|
|
 عاوز تموت بشنوا ........................؟
|
سلام الي الجميع
اتمني ان تكون هنالك انتخابات شريفه
لكن الذي اسمعه من بعض الاشخاص والذي اشاهده علي التلفاز يؤكد
ان هنالك غش داخل هذه الانتخابات نتمني من جميع الموطنين ان يشاهدوا
ذلك علي التلفاز او قناة الشروق هذا ليس من احد بل من المواطنين والصحفيين .
اعجبني هذا البريد فقمت بادراجه هنا لو عايز تموت
لو عاوز تموت من الحسره؟
- ياتتفرج على اعضاء المجلس الوطني وهم يمارسون (فضيلة الصمت) تجاه مشاكل المواطنين
- يا تتفرج عليهم وهم يمارسون (حق) الكلام عن (زيادة مخصصاتهم)
لو عاوز تموت مفرووووس ؟
- يا تقرأ لـ(عبدالرحمن الزومة) الذى يكتب عمودا يوميا (بين قوسين) يعدد فيه حسنات وإنجازات (النظام)
- يا تبحث عن (مردود) ما يسمى بعائدات النفط .
لو عاوز تموت شهيد ؟
- يا تسافر عن طريق أحد شوارع (الموت) التى لا تصلح حتى كشوارع (داخلية)
- يا تخرج فى مظاهرة (سلمية)
لو عاوز تموت بالسرطان ؟
- يا تتناول الخبز المحسن (بالبرومايد) الذى يباع (عينى عينك) أمام نظر السلطات
- يا تتناول (المواد الغذائية) منتهية الصلاحية المفروشه (عينى عينك برضو) على الأرض فى الأسواق .
لو عاوز تموت من الغيظ ؟
- يا تسمع تبريرات (الحكومة) حول قوات (الهجين)
- يا تسمع تبريرات (الداخلية) حول إطلاق النار على المواطنين فى (كجبار).
لو عاوز تموت من الجوع؟
- ياتنتظر (الدوله) توفر ليك (شغل) تسد به رمقك
- يا تحرى ليك (قريشات) من (بيت مال المسلمين)
لو عاوز تموت من الهبل ؟
- يا تستمع لما تبثه (الإذاعه والتلفزيون) من إعلانات (ساذجه)
- يا تستمع لإحدى مذيعات النيل الازرق في برنامج مشوار المساء
لو عاوز تموت مرعووووب ؟
- يا تقرأ عن عدد ونوع الأسلحة والعتاد الذى تمتلكه (المليشيات) داخل العاصمة
والتى تجاوز عددها 47 حسب شهاده مسئول كبير
- يا تضع عينة من مياه الشرب تحت مكبر (مايكروسكوب) وتنظر لما تحتويه من (كائنات) غريبة الشكل !!
لو عاوز تموت من الضحك؟
- ياتقوم تتذكر إنو نحنا (دوله بتروليه)
- يا تقوم تتذكر أيام قبل ما يتم (إنقاذنا)
لو عاوز تموت مليونير؟
- يا تكون مسئول وعندك (بيزنس)
- يا تكون عندك (بيزنيس) وأخوك (مسئول)
لو عاوز تموت من الإندهاش ؟
- يا تسأل روحك (مرتبك ده مكفيك إنت والأولاد كيف؟)
- يا تسأل روحك (المسئول ده عمل العمارات دى) من مرتبو كيف؟
لو عاوز تموت من الحزن ؟
- يا تعود إلى البلاد من أى سفرية (خارجية) وتقارن بيننا وبين الناس البره
- يا تقيف أمام إحدى المستشفيات (الحكومية) وتشاهد المواطنين الذين يتسولون قيمة الدواء
لو عاوز تموت على الحديده ؟
- يا تعمل ليك مشروع تجارى و(يجوك ناس الجبايات التركية)
- يا تدخل ليك مرابحة مع (بنك إسلامى)
لو عاوز تموت قبل يومك ؟
- يا تقوم بإجراء عملية جراحية (دقيقه) فى أحدى (المستوصفات الخاصة)
- يا تقوم بإجراء عملية جراحية (غير دقيقه) بأحدى المستشفيات (الحكومية).
لو عاوز تموت من الإستغراب؟
- يا تشوف مواطن عاوز يعمل ليهو عملية تتوقف عليها حياتو (بشهاده الأطباء) وديوان (الزكاه) يديهو (ملاليم)
- يا تشوف عدد حالات (إلى ذوى القلوب الرحيمة) التى تنشرها الصحف فى دولة (المشروع الحضارى)
لو عاوز تموت من الزهج ؟
- يا تنتظر الكهرباء المقطوعه (من الصباح) تجى راجعه
- يا تنتظر دورك الـ 96 فى عيادة الأخصائى الكبير !
لو عاوز تموت مخنوق؟
- يا تقيف فى صف العربات الطويل المتوقفه فى إنتظار العبور للخرطوم من (أم درمان) بكبرى النيل الأبيض (الما معروف يتصلح متين)
- يا تكون واقف فى (صف دفع الجمرة الخبيثه) يوم نهاية (الدعم)
لو عاوز تموت مزهووووووول؟
اسمع قاضي المحكمة العليا بتكلم عن لون قميص لبني في حيثيات قضية البنطلون الما عندو لون
لو عاوز تموت وفى نفسك سؤال ما لاقى ليهو إجابه؟
- يا تسأل عن (خلوها مستورة دى لمتين ح تكون مستوره)
- يا تسأل روحك (طيب ليه ما يخلونا فى الصورة) ؟
لو عاوز تموت مبسوط في الواقع الحالي دا؟
(صدقنى) يا بتحلم
- يا …….. بتحلم
لو عاوز تموت وانت ما مبسوط ؟
امشي وانظر إلي أماكن الاقتراع لكي تري الغش الذي بداخلها؟!
أو يكون عندك شخص يعمل معهم ويحكي ليك بالحاصل شنوا !!!!!!!!!!!!!
تأكد أنوا البشير لا مفر منه.....
|
|
 
|
|
|
|
يسن ابوالمجد
فيس بوك
تويتر
انستقرام
يوتيوب
بنتيريست