|
|
 بهنس ..تماضر شيخ الدين و الشباب(دوبيت و أشياء أخرى مفيدة!)
|
حكاية من الزمن الجميل
زمان! و كم نحن مصابون بحب زمان عموما. فالسودان (بما في ذلك النفوس) وطن يسوء بمرور الوقت لهذا يحكي كل جيل للذي يليه عن زمان ..
المهم كان في البورد شاعر و موسيقي و تشكيلي إسمه محمد حسين بهنس
و كانت في البورد فنانة و بس إسمها تماضر شيخ الدين
و كان هناك بدري الياس
و شباب زي الورد
أها يوم قام بهنس علينا و خلانا نتجادع و الحكاية بدأت كالآتي
بهنس:
هديت مسداري لي بلدا منغنغ وجارف
وأكرم نادره خاصة مواسم السوق القضارف
محل قعدو الفحول واتباصروه العارف
هم بحر العباب وايش النقيص لي غارف
دهب كلمة الصريف
ليلا مرصع بالحنين يلمع دمع
وجه البنات والريح تتندل في الشمع
الطوف مطلوح موج بيفرد وينجمع
ليلا يصن فيو بلعة الريق تنسمع
ليل في خريف
تنقرش عصبي في النجمات تلوح ده صوابي
ملتهب الوجود تنفخ رماد أعصابي
غبيت في الرحيح دون ضيف فتحت ابوابي
دخلت فيها غيمةورحمنت أسبابي
مابعدم خريف
نواصل......
|
|
 
|
|
|
|
|
|
|
|
Re: بهنس ..تماضر شيخ الدين و الشباب(دوبيت و أشياء أخرى مفيدة!) (Re: fadlabi)
|
سمعت هذا يا طلال
و أصابتني أحاسيس مختلفة
الفترة الأخيرة التي قضاها بهنس في فرنسا كانت صعبة عليه
قبل شهور نويت أن أزوره و نتونس كما كنا نفعل زمان ولكن التصاريف حالت فانتهت رحلتي لفرنسا في شمالها و عدت مشتاق أكثر وبروحي خيبة
إن لاقيته أبلغه عني أني لا زلت أقرأ شعره لنفسي في خلوات متفرقة و أنني أشتاق لليلة أقرأ فيها الشعر معه و نجلاء, و أعود للبيت كأن روحي أخرجت عنها أثقالها.
_______________________________
رجال القمر(رسم بالضوء) بهنس 2005
| |
|
|
|
|
|
|
|
|
|
Re: بهنس ..تماضر شيخ الدين و الشباب(دوبيت و أشياء أخرى مفيدة!) (Re: fadlabi)
|
حسين و ثروت
ثم قال بهنس :
حافي عليها مشيت والحسكنيت سجاده
غيلان الالم جو وأكلتهم لباده
حفيان بت حضنتهاواتخلقت سعاده
حفنه من النعاس والغفوه بالجباده
شفت عيون خريف
..شفت عيون خريف
عوات الرياح عوات الرياح فوق للخرابه الفانيه
مزاجي سقط لقط فوق رجلو خالف التانيه
واتزكرت يا فاضلابي جية ألمانيا
روحي اتشلهتت لا ويكه لا شمبانيا
نواصل...
| |
|
|
|
|
|
|
|
|
|
Re: بهنس ..تماضر شيخ الدين و الشباب(دوبيت و أشياء أخرى مفيدة!) (Re: fadlabi)
|
أها بهنس قام علي يا زول قال لي إنت إنتهيت و بقيت خواجة ساكت
قمت قلت ليهو:
يا بهنس نسيت ولا الزمن جاب وزرو
قايل أوسلو ما فيها البيهبر شعرو
البنوت هبطرش و القلم بي حبرو
وعارف من زمان أسد الرضيمة بنترو
أجهز يا ظريف
عايش في البلاد وحداني
هذي العتمة رامية عليا شي يوطاني
ما شكاي وشكوى رفاقي يوت في أضاني
شايل الشايلو دونما أختارو ماردات الهموم حاباني
وما سكت النزيف
يا بهنس حقيقة الشوق بقالي مكيدة
الشارع طويل والضو نقاطو بعيدة
والخرطوم حليلا الأطعمتني بأيدا
والبكتني والربتني والأدتني سر الريدة
و الحزن الخفيف
في الليل حين يكون الليل كتابة وخمرة
بقدل في الجراح اللا بتطيب لا بتبرة
و أعصر روحي من هم البلود البرة
أكتب باليمين وشمالي قابض الجمرة
والشوق ما بيقيف
الخرطوم تجيني وتملا كل أفكاري
أقدل فيها بالركشات وبالأمجاد وساي كداري
وبالحافلة التزهج أشاكل الكمساري
والجامعة وبناتا مظاهراتا دياري
و شاهيها الرهيف
يا بهنس فتحت الباب و قايلو إنسدا
المرض القبيل الليلة تاني أشتدا
يا ليل ما بتتوب بالنار عملت مخدة
وقلبي القايلو أسلم تاني هسي أرتده
تاني رجع رهيف
| |
|
|
|
|
|
|
|
|
|
Re: بهنس ..تماضر شيخ الدين و الشباب(دوبيت و أشياء أخرى مفيدة!) (Re: fadlabi)
|
بهنس:
أها آالفاضلابي جيتك انت وين يا لورد
داقشك بي قوافي بكاسي هوستن فورد
الليله الشعر هزاز سيوف البورد
تشوت ربعيه أرسلها ليك بالباكورد
تسلمي يا تماضر يابلد ياوارفه
والفاضلابي الا الليله شوف ليك صارفه
ود ودالياس/خضر/والحمزه تسلمو كافه
علي الفاضلابي شاني الخوه قطعا جافا
أهه...تلاقط نار دغش لا بي صفيح لا ماشه
الفن فيك قرضم بس معاها بشاشه
أصلك ود غشيم من قمت روحك طاشه
أنفك فوق وناس الحله كلهم شايفم شماشه
ود ساقرتا باره وسودري وقيسان
وشندي انقسنا طوكر مروي وأمدرمان
شوك سنار وييي القربه مارنجان
هيا ورفاعه كاس قنب كتم امضوبان
ومن كوستي الرديف
مدت لي لوح ظنيتو من هجليج
ونترت فيو بزور طقطيقاوحدو هجيج
أخد لفه وتعال قالت بنبره بهيج
أخدت اللفه للآن..حسره شوق ولهيج
يسليني الخريف
| |
|
|
|
|
|
|
| |
fadlabi
طلال عفيفي
Hussein Mallasi
ثروت همت
Tumadir
مريم الطيب
Dia eldin khalil
فيس بوك
تويتر
انستقرام
يوتيوب
بنتيريست