2009 أهم الاحداث الزقازيقية العامة ، والشخصية لكافة الزقازيقيين (Re: محمد صديق)
|
يا شادينا والله عام 2009م ده من أسواء الأعوام المرت علي الزول في حياته بس ما أسواءها ... سنة ثقيلة الله لا عادها ... ولا رجعها ده علي المستوي الخاص والعام ... رغم إنه فيها بعض الإشراقات التي لولاها لكان عامنا مثل عام المريخ المنصرم ،، وأخدناها سيك ... كل عام نتفاءل بالعام الجديد ... عسي ولعل يكون أفضل من سابقه ... حتي علي مستوي الجمعية كان أقل الأعوام نشاطاً للجمعية ... وإذا قلنا نقعد نعمل جرد حساب للعام المنصرم ، سنصاب بالإكتئاب .. آسف لهذه المداخلة السوداوية ولكنها الحقيقة التي أود أن اودع بها هذا العام ... ولا زلنا نتجوس منه خيفة فيما تبقي به من أيام معدودات رغم قلتها ....
| |
|
|
|
|
|
|
|
|
Re: العام 2009 أهم الاحداث الزقازيقية العامة ، والشخصية لكافة الزقازيقيين (Re: زهير الزناتي)
|
العزيز محمد صديق مبروك لمتك الاسفيرية مع كل الزقازيقيين في عام 2009
وحجة فارح
بكل المقاييس تعتبر حدث في عام 2009
سواء بالنسبة لفارح
أو للمتابعين
أنا عايز اعرف الزول صايم معانا عاشوراء
والله خلانا صمنا وزاغ
الحبيب زهير الزناتي
الولد مجد
( والله غيرتو الاسم )
كان اهم حدث في 2008
أعتبر خطوات مجد في الحياة تعتبر أهم حدث في 2009
سواء في اسرة الزناتي والله في حياتنا كلنا
انت عارف زناتي
زمان قبل ما اتزوج لمن كنت امشي في السوق مع امي
تقول لي الله لا يرحرمك من الاطفال
لاني طول ما انا ماشي اشاغل في الاطفال وابوس فيهم
الله يخليك ليك ولدك مجد
وكل اولادك
يا الحبيب
عارف كنا في شقة كيمولاند
انا وميسرة
كان في واحد مصري ساكن قدامنا
لمن يجونو ضيوف اطلعهم البلكونة اقوليهم اعرفكم بي بنتي
هي طبعا بنت جارنا المصري
لكن حاجة تخلي الدنيا تضحك وتبتسم زي ولدك مجد كده
وكنت مسميها مرافيء
عليك الله عايزك تقعد وتحسب لينا كم حدث جميل في 2009 وما عيزين نقفل السنة وأنت فاهم انها بايخه
| |
|
|
|
|
|
|
|
|
|
Re: العام 2009 أهم الاحداث الزقازيقية العامة ، والشخصية لكافة الزقازيقيين (Re: أبوبكر حامد الأمين)
|
الاخ كمال الشادى
لك الشكر والتقدير على اتاحة الفرصة لعمل جرد حساب لاحداث العام
نظراً لايقاع الساعة السريع سنجد ان هناك الكثير من الاحداث الجميلة التى مرت ولم نلاحظها
وعلى قول ابوبكر ادينا فرصة كلنا نقلب الدفاتر ونجيك راجعين .
