|
دعواتكم لزميلنا المفكر د.الباقر العفيف بالشفاء العاجل
|
|
 Re: سلمى الشيخ سلامة .. سلامتك من داء الملوك .. تعالوا دثروها وزملوها (Re: سفيان بشير نابرى)
|
ياسوفى
ملوك شنو؟ياخ اقول ليك قاوت
تقول ملوك
"هو قاوت لمتين زاتو ما يمشى ياخ"
قاوت لعبة قون
مسربعة ليك بالفكرة سربعة ونص
عندى صحبى عنده قاوت
فمرة اصبع القدم بقى منفوخ من الورم
مشينا ليهو بالصدفة
ـ سلامتك مالك تمشى بالعصاية "دى مرحلة لسه ما وصلتها"
فقال لينا
ـ والله عندى "ايدز" فى الاصبع الكبير
الله لاوراك "اللواية" من وجع الاصبع
اها واحد صاحبنا برضو اصبعو كان مجروح
فاتصلت عليهو زولة صحبتنا مسربعة سالتو قبال صباح الخير
ـ كيف اصبعت
تخريمة
ياخ راجع مسنجرك
| |
 
|
|
|
|
|
|
|
|
Re: سلمى الشيخ سلامة .. سلامتك من داء الملوك .. تعالوا دثروها وزملوها (Re: القلب النابض)
|
القلب النابض
ياخ سلفينى اسمك دا اول حاجة
تعرفى
العبدة لله ما عندها غرد بالاكل شديد كدى
يعنى زاهدة
وحات الله باكل بطرف اصابعينى زى الصوفيين
اتعلمت الحركة دى من ابوى عليه الرحمة
المهم
لكن عامل الوراثة هو الا صل
يعنى يا قلب الناس بورثوهم العمارات يا يمة والعقارات يا يمة ونحنا
الحمد لله
شى امراض قلب وشى قاوت
سالتنى سكينة الربيع المشت معاى المستشفى
ـ اها حتصرفى الدوا؟
قلت ليها
ـ حاصرف نظر
عارفة جنى وجن كلام الحكما دا
عندى حبوبة لى مشت للحكيم ودار بينهما الحوار التالى
ـ يا حاجة ما تاكلى البطيخ والموز ، اللحم، ال......... قائمة اطول من يوم القيامة
عاينت للدكتور كدى وقالت ليهو
ـ بطول العمر ؟
ـ لا ياحاجة
ـ بقصرو ؟
ـ الاعمار بيد الله
ـ اها دحين قول قولك وانا بسو سواتى
فيا اختى عالم الحكما دا بدخلنا فى مشاكل ماعندنا ليها عمر زاتو
وباقى العمر دا بنضارف عليهو تب
قلتى كيف؟
| |
|
|
|
|
|
|
|
|
|
Re: سلمى الشيخ سلامة .. سلامتك من داء الملوك .. تعالوا دثروها وزملوها (Re: Rawia)
|
Quote: مالها بقت لي زي الجرسة من سفر البنية
الله يرجعها بالسلامة بس |
الله يسلمك حبيبة
عارفة يا راوية اختى
سفر البنية مزهجنى ومقلقنى
امى كانت بتقول لينا "بنات العنزة ان قربن اتناطحن وان بعدن اتصايحن "
وشايلة جنس هم لمن تتزوج وتمشى
الله لا وراك
غايتو ربنا يسعدا
مرة بتونس معاها
قالت لى
ـ امى انتى ما تتزوجى انا حامشى وحتكونى محتاجة ليك لزول
بنات اخر زمن
هسى بعد مرضى دا كلو اكون دايرة "عريس" ولا ممرض؟؟؟؟
غايتو من يجد فى نفسه كفاءة الممرض اليجى "وش مستغرب خالس"
وبعدين اكل الامريكان دا مكجنة خلقتو
ولا بجى بى جنبو
لانه اشتغلت فى مطعم وبعرف اصله وفصله
معفن ياخ
الله يفكنا من بلدهم دى زاتا
