اكتب كل يوم فى اى حاجة..ويا حبذا لو كتبت عن اشخاص في البورد تسال عن احوالهم او اكتب عن نفسك لو ما لقيت حاجة تكتبو اشتم...دا برضو نوع من الابداع الكتابى في البورد
...اياك..ثم اياك ان تكتب فىالسياسة السياسة مشاكل وناس البورد طيبين وحلوين ما دارين المشاكل
رد فى اى موضوع حتى لو مااختصاصك.. وما فاهموا وما عاجبك.. في ردك امدح.. اكذب.. نافق..دا اسمو مجاملة في البورد
نظربة البورد بقول :البرد لموضوعك رد ليهو والعكس
اياك ان تقول الحقيقة لان ناس البورد عندهم حساسية ضد الحقيقة
البنات حساسات و ما بتحملن النقد...استعمل الكلمات الاتية: موضوعك يجنن كلك احساس و مشاعر.. انت شاعرة ..انت رومنسية
لو زعلت واحدة باقى الشلة بزعلو منك
الاولاد اكتب ليهم : يامجدد ..يامبدع ..مواضيعك حلوة ومفيدة البورد من غيرك ما فيهو مواضيع لو نقدت واحد حايعمل ايميل ولا تلفون لباقى المجموعة ... و تكون ممنوع من التعامل معه اخيرآ ما تنسى تصلح علاقتك مع ادارة البورد بالمديح لهم
حتى مايحذفوا مواضيعك
لو واحد شتمك حايوقفوا ليك ولو انت شتمت يعملو نايمين
player
06-23-2002, 10:36 PM
Wad Aljaili Wad Aljaili
تاريخ التسجيل: 04-26-2002
مجموع المشاركات: 1577
ياأخ حلفاوي السلام عليكم يا أخي لا داعي لمثل هذه الألفاظ ، والرجاء الإعتذار للرجل، فليس من الضرورة أن تكون أفكارنا جميعآ متماثلة والسلام عليكم مرة أخري
06-23-2002, 11:24 PM
PLAYER PLAYER
تاريخ التسجيل: 04-23-2002
مجموع المشاركات: 10283
ودالجيلى في ناس فالحين فى الشتايم بس ما يعجبوا كلامك يشتمك عديل..يا ريت لو يشتمك بالفن ربنا يهدينا جميعآ الله يديك العافية
hamoodi الله يحفظك من الكلام جرب ...تعرف بين الاخوان مودة نصيحة اخوية ...اطلب رضى الله ولا تخشى احدآ في الحق .....تذكر قد يكلفك الكثير جزاك الله خير
Pearl اعملى البريحك والمقتنعة بيهو.....بس اتحملى النتيجة انا كتبت الكلام دا ..عارف انو ما حيعجب ناس كثير ...وحايزعلو منى.. ..لاكن انا مرتاح لانى قلتا اللازم اقولوا.. وجاهز لتحمل النتيجة سواء كان سلبى او ايجابى وفقنا الله جميعآ
طيب وبعدين هل من طريقة لنقفز بها فوق واقعنا المر ..ونجعل الاحلي يدور هنا .. حلفاوي انت نفسك دخلت من نفاج الواقع الذي تحدث عنه بل وبالاسوأ الاسوأ فيه .. لا تــدع حبك لنفسك يعميك عن رؤية عيوبك..!! ليس عيبا ان اكون كلي عبر لكن العيب ان لا اعطي نفسة فرصة لكي انظر الىّ والى هذه العبر لكي اعمل على تجاوزها
الكتابة على هامش السطر
بليير اتريد ان تعرف معني سمج؟؟ السماجة هي طعم نتذوقه شفت ملاح الويكة لمن يبيت خارج التلاجة ونقوم نختوا في كيس ونرمي به في الزبالة وهناك يقعد ليهو اكتر من عشرة يوم قبل ناس (القمامة) ما يجوا ويشيلوهوا تعال اعفص الكيس دا وجرب الاحساس دا او تذوقه ولا اقول ليك زي شنو؟ ...... ...... ولا بلاش ؟؟ احس اكون انا برضي سمج يلااااااا
06-24-2002, 06:10 AM
banadieha banadieha
تاريخ التسجيل: 02-04-2002
مجموع المشاركات: 2235
من أول أمس وأناأريد تنزيل بوست عن غياب ودعزة ولكن ترددت ثم صرفت الفكرة تماما..وأثناء ذلك أرسل لي هو مسنجرا ورديت عليهو وطلبت منه أن يعاود الظهور والمشاركة
06-24-2002, 06:48 AM
PLAYER PLAYER
تاريخ التسجيل: 04-23-2002
مجموع المشاركات: 10283
والله كلامك ده فيه نسبة كبيرة جدا قد تصل الى 90% صاح جدا جدا والعشرة الباقية تتعلق بناس الادارة (لانى منهم-- هاااى يكة) فهم ناس ياخى ملائكة عديل كده وما ممكن كلامك ده ينطبق عليهم..
اصحح ليك معلومة اخونا حلفاوى من اقدم الناس هنا وفى المواقع السودانية الاخرى وهو عاشق للسياسة ولذا اصابته كلماتك برشاش
يا حلفاوى معليش ياخوى الما بعرفك بجهلك واخونا بلير جديد فى الساحات
بلير اوع تقلب على بس ده انا غلبااااااااااان
06-24-2002, 08:06 AM
Al-Masafaa Al-Masafaa
تاريخ التسجيل: 04-25-2002
مجموع المشاركات: 1586
يا جماعة الخير باركوها و استهدوا بالله خير بلا نجوم بلا كواكب نحن هنا كلنا دون فرز اهل و احباب و اصدقاء و بعدين مافي جوائز و لا كاسات حتتوزع فنحن المنتصرين في النهاية بمزيد من التأخي و التعاضد مع بعض
06-24-2002, 10:26 AM
Habib_bldo Habib_bldo
تاريخ التسجيل: 04-04-2002
مجموع المشاركات: 2350
أخ بلير لك الود والتحية نزولاً لرغبتك ونصيحتك الغالية بشاركك هذا البوست الظريف عشان أكون أحد ظرفاء هذا البورد وخايف يجي يوم يوصفني واحد بثقل الدم والسماجة وبالمنسبة دي شهادة مني لرواد سودانيز اونلاين كلهم وبالأخص أهل المنبر بدون إستثناء والمواضيع المنشورة بدون غربلة كلكم حلوين وزي العسل والمواضيع كلها حلوة وشيقة ومسلية حتى المهاترات البتحصل أحياناً غالباً ما النفوس تتصافىا ونرجع كلنا أحباب وأصحاب المهم إننا نرسخ تقاليد ومثل قيمة بيناتنا خاصة الإحترام المتبادل وعدم تسفيه أراء الآخرين حتى لو كانت أراء بسيطة وسطحية لأن كل واحد فينا بيدلو بدلوه وفينا المثقف وفينا الفنان وفينا السياسي والأديب والإنسان البسيط وفينا العوام أمثالنا مرات نشارك ومرات بنستمتع بمشاركات الآخرين وكله في النهاية متعة وتسلية وعلى الأقل الواحد ينسى أوجاع وآلام الغربة ويحس إنه بين أهله وأولاد بلده وفي الختام للجميع التحية والتقدير وليد
06-24-2002, 10:52 AM
BousH BousH
تاريخ التسجيل: 04-19-2002
مجموع المشاركات: 1884
Kofi بكلامك داشلت هم كبير من قلبى كنت خايف اكون جرحت ناس او اجحفت اخرين ظلمآ لاكن طمنتنى انو القلتو .. علي الاقل نوع من الحقيقة وانا صح فى البعض منها جزاكم على الله
قرشو
كلامى ما فى كل الادارة.....لوماانت بكون غيرك
قلت جديد للاخ حلفاوى لان من شهر 2 ماظهر الافى اخر6
ثم ان قصدت اجرو للكلام
لقد التقينا به فى حبيبتنا طيبةالذكر الشات التي وضعت فىالحبس الانفرادى
دون ذنب جناها سوى انها جمعتنا فىلحظات خالدة ولم يعجب البعض ذلك(ما تزعل)
اخيرآ
بلغ اعتزارنا للاخ حلفاوى عن كلمة(جديد)
شكرآ لتايدك لى(يانى ضمنت واحد فىالادارة والله يزيد لناالعدد
06-24-2002, 02:11 PM
PLAYER PLAYER
تاريخ التسجيل: 04-23-2002
مجموع المشاركات: 10283
I dont wanna be a Player no more... I'm not a Plyaer I just crush a lot .. <-- this is just a song..
يا خوي كلامك دا كيف..؟؟ .. اسمع انا دي جكسويه لكن من تبيت و قمته زول قال لي يا رائعه يا مبدعه يا رومانسيه .. الخ مافي... يا ربي يكون العيب فيني؟؟؟ و حات شيخي بلكضب سااااي ما سمعته يطرشني و يعمي جيراني ..
الا حسي كلامك دا حزا في نفسي ... لانو كلامك دا بيقول انو هنا لاعمي شايل المكسر و العميانه تكحل الهبله و تقول ليها تشبهي البيه و تزيدي عليه ... يعني الزول كان قال النصيحه ... خبرو ما بجيبو ... بري بري .. انا ماشه اشرب لي كباية ليمون اكان تنور لي جضومي ديل...
06-24-2002, 10:19 PM
PLAYER PLAYER
تاريخ التسجيل: 04-23-2002
مجموع المشاركات: 10283
تعرف يا لعيب اختك ما ناقشه ابو النوم يعني ما تفتيحه و الكلام اللبع لبع ما بعرف ليو ... برضو احتمال العيب فيني... لكن تعرف انا عندي لفه كل يوم اصحه بدري اشيل سفنجاتي و الف.. بجي بي هنا و بمشي ناس حلة تحت عرفتهم ؟؟ ناس السودان نت ااهاااا لما الكلام يغلبني بكون عزيزي المشاهد .. ودي اسلم الطرق لحسن بعيد عنك لمن افتح خشمي و اقول رأي في ناس بيرتفع عليها الضغط و يجيهم بعيد عنك حالات من الانتفاخ الموضعي (انا بقول غازات) يقومو يتكلمو كلام لا في السما لا في الواطه و كل زول يعمل فيها ابوبكر الصديق و يطلعوك اى كلام و تاني يوم تجي تلقه اسمك بلبونط العريض فلانه الفلانيه اخلاقه ما تعرف ايه و جايه من اسره ايه .. الخ.. وحات شيخي تعرف مره لقيت لي بوست حق نكت قلته يله خشي اتحفيهم بي نكته.. و يله عينك ما تشوف الا النور واحد كدا زعل و اتهيج لمن السكرين حقتي اتهزت و قلته يا لطيف الالطاف نجنا مما نخاف...
انا والله قلبي منور نور عندي فيو كشافتين و اتنين لمبه نايلون و اتنين قلووز و واحده ابره... يعني اكان في ناس ولا مافي المحل منور .. انت في دا ولا المحيرني جد جد هو الناس بتجيب الكلام السمح الكبار كبار دا من وين ؟؟ والله لمن اقراو حيرتي ذاته بتتحير غايتو عيني لوح تلج .. اسمع انا ماشه اتم لفتي .. خلي لي الباب متاكه
06-25-2002, 02:02 PM
ShiningStar ShiningStar
تاريخ التسجيل: 04-26-2002
مجموع المشاركات: 468
تعرف يا لعيب اختك ما ناقشه ابو النوم يعني ما تفتيحه و الكلام اللبع لبع ما بعرف ليو ... برضو احتمال العيب فيني... لكن تعرف انا عندي لفه كل يوم اصحه بدري اشيل سفنجاتي و الف.. بجي بي هنا و بمشي ناس حلة تحت عرفتهم ؟؟ ناس السودان نت ااهاااا لما الكلام يغلبني بكون عزيزي المشاهد .. ودي اسلم الطرق لحسن بعيد عنك لمن افتح خشمي و اقول رأي في ناس بيرتفع عليها الضغط و يجيهم بعيد عنك حالات من الانتفاخ الموضعي (انا بقول غازات) يقومو يتكلمو كلام لا في السما لا في الواطه و كل زول يعمل فيها ابوبكر الصديق و يطلعوك اى كلام و تاني يوم تجي تلقه اسمك بلبونط العريض فلانه الفلانيه اخلاقه ما تعرف ايه و جايه من اسره ايه .. الخ.. وحات شيخي تعرف مره لقيت لي بوست حق نكت قلته يله خشي اتحفيهم بي نكته.. و يله عينك ما تشوف الا النور واحد كدا زعل و اتهيج لمن السكرين حقتي اتهزت و قلته يا لطيف الالطاف نجنا مما نخاف...
انا والله قلبي منور نور عندي فيو كشافتين و اتنين لمبه نايلون و اتنين قلووز و واحده ابره... يعني اكان في ناس ولا مافي المحل منور .. انت في دا ولا المحيرني جد جد هو الناس بتجيب الكلام السمح الكبار كبار دا من وين ؟؟ والله لمن اقراو حيرتي ذاته بتتحير غايتو عيني لوح تلج .. اسمع انا ماشه اتم لفتي .. خلي لي الباب متاكه
AmDur ربنا يسهل ونكون واقعين شوية بس حتى لو مرة فى العمر نلبس ثوب الحقيقة ونظهر للناس بدون قناع الكذب
shanining star is my head بجد خليكى كده لانك صادقة فى كلامك عشان كده بزعلو منك...الخطا منهم لانو ما عاوزين الصراحة ربنا حا يجيب ليك البفهم اصلك ما تشتغلى بكلامهم
بهزار
غيري الفكى ولا الشيخ بتاعك شغلو ما نظيف بعدين وجهى الكشافات فى تجاهك عشان البكاين يشوفو جمالك لانك وجهت فى وش الشباب وما شايفينك
عزيزي بليرررر يا رائع امسك دي من اولها آها لقيتني كيف يا مان والله من زمان مشاركين لكن مرة مرة كده بندخل ونشارك لكن بعد ده يا مان ليك على كل يوم تلقاااني في وداخل في البوستات ومشارك ولك مني كل التحايا
ــــــ
أسير الغرام يا قلبي ظلموك الحبابيب سقوك الآلام يا قلبي
06-27-2002, 08:16 PM
ShiningStar ShiningStar
تاريخ التسجيل: 04-26-2002
مجموع المشاركات: 468
يا فرده معليش علي التأخير لكن سفنجتي راحت مني و كنت قاعده افتش فيها.... في انهايه لقيته عند ناس عشه كشكوش ... غالتتني فيها لكن انا سفنجتي ما بتغباني....
انا شيخي ما بخلي... لكن كلام الكشافات القلتو داصحيح ميه الميه ... واتاري انا اقول الجكس لمن يشوفني بخت يدينو في عيونو لي؟؟؟ .. اصلي ما فكرته دي تكون الكشافات ... انا قايله دا الحجاب الاداني ليهو شيخي ... قال بخلي الناس تشوفني من قدام نوووور و ورا زهور ....
اسمع ما تقفل الباب تليب الحيط دا ما بقدر عليو ...
اها ودعتك الله انا ماشه اشطف كريعني لحسن عجاجتم رابطه فيونكه... واتمسح لي بي فازلين و اوجه الكشافات ....
06-27-2002, 09:08 PM
Wad Aljaili Wad Aljaili
تاريخ التسجيل: 04-26-2002
مجموع المشاركات: 1577
لمتين تكون اسير للغرام .....سبب الغرام دا منو ووينو
shining star غلبتيني بالكلام بساطة وحلاوة الكلام ودا ورثتى من حهة ابوك ولا امك
ياريت تترجمى تجربتك وفلسفتك في الحياة لموضوع نفسى افهمك اكثر انت مامحتاجة لحجاب ولا شيخ انت محتاجة ل................ لو مشيتى حتة ما تقلعى سفنجاتك اخيرآ الوادك احسن من الفازلين
ازيكم الله يسلمكم الله يعافيكم .... الله يبارك فيك الله يسلمك الله يبارك فيك... الخ...
يخواني وووووووب علي من حر السجم دا... المكيف وين؟؟ دا كلو من الكشافات المتوجها علي دي... يعني كدي ووب و كدي وووبين ... تعرف يا بقع بمناسبة الحر دي مره في المدرسه عز الضهر الشمس موجها اشعتا الناريه يعني موووووووت عديل كدا ... كان معانا واحده منقبه يعني نظام شورابات و جونتات والوش مغتا.. بعيد عنك كلو اسود... قمتا سألتها .. يا آخت انتى ما حرانا ؟ البت اتلفتت و حمرت لي وبي زعله قالت لي احنا بتهب علينا رياح الجنه .... احرجتني.. لكن صحي في رياح جنه؟؟ غايتو اناما بعرف لكن الجن البتعرفو آخير من المابتعرفو...
حسي قلته لي احكي تجربتي ... احكيها ليك كيف و هي لسه ما انتهت... انا من ولدوني و لي حسي متجهجها جهجهت المابجيب اسمو ... و بعدين تعال النكلمك... قلته نفسك تفهمني... وحات شيخي انا ما فاهمه اى حاجه و كل ما اقول يا منقه خلاص جاء الفرج وحاتفهمي حاجه القه في حاجه تاني ما فاهماها... وبرضو بقول يمكن العيب فيني ؟؟؟ اما موضوع السفنجات دا... انا مرات بقلعه و اقعد فيها و مرات بحجز بيها مكانتي... و القلب ما ميت فبقوم انساها مرات.... و انت يا دا من زمن الودك و الكركار... ياخوي الطب اتطور و بقه في فازلين وجرسلين و كمان اذا ماشه معاك حلاوه تديها نقطه نقطتين ليمون و تبقي شي و الزمن يطشي ....
ااها و دعتك الله انا ماشه ناس التعليمه ... ياحبيب يلاكه انا انا.... بي محل يوم داكا انا انا .... نسمع الموسيقه و نرقص الكنداكه انا و انت .....
06-29-2002, 06:35 PM
banadieha banadieha
تاريخ التسجيل: 02-04-2002
مجموع المشاركات: 2235
خليك مشرور كده لحادى ما تنشف بعدين بتجيك نسيت اقول الشرات ده جزء مهم فى نجومية البورد اوعدك القضية حية فى قلوبنا البت شاننغ بقت لى لغز باحاول لها
shining star يا بت قولنا ليكى بطلى الحوامة فى الشمس ليضربك سحاوى ( ماتقولى لى شيخك اداكى حجاب السحاوى نفسى اعلق في موضوع صاحبتك الننجا وريح الجنة بس خايف من ناس التكفير بالبورد يقوموا يححلوا دمنا وانا ما عندى كتير بعد زيارة المحترم ملاريا لنا
لاكن حاكى دة
سالنا صديقآ لنا من انصار السنة عن سبب لبسهم للبنطلون والجلابية القصير ,فاجاب الملابس الطويلة تشيل النجاسة من الارض...قلنا له فى براءة وطفولة طيب ما تلبسو اردية وعراريق فاجاب في ثقة:ديل حرام عشان العورة.
كان ما كداب اقول باقى شوية عشان افهمك حسب كلام الفكى بتاع الاسرة سفنجاتك بتحجزى بيهو وين,صف العيش ولا صف الطاحونة..... اكتبى عن ما مريت بها من تجارب حتي تعم الفائدة
ود الجيلي ما الفكرة التى كونتها عن شخصية شانغ استار
تقبلوا جمبعآ تقديرى واحترامى
06-30-2002, 01:59 PM
قرشـــو قرشـــو
تاريخ التسجيل: 02-05-2002
مجموع المشاركات: 11385
هي يا بناااااااديها كر علي كر علي ... انت مشرور بي وين ؟؟؟ وحات شيخي كوستك كواسه لمن كرعيني وجعوني ... و لبسته سفنجة عشه كشكوش لزوم التمويه و كدا ... و استنيتك الساعه سته في نفس الحته ... لكن انت عارف انو روحي بتحرقني بي سرعه... فأظنننا اتعاقبنا ... السماح يا سيد الناس .... بعدين تعال هنا كيف يعني بضيع في القضيه ؟؟ يا زول هييي وحات الفيونكه انا في نص القضيه .... ما شايفني كل ما البوست يترتر لي ورا بجيبو قدام ... اجي يا ود امي ما بالغته ... برييييدك ...
Ya Player...... طبعا لمن اشوف اسمك مكتوب بي العربي بتذكر توني بلير.... اسمع صحبك انصار السنه دا برضو ناس كدي وووب و كدي ووووب... غايتو انا تحليلي للبناطلين المشحتفه دي ... انو القماش قصر ولا توفير للمواد الخام .. و الله بيني و بينك شينين شنه عجيبه و العجب السكاكات دي ما العوره زاااااته... يا ما ما البناطلين و الجلاليب الطويله سمحه و مخليا الطابق مستور ...
و مالك ما داير تعلق علي ناس الننجا؟؟ يا ولدي فتو و اكان جات الكشه لملم سفنجاتك و اركب الهوا ... الحبه ما بتجيك .... و يا دا تعال النسعالك .... دحين داير تسويني اكسبيريمنت !!! عشان اكان كدي بجي بكره من دقشا بدري و اقعد افتو فت السنين و الايام اخليكم تضربو اخماس في اسداس... السحاوي دا علي وزن سحائي... يا ابني انا الحبه ما بتجيني لانو بقجتي في راسي تشغل محل المكيف يعني يتحول الاشعه الناريه الي همبريب عجيب و راكب الجيب...
قرشو شكرا ليك يا حبه.... اجي يا دا عشه كشكوش عرفة الليله ولا امبارح.... ياخوي دي عرفه من زمن خفرع و منقرع.... لكن انت بتعرفه من وين؟؟؟
قرشو ياريتك تساعدنى في دفع شاننغ للابداع الكشكوش تطلع منو
شاننغ
انشاء الله ما عندك مشكلة مع توني بلير الراجل ما قريبى ولا بعرفوا
عندما كنا في المكتب التنفيذى لشباب الوطن كانت معنا احد الننجات ممثلة للمراة قررت اشكسها قريت لها الجريدة وكبيت لها مكنات جديدة لنج ...ويا ريتنى ما قلت.....المهم قالت تفكر. ..اتارى ناوية شئ تانى كلمت الننجا الابيض(ناس الامر بالمعروف والنهى عن المنكر) ولسوء حسن حظنا اتفق الجميع اننا من الجزء التانى ...فاجازوا ضربنا لاننا مارسنا الزنئ بالفم (لم اسمع بها من قبل او بعد) لنكون عبرة لكل من لا يحترم اخوات المؤمنين.....احدهما كان صديقآ للوالد كلمه..... اضطر الوالد لانقاذنا بالاعتزار بعد ان وعدناهم باننا لن نشكس او نصادق الننجات سودآ او بيضآ
انا ما عندى سفنجة عندى(تموت تخلى) القال فيهو الشاعر:
ورثناها عن اباء صدق......ونورثها اذا متنا بنينا
سحائى عندكم فى البندر عندنا اسمو سحاوي او ابوفرار اصلوا فردتك من ناس هنييكا وانديكا كما قال فيلسوف اللغة عبدالله الطيب (الناطقين بغيرها
واصلى فتتك الحلوة دا ( كنت البتظبوتى فطور شلة المدرسة
لكما كل الود
07-01-2002, 09:21 AM
رقم صفر رقم صفر
تاريخ التسجيل: 05-06-2002
مجموع المشاركات: 3005
بركه الدقوك ... حسي في ذمتك دي المجكس ليها شنو يعني دحين شفتها ؟؟ نضمت معاك ؟؟ و بعدين تعال المكن و الحنك القالو عليو زنا !! الشي قلته ليها شنو ؟؟ لا حيله في امرك يا رب بري يا يمه اطرشني من جنس دا .. وانت اوكت شفته الموضوع جاب ليو عجاجه ما كان تطير فوق تديها جوز ,عشان تأمن...
قلته لي بتلبس تموت تخلي... تعرف في بطاريه هنا اسمها Die Hard
يعني زي تموت تخلي... لكن انا سفنجاتي ديل ما ببدلم بأي شي.. عشان سريعات بيعملو طق طرق طق لمن اكون ماشه....
تعرف انا جني و جن الفته و اللغاويس لكن كان الناس ملمومه بقعد بتونس و اشوف الشمار.. اما فتتة الكلام دي ايييييك اقعد افت و افت لمن خشمي يوجعني... و انا زوله لايييييوووقه اكعب من ملاح الويكه .. لكن ربك كريم... تعرف بمناسبة الجكس الدقوك بي سببه دي ... كان عندي واحده صحبتي هي ما ننجا لكن متكوزنه و قالت لا اصافح .. لكن عاد خفيفه خفة الجن يعني الكيس في الهبوب بعيد عنك.... اااها كنا مشتركين لينا في معهد لتعليم اللغه الفرنسيه(شلاقه بس).. و الكورس كان مختلط و النصيحه لي الله كان في جكس سمح اها انت يا البت اول ايام تسوي في سوات لا اصافح لا اصافح... و انا قلتا خلاص القبه تحته فكي... يوم جيت كوشك كوشك لقيته ليك قاعده وسط شله من الجكس و دااك يا الضحك و كل ضحكه معاها ضربه في الكتف ولاالرجل... قعدته نططه عيوني و قلته حكمتو شريفه.. يعني السلام حرام و الضحك و الضريب اوكي.. آجي يا البامبي... قمته طوالي شلته كرعيني و للخلف در و قلته يا بت مالك و مال القرع ...
Ya Player... انت توقيتك كيف؟؟ يعني محلي ولا علي توقيت غرينتش؟؟؟
من دربي دا و علي ناس حلة تحت عشان نشوف الشمار الجديد و الاخبار الدقاقه...
و حمام الجك يله يا منقه شفته فره ورك يله يا منقه... لونك الاناناس يله يا منقه...
07-01-2002, 09:57 PM
PLAYER PLAYER
تاريخ التسجيل: 04-23-2002
مجموع المشاركات: 10283
رقم صفر فى ناس عاوزين يجمعوا اكبر عدد من الاصدقاء وباي طريقة عشان كده بيجاملوا فى تانين بيخجلوا يقولوا رايهم الشخصى عشان كده بيكدبوا اخرين طبعهم اعوج فى الحياة فى تانين راسهم فاضى ما فاهمين الفرق بين موضوع للنقاش واخر للدردشة......الله يكون فى العون نفسى اعرف لماذا اسئ الينا......لماذا البعض منطقهم بالاساءة
shining star ابوى قال :انت جنيت ولا عميت ماشى تشكس ذى دى بس بينى بينك فردتك بحب التحدى(موشارط صاحبى)
والله فكرت اديها درس خاص وكلفنا صديق لنا اسمه ابو جهل للتنفيذ ...لاكن اوقفناها بعد ان اوقفنا احد الشيشان حاملآ سلاحه قائلآ:انا شيشان عدو الانسان عديم الاحسان..لو حصل اى حاجة لاخت المؤمنين ننجا ..اقرأ الفاتحة على روحك(اتحرشنا)
كلامك صاح ديل بيعملوا العجب(عندي معهن طرائف)
مشكلة امريكا ما بيشتغلوا بغرينتش لان جهة عندو تقيتوا الخاص(انا فى تكساس) انتى وين
اصلك ما بتتعبى من الحوامة وكرعينك ما بوجعوكى
فى رعاية الله
07-01-2002, 10:27 PM
7abib_alkul 7abib_alkul
تاريخ التسجيل: 02-05-2002
مجموع المشاركات: 3757
انت اكوت بتريد الننجا... شيل شيلتك يا ولدي...لكن انا بره.... انا كرعيني ما بوجعوني خمسه و خميسه... من عين الصبي اب جنا غبي و عين الفتا بتقد الواطه وعين العجوز الفيها التروس .... يا ابني ديل كرعين بنفزلنم و نجرسلنم بي في الليل و قال ليك تاني يوم يدورو زي الماحاصل شي..... وانابي صراحة ربونا كدا بدووور اللف و اللفافان و التلفلف....
قلته انتو ناس اناناس و من تكساس يعني كاوبوي آآآدييل كدا.... كان كدا توقيتنا بيختلف عنكو بي 3 ساعات.... انافي ال East Cost in Connecticut....
لكن لسه بحوم.....
07-04-2002, 05:31 AM
PLAYER PLAYER
تاريخ التسجيل: 04-23-2002
مجموع المشاركات: 10283
حبيب الكل شكرآ على زوقك وخفة دمك انشاء الله كل ايام افراح وضحكات. بس ما قلتا لي انا غلطان ولا صاح فى الكتبتوا دا
shining كنت عاوز احكى ليك حكايتى ما واحدة كوزة لما كنت مسئول من التموين فى اللجنة الشعبية لاكن شكلك تعبانة الليلة من الحوامة وزى الزاهجانة شوية اوعك يكون شاغلك كوز ولااعطك عين انصار سنة اخليكى تاخدى راحة وتروقى
مدينتكم جميلة قعدتا فيها 6ساعات
lansing عندي صديقات فى
07-21-2002, 00:25 AM
رقم صفر رقم صفر
تاريخ التسجيل: 05-06-2002
مجموع المشاركات: 3005
صفر ما مرور كل يوم جديد يظهر مذيد من الادلة على ان هناك شى خطا في البورد يحول دون تقدمنا الى الامام.....البعض أقر وطالب بالتصحيح...لكن صوتهم لم يسمع مع صوت الاحتفالات بان البورد عال العال.. ومستوانا الحواري راقى. .ونقاشنا حضارى جدآ. .هناك سؤال لم أجد لها الاجابة .........لماذا لا نعترف بالحقيقة...ونبحث عن الحلول بدلآ من نكرانها وخداع انفسنا......... player
07-25-2002, 08:34 AM
Tabaldina Tabaldina
تاريخ التسجيل: 02-12-2002
مجموع المشاركات: 11844
.. . سلام يا بلير لقد تجنبت وتحاشيت هذا الموضوع كثيرا قد يكون هذا نوع من النفاق الاجتماعى الذى نمارسه هنا او مجاملة لاصدقائنا او خوفا من جرح الغير فى احاسيسهم ولكن طفح الكيل لم ارد ان اخوض فى كثير من المناكفات والاراء التى توصفك بالتبلد والجهل وهذا عيب فينى بلاشك ان اجامل وبذا يكون من جاملته اصبح نجماً فى غير مجاله وتصبح انت متحجرا وجاهلاً .. ان لمتكن متطرفاً لانك لا تميز بين هذا وذاك ومن احد صفات النجومية هنا ان تمدح صديقك لو على خطاء ان تستميل مجموعة لتصبح الشلة التى بها تتوارى ان تكثر المدح كوسيلة دفاع عنارائك ومعتقداتك وكثير وكثير ودوما ياتى الدمار من ...!!؟؟؟ من تعتقد يا بلير
تحياتى واعتذراتى فقط اكون انحرفت ولكننى امارس نوع من التعبير فهلا تقبلتنى هنا وعذرتنى
دمت
07-25-2002, 11:10 PM
PLAYER PLAYER
تاريخ التسجيل: 04-23-2002
مجموع المشاركات: 10283
الأخ تبلدينا اولآ اشكرك لصراحة القول ......وصدق التعبير ثانيآ اجبرتني على احترامك لانك لم تجامل قدرنا ان ننال الذم الصادق......فهى افضل كثير من المديح الكاذب قناعتى هى ان اقول للخاطى خاطى ان كان صديقى وان اقف مع صاحب الحق .....وان لم يكن صديقى والحمدلله خسرنا الكثيرين لرفضنا المجاملة والمنافقة....على حساب الحق ام عن المشكلة الرئيسية في البورد فهي:صعوبة الاختيار بين الصراحة والصداقة.......للاسف الغالبية اختارت الصداقة .........فظهرت المجاملات الفاضحة والمخجلة.....والنتيجة تدهور المستوى الحواري في البورد.....حيث ظهرت نظرية......من ليس معنا فهو عدونا تاتى الدمار من...........اللامصداقية لن اقبل اعتذارك.........لانك لم تفعل ما يؤجب الاعتذار اذا كنت من محبى صراحة التعبير......فمرحبآ بك معى...فى صف المكروهين
لك كل الود player
07-30-2002, 01:34 AM
PLAYER PLAYER
تاريخ التسجيل: 04-23-2002
مجموع المشاركات: 10283
ألأخت أسمحى لي ارد لك في العام..لسببين أولآ حتي يعم الفائدة ثانيأ...سؤالك كبير ما بقدر عليهو براى عشان كده بجاوب لبقدر ليهو هنا....والباقي تقديرآ لك واحترامآ للبورد أعضاء وضيوف...حانزلوا في الجزء الثانى.واجابة لسؤالك انا ما من نجوم البورد....لكن باجاهد عشان اكون
10-29-2002, 04:47 PM
PLAYER PLAYER
تاريخ التسجيل: 04-23-2002
مجموع المشاركات: 10283
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
PLAYER
Wad Aljaili
banadieha
قرشـــو
Al-Masafaa
Habib_bldo
BousH
OmDur
رقم صفر
7abib_alkul
فيس بوك
تويتر
انستقرام
يوتيوب
بنتيريست