|
|
|
 Re: خروف و جردلين و كانون (Re: ابو جهينة)
|
يا سلام يا ابو جهينة
اذا ما اخاف الكذب لقت اني شممت رائحة شواء لحم ولسعة الشربوت علي اللسان
جد زي الضحينا معاهم في السودان
تسلم ويسلم قلمك
ويسلم خيالك
والقابلة عندك ان شاء الله
والعيد مبارك علينا وعليك
| |
 
|
|
|
|
|
|
|
|
Re: خروف و جردلين و كانون (Re: ابو جهينة)
|
يا ابا جهينة يا ابن بلادي
عيدك سعيد
كل سنة وانت طيب
يا حليل ايام زمان وكوم ناس حجة نفيسه
والله شوقتنا للشربوت وما ادراك ما الشربوت وتوابعه
أبدعت ولا تعليق لنا يا ابن بلادي
وغدا نلتقي
| |
|
|
|
|
|
|
|
|
|
Re: خروف و جردلين و كانون (Re: ابو جهينة)
|
يا ابا جهينة
جلال سيد الجلال
طبعا أخوك نباتى ومافى اى علاقة بينه وبين اللحوم
لكن الواحد من السيناريو "الشهى" للغاية الحكيته انت هنا، عربدت بيهو هاجسات الشوق للمة والحبان وكل الطقوس العجيبة الجميلة هناك
مالك علينا بالله يا جلال، يا داب بدينا ننسنا
لكن شكلها كده بايظة بايظة
والعيد مبارك عليكم كلكم
أبوذر
| |
|
|
|
|
|
|
|
|
|
Re: خروف و جردلين و كانون (Re: THE RAIN)
|
أباذر
المطر النازل في زخات حنينة تصابح الوشيش و تقالد القليب
أباذر أيها الفارس النبيل
و الله و بكل صدق ، كتبتها و في خاطري ( أمي رحمها الله ) و كأنني أسمع حوارها مع أبي ( رحمه الله ليلة العيد
و كأنني أسمع خروف العيد و صوت السكاكين و هي تُشحذ
و عشرات الصور التي تكوِن بانوراما ليلة العيد ، و بانوراما يوم العيد
القابلة على أمانيك أبا ذر أنت و الأسرة الكريمة و كل من يعز عليك
أرقد عافية
| |
|
|
|
|
|
|
|
|
|
Re: خروف و جردلين و كانون (Re: ترهاقا)
|
عارفك عزابي اليومين ديل و ممكن تعملها يا ساطور.
على كل حال لو ناوي قول لي من بدري عشان أجيك أنا و حمزاوي و حبيب بلدو و معانا ( شربوت و تونيك ).
| |
|
|
|
|
|
|
|
|
 Re: خروف و جردلين و كانون (Re: ابو جهينة)
|
أبوجهينة..
كل سنة وانت طيب..
ويا أبا جهينة حرام عليك (عوقتنا يا أخي)...
ومن الطقوس ما قتل..ويشكو منزلي قلة النمل..
لا شربوت لا أم فتفت لا كمونية..والشكية لبيدن قوية..
وحتي خرافنا هنا ما بتقول باع.تصدر صوت ما بين الغنمي والبقري.مضقلمة وما عندها ضنب
مليانة صوف يغريك المنظر وما تحت الثياب لا يسر الخاطر ولا الأسنان
طعم اللحم (تفل) وشية الجمر جو البيت بتجيب المطافي..
الله يدك العافية و(إيد مبارك ألينا أليكم)..
| |
|
|
|
|
|
|
|
|
|
Re: خروف و جردلين و كانون (Re: Osman Hamad)
|
المهندس الفنان خالد الحاج
القابلة على أمانيك كلها محققة بإذن واحد أحد
و الله ضحكت ضحك شديد من وصفك لخرفانكم التي أعرفها ، و التي ذبحنا إحداها في لندن في مزرعة خارج لندن ( مزرعة خيول ) ، فإجتمع علينا الخواجات ينظرون إلينا بهلع و نحن ننتزع الكبدة و نأكلها بالشطة و الليمون.
لا تخف خالد ، سنذكرك عند كل كدة عضمة ، و عند كل تقطيع لشريحة شية
أرقد عافية
| |
|
|
|
|
|
|
|
|
|
Re: خروف و جردلين و كانون (Re: ابو جهينة)
|
أخي العزيز و صديقي الصدوق و أخي الفاضل
عثمان حمد
القابلة على أمانيك محققة و كل سنة و إنت و الأسرة الكريمة بألف خير و عافية.
و الله يا عثمان القلوب شواهد.و ربنا يديم الخوة.
و بمناسبة الخرفان ( تربية مشك المريسة ) ، غايتو نحن في عطبرة خروف العيد كان بيجينا مليان شحم من ستات الإندايات ، بالله الشحم يملا صفيحة كاملة و الربيت داك أسكت خليهو. ربنا يقبل.
تحياتي عثمان و أرقد عافية
| |
|
|
|
|
|
|
|
|
|
Re: خروف و جردلين و كانون (Re: ابو جهينة)
|
استاذنا العزيز ابوجهينة
كل سنة والجميع بالف خير
تفوح من هذا البوست رائحة الشواء المتلئة بابداعك في وصف تلك التفاصيل الجميلة
تسلم استاذنا وكتروا من الدكوة للمرارة
لك تحياتي
| |
|
|
|
|
|
|
|
|
|
Re: خروف و جردلين و كانون (Re: maia)
|
مايا
كل سنة و إنت و الوالدين و الأهل بألف خير
كنت قد راهنت على حضورك لمشاركتنا خروف هذه السنة بدكوته و شطته ، و لكن تأتي ( التأشيرات ) بما لا ( تشتهي مايا )
أرقدي عافية
| |
|
|
|
|
|
|
|
|
|
Re: خروف و جردلين و كانون (Re: ابو جهينة)
|
أخي أبو جهينة
كل سنة وانت طيب
أنت توصف ويعجبني وصفك وأعيد قراءتك مرات عديدة ، إلا هذه المرة ،
أبو جهينة نحن في هذه الشقق الضيقة لا نعرف أين نربط الخروف ناهيك عن أن نأتيه بالبرسيم وطشت الماء، ونجعل أولادنا يغازلونه ،، أنا شايل الهم متى أشتري الخروف ، وأين أضعه ، وأين أجد الجزار و الحلال ،،
مشكلة يا أبوجهينة ،، كلامك ده هناك ، ولكن هنا لا .
| |
|
|
|
|
|
|
|
|
|
Re: خروف و جردلين و كانون (Re: ودقاسم)
|
ود قاسم
كل سنة و إنت و أم طلال و الأولاد و البنيات بخير و عافية
أها : حليت ليك مشكلة الخروف ،، جيبوه هنا عندي ،، في حوش كبير حدادي مدادي ترتع فيه عدة خراف ( نعيمية ) ، و يوم العيد تعال أضبح خروفك هنا و بالمرة كمان نضوق مرارتكم ،، برجاك شايل صحني فيهو الليمون و البصل و الشطة و الملح و الدكوة.
البرسيم و الموية علينا.
طبعا قبال تجيبو ، لو ولدك قاسم عاوز يديه كليقة كليقتين برسيم ، مافي مانع ، و يسمع لو ( باع ) ولا ( باعين ) و يتغزل فيهو شويه مافي مانع.
بس أسرع عشان يمكن الحوش يتملي.
| |
|
|
|
|
|
|
|
|
|
Re: خروف و جردلين و كانون (Re: ابو جهينة)
|
عليك الله يابوجهينة مع كل لقمة شية وللا مرارة وللاجغمة شربوت اكل واشرب لى معاك...باقى انا عيد الضحية دا عندى ذى الحلم حلم..بسمع بيهو هنا بس فى البورد..لا خروف لا برسيمو لا شربوت (الصلاة فى تلتلة)
| |
|
|
|
|
|
|
|
|
|
Re: خروف و جردلين و كانون (Re: Raja)
|
سلامات يابت يارجاء وكلام كتير سمح
اسى يارجاء لوكنا بنضحى باسد ذى ماقلتى....كان ح تقولى برضو(وآآآى ياخوانى والله صوت الاسود دا يوم الوقفة بحننى)وكان ح تسألى اسى الزول لوكان بضحى بخروف مالو!!
| |
|
|
|
|
|
|
|
|
|
Re: خروف و جردلين و كانون (Re: Osman Hamad)
|
أخوى العزيز عثمان حمد
كل سنة و إنت طيب
قلت لي الصلاة في تلتلة. ؟ كان كدة برضو مع كل ركعة في صلاة العيد حأدعو ليك معاى , زى مع كل حتة شية و جغمة شربوت حأقول ( و دي عشان حبيبنا عثمان.
تسلم عثمان ، و القابلة على أمانيك
| |
|
|
|
|
|
|
|
|
|
Re: خروف و جردلين و كانون (Re: ابو جهينة)
|
أختي الحبيبة رجاء العباسي
كل سنة و أنت طيبة مع الأهل و الأخوان و الأخوات
و سلام كبير أوي أوي للحاجة الوالدة
أما عن ذبح الخروف في العيد ، طبعا أنا عارفك ( حنينة ) و قلبك ( رهيفوني )
و لو ذبحنا أسد ما أظن حتحني عليه ، لأنو صوتو ( نشاز ) ما زى الخروف يقطع نياط القلب
المهم ، أدي الله و أدي حكمتو ، أمر سيدنا إبراهيم و هو نفذ مشيئة الله.
دي ذكرتني بي نسيبنا من ( أهل العوض )
أول مرة يجي العمرة و أدوه موية زمزم و لم تكن باردة
أخد ليهو جغمة و قال : دي موية شنو ؟
قالوا ليه موية زمزم
قال : ما نقدر نقول شي
دحين إنتي كمان أكلي اللحمة و ما تقولي شي ، و إنت بتاكلي اللحمة إتذكري الخروف لما نطح ليهو زول ، ولا لما أكل طرف الملاية ولا الجريدة اللي لسع ما قريتيها.
| |
|
|
|
|
|
|
|
|
|
Re: خروف و جردلين و كانون (Re: ابو جهينة)
|
ابو جهينة ابو الولف ذاتو..
الشغلة الفيها شربوت دي ما بتمرق مني ابدا
اخوك انا يا بو جهينة رتجي منك وصف للبيت وبجيك طاير بعد 2
مواعيد سودانيين
ياخي شهيتنا الحلة الله يغفر ليك بس
| |
|
|
|
|
|
|
|
|
|
Re: خروف و جردلين و كانون (Re: ابو جهينة)
|
العزيز ابو جهينة كل سنه انت والجميع طيبين ونحن بي حلال ميت مضحين
وكل بوست ليكم يزيد الحنين فلا تكثروا من اكل السواكني فهي من الخراف المصابه بداء المجانين
| |
|
|
|
|
|
|
|
|
|
Re: خروف و جردلين و كانون (Re: ابو جهينة)
|
أها قبل ما أنسي عمك حسبو (حسه اتنكر و غير اسمو) و ود الجعلي هم الحندكونا بالعصيدة الحارة و ملاح النعيمية في عز صقيع رمضان، الكلام ده صاح منهم يا أبوجهينة؟
| |
|
|
|
|
|
|
|
|
|
Re: خروف و جردلين و كانون (Re: Nada Amin)
|
الوجيهه ندى انتى شفتى حندكه هو بعدين انتو فى فرجينيا بالله ما بضحو والله نحنا هنا ما حصل بنفوت ضحيه والذ حاجه بنمشى قروب نضبح واخوك طبعا اهل عوض علمونا
الضبيحه من المتوسطه اها تسعين فى الميه من الناس المعانا
حناكيش بس كل الواحد ما يستلم خروفو يقوم يجدع المراره
اها انا ومعاى واحد دكتور نلملما ليك ونمشى بيتم والله
ياندى رغم انو مرتو من بنات الخرتوم لكن بتظبط المراره
دى زبط والله مرات بتقعد معانا عشره يوم بعد العيد
والعجب الدكوه بالليمون والشطه لكن شرطا الليمون
يكون اخضر او كما تقول الدكتوره وان جيتى للشيه اسكتى
ساكت واقوليك مبالغه الكانون بنختو فى الباكيارد فوق
التلج من فوق ونظبط الشيه جمرا يطقطق والشراريخلع
اها بعداك نقوم ندخلا جوها ونململا فى الكوه والشطه لمن
نعرق وكان مكضبانى اضربى لى تلفون يوم الاحد زى الساعه
خمسه كدى عشان تشمى عطرابة الشيه بعدين مافى مشكله
هسى امشى اجرى عربيه وتعالى لينا لكن كان جايه لازم
تدينا خبر من هسع عشان نزيدلك خروف براك
| |
|
|
|
|
|
|
|
|
|
Re: خروف و جردلين و كانون (Re: WAD ELGAALI#4)
|
العزيز أبو جهينه
العيد يتبارك عليك ..
وجميع أفراد الأسرة الكريمة بألف خير ..
عندنا واحد بحب الكلاوي شديد وبعدين في عيد الضحية ضبح الخروف
الأولاد الصغار حارسين الكلاوي بحبوها زي أبوهم ..
قاموا قالوا لابوهم يابا أدينا الكلوة ..
رد الوالد قاليهم يا أولادي كان الخروف فيهو كلوة ضبحوه ..
ما تنسانا من الشربوت ..
يعيده علينا وعليكم بالخير واليمن والبركات ..
| |
|
|
|
|
|
|
|
|
|
Re: خروف و جردلين و كانون (Re: Nada Amin)
|
العزيزة ندى امين
انامتين حنتكت بالنعيمية والعصيدة انا لى روحى مشتهيهم...حالى ذى حالك دا وكمان اصعب
انت ماقريتى البوست بتاعى المنتظر فيه الجماعة يرسلو لى المرارة والشربوت بالاميل
| |
|
|
|
|
|
|
|
|
|
Re: خروف و جردلين و كانون (Re: ابو جهينة)
|
اتخيل يا أبو جهينة أنا الشربوت في حياتي ما دقتو حتى لمن كنت في سوداني الجوه وجداني، لاكن شكرا على العزومة اللطيفة
و يا ود الجعلي قايتو انت أصله ما حنقدر عليك، أنا الحالة فرحت و قلت أبو جهينة من غير ما يقصد انتقم لينا و "حندكم" بحاجات الخروف دي لكن باين عليك ما بتلعب بروحك أصله و فعلا بقيت كيمو الجاهز لكل المناسبات، على العموم كل سنة و انت طيب و ربنا يحقق كل أمنياتك على رغم حندكتك المتواصلة لعموم البورداب/ات المغلوبين/ات على أمرهم و أحسن ليك أكل كويس لأنه أنا و الجندريات بنصمم في حملة واسعة النطاق ضدك و حنطالبك بعد العيد بالسحب الفوري لامضاءك والا...
| |
|
|
|
|
|
|
|
|
|
Re: خروف و جردلين و كانون (Re: ابو جهينة)
|
الخروف ، الجزار ،السكين ..
الدم ، النزيف ، الألم ..
اللحم ، المرارة ، الشية ..
وبقية مشهد المجزرة ..
اننا كل عام نحتفل على مسرح جريمة متكامل التفاصيل ..
كل عام والله يا أبا جهينة أسأل نفسي :
كيف يمكن أن نستوعب هذه الفواجع ؟ وان اتسعت دائرة المباح
اليست لهذه المخلوقات أرواح ؟
ألا تتألم؟
هل ستبعث يوما لتكأفأ؟الحيوانات لا تبعث ماعدا أربعة منها على ما أعتقد
اذن ما ذنبها وهي تتألم؟
أنا أحترم النباتيين لآنهم يحترمون الأرواح ويكرهون الألم ولا يدنسون أرواحهم بالدماء
لست مفتي .. ولكننا يجب أن نفدي هذه المخلوقات كما فدي المولي الرحيم اسماعيل عليه السلام .. مأ أمكننا ذلك
ولله في خلقه شئون ..
وكل عام وأنتم بخير
| |
|
|
|
|
|
|
|
|
|
Re: خروف و جردلين و كانون (Re: شتات)
|
الأخ العزيز صلاح
كل عام و أنتم بخير و القابلة على أمانيك
كما قالت رجاء العباسي : ندق الصحبة مع الخروف كم يوم ، و يوم العيد ننهش اللحم و ننسى تلك الأيام التي عايشناه فيها .
لله في خلقه شئون
أرقد عافية يا صلاح
| |
|
|
|
|
|
|
|
|
|
Re: خروف و جردلين و كانون (Re: ابو جهينة)
|
ما فيك يا با جهينة تنكر التهمة ...
لو جوك الجماعة لانك سببت في سكر النمل ..
وعباد الله الصالحين ...
علي كل بعيد عنهم ..
مرحي .. بعيد السودان .. وطقوسه الجميلة ..
من شواشي .. شربوت .. عسلية .. مرارة و دكوة ..
و الجيران و الكيمان ..
شكرا علي التواصل والزكريات ..
دوما مبدع ..
| |
|
|
|
|
|
|
|
|
|
Re: خروف و جردلين و كانون (Re: hamid hajer)
|
عزيزي حامد
كل سنة و انت طيب و القابلة على أمانيك
و الله ما بعيدة يا حامد يتهمونني بالتسبب في سكر النمل و بقية الخلق
لاكين الشلربوت هنا في الدمام مع الأهل و الصحبة له نكهة النوم في الحوش في ليلة صيفية
أرقد عافية يا حامد و ربنا يحفظك
| |
|
|
|
|
|
|
|
|
|
Re: خروف و جردلين و كانون (Re: ابو جهينة)
|
ابوجهينة
بالعربي اخيرا
والله حكاويك ذكرتني ايام الطفولة والفرحة بالخروف
زي ما قلت قبلا..انا بعييييدة حتي عن انجلترا
العيد جليد في جليد
لم يخففه الا وجودي في ضيافة اخوات عزيزات علي من منبرنا الكريم
اما الخروف...فنسيت شكله كيف
انشاء الله العيد الجاي في سوداني الجوة وجداني
قول امين
| |
|
|
|
|
|
|
|
|
|
Re: خروف و جردلين و كانون (Re: ابو جهينة)
|
ااااااخ يا ابو جهينه ما كتلتني عديل كده ,,, ياحليل الشيه و المراره و الكمونيه ,,, انا ضربت لناس بيتنا يوم العيد و سلمت عليهم كلهم , لكن امي كانت اخر زول جاني بعد سالت منها قالت لي يا بتي ما كنت بانضف في الكمونيه  ,,, قلت ليها اااه لو ترسلي لي صحن كمونيه تكوني ما قصرتي ,,,,
و كل سنه و الجميع بخير
| |
|
|
|
|
|
|
|
|
|
Re: خروف و جردلين و كانون (Re: ابو جهينة)
|
معقولة يا أبوجهينة
بكيت وحدي في الغربة وسط خواجات لا يعرفون يا سيدي
المرارة والكمونية والربيت ، فبدل الشاربوت يحتسون
شراب أجارك الله منه في ليالي عطلاتهم الأسبوعية ، وصدقني
لم أجد الي الأن أطعم من عرقي صديقنا جاكوب وعمتنا
تريزا في قنب الحلاويين ..
عذبتني كتابتك كثيرا وأنا مأخوذ بذكريات تأخذ الواحدة
برقبة الأخري لتزيدك في الوحدة بكاء لحد البلل!
ياخي مالك علينا؟
علي الأقل فأنا سأتجاوز محنتي لأني سأكلم خطيبتي بعد قليل
لكني أخاف علي أصدقاء لا ينعمون في الدنيا الا بقليل
القليل ..
لك التحية وأنت تنتزعنا من حياة في غاية السكون
لك مودتي
| |
|
|
|
|
|
|
|
|
|
Re: خروف و جردلين و كانون (Re: Abuobaida Elmahi)
|
ابوجهينة والشية..
والمرارة النية...
عملت لينا كية..
ونحنا فى السعودية...
عذابة..منسية..
قلوبنا مكفية..
ما متذكرين بنية..
وعاملين افندية..
وحافظين الالفية..
وما بنملك عيدية..
شقالين وردية..
فى مبنى العقارية
كل سنة وانت طيب..الهنود طبعا بضحوا التيوس لازم يحضروه
قبل ثلاثة ايام وعشان يجرتقوه..وتلقى عيالهم يتنافسون بها
فى السوق وشوارع المدينة...بكرى عيد...يقوم اخنا بكرى يزعل مننا
البكرى هو التيس
ولك ودى
| |
|
|
|
|
|
|
|
|
|
Re: خروف و جردلين و كانون (Re: abuguta)
|
الاخ العزيز ابوجهينه
كل عام انت والاسره بالف خير وصحه
وربنا يحقق كل الامنيات الطيبات
رغم دخولنا المتاخر وبعد 5يوم من العيد
لكن نعشم هل هناك باقى من الخروف والشربوت
حاجه , انشاء الله كمونيه ؟
| |
|
|
|
|
|
|
|
|
|
Re: خروف و جردلين و كانون (Re: ابو جهينة)
|
الأخت آمنة شبيكة
كل سنة و إنت طيبة و بألف خير
رد الله غربتك سالمة غانمة
ريحة الكمونية طاقة في البوست دة ، لو كنت عارف عنوانك كنت رسلت ليكي ( بالدي إتش إل )
معليش يا آمنة ، القابلة على أمانيك من ضمنها الكمونية
أرقدي عافية
| |
|
|
|
|
|
|
|
|
|
Re: خروف و جردلين و كانون (Re: ابو جهينة)
|
الأخ العزيز أبو عبيدة الماحي
كل سنة و إنت بألف خير و عافية
و الله ذكرتني أيام الغربة الصعبة في أمريكا و التنقل بين لندن و باريس و أسبانيا ، كنت أشعر بنفس شعورك هذا في رمضان و العيدين
لكن هنا في السعودية الأمر طبعا يختلف
رد الله الغربة
و القابلة على أمانيك
| |
|
|
|
|
|
|
|
|
|
Re: خروف و جردلين و كانون (Re: ابو جهينة)
|
الحاج محمد الشيخ
الحج مبروك
القابلة على أمانيك ( طبعا العروس على راس القائمة )
باقي حبة شربوت في قعر الجردل ( نصو مشق ) ، بس ما حينفع معاك ( ما أسكر كثيره فقليله حرام )
تسلم
| |
|
|
|
|
|
|
| |
ابو جهينة
اساسي
THE RAIN
ترهاقا
Osman Hamad
ودقاسم
Raja
بلدى يا حبوب
الفاتح يسن
WAD ELGAALI#4
معتصم دفع الله
شتات
haneena
hamid hajer
انور الطيب
Abuobaida Elmahi
abuguta
mohamed elshiekh
shiry
فيس بوك
تويتر
انستقرام
يوتيوب
بنتيريست