|
دعواتكم لزميلنا المفكر د.الباقر العفيف بالشفاء العاجل
|
|
 Re: مجدى النور ........الولد النيل (Re: سلمى الشيخ سلامة)
|
Quote: انا كم غنيت وكم لبدت دموع الجوف
وكم اتمنى اشوفك تانى عاطف على لب المسرح
والمسرح بيك اكان معطوف
|
الاستاذة / سلمى بت الشيخ سلامة
نبيل الحزن يطل من كلماتك..فينسل الى دواخلنا ..هكذا دوما انت..احساس صادق ورحّال لا ينسى
ديارا الا ويلقي عليها السلام..(مالك علينا يا زولة)..لم ننسي الانسان الفنان مجدي النور..
ولكننا نتناسي احزاننا في غمرة التحديق في الافق البعيد عله يأتي بما يشفي الجراح..ويبقي
الحزن قدرنا الابدي وهذه الفانية ما فتأت تكْلُمنا برحيل عزيز علينا..لله درك يا سلمى ورحم الله فقيد
الشباب مجدي النور..
امين
| |
 
|
|
|
|
|
|
|
|
Re: مجدى النور ........الولد النيل (Re: mohmed khalail)
|
..(مالك علينا يا زولة)..
مليت مليت مليت
مليت من جرحى الرفض يبرى
كل ما اقول كملت العبرات
تنط وتجيك من عبرة
ومجدى
ما كنت حارية انى يوم انعيه يا محمد خليل
شفت الحياة ماشة بكرعين ؟دا كان مجدى
شفت النيل بيقطع الشارع ويدخل النفاج على الجيران ؟
دا كان مجدى
يوم فى شهر ديسمبر
اخر الايام من الشهر
الصباح بدرى رن التلفون
ما من العادة الا تكون عزة و(فارق التوقيت )
ـ الو
ـ سلمى مجدى مشى
ـ منو معاى ؟
ـ جلال بلال
ـ مجدى النور ؟
ـ مات ياسلمى
ـ مالو ؟ حادث
كانت تلك اللحظة هى التى عرفت فيها رحيله
ـ عرفتها(الكريهة )جات لموتو
السكة اتقفلت التلفون لا انشال لا انخت
معلق كان
وكنت معلقة بين النيل والموج
يا مجدى النور احى عليك يا ود يا نيل
لك كل الرحمة
| |
|
|
|
|
|
|
|
|
|
Re: مجدى النور ........الولد النيل (Re: سلمى الشيخ سلامة)
|
العزيزة سلمى
تحياتى
هذين اليومين بصدد الترتيب لاحياء ذكراه..
ولك مودتى وتقديرى
وثيـقـة ياســــر عــــرمـــــان !!!!
في عرصات بيروت الجميلة ولياليها العتاق يسرح مد البصر صديقي الجنوبي الودود"أتيم" ويكتب ويقرأ وألاماني الحلوة.. أمضيت حيث يقيم في علو شاهق هناك أياما بديعة في حوارات متصلة وأحاديثنا تقترب معه بالأوطان إلي ضمد الجراح وبشريات السلام واحتمالات الوحدة وثمن الحرب الضروس.. هو ينظر ابعد قليلا ويثقب المستقبل.. وقناة الجزيرة تقدم تقريرا حول زيارة وفد الحركة الشعبية الي الخرطوم بعد غياب تطاول لعقدين ويزيد خصوصا السيد ياسر عرمان..وقتها فتحت بابا للحوار في سودانيز اون لاين حول أمنيات المثقفين والفنانين وآمالهم العراض بمقدم السيد عرمان وهو الأقرب اليهم لاعتبارات عديدة أدناها صداقات ممتدة تربطه بمعظمهم واعتباره بالفن وطاقته وقدرته علي حمل ثقافة السلام ونبذ الفرقة والاحتراب...
ثم..تمضي الأيام و"أتيم" يعبر بيروت إلي صقع ناء وبلاد تموت من البرد حيتانها وحواري معه لا ينقطع..الحركة الشعبية تعود شريكا أصيلا في الحكم..لها ما للمؤتمر الوطني..وعليها ما عليه سواء بسواء أو هكذا قريبا من مقتضي الاتفاقات... الفنانون وفقا لهذا وآمالهم والأحلام.. يؤملون في انصلاح حالهم وإعطاءهم مساحات اكبر للإسهام بتسريع خطي السلام وأعينهم تصوب نحو أفق بعيد ونحو وعود السيد عرمان وقدرته في تحسين الصورة وحفز معدلات ناتجهم الإبداعي...
