بعض من ملامح العرس الوئيد "يوميات العصيان الأول...
إلى شباب ثورة العصيان المدني: الحرية لا تقبل المساومة!
منبر التجانى الطيب للحوار بواشنطن يقيم ندوة بعنوان الازمة السودانية و افاق التغيير يتحدث فيها على الكنين
العصيان المدني...... تجميع فيديوهات للتوثيق ومزيد من النشر
19 ديسمبر .. إني أرى شعباً يثور !!
صدور... الهلوسة
منتديات سودانيزاونلاين    تحديث الصفحة    مكتبة الفساد    ابحث    اخبار و بيانات    مواضيع توثيقية    منبر الشعبية    اراء حرة و مقالات   
News and Press Releases    اتصل بنا    Articles and Views    English Forum    ناس الزقازيق   
مرحبا Guest [دخول]
اخر زيارك لك: 12-08-2016, 06:13 AM الصفحة الرئيسية

مكتبة سلمى الشيخ سلامة(سلمى الشيخ سلامة)
نسخة قابلة للطباعة من الموضوع   ارسل الموضوع لصديق   اقرا المشاركات فى شكل سلسلة « | »
اقرا احدث مداخلة فى هذا الموضوع »

صينية الغدا

03-13-2007, 04:56 AM

سلمى الشيخ سلامة
<aسلمى الشيخ سلامة
تاريخ التسجيل: 12-14-2003
مجموع المشاركات: 10753

للتواصل معنا

FaceBook
تويتر Twitter
YouTube

كيف احذف مداخلة من بوستى

صينية الغدا




    زمان، فى السودان كان فى صينية غدا ، كنا نلتف حولها فى ما بعد الظهيرة ، يكون برنامج الرياضة على الهواء ، الصينية لا تخلو من عدة اصناف (مفروكة ، طبيخ ، ايا كان نوعه ، وسلطة خضراء ،وارز او مكرونة، الكسرة مصنوعة فى البيت اما ان تصنعها ام الاسرة او تحل محلها الجارة او واحدة مختصة فى هذا الشان ونسميها العوّاسة، توضع الكسرة فى حواف الصينية وعليها الرغيف ) يتنادى اهل البيت للغداء ، دائما هناك صينيتين ، واحدة للرجال فى الديوان، والثانية للنساء وعلى النساء غالبا انتظار صينية الرجال ، وكذا الاطفال الذين يحلون فى المرتبة الاخيرة او ما قبل الاخيرة ، الغداء كان موسوما بانه ( بختوه البنات ) اللاتى يجئن من المدارس او العمل ، لا يهم مدى تعبهن لكنهن مرتبطات بذلك العمل وعليهن اداؤه .
    احيانا يحل ضيوف فجأة من اى مكان فتسمع الهمس بين البيوت من خلال النفاج او الطاقات المشرعة على البيوت احدها على الاخر ، حوار ملئ بالامل فى ان تجد هذه او تلك بعضا مما تبقى لدى الاخرى (يختى ماعندكن باقى ملاح و كسرة جونا ضيوف فجأة) وحين لا يتأتى ذلك يكون من الضرورى طبخ (صحن ارز ، او صحن مكرونة لانهما سريعتا الطهى ) لا يخلو بيت من البيوت من صحن اضافى هو ( الحلو ، سواء كان بالليمون او الكركدى او ما تبقى من قمردين رمضان ، وفواكه غالبا ما تكون الموز او البرتقال لان الموظفين كانوا قادرين على شراء تلك الانواع ، لم يكن التفاح الا ثمرة نراها نحن ابناء الموظفين والعمال فى ايدى بعض اهلنا من ذوى الحال الميسور او ان يسافر احد الافراد الى الخارج ليعود بتلك الثمار او ما شابهها من العنب ، حتى ان كانت موجودة فهى باهظة الثمن نراها فى اماكن بيع الفواكه التى لا نمر عليها كثبرا حيث الاب هو المختص بتلك الشئون ، فهو من يجلب اول كل شهر التموين من زيت وفول وعدس وارز وسمن حيث كان السمن يباع فى سوق ابجهل الاكثر شهرة فى الابيض ، تمتلئ شونتنا الصغيرة فى المخزن بما يمكن لوالدنا ان يجلبه اول كل شهر ، والخضار ياتى كل يوم جمعة لنعد منه بعض الاكل للايام التالية حيث التلاجة كما كانت تقول امى تخفف عنها عناء الطبخ اليومى )
    فى بيتنا فى امدرمان فى حياة جدتى كان البيت لا يكاد يفرغ من الزوار البعض يجئ من كسلا والاخر من ملكال والبعض يحل من دنقلا ، طلابا وموظفين يجعلون من (الحوش) منزلة لهم ، كانت حبوبة نفيسة تطبخ العديد من الاصناف لمواجهة تلك الجموع دون كلل او ملل ، تقول دائما( ربنا ما يطفى نار البيت ) فتظل النار موقدة فى المنقد منذ شاى الصباح الى العشاء فى الامسيات التى تشهد ايضا اعدادا من الضيوف تكاد لا تنقطع ، صينية الغداء حين يكون ثمة ضيوف فانها تختلف قليلا عن الغداء العادى لاهل البيت ، ففيها لحم محمر واللحم لم يكن الا ضانا لان لحم البقر كما كانت تقول جدتى ( بجيب المرض ،ما سمح ) او كان جدى يجود علينا بحمل فى يوم الجمعة وكذا كان ابى يفعل لكن هنا يتشارك الجيران لشرائه وهو لا يتعدى الجنيهات ، تتقاسمه الاسر ، او تجدهم يوم الجمعة فى غداء جماعى يلتم شمل الاسر فى بيتنا فى السكة فى مدينة الابيض
    جارنا العزيز عم السربلنجه كان يربى كما هى العادة فى تلك الانحاء مدينة الابيض (الاغنام) وكل ما تصادف ان حاز على (سخل ) كان يناديه (عبدالحى)ويكون ذلك اليوم الذى غالبا ما يصادف الجمعة يوم نحر عبد الحى منذ الصباح الباكر تلتف امى عليها الرحمة وجارتها العاجبة لتلك المهمة ، حيث كنا لا ناكل لحم ( العتان ) البعض منا يتكل على الفول او العدس ، لكن اليوم ( كان جمعة )تجتمع بعض الاسر من الجيران فى مائدة تخرج اليهم مطهوة ولذيذة ، تلك الايام لن تعود ، خاصة حين كنا فى القضارف حيث( (الحمل) يجئ من (تسنى ) ومعه اشياء اخرى لم نعد نراها كالحلوى والصابون البدرة ، فحين يعود والدى له الرحمة من احد سفرياته الى تسنى التى كان يصل اليها خط السكة الحديد كان يجيئنا محملا بالبضائع ( الصابون المحشو بالهدايا من كبابى زجاجية وحلوى كان يقول عنها انها من الحبشة )
    وتبقى تلك الايام فى الذاكرة حيث لصينية الغداء طعم وللناس التفاف حولها وونسة ما بعد الغداء التى تستمر بعد شرب الشاى حتى العصر يخرج ابى الى الصلاة ونقوم نحن لغسل الاوانى ونظافة البيت حيث لا يمر يوم دون ان يكون لدينا ضيوف يجيئون فى العصريات ولا يخرجون احيانا الا بعد العشاء ، وغالبا ما يكون التاكسى هو وسيلتهم يكلمونه من البيت ويجئ طائعا مفرهدا لان التاكسى كان وسيلة من وسائل الانتقال بين الاحياء التى لا تمر الباصات عليها
    الان بات كل شئ غريب بطعم الجرى والعجلة ، يالذلك الزمان البهى ، هل سيعود؟
                   |Articles |News |مقالات |بيانات

03-13-2007, 05:15 AM

معتصم عبدالرحيم
<aمعتصم عبدالرحيم
تاريخ التسجيل: 01-24-2007
مجموع المشاركات: 425

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: صينية الغدا (Re: سلمى الشيخ سلامة)

    الاخت سلمي

    تحياتي

    تجيء نلّم شاي الصباح والغداء بتاعي دة ...ونلّم جماعة البورد ديل ونرجع بيهم للزمن السمح داك

    زكرتي السكة حديد

    زكرتي تسني

    زكرتي الحبشة

    زكرتي كثرة الضيوف .. والحوش سكن

    كل هذه الاشياء ...قاسم مشترك .. وايام لها ايقاع


    لك التحية


    معتصم العربي - من الزمن السمح
                   |Articles |News |مقالات |بيانات

03-13-2007, 05:24 AM

منوت
<aمنوت
تاريخ التسجيل: 03-18-2002
مجموع المشاركات: 2637

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: صينية الغدا (Re: سلمى الشيخ سلامة)

    أمو الحنينة ،
    سلام ،
    و تحيه ،
    و حمد الله " ألف " على السلامه ...


    أخوك " و اللهِ " قرمان ليهو لي شية جمر ،
    و عصيده بي ملاح تقلية ( لحم غزال ) !!
    و كمان جرجير في سلطة من الزمان دااااااااااااااااك !!!!!!!


    تسلمي ، يا أمو
    و ابقي مواصله الكتابه اللذيذه دي !ا
                   |Articles |News |مقالات |بيانات

03-13-2007, 05:26 AM

سلمى الشيخ سلامة
<aسلمى الشيخ سلامة
تاريخ التسجيل: 12-14-2003
مجموع المشاركات: 10753

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: صينية الغدا (Re: سلمى الشيخ سلامة)

    يا معتصم يا اخوى الزمن الهسى دا زمن ما زمنا ، نحنا اتربينا فى الحيشان ، تعرف الحوش الكان تدخل بالشرق تمرق بالغرب ، ممددطويل وعريض ، النفاجات، الناس ذاتا هينة ولينه وسمحة وهدية ورضية ، اللقمة بتاكلا كان فى بيتكم ولا فى بيت الجيران هسى الناس بقت مشدوهة فى الفارغة ومقدودة ، حتى برنامج الرياضة ذاتو بقى مسيخ ، لمن مشيت السودان متخيلة الناس زى ما كانوا اول ، صينية الغدا والونسة ، فى بيتنا الحاجة دى ما بتنعمل الايوم الجمعة ، اها قلت ليهن الصينية حقت الشارع شيلتا اتزامنت مع شيلة صينية الغدا بقن الاتنين مافى
                   |Articles |News |مقالات |بيانات

03-12-2007, 08:28 PM

سلمى الشيخ سلامة
<aسلمى الشيخ سلامة
تاريخ التسجيل: 12-14-2003
مجموع المشاركات: 10753

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: صينية الغدا (Re: سلمى الشيخ سلامة)

    يا منوت تسلم اخوى تعرف البيوت بقن نيرانا مطفيات ، وحات ابوى تدخل البيت اهلو يتضايرو خاصة لو وكت الغدا ، لانو كيلو اللحمة ما بنهبش والخضار ما بنهبش ، غايتو فى ناس عايشين (سلكمة ) وشفت ناس فى بعض الاحياء البعيدة فى الاطراف ديل يا منوت والله بس راجين الكفن ،مافى لا صينية غدا ولا هم يحزنون، مشيت البان جديد، قمت عملت تحقيق صحفى مع بعض التلميذات ، سالتهن بتاكلو شنو فى الغدا ؟ قالو لى (عصيدة بملاح ويكة ) وفى الفطور ؟ قالو برضو عصيدة بملاح ويكة بس فى الغدا بكون فيها طماطم مهروسة جواها، والعشا ، واحدة قالت لى مرات الفطور ولا الغدا ما بنلقوهو ، انقر ما بكيت ؟
                   |Articles |News |مقالات |بيانات

03-12-2007, 08:35 PM

منصوري
<aمنصوري
تاريخ التسجيل: 09-28-2003
مجموع المشاركات: 2366

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: صينية الغدا (Re: سلمى الشيخ سلامة)

    سلمى الشيخ سلامة
    والله عاد ماخليتي شئ.. سرد رائع متسلسل.. كتابة دقيقة..ولغة رصينة سليمة من الأخطاء الإملائية موش زي معظم ناس البورد البيكتبوا غلط.. شئ مبهج بحق
    ..........
    الإسم ماغريب على.. زمنا وزمنك ياهو الزمن السمح دا لمان كانت صينية الغداء سمحة
    هسه بقا غدا ذاتو مافي..اي واحد من أفراد الأسر الكادحة ياكل أي حاجة وانتهى الموضوع
    ........
    ناس الشيخ سلامة ديل ناس كبار في أم درمان تقابلنا لافتات دكاكينهم.. ومسميات لافتاتهم..ماعارف اسم على اسم والله توافق..ويمكن كمان في واحد منهم دكتور عندو عيادة إن شاء الله ديل يكونوا أهلك.. ديل ناس علم وناس مال وتجارة.. وبعضهم متفرق في أنحاء السودان..
    المهم عجبتنا صينية الغدا
    زادك الله من علمه وفتح عليك..
                   |Articles |News |مقالات |بيانات

03-12-2007, 09:04 PM

صديق الموج
<aصديق الموج
تاريخ التسجيل: 03-17-2004
مجموع المشاركات: 19884

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: صينية الغدا (Re: سلمى الشيخ سلامة)

    ناس الشيخ سلامة ديل ناس كبار في أم درمان تقابلنا لافتات دكاكينهم.. ومسميات لافتاتهم..ماعارف اسم على اسم والله توافق

    منصورى سلام يا حبيب ..ديك ناس ابو سلامة العندهم دكاكين ولافتات
    لكن ناس سلمى ديل اغنى من ديك بكتير ،مش قالوا القناعة كنز لا يفنى
    وبعدين بالله فى كنز اكتر من سلمى دى..هسع العندو زى سلمى
    بفقر تانى.
    سلمى ان شاء اله راجع لى صينية الغداءوبحكى ليك،،،،
                   |Articles |News |مقالات |بيانات

03-12-2007, 10:05 PM

سلمى الشيخ سلامة
<aسلمى الشيخ سلامة
تاريخ التسجيل: 12-14-2003
مجموع المشاركات: 10753

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: صينية الغدا (Re: سلمى الشيخ سلامة)

    يا صديق يا موج ، ماتخلى الزول يقول ياخى ، ناس سلامة ديل مرة واحد جانى ليك هايج لانو قال انى (فاسدة بكتب فى الجرايد وبشتغل فى الاذاعة ) عارف لانو فى زول اسمو الشيخ سلامة ودا شيخ كبير الظاهر عليهو والزول محتج كيف بت الراجل الصالح دى تبقى فاسقة وتسوى متل الحاجات دى اذاعة وجرايد ، قلة حيا ، المهم اقنعتو كما لم يقنع احدا الديك انو الاسما بس المتشابهه وبعدين ابوى زاتو ما كان زول هين رحمة الله عليه ، كنا لمن نعمل الغدا لازم الرادى يكون فاتح على اذاعة لندن ، بسمع النشرة بتاعة تلاته ، وبعد النشرة فى لندن ، بخت ليك عدد واحد سفة محترمة ويجيب كتاب الاغانى عشان ينوم بيهو لكين ما بنوم ، بقرا بصوت عالى وبتكيف لمن نشاركو النقاش ، ولا الاستماع حقيقة ، صوتو كان جميل جدا ، وقرايتو رغم انه ما قرا مدارس (الخلوة والكتاب ) لكنه كان شخص قارئ من الطراز الاول ، ومحلل سياسى بارع ، له الرحمة ، كان لمن يجى يعنى مواعيد الغدا جات ، نتطاقش عشان نعمل الغدا ، البنات كنا بناكل فى الراكوبة ، والاولاد وابوى فى الديوان ، ولازم قبل مانخت الغدا نخت الشاى فى النار ، طبعا لافى بوتجاز ولا ديزل ، فحم ساكت ، ولا بابور الجاز ان توفر ، المهم دخلت الصينية بى جاى من الديوان ، مرقت صينية الشاى ، والعصر لازم شاى اللبن المقنن ، ايام يا صديق يا خوى
                   |Articles |News |مقالات |بيانات

03-12-2007, 11:06 PM

نادر السوداني
<aنادر السوداني
تاريخ التسجيل: 08-21-2006
مجموع المشاركات: 1374

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: صينية الغدا (Re: سلمى الشيخ سلامة)

    الصديقة والزميلة سلمي بنت الشيخ سلامة إزيك
    لك التحية لهذة البوست الجميل اللزي الهبة الزكريات الامدورمانية العظيمة لقد كانت الاسرة في السودان
    تقدس مواعيد صينية الغداعندما تجتمع حولها يتناولون الطعام بعد عناء يوم شاق
    كما تاخز صينية الغدا طريقها الي خارج المنزل الي بيوت الجيران للمشاركة داخل صيوان العزاء
    لقد كان اهل الحي عائلة واحدة تجمعهم صينية الغدا وصينية العشاء في احزانهم اوفي افراحهم لكي من الحب اطهرة

                   |Articles |News |مقالات |بيانات

03-12-2007, 11:25 PM

سلمى الشيخ سلامة
<aسلمى الشيخ سلامة
تاريخ التسجيل: 12-14-2003
مجموع المشاركات: 10753

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: صينية الغدا (Re: سلمى الشيخ سلامة)

    يا نادر او محمد نادر لكم طال بنا الزمن فى المهاجر ، مشيت مؤخرا السودان ، نفس الحاجات الزمان ونفس الطقوس ، بيت البكا وصينية الغدا الفيهو ، زمان حبوبة كانت بتكتب اسمها فى طرف الصينية لمن توديها لبيت البكا والصحانة برضو تلقى الصحن مكتوب فيهو الاسم ولا الحرف الصوانى الكبيرة منقوش فيها الاسم بمسمار والصحانة بالبوهية دايما لونا لبنى او رمادى ، او ل ما دخلت المدرسة المتوسطة وبقيت اعرف اكتب الحروف الانجليزية جبت ليك اللون اللبنى وبالفرشة كتبت ليك الحرف الاول من اسم امى او حبوبتى لغاية هسى بعض الحاجات قاعدة وبشاكل كان لقيت زول شال حاجة من حاجاتا ، كان صحن ولا صينية ولا حلة
                   |Articles |News |مقالات |بيانات

03-13-2007, 00:12 AM

علي طاهر
<aعلي طاهر
تاريخ التسجيل: 03-02-2007
مجموع المشاركات: 108

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: صينية الغدا (Re: سلمى الشيخ سلامة)

    بصراحة بوست جميل و شيق جداً
    بنفس النكهة و ذات الرائحة ترتادني تلكم الزكريات الجميلة ..
    صينية الغداء المتزامنة مع موسيقى عالم الرياضة ،،
    حيث أول بوادر تجهيز الصينية دخول والدي و عمي الى المنزل حيث كانا يعملان في ابو رجيلة سوياً
    ابو رجيلة لمن لا يعرفون الإسم ( شركة مواصلات ولاية الخرطوم ) هسي ما عارف موجودة و لا اتخصخصت و لا اتفرتكت
    ( شركة النقل البري ) زماااااااااان كان اسمها كده ،،
    كانت للحياة جميع ألوان الفرح كما كانت تسير الأمور على ما يرام ،،

    آخر إجازة لي في السودان شهر كامل ما حصل اتلمينا كلنا في صينية واحد لا غداء و لا فطور حتى العشاء الذي من المفترض ان يكون فيه كل أفراد المنزل حضوراً نتناوله فرادى ..

    و ياااااااااا حليل ايام زماااااااااااان ...
                   |Articles |News |مقالات |بيانات

03-13-2007, 00:55 AM

سلمى الشيخ سلامة
<aسلمى الشيخ سلامة
تاريخ التسجيل: 12-14-2003
مجموع المشاركات: 10753

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: صينية الغدا (Re: سلمى الشيخ سلامة)

    تعرف صينية الغدا كانت خشم بيوت يعنى كان فى حقت الضيوف حقت الضيوف دا احلى صينية لانها مدنكلة ، وفى حلو بعد داك طبعا نحنا تقليد فواكه دا بالمناسيات فى المناسبات الرسمية ،اها صينية الضيوف دى فيها المحمر والمشمر ، مرة كانت امى الله يرحما عاملة لينا كفته واحد من العيال قال داير زيادة قام التانى قال ليهو فى كفته بزيدوها ؟وفى حاجة تانية اسمها غدا المشاطة دى لمن حبوبة يكونوا عايزين يمشطها بكون فى غدا فوق العادة ، وما بنشوف الاكل الا بعد تاكل المشاطة ، كنا بنمشى سوق الموردة نجيب السمك من عم السكى ، وبنجيب الرغيف الشمسى والسجاير للمشاطة ، وامى كانت بتعمل الغدا وتختو فىى النملية عشان ما فى زول يهبشو، ويا ويلك وسواد ليلك لو هبشت غدا المشاطة ، لانها غالبا بتشيل حسها ، اها المشاطة دى ذاتا بتقوم تجى الضحى تكون القهوة مدورة، بعد داك تبدا العملية بتاعة المشاط ،تلقاها قاعدة فىالبنبر فى السرير ولا العنقريب،وامى قداما، مرات بتنوم، انت الزول لمن زول يسرح ليهوشعرو بنوم ليه؟ نحنا كنا بنعمل حاجة محددة بندق الطوب الاحمر عشان بعملو بيهو (الوش ) زى البودرة ، وبعد المشاط بتبدا عملية المكياج بالحيمور ( الطوب الاحمر الناعم )وبالخيط تجبد ليك الوش يبقى ناعم وجميل ، وبعد داك فى وصلة ، بجو حبوباتى التانيات الما دايرات مشاط كامل بعملو حاجة اسمها (كسر المسيرة ) يعنى بس الشعرات القداميات ، وهاك يا ونسة وضحك ، نحنا بطردونا عشان ما نسمع كلام الناس الكبار، وبعد البرنامج دا كلو فى برنامج تانى القهوة العصرية متنتنه وفناجين ما تمرق الا فى المناسبات الكبيرة ودى واحدة منها ،طولت عليك مش
                   |Articles |News |مقالات |بيانات

03-13-2007, 01:08 AM

علي طاهر
<aعلي طاهر
تاريخ التسجيل: 03-02-2007
مجموع المشاركات: 108

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: صينية الغدا (Re: سلمى الشيخ سلامة)

    الزكريات الجميلة لها وقع خاص على النفس ..
    فاحكي ما طاب لكي من الحكي و نحن كفانا الاستمتاع بهذه الدوزنة على عصب الزمن الجميل ..
    قهوة الضحوية و شاي المغربية و اشياء كثيرة لها في وجداننا مساحات كبيرة من الحب الدائم ..
    فما اروع ما تنثرين من ورود و رحيق في هذه المساحة ...
    و لكي كل الود ...
                   |Articles |News |مقالات |بيانات

03-13-2007, 01:58 AM

مصطفي سري
<aمصطفي سري
تاريخ التسجيل: 03-07-2007
مجموع المشاركات: 2339

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: صينية الغدا (Re: سلمى الشيخ سلامة)

    جوعتييييييييييييييييييييييييييييييييييييينا
                   |Articles |News |مقالات |بيانات

03-13-2007, 04:14 AM

سلمى الشيخ سلامة
<aسلمى الشيخ سلامة
تاريخ التسجيل: 12-14-2003
مجموع المشاركات: 10753

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: صينية الغدا (Re: مصطفي سري)

    مصطفى سرى يا خى انت هنا ولا هناك معانا ولا مع الخيانه ؟انشا الله بقيتو تلاته، فى واحد صاحبنا زمان كتبت عنه قصة اسمها (وحيد جدا ) المهم فى المسالة انه قالو ليهو انت خلاس اشتغلت ومفروض تتزوج ، قام اتزوج ، فى السنه الاولى جاب ولد، لا قبال ما يجيب الولد شابكنو ليك العروس اضانا ما صفرت ، المهم اضانا صفرت وجابت ولد ، بعد سنتين قالو ليهو الولد دا ماببقى براهو ببقى معجن واخير تجيب ليك زول معاهو ، جا ولد تانى ، تانى قامو قالو ليهو كدى ما شترا القصة دى ؟ اخير تجيب ليك بنية ، قاموا جوهو تيمان ، برضو اولاد ، بقى عندو اربعة اولاد بعد دا النقة بقت حقت الزوجة ، دايرة بت ، لمن وصلو عدد الاولاد سبعة الزول قال ليها مش البت دى فى الكوشتينه ما بدورا ، وهج خلى البلد ، دحين انت يا عشا البايتات سوى ليك حوار قوامك ، الدنيا ما معروفة ، على الاقل وكتين تكبر تلقى ليك زول ينفعك ، ولا تبقى زى صاحبنا ابراهيم القال ليهو ابوه عرس عشان تجيب ليك اولاد ينفعوك ، قال لابوه يعنى انا هسى نفعتك بشنو ، ولا امكن كمان تبقى زينا راجى بيوت العجزة ؟ يوم كانت معانا اشراقة مصطفى الله يطراها بالخير ، هنا فى ايوا ، المهم جاتنى زعلانه ووشها محنوف ، مالك يا ست الناس ؟ قالت لى الاولاد طنشونى سلام بارد وانا مشتاقة ليهم لى كم يوم منهن ، قلت ليها دا هين الكلام يعدين ما يودونا بيوت العجزة ، جنس وليداتنا ديل الله يهون
    وفى مناسبة العرس دى عادل صاحبنا شفاه الله عادل سليمان المهندس ، امو قالت ليهو يا ولدى عليك ما تعرس ، قال ليها ليه ؟ قالت ليهو عشان مرتك تزيد السم الهارى البتشربو دا موية متل ما بزيد لابوك ، اها الغدا كيف؟
                   |Articles |News |مقالات |بيانات

03-13-2007, 02:15 AM

سلمى الشيخ سلامة
<aسلمى الشيخ سلامة
تاريخ التسجيل: 12-14-2003
مجموع المشاركات: 10753

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: صينية الغدا (Re: سلمى الشيخ سلامة)

    تعرف يا على فى بربر الغدا عندو تقاليد راسخة ، خاصة لمن يكون فى ضيف عزيز ، كنا لمن نمشى بربر فى الاجازات بكون الغدا كلام تانى ، كل الاهل بجيبو غداهن، وخاصة اهلنا القريبين ، ناس بسيطة وغدا بسيط اهم حاجة يكون فى كسرة وملاح مفروك وديل من الله خلقنى ما بحبهم ، بقوموا يصروا انى اكل ، وباكل لكين بودونى المستشفى مش لانى عيانة وبس لكين لانى بجينى مغص غريب ، وبعدين فى بربر (بلقموا ليك) تعرف كان ما اكلت عيب خاصة اللقمة البتديك ليها حبوبتك ، بتكون كبيرة ، وتقرب تخنق ، المهم انهم بكبوا الاكل كلو فى صينية كبيرة وبلخبطوا المفروك مع المطبوخ مع السلطة مع اى حاجة وبلقمو ليك ، وبعد داك فى طقس (كد العضم ) لازم تكد العضم ، ففى واحدة من ناس بربر اهلنا ديل قامت جات الخرطوم، بتاكل بطرف اصابعينا ومعروف انها بتحب الطعام جدا ، قاموا قاالوا ليها انتى مالك يختى ما بتاكلى ؟ قامت قالت ما ترانى باكل ، واحدة قامت ادتا عضم ، قالت ليها اول ناس الخرتوم بكوا العضم ؟قالوا ليها كيفن يعنى ما بنكد العضم ؟ قالت لى عمتى كانت حاضرة القصة دى ، الساعة الجدعت توبا متل هناك وما خلت عضم للباقيين
    لكين الغدا فى بارا ، الما اكل فى بارا ، يا خسارة ، مرة مشينا بارا كان معاى اخوى الكبير الله يديهو العافية، معاوية ، مشينا لخالنا كان ناظر مدرسة بارا المتوسطة ، المهم، اول ما جينا داخلين البلد هو عرف اننا جينا لانو الخبر وصلو قبال ماالباص يصل المدينة حتى ، وصلنا وقعدنا ، جونا اصحابو قالو الا نمشى معاهن البيت معزومين عشا ، البيت بيت ناس عمك كرداوى واولاده ، الله يرحم محجوب كرداوى كان صديق معاوية ، المهم جابو العشا وبعد العشا مباشرة اطنان من الكنافة ، طبعا بارا اشهر حاجة فيها الكنافة بعد البصل والليمون والبنات السمحات ،دى بين قوسين ، اكلنا الكنافة كل زول شال ليهو قطعة، لكين البخليك منو ؟ طلاقات تتخابت وحليفة ما ليها حد، المهم نزلنا السواقى بعد داك غنينا وفرحنا وامسينا وصبحنا ، ونحنا كما انحنا ، اليوم التانى كان الغدا ، اتغدينا واول ماشالو صينية الغدا جابو الكنافة ، خلاس وصلت الحد من الكنافة ، لكين برضو الحليفة وتاكل ولا بزعلو ، الباقى شلناهو معانا لانها كميات تفتح محل عديل
    امكن فى اى بلد من بلاد السودان فى تقليد غدا خاص ، العارف يقول ، ودعتكن الله موقتا
                   |Articles |News |مقالات |بيانات

03-13-2007, 02:27 AM

صديق الموج
<aصديق الموج
تاريخ التسجيل: 03-17-2004
مجموع المشاركات: 19884

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: صينية الغدا (Re: سلمى الشيخ سلامة)

    سلمى كيفك...ياحليل صينية الغداء البتلموا فيها الناس انا احكى ليك
    واحدة.
    فى مرة كان عندنا ضيوف فى البيت وقامت امى رسلتنى جبت ليها علبة
    اناناس من الدكان وزمنا كان اسمها (الفرطة)لعلها استنباط من FRUIT
    وكان ذلك امر نادر الحدوث ويتزامن مع هكذا دعوات فقط المهم جبتها
    امى سلخت منها الورقة وقالت لى ارميها فى الزير الوسطانى..
    وكان الزير الوسطانى بمثابة الثلاجه ويؤدى عملها نوعا ما،ولكننا قانعون
    وقد فعلت ما امرت،بعد شوية راودتنى الامارة بالسوء،فاخذت مفتاح
    الصلصة ومشيت طلعت العلبة وقديتها من جنبة واحده ومصيت الموية الفيها
    وعندما اردت ارجاعها الى مكانها،ابت العلبة بت الكلب ان ترجع الى
    قعر الزير..وحاتكم طرورة بس..يا يمة تنخت عليك ما تغطسى وابت
    العلبة ان تغطس ،لم اكن وقتهااعرف عن ضغط الهواء او ارخميدس،المهم عنت
    لى فكرة مشيت حليت لى سكر فى مويه وجبتوا ليك اعبى فى خشمى وارجع للعلبه
    الى ان غطست العلبة ورجعت قعدت وكان شىء لم يكن،المهم الرجال اتغدوا
    انا جريت للعلبة ومفتاحى فى ايدى ،امى قالت لى جيبها هنا بتدفقها
    ولم اعبألكلامها، ولما جاءت على قلت ليها خلاص قديتها وهو يشهد الله القد
    القديم..المهم امى فتحت العلبة والرغوة ما تديك الدرب وقاموا قدموها
    للضيوف وظبطوها تمام.. لم احكى هذه القصة لامى الا بعد ان صار عمرى
    فوق الثلاثين وجاءت سيرة الاناناس..لكن ضيوفنا شبعتهم ريالة سنة يا
    صينية الغداء،،،،
                   |Articles |News |مقالات |بيانات

03-13-2007, 04:48 AM

سلمى الشيخ سلامة
<aسلمى الشيخ سلامة
تاريخ التسجيل: 12-14-2003
مجموع المشاركات: 10753

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: صينية الغدا (Re: سلمى الشيخ سلامة)

    الصديق صديق ، تعرف الغدا فى القطر احلى وجبه ، كنا بنسافر بالقطر من الابيض للخرطوم ، ودى قصة طويلة ، لكين نحكيها ليكن ، اها من اليوم القبل السفر نقوم ياسيدى نسوى الزوادة ، نحمر اللحمة فضلة خيرك ، والطعمية من بالليل ، والسامبكسة دى ناس رحاب ما بعرفوها الفطير المحشى باللحمة هسى بقوا يسموه فطائر كل زمانا يخدكوه رجالو ، وكل فولة ليها كيال ، المهم يا سيد اللمنتى ليك ، نشيل الحاجات دى كلها ومعاها الجبنه حقت الدويمالسمحة ديك ، والمربى والطحنية، وكان سمافرين بالصالون ما بنتعب لانو الصالون فيهومطبخ ، حال التريددك ، لكين دا كلو بقى حكايات، طبعا القطر ذاتو حكاية فيهو شكلة لازم تقوم ، بين المسافرات ، حجزى وحجزك ، وبعد داك بتصالحو وتبقى الصداقة قرابة ونكسب الودين ، اها خته كراعنا فى القططر القيامة تقوم فى الشباك ، شباكى وشباكك ، انحنا الكبار بنقعد فى الممر عشان نخلى الشكلة تروق لانو امى الله يرحما كانت بالا طويل ، لكين لمن يكتروها الشفع بتنهر ولا بتقرص الفطيرة خاصة للبنات ، المهم ، اول ما القطر صفر مارق من الابيض ابوى الله يرحمو كان بعمل الحركة دى لما يكون ما مسافر معانا ، وتشوفو زى اليتيم يلوح لينا بايدو وتحت تحت بكون اخد ليهو جعرة ، المهم ما مشى القطر سمح الا والعيال طالبو بالاكل ، كانت امى بتقول ليهم لسه انحنا ما اتحركنا سمح ، اول رد بكون : ياامى نحنا مافى البيت ياخى ، وتقوم تجر الكرتونه من تحت الكنبة ، كان مسافرين بالاولى ولا التانية ،فى القمرة الدرجة الاولى الكرتونة بتكون مختوته فى الرف وفى التانية تحت الكنبة ، تجر لكرتونة نجرررر ، الكرتونة اياها العملناها اميارح ،وتبدا تعمل الساندوتشات، ابوى ما كان بدور الاكل المشحتف دا ، بنقوم نخت ليهو صحن ، اتغدينا ولمينا الحاجات ، بعد شوية تانى زول بقول جيعان ، المرة دى بدوهو مربى ولا طحنية ، دا غير طعمة فلاته اللذيذة من الرهد ، والفول المدمس من كوستى او تندلتى ، والبطيخ والجوافة من العين ، المحطة ما الامارة ، ونشترى من كوستى الرز ، ومن ربك ، والطف حاجة لمن القطر يكون ماشى فى الكوبرى بين كوستى وربك ، مشهد النيل الابيض والاعشاب مغطية النيل ما بتكرر ، واصوات عجلات القطر تعمل نغمات بنتابعا بالغنا ، معاوية اخوى كان صوتو جميل ، وبغنى فى القطر ، امى طبعا حافظة الحقيبة بتصلحو كان غلط ، ولا ابوى وببدا نقاش جميل حول الاغانى والمناسبة بتاعة الاغنية والشاعر وبتتحول السفرية لندوة حميمة ومرت فى زول بكون لابدليك كل ما القطر يقيف يجى جنب الشباك ، ويعمل ليك حركات كده ويكتب ليك ورقة ويجدعا بحرفنه عالية ، مرة كنا مسافرين (طالبات كلية معلمات الابيض )رحلة تعليمية لمن وصلنا سنار كان فى مجموعة من الطلاب معهد تربية الخرطوم مسافرين نفس البرنامج ، المهم القطر لمن وصل درديب ، قام اتعطل ، وكان الاساتذة عاملين فيها حريفين عشان الاولاد ما يشاغلونا ، لكين تمت المشاغلة وواحدات اتخطبو من الرحلة ديك ، كنت واحدة من الاتخطبو ، وقصة طويلة ،اها القطر واقف ليهو زى اتناشر ساعة ، واتعارفنا زى الماحصلت حاجة وبقينا نكتب المذكرات ونرميها من الشباك ، وحركات صبيانية لذيذة ، بس يا سيدى قمنا بعد داك مشينا بورسودان سوا ، ومن بورسودان قبالا مشينا كسلا ، وتميناها فى الخرطوم ، الغدا كيف ؟
                   |Articles |News |مقالات |بيانات

03-13-2007, 05:04 AM

صديق الموج
<aصديق الموج
تاريخ التسجيل: 03-17-2004
مجموع المشاركات: 19884

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: صينية الغدا (Re: سلمى الشيخ سلامة)

    Quote: ، لكين تمت المشاغلة وواحدات اتخطبو من الرحلة ديك ، كنت واحدة من الاتخطبو ، وقصة طويلة ،اها القطر واقف ليهو زى اتناشر ساعة ، واتعارفنا زى الماحصلت حاجة وبقينا نكتب المذكرات ونرميها من الشباك ، وحركات صبيانية لذيذة ، بس يا سيدى قمنا بعد داك مشينا بورسودان سوا ، ومن بورسودان قبالا مشينا كسلا ،
    وتميناها فى الخرطوم ، الغدا كيف ؟


    سلمى يعمينى ما شايف لى غداء هنا،الا يكون غداكم دا بالخلاطة
    الموضوع جاب ليه خلط وريده وعرس ،والغداء راح شمار فى مرقة
    بالله رجعينا لى صينيتنا تانى،
                   |Articles |News |مقالات |بيانات

03-13-2007, 05:30 AM

سلمى الشيخ سلامة
<aسلمى الشيخ سلامة
تاريخ التسجيل: 12-14-2003
مجموع المشاركات: 10753

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: صينية الغدا (Re: سلمى الشيخ سلامة)

    يا صديق عشان ماتزعل رجعنا للصينية داير حقت العرس ولا حقت بيت البكا ، كلو عندنا ، فى الاول نسوى حقت العرس،ولو انه هسى بقى مافى اختلاف كبير ، حقت العرس فيها يايمة ليك الضلع واللحمة المحمرة والكباب ، والمحشى والمكرونة بالجبنة والسلطة الخدرا، والسلطة حقت الاسود والتانى شنو ، المهم بجن شايلاتنها اتنين ويحنسن فى النسوان النبى كان ما قمتن ، الرسول كان ما اكلتن، والخسيمة(وتخسيمة نساوين الفريق لزولا عزيز يشرب عصير ريدتنا يسكر ما يفيق) او هكذا غنى احمد ربشة له الرحمة بس يا سيدى الغدا حق العرس بنتهى بالتحلية وحق بيت البكا بنتهى بالشاى والضحك ، لكين ناس بيت البكا ما بياكلو خاصة بنات المرحوم او المرحومة دا كان زمان والله هسى الواحدة تكوضم متل الماحصلت حاجة وتبكى وتاكل ، اها الطباخين وديل ناس لذيذين خاصة فى بيت العرس ، جنباوى كده فى (حاجة مدسوسة ) جغمة جغمة ، وسجارة بعد داك وونسة احلى ما يكون ، بتاعين بيت البكا ماشديدين على الونسة لانه الجو العام ذاتو ما بساعد ، لكين بتاعين بيت العرس الله حى ونسة وضحك وتلقى النسوان متلمات فيهن (الرسول كان ما حكيت لينا داك وداك) وهن الغبيانات يتضاحكن عاجبن الكلام (النى ) وديلاك يسوو فى البدع ، والقطيعة قرش ونص ، دى سمحة ودى شينة ودى مابعرفا مالا ، لكن البكا فى بربر ما زى بكا ناس الخرطوم هناك السليقة بالقوز ، قالت عمتى :يوم الصدقة بسوو الفطير باللبن ، فى العشا ، اها بتجى واحدة حايمة بين النسوان وتحلف فيهن(الرسول كان ماتجغمتن الليبينة ) اها فى البكا فى بربر برضو بسوو البليلة بالقوز الكبير يوم الصدقة ، يوم جدى قال جات واحدة جيعانة ، وما اظنها اكلت ليها يوم مسافرة من الدامر لى بربر المشوار الزمن داك اكان طويل ، وكت وصلت لقت البليلة ريحتا فايحة قعدت تعزى وتقول الليلة يا بليلة هوى يابليلة ، قالوا ليها اقعدى يختى اكلى ويعدين عزينا
                   |Articles |News |مقالات |بيانات

03-13-2007, 06:34 AM

حمد اسماعيل

تاريخ التسجيل: 01-27-2005
مجموع المشاركات: 544

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: صينية الغدا (Re: سلمى الشيخ سلامة)


    يابت الشيخ



    والله يا سلمى يا بتى خليها ساكت, انا فى بلد ما فيها

    صينيه تلف حولها العربات تقولى لى صينية الغداء , هنا

    الناس ممكن يقعدو فى دائره وياكلو لاكين مافى صينيه بكونو

    مفرشين جرايد حتى الجرايد الحبر بيظهر فى الرغيف كان ختيتى الرغيف .

    بناكل فى اللحم و الجداد( الدجاج) 15 سنه ما شفنه خروف ولاجداده تقولى

    لى قال. وبعد ده الجماعه يقولو ليك اسمع جيبه حلال من دكان العرب .

    علشان كده الواحد مشتهى اللمه بتاعت ناس البيت كلهم خصوصا لما يكون فى

    ملاح قرع ويقومو كده ويقلبو القرع والسلطه وباقى الحاجات كلها فى الصينيه

    وعليها شطه وملح وشويه مويه ويلخبطوهم مع بعض ويلا شوفى اللبع دا كيف .


    الصينيه كان فى ما اظنها تكون الصينيه السمينه الزمان ديك .غايته الله علينا

    يا بتى .
                   |Articles |News |مقالات |بيانات

03-13-2007, 06:43 AM

سلمى الشيخ سلامة
<aسلمى الشيخ سلامة
تاريخ التسجيل: 12-14-2003
مجموع المشاركات: 10753

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: صينية الغدا (Re: سلمى الشيخ سلامة)

    حمد يا خوى بقى صحن واحد ومسكين خجلان يدور من محل لى محل ، الخلاص بقى عندو ملاحين بتمهن ماجى ، وامكن فى البيوت الكبيرة الزمان بقى عادى صحن واحد وبالكتير معاهو سلطة لو فى موسم الاسود بكون فى سلطة اسود وملاح واحد ، طبعا كلام موظف يقدر يعمل صينية غدا زى زمان مافى الكلام دا ، صحن واحد ، وزى ما قال واحد فى تعليق سابق حتى العشا بقى كل زول براهو ، مرات مرات الا تكون فى مناسبة حتى الناس تلم ، والله حالةسعبة خلاس
                   |Articles |News |مقالات |بيانات

03-13-2007, 12:44 PM

زهير عثمان حمد
<aزهير عثمان حمد
تاريخ التسجيل: 08-07-2006
مجموع المشاركات: 12694

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: صينية الغدا (Re: سلمى الشيخ سلامة)

    الرائعة سلمي بت الشيخ
    امدرمان زمان واليوم وبكرة والي ان تقوم الساعة مدنية لها تقاليد واعراف راسخة رسوخ الجبال ناس أمدرمان اصحاب مواهب واهل علم ودين ومقامها بين المدن في السودان هي درة المدائن بأرض السودان لما ترجع بيك الذاكرة تسيل دمعة وتقول أمتي أرجع لأمدر وازورا واشوف نعيم دنياتي وسرورا سلمي سالتك الله لا اود ان اموت شوقا لمدينتي امدرمان واهلها وتقاليدهو وطقوسهم
    ولك حبي زهير

    (عدل بواسطة زهير عثمان حمد on 03-13-2007, 12:48 PM)

                   |Articles |News |مقالات |بيانات

03-13-2007, 04:37 PM

سلمى الشيخ سلامة
<aسلمى الشيخ سلامة
تاريخ التسجيل: 12-14-2003
مجموع المشاركات: 10753

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: صينية الغدا (Re: زهير عثمان حمد)

    زهير عثمان ، كيف تمام؟ امدرمان ، دى حكاية براها،زمان فى بيتنا كان فى نفاج ، النفاج فاتح على بيت ناس حبوبة عازة بت محمود ، بتطلع من بيت ناس حبوبة عازة بتدخل لى بيت حبوبة فاطنة بت محمود، والبعده امنة ، وهكذا لمن تصل بيت حبوبة نفيسة بت محمود،بتكون شربت شاى مع حبوبة فاطمة بت محمود ، واتغديت مع ناس حبوبة عازة ، بتصل الحوش حقكن وانت ما سائل فى غدا ، لانك متغدى وشارب الشاى ، وحلى كمان ، زمان جدى بابكر كان زولا فنجرى وكل يوم بجيب بطيخة كان ما البطيخ موسمو انتهى البطيخ ما بقيف من البيت ، بعد الغدا تلقى ناس الحوش كلهن فى بيت حبوبة نفيسة منتظرين البطيخة الحمرا وسمحة
    امدرمان تانى ، خالتى فاطمة احمد ابراهيم الله يخليها لينا شجرة موية ، قول يا مين ، مرة جات الحوش لقت الحوش ما ياهو الزمان ، لقت انو فى ناس ما بعرفو بعض فى الاسرة ، قامت كالعادة عملت اجتماع كبير بقيادات الاسرة من اخواتها وبنات خالاتا وقررو انو كل يوم جمعة الغدا فى بيت زول من الاهل ، يوم عندهن فى العباسية ويوم عندنا فى العباسية فى الحوش ، ويوم فى بحرى مع بنات اختها نفيسة ، ويوم مع .... الى اخر القصة ، بقى البرنامج داك سارى لغاية ما جا هادم اللذات ومفرق الجماعات وكل زول مشى جيهة
                   |Articles |News |مقالات |بيانات

03-13-2007, 12:58 PM

رشا سالم
<aرشا سالم
تاريخ التسجيل: 08-24-2006
مجموع المشاركات: 2604

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: صينية الغدا (Re: سلمى الشيخ سلامة)

    الاخت سلمي سلامة...

    والله زكرتينا ايام ما في اجمل منها....

    كنا ساكنين والبيت اللصقنا بيت ناس خالي...

    ومعظم الايام بنتغدي مع بعض ..مع العلم انه خالي عنده 7 بنات!

    يعني بكون مهرجان من الونسة والضحك والمشاكل اللذيذة...

    .............

    هسه لما نتقابل انا وراجلي في صينية الغداء بنعمل حفلة!

    لانو نادرا ما نتلاقي في مواعيد الغداء..يعني ياهو في دوام يا انا في دوام..

    ومعظم الناس عندها المشكلة دي..

    غايتو ربنا يعتقنا من استايل الحياة الغريب دا!
                   |Articles |News |مقالات |بيانات

03-13-2007, 04:55 PM

سلمى الشيخ سلامة
<aسلمى الشيخ سلامة
تاريخ التسجيل: 12-14-2003
مجموع المشاركات: 10753

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: صينية الغدا (Re: رشا سالم)

    رشا ازيك ، ذكرتينى ببنات اهلك ديل حوشنا ساعات تجى تلقى ناس كانوا يعترو ليك شدة ما كتار ، بنجى نحنا من الابيض ناس خالتى من كسلا وناس خالنا وبناتو من بورتسودان ، واولاد خالتنا من نيالا ، وواحدين من دنقلا ، وواحدين من القطينة ، الحوش دا زى ما بتقول امى الله يرحما ، ينعى من كتر الناس ، تسمعى الاصوات من بعيد ، تسمعى الاصوات تقولى فى عرس ولا مناسبة كبيرة ، المهم بنتلم نحنا الصبيان والبنات فى راكوبة حبوبة فاطمة بت محمود ما كان عندها اطفال ، كلنا بنكون قاعدين ونسة وضحك وساعة الغدا صينيتنا براها ، نخمج ونكب ، نشرب الشاى ونمرق العصرية نمشى النيل كلنا ، سيرة بس ، اسم الراكوبة (نادى اسكيز ) سميناها كده ليه ما بعرف ، المهم بعد نمشى (البحر ) نجى راجعين كشك عمنا حسن قرشى نشرب ليمون مصلح ، ونرجع البيت المغربية جبنا التفزيون ومعانا بنجيب تسالى ، ونقعد قدام التلفزيون لمن يكمل ، فى النص بنمشى تانى لعم الصافى بنجيب الفول ،بعد ما نضرب الفول البكون امير مكى ودخالتنا عملو بوش، رهيب ، بعد داك نقوم نقدم بنات جدنا لبيتهم فى الناحية التانية للشارع ، ونرجع تكون الساعة بقت واحدة ، نغسل العدة حقت العشا ، وونسة ما بتنتهى لاننا فى اجازة ، هسى لو قلت البيت دا ما فضل فيهو زول صدقينى ، كتيرين من الشابات والشبان رحلولهم كل الرحمة (سامى مرتضى احمد ابراهيم ، الهام لدرديرى ، هدى الشيخ ، عبد الاله العبادى ، حمدى العبادى ، الفاضل الطيب ، عادل محمود محمد على ،)والمامات سافر بالسنين بره السودان الفى انجلترا والفى كندا والفى امريكا والفى اليونان ، والفى السعودية واى حته،كان بيت جميل
                   |Articles |News |مقالات |بيانات

03-13-2007, 02:00 PM

nourelhadi awad

تاريخ التسجيل: 10-24-2006
مجموع المشاركات: 1111

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: صينية الغدا (Re: سلمى الشيخ سلامة)

    سلمى إزيك
    أنا والله متغدي
    وإيدي لسه لينة
    فضلت خيرك
    بس جيت أقول سلام
    ياللا ماتعاينو لي إتغدوا
                   |Articles |News |مقالات |بيانات

03-13-2007, 05:01 PM

سلمى الشيخ سلامة
<aسلمى الشيخ سلامة
تاريخ التسجيل: 12-14-2003
مجموع المشاركات: 10753

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: صينية الغدا (Re: nourelhadi awad)

    جدى الطيب يا نور الهادى كان شخصية مرحة جدا عليه الرحمة ، كان لمن يجيبو ليهو الغدا غاليا بتكون الساعة سته ، لانو كان ملاحظ مبانى فى وزارة الاشغال عليها الرحمة هى الاخرى ، حاجة وداد بتعمل ليهو الغدا وهو بكون زهجان ما من الاكل لكين من صينية الطلس ، لانها بتزحلق الصحون ، فبقوم بنادينا انا وبته الكبيرة خالتى حياة بقول لينا امسكو الصحن دا عشان اعرف اكل ، يا حجة انتى غير الصحن والصينية ديل مافى فى البيت ، لكنه كان كتلة مرح يصنع من ذلك الموقف حالة لذيذة هو ياكل ونحنا ماسكين الصحون عشان ماتتزحلق
                   |Articles |News |مقالات |بيانات

03-13-2007, 02:50 PM

معتصم دفع الله
<aمعتصم دفع الله
تاريخ التسجيل: 12-18-2003
مجموع المشاركات: 12722

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: صينية الغدا (Re: سلمى الشيخ سلامة)

    يا سلام عليك يا سلمى ياخ ..
    داك كان زمن الناس الهدية ورضية زي ما قلتي ..
    هسي الزمن بقى تيك أوي ووين وين الناس تقعد ليها في صينية واحدة ..
    والغداء بدل الساعة 2:30 مواعيد عالم الرياضة بقى الساعة 6 ومرات 7 مساء ..
    داك زمن حنين والناس قلوبه على بعض وتلقيهم متلمين في الفرح والكره ..

    ربنا يحنن القلوب ويجمع الشمل ..

    يديك العافية ..
                   |Articles |News |مقالات |بيانات

03-13-2007, 05:11 PM

سلمى الشيخ سلامة
<aسلمى الشيخ سلامة
تاريخ التسجيل: 12-14-2003
مجموع المشاركات: 10753

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: صينية الغدا (Re: معتصم دفع الله)

    تعرف يا معتصم الزمن مازال جميل لكين بس فى شوية حاجات لو اتعملت ؟؟؟الناس ياها مافى شى اتغير مش عمك الشاعر قال (نعيب زماننا )الى اخره حقيقة لو عاينت للاشياء تلقاها نفسها ، بس فى ايقاع مختلف وناس مشدودة وعصب متوتر ،لانه فى حاجات كتيرة سمحة باقية بس دايرة الزول اليشوفا مش ؟
                   |Articles |News |مقالات |بيانات

03-13-2007, 03:53 PM

منصوري
<aمنصوري
تاريخ التسجيل: 09-28-2003
مجموع المشاركات: 2366

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: صينية الغدا (Re: سلمى الشيخ سلامة)

    سلمى.. موش غالباً ما تكون التحلية كاسترد..ومعاهو رز..وبعدين موش في ولاد من ولاد البيت أو زول دمو خفيف يقول أيه رايكم ياجماعة لو لخبتوهم مع بعض.. أعني الكاسترد والرز..
    ومرات بيكون ملاح الغدا الأساسي ملوخية مفرومة بالفرامات البي تمشي شمال يمين ديك البي يشتروها من سوق أم درمان قرب زنك اللحم في الحتة الغميسة ديك البي يسموها( كرش الفيل)فيه حدادين كدة وناس يلحموا في الصفايح ويعملوا حاجة كدة بي يختوها في ماكينة الفرامة رقم خمسة ورقم تمانية.. يلحموا من سنة حفروا البحر..حتى جسمهم إنسهك وبقوا كالأشباح حتى ما بيشوفوا كويس تلقا الواحد مجنقل عينو وصاريها من حرارة بخار كاويا اللحام وموية النار بتاعة اللحام الحارقة..
    أها الخدرة تفرم بي فرامات زي دي.. طااعمة موش زي يفرموها زي فرم الزمن دا بالخلاطة الكهربائية... أها الخدرة دي نصها يكون لحم ضاني خروف بج..بكسر الباء.. بعدين في ناس يقولوا كبوا عليها الرز...
    الرز.. السودانيين أسماهم للحاجات سمحة..
    شوف هسه كلمة رز دي سمحة كيف ومختصرة مع إنها ( أرز)
    بعدين شوف كلمة ( كستر) دي حلوة كيف مختصرة مع إنها( كاسترد)أصلو مافي داعي للألف والدال ديل فيها..
    زي كلمة ( معكرونة) والسودانيين يقولوا مكرونة أصلو العين دي فيها حذلقة ساكت..
    .........
    لهجتنا حلوة وناسنا حلوين وكلو شئ كان عندو طعم وسوف يعود له طعمه..
                   |Articles |News |مقالات |بيانات

03-13-2007, 05:21 PM

سلمى الشيخ سلامة
<aسلمى الشيخ سلامة
تاريخ التسجيل: 12-14-2003
مجموع المشاركات: 10753

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: صينية الغدا (Re: منصوري)

    تعرف يا منصورى ذكرتنى صديقنا خليل اسماعيل الفنان الجميل ، بفرامة الخدره ، مرة كنا بنسجل معاهو فى الاذاعة ،سجلنا معاهو سلمى وطارق البحر اها قاعدين فى الاستديو نتونس ، واحد قام سالو (انت يا استاذ من وين ؟ قال ليهو من الابيض ، قمت قلت ليهو فى الابيض وين ؟ قال لى لمن تلقى نسوان ماشات زى فرامات الخدره باريهن بتصلى بيتنا )وبيتهم فى حى القبة ، فرامة الخدرة دى كانت عقدتنا ، لمن يكون فى خدره فى الغدا بتحصل (شكله ) عدييل لانو الخدرة دايرة تتفرم وتتفرم معناها الزول يتتفن فى ا ويقعد ساعة يتحرك يمين وشمال وكل مرة امك تقول ليك لسه ماها عيون عيون ، يا امى ياخى انا فترت ، خلاس اديها لخنساء وخنساء ما بتدور شغل البيت ، شعار واضح ( اشتغل هنا وهناك؟ ابيييت ) وتجر الياء لمن تصل حى القبة من حى السكة حديد فى الابيض، والملوخية او الملوكية جاتنا من الاتراك لانه معظم مطبخنا يا تركى او يونانى حتى المصريين مطبخهم معظمه تركى ، يعنى البامية والملوخية بالمناسبة (الرجلة الانحنا بنحبها دى ) المصريين ما بياكلوها الا سلطة او بياكلوها لل(جداد)اقعد عافية ود امى
                   |Articles |News |مقالات |بيانات

03-13-2007, 04:17 PM

willeim andrea
<awilleim andrea
تاريخ التسجيل: 05-01-2002
مجموع المشاركات: 3768

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: صينية الغدا (Re: سلمى الشيخ سلامة)

    الاخت سلمي .... ذكرتيني الحاجه ....... الله يرحمه... ياحليل الزمن الجميل والله يديم المحنه

    (عدل بواسطة willeim andrea on 03-13-2007, 04:18 PM)

                   |Articles |News |مقالات |بيانات

03-13-2007, 05:28 PM

سلمى الشيخ سلامة
<aسلمى الشيخ سلامة
تاريخ التسجيل: 12-14-2003
مجموع المشاركات: 10753

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: صينية الغدا (Re: سلمى الشيخ سلامة)

    وليم اندريه ، وليم اندريه كان فنان ولاعب جميل ، الله يرحمو ، لكين انت بتحب الشواءات ؟ ياخى انت ايامك عسل ، اكتر حاجة ممكن الزول يا كلا فى الدنيا دى الشواءات ، تعرف ، مرة كان عندنا ناس اهلنا كده بحبو ليك الاكل حب مبالغ فيهو ، المهم يوم كان فى سماية فى البيت ، والسمايةغدا طبعا اها خيلانك ديل لمو ليك فى الخروف ما خلو فيهو حاجة جابو منقد وولعو الفحم واحد يقطع والتانى يشوى لمن النسوان حرسن وفترن واللحمة ما جات قامو دخلو الحوش الورانى الكانو قاعدين فيهو الخيلان ديل لقوا ليك بس الكرشة والضلافين، انقر ما جابو خروف تانى ؟
                   |Articles |News |مقالات |بيانات

03-13-2007, 06:22 PM

مصطفي سري
<aمصطفي سري
تاريخ التسجيل: 03-07-2007
مجموع المشاركات: 2339

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: صينية الغدا (Re: سلمى الشيخ سلامة)

    سلمي الشيخ سلامة يعني شنو الفتح دة
    انا صينتك ذاتها ما دايرة ، يعني نسلم عليك لا رد ولا يحزنون ، يعني دي ما كانت هناي
    كيفك والمعاك برضو بنسلم تاني ، يظهر انك في بلاد العم سام وكدة يالطغي
    ابقي عافية
                   |Articles |News |مقالات |بيانات

03-13-2007, 07:25 PM

منصوري
<aمنصوري
تاريخ التسجيل: 09-28-2003
مجموع المشاركات: 2366

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: صينية الغدا (Re: سلمى الشيخ سلامة)

    سلمي شغلتك فرامة الخدرة، وكتبتي عنها وبس.. وما علقتي على لخبتة الرز بالكستر.. ولا مسميات السودانيين واختصارها في ردي الفات..؟
                   |Articles |News |مقالات |بيانات

03-13-2007, 10:30 PM

سلمى الشيخ سلامة
<aسلمى الشيخ سلامة
تاريخ التسجيل: 12-14-2003
مجموع المشاركات: 10753

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: صينية الغدا (Re: منصوري)

    منصورى انت زعلت ولا شنو ، ماتزعل ود امى ، اها الرز دا الا فى السودان البخلبتوه مع الكستر ، عارف زمان فى البيت لمن كنا صغار كان اليوم البتعمل لينا فيهو امى الحلو بالرز معناها دا اول الشهر ، لانو لسه بكون فى باقى ملالين ، اها الحلة اول حاجة بعد ماامى تكب الحلو فى الصحانة ولا القوالب ، بنتخاتف الحلة وكل واحد عاوز يتلحوس فيها ، اكتر زول كان بغيظنا طارق اخوى الكبير ، بقوم بشيل الحلة ويجرى بيها وكان حصلناهو (بتف )فيها ، ونفس الحركة بعملا فى الحلو والرز ، كلنا بنجرى وراهو وعارفين انه حيتف فى الصحن ، ولمن يجيبو الرز والحلو واحدين عاوزين حلو بدون رز واحدين عاوزين يلخبطو الاتنين ، والشكلة تدور ، والقيامة تقوم فى المسافة دى طارق كالعادة بكون ختف الصحن وجرى ، امى بقت لمن طارق يختف الصحن ، بتمرق لينا انحنا المساكين صحن برانا نلخبط الرز بالكستر ، هو ذاتو مرات بكون حلو لبن ومرات حلو كركدى او قمردين او ليمون والله حلو الليمون دا حلو حلا
                   |Articles |News |مقالات |بيانات

03-13-2007, 07:32 PM

سلمى الشيخ سلامة
<aسلمى الشيخ سلامة
تاريخ التسجيل: 12-14-2003
مجموع المشاركات: 10753

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: صينية الغدا (Re: سلمى الشيخ سلامة)

    مصطفى حبيبى ما تزعل وحات ابوى رديت ليك ، لكين النكلمك بصينية الغدا حقت ناس امى وكتين كنا فى الابيض مرات بجونا انس من اهلنا يقعدوا معانا فى الاجازة لمن ما ننزل الخرطوم ، البيت بكون فاير بالناس ، كانوا بجونا ناس عمتى غالبا من عطبرة ، هى واولادها ، بكون طبعا المستلمة الشغل حق المطبخ مش البت الكبيرة ؟ يلا بعمل ليهم حاجات مخترعة يا كلو ويسالو ، دا شنو دا ؟ ودا ماعارف ليك شنو ، اها كنت بعمل الرغيف براى ، امى بتعوس الكسرة وانا بسوى الرغيف ، عندنا فرن فى الراكوبة بقوم بعد ما سويت الرغيف بعمل اصناف بتدخل الفرن ، وبتطلع( ايقاع نوبه ) حاجة لذيذة جدا ، انا ذاتى ما بكون عارفة انى عملتها كيف ، والعصر عندنا برنامج ثابت بنمشى كوبرى بعيد شوية من البيت مرات بنشيل الغدا ونمشى تحت الكوبرى داك نقعد نتغدى ولمن العصر نقوم نتراوح اهلنا ، نشرب شاى العصر بمزاج وابوى غالبا بكون شايل معاهو الطاولة والكواريك والجوطة تجيب الرايح ، بلعبو هو والحجة الله يرحم الجميع
    لكين كان عاينت فى البوست دا كويس رديت عليك يا صفصف ، حتى سالتك البنية اضانا ما صفرت؟اقراهو تانى ،لك الحب يبقى
                   |Articles |News |مقالات |بيانات

03-13-2007, 09:24 PM

ismeil abbas
<aismeil abbas
تاريخ التسجيل: 02-17-2007
مجموع المشاركات: 10789

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: صينية الغدا (Re: سلمى الشيخ سلامة)

    ألأخت/سلمى أولا والله أنا عايز ارد عليك وارجع تانى أقرأ ردودك الظريفه دى إنتى وصديق الموج والظاهر ياأختى إنو صديق الموج اليوم مزاجو رايق.وبصراحه لما يكون رايق ونستو حلوه.وصديق من زمن ألأناناس بسمو الفرطه والله إلا سمعت بيها هنا (ياخى إنت قديم خلاص)نحن كنا بنجيبه من أولاد ملاح شارع الرباطاب وبسموه أنا ناس.

    لكن صينية غداك بقت ونسة قهوه عديل الله إديك العافيه واصلى وبنمر.
                   |Articles |News |مقالات |بيانات

03-13-2007, 10:17 PM

سلمى الشيخ سلامة
<aسلمى الشيخ سلامة
تاريخ التسجيل: 12-14-2003
مجموع المشاركات: 10753

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: صينية الغدا (Re: سلمى الشيخ سلامة)

    الحبوبات الله يرحمن حبوباتى ، كانت حبوبةمريم بت على اكثر الشخصيات طرافة لهاتسمياتها للاشياء تسميات خاصة بها ، تسمى (امالبينا ، ام الاولاد)واذا ما ارادوا اخواتها العبث معها ارسلوها الى سوق امدرمان لتجلب ام الاولاد، وكذا كان يفعل الجزارين معهاهذا يدفعها لذاك حتى اذا انتصف النهار يقوم واحد منم باعطائها ما طلبت وهم يتضاحكون علي طريقة نطقها ، تجئ حاملة ما اشترت من سوق امدرمان وتتوفر على طبخه ، كانت بطيئة الحركة لكنها طباخة ماهرة تصنع تلك (الحلة ) وتشتهى ان تاكلها كل يوم لفرط روعتها ومذاقها الذى لا ينسى ، فى المناسبات كانوا يتركون لها البامية فهى احسن من يطهوها ، تجيب البامية وبراحه براحة تقطع روؤسها النووية تلك ، ثم (تقمعها ) اى انها تسلخ تلك الشرايات فيها ، ثم تحمر البصل حتى يصفر لونه ، كنت اقبع الى جوارها (باك تو باك)واجلس بالساعات دون كلل فنحن موعودون ببامية حبوبة مريم ، كانت حين تهل علينا فى الحوش تجئ حاملة (قفتها) الزى كانت دائما مغطاة بفوطة ، تحوى هذه القفة كل انواع الحلوى والدوم والنبق والتسالى ، تشتريها لنا وتخصنى حيث انى ابنة (اختها، حبوبتى نفيسة ) هكذا كانت تنادينى بت نفيسة ، وتخصنى بكل ما طاب دونا عن اترابى ، لذلك كنت احيها وكثيرا، ولعمرى فجعت يوم رحيلها وهى التى كان لمذاق طعامها نكهة لا تضاهى ، يا لتلك الحبوبات يا ود عباس ، كذا كانت حبوبة فاطنة بت محمود عليها الرحمة ، كانت طباخة ماهرة ، تجتمع هؤلاء النساء لدى حبوبة نفيسة يوم الجمعة للغداء ، كن يرضين (بباقى الحلل) حين يعز ما طبخنه ، لان ( الجنون الله يحفضن ما خلوالينا شى ) غالبا كن يتغدين بكسرة بموية ، يضفن اليها الطماطم والبصل وزيت السمسم، كن مثل الانبياء عفيفات يرضين بكل شى لا لسبب سوى الزهد الذى الذى احاط حياتهن من اولها الى نهايتها ، تجدهن بعد الغدا وقد تحلقن حول المنقد يتنتن القهوة ( قهوة سيدى الحسن ) يتنادين لها ويكون الودع حاضرا والضحك هو سيد الموقف ، تجئ حبوبة عرفة من العرضة والبقية كانت تسكن الحوش الزى كان حوشا عامرا بالخلق منزلة لكل من لا منزلة له كانت وفود تحل واخرى تغادر (الطلبة )والناس الجايين للعلاج من دنقلا وبربر وكسلا ، وحتى ملكال التى كانت تجئ منها حبوبة خديجة بت عثمان وتنطق الصاد ثاء تحلو لى طريقة حديثها ، واكون محل ما مشت فى ضهرا، نتغدى فى بيتنا ونخرج الى بيت جدنا الدرديرى محمد عثمان فى الموردة ، نتمشى وتحكى لى عن ملكال التى لم ارها ، كنا فى ذلك الحوش قانعين ، ومحبين لاحدنا الاخر ، حين يحل ضيفا كانت حبوبة نفيسة احيانا تقوم حتى بعد انتهاء الغداء بتحضير غداء جديد، غالبا ما كانت ( تضبح ) للضيوف من (جدادات )او (حمامات ) كان برجهن اعلى الراكوبة ، نصعد اليه بسلم وتتم عملية اغتيال تلك الحمامات لغدا مقترح لضيوف اعزاء
                   |Articles |News |مقالات |بيانات

03-14-2007, 10:38 AM

Nadia Elsir

تاريخ التسجيل: 12-26-2005
مجموع المشاركات: 1396

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: صينية الغدا (Re: سلمى الشيخ سلامة)

    العزيزة سلمى الشيخ سلامة ,

    انا بحب اقول اسمك كده كااااامل زى ما كنت بسمعو من الاذاعة عارفة انت وناسة بعجبنى كلامك شديد بتختارى مواضيع مهمة و بتكتبيها بجمل و عبارات رشيقة !

    يعنى فى ردك لمعتصم امنتى بل و راهنتى على واقع ما آل اليه المجتمع السودان و ما حاقت به من جملة متغيرات اشاركك الرأى بانها لم تطال اللباب بما قدر ما شوهت القشور !


    Quote: تعرف يا معتصم الزمن مازال جميل
    لكين بس فى شوية حاجات لو اتعملت ؟؟؟الناس ياها مافى شى اتغير مش عمك الشاعر قال (نعيب زماننا )الى اخره حقيقة لو عاينت للاشياء تلقاها نفسها ، بس فى ايقاع مختلف وناس مشدودة وعصب متوتر ،

    لانه فى حاجات كتيرة سمحة باقية بس دايرة الزول اليشوفا مش ؟




    سلمى يا خيتى الله يطمنك زى ما طمنتينى و يديك الفى مرادك !


    مودتى الصادقة,,,

    نادية السر
                   |Articles |News |مقالات |بيانات

03-14-2007, 03:58 PM

سلمى الشيخ سلامة
<aسلمى الشيخ سلامة
تاريخ التسجيل: 12-14-2003
مجموع المشاركات: 10753

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: صينية الغدا (Re: سلمى الشيخ سلامة)

    نادية الزاهية بت السر زمانك كان فى برنامج صباح الخير يا وطنى ومساء لخير يا وطنى ، كنت ببدى البرنامج بالامل بنهيهو بالامل لانو اكتر حاجة الزول محتاج ليها هى دفعة الامل ،وما زلت متفاءلة انو الدنيا بخير والحياة لازم تكون جميلة مهما كان لانو الدنيا لو بقت كلها زى القاعدين نشوفا فى التفزين دى الله واحد ما بتنقعد ،ما بالكضب لكين بتوجيه النظر لمكامن الجمال وعشان كده عملنا الحزب الجمالى ودا واحدة من مراميهو انو يشوف الجمال ما القبح، وحتى القبح مرات فيهو جمال ، المسالة نسبية ياحنونة، ولمن اختفت صينية الغدا من حياتنا ودى حقيقة، ما بكيت عشانا بالعكس استديت ملامحا الزمان امكن ترجع ويرجع الزمان الزاهى والافندى يرجع يبقى مصدر للعزة زى ماكانوا ابهاتنا واخوانا الكبار ، لك مودتى والامل باب مفتوح دايما
                   |Articles |News |مقالات |بيانات

03-17-2007, 11:07 AM

Nadia Elsir

تاريخ التسجيل: 12-26-2005
مجموع المشاركات: 1396

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: صينية الغدا (Re: سلمى الشيخ سلامة)

    سلمى الشيخ سلامة ,,,

    سلامات يا غالية


    Quote: ،وما زلت متفاءلة انو الدنيا بخير والحياة لازم تكون جميلة مهما كان لانو الدنيا لو بقت كلها زى القاعدين نشوفا فى التفزين دى الله واحد ما بتنقعد ،ما بالكضب لكين بتوجيه النظر لمكامن الجمال وعشان كده عملنا الحزب الجمالى ودا واحدة من مراميهو انو يشوف الجمال ما القبح، وحتى القبح مرات فيهو جمال




    اها شفتى تاااانى قلتى ليك كلام ملياااان حكم و فلسفة عمييييييقة عن الحياة و الامل و التفاؤل و الجمال و القبح و بمفردات رشيقة و حنينة .....الله يخليك !


    عارفة بديت اقرأ بوست الحزب الجمالى و اظننى عضو فيه منذ التكوين سلبطة عديييييييل!



    مودتى الاكيدة,,,.



    نادية السر
                   |Articles |News |مقالات |بيانات

03-18-2007, 01:04 AM

سلمى الشيخ سلامة
<aسلمى الشيخ سلامة
تاريخ التسجيل: 12-14-2003
مجموع المشاركات: 10753

للتواصل معنا

FaceBook
تويتر Twitter
YouTube

كيف احذف مداخلة من بوستى

Re: صينية الغدا (Re: سلمى الشيخ سلامة)

    نادية ، يا نادية ومليانه جمال ، عميرى قال : سؤال يا حب ، حصل حبيت؟
    واذا حبيت بترضى تكون مع الزمن القبيح مهزوم؟
    ونحن لانرضى الهزيمة يا صديقتى فالحب هو (مخرجنا ) والجمال مدخلنا الى الحياة ، كن جميلا ترى الوجود جميلا
                   |Articles |News |مقالات |بيانات

[رد على الموضوع] صفحة 1 „‰ 1:   <<  1  >>

· دخول · ابحث · ملفك ·

اراء حرة و مقالات
Latest Posts in English Forum
Articles and Views
اخر المواضيع فى المنبر العام
News and Press Releases
اخبار و بيانات
فيديوهات سودانيزاونلاين Sudanese Online Videos
صور سودانيزاونلاين SudaneseOnline Images
ويكيبيديا سودانيز اون لاين
Sudanese Online Wikipedia
فيس بوك جوجل بلس تويتر انستقرام يوتيوب بنتيريست Google News
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
About Us
Contact Us
About Sudanese Online
اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين
News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums
If you're looking to submit News,Video,a Press Release or or Article please feel free to send it to [email protected]

© 2014 SudaneseOnline.com

Software Version 1.3.0 © 2N-com.de