اقعدى عافية
| |
|
|
|
|
|
|
|
|
|
Re: سلمى الشيخ سلامة .. سلامتك من داء الملوك .. تعالوا دثروها وزملوها (Re: ماضي ابو العزائم)
|
Quote: باين كنتى متوصية بالمطايب و كلو من بيت الكلاوى
و لما تجى السودان سوق الناقة ما بتفارقيهوده كلو |
ابو العزايم ياخ ازيك ياخ
اول حاجة بيت الكلاوى دا ما عندى معاهو غير انه
بشيل "الشحم " واقول كدى اسيح الدهن
واسوى داك يا الكركار "
وطبعا ما بحب الربيت
تعرف الربيت ؟
لانه دهنه كتير
وحكمة الله ممكن اطبخ بدون زيت او سمن
ما عندى شريعة مع الحاجات دى
لكن الجينات "الجينات الجرو سابو عروضهن هملو "
نجى لموضوع سوق الناقة
ماتقول مفلهمة ولاحاجة
لكن اكل فى الشارع دا ؟كان زماااااااان
ولابقرب منه بقرف عديل النبى عربى
وسوق الناقة دا بسمع بيهو سمع
يوم مشيت بالصدفة كان عندنا عرض مسرحى فى ود البشير مع ناس اسامه سالم وصوصل
ما دخلته ، لكن من بعيد صوصل الفنان قال لى داك سوق الناقة
واكتشفته انه رواكيب وحته ما صحية يعنى ضبان حايم ونسوان بسوطن فى الاكل صواته
واللحمة معلقة فى الشارع غبار السنين عليهاوعادم عربات و... ماخفى اعظم
هى وكت مغتية مشكلة
اها ياسيد امك وابوك دى قصتى مع الحاجات دى
قول اى حاجة لكن ما قاعدة اكل بره البيت
هسى فى البلد دى كان داير "تغدب" على اعزمنى اكل بره
لانه عارفه اكل بره البيت دا شكله كيف؟
قبل اشتغل فى المطاعم كنت "باكل " النصيحة ليك يا الله
لكن بعد ماعرفت "المغتى ومليان شطة "برى وحاتك
| |
|
|
|
|
|
|
|
|
|
Re: سلمى الشيخ سلامة .. سلامتك من داء الملوك .. تعالوا دثروها وزملوها (Re: حمد اسماعيل)
|
Quote: بعدين فى حاجات من سوق ابوجهل وودعكيفه
بس ما أظنه مسموح دخوله عندكم كان رسلناها |
حمد اسماعين ؟
ياخ مشتاقين كتير
والحقنى بيها البنية فى السودان تجيبا معاها
النمل يقرصك كان ما قلتها
لانى دويات الحكما دى ولا بدورا زاتو
استعجل ود امى خسمتك
تسلم يارب من كل شر
وعندك التلفون ياخ قول صباح الخير
قوول قول مساء الخير
وابدا يومك بالتحية
وانهى يومك بالتحية
او كما قال الناس بتاعين الزمن الجميل
| |
|
|
|
|
|
|
|
|
|
Re: سلمى الشيخ سلامة .. سلامتك من داء الملوك .. تعالوا دثروها وزملوها (Re: محمد فضل الله المكى)
|
محمد فضل الله المكى
يا ود امى القصة صعبة وما هينة
لكن التجى من الجينات تستحملا بت الشيخ
امى عليها الرحمة كانت تعانى من هذا المرض
لكنها ضاربة اضان جلد
مرة سالتها وكانت متصوفة للغاية
تاكل "حريف كسرة بموية " وتحمد الله كثيرا
قلت ليها انتى ياامى القاوت دا يجيك بى وين ؟ لحمة ما قاعدة تاكلى ؟
ضحكت وقالت لى
