|
|
|
 Re: مصابيح السما التامنة وطشيش (Re: Elsadiq)
|
الاخ الصادق شكرًا لك على التشجيع
----------------
قدر يا عين وطنا الزين لا تنضر لا ننعاق
نظل في حبلك الواحد حبيبن ما في بينا فراق
وهيط شايلنا شيلة السيبي سعن الباشي والمعلاق عشيو ة (انتاج ) اواخر الليل كهاربو ضي النجم بواق
يسد لبق الاسى الشايل بلد فاتحلو غلبو بلاغ
جروحو جروح ويا النبي نوح شّقيان و الدهر لداغ
متينك ( يا غربة) الجن نسكت صنك ا لنقناق
بلد جيت المطور للطين نجيها وتصدق الاشواق
لا زنزانة تتراجانا حي الشعب يا اشلاق
وبي احضانا تنلقانا جنّ الجدول الرقراق
نطرد همبريب الحِن على لفح النوى الحراّق
وفي وش الطراوة دحين منو اليطبل سماك بـ اطواق
ياوطن النفوس البِكرة ياوادي الحشا البرّاق
إذا ما الريح جرح لـ الليح و صيفًا حتحت الاوراق
حطبنا نصيح اتبني الساق امان يا غيم مش دفاق
يا وطنًا قريب للحي وسّرك للبعيد لحّاق
حلّو حلاوة ما بتنضاق ومُّرًا كلو كلو انضاق
من كُناك ما خُناكَّ ولا فينا الضلالي العاق
ويا حاسب سكاتنا رضاك آمانة بطونا ماها غُراق
صدورنا على البِعادي زقاق ضهورنا الى المنادي رقاق
رضينا بلا قرن ننساق وحين نحرن جبل يا ساق
اجرّب يطير ما بيمشي لو حرّت علي الاشواق ومن قولد لهيب الشمشي ما كوش من الرقراق
وطن لو رزَّ يكِسر الرزّة
وانت المالي عيونا معزة
وين متراوح سايب عازة
ودابا اشتغلت فيها الغنية
دابو ضمير الدنيا اهتزَّ وبدا في القدح الكوني يتبّن
شوقا يضوق للعالم لزة
وين متراوح وين يا طالي باب النيل بحنين الوِّزة
عمرك كلو تغني عليها وتنراجاها تعالي تعالي
اول هي ما برت عينيها
نهمة غيمة مشيت طوالي
كورنالك .. كورنالك .. يا الله سبعة ايام في سبعة ليالي
رجع الصوت الطالع آهـ ثرثار جدول رادّو العالي
كنا غلابة
وليل وربابة
متلمين فوق قوز ونغني
قنا الصحر تشهّي الغابة حلم قُريّب ما هو تمني
تنسف فجأة القوز دبابة .. تنسف فجأة الشوق دبّابة
وفينا غنانا يصنف الصنّي
كنا غلابة وليل وربابة ..
انلقطَّ سحابة سحابة .. اتنقطت سحابة سحابة
وبدا ينلقط طير الجنّي
نفس الريح الحرق الغابة قطّم فرحك ليلة الحنيّ
رغم بهاظة وعظمة فقدك
الا انو الحياة ما وقفت
الا انو في ناس بيغنّو
عشان تخضر الارض النشفت
ناس من بعدك
بعضها .. بعضك ارضها ارضك
وناس لا عرفت بيك ولا سمعت بيك وتكنو
غناك الليهن ماشي عليهم .... تتلافاهو الريح وتفنّو
ورا الاحلام الجفّت ورهقت ..رهِقت وخفّت خفّت وطارت
طارت ورفّت روحك فوق الغنية اتلفّت بي بشكير الصبر اندفّت
وانشتت كوامي كوامي قلنا الله بيخون الخاين
لملمناك والعين بتعاين مدَّ النيل الوافي ضراعو
سويناك باجور وجناين شيدنابك دور ومداين
حندكنابك حز الريح حركنابك شوقنا الكامن
او قلنابك ظل مطاّمن انو ح يشرق فجر العالم
بي بني آدم طيب وآمن ونفضل نطلق نار الغنية تال الزمم الخاتي نظامن
تنسف ونجرف دبش الدنيا ووغش الفجرالكاذب لامن تبرق ويمرق شهب الباكر وتضوي يسماك يا يوما التامن
لما وطاك ما خبر البوت برفع قدرك للملكوت
