.
.
[qb]
مشاوير ريد
وأعاين جوه في عينيك
وأخاف نظراتي تفضحني
لــمــا تلاقـي نـظـراتــك
واقول أتهنى بي شوفتك
أروي اللهفة في جواي
أنا العـاشــق صفات ذاتـك
وألقى عينيك بحور آمال
مراكب شوقها ما بترسى
وشعاع بيضوي ضحكاتك
وأشاور ليك بالكلمات
وأتاوق لي سماك مفتون
تغــازل فـيــني بسـماتك
وأفتش في الكلام الراح
وأشيل منك حروف الريد
وقت ما تجيني همساتك
أشوفك زي جناح غيمة
حنينة بتسقي في الدنيا
مسافرو وشايلة نسماتك
أنادي سواك بي اسمك
تغــفــر لي غلــطــاتي
واســامح لـيـك هـفواتـك
أريتك جيتني في الأعياد
تعطر عمري بالأفراح
وأبــارك لـيــك جيـاتـك
وألاقيك حكوة من ماضي
تمهد لي زمن جاي
وعشق بيسكن محطاتك
دروب تحضن مشاويرنا
بتمشي معاي خطواتي
وامشي معاك خطواتك
ولو طالت مسافاتنا
بنحلم بي زمان أجمل
وتـاني نـعـيـد بداياتــك
ونفتح في الزمان صفحة
نسطر فيها أحلامنا
وتكون أحلامنا غاياتك
....
..
.
جمال السنوسي
[/qb]
جمال السنوسي
فيس بوك
تويتر
انستقرام
يوتيوب
بنتيريست