ـ زمان ابوك بجيب لينا كل اسبوع خروف من تسنى ايام كان شغال فى القضارف والشباب ايامها
لغاية ما اتمكن مننا القاوت
عارف برضو فى الابيض كل يوم جمعة كان بضبحو "عتود"
كملو العتان وجاهن القاوت
الله كريم يا حبيب
الظاهر العتان كانت زعلانة وادتنا القاوت
| |
|
|
|
|
|
|
|
|
|
Re: سلمى الشيخ سلامة .. سلامتك من داء الملوك .. تعالوا دثروها وزملوها (Re: د.نجاة محمود)
|
| Quote: حتعملو شنو للمعهد يا سلمى؟ |
نجاة الحبيبة
كتر خيرك وعمر بيتك
تعرفى اللحم "دا "
ما عندى كبير غرد مما قالو جنون البقر وجنون الخرفان
طلقناهو بالتلاته
لكن يا حبيبة الجينات
ما تظهر فى زول الا "انا ، الا انا" او كما قالت المغنية السمحة انغام
نرجع لموضوع المعهد
دى دايرة ليها مؤتمر
والمؤتمر تنبثق عنه جنة
اللجنة ينبثق عنها لجان
واللجان
ياحبيبة دى قصة طويلة لكن خلينا نفكر مع بعض
وبالخبرات الاتراكمت ممكن نعمل اوراق نرسلا لناس المعهد
ولو انهم ما حيوافقوا عليها
دا مبدئيا
لكن نعمل العلينا ولا رايك شنو؟
| |
|
|
|
|
|
|
|
|
|
Re: سلمى الشيخ سلامة .. سلامتك من داء الملوك .. تعالوا دثروها وزملوها (Re: خالد حامد الجزولي)
|
خالد حامد الجزولى
يا حبة القصة دى وحاتك لاكنت حارياها ولا متعشمة
نعمنى ما زولا كدى بشبه جنس دا
لكن تقول شنو ؟
هسى انت خليت اكل اللحمة ؟
قول النصيحة
عارف عندى حبوبة لى كدى بتريد اللحم
وكدكيد العضام من اهلنا ناس بربر
قومى يا الحبوبة تعالى الخرتوم
وقاعدة تنقرش فى الاكل بطرف اصابعيها
والمعاها مستغربات ، سالنها
ـ انتى يا بت امى مالك تعاينى فى الاكل كدى بعين الرخسة ؟
قالت ليهن
ـ يعنى ناس الخرتوم بكدو العضم ؟
ـ كيفن يعنى ماك شايفانا ؟
قال ليك الحاجة قالت كدى للتوب جدعتو محل هناك ويا الصينية جاك زول
ما خلت عضم طاير
نحنا يا ود امى ما عندنا غرد فى كدكيد العضام
لكن الله غالب
القصة جينات ما عضام ولحمة
| |
|
|
|
|
|
|
|
|
|
Re: سلمى الشيخ سلامة .. سلامتك من داء الملوك .. تعالوا دثروها وزملوها (Re: محمد مكى محمد)
|
محمد مكى محمد
يا ود امى
اسمك دا غايتو بذكرنى اهلنا ناس فريق المكى فى امدرمان
وطيبتك وسماحتك دى منهم بتكون
حبوباتى الله يوسدن الباردة كانن بريدن اللحم
وخاصة فى عيد الاضحى
الربيت دا ما يديك الدرب
ويقعدن العصر فى الضل حق العصر داك
ويجيبن الربيت وهاك يا "لخ "
يكوجنن كدى قدرتن
وبعد داك يشربن قهوتن وشاين "لزوم انهن يحبسن وكدا "
لكن الغربية ما كانو اصلا بشتكو من قاوت ولا مصران ولاهم يحزنون
ياربى من شنو ؟
| |
|
|
|
|
|
|
|
|
|
Re: سلمى الشيخ سلامة .. سلامتك من داء الملوك .. تعالوا دثروها وزملوها (Re: الطيب شيقوق)
|
