اتمنيت لو كنت كديسة .... فى البلد الهايف اهلها!!!

دعواتكم لزميلنا المفكر د.الباقر العفيف بالشفاء العاجل
مرحبا Guest
اخر زيارك لك: 12-13-2024, 04:29 AM الصفحة الرئيسية

منتديات سودانيزاونلاين    مكتبة الفساد    ابحث    اخبار و بيانات    مواضيع توثيقية    منبر الشعبية    اراء حرة و مقالات    مدخل أرشيف اراء حرة و مقالات   
News and Press Releases    اتصل بنا    Articles and Views    English Forum    ناس الزقازيق   
مكتبة سلمى الشيخ سلامة(سلمى الشيخ سلامة)
نسخة قابلة للطباعة من الموضوع   ارسل الموضوع لصديق   اقرا المشاركات فى شكل سلسلة « | »
اقرا احدث مداخلة فى هذا الموضوع »
04-15-2007, 04:24 PM

سلمى الشيخ سلامة
<aسلمى الشيخ سلامة
تاريخ التسجيل: 12-14-2003
مجموع المشاركات: 10754

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
اتمنيت لو كنت كديسة .... فى البلد الهايف اهلها!!!

    اهداء خاص لصديقى ابوبكر سيد احمد الذى يتهمنى بالحزن الدائم

    الكدايس خشوم بيوت واحدات بياكلن اكل الكوشة راسن عديل ، وديل حقاتنا لزم ، لا عندهن تالى ولا والى ، ولا اما تبكى عليهن ، مسكينات ، ولا والدن يشهد لهن ياكافى البلا يا حايد المحن ، واحدات وديل مشهورات بي كدايس المطابخ ، مدوعلات ومُكان الواحدة ليها كلاوين ، لمن تحس بيها نفسا قايم من الدفس البتدفسو وديل تلقاهن النهار ما طال مبطحات وبالليل داقشات الكوش حقت المطاعم ، زمن الزمن زين ، والاكل يملا كوشتين ، هسي بقى عندهن منافسين ، ناس قدوم شين ، وخشمى عندى
    واحدات وديل عندهن ميزة بياكلن مع العيانين الايد بالايد ، مامهم نوع الاكل، المهم ياكلن ، حق السكرى بياكلنو ، حق الضغط ، مافى مانع ، حق الايدز ياربي دا كيفنو؟
    اها الكدايس قلنا انواع ، منهن البنضمن، وديل محن ناس بورسودان

    بسم الله الرحمن الرحيم ، قالو الله يكفينا شر القوالة ، فى كدايس من ناس(بسم الله)بيورنك محل الخزاين ، تفتح وتخم ، اريتني القي واحدة منهن وحار حار ابقى غنيانه والله ما بكلم زول ،السر في بير ناس الدنيا ما معروفين باكر يسوولى عمل يلحس الادتنى ليها الكديسة
    برى ، وعاد يا الله بجيك وتسالني ، عامن اول مشينا بورسودان رحلة مدرسية ، زمن التعليم بي خيرو ، نزلونا في كلية المعلمات،شهر سته ، الدنيا حر ،والرطوبة تخش في العضام ، والخوف مالينى تب ، والراس يودى ويجيب ، ملان كلام شئ اساطير وشئ خرافات ودجلا ما عندو حد عن الكدايس حقات بورسودان،اول حاجة عاينت لي محل الكدايس ، وختيت سريري وسط البنات ، وخشمى كارس ما حدثت واحدة بي نضم قلبى ، النعمنى كان نضمت كلهن بياخدن بعضن ويا درب جاك زول لكين الخشم ما بقدر علي سكاتو ، عاد ماكلني اكولة شديدة بلحيل ،ودايرة انضم ، والكلام مدور في الراس ، هسي كان دايرة اسال ، اسال منو ؟ يوقع لى كلام الكدايس دا ؟ محن الكدايس دى منو البعرفا ؟ عاينت قدر ما عاينت ، مافى زولا كدى اقدر اسالو ، وخلاس القلب ابى السكات ، تعب من الكتمة والنضمى الكتر ، يا ربي صحي الكدايس ديل بنضمن ؟ واها كان نضمن ، نضميا كدي مفهوم الزول يفرزو ؟ ولا كلام الطير في الباقير ؟ لا لايا بنية دا ما كلام طير دا كلام كدسة ،كدايس ساكت ، (كلام الكدايس دايرلو ركايز)وكت خلاس الكلام غلبني بقيت اقول لى :
    يا بت قولي بسم الله ، اول متل نضميك دا بجيبلك الكلام ، اول في كلام بلاكلام الناس ؟ ياتو يوم سمعتي زولا ولا مخلوقا غير الانسان بتكلم ؟ يعني دايرة تقولي الكدايس ناس مقلبنين ؟
    اها القلب يودى ويجيب اتمددت فوق سريري المتروس بالناس ،من كل ناحية ، بي جاى بنات،وبي جاي بنات ، راقدة ممددة العين بيضا ، اثر للنعاس مافى ، قدر الريال ان كبيت فيها طن تراب تشيلو، والقلب دلوكة بس ،محمسة بي نار، مشدودة وتسوى (دل ، دل ، دل ، ) الليلة يا بت الشيخ ، سجمك ورمادك ،هسي كان نطت عليك كديسة فوق السرير ونضمت معاك ، وين بتمشي ؟ وشن بتسوى ؟ اها ،انا اختك يالمغيرة ، والله والله ، تلاته بالله نعلاتى ديل الا يختنها (سلات) ، اها وكان خربشتك شفتو جنس الختا دا؟ ... اجي ما بجرى ، اها فى جنس كلامى داك احس ليك بي جنس عطش ، لا حكي لا بقى ، لمن ريقى بقى دقيق ، الخلق بي تمتا نايمة ، عاينت لي محل السفرة ، نزلت براحة من السرير ، مشيت على السفرة ، الكرعين كان رخيت اضانك امانه ما بتسمع( ككرك ككرك ككرك) يرجفن متل مرقة الضلافين ، النور مولع ، فرحت ، قلت امكن في زول جوه ، دخلت السفرة ، قربت ارجع ، عاد يا الله بجيك وتسالنى الكدايس ملمومات في التربيزة متل النمل في السكر ، وشن بشبهن بلا الحمل الدعول المربي ، عاينت لي واحدة قريبة منى واقفه جنب التلاجة ، يا يمة تقيف جبارتك ، تتضرع ، وكت شافتني وقفت واتمغت ، وعاينت لى جوه عينى ، كدى ها ، غزت العين غزة البصلة قهرتك بالذي خلقك ، وحسيت بيها قربت تقول لي: دايرة شنو ؟
    يايمة الدورة التملا راسك ورق ، اعاين ليها ساعة واعاين لي رفيقاتا ساعة ، كلهن خلن سواتن وقبلن على ،العين زى النور المجرور ، تلمع ، اجى ، قلت اخير النقوى قلبى ، قويتك يا قلب الجن ، وانت كل ما ليك مايع ، وعليت حسي شان اقولهن( بس )شوف عينى ، كلهن الساعة الحدرن لى ، ونجرررررر جررن فينى ، وكان ما اخاف الكضب واحدة قالت لى
    ـ بس انتي ، خايفة منك ؟
    اجى يا يمة ؟ يا بت الشيخ الحقى امرقى من جنس النضمن ديل ، دا نضميا كتر ، مشيت على الماسورة حقت التلاجة ، اشوف ليك كوم منهن جن داخلات كانهن معزومات ، وعديل على التربيزات ، عارفات شغلن بالله الذي نتفن الصحون نتف ،مشيت خطوة ، اشوفن رفعن راسن من الصحون ونجررررر، الكلام طار لي من راسي ، اقول بس ولا اجرى ولا ، ما عرفت اسوى كيف ؟ مالكن ؟ يملكن في نار جهنم يالغبيانات العيون تلمع ، وهن خلاس لقن ليهن موضوع ، قدر ما نهرت مافى صوت الصوت ابي يمرق من الخوف ، عيونن زى البنادق ، ما رمشن يخربن ، والصوت بقى عالي حق النجرررر ، كل ما ليهو ماشي زايد ، العطش طار ، محل ما طار ما عرفتو ، انعدلت ويا الباب جاك زول ، ، ترس ، الموية عنها ما انشربت ، اتذكرت في اللحظة ديك قصة حكاها لى عمي يوسف ود امحمد، جات من وين ؟ ما بعرف المهم انها جات :
    قال : صاحبا لى قال مسافر بربرمن بورسودان، قال كم يوم وراجع ، اها عندو كديسة مربيها ، قام قال لى الكديسة دى امانه ، تشترى ليها كل يوم نص كيلو لحمة ضان ورطل لبن ، مافى حاجة اسمها اكل بايت ،ما بتاكلو ليك ، عمي يوسف نساى اظنو نسي كلام صاحبو ما سوي منو جنس حاجة ،اول يوم جا متاخر ، وما اداها العشا ، وكان اداها مااداها كلام صاحبو الوصاهو بيهو ، قال : ختيت الاكل وناديتا كديسة الجن دي ، عاينت لى كدى وقدلت بعيد من الصحن المعنى يعنى حردانه ، قلت النحنسا بلا كفتت الصحن في وشى وبي صوت ما عرفتو جاى من وين زى السمعتها بتقول :
    ـ انت الاكل حقى داسيهو لى رقبتك ؟ ما قال ليك ادينا لحمة ؟وينا ؟ ووين اللبن ؟
    عمي يوسف من ساعتوديك الحمى ما نزلت منولمن سيد الكديسة جا ، ومن محلى داك قال عم يوسف على القطر وبربر جاك زول ، وحلفت تانى بورسودان ان بقت قبلة مانى مصلى عليها ، حد الله
    اليوم التانى قمت من النوم والحلق ناشف والعيون مدفدفات ، ومن ساعتي ديك بقيت اجيب الموية من ضو اختها جمبي ويا كديسة الجن القشة ما تعتر ليك
    الكدايس خشوم بيوت ، حقات الحلة عندهن لغة براهن بتناغمن بيها في الليل يتلبن من حيطة لى حيطة ومن بيت لى بيت يتصايحن ، كنا بنترجم ليهن الكلام مرات،عدم الشغلة، واحدات بنتخيلن يقولن( داؤود )، ديل تخصص اكل الحمام ، والفيران ، ولا تلقاهن داخلات المطابخ حقات البيت اللبن في غضب الله ، باقى الحلل ان قاعدات بره ما دخلتوهن التلاجة ولا علقتوهن في المشلعيب حقهن راح ، ولا كان ما غطيتوهن وعصرتوهن بالحجار زي حبوبة فاطنة بت محمود ما كانت بتسوى الرماد كال حماد تجيب الطشت تملاهو موية وتخت الحلل وتعصرن بالحجارة يوما تلقاهن ويوما الكدايس يرمن الطشت الفوق ، يا اكلنهن هن ولا الكدايس الادمية البتجى تطمش نص الليل وتكابس
    لكين الكدايس هنا في البلاد دي امريكا يعنى كلام تانى ، وحالا اريتو حالى ، اها ، عاد للاستباليات ديل عندكن يا كدايس الجن ، استبالية حدادى مدادى ، ودكتور وممرضات ، وعربات اسعاف ، وغرف مخصوصة دقر ياعين ، اريتو حال اهلى يا يمه ،وحات الله فراغ من متلا الباعت امها وكست راجلا ، الناس هناك جنس الاعتنا دا كان لقوه جنس زول عوجه ما بتجيهو ، النعمنها في جنس البلد (الهايف اهلها )كان ساكت طولت فى النوم يقولو عيانه ، واستبالية ودوا
    امريكا بلد المحن الملن الصحن
    اول ما جيت امريكا ، مشيت السوبر ماركت ، قلت النجيب لى حاجات للبيت ،داك اليوم ضحكت فينى جنس ضحك ، طبعا ما عندى فكرة انه فى حاجات ما ( استعمال آدمى ) وانه فى لافتات معلقة فى راس الزول فيها اسماء الحاجات والمحتاجات ، للتعترنى لا شفت لافته ولا قريت ، تووووشك دخلت الصف من اولو ، لى اخرو ، اشيل والقّط لقطك لقطك ، شى معجون اسنان ، وشى علب لحمه ، وشى اشكال غريبة لمنتوجات ما شفتها قبل كده ، لقيت الكلام ما ياهو ، في سراير صغار كدى ، وفرش تسريح ،وشامبوهات اول مرة اشوف زيها ، اها رفعت لى حاجة كدى ، ما بذكرا ، المهم لقيت فيها صورة كديسة حلات الدنيا عليها ، عاينت لى عربيتى الجاراها ملانه هتش كدايس ، اجى دا حال العدو الما صليح ، دا اكل الكدايس ، امرقى يا اختى قبل ما زول يشوفك ، براحة انعصرت ويا دار ما دخلك شر
    وخلاس يعنى البت بتشترى براها ، لكين ما شفت العجب شى سراير مخصوصة ، وشى فرش اسنان ، وشامبو ، معجون اسنان، كريمات ، صابون حمام ، حبوب الدوا من الدبرسة ، للقراد والجرب حالنا يا يمه حال الكديس الامريكى ، الاكل انواع واشكال ، جنس دلع !
    من طرايف الامريكان والكدايس ، واحدة كانت معانا فى الشغل كل يوم تجينى بتي عملت، بتي سوت ،وبتى فعلت ، كسرت الصحن ،الليلة ضربتني ، وحكاوى لذيذة ، ومشوقة ، المهم يوم قالت لى حاجيب ليك صورة بتي ، وكنت يا مؤمن يا مصدق ، حاشوف البت الداوشانا بيها طول الليل دى ( كنانشتغل وردية ليل تبدا من العاشرة وتنتهى عند السابعة صباحا ) طول الليل ونحنا في بتى ، الليلة اشتريت ليها شامبو نوع جديد من البعملو ليهن اعلان فى التلفزيون ، وبتى قبل كم يوم جاتا حمى ، وديتا الدكتور العلاج غالى جدا ، اها قولى كدى اليوم داك جابت الصورة ، قبل ما اشوفا قالت لى
    :عارفة اننا انفصلنا انا وخطيبى لانه قال لي : يا انا يا هي
    ولغاية الوكت داك كان عندى احساس راسخ اني حاشوف بت بي ضفاير ، حليوة ومدغلبة بيضا وليها جضوم ولمن تورينى الصورة حاقول ليها حلاتا بتك ، مدت لى الصور ة ، اول حاجة قلتها بعد ما مسكت نفسى بعد تعب من الضحك :
    ـ الخفا اليخفاك النصرانية ، بتك كديسة ؟
    لمن حكيت لاصحابي قالو لي انتي البوديك لي جنس المحلات دي شنو ؟ وما اظن بتعرفى قدرنا النوريك
    في واحدين بكوسو الكديس المناسب للكديسة المناسبة لانهم بيفتكرو انها ( بت قبايل)
    وما مفروض تطمش بالحلة ساكت ، ( لازم يكون كديس ود ناس ) قلت ليهم تايهة ولقيناها اشتغل خاطبة ويا بخت من وفق (كديسين) في الحلال ودى عايزة حركة تقوم تشوف الناس العندهم كدايس ( اناث ) والناس العندهم (ذكور ) تشيل صورة الكديسة توديها لناس الكديس ،وكان اتوفقوا نان ما بسوى ديك ياالحفلة الما خمج ، وانعدل واغنى :
    كديسنا قطع البحر الليلة زينه
    كديسنا قطع البحر للكديسة
    كديسنا قطع البحر ياكديسة
    شرك لسمك البحر للكديسة
    البلطى احسن سمك
    ياكديسة
    وكمان كان عرفو بعض بطريقتن ، حتكون الاغنية مختلفة خاصة لو فى منافسين:
    كديستى وكديستك اسباب لوعتى
    ولمن يقولو كدي يا يمة ويجو لي قطع الرحط ، حنجيب ليهم ديك يا الغناية ، الساعة التغني ليهن :
    يا كديسنا ؟
    آآيا العضم دا
    آى يا
    ادى كده
    آيا اللبن دا
    آآآيا ادى شفطة