ما في القدِرك حتى الموت حيّر قدرك هادي الصوت
حير صوتك هادي الروح حير روحك عشق الناس الوين ما تروحك تابا تفوت
من يتأمل فيك يتجمّل
من يتجمّل بيك يتكمّل
انو الحق مبسوط مبسوط
يا الخليت الزمن الاطرق زمن الموت مضبوط مضبوط
يازول يا حبيب ياالاروع ما في الدنيا الغيب اتجمع بيك اتوزع فيك
ومرقّت في رقّة .. شوارع أزقة ونفاجات ابواب السر
بتودي تجيب وتنّدي الارض تلاقي قلوب الناس بي بعض
بلا ترتيب انتاوق فينا لا تثريب من خوفنا عليك
تلاقي الحب في عيون كُّداح للشغلة تخب تنباخت بيك
مع كل صباح يا زول يا كيك لو راح الحب لو ضاع في القاع الدنيا دي راح تنقرقر جُب
وقدام عينيك مرّت قافلة وكانت غافلة
يا يوسف في الدنيا القافلة منو اليترجّل ينزل ليك
او يترجّل ينشل ليك
يا يوسف في الدنيا القافلة منو ال إترجل ينزل ليك او
يتروجل ينشل بيك النجمة الحب
عوّد عينيك في الضلمة تشوف
حفّر بـايديك عتبات للجب
سمّو انسف جوف صنات الخوف الشوف الرعب
يا ازّن فيك درابة الصبر انا قلبي عليك جاييك جاييك في سراع ف سراع
قلعّت شميك الشوق ملتاع انتل وافتل فضّل فد باع والحبل يتم ..
كمل الاشميق ما تحتي نكب تنقت تنقت فوق ارض حجر لفيت لفيت دُخّ بي سيسيق
يا جاو سجر يا نخل طوال وانا رجلي عطير انا نفسي قصير
من شرب القمشة الشيشة البنقو وضغ القات سف التمباك لفّ ال حب شاي ف ورق قصدير
شم البنزين الجن الطين برد الاحراش حر الزنازين من يسقط وعاش اضرب بي ايدي قربّت اطير
في الوضع الكير تبنّت عضاي حين شفت الريح ينتف في دلق من لقدة الجير ما احترت كتير الرب فزّاع يا الفطن القاع شرطتَّ هدومي وتم الباع برطاع برطاع
امسك يا يوسف هاك امسكيوسف سامعني وما بيمسك
طمني عليك لو ماك مارق امرق حسّك .. يوسف قول خير
اربط نصك وامسك في الحبل وما تنفك
يا انقطع الحب ويا انشقلب بالفيها معاك
لاحظ يا يوسف اني ضعيف والحبل اضعف من حيل موقف سريق الفقر العربية قدام اللقمة الغربية
خليكا حريف بالذات احرف من عِرق الغضبة الشعبية الهبّة النار المطرية
كل ايد في ادار شمشم واتحسس باقدامك كل الاجحار ما عدم الجب قبل اعدامك من عكن احجار
الحفر الجب زول قدامك مو قبيلة فار ولابد اكيد ساعة تمّا لابد طلع من دربٍ ما
تبّن بيديك كوس الجحّار لابد لابد
يوسف سامعنيييييي وما بيرد
يا سيد حر الشمش شديد
وانا بين حجرين واقف ويحيد نازف حفيان
رادف غلبين وراجف عريان سايف عطشان
وابار الارض العربية ابارا جميعن قد قطّن
والنهر جريح وبعيد جدًا دا درب مقطوع حدًا حّدًا بي فوقو قوافل ما عدّن
من صلب يسوع اللي اتعربن حردن وصدّن من عهد محمد ما جابن جيهاتو الاربعة ما ودّن
من عهد صلاح الدين وجمال كل الينابيع طين إنقطّن والغيم الزنجي دقس لندن
والمطر العربي مشا امريكا وف امريكا ا تجنّس واستطوطن
القال اتمدن جا مديّن والكان انديّن جا مطيّن
اطلع عينيكا توريكا وين وصل الحال الانقطّع
مع انك يكفيك الفيكا
امريكا وانصاص امريكا مارشات الناس ومزازيكا
البوسنة الهرسك وصربيكا دا كلام ملحوق
اطلع
اطلع الله يرضاكا ويرضيكا