| Quote: سلامتك بت الشيخ وبلي راسك يا بت الربيع |
هسى يا ود شيقوق الجاب السيرة دى منو؟
يعنى ليه يعنى زى ما بتقول حبوبة حليمة الله يرحمها ويغفر ليها
ولا نظام الكاشف اخوى ؟
وعشه اختى زى ما بقول الفنان العظيم اسماعيل عبد المعين
كان فى برنامج اسمه"سحارة الكاشف"
بقدموا الراحل محمود ابو العزايم
استضاف فيهو الراحل اسماعيل عبد المعين والراحلة عائشة الفلاتية
الكلام كلو عمك اسماعيل يقول لعشه
ـ اها ياعشة اختى غنى لينا
وتقوم عشه تقول لاسماعيل
ـ اسماعين اخوى فترت من الغنا غنى انت
ودنيا كانت جميلة يا الطيب اخوى
والمرض ما بكتلو زول
| |
|
|
|
|
|
|
|
|
|
Re: سلمى الشيخ سلامة .. سلامتك من داء الملوك .. تعالوا دثروها وزملوها (Re: خالد محمد سليمان)
|
خالد ولض امى
اولا شى
Quote: و الكافات السبعه
كباب
كبده
كسره
كمونية
كوارع |
فى كافين ما لقيتهم
وين ودرتهم؟
ثم تانى حاجة
كوارع دى من الله خلقنى ما ضقت طعمها لغاية الان
الكمونية نهائى ما باكلا
الكبدة دى بتقزز منها
الكسرة دى ولافى الحلم ما معاى
الكباب دا فى السنه حسنه
اها يلا ورينى الكافين ديل امكن اكون باكل واحد منهم
لكين بالغت معاى فى حكاية البقوليات دى
وحات سيدى ما بخلى طعمية الفلاتة كانت تكتلونى عديل
احلى طعمية فى الدنيا
لكن الفول هادى طرفى منه الى يوم يبعثون
نعمنى كملت كوتى فيهو من زمن الداخلية فى المدرسة
احى يا خالد العدس حبيبى ما بقدر
يعنى باختصار روشتتك دى خسرانة معاى
| |
|
|
|
|
|
|
|
|
|
Re: سلمى الشيخ سلامة .. سلامتك من داء الملوك .. تعالوا دثروها وزملوها (Re: طه كروم)
|
طه كروم يا احلى صديق
نور جنبيك خليك رقيق
متذكر الاغنية دى ؟
اعتدت انه اعمل الحركة مع اصحابى
يعنى تلاقينى مع السنى دفع الله
بغنى ليهو يابوى يالسنى يا السنى طمنى
وعميرى هو العلمنى الحركة دى
كان بيسلم على يقول
سلمى الشيخ سلامة يا بلال على
وارد ليهو
عبد العزيز جينا ليك
الحمد لله اتحسنت الاحوال
يوم الاتنين تانى ماشه الحكيم
وربك يهون حقن حقن غرامة غرامة
| |
|
|
|
|
|
|
|
|
|
Re: سلمى الشيخ سلامة .. سلامتك من داء الملوك .. تعالوا دثروها وزملوها (Re: انعام حيمورة)
|
سلامتك سلمي من داء الملوك
بسحروك الناس عشان مابشبهوك
كان ختيتي اللحمه بالذات والسجوك
وبقيتي علي السمك واكل الديوك
مابتجيكي الحبه مهما يعزموك
يالحنينه الغاليه (طبعا من ابوك)
اختي ناس بورداب وشله قندهار
البصوتو الشيه بالليل والنهار
اصلهم ياسلمي قاصدين الدمار
يولعو في الكوانين الكتار
وعاد داء الملوك بعرف هظار؟
اريت امريكا تعرف ابتسامك
وروشتاتا تتضمن كلامك
كان اوباما كان بعرف مقامك