    اكتر حاجة كانت بتنرفزنى لمن القي واحد ولا واحدة سايق الكديس بفسح فى، ويقول ليهو سلم على ...، السلب الطوال ، وعجب العجايب الاعلانات ، قادر الله ، والافلام ، والنسوان البجيبوهن يبكن علي الكدايس ، ولا الشفع ، ولمن اتذكر كدايسنا ببكى علي هملتن ، وعدم واليهن ، واتمني لو كنت زي كدايس النصارى ديل والله الواحد كان اخيرلو يكون ، ولا بلاش




    واشنطن دى سى
    2004 /24 / 4




    (عدل بواسطة سلمى الشيخ سلامة on 04-15-2007, 04:26 PM)
    (عدل بواسطة سلمى الشيخ سلامة on 04-15-2007, 04:29 PM)
    (عدل بواسطة سلمى الشيخ سلامة on 04-15-2007, 04:53 PM)
                  

04-15-2007, 05:21 PM

abubakr
<aabubakr
تاريخ التسجيل: 04-22-2002
مجموع المشاركات: 16044

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: اتمنيت لو كنت كديسة .... فى البلد الهايف اهلها!!! (Re: سلمى الشيخ سلامة)

                  

04-15-2007, 06:19 PM

سلمى الشيخ سلامة
<aسلمى الشيخ سلامة
تاريخ التسجيل: 12-14-2003
مجموع المشاركات: 10754

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: اتمنيت لو كنت كديسة .... فى البلد الهايف اهلها!!! (Re: abubakr)

    صديقى ابو بكر مرة حكى لى ابوعركى الفنان انه الكهربا كانت قاطعة، فقام اصغر واحد فى اولاده اسمو محمد الخاتم عندو كديسة مربيها، فدخل الاوضة عشان يشوف حاجة فى الدولاب وشايل الكديسة وموجه عيونا على الدولاب لمن سالوه ليه عملت كده قام قال ليهم (مش الكديسة عيونا بتولع فى الضلام)
                  

04-15-2007, 05:22 PM

abubakr
<aabubakr
تاريخ التسجيل: 04-22-2002
مجموع المشاركات: 16044

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: اتمنيت لو كنت كديسة .... فى البلد الهايف اهلها!!! (Re: سلمى الشيخ سلامة)

    (عدل بواسطة abubakr on 04-15-2007, 05:23 PM)
                  

04-15-2007, 05:36 PM

نهال الطيب
<aنهال الطيب
تاريخ التسجيل: 03-14-2007
مجموع المشاركات: 1606

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: اتمنيت لو كنت كديسة .... فى البلد الهايف اهلها!!! (Re: abubakr)

    اول ما جيت امريكا ، مشيت السوبر ماركت ، قلت النجيب لى حاجات للبيت ،داك اليوم ضحكت فينى جنس ضحك ، طبعا ما عندى فكرة انه فى حاجات ما ( استعمال آدمى ) وانه فى لافتات معلقة فى راس الزول فيها اسماء الحاجات والمحتاجات ، للتعترنى لا شفت لافته ولا قريت ، تووووشك دخلت الصف من اولو ، لى اخرو ، اشيل والقّط لقطك لقطك ، شى معجون اسنان ، وشى علب لحمه ، وشى اشكال غريبة لمنتوجات ما شفتها قبل كده ، لقيت الكلام ما ياهو ، في سراير صغار كدى ، وفرش تسريح ،وشامبوهات اول مرة اشوف زيها ، اها رفعت لى حاجة كدى ، ما بذكرا ، المهم لقيت فيها صورة كديسة حلات الدنيا عليها ، عاينت لى عربيتى الجاراها ملانه هتش كدايس ، اجى دا حال العدو الما صليح ، دا اكل الكدايس ، امرقى يا اختى قبل ما زول يشوفك ، براحة انعصرت ويا دار ما دخلك شر

    ست سلمى
    أضحك الله سنك والله الضحك شرطني

    عارفة خالاتي في سنار مربيات كدايس وعاملين بيهم موضوع اها انا الكدايس بتهدد أمني بالذات البتلصقوا ديك والله أنا اليوم كله محشورة في ركن من الكدايس

    سلمتي يا حبيبة
                  

04-15-2007, 06:27 PM

سلمى الشيخ سلامة
<aسلمى الشيخ سلامة
تاريخ التسجيل: 12-14-2003
مجموع المشاركات: 10754

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: اتمنيت لو كنت كديسة .... فى البلد الهايف اهلها!!! (Re: نهال الطيب)

    نهال الحبيبة تعرفى (هنا)الكدايس عندها توم وشمار مازى حقاتنا وبخاف منها من ما عرفت الدنيا ما بشيلا فى ايدى ، الايام دى شغالة فى حضانه وزى ما بخاف من الكدايس بخاف من العيال الصغار ، حقيقة بخاف عليهن لانو مرات ببقو زى الكدايس خاصة لمن تجى تغيرى ليهم ويعاينوا ليك زى عين الكديس وحلاتن لمن يضحكوا ،المهم انهم اكتر الافراد المعتنى بهم ، ودايما بتمنى انه عيالنايبقو محل اهتمام الاهل مش ياكلو اخر ناس بعد (الرجال )ويكونوا محترمين حبه لانهم عصارتنا وزادنا ، شكرا ليك حبيبة
                  

04-15-2007, 05:40 PM

abubakr
<aabubakr
تاريخ التسجيل: 04-22-2002
مجموع المشاركات: 16044

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: اتمنيت لو كنت كديسة .... فى البلد الهايف اهلها!!! (Re: سلمى الشيخ سلامة)

    اها ياسلمي ما قتي لي في بلدكم الهايف الكدايس بصوتو في الانتخابات واللا اكل ومرعي وقلة صنعا ؟
                  

04-15-2007, 06:47 PM

نهال الطيب
<aنهال الطيب
تاريخ التسجيل: 03-14-2007
مجموع المشاركات: 1606

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: اتمنيت لو كنت كديسة .... فى البلد الهايف اهلها!!! (Re: abubakr)

    ست سلمى
    عارفة في نادرة ماسكنها لي من زمان اني لمن عمري أربعة سنين كنت في إجازة في السودان اها طبعا كنت القشة أم روح
    ومن ما بدت الاجازة بقيت ما باكل زيادة بس طوالي ودوني الدكتور اهاالدكتور لئيم بس سالني مالك ما بتاكلي قلت ليه لانهم بجيبوا لينا الأكل بعد الرجال وشكله ما حلو عشان كده ما بأكل اها الراجل مات بالضحك قال لي أنتي جابوك من وين فصيحة كده
                  

04-15-2007, 06:48 PM

سلمى الشيخ سلامة
<aسلمى الشيخ سلامة
تاريخ التسجيل: 12-14-2003
مجموع المشاركات: 10754

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: اتمنيت لو كنت كديسة .... فى البلد الهايف اهلها!!! (Re: سلمى الشيخ سلامة)

    تعرف لو كانوا بصوتوا فى الانتخابات حيفوزا الديمقراطيين لانهم اقل شراسة (على الاقل فى الظاهر)من الصقور والمحافظين الجدد الله يقطع طاريهم ، ولان الكدايس (رقيقة ) حيجيبوا يا هيلارى كلينتون اوالمرشح الديمقراطى الافريكان امريكان ياخ نسيت اسمو ، واحكى ليك مرة اوبرا وينفرى سالت ممثل امريكى برضو من البنسميهم اولاد الخالة ، المهم السؤال كان هل ممكن يجى زول افريكان امريكان كرئيس للولايات المتحدة ؟ اللمثل قال ليهابعد ماضحك: امكن سنه خمسة وامكن كمان
                  

04-15-2007, 08:06 PM

عاطف عمر
<aعاطف عمر
تاريخ التسجيل: 11-26-2004
مجموع المشاركات: 11152

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: اتمنيت لو كنت كديسة .... فى البلد الهايف اهلها!!! (Re: سلمى الشيخ سلامة)

    يا سلاااااام يا سلمى
    سرد ينزع الشهقات

    وللقطط حكاوي لا ينضب معينها

    في سفرياتنا الكثيرة بين الجزيرة والخرطوم حيث كانت الجامعة ، صادفني يوماً في محطة الحصاحيصا شاب في ريعان شبابه ، وسامة ورجولة بادية ، غطى أهله كل قطعة من يديه بثياب كثيفة ، قيدوه ، حوله إثنان من أشقائه يتناوبون على منعه من عض نفسه ومعهم ما بدا لشدة ألمها أنها أمهم .
    كان المسكين قد تعرض لعض كلب مسعور وأهمل العلاج أو لم يهتم به .
    من هنا كانت عقدتي من الكلاب وكل ما يؤدي للسعر .
    كان لوالدتي قطة ، حاولت كل جهدي إقناعها بأن ( تسرحها ) وكانت ( لاءها ) غير قابلة للنقاش . ياولدي سوت ليك شنو ؟؟؟
    إلى أن كان يوم
    كنت استعد للخروج مساءً ، وتقطع الكهرباء فجأة وفي عز ( المكابسة ) أتعثر في القطة التي تضطر للدفاع عن نفسها و ( تخربشني ) أم ( تعضيني ) لا فرق المهم أنها أسالت دمي .
    فجأة تذكرت ذلك الشاب المسعور وكبرت العقدة في رأسي وتخيلت نفسي مكانه و( مسخت ) على الدنيا وأصررت على البدء فوراً بعلاج السعر. أقنعني من لهم عميق معرفة بالطب أن الحيوان المسعور يموت بعد أن يفرغ سمه في الضحية في فترة زمنية لا تتجاوز العشرة أيام . لذلك من الأفضل مراقبة القطة فإن لم تمت في هذه الفترة فهي غير مسعورة وبالتالي لا ضرورة لأخذ العلاج الذي كان 28 حقنة حول السرة متواصلة دون إنقطاع وإن إنقطعت لأى سبب تبدأ من الأول . أخذنا نراقبها ونقدم لها الوجبات في مواعيدها شاملة اللبن ( الكان معدوم) .
    المحروس مقروص كما يقول أهلنا .
    كان فرح أخي الأصغر بعجلته الجديدة لا يوصف ، يسوقها داخل البيت وخارجه بنفس السرعة مستعرضاً مهاراته العالية . في أحد حركاته البهلوانية صدم القطة العزيزة وكسر رجلها . هرعنا بها للطبيب البيطري غير آبهين بما حصل له هو من الوقعة. ضمد كسر رجلها . إنتشر الخبر بين الأهل ، وفي ذلك المجتمع الريفي الطيب حيث الجميع يحسب الأيام العشرة تضامناً معي كثرت زيارت الخالات والعمات صباحاً مستفسرين

