بلدياتى يعمل برماح ريفى الرياض له اكثر من شهرين ياتى للرياض اسبوعيا..كنت مفتكره يريد ان يجدد جوازه او يبحث عن عمل مريح كعملى هذا ..الصحة فيت وجالس مجانى على النت.واخر العام طالع كيت...لكن هذا الرجل كان ساكى موضوع مهم ..اخيرا وبقدرة قادر وبفرح عم القرى والبنادر...تحقق حلمه..وبعد مزايدات..اشترى البوكسى موديل 79 بمبلغ قدره 10 الف ريال..امس ابصرته واقف امام الجمعية..بغبيرا..بوكسيا مزيقا يسوى ياغربتى...طيب ياطويل العمر.وهذه تصلح البوكسى ايضا .كيف توصله للسودان...فقال اتفقت مع وكالة فى جدة..ب 8.5 مليون سودانى تسليم وتسلم فى قهوة عبد العاطى بابقوتة من غير ان تمس كفراته الارشيفية باطن الارض...فقلت ياسبحان الله نعم التعليم والتكنلوجيا...طيب ياشيخنا البوكسى المصغر ..من صدا..بجيبك ليك كم هناك فى السوق..فعدل الرجل جلسته وشنق طاقيته...فقال لى ياباشمهندس..انا زول تفتيحة ومولود باضراسى فى دلالة العربات..وما بعمل حاجة بتخسرنى والله نوع الموديل دا مرغوب اكثر من 2005....وممكن يجبب ما بين 23- 25 مليون...ولو عندك واحد تانى اسى بشتريوه منك...قلت ليه طيب انت كدا بتربح 5 مليون بعد ما شغلت لاب توبى...قال لى انت بليد فى الحساب انا بربح قريب العشرة مليون
البوكسى كتب عليه تصدير وشحنوه امس فى احد الوكالات...فى طريقه الى جدة...ومنها الى ارض الاجداد... سوالى الى خبراء الاقتصاد وعالم الحديد..والنت...بوكسى زى دا معقول احسن من موديلات التسعيان والالفين...طيب ليش الشركة بت الكلب دى ما صنعت زى بوكسى موديل 81 لسع ولا حتقدر على قول بلدياتى....افتونى ياجماعة الخير..اذا كان فيكم سمسارى قديم ولقدام
05-18-2005, 04:19 AM
A.Razek Althalib A.Razek Althalib
تاريخ التسجيل: 12-12-2004
مجموع المشاركات: 11818
Quote: ليهو كم سنة قريبك ده... كسؤال أولاني... وشغال شنو... منهم نستفيد... خبرات جمع الكاشات... بدون نقاشات....
قديم قدم الكسرة لكن جاء البلد دى لما طلع من سادسة...اول مرة كان سارح وبعدها دخل سوق الغنم كان برجع كل سنة والسنة ببوكسى ولما يكمل الستة اشهر بكون باعو وما خد العربون... لكن من وقفو البكاسى القديمة هو خلى السفر قال كيف يرجع حافى ويقضى اجازتو كيف بدون اب زيق ويقوم يشتريوه هناك عيب والله عيب..ناس الحلة بشيلو حال عياله...السنة القبل الفاتت اشترى ليه اعفاء يتاع شهيد وما اكثرهم بس ترسل نمرة الشاسى لاخو الشهيد ويسترخج ليك الاعفاء من وزارة البيع اخا السنة دى الناس تفننت بقت وكالات ..تسليم وتسلم... شكرا ود الطالب على مرورك المتكرر على وزن وقوف متكرر امس شفت واحد فى شارع غبيرا العام نفس صورتك بتاع الفى بوست القنصل..داخل سوق التياب لو ياخوى عندك خبرة فى التياب انجدنا انا ووليد طه عاوزين نشترى الشيلة شكرا
05-18-2005, 09:15 AM
almulaomar almulaomar
تاريخ التسجيل: 07-08-2002
مجموع المشاركات: 6485
أخي الرائع أب قوته رد الله غربتك وغربة جميع المغتربين سالمين غانمين يعني ما يسفروكم بالقوة ، أها زولك ده والله داقس إنت من زمن البوكسي التسعة وسبعين يا أخي حاج أحمد سيد اللبن في بحري بقى راكب تويوتا هايلوكس دبل كابين ومكيفة كمان وأوعك من شريط سيدي سااااكت ، تقول لي بوكسي ... المهم يا أخوي يبد إنو قريبك ده طول من الخرتوم ما شاف الباثفايندر والإنفنتي والهامر والأفالون والبي أم دبليو وهلم جرا ، وكلهن القزاز أراك ولا تراني مظلل لمن تشوف فيهو وشك ده لو العربية ماشه بشويش عشان تقول في سرك كلميني يا مرايا. وبالمناسبة البخلي بوكسيكم المولود في العام تسعة وسبعون يعني أكبر من رونالينهو بي ثلاث سنوات وأكبر من صمويل إيتو بخمسة سنوات لي هسع مرغوب شنو ، يا أي دي تايوتا زاتها إتغير شعارها خلال تلك الحقبة أكثر من مرة ، والله إذا قريبك ده إشتري العربية البوكسي دي يكون باقي ليهو يشتري كومر وهنتر وبيدفور وأوستن وجيب ولاندرفور القديم داك وموريس عشان يكمل مجموعته الكلاسيكية ، ويمكن أن نتشارك جميعاً في فتح معرض عربات منقرضة بمنطقة أبي قوته إذا كانت تقع شرق الظلط أو أبا قوته إذا كانت غرب الشارع وأب قوته حيث تقع الآن. وأكيد قريبكم ده تلفزيونو ناشيونال وعجلتو رالي ومراوحو سانيو وثلاجتو زير قناوي
05-18-2005, 11:05 PM
abuguta abuguta
تاريخ التسجيل: 04-20-2003
مجموع المشاركات: 8276
الملة شيخ جبال توار بورا تعرف تورا...يعنى صغيرة وبورا يعنى كبيرة بوووت بورا ادمى...رجل عظيم
يحكى ان واحد من اهل العوض متفق مع كفيله وهو قاعد فى السودان دلالة العربات..اها كيفيله دا كل شهر مرسل ليه بوكسى..76-81..الكفيل التفتيحة دا لافى قرى البدو كلها يفتش للبكاسى القديمة قالو فى الافلاج لقى ليه بكوسى مدفون فى الرملة..من عهد قيس اين الملوح..الكان بجكس بيه ليلى وكمان مكتوب عليه ليالى عودا تانى...اها الكفيل دا شغال مع مكفوله دا بالنص...ولسع العلاقة بينهم كويسة ..مشترين اراضى فى كافورى مع ناس شيخى...ونصف السلمة بتاعتو..سبحان الله زولنا المسكيين دا...السعودى لما يجى السودان...تلقاه ماشى امامه من فندق لفندق ومن ديوان لديوان..ويجلسو مع عمدة البلد ورئيس المحلية وشيخ الترع والرى...وكمان تبرع ليهم ب 15 مليون عشان يعملو كبرى صغير..للبكاسى لما تجى مارة...شفت كرمنا زائد كيف...مدنكل ومقنن..وازيدك من الشعر قافية..قال ليه ممكن اعرس ليك بنتى..لكن ود عم ابنت كان ضكران خلاص سلى سكينو...اها السعودى لما شاف ..رقبتو بطير زى العصافير...كبى الزوقة وتبرع للولد بى 5 مليون عشان الرجالة كيفتو...لكن زولنا لما يجى السعودية...يقوم كدا السعودى يتعفرت عليه ينومو فى الخلا مع الغنم...وما بدخل المجلس بيت الشعر مع شيوخ العرب والعشائر..لما تكون فى ذبائح...دهنها ينقط قلت قريبى بتاع البوكسى داير يعمل متحف...لقوارض المحركات...لا والله الزول دا تاجر وزول بيع ساى .. ومن عسى البوكسى بتاعو دا محجوز...من زول دايروا لصفائح الطماطم....تعرف فى الشمالية البوكسى الجديد بشيلو صندقوالاصلى برة وبركبو ليوه صندوق قديم...ويخدموه..ولما يجو يبيعوه..يركبو ليه الصندوق الاصلى...المختوت فى المحزن ومزيت مع شوالات اللوبيا...ويمشو يشترو تانى موديل جديد ويركبو ليه نفس الصندوق...وياخذ دورة الشغل....قالو فى واحد ساكن عفيفى...مش عفيف...تقوم تعمل لى شكلة اسى...الاسم دا باقى لى الايام دى بطل البورد...اها الزول دا برضو اشترى ليه كريسيدا ب10 اللاف من الرياض..بعد كم شهر باعها ب 6 الف سالوه ليش عملت كدا...قال احسبو لى مشاويرى بين الرياض وعفيفى...ماتنسى تقراء الياء... مع خالص مودتى اخوك احمد ولقدام
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
abuguta
A.Razek Althalib
almulaomar
فيس بوك
تويتر
انستقرام
يوتيوب
بنتيريست