كان اسرع وجاك شايل وسامك
سلامه ام عزه تبري من المصايب
معاك بالريده ح نخلي المطايب
نعزمك بكره يا ام الحبايب
فطير بي حب حليب العزه رايب
| |
|
|
|
|
|
|
|
|
|
Re: سلمى الشيخ سلامة .. سلامتك من داء الملوك .. تعالوا دثروها وزملوها (Re: طارق الأمين)
|
Quote: سلامتك سلمي من داء الملوك
بسحروك الناس عشان مابشبهوك
كان ختيتي اللحمه بالذات والسجوك
وبقيتي علي السمك واكل الديوك
مابتجيكي الحبه مهما يعزموك
يالحنينه الغاليه (طبعا من ابوك)
اختي ناس بورداب وشله قندهار
البصوتو الشيه بالليل والنهار
اصلهم ياسلمي قاصدين الدمار
يولعو في الكوانين الكتار
وعاد داء الملوك بعرف هظار؟
اريت امريكا تعرف ابتسامك
وروشتاتا تتضمن كلامك
كان اوباما كان بعرف مقامك
كان اسرع وجاك شايل وسامك
سلامه ام عزه تبري من المصايب
معاك بالريده ح نخلي المطايب
نعزمك بكره يا ام الحبايب
فطير بي حب حليب العزه رايب |
طارق المبروك اقيف
لا تخرب النضم السمح
ناس قندهار ماعليك منهن
وتانى ما بنمشى نلمهم
واوباما ود امى مزنوق
زنقة عدوك والناس المابشبهوك
ميزانية ضاربة تسوك وتلوك
ونحنا فى مرض الملوك
وفطيرك يا حلاتو مع الصباح
ولا كان فى العشية برضو ما بنابى الملاح
الا الملاح ما بناكلو تب
نعمنو جاب لينا المتكل بالشعب
انا اخيتك يا السمح العديل
كلامك سمحا يخلى للمرضان يطيب
وتدنو الثريا تبقالنا قريب
ويا حبيب ناكل فى جديدك يوم المنى
ونعزم صحابنا وكلنا
نتقدم السيرة ونبشر بالهنا
ود الصلاح ساق بتنا
ابشر بالخير يالسمح
نجرتقك ونحننك عاد كلنا
| |
|
|
|
|
|
|
|
|
|
Re: سلمى الشيخ سلامة .. سلامتك من داء الملوك .. تعالوا دثروها وزملوها (Re: محجوب البيلي)
|
| Quote: وتسمعي كلام الحُكما، على ما فيه من مساخة |
يا محجوب البيلى ود امى
كلام الحكمادا يا الحبيب
ما بنبلع لكن التجى من الحكما تستحملا بت الشيخ
النحكى ليك ببت عما لى جنها دكاترة ومستشفى
ووحاتك تعرف الادوية عرفة ما حصلت باسماءها اللاتينية
وكان جيت عندها وشكيت ليهاحالا تنادى بتها يا امل جيبى الدوا حق الحاجة الفلانية لخالتك
والعجب كمان كان قلت ليها عندى كدى ولا كدى طوالى تقول ليك
ـ هى دا ماعندى الله يسختو
اها يا سيد امك وابوك اخدت ليها كم يوم ما مشت المستشفى ولا لاقت دكتورها البتمشى ليهو
يقوم يسالا
ـ وينك ليك كم يوم ما شفناك ؟
انقر الرد شنو ؟
ـ هيا دكتور ما كنت عيانة
شفت كيف ؟
شفت كيف مش ؟
| |
|
|
|
|
|
|
|
|
|
Re: سلمى الشيخ سلامة .. سلامتك من داء الملوك .. تعالوا دثروها وزملوها (Re: Zoal Wahid)
|
زول واحد كبفك ابوى
الدوم والريد دا بنعرفو طب
لكن الدوم دا الا الزول يمشى المكسيك