    " أها يا بت التلب ( إسم والدتي ) الكديسة أصبحت كيف ؟؟؟؟ "

    متناسين خربشتي ورضوخ شقيقي .
                  

04-15-2007, 08:48 PM

سلمى الشيخ سلامة
<aسلمى الشيخ سلامة
تاريخ التسجيل: 12-14-2003
مجموع المشاركات: 10754

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: اتمنيت لو كنت كديسة .... فى البلد الهايف اهلها!!! (Re: سلمى الشيخ سلامة)

    اضحكتنى كثيرا ، تعرف يا عاطف المصريين عندهم اعتقاد راسخ اننا لا يمكن ان نكون من اصحاب النكتة بل يروننا شعب متجهم، طرافة ما حكيت هى التى ساقتنى الى هذه الحكاية ، كنت ذات يوم صحبة الراحل الجميل عم زهدى العدوى فنان الكاريكاتير المصرى المعروف وهو شيوعى قديم ، كان معنا ايضا الراحل عم الشيخ امام ، متجهين فى زيارة توثيقية لعم عبد السلام الشريف اول مصمم صحفى لصحف مصرية عديدة منها الاهالى ، على اى حال كنا وعم زهدى نتبادل النكات وعم الشيخ امام يقرقر بالضحك ويتناوب معنا فى ذلك الجو الضاحك، كنا فى سيارة قريب عم زهدى وهو شخص (صعيدى ) متجهم، سالنى (حضررتك مصرية ) ،لكن عم زهدى تولى الحكاية (انت ما تعرفش خفة دم السودانيين ، طيب اقولك، فى المعتقل كان معايا عبد الخالق محجوب ودا اكتر سودانى دمه خفيف اناما شفتش حد فى خفة دمو،انت فاكر انكو بس البتعرفو تقولو نكت ؟ لا ياعم السودانيين ديل اخطر مننا، لانه النكته عندهم فيها فلسفة، مش اى كلام)وضحكنا بعد ذلك فى قصص عن الشهيدعبد الخالق اثناء اعتقاله فى مصر فى اربعينات القرن الماضى
                  

04-16-2007, 06:00 AM

abubakr
<aabubakr
تاريخ التسجيل: 04-22-2002
مجموع المشاركات: 16044

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: اتمنيت لو كنت كديسة .... فى البلد الهايف اهلها!!! (Re: سلمى الشيخ سلامة)

    سلمي
    اها دي الكديسة الكانت مخوفاكي.. فتشت عليها لامن قبضتها وقفلتها في بكان تاني ما تطلع منو ولا تفكر تهوب ناحيتك
                  


[رد على الموضوع] صفحة 1 „‰ 1:   <<  1  >>




احدث عناوين سودانيز اون لاين الان
اراء حرة و مقالات
Latest Posts in English Forum
Articles and Views
اخر المواضيع فى المنبر العام
News and Press Releases
اخبار و بيانات



فيس بوك تويتر انستقرام يوتيوب بنتيريست
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
About Us
Contact Us
About Sudanese Online
 اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين 		News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums
If you're looking to submit News,Video,a Press Release or or Article please feel free to send it to [email protected]

© 2014 SudaneseOnline.com

Software Version 1.3.0 © 2N-com.de