يا يوسف اخوي اطلع نطلع .. اطلع نطلع
يا يوسف هوووووي ما عاد تسمع
يا يوسف الله يرضاكا ويرضيكا اطلع نطلع
يا يوسف هووووووووووي
ما عاد يسمع
انا حافي وساحت كرعيا فوق زفت الارض العربية
عسمت كلماتي مع الرقبة وداختيا ساكت عينيا
شاخت ايامي الشمشية وباخت احلامي القمرية
اطلع ياخي اطلع ياخي اطلع
لا انعلّق يوسف في حبلي
لا انفك الصبر من ايديا
يا يوسف يوسف يا يوسف يا سوف يوسف يا يوسف
يؤسفني
ما ردّ عليا
من نخلة على اختها متكية كومة لي وسيما العصرية قيلت انصت وانكربش
كدرومي الحالة بعينيا انكرفس في ضل النخلة وانكفت اللحظة المبكية قمرية تراحم قمرية
وتحكيلا بحرقة وراثية قمرية من القمري الشاهد على خطو الميتة الدغرية تحكيلا وعينيها تناهد
عن كيف انشرمت اغنية وانترمت احرف من كلمة انسحقت روحا المقريا حين سابا مغنيها براها
في سفرة بعيده وابدية كيف شمط الوتر الموال وانفلت النم من صقرية وانشابط في لميمة الاهة بي طم الفجعة الكونية المرق الساند والشال طقطقبو الدمع الهطال انشقق حايط كان ساتر واترقرق سب الامال الكان بيبشر بالفال والبسمة عيون الاطفال الكان بيوزع في العتمة للضو على كل الحلاّل الكان بيفرّق في الزحمة عن كيف تتلم العمال في الكتمة يرطب بي كلمة عرق المسحوق الشغال طوالي يصّبر في العالم مش صبر الفاقة الهقال الصبر المنّو البني ادم يعدل للزالف في الحال ظل صابر قالت امنية دفنتلها كمّين تربال كم بت شيالة على نيّة الريح جازالا كما النال قالت والخاطر جوال استغفر يا وتر الباكر والدنيا قديمة يا موال قمرية تقاطع الامنية خليهم يرتاحو شوية ما الفجع الواقع غلاب والدمع بريّح يا خيّا انفتق المرتق بي صفحة الزفرة الجات دافرة قوية ضلعاً ممنوعة من الفرحة من حقها تبكي بحرية البينا وبينو من الالفة ما بين الارض وطورية احساس رواسّي لقى الضفة عارف في الجنة وحورية ما حيلة العمر ان ما كفّى نفسًا مطامنة ومرضية ترجع لي ربها والمنفى ولي شعبها ما بينسى قضية
--------------
| |
 
|
|
|
|
|
|
|
|
Re: مصابيح السما التامنة وطشيش (Re: bunbun)
|
الغصة تشرق القمرية وتنعشرق في حلوق الخلّة
وين غايب سايب ليلاتك يا شهر احلاما بلا هلّة
ولسع في مطاليق من غادي بيجارطو بنيات الحلة
في ربابيط تقطع في الوادي للبطلع لاهلو ويندلى
عطكازك مرمي وسيف صادي وخيلك من غلبها لا حولا
لسع في فوارق في طوابق تنعلا ولازم تنعلى
ماطال الرزق الجي مارق للناس تنصلبتو باسم الله
وين غايب سايب للعالم يا تامن ايامو بلا طلة
لسع في جزاير مخجوجة في خلايق لايجة على ملة
............ الرؤية المختلة يا معاين في الغبن الباين
يطعن في خيّو وما يضلا معنى القومية العربية
مادِلا الضلَّ وما دلّى ما ضلّ الدلّ وما لىّ
ماضلّّ الضلّ وما دلى معنى القومية العربيّ
واحد : ان تقلب للسلطة بالدعم الاجنبي وبالخطة
اتنين : تنسلط في شعبك بالشرطة المغسلة والبلطة
بالحمم الشعبية
تلاتة : تمرق من ورطة عشان تدخل
بالامة وبلدك في ورطة وبي دينا تدينا وما بتفرق
اربعة : ان تحرق بي نارك قطية الجا.........
خمسة : وتنسلبط في طينو لي مويتو وسماهو المهرية
تحت الشرعية الثورية
ستة : وكان اسمّح لو تفتّح نفاج ما بينك وما بينو
عونّك وعوانّو يشبّو ، عاصرين على بعض ويتربّو
من شطرٍ عربيٍ واحد راضعين : في الاول ينحبّو
وفي الاخر راح يرمو الحيطة وعلى بعض قلوبهم ينكبّو
على صدر الارض العربية ، بالنور الاخضر ينعبوا
جنيات السلم مباديها ، الموية اللبيها تعديها
لا شرطة لا نقطة تلاقيها ... كل اجراءاتها الرسمية
ان تشرح ويفصح ما فيها من عشق محبة .. وحنية لي كل الارض العربية
بالشوق بتلوّح اياديها .. على نخلة قديمة على الشاطئ
في طيبة تسكر اساميها والحيطة التقفل ترميها
بي ريح الوجد القومية
عقبال الحيطة البعديها
والحيطة البعد البعديها
لاخر الحيط الوهمية
وعقبان الحيطة الشعبية
على خدر حبيبتي العربية بتًا حبوبة ودغرية
لارحطا يقطعو همباتي لا رحمًا فضوّ حرامية
سبعة : وما بتنسى المتلبد ، اليانكي
المشكي على الله ومتسبب وكايس لي علة
يدخلبها في الربع الخالي لا حاشا تحوشو ولا كلا
ولسع في فلسطين محتلة وفي فلسطينات دار تُحتلا
وين غايب
سايب للعالم يا شايل همو بلا كلا
ولسع في افريقيا المحنانة نشفانة سهولا المبتّلا
آسيا الكحيانة وصبيانا تنفرج على رمي الجلة
لسع في اوروبا الغنيانة فقرانة روح دار تنسلا
لسع في بعايض في العالم بي دم الادم تنسلا
ولسع في هوايل في بلدي بي اسمي واسمك واسم الله
كيفنك يا وطني المافي
عواافّي يا ارضي المحتلة
ولسع
يا المن خيتك بنسع سنارت الصبر في جبادة عشم الايام اللي هسع
ل( نتقك) كورة ولا داير من بحر الحاصل افوت اقنع
لسع دم فاير في وطني ولسع هم ثاير فيّ يلسع
لسع حكاية عز زاد عن خيل رهاب منشرفة
مرق المغني يجيب مطر لي نخلة روحا مشحتفة
هبش السحابة ابت تصب
صبت عليهو العاصفة
فنّت من ايديهو الوتر
والغنوة خرّت نازفة
في حلقو ينعارض حجر سادي الغناوي العازفا
وهج النجيمة الشايفة بي ليلو يتطاير شرر
فوق راس نخلتو الناشفة
النار عديل النار قبل
حرق العطش ما كان كفى
قدر المغني على دموعو يوقفا
دقس الحجر والعاصفة حين لم في عضم المطر
بعد الصُراعات والحفا
النخلة كانت في القفد جمراية ترفس واقفة
خالفالا شتلة عمر شهر
محنة مغني وعاطفة
غلبت عليهو العاطفة ضرّع على الشتلة ام سهر
وفي لجة النار اختفى .. داخل على حوش المطر
والشتلة بينو ملفلفة الباقي من ساق نخلتو فوق كتفو بي جمرو انكفى
يا امة فرسانك تموت مغدورة دايما من قفا
يا امة ترقابة وفا خانة ومشاعر مرهفة
يا مدن شوارعا كالصعيد
بي اغنياتو عن النضال ضد الظروف المجحفة
بعضا على بعض الدروب قاشرابو موضة وقندفا
لو تستعيد نفس امنياتو على الطريق
ما في العوارضو توقفا
يا كمبوهات بت الحلال بالطيبة والرحمة المحاننة مترفة
يا الفارشين الارصفة
يا الحلمهم حلم الطيور
عيشةً شريفة وارغفة
في بلد حنيني موالفة يا المن اصابعين الوطن
حتى القيامة ولا الزمن
(لا قبة حامي بتنتفا)
يا كلكن في العاصفة
دون عاطفة
من كان بيسمع مصطفى صنّ ووهج صوتو انطفى
من كان بيسمع مصطفى حي بي قضيتو وبس كفا
يا كلكن في العاصفة دون عاطفة
من كان بيسمع مصطفى صنّ ووهج صوتو انطفى
من كان بيسمع مصطفى حي بي قضيتو وبس كفا
يا كلكن في العاصفة دون عاطفة
من كان بيسمع مصطفى صنّ ووهج صوتو انطفى
من كان بيسمع مصطفى حي بي قضيتو وبس كفا
| |
|
|
|
|
|
|
| |
bunbun
Elsadiq
yasiko
فيس بوك
تويتر
انستقرام
يوتيوب
بنتيريست