عارف ناس المكسيك ديل حيرونى فى راسى دا
اى حاجة حقتنا عندهم
ياربى بنتشابه فى الممارسات؟
عندى بت صحبتى امها فنانة تشكيلية وخالتها برضو
فقالت لخالتها "انتى بتشبهى امى جدا "
الخالة قالت ليها فى شنو ؟
البت المفعوصة قالت لخالتها"فى الممارسات وكدا"
اها ناس المكسيك ديل للعرديب دا عندهم
بغلبهن ياربى الدوم ؟
ما ظنيت
وباقى لى كان ما اخاف الكضب شفت شجر دوم فى تكساس
النكلم ناس تكساس يرسلو لى دقة الدومعشان الوزن
تسلم ود امى
| |
|
|
|
|
|
|
|
|
|
Re: سلمى الشيخ سلامة .. سلامتك من داء الملوك .. تعالوا دثروها وزملوها (Re: ناهد بشير الطيب)
|
Quote: وسمعتك امبارح فى النيل الازرق
بتتكلمى كلام مؤثر عن صديقتك المرحومة رجاء حسن حامد
كل تعازى الحارة |
الصديقة العزيزة ناهدبشير
تعرفى الكلام مع ناس التلفزيون دا لا بودى ولا بجيب
لانهم ما جهة تنفيذية
للاسف
والمتنفذين ما بعبروا الفنانين
يعنى كل الفنانين حيموتو سمبلة
هسى عليك الله الزى رجاء دى ربنا يرحمها بخليها تمرض ؟خلى تموت بالحسرة ؟
يا امى البلد دى ماعندها وجيع
والفنان فى بلد زى بلادنا بموت بالحسرة والمرض
وياما فنانين رحلو دون ما واحد يعبرهم
عارفة الفنان عوض الجاك مات وهو افقر من مشى على الارض
وكان بجى الاذاعة من بيته ماشى لانه شلن المواصلات فى الوكت داك ما كان عنده
وغيره كتيرين
ربنا يرحم فنانى السودان الذين يوقدون اصابعهم شمعا ليضئيوا حياتنا
يسلم عمرك حبيبة
| |
|
|
|
|
|
|
|
|
|
Re: سلمى الشيخ سلامة .. سلامتك من داء الملوك .. تعالوا دثروها وزملوها (Re: Muna Khugali)
|
منى العزيزة
يسلم عمرك
| Quote: وقفي أكل اللحمه علشان لما تمشي السودان تمشي قندهار.. |
وحاتك ولا كابول زاتا
شفتها من بعيد لبعيد
برى وحات الله مانى ماكله فيها
ياحبيبة نحنا بقينا فى ارزل العمر
والفاضل دا بنتضارف عليهو
مبروك يا السمحة للبنية لينا كلنا الحفيد
يتربى فى عزكم
وما تنسوا ترسلو لينا الكرامة لكن ما لحم حاجة تانية
انشا الله علبة حلاوة
تحياتى لاية ويسين وامنا حاجة جارة
| |
|
|
|
|
|
|
|
|
|
Re: سلمى الشيخ سلامة .. سلامتك من داء الملوك .. تعالوا دثروها وزملوها (Re: Yassir Bainwi)
|
ياسر بيناوى
ازيك ياخ
الرطب الفى يدك بتودينا للموت
انت ماك عارف ريدى للتمر ؟
زمان كان عندنا مزارع ولا شنو اسمهاياربى
لاما مزارع بقول عليها فى البلد"دنقلا ـ الحفير ـ اسم غايتو
يفيد انها مزارع
كانوا بجيبو لينا التمر
الله عليه ومعاهو "الجرم"بضم الميم
لكين لمن حبوبة ماتت انقطعت الامدادات التمرية
والقمحية والجرمية
لكن ظلت علاقتى بالتمر قائمة
قومى يا بت الشيخ امشى كاليفورنيا فى احد سفراتى التاريخية