عزيزنا الزناتى
شايفه المود بتاعك ما كويس سحروك ولا شنو
سبقنى اخونا الشادى وقال ليك مجد وشقاوته وضحكته يعتبر انجاز
وجود بهجة البهجة الى جانبك خلال العام يعتبر انجاز
عزيزنا وذى ما بقولو انظر الى النصف الممتلى من الكوب
| |
|
|
|
|
|
|
|
|
|
Re: العام 2009 أهم الاحداث الزقازيقية العامة ، والشخصية لكافة الزقازيقيين (Re: زهير الزناتي)
|
سلامات ياشادي كل سنه وانتوا طيبين
والله الفكره حلوه على الاقل نعرف اخبار بعض
ابوبكر الامين ومحمد صديق ومشاعر اطمانينا عليكم باين عليكم تمام ان شاء الله دائما
زهير ياالغالي نجمع اي فرح ولو قليل عند اي زول ونرسلو ليك على قول الشادي كفايه ضحكات مجد واخواتو
وعلى قول مشاعر ام مجد الغاليه جنبك ولمتنا بعد السنين دي كلها كميه من ناس الزقازيق اجتمعت وحققتوا الهدف ياناس دهب وزهير والنضيف واتمنى انو نكون مع بعض ونوقف مع بعض دائما وانت اكبر من كل الهموم
عني السنه دي كانت سنة الاشياء الكبيره انتقلت من جده لكندا وفارقت احبتي في المملكه وكان يفصلني عن اهلي واحبابي بحر واحد كلما زاد بي الشوق عبرتو مسرعه لدار الاحباء صارت تفصلني عنهم البحار والمحيطات امي الحبيبه وكانما احست ببعدي عنها فاختارت الرحيل
شفت اختك صنديده كيف يازهير
احلى حاجه كانت وقفة الناس معاي في احرج مواقف حياتي وناس الزقازيق الغاليين ماقصروا ربنا مايحرمنا منهم اتى مسرعا للعزاء زهير وعثمان الجيلي واسرهم وخديجه احمد التوم واتصل علي الكثيرون وفي بورد الزقازيق كان العزاء كبيرا اقول ليهم مشكورين من باب الزوق وليس من باب الواجب لانو دا واجبهم
انت ياشادي على قول المصريين بتشتري مابتبعشي
| |
|
|
|
|
|
|
|
|
|
Re: العام 2009 أهم الاحداث الزقازيقية العامة ، والشخصية لكافة الزقازيقيين (Re: حنان مجمر)
|
الاخت العزيزة مشاعر بدوي
لك الود مصول يبراك وينهي ليك السنة كأحلى ما يكون
ويقدمك ويوصلك للسنة الجاية والبعدها ومليون سنة من الفرح انشاء الله
يا لله يدك معاي نرفع معنويات التعبان الاسمو زهير الزناتي ده
على قول مصطفي ( نشيل كتف الغنا الميل )
ما قلتي لينا يا مشاعر اية محطة أو محطات ليك في سنة 2009
عايزين نعرف أية اخبار عنك
يا الله أحكي
انا راجيك
انا باقي بحب الحكي وسماع جدا
سماع يعني مستمع جيد
تحياتي
الاخت الغالية
وصديقة الايام الجميلة حنان المجر عيسي
لك الود
والله يا حنو عارفا الايام دي درجة الحرارة في الرياض حاجة بتاعة كم طاشر كده
واخوك بريد جدا
بريد يعني بيبرد مع أول نسمة برد
افكر انتو عاملين كيف يا الراقدين تحت
المحيط المتجمد الشمالي
معلعون ابوظروفنا الخلت الناس تتشتت في كل اركان الكرة الارضية
فرحت إنو نقلتك الي كند من جده كانت حاجة إيجابية
الله يزيدك وزوجك واسرتك كلها نجاح كمان وكمان انشاء الله
أشكر بإسمك عصام دهب والمهندس بكري
اللي خلونا بعد الله نقدر نتواصل مع احبابنا في آخر الكرة الارضية
تحاتي لكل اسرتك
وكلمينا شوية عن البرد الايام دي في تورنتو
| |
|
|
|
|
|
|
|
|
|
Re: العام 2009 أهم الاحداث الزقازيقية العامة ، والشخصية لكافة الزقازيقيين (Re: كمال الشادي)
|
حتى لا تنتقل حمى التشاؤم التي يبثها سرا وعلنا الزميل زهير الزناتي
اردت أن اهرب منه باللجوء الى بعض اركان الضحك في النت
فوجدت مجموعة جميلة من النكت السودانية
ارجو ان تضيف البهجة ألى آخر لحظات العام 2009
----
قالوا سوداني ومصري بيسطلوا السوداني قال للمصري تعرف والله الدنيا دى كلها مآسى المصري قال ليهو: هو انت ماسك قد ايه؟؟
واحد بسأل مسطول قال ليه حدائق 6 ابريل وين؟
المسطول قعد يفكر!!!
حدائق 6 ابريل 6ابريل 6ابيييييريل ما قالو ليك فى ياتو سنه؟؟؟؟؟
مسطول يشرب الدواء قبل مواعيدو سألوه ليه بتعمل كده؟
قال عشان افاجئ الجراثيم!!!!!!
وحدة فرنسية إسمها ليزا ..
ووحدة إنجليزية إسمها اليزابيث
ووحدة سودانية إسمها أم محمد
الثلاث زهقن من شغل البيت والطبخ والكنس فإتفقوا يعملون إضراب ويخلوا أزواجهم يشتغلون بدالهم وبعد إسبوع يتقابلون وكل وحدة تقول وش صار لها
وبعد أسبوع
قالت ليزا الفرنسية أنا قلت لزوجي من اليوم مافيه كنس ولا طبخ ولا كوي .. أنا زهقت من الشغل وشوف لك حل!!!
طبعا بالفرنسي قالتها طبعا
مر يوم وماشفت شى
وثاني يوم برضو
ماشفت شى
وثالث يوم لقيت زوجي قايم الصبح بدري ومجهز الفطور والشاي وجابه لي في السرير وأنا نايمة وبعدين راح شغله
اما البريطانية اليزابيث ردت وقالت: وأنا بعد قلت لزوجي أنا من اليوم مانيب كانسه ولا طابخه ولا كاويه في هالبيت بالانقليزي طبعا
أول يوم ماشفت شى
وثاني يوم برضو
ماشفت شى
لكن في اليوم الثالث لقيت زوجي رايح وإشترى كل الطلبات الي كنت ابيها في البيت وبعدها قام نظف البيت كله وكل شئ صار تمام التمام
أم محمد جاء دورها في الحكي فقالت: أنا رحت بعد ماتركتكم وقلت لزوجي إسمع يابو محمد أنا زهقت من شغل البيت وإعمل حسابك أنا من بكرة لا كانسه ولا طابخه ولا كاويه
وبصراحة
أول يوم ماشفت شى
وثاني يوم ماشفت شى
وثالت يوم برضو
ماشفت شى
والحمد لله رابع يوم بعد مافتحت قدرت أشوف شوي بعيني الشمال
مسطول دافن نصه في الارض عشان داير يمثل فديو كليب انا عايش ومش عايش
رباطابي عنده فرن جاهو مسكين قال ليهو ( لي يومين ما ضقت طعم الرغيف ) الرباطابي قال ليهو : ( ياهو طعمو زاتو ما اتغير )
واحد مسطول راكب امجاد ركب جنبه واحد شايل فرشة بوهية وفرشة نقاشة ,و المسطول ساله قاليهو ؛ انتا شغال شنو ؟ الراجل قاليهو ؛ شغال نقاش ,, المسطول قاليهو ؛ طيب انقشنى انا منو ؟
قال ليك مسطول ماشى فى الشارع لاقاهو واحد المسطول قال ليهو عليك الله ادينى الفين افطر بيهن قال ليهو آسف والله ما عندى المسطول قال ليهو خلاص الف قال ليهو آسف والله ما عندى قال ليهو طيب جيب سيجاره قال ليهو آسف والله ما عندى المسطول قال ليهو انت شغال شنو ياابوالشباب قال ليهو شغال استاذ قام قعد ليهو فى الواطه ومسح ليهو التراب وقال ليهو طيب ادينى إملاء
قال ليك واحد دخل قرية الرباطاب وفي طرف الحلة كده
لقي لية واحد صغير قام سألة اسمع عندكم موية
قام قال لية نان شجرنة ده قايم بي التيمم
غراب مسطول جالس في شجرة بياكل في قطعة جبنة الثعلب وقف تحت الشجرة وقال ليهو غني لينا ياغراب الغراب طلع الجبنة وختاها جنبو في الشجرة وقال للثعلب انت قايلني غراب سنة رابعة العوير الزمان داك
| |
|
|
|
|
|
|
| |
كمال الشادي
محمد صديق
زهير الزناتي
أبوبكر حامد الأمين
مشاعر بدوي
حنان مجمر
عفاف علي ميرغني
سامي عبد الوهاب إدريس
فيس بوك
تويتر
انستقرام
يوتيوب
بنتيريست