الأسبوع الماضي قام بعض الفنانين والمسرحيين بتتويج جهد أسابيع مضنية واجتماعات متصلة ولقاءات عديدة بإقامة ليلة تأبين الراحل مجدي النور والتي كانت عملا ملحميا مهيبا لفت الأنظار والمسرح القومي يضيق بجمهور عريض...بعض الأصدقاء والحاديين علي مسيرة الفن ومكانة الفنان اقترحوا مشروعا لوثيقة الفنان السودانى من وحي الرحيل الكبير وجهد حفل التأبين...دعوة يتواضع عليها المسرحيين وتمهر بتوقيعاتهم والدفع بها إلي الجهات ذات الصلة وفتح حوارات موسعة بشأنها... الوثيقة عمل يضمن زحزحة الأوضاع حول الفنان الذي يهب المجتمع فنه وحياته...
السيد ياسر عرمان مشكورا ووفد من الحركة الشعبية كانوا حضوراً في الخامس عشر من يناير..يوم الفنان السوداني...جلس إلي مجموعة المسرحيين والتفاهم في حوارات مثمرة وحديث الوثيقة مشروع في عنقه..هو وحده..علي أن يستمر الحوار معه حول صيغة مثلي لتقديمها والاتحادات المنوط بها عمل كهذا تغيب طويلا ولا تحضر حتي في الملمات...
وثيقة الفنان السوداني خطاب مفتوح إلي الفنانين علي اختلاف أجناس ناتجهم الإبداعي..إلي الاتحادات ..المنظمات..المجاميع الفنية..الإذاعة والتلفزيون..والمسئولين في الدولة هي تنبيه يتلطف أن يجد الذين يرحلون عن دنيانا وقد أعطوا كل شئ..أن يجد المبدع بعد رحيله ما يحفظ بقيته في وجه العاديات وصروف الأيام..
السيد عرمان يقرأ ما نكتب وننتظره..نرجوه لهذا ولغيره.. وهو يعرف ان الوفود في زيارات السلام تصطحب الفرق الموسيقية والكوميدية والفنانين .. مجدي النور كان احدهم .. ومشروعاته التي لم يستكمل مبسوطة علي الورق...الآن!!!
ـــــــــــــــــــــــــــــــــــــــــــــــــــــــــــــــــــــــــ
شروق
مجلة(أوراق) عدد مارس
[email protected]
| |
|
|
|
|
|
|
|
|
|
Re: مجدى النور ........الولد النيل (Re: محمد عكاشة)
|
في مساء حزين غيب الموت الفجوع (زولا) جميل من أقصي المدينة والموت غاية كل حي.... مضي في موكبه المهيب خلق كثير ...بعضهم يعرف بعضا وآخرين من دونهم هم شخوص أعماله وعوالمه الرحبة الفسيحة .... أربعون عاما هي رحلة طويلة محسوبة بدقات الزمن المبدع وبحبيبات العرق... وصحيفته تنجز من الأعمال أربعين.....
الموت والرحيل فكرة مركزية في اواخر أيامه وخواتيم ما كتب من أشعار ... حدثني عن الموت حديثا مؤثرا قبل رحيله بأيام وظننت وبعض الظن إثم إنها احدي دعاباته وقفشاته الذكية ...كان فتي يلمعيا...حاضر الذهن .. متوقد الذكاء...
في صيوان العزاء الذي ضم جحفلا من الأصدقاء والمحزونين تسمع حديثا غريبا... فقيرات من قاع المدينة يبكين بكاءا مرا ... ويخبرن عن انه التقاهم قبل أيام يترصد الأحوال ويتفقدهن..الفنان/محمد عبد الرحيم قرني يجهش بالبكاء وقد زاره الفقيد قبل يوم عند منتصف الليل علي غير عادته ويستغرب جوابه.."اشتقت ليك..قلت أشوفك.." وما دري صديقنا الأستاذ قرني انه آخر وداع.. والأيام تمضي..
صديقي مجدي النور غادرنا إلي رحمه مولاه ...يحشره في زمرة المساكين وسيد الخلق يدعو تضرعا.."اللهم أحيني مسكينا وامتني مسكينا واحشرني في زمرة المساكين.." والمخرج مجدي النور كانت أعماله وحياته لأجل المساكين..المغمورين..المطمورين بالأنوار والتجليات القدسية يمنحهم من دفقه أبعاداً جديدة.. عميقة.. ويبعثهم خلقا نابضا بالحياة طماحا بالمعاني ويطوي علي الليالي جرحه وأحزانه وتحنانه...
ثم....آه..ثم..آه..
"رد الجميل" ...يالله...ويا للعبارة..هي عنوان يحتشد تحت دلالاته شرذمة من المريدين والأحباب.. منظمات وجمعيات وفرق مسرحية وكوميدية وغنائية وافراد والكاركاتيرست نزيه حسن عثمان..رد الجميل اعلان للناس لحضور احتفائية عل نحو خاص في مقام"المجد"و"النور" لاحياء ذكراه..المسرح القومى بام درمان فى أبهى صوره يتخذ زينته والفنان طارق الامين ظل لاسابيع فى انشغال ولجنة موقرة عاكفة بمكتبه وكرم ضيافته لتنسيق الحفل والجهود ليكون الخامس عشر من الشهر الجارى يوما محضورا..مشهورا..
احتفائية مجدى النور ستكون عملا متميزا يشحذ من قيمته اعمال الراحل الكبيرة وابداعاته وحضوره الوهاج..
يوم نتطلع من خلاله إلى بذل المزيد من الجهود للفن..هو تحية ندية رغم الأحزان والأشجان إلى الرواد والفنانين وجمهور المسرح..
الخامس عشر من يناير الجاري بطاقة دعوة مفتوحة من الصباح وحتي المساء..معرض وحلقات ذكر وندوات وعروض مسرحية وأغنيات كتبها الراحل الكبير يترنم بها عبد المنعم النذير وعامر الجوهري ومعتز صباحي ...
آلا رحم الله مجدي النور وإلهمنا وآله وذويه الصبر وحزن العزاء واصبرنا علي فقده الجليل..الجميل..
مودتى وتقديرى
| |
|
|
|
|
|
|
|
|
|
Re: مجدى النور ........الولد النيل (Re: محمد عكاشة)
|
محمد عكاشة
انه الالم مهما كتبنا
انه الفقد يا صديقى
مجدى كان مزروعا وسط الحيشان
(ينطط) بالامل
ويجرى نيلا
رايت من تحدثت عنهن اولئك اليتيمات بعده
ومثلهن غدوت
عقب عودة عبد الباقى محمد(بقة )
انعقدت ورشة للفنانين المسرحيين
كان فراشتها التى تحط على كل لون فى تلك الحديقة
هو وقرنى وسيف الاسلام محمد وصوصل والرشيد احمد عيسى وماهر الحنون وحاتم العربى ،وديرك اويا الفريد
وغيرهم
انتجوا مسرحية
كنا نلتقى كل يوم منذ ان بدات الورشة
ننشد املا ومسرحا مفتوحة ابوابه للجميع
لكنه (تاكى الباب ) وخرج
خرج ماسوف علي شبابه الذى كان منذورا للحياة والمسرح
اعرف ان رحيله كان صدمة وما تزال عالقة تلك الصدمة رغم مرور عام على رحيله
لكنه بيننا وفينا
| |
|
|
|
|
|
|
|
|
|
Re: مجدى النور ........الولد النيل (Re: محمد سنى دفع الله)
|
السنى
شفت الحزن اتلاحق كيف؟
كل يوم تجيك حالة من الحزن تحسب انها الاخيرة
مرت سنه
الشهر الجاى يعبر مجدى حضورا جديدا
تعرف صحيت امبارح كنت مشتاقة لمجدى
ما عرفت اعمل شنو كتبت ليهو
كتبت وكنت ببكى
زى كانه جرح جديد
زى كانه ما مر يوم على رحيله
حسبت الايام لقيتا سنه الا كم يوم
زاد حزنى يا سنى
مرات كان برسل لى رسايل فى اوقات غريبة
الصباح بدرى
يقول لى
ـ مشيت اشوف الشروق فى النيل تعالى نشوفو سوا
كان بحب مشهد الغروب فى النيل
وعارف انى ما اتعرفت عليهو الا السنه الرحل فيها
بقينا زى بنعرف بعض لينا مليون سنه
اتصاحبنا صحوبية جميلة
لمن الوالدة اتوفت عليها الرحمة كان زيك بجينى كل يوم
من الصباح بدرى
نقعد نتونس نضحك
وانسى الحزن لحظة
اخ يا سنى
كان بنادينى حبيبتى
وحبيتو لانه جميل
ومشى يا سنى زى موج النيل
انسرب انسراب الضل
لكنه عايش زى النيل الكان حابيهو
اى قصيدة تلقى النيل قدامك فيها
والنيل تلقاهو جارى فى جواهو
قصيدة حب ما ليها مثيل
| |
|
|
|
|
|
|
|
|
|
Re: مجدى النور ........الولد النيل (Re: Muna Khugali)
|
مجدي ...
يا مسافر السلامه...
لما القمر يرحل يشق صدر الغمامه...
تصحي النجيمات من ضلامه
رافضه بالجد سر رحيلك
والسحابات كان بغنن
تشدو ليك سر احترامه
يا مسافر السلامه
كم كتبنا ليك....
يامارق من جوه ضلوعك
وتحت الجلد الحي الفوقك
وداخل الخلوة لوحك تك
يا شايل صوتي تغني
مارق روحك وين مني
العالم في جلدك
قرية وقوز
وغابه ابنوس
عليش...
| |
|
|
|
|
|
|
|
|
|
Re: مجدى النور ........الولد النيل (Re: Mohamed Abdelgaleel)
|
محمد الجليل
يوم رحل كنت كتبت بعض ما يقينى وهدة الحزن
هل حان الوداع بالفعل ؟ ام اننى عرفت الدار بعد توهم
كلهم كانوا هنا يا صديقى ،
جاء المغنيين الصعاليك ، جاء التربالة وستات الشاى
والعرق الذى سكبوه رقصا لحظة ان مشيت ،
هل مشيت يا صديقى ؟ ترى هل مشيت ؟
جئتك مع العصافير التى ناحت ساعة ان افتقدت صوتك وهو يناديها
جئتك فى خرير النيل الذى اقسمت له حبا انك لن تفارقه لكنك خنتنا ومشيت ،
خنته فانحنى ثم حياك ومضى ،
الى اين لا احد يعرف
فالنيل كنت فاتنه بسحرك هل قلت لك انك ساحر يا مجدى النور سلامة ؟
تعرف سر التسمية كما ازعم ،
قلت لى انك حين كنت فى السنة الاولى فى المعهد وكيف انك اغرمت بالاسم فاسميت نفسك مجدى النور سلامة
وهكذا درجت على تلك التسمية ،
لكم كنت سعيدة لحظة ان قلت لى انك فعلاتحب تلك التسمية ، ولكم احزننى ان لااجدك هنا ، هنا
| |
|
|
|
|
|
|
|
|
|
Re: مجدى النور ........الولد النيل (Re: حيدر حسن ميرغني)
|
حيدر
شكرا ليك على حضورك
مجدى النور كان علامة من علامات المسرح الحديث
فى السودان
ولك ان تشهد الناس تجئ الى مسرحه
وتخرج مغتبطة
ذات يوم كتبت عن مسرحيته(الحلة القامت هسع )
وجدته فرحا يشيل ويصور فى المقال
ويوزع فيهو لمن قلت الحاصل شنو ؟
لقيتو محتفظ بالمقال ويقرى فيهو للناس
فرحت يا حيدر انى كنت حاضرة العرض وكتبت عنه
كنت حاكون حزينة لمن اموت ولو ماحضرت العرض
للاسف فقدت المقال
لكنى كسبت حب مجدى النور سلامة
كما كان يحب ان ينادي نفسه
له كل الرحمة
| |
|
|
|
|
|
|
|
|
|
Re: مجدى النور ........الولد النيل (Re: Mohamed Ahmaed Olyesh)
|
يا عليش
يا زول يا جميل
قال مجدى النور
صورتك
فى موية عكرانه
نيتك
تضوى مبهوته
لسفن ما بتصلك
او تصلك
تروح
يا اول الشارع
فى بابك نواح الريح
يا حزن اطفالك
بكاك فى الزحمة
بلة ريق
لو يبقى مشوارك
مسواك
وزقاق يشيل ابريق
انساك
وفى عصبك نسوان
تقول للنيل بقيت غرقان؟
ويدسو وشاح
الموجة من اهلك
القاهو
بين الجراح
والصادين
عرقان
وصدرو حنين
جوايا يشربك
ومايصلك
تروح جوايا
دافى حزين
وحزين
سبتمبر 1991
| |
|
|
|
|
|
|
|
|
|
Re: مجدى النور ........الولد النيل (Re: Muna Khugali)
|
منى الانسانه
عاينى الزول دا قال شنو
اهبطى
آن ميقات النغم
ضى
يفتش فى العتمة
عصب العشم
يا قنعان
ومرتق النيل بالالم
حفيان مغبش
مندلى وين ؟
نازل شريان حبيبى
انشل الخوف بالنغم
وغنيت حنين
ما وقفنى هم
روح
تقالد الروح
نتمد بوح
نتلم لم
افتح ابواب بخورك يا حلم
دليه سورك
يتحسس الاعمى البصر
اهبطى
آن ميقات النغم
| |
|
|
|
|
|
|
|
|
|
Re: مجدى النور ........الولد النيل (Re: Inaam Saad)
|
سلام يا بت النيل
انعام
كل ما اجرحك
يندفقو جواى جرحين
كل ما اسالك
يطلعو من الضلمة عينين
ترقرق دموع الليل
يا بت دريب
الحب طويل
زى نجم
سحابه تودعو
يرتاح فى رموشا
تفوتو باكية
توجعو
يضارى من ليل
صدودا
يجيبا شوق
وتفتشو
يا بت دريب الشوق طويل
زى غرقان
احزانو شادّ
تغرقو
وشوق اليابسة
ساقووطفحو
لوعة النيل فى الغروب
موجة
داير تعكسو
الضى بفوت
الموج يفوت
ضفاف مناهاتقالدو وتحضرو
ماهمس الهمس
بوح
ماقادر اