دعواتكم لزميلنا المفكر د.الباقر العفيف بالشفاء العاجل
|
|
 ياكـــفيلى ..الاول.. اقامتى ما بتتحول
|
رجل بسيط انحدر من غرب افريقيا ينتمى الى قبيلة الهوسا جده الكبير حارب مع الملك عبد العزيز لذلك اكرمه الملك بالتابعية, حين قابلته اول مرة فكرت كيف ادخل الى قلبه حتى يعفينى من رسومه الشهرية المفروضة على من يقعون من اجانب تحت كفالته ويعملون خارج مؤسسته الوهمية.ذكرت له ان امى هوساوية وجدى لابى جاء من غرب افريقيا كان جنديا فى جيش المهدى فتزوج سودانية فكانت سلالتى, فبادرنى طيب انت ليش لونك فاتح قلت له انا من سكان الجزيرة وولدت فى النمرة(المنازل الموقتة التى تبنى من القصب ايام الحصاد) وحبوتى كانت تغسلى كل صباح ومساء فى مويى البوغا(موية الفيضان المحملة بالطمى)فكان هذا لونى الفخارى الذى تراه فصدقنى الرجل ومن يومها صار ينادنى بانى اختى فاستطعت ان افتح محل جوالات على كفالته تحت ادارة ابنى خالتى الذى تفرعن علينا الاثنين.
فانا رجل محظوظ فى تغير امكنة العمل فما تركت شركت الا وتعلقت باخرى
لان شركات الانترنت عمرها قصير وكل شهرين مندمجة واحدة فى اخرى حتى تقاوم ظروف المنافسة ويكون لها وجود فى دائرة السوق المغلقة
وكم تمنيت ان اعمل فى شركة 25 سنة من غير توقيف ولا توقف حتى استطيع ان احقق امنيات اسرتى الكبيرة والمستقبلية الصغيرة وبنتى تدرس علوم طيران حتى تجد لها عمل مريح فى كوكب المريخ سنة 2025.
احدى هذه الشركات تسلط على مدير موظفيها اذا لم انقل كفالتىعليها ساوقف عن االعمل ففعلت كرها, ويومها حذرنى خالى الكفيل باننى لو فارقته ساتعب وساكون تحت كفالة رجل لا يرحمنى ولو بقيت معه فى المستقبل سيشفع لى حتى انال التابعية ولكن خالفت نصيحة ذلك الرجل الطيب.
فالبوم ايها السادة شركتنا باعتنا بكراسينا الى شركة اخرى وسنرحل عما قريب من المبنى الجميل الى مينى اخر مع تقليص بعض الامتيازات فمن كان معنا فرحب به ومن اراد ان يرحل فله منا بسمة وداع مع تذكرة ذهاب الى ارض المليون ميل مربع حتى يسمع باسترخاء اخر اناشيد السلام فى مقاهى الانقاذ المنتشرة وسط العاصمة الكروية هذا اخر كلمات خرجت من فاه مديرنا .
ووجدت نفسى اترنم...مع ذهاب امالى العراض واتحسر على ايام العز مع كفيلى الاول.
ياكفيلى الاول...
الاقامة ما بتححول...
الراتب قالو حينقص
وانا ايش اعمل...
اسافر السودان
ولا اشتغل واخر الشهر
اقعد اتسول...
|
|
 
|
|
|
|
|
|
|
|
Re: ياكـــفيلى ..الاول.. اقامتى ما بتتحول (Re: abuguta)
|
بسيطة يا أبقوتة .. أبدا من الآخر .. أقعد اتسول آخر الشهر واشتغل أوله .. بعدين كلامك دا أعاد إلى ذاكرتي مقولة الشاعر الشهير أظنه الجاغريو الذي قال : ما الحب إلا للكفيل الأول .. هنيئاً لك بكفيلك الأول واسكيلك العالي وعملك المستقبلي .. ومرحبا بالتشريد إن كان يولد مبدعين . قنبلة البوغة الموقوتة .
| |
|
|
|
|
|
|
|
|
|
Re: ياكـــفيلى ..الاول.. اقامتى ما بتتحول (Re: ولياب)
|
ولياب الحبيب
والله حلوة الاغنية..ضحكتنى
وانا قاعداكتب فى السيرة الذاتية عشان اقدمها لشركة اجنبية
فى مشارع سندس النموزجية
قلت لى المبانى الجميلة...والله ياخوى انا اشتغلت فى 4 شركات كلها فى العقارية.اسى الجديدة دى برضها فى المنى القديم بس الراتب ما بحقق طموحاتى لكن نسوى شنو احسن نواصل اخير من الكواسة
كدى ابقى اظهر
بلونك الاخضر
ولك ودى
| |
|
|
|
|
|
|
|
|
|
Re: ياكـــفيلى ..الاول.. اقامتى ما بتتحول (Re: Ahlalawad)
|
قلت لى للجاغريو...وغناها مبارك حسن بركات
قلت لى ابدا التسول ...من البطحاء ولا بيت العذابة المليان
وراجين نفتش ليهم عن شغل.
طبعا ما حقولهم انا شلحونى من الشغل عشان ما يوصلو الشمار
لخطيبتى .تقوم تنكس. طبعا انا قاعد بقول ليهم الاستقدام فى الترزى
بخيطو فيهو
وتسلم
| |
|
|
|
|
|
|
|
|
|
Re: ياكـــفيلى ..الاول.. اقامتى ما بتتحول (Re: abuguta)
|
الأخ العزيز سجيمان ... والله فيك الخير ... فعلا والله يمكن يكون من آثار الجبس .. بالله دي فاتت علي كيف؟ بعدين داير ارسل ليك مسنجر .. علا قفلوهو .. سلاما سليما وشوقا عظيما إذا مر بالجبال .. دي اقراها في سرك . بعدين إنت برضو رد علي في سرك .. الأسرار عند بعضيها .
| |
|
|
|
|
|
|
|
|
|
Re: ياكـــفيلى ..الاول.. اقامتى ما بتتحول (Re: abuguta)
|
خالد الحاج
قلت لى قربت..بينى وبينك الشايقى احسن من الكوز
هم ما عاوزين يتفقو...
امس قلت لابوى على التلفون الشركة عاوزة تفنشنا قال لى خلاص
تعال راجع...نحن القروش داير بيها شنو
السنة حواشتنا جابت ليها 40 شوال قمح و50 ذرة
والبقرات ولدن ...تانى انت داير غنى اكتر من كدا
شوف بساطة الناس الطيبين ديل...
مش حظ عمر البشير..بحكم فى ناس زى ديل
ولك ودى
| |
|
|
|
|
|
|
|
|
|
Re: ياكـــفيلى ..الاول.. اقامتى ما بتتحول (Re: shiry)
|
بتنا...شيرى...
ودهانك الفيرى..
ياحليل ايام ما كان غيرى...
الشركة نوت تسفيرى...
وينك انت يابت... زمان ما شايفك لكن قلت ما مشكلة
خليها تفضى من اساسى..ما تنسينا من وساطاتك مع بت الحسين
انا صحى بنجح وزير اتصالات ...عشان اقلل ارباح سوداتل
شركة خدمات ارباحة 200 %
اما خالد الحاج دا ذاتو حبوتو شايقية..وعليك الله ياشيرى
عبود مش كان ارجل عسكرى...عقبان يابت امى يكون الرئيس
جنوبى ..او كاهلى...
وشوفى الخمج..والمو خمج كيزان
منعول اسم ابوى نرقص فى ميدان ابوجنزير
وتسلمى
| |
|
|
|
|
|
|
|
|
|
Re: ياكـــفيلى ..الاول.. اقامتى ما بتتحول (Re: abuguta)
|
الاخ / ابوقوته
تحياتي ، و الله منفوحة اطورت من ناكبور للعقارية حته واحدة كده و من موتر بجاج لعربية من موديل التسعينات ، ياربي ابوقوته ده جاتو ليلة القدر ولا شنو ، على كل نحن جنبك قريب و كان طليتنا تكون ما قصرت .
الصادق خليفة
| |
|
|
|
|
|
|
|
|
|
Re: ياكـــفيلى ..الاول.. اقامتى ما بتتحول (Re: الصادق خليفة)
|
لن نصادق غير الصادق
والله مسحت همى حين ذكرت ناغبور بلد الموسمبى
كنت بكون مفلس 6 شهور وامورى ماشة زى الحلاوة
وهاك ياضحك وونسة وتكون حايم فى الشوارع
ومرات تتفن فى نصف الحى ..كانك فى ابقوتة
لا شرطى يسالك ولا زول كبير ينهرك
كم مرة جيت مركز جمال ..ما بلقى غير شباب عرفتى بيهم
طشاش لكن بشم منهم رائحة البيجية..والسامبوسة
عموما بينا اتصال
وسوف نلتقى
ولك ودى
| |
|
|
|
|
|
|
|
|
|
Re: ياكـــفيلى ..الاول.. اقامتى ما بتتحول (Re: abuguta)
|
سلام يا ابوقوته
قصتك الطريفه عبرت عن مشاعر شريحه كبيره من المهمومين بهم التفنيش وانا منهم
انت كويس عندكم حواشات وبقر وحرمت انا لو منك دقيقه ما بقعد!!!!
ويازول خت الرحمن في قلبك وشيل طوريتك واتوكل -بلا غربه بلا هم
تسلم
| |
|
|
|
|
|
|
|
|
|
Re: ياكـــفيلى ..الاول.. اقامتى ما بتتحول (Re: abuguta)
|
اب قوته يا ود الخال
كنته في الهند شاعر الحب و الجمال
وقتاة الجارمنار.......
لا كبسه لا سجم بس السمبوسه والدال
لا كشه لا كقيل بي عقال....
لا خوف من البوليس زي النشال
لكن دوام الحال من المحال
اصبر يا اخوي والزم الجابره
وخلي الكريم قي البال
الله يديك العاقيه والسلامه و سترت الحال...
ويردغربتك وتحوم قي الدره الياقوته..قدال
وتدوبي في الجروف بي العراقي والسروال
قول امييييييييييييييييييييييييييين
| |
|
|
|
|
|
|
|
|
|
Re: ياكـــفيلى ..الاول.. اقامتى ما بتتحول (Re: WALEED YASSIN)
|
وليد ياسين
الله عليك...شنو الابداع دا
والله ذكرتنى...مقهى مهدى بتنام فى حيدر اباد الشباب يجلسون الى اخر الليل لا كشة ولا خوف من ناس عشة...عير التفكير فى العشاء بعد اكل كمية من السندوتشات..
اذكر اخر مرة زرت فيها حيدر اباد يوم ضربة مصنع الشفاء...ونزلت مع واحد كوز بمحض الصدفة. وكان عندهم مؤتمر ..الكوز على طول بادرنى الجماعة فى القاعة...قلت ليه كويس بركة الحصلتهم.لان قطرى تاخر شوية
وبعد الغدا مشيت معه القاعة..وعندما رانى كبرائهم الذين علموهم السحر جن جنهم...وخارجونى الى اقرب بيت شباب ...ناس سامى عبد الرحمن ولم اجد سامى..ووجدت معه طلبة جدد فاعتبرونى كوز ضالى الطريق...ولم يكلمنى منهم احد وحين سالت عن سامى..قفزوا من اسرتهم
بالله انت تعرف سامى قلت لهم..صديقى وحبيبى ..فقال احدهم افتكرت كوز...فى المساء رحنا للمقهى فقابلنى معاز ود المحيريبا ..وينك يابقوتة وانا ضيعت اسمه..وهو عربى لايوق..مصر على ان اتذكر اسمه وهو نزل معى فى ناغبور اسبوع كامل..ولم اتذكر اسمه بعد اربعة سنوت
فسامى كتب لى اسمه فى ورقة صغيرة..فقال لى دا عنوان مصنع الصندلية اتصل عليهم عشان يحضروا لك كميتك العاوزها بعد ما تفضى من كلام العربى دا..واكيد انت عارف اسمه بس عاوز تشحفت روحه..فحلانى من ورطة
بصراحة ياوليد انا تركت الهند قبل 5 سنوات واربعة اشهر لكن مازلت اسرح مع الذكريات..التى تنسنى الام الاغتراب...وحلم السراب...لكن الحمد لله على كل حال...
ولك ودى
| |
|
|
|
|
|
|
|
|
|
Re: ياكـــفيلى ..الاول.. اقامتى ما بتتحول (Re: abuguta)
|
الاخ / ابوقوته
صادق الود
طبعا نحن ناس بارودا كنا شويه حناكيش مش زي ناس ناكبور لكن برضو ما بنحصل ناس بونا في الحنكشة ، و الفلس دي اطعم منو اصلو مافي في الهند ، بالله يا ابوقته شفتو الحياة هناك كانت حلوة كيف بالرغم من اكل البيض و العدس الكثير وزي ماقلت انو الواحد شهرين ثلاثة مشو ستة شهور زي ما عندكم الواحد بكون مفلس لكن الحياة بتكون ماشة زي الورد ، اذكر مره جاء واحد من شباب ناكبور بارودا و كان نازل عندي في الشقة اسمه بكري وطبعا كان مندهش ببارودا .
ياحليل مركز جمال كان قبل ثلاثة او اربعة سنوات الشباب بتجمعوا هناك لكن الان كل واح يبدو شايف عيشتو .
امل ان نسمع صوتك و الارقام بتاعتي على البروفايل ولكن بالامكان شفتك كمان
الصادق
| |
|
|
|
|
|
|
|
|
|
Re: ياكـــفيلى ..الاول.. اقامتى ما بتتحول (Re: الصادق خليفة)
|
طبعا نحن ناس بارودا كنا شويه حناكيش مش زي ناس ناكبور لكن برضو ما بنحصل ناس بونا في الحنكشة ،
بونا يام جوا ظريف
اناجيتك فى الخريف
بونا يام مظرا رزاز
انت فى الزول الظريف
وفيك اللاعب الحريف
وفيك الناقد كشوقى ضيف
وفيك الناس الشواذ
الاسامى مستوردة
والفنلة كت موردة
والبنطلون قاصنو ردا
وبرضو ماشين الماهناز
ديل حناكيش بونا..قالو واحد من حناكيش بنقلور نزل اول مرة مع اخوان مسلمين..فقالو ليه كنيتك شنو...قال ليهم كنية يعنى شنو
قالو ليه مثلا اسامة دا كنيته ابو صهيب, وعلى دا كنيته ابو نسيبة
فقال ليهم ممكن تكنونى ابو الشباب...اشتهر بالحنكشة ..قام نقل على بونا وهنالك وصل قمةفى الحنكشة...وكان حالق حلاقة غريبة..ومختصر اسمه على شعرة...m.h فراه واحد من شباب الجنوب قاليهم خلاص رخصتوه مهراشترا.....
شكرا اخى صادق على المداخلة وسماع صوتك
وسوف نلتقى
ولك ودى
| |
|
|
|
|
|
|
| |
abuguta
Ahlalawad
ولياب
سجيمان
omer almahi
shiry
الصادق خليفة
ابو عثمان
ودقاسم
فيس بوك
تويتر
انستقرام
يوتيوب
بنتيريست