|
|
 يا عشاى.. العشا أب لبن.. عشا البايـتات.. ده رئيس سوداني جديد
|
كفاية دموع.. كفاية عذاب.. كفاية دماء.. كفاية تقتيل.. كفاية معاناه.. كفاية ترميل.. كفاية سحق.. كفاية محق.. كفاية ألم..كفاية معاناة.. كفاية موت.. كفاية دهس..
ديل مسكوا كتلو ديلاك
وديل مسكوا قتلوا أولئك
وديل مسكوا سحقوا هؤلاء
ندعوا الله بلسان حالنا ولو بعد عشرين سنة
يجينا سوداني كدة
عشاء البايتات
العشاء أب لبن
كدة يكون كل السودانيين من نومولي لغاية حلايب كدة مافي غختلاف حولو
كل الأحزاب تكون جماعتو
كل المنظمات يكون ناسو
دستورو السودان وبس
الناس تتكلم زي ما عايزة وما بيسوو بيه شئ
الناس كلها تجتمع على محبتو
ما عندو تهميش لأن كل فرد سوداني ولدتو أمو مهم
القروش تروح وتطير الله ينعل أبوها القروش الفرقت الناس
ليه؟
المزارع ينتج يدي الناس طماطم بلاش
بتاع المصنع ينتج يدي الناس دمورية لأنو بتاع الطماطم أداهو طماطم
بتاع المصنع ينتج يدي الناس تلفزيونات ملونة 32 بوصة لكل بيت سوداني
لأنو بتاع الطماطم أداهو وبتاع المصنع أداهو دمورية
وهكذا
الله ينعل أبوها القروش
المهندس يتخرج وهمو القروش
والدكتور في عيادتو عايز القروش موش من أجل العلم ومداواة الناس ينادي الممرضة يقل ليها كم عدد المرضى تقول ليهو 20 يقول ليها لو لقينا عشرين تاني كدة تكون قروش الخفجة للسطوح إكتملت
المدرس يقول أكرس جهدي عشان أتم العتب للبيت ونضبح للعتب بعدين نبقى على الصبة
عشا البايتات ده
كدي يجيبوا لينا الله من عندو..
العشا أب لبن ده ما بيختلفوا فيهو إثنين ليه؟ أم قلتا علم علم
أم قلتا تواضع تواضع
أم قلتا شبع شبع الناس كلها شبعت لامن تترع
أم قلتا دستور يتلاقى عليه كل الناس..
أم قلتا فنجرة فنجرة
أم قلتا ضكرنة ضكرنة
أم قلتا فرسنة فرسنة
بعيد على الله أن ندعوا الله ولو بعد حين يدبر لينا واحد زي ده
...............
يتداول السودانيون كثيراً كلمة عشاي على المحنة الزائدة وفي أغانيهم
( طلعت القمره.. واريت يا عشاي ما تودينا لى أهلنا.. بسألوك مننا)
والعشا أب لبن.. دا خريف ساكت.. لأنو الناس أتعودت أن لاتتعشى.. أو تتعشي سناسن بي ملح وشطة وموية
وعشا البايتات اي بايتات القواا.. أي بايتات بلا عشاء.. ما لقن عشا.. عشا البايتات ده يعشيهن.. با يتات أي بنات ونساء مكسورات جناح محتاجات لمن يعشيهن.ز ضعفت حيلتهن في المكابسة من أجل الرزق ولقمة العيش الشريفة الكريمة الكافية
عشان كدة لو قالوا ليك عشا البايتات
مافضلوا ليك فرضاً ناقص من الشكر
.......
عشان كدة ندعو الله كفاية معاناة
كفاية دموع
كفاية دماء
كفاية الم
وأمي رحمها الله تقول ليك ( مافي شئ كتير على الله... جبالو عَلى.. ومخازنو ملَي)
|
|
 
|
|
|
|
منصوري
فيس بوك
تويتر
انستقرام
يوتيوب
بنتيريست