تــواصل .... في الزمن الفاصل !!

[qb]
يا شــوق مـتـواصـل
بين أحضان الذكرى الباقية
وبين أقدار الزمن الفاصل

دنيا أحلامك ماهي غريبة
خلّي سنينك تبقى قريبة
قرب النبض للشوق الحاصل

شوف أحلامك كيف وردية
وكل أحلامك عيشة هنية
وصفا أيام وريد متكامل

سافر أمشي وأرجع تاني
قيس الريد الفيك جوّاني
إنت بتعرف ليه متجاهل

آخر مرة زرتك فيها
شفت النظرة الطليت بيها
أصلو عيونك ما بتجامل

كنت بتحكي عن أيامك
ونار أشواق بتزيد آلامك
ومهما تسامح ماك متساهل

ما تتألم من أشــواقك
بكره العيد بيفتح أبوابك
فرّّح قلبك وكون متفائل

أقرأ وأسمع كتابة صوتك
عيش الريدة قبل تفوتك
ما ظن يعني تكون متغافل

ولو حاولت تبدد حيرتك
شوفا عيوني حتعرف قيمتك
إنت بتعرف ليه بتجادل

مرة أقيف وشوف اللهفة
البين الموجة ورمال الضفة
إيد بتسلّم وعيون بتغازل

بيني وبينك حكاية ريدة
في العشاق حالة فريدة
أحلى قصيدة عشق متبادل

أرجع تاني وعيد أعيادك
وشوف الدنيا من ميلادك
تلقى قليبي معاك متزامل

بيغني معاك أحلى أغاني
وكل أحلامو تبقى أماني
يلقى معاك الريد الكامل

ولمّا تغيب بسأَل عنّك
كل الدنيا وأبدّد ظنّك
حتى بتابع الطير الراحل

وحتى الضل الكان بجمعنا
ولمّا بنمشي كان بتبعــنـا
حتى مشينا كان متكاسل

ولمّا تحاكم قلبي وقلبك
خت في بالك إني بحبك
وبرضى معاك الحكم العادل

....
...
.

جــمــال



[/qb]

(عدل بواسطة جمال السنوسي on 07-07-2004, 11:44 AM)