لقيت ليك التمر الماخمج
كان زمن الدنيا بى خاترا عمنا صدام عليه الرحمة
اهدى شتولا ما هينة لعمنا ريجان
وقول كدى يالتمر املا المحلات
والشوارع
شوف عينى الشفع يطقعو التمر زى ما نحنا بنطقعو
الظاهر الحركة دى انترناشيونال
وقاموا اصحابى المشيت ليهم ديل لمن شافونى متوجدة على التمر
رسلوا لى طردا ماكن
من التمر
وعاد يايمة ليك لمن مشيت العراق عامن اول
ما عندهن تمر انى امنت بالله
حلاوة الدنيا كلها
لكن مازى حقنا السمح داك
بمناسبة التمر برضو
حصل اكلت الكابيده؟
مخلوطة بالتمر ؟
جربا وحات الله تاكل ما تدى المعاك
والحكمة كانت زوجة جدنا صالح الدنقلاوى عليه الرحمة هى البتسويها
لكن الحكمة انها شايقية شفت كيف؟
شفت كيف؟مش؟
بعدين تعال هنا ليه عملت اعداء ياحبة؟
نحنا ناس بنعيش حياتنا الغالية بالنية السليمة
وكل زول دايرين سعادتو تشهد الايام عليمة
ولا كيف؟
| |
|
|
|
|
|
|
|
|
|
Re: سلمى الشيخ سلامة .. سلامتك من داء الملوك .. تعالوا دثروها وزملوها (Re: عزيز عيسى)
|
Quote: وبلدكم أيوا الباردة دي
أحسن تطلعي منها وتجينا
هنا في هيوستن..
بي رطوبتنا الشفتيها ديك
لا عندنا قو أوت ولا قو أواي. |
ياعزيز يا عزيز
ياعزيزى هيوستن دى اخير منها برد ايوا
انى امنت بالله
بلد فى الشتا سخانتها تلحم؟
حرام عليك ياخ انت فعلا قنعان منى
زمان اول ما جينا البلد دى كنا فى هيوستن
ولمن لقيت ايوا بعتها طوالى
ياخ دى حرها كافر خالس
ورطوبة ما بتعتق
يعنى درجة الرطوبة بتصل اكتر من مية فى المية
انا لله
يازول بردا جاف ولا حرا مرطب
| |
|
|
|
|
|
|
|
|
|
Re: سلمى الشيخ سلامة .. سلامتك من داء الملوك .. تعالوا دثروها وزملوها (Re: حواء سليمان ابراهيم)
|
حواءسليمان
يا اعز الناس
دا اسم حلو مرة واحدة
ذكرتينى اهلنا ناس كردفان وطبيق العسل
وعلى ذكر القرع
مرة كنت فى الدوحة فى سمنار ما عن كرة القدم
لاهتمامى الخاص بتلك اللعبة ولعلمى التام ان الانجليز اسياد اللعبة
قلت لبدر الدين الامير الله يطراهو بالخير حامشى معاك
فى الجلسة الختامية واحد هندى اتكلم عن
اللاعب الافريقى وفرصة انه يبقى نجم لمجرد عبوره الى اوروبا
زعلت واعلنت غضبى بصورة واضحة
المهم يا ستى بعد كلام الهندى جا "الكنجكة" الكبير
محمد همام رئيس اللجنة الاولمبية الاسيوية حينها
وقال فى معرض حديثه انه"اعتذر للاخت الصحفية سلمى السودانية "
"امك "
قمت لشلاقتى حكيت للسنى دفع الله
قال لى
ـ ما مشيتى ليهو واتكلمتى معاهو عن وظيفة ؟
قلت ليهو ابدا
زعل منى وقال
ـ تعرفى لو دا لو زول تانى كان القرع دا ما يديك الدرب
من الدمازين لغاية الابيض كان هسى يكون ممدود
ياخ دى فرصة ذهبية
لكين يا اخية الرزق مكتوب ولا ما كدى ؟
تسلمى بت امى ويخليك يارب
| |
|
|
|
|
|
|
|
|
|
Re: سلمى الشيخ سلامة .. سلامتك من داء الملوك .. تعالوا دثروها وزملوها (Re: نصار)
|
Quote: كان زمان مرض ملوك
و كان خطر
الان فقد مولكيته و خطره |
نصار اخوى
الله لا وراك وجع المفاصل
لكن اتمنى انه كلامك دا يطلع صاح
لانه القومة بقت صعبة
والزول ماشى دفرة
ثقيل جدا هذا الورم العضامى
يسمع منك ربنا ويلحقنا ويفزعنا الخواجة بعدد واحد دوا يطفشو
لكن اقول ليك حاجة
غايتو كان حمونى الشكولاتا بموووووووووت
الباقى هين
| |
|
|
|
|
|
|
|
|
|
Re: سلمى الشيخ سلامة .. سلامتك من داء الملوك .. تعالوا دثروها وزملوها (Re: عماد الشبلي)
|
عماد الشبلى حبيب الشعب
عليك الله ما مظاهرة محترمة؟
بتعرف صباح النعمة سراج النور
كان فى كلية الفنون
اول ما الشباب يصحو الصباح ماشين على الكلية يدوها ليك مظاهرة
وهم شايلين صباح ويهتفوا
صباح النعمة سراج النور
المسا لمن اليوم الدراسى ينتهى صباح يقول ليهم
ـ يا شباب ما فى مظاهرة ؟
الجواب انه المظاهرة فى الصباح بس
هسى انتى اسمك عملناه ليك مظاهرة بت كلب
تحياتى
| |
|
|
|
|
|
|
|
|
|
Re: سلمى الشيخ سلامة .. سلامتك من داء الملوك .. تعالوا دثروها وزملوها (Re: Mohamed Abdelgaleel)
|
محمد الجليل
ازيك وبركة الشفناك "اثيريا طيب"
طولت من تلفوناتك وكلامك اليرد الروح
ويا حليل امدر
طريتا وطريت ناسا
بمناسبة امبدة دى
يوم جاية البيت المسا
موصلنى عركى البخيت
مش فى المنطقة الصناعية فى محلات بتاعة ابواب وشبابيك حديد
على الشارع الكبير
الممتد من ود البشير لغاية لفة بيتنا
عركى قام عاين للابواب ديلاك وقال لى
ـ تعالى ندق الابواب دى ونجرى
قلت ليهو لوجا زول فتح لينا ؟
بقيت كل ما امر بهناك اتذكر الحكاية دى واضحك
خلينا نضحك ياخ
ونضحك من الواقع سوا
| |
|
|
|
|
|
|
| |
خالد العبيد
القلب النابض
سفيان بشير نابرى
سلمى الشيخ سلامة
محمد فضل الله المكى
Rawia
ماضي ابو العزائم
Badreldin Ahmed Musa
أحمد الشايقي
هند محمد
محمد كابيلا
خالد حامد الجزولي
rosemen osman
محمد مكى محمد
طارق جبريل
عبد الدائم سيد أحمد
الطيب شيقوق
محمد عبد الماجد الصايم
Mohamed Abdelgaleel
عماد الشبلي
نصار
نصر الدين عثمان
ASHRAF MUSTAFA
أبوبكر أبوالقاسم
حواء سليمان ابراهيم
عزيز عيسى
Abdelgadir Galal Ahmed
Muna Khugali
ناهد بشير الطيب
خالد محمد سليمان
باسط المكي
Alsa7afa_30
محجوب البيلي
عبدالوهاب علي الحاج
ماجدة عوض خوجلى
الفاتح يسن
ترهاقا
انعام حيمورة
الجندرية
أبوذر بابكر
دورنقاس
ismeil abbas
فيس بوك
تويتر
انستقرام
يوتيوب
بنتيريست