|
دعواتكم لزميلنا المفكر د.الباقر العفيف بالشفاء العاجل
|
|
 Re: طاااااااااااااعم ... والحمد لله !!! (Re: موسي عيسي)
|
Quote: و الله الخايفين منو انه في واحد يكون دخل الصف !
الله يستر !! |
ياولدنا والله الدخلوا الصف كتار لكن عاملين حميل
نحن بس لسانا متبري مننا ساكت
----
لكن والله ياموسي اكتر حاجة هارياني الشاي المسيخ دا ياخ
كعب ياخي ...
| |
 
|
|
|
|
|
|
|
|
Re: طاااااااااااااعم ... والحمد لله !!! (Re: جلال عثمان)
|
Quote: أول مرة في حياتي
أشوف لي زول بيهضرب بالنهار
و كمان صاحي
كفيل ما شايف شغلو
حقو ما يدوهو تصريح عمل |
ياولدنا خليك حريف ياخ ...
طبعاً اخوك الايامات دي آخر دلع
والكفيل مستلموا ليك استلام جد
اي عنكبة شنكبة .... آخد بعضي وأتخارج
الزول دا مشى وين ... والله مشى المستشفي عندو "تيست"
-------
بعدين احسن ليك تتصلح معانا...
اسا الواحد يزيد ليك السكر
| |
|
|
|
|
|
|
|
|
|
Re: طاااااااااااااعم ... والحمد لله !!! (Re: جلال عثمان)
|
يا صحبي كل الشباب المغتربين ديل ضاربهم الضاربك بس
سردب ساي و سؤالك بهناك عن ناس الخبرة و كده و الله
جماعتك ديل كلهم خبرة بس عليك اقع عند ود جبريلا و
الله عينك ما تشوف إلا النور جنس هضربه هي و الله عندو
ليهو بوستات بهناك فيها جنس شي الله لا وراك بس جلا دا
فك دربو بزيد ليك الانجمامه حقتك دي و العجب العزابة
الزينا ديل الله والرسول تبراهم ، ما زمان لمنا نشوف
لينا كداحة بنقول الرسول معانا ما تغشاناك بس ياها !
يا صحبي الله يفكها ساي كدي قوم اعمل ليك رنه رنتين للحاجات
القديمة ديك و الله تلقي نفسك شديت ؟ و بعدين كلمني بالحاصل!
| |
|
|
|
|
|
|
|
|
Re: طاااااااااااااعم ... والحمد لله !!! (Re: جلال عثمان)
|
يا جلال أول حاجة نسأل الله أن يشفيك و يعافيك...
و الله ذكرتني بي جماعة جيرانا في أركويت...
مرة عاملين حفلة راااابة الساوند سيستم بتاعها يجيب الطاشي...و جايبين فيها ولد من أولاد أركويت زمان حاول يلعب كورة ما ظبطت معاهو قام بقى فنان...رابط ليك البنطلون في نص بطنو و مجلط ليك الشعر و مطلع ليهو خصلة زي بتاعت مايكل جاكسون...كنت عايز أقول ليك المرحوم مايكل جاكسون خفت يجي واحد ناطي لي في حلقي...و واحد ود جيرانا بيعزف ليهو في الأورغن...لحدي قبل شهرين من الحفلة بس كان بيعزف عازة في هواك...حسة ما شاء الله عليهو بقى يعزف غناء الكاشف كلو و بي لحن واحد...يعني 6X1 ...المعنى ستة أغاني بي لحن واحد...و يجي الولد أبو شعر مجلط و خصلة مايكل جاكسون (بدون مرحوم) يغني ليك...وحاتك الأورغن في جهة و الفنان في جهة...الساوند سيستم زاتو اتحير..يركز مع منو...
المهم الحفلة كااااربة و الساوند سيستم يجيب الطاشي...تسأل الجماعة يا جماعة المناسبة شنو....
يقولو ليك و الله الليلة ناصر جاب قون في الرابطة الليلة...
أنا من قبيل شايف البوست و قلت حسه أنا مشغول بفتحو بعدين... و جيت فتحتو حسه...لقيتك يا جلال زي ناصر جبت قون في الرابطة...يا زول الجرسة العليك شنو...ما تركز سااااااكت...
| |
|
|
|
|
|
|
|
|
|
Re: طاااااااااااااعم ... والحمد لله !!! (Re: الرشيد بابكر)
|
يا حليلك يا صاحبى
وصلت الميس
طوبة ما تعتر ليك
ولا يهمك , الطعامة للطاعمين
وحاة الله مرض ساااااهل ولذيذ , يشبهك فى الطعامة جنس شبه
انا من زماااان , اقول الزول ده , الطعامة دى جايبها من وين ؟؟؟
ما تاكلش سمك ولا بيض
اتارى شايل عكاكيزك وحايم ليك يومين
يا ود يا سكر انت
قالوا عليهو صديق صاحبه , انت العب عليهو واعمل صاحبه كمان
نحن غايتو , ناس ضغط ساااااى
| |
|
|
|
|
|
|
|
|
|
Re: طاااااااااااااعم ... والحمد لله !!! (Re: منصور عبد الرازق)
|
يا ابو الجل والله هاردلك والف كفارة وحقيقي السكري ما بيشبهك ... إلا إنك طاعم .... بس عحبني إنك إتعاملت مع المسألة بسخرية تخلي الزول يقابل المرض بشجاعة ... والدي الله يرحمه زول جاهو السكري من فترة طويلة جداً يعني قبل ما يلدزنا... بس كان راجل حريص جداً ... وعامل حسابه وشغال بالكتاب ... دي ما بتنفع مع السكري خلاص ما تنفع وهكذا ... وعاش إلا أن بلغ السبعين من عمره دون أن يشكو من مضاعفات السكر ... رغم إنه العناية الطبية لم تكن كما الآن ... ولم تظهر الأغذية الدايت حتي ... المهم يا زول السكري ده ما عنده علاقة بالعمر عشان كده ما تشيل هم في النقطة دي ... وسامي عبد الوهاب عنده تجربة كبيرة جداً مع السكري وكان عنده بوست مميز في المنبر العام عنه ... ليته يأتي ويدلو بدلوه ... مع صادق أمنياتي أن يكون الأمر عارضاً ... يعني زي سكري الحمل كده ... طبعاً يا أبو الجل بالتأكيد مع الفارق في المقارنة وكده ...
| |
|
|
|
|
|
|
|
|
|
Re: طاااااااااااااعم ... والحمد لله !!! (Re: زهير الزناتي)
|
| Quote: يا صحبي كل الشباب المغتربين ديل ضاربهم الضاربك بس |
والله الله يطمنك يا ابو عهود ... يعني نسردب بس
الجماعة ديل كلهم لابتين ساكت ...
غايتو الواحد بقى يمشى وغازي عينو في الواطة خوفا من شوكة بس تطعنوا
-----
الز حاجة الوالد ضرب لي تلفون قال لي:
ياولد بطل الدلع اسا انا ما خليتك سمين سكري شنو
| |
|
|
|
|
|
|
|
|
|
Re: طاااااااااااااعم ... والحمد لله !!! (Re: جلال عثمان)
|
Quote: يا جلال أول حاجة نسأل الله أن يشفيك و يعافيك...
|
رشيد يا حبيب ...
دعواتكم جزء اصيل من العلاج فلا تنسونا من صالح الدعاء
بعدين انت في القون الجبتو في الرابطة ولا هاك دي ...
زمان جيرانا في سنار ومجاراة للتقليع السائد حينها ...
عملوا "بارتي" عشان "غنمايتهم" جابت تيمان
يديك العافية ضحكتني بالوصف ...
صاحبي طارق سخانة الله يطراهو بالخير زمان لما تقشر قشرة زي دي
وتشك البنطلون زي زولك ده يقول ليك مالك الليلة "غرقان كدة في البنطلون دا"
| |
|
|
|
|
|
|
|
|
|
Re: طاااااااااااااعم ... والحمد لله !!! (Re: جلال عثمان)
|
Quote: قالوا عليهو صديق صاحبه , انت العب عليهو واعمل صاحبه كمان
نحن غايتو , ناس ضغط ساااااى |
منص ياحبيب ...
عارف زمان قوني الجبتو في تجارة (دوري الخريج) داك من قريب راية الكونر
ما كان باللفت رغم انو انا كنت بلعب رايت بس
لكن لما تكون بتلعب بالاتنين دا الفلم زاتو ...
انت قايل ضمونا للنادي الملكي كيف ياحبيب
انعل ابو الحرفنة زاتو ....
قال ليك ستة حبات في اليوم
2 ضغط - سكري - قاوت - كلسترول - اسبرين
| |
|
|
|
|
|
|
|
|
|
Re: طاااااااااااااعم ... والحمد لله !!! (Re: جلال عثمان)
|
| Quote: يا ابو الجل والله هاردلك والف كفارة وحقيقي السكري ما بيشبهك |
ابو الزوز ... يديك العافية
يعلم الله مشتهنك عديل كدة ....
عارف يا ابو الزوز اخوك بموت في حاجة اسمها واقعية ولازم الزول يواجه كل اموروا بواقعية ... عشان كدة واقع الامر علي كان واقعي جدا شنو يعني سكري ما عادي ....
زهير السطرين ديل فطهم ياخي ... هضربة ساكت ...
بس عارف "ورحمة الله على الوالد" ديل كانوا ناس تانيين ياخ قمة في كل حاجة ... في تربيتهم واخلاقهم وحتى في مواجهتهم للمرض ... وامورهم كلها... اما الجيل الحالي فنحمد الله ان عشنا لنسمع بالكلسترول وما اليه من امراض تشيب لها الولدان.
وفي انتظار حبيبنا سامي لشرح تجربته مع ابو "السا" ده
ومع تقديري لامنياتك الصادقة بس الشغلة دي "سيك ... سيك ... معلق فيك" وليست عارضة كما اشرتم وتفضلتم
رغم انو انت عارف كان بقت عارضة جنس عروضك دا اخير لينا .... السيك حقتنا دي
| |
|
|
|
|
|
|
|
|
|
Re: طاااااااااااااعم ... والحمد لله !!! (Re: جلال عثمان)
|
Quote: ياجلال كفارة
حسنة واجر
ياخي الحلوين كتار
|
عمرنا ياحـــلو ...
يازول والله هامينا لمن هامينا زاتو ...
عارف امس بالليل معاي الشفع وامهم قلنا نتمشى شوية
الشفع قالوا عاوزين سندوتشات شاورمة....
اها اخوك زهجان من حكاية عاوزين ... عاوزين دي
طوالي قلت ليهم لا بتعمل سكري ... فما كان من امهم الا ان ماتت من الضحك
يازول الموية دي بقينا نضوقها اول شيئ قبل نشربها
| |
|
|
|
|
|
|
|
|
|
Re: طاااااااااااااعم ... والحمد لله !!! (Re: جلال عثمان)
|
ياجلال لاتكبرها وهي صغيرة
كفاية الاكل الاكلناة والشراب
الشربناه واحكي لك قصه
واحد بلدينا مشي كشف طلع عنده
اتصل علي ولد اخته وقال ليه
انا جاني سكري
فقال ليه ياخال ماورطنا
قاله ليه
عشان تاني لو سطت الموية بالعود
مانقدر نقول ليك حاجه ومرة كان
متعشي معانا وكان في باسطة
قلنا ليه شيل حبة واحدة
خمش لية تلاتة وقال الحبة كبيرة
كدة ليه قلنا له البس النظارة ديل تلاتة
وبقول ليك الطفاسة ماحلوة
لكن ماتحرم نفسك
بعد شوية ماحايكون عندك فرق من الباقين
مبدئيا اخد حبوب تنظيم فقط وحافظ
| |
|
|
|
|
|
|
|
|
|
Re: طاااااااااااااعم ... والحمد لله !!! (Re: جلال عثمان)
|
ابو الجل يا حبيب ..
كفارة والف سلامة ... والطعامة من غير سكرى هى طبعك
ربنا يجعله ليك اوفى صديق زى ما يقولوا .. لا بيحسد ولا بيغدر
المهمم تصاحبه كويس وتمشى وراهو .. يمين ... شمال انت وراهو
سيبك من جريات سادومبا والهوبا حقت ولدنا ...
بعدين السكرى بعد الاربعين لا يعتبر سكر مرضى .. وانما سكر كبر ساكت
يعنى بكل سهولة تتعايش معاهو ... الا اذا داير تعمل صغيّر وما زلت فى ريعان الهناى داك ..
واهم شى تســعى ليك حذاء طبى واوعى المراكيب ام مسامير ... وتكتـّر من اكل ثمرة القورو
ولو مافى فى الرياض قول لينا وبنرسلها ليك من جده ...
جميل وظريف وحلو زى السكر ... مين زيك يا عم ..
ايه الطعااامة دى ..؟
| |
|
|
|
|
|
|
|
|
|
Re: طاااااااااااااعم ... والحمد لله !!! (Re: محمد عيد)
|
سلامات يا ناس
ابو الجل ..او جلة ...او جلجل...شايف كم لقب يا حبيب؟؟؟
اها اول تبادى كترة الالقاب دليل على الطعامة.نسأل الله لك
العافية وحسن التعايش مع البتاع ده...بعدين البتاع بتاع
بعد الاربعين ده مسيخ...يعنى انت ممكن نعدل عنوان البوست
الى مسيخ والحمدلله..وده ما بيقلل من كون انك طاااااااااعم
تأصيل البتاع يبدو لى راجع اولآ لى طعامتك الشخصية اللهى
شقيقة بطاقتك الشخصية والمؤكد انك حتعمل ليها شهادة فقدان
لما تجى السودان...( عندنا صاحبنا فى البوليص اسمو عوض مفتاح
بتاع آداب داك ممكن نخليهو يساعدك لاستخراج بدل فاقد) كنا بنقول شنو؟
ايوه التأصيل : نمرة واحد قلنا طعامتك نمرة اتنين انت شكلك متابع ومستمتع
بكتابات وتشبيهات الكوتش الطاااااااااعمة لامن جاتك فى حنانك....
كامل تضامنى معك فى المسيخ حقك ده..
| Quote: ما تاكلش سمك ولا بيض |
زى ده حاسد...جلا ممكن يجى يأكد ليك انو الزول ده حاسد...نمرة واحد ما دايرك
لما تجى السودان تستمتع بى سمك عوضية...نمرة اتنين السمك من الحاجات البوصو بيها
الناس البجيهم البتاع ده...ونمرة تلاتة والاهم مادايرك تجك بعد تلهط السمك والجكة
طبعآ حتحرق ليك كم سعرة حرارية كده وخاصة انها جكة فى شارع الموردة وفى الظلط
الحار داك والشمش المولعة ديك فى عز الصيف لانو فطور زهير بيكون الساعة واحدة...
شكلها دى اطول مداخلة اعملا من ادونى الباصويردى دا...يكون الخبر دا عمل لى نفسيات؟
جلال ...مساءات الصحة والعافية.
| |
|
|
|
|
|
|
|
|
|
Re: طاااااااااااااعم ... والحمد لله !!! (Re: جلال عثمان)
|
كمنداننا يا كوتش
كنت عاوز اقول جورج لكن خفتك تسبقني في الالقاب
لكن الطعامة ما بتلحقني فيها رغم انك ابوالطعامة وصاحب الحق الحصري
ومن حيث المتابعة اها بعد البتاع دا تاني شوف ليك زول يقراء ليك طعامتك دي
بعد ما سوتها فينا ...
اما حسادة منصور بتاعت السمك ديك، ياخ منصور دا جلا بكون فاهمو غلط
منصور دا بكون خايف لى من العطش مش قالوا السمك بعطش ....
بعدين وحاتك نحن نصل شارع الموردة دا ياحبيب اول حاجة تعملا "تقفل الموبايل"
وماتفتحوا الا تاني يوم والحجج راقدة ... تشوف براك لما نجيكم بس ماتكلم زول
قال جكة قال... وحاتك نحن في البلد دي نفسنا انقطع رسمي كل يوم جكة جكتين ...
تقول نحنا في معسكر الفريق القومي
| |
|
|
|
|
|
|
|
|
|
Re: طاااااااااااااعم ... والحمد لله !!! (Re: جلال عثمان)
|
سلامات يا ناس
| Quote: لكن الطعامة ما بتلحقني فيها رغم انك ابوالطعامة |
جلجل يا حبيب ...صباح كامل الطعامة
تعرف اول مرة اشوف الطاعم ده ...كان عند عوض المفتاح ..انا كنت طاشى زماااان
فى الولايات وجيت مرة مستشفى الشرطة...شفت ليك عوض ده هناك..قلت ياربى
الزول ده مالو...كان كملان من لحم الدنيا...وبعد داك انا اتبلمت وما قدرت اقول
حاجة ..وهو شرح لى وقال لى ياخى انا جانى الطاعم...ما تتخيل انا كنت حزين كبف
ولزمن طويل انا كنت شايل همو...وهسة والحمد لله هو مخاويو وامورو تمام...لو انا
قلت ليه عن طعامتك دى حيقول ليك عليك بالسمك..( الخالى من منصور)
وصباحات الصحة والعافية
| |
|
|
|
|
|
|
|
|
|
Re: طاااااااااااااعم ... والحمد لله !!! (Re: عبد الدائم سيد أحمد)
|
جلجل
سلامات وما تشوف شر إن شاء الله
وأول حاجة هاك دي:
ألهم رب العرش...
أذهب البأس واشفه شفاءا لا يغادر سقما...
ربنا الذي في السماء عرشه ، ربنا الذي في السماء تقدس اسمه، أمرك ماض في السماء والأرض ، وكما رحمتك في السماء ،فاجعلها في الأرض، اغفر لنا ذنوبنا وخطايانا، إنك أنت الغفور الرحيم ، اللهم أنزل رحمة من رحمتك ، وشفاء من شفائك ، على ما بصلاح من وجع .
| |
|
|
|
|
|
|
|
|
|
Re: طاااااااااااااعم ... والحمد لله !!! (Re: سامي عبد الوهاب إدريس)
|
ثانيا : وزي ما قال ليك زهير أنا كنت فتحت بوست قبل كدا عن السكري نتيجة معرفة تراكمية بسب إصابة زوجتي وإبني بهذا المرض
عنوان البوست: مرض السكر... المختصين والمهتمين... لنتبادل المعرفة
وهذه كانت البداية:
Quote: ما هو مرض السكر؟
هو مرض يصبح فيه دم المريض (وبوله) محتويان على كميات زائدة من سكر (الجلوكوز) مما يسبب للمريض عدد من الأعراض والمضاعفات إن لم يعالج، ويمكن أن يصيب الكبار والصغار.
عندما نتناول الطعام يهضمه الجسم في الأمعاء ويتكون في النهاية سكر العنب (الجلكوز) الذي تمتصه الخلايا المبطنة لجدار الأمعاء الدقيقة، ومنها يتسرب إلى مجرى الدم ويساعد هرمون الأنسولين * الذي تفرزه غدة البنكرياس على دخول السكر من الدم إلى خلايا الجسم للاستفادة منه وإذا حصل هناك خلل في غدة البنكرياس ينتج عن ذلك نقص في الأنسولين وبالتالي يفقد الجسم قدرته على استهلاك السكر ثم ترتفع نسبته في الدم ويتسرب في البول وبسبب ذلك يعاني المريض من كثرة التبول والعطش ونقص الوزن وضعف عام هذا إلى جانب عدد آخر من المضاعفات وإذا استمرت الحالة دون علاج فإنها قد تتطور إلى غيبـوبة عميقـة .
* الإنسولين هو هرمون تفرزه خلايا بيتا في البنكرياس ويُطرح في الدم, ويعمل هذا الهرمون على الحفاظ علىى مستوى طبيعي للسكر في الدم. ويؤدي وظيفته من خلال الإلتصاق بمستقبلات الأنسولين في الخلايا لفتح معابر لدخول السكر إلى الخلايا (إمتصاص السكر) للإستفادة منه في العمليات الحيوية وإنتاج الطاقة.
____________________________
هناك نوعان من السكر وكلاهما يعوق التمثيل الغذائى للسكر والكاربوهيدرات فى الجسم ويؤثران على الطاقة الكلية للمريض. النوع الأول من السكر هو أن يفرز الجسم كمية قليلة من الإنسولين أو لا يفرز إنسولين على الإطلاق، وهذا النوع من السكر يصيب عادةً الأطفال والشباب أقل من 30 سنة. هذه الحالة تستدعى استخدام جرعات من الإنسولين للحفاظ على المستوى الطبيعى للسكر فى الدم، ويطلق على هذا النوع سكر الأطفال أو (النوع الأول). (النوع الثانى) من السكر يصيب الأشخاص الأكبر سناً وقد لا يحتاج لأخذ إنسولين وكثيراً ما يمكن تنظيمه عن طريق التغذية المناسبة، ممارسة الرياضة، وتناول الأدوية عن طريق الفم.
|
| |
|
|
|
|
|
|
|
|
|
Re: طاااااااااااااعم ... والحمد لله !!! (Re: سامي عبد الوهاب إدريس)
|
اها سامى ده جاك بالكلام النجيض
كلام ناس جلا والكمندان ده , اديهو ضهرك ساااى
هم بس جاريين لى جكتى العاجباهم دى
هم ما عارفين انو شعارنا (من جكنا ليس منا ) ولا شنو
يمينا بالله يا ابو الجا , لمن تشوف طعامة وليد سامى داك , لمن انت بى جلالة قدرك ده تبقى امسخ من (المرشح داك )
ما شاء الله عليهو وليد سامى , وكمان بنية شيخو , خلوهو ليك يذاكر الأحياء من اول جديد
انا شخصيا , الطعامة دى عندنا رااااقدة , امى كانت اطعم زول فى الدنيا دى الله يرحمها , واخوى حجازى الله يرحمه كمان
واخوى الأصغر منى واختى الأكبر منى كمان
لكن نحن بقينا ناس (ملح سااااااى )
لو بقيت فى الخيار بين عدم الملح وعدم السكر
احمد الله ساااااى , عدم الملح كعب كعوبية
لكن عارف , دى مشكلة الناس بعد الأربعين
انا غايتو لمن اصل الحتة دى , اساسا ما بشترى لا ملح ولا سكر
غايتو , ياها كلها زى عشرة سنوات كدة , الواحديتم الأربعين وبعديها يقدر يحكم
قلت لى صايم كم , وفاطر كم ؟؟؟؟!!!
اسمع اى حاجة يقولها ليك ديدو ده , لكن وحاة عينيا سكر دى بتاعت الكابلى , تسمعها الخميس الأخير كل شهر , وكوبليه واحد بس , سمعت ؟؟!!
| |
|
|
|
|
|
|
|
|
|
Re: طاااااااااااااعم ... والحمد لله !!! (Re: منصور عبد الرازق)
|
والله يا جلال زى ما بقولوا ناس الويست (جيتنى فى تمنيتى) ، أخوك خريج سكّريات "على وزن بصريات" ، أها نبدا ليك القصة من الأوّل ، فى أمريكا سنة 2002 إشتغلت فى شركة وفّرت لينا تأمين صحّى ، أخوك ما مُضر قال كدى أمشى أعمل فحص شامل ، وقبليها الجماعة شبكونى جسمك نازل وضعفتَ ، المهم مشيت عملتَ الفحوصات إيّاها ، دخّلوا النتيجة على طبيب المستشفى وهو من أصول سورية ، الرجل كان لطيفاً معى للحد الذى تجاوز المألوف ، طوّالى الفار لِعِب فى عِبّى ، قعد إسألنى عن تاريخ الأسرة المرضى ، قلتَ ليهو أبوى توفى فى سن الثالثة والستين فقال لى (بعدو ماتِ إصغير) ، المهم الراجل إلف وإدوِّر زى ما إكون جايب ليهو خبر وفاة ، وبى تأثُّر شديد قال لى عندك سكّرى ، طبعاً الزول بينبهط للوهلة الأولى ، لكن بديت بينى وبين نفسى أدوِّر المسأله فى راسى ( أنا الزول ده ما جيتو بى كرعى ، لازول شالنى ولا جابتنى سيارة إسعاف "عمبلوص على قول أهل البحرين) ، المهم مشيت البيت عادى لأنو الطاعم ده هابش أبوى الله إرحمو وهابش أحبَّ الناس إلى نفسى شقيقتى الكبرى سلمى التى أكرمنى المولى عزّ وجل بأن جعلها لى أم ثانية بجانب أمى متعها الله بالصحة والعافية ، المهم إبتدأت بالعلاج مع الغلوكوفاج وشيئاً فشيئاً إستعدتُ وزنى وبالزيادة كمان ( ما أخذ بالقوة لايسترد إلا بالقوة - وهاك من دار جعل).
عموماً يا جلال من كثرة تعايشى مع الطاعم لا أستطيع أن أقول لك كفّارة لأن صديقى سكاكيرو ربما ياخد على خاطرو منّى ويعاتبنى (كتّر خيرك يا بكرى ، بعد عشرة سبعة سنوات لسه بتعتبرنى مرض ، أنا أستاهل العاملتك بى إنسانية ولطف ، أريتنى كان إتهيجت فيك ، كان هسّى قطعوا رجلك وخلّوك زى المفتاح الإنقليزى ... الشر بره وبعيد) ، عفواً صديقى سكاكيرو لم أقصد إهانتك أو معاملتك كمنبوذ ، فقط ترفق ما أمكن بأخى جلال ولا تغلظ عليه .
والله يا جلال لى مع السكّر طرائف عديدة ، أوّلها أننى لدى قدومى البحرين إستأجرت شقى بمفردى واشتريت أغراض الميز ومن ضمنها محلِّى (Sweetner) ، زارنى أحد الإخوه السودانيين وقدّمتُ له كوب شاى وضعت داخله مظروف مُحلِّى ، زولك جغم جغمة من الشاى وختّاهو ، وأنا بى شتارة شابكوا ليك (عليك الله أشرب الشاى) وزولك إجغم فيهو زى الدوا ، بعد فات لقيتو يا دوب شرب ربع الكبّاية ، إتذكّرتَ إنو الشاى مطعّم بى المُحلّى ، طبعاً ما جا فى بالى أشترى سكر عادى لأنى ساكن براى وماكنت بعرف ناس عشان أتوقع زيارتهم ، تخيل زولى ده من يوميها حرّم إزورنى فى الشقة .
فى أحد الأيّام مع الشباب فى الشقّة السكّر خلّص ، إقترحت عليهم تنازل ظرف من المحلّى فرفضوا ، قلتُ لهم ( مافى فرق بينو وبين السكّر العادى فى الطعم) ، ردَّ علىَّ أحدهم بلؤم ( إنتَ الطعم العادى شن خبّرك بيهو).
يا جلال نصائح لابد منها :
1- لا تعمد لتضييق مقاس الملابس ، فحالما يعود لك وزنك بعد الإنتظام فى أخذ جرعات الدواء.
2- المشى مفيد
3- تناول محلّى إسمه (Tropicana Slim) ، ويحوى 6 سعرات حرارية فقط
4- الخبز الأسمر مفيد
5- تناول السلطات والفواكه
6- إحرص على وجبة الفطور وحاول قدر المستطاع إلغاء وجبة العشاء والإستعاضة عنها بكأسة زبادى أو لبن رايب قليل الدسم.
على ذكر قليل الدسم ، صديقى موسى سليمان كنّا حين نذهب لشراء أغراض الميز يشترى حليب عادى لهم ويقول لى ضاحكاً ( شيل قليل الفهم بتاعك ده).
أذكر أن الدكتور السورى الذى ذكرته فى أعلى هذه المشاركة طلب منى البعد عن الدهون وتناول الحليب قليل الدسم ، ضحكتُ داخلى وهمهمتُ ( إبن الإزكة ده لو عرف إننا فى السودان بعد الضحية بناكل الربيت ، وهو لمن فاتهم حسن الإستماع للزمن الجميل خلاصة الشحوم وما علق بها من لحم بعد إذابة الشحوم واستخلاص الزيت الذى يستخدم لعمل " الكركار" وهو زيت شعر وكريم أيّام زمان يا فافى).
يا جلال برجع ليك بى حكاوى طاعمة عن السكرى
| |
|
|
|
|
|
|
|
|
|
Re: طاااااااااااااعم ... والحمد لله !!! (Re: جلال عثمان)
|
Quote: ألهم رب العرش...
أذهب البأس واشفه شفاءا لا يغادر سقما...
ربنا الذي في السماء عرشه ، ربنا الذي في السماء تقدس اسمه، أمرك ماض في السماء والأرض ، وكما رحمتك في السماء ،فاجعلها في الأرض، اغفر لنا ذنوبنا وخطايانا، إنك أنت الغفور الرحيم ، اللهم أنزل رحمة من رحمتك ، وشفاء من شفائك ، على ما بصلاح من وجع . |
سمسم ... ياحبيب
نسأل الله ان يذهب البأس ... ويشفينا جميعاً
شكرا على المداخلة التى افادتني كثيرا حيث كانت اول ثمارها اشتراكي في جوال "ماي سكري"
الناس ديل ماهينين الزول يمسك فيهم قوي تاني ما بكون محتاج لي شئ
وكثيرا من النصائح والارشادات المهمة تصلك يومياً على جوالك ...
شكرا ياحبيب
| |
|
|
|
|
|
|
|
|
|
Re: طاااااااااااااعم ... والحمد لله !!! (Re: جلال عثمان)
|
بكور خريج السكريات ...
ياخ يديك العافية ... مداخلة شحمانة لامن جاتني "عشراقة"
انا قلت السكري ارتفع لكن لقيتو ليك ده من عديم الفهم بتاعنا ده ... غايتو ربنا يديك الفى مرادك رفعت معنوياتي بشكل لا يقدر عليه كل السكريات في العالم... عليك الله يابكري كل مرة ادينا 2 كيلو من نوع دا خلي البتاع دا ينزل شوية ...
احاول جاهدا هذه الايام صياغة بعض متطلبات المرحلة وحقيقي هي خبرات جديدة طلعت كلها 100% ولم نكن ندري
اعتدت الان على شرب كل المشروبات من غير سكر ولا حتى محلى "المحلي داخل عطبرة" يعني "اسكيتو" ساكت، فوجدت لك ان طعم الشاي بدون سكر حاجة كدة "لامن تغمض عينيك" لكن لذيذ والله ... لا وكمان الينسون والماعارف شنو داك ... يازول خليت ليك كل حاجة شاي مرة واحدة في اليوم الصباح مع الفطور وبس.
شكرا بكور على النصائح ... وتأكد تماما اننى سوف اعمل بها
اسأل مجرب
| |
|
|
|
|
|
|
|
|
|
Re: طاااااااااااااعم ... والحمد لله !!! (Re: جلال عثمان)
|
| Quote: ياعم حالة عرضية وح تروح لسبيلها |
عفاف صاحبة التمائم وام الجيفارات
ويين حاج الركز ... الزول الا يلاقيهو صدفة عند الفوال السوداني
تصدقي قريتا حالة عوضية
الله يجازي منصور شهانا السمك ياخ
بس وحاتك الفاس وقع في الراس وتاني تعملوا حسابنا في اللمات ديك
حقنا جيبوا لينا دايت بالله
| |
|
|
|
|
|
|
|
|
|
Re: طاااااااااااااعم ... والحمد لله !!! (Re: جلال عثمان)
|
اللهم الإبتلاء قدرك والشفاء قدرك
فعافه بقدرك من قدرك
أنه عارض وبإذن الله يزول
ولو ما زال إنه لم يعد مرضا
وعليك بصداقته
لكن والله يا جلال القصة إنك
سكرعشان كده ما داير زيادة
تخفيفة :
واحد شايقي قابل رباطابي
قال ليه : ياود رباط تتخيل أنو الدبيب
لو عضاك بخلي سنونو
الرباطابي قال ليه : أفرض عضاني وخلى سنونو
لو قابل واحد تاني بعدي
بسلم عليه ...
الشايقي ما طارق جبريل قال ليه :
تتخيل في الفترة دي طوالي بتقوم ليه
سنون جديدة ويعضيك تاني
الرباطابي : ما تخاف الله ياطارق
ده دبيب ولا دباسة
ها ها ها
يلا بلا سكري بلا لمة
إنت أكبر وأقوى من كل ذلك
يا رب أجعله عارضا.
| |
|
|
|
|
|
|
|
|
|
Re: طاااااااااااااعم ... والحمد لله !!! (Re: جلال عثمان)
|
أها يا جلال رايك شنو أنا رجعت قبل شوية من الدكتور لقيت الطاعم عامل 345 ، أجمل مافى الطاعم أنه تم منحى إجازة مرضية ليوم غد وبعد غد ، أضف لذلك عطلة الجمعة والسبت ، وزد على ذلك يوم الأحد الذى تم إعلانه فى البحرين عطلة رسمية تعويضاً عن إجازة المولد النبوى الشريف التى تصادف يوم الجمعة فيتم التعويض بيوم الحد ، يعنى تانى نشوف الشغل يوم الإثنين ، ما قلت ليك طاعم.
| |
|
|
|
|
|
|
|
|
|
Re: طاااااااااااااعم ... والحمد لله !!! (Re: أبوبكر حامد الأمين)
|
يا جلال مالك جايب لينا
سيرة البحر والسمك ما ده
أنحنا خايفين منو ،،،،،،،
أخوك مؤمن حلوي آكل أكثر الأشياء الحلوه
وأشرب سكر بالشاي وكذلك سكر بالقهوة ،،،
وعامل نايم والجماعة ياخي بجيك سكري ،،،
قولوا بسم الله سكري شنو،،،،،،،،
الوالد الله يرحمه كان عنده سكري وما مهتم فيهو
وياكل أي حاجة وتزوج وخلف بعد الثمانين وتوفى ما يقارب التسعين عام.
سؤال حلو السكر ولا غريق البحر؟
| |
|
|
|
|
|
|
|
|
|
Re: طاااااااااااااعم ... والحمد لله !!! (Re: محمد آدم النور)
|
قال بكور ان الطاعم اداهو اجازة
لغاية يوم الأتنين الجاى
ومالك قاعد طيب
ما لقيت حجز ولا شنو !!!!!!!
الوشوش المستغربة ديك , رصوها لى من الليلة لغاية يوم الأتنين
والوشوش الحاسدة والبغرانة كمان
اقول ليكم حاجة
ختوا لى صورة ابو الجل ظااااااتو
| |
|
|
|
|
|
|
|
|
|
Re: طاااااااااااااعم ... والحمد لله !!! (Re: منصور عبد الرازق)
|
سلام يا جلجل و يا كل الرائعين ..
و كفارة و أجر يا أبو الجل مع أنك كدة بقيت زول عصري ..
و البوست بتاع أخونا سامي أمسك فيهو قوي ..
و عليك بالمشي و الكسحي .. المشي الواحد الأبيناهو دة يا جلال .. تعرف ياخي المشي دة زول كويس بي شكل ..
و بجيك بي مهلة ..
| |
|
|
|
|
|
|
|
|
|
Re: طاااااااااااااعم ... والحمد لله !!! (Re: أبوبكر حامد الأمين)
|
عليك الله يابكري انت بي صحك؟
اسا انا "الجقلبة" دي كلها في 265 الفوق ديك
يعني يابكور البتاع دا ممكن يصل مواصيل ذي دي؟
غايتو احسن مافي الموضوع دا حكاية الاجازة دي ..
بس تعرف "ابوالسا" دا حكايتو حكاية جنوا وجن الاجازات دي لانو فيها الركلسة
بكري ... قوم امشي ياخ نزل البتاع دا ماتخوفنا ساكت
انا غايتو لحدي الآن مقطع "شبشبين جداد لنج
| |
|
|
|
|
|
|
|
|
|
Re: طاااااااااااااعم ... والحمد لله !!! (Re: جلال عثمان)
|
Quote: أخوك مؤمن حلوي آكل أكثر الأشياء الحلوه
وأشرب سكر بالشاي وكذلك سكر بالقهوة ،،،
|
حارسنا وفارسنا وريسنا...
بمناسبة الحاجات الحلوة دي احكي ليك نكتة
قال ليك اتنين بلدياتنا عمرة قبضوهم ناس الجوازات وطوالي على سجن الترحيل
اها في وجبة الغداء جابو ليهم كبسة وقزازة بيبسي "صاااااااااااقطة"
اها قام محمد فتح ليك قزازة البيبسي الصاقطة دي قامت عملت تششششششششششش
احمد قال لي محمد عارف يافردة تاني تششششششششششش دي الا تسمعا في بصات ابورجيلة
اها تاني اخوك حاجاتك القلت عليها دي الا يشوفا في الشاشة
| |
|
|
|
|
|
|
|
|
|
Re: طاااااااااااااعم ... والحمد لله !!! (Re: جلال عثمان)
|
Quote: و كفارة و أجر يا أبو الجل مع أنك كدة بقيت زول عصري ..
|
حبيبنا سيد حوشنا
يديك العافية ياخ ... قلت لي بقيت عصري
اها من الليلة دي قال ليك بجانب اللستةالطويلة من الممنوعات
نمشي نشتري الترينق سوت وحذاء المشي الماخمج وجهاز الجري الكهربائي
وكان لقينا لينا طاولة بلياردوا كمان ما بطال ...
إمعاناً في العصرية ياخ ...
| |
|
|
|
|
|
|
|
|
|
Re: طاااااااااااااعم ... والحمد لله !!! (Re: كمال الشادي)
|
| Quote: إلا اني بسألك تاني الرطل الايام دي عامل كم ؟ |
تسلم ياغالي والله قال ليك الايام دي البتاع دا في ندرة عديل كدة
والله ياكمال فعلا قال ليك موضوع المشي دا حاجة مهمة جدا
الحمد لله احافظ هذا الايام على مستوي 110 نهارا ويصل ليلا الى 117-120
وذلك من بعد الله بفضل المشي ...
ولا يخلو الامر من بعد الطلعات وذلك بسبب الطفاسة والذي منه
| |
|
|
|
|
|
|
| |
جلال عثمان
محمد آدم النور
موسي عيسي
الرشيد بابكر
منصور عبد الرازق
زهير الزناتي
عمر المهدى
محمد عيد
محمد صديق
عبد الدائم سيد أحمد
سامي عبد الوهاب إدريس
أبوبكر حامد الأمين
عفاف علي ميرغني
عبد الحفيظ عباس
ميسرة سيد أحمد
عصام دهب
كمال الشادي
فيس بوك
تويتر
انستقرام
يوتيوب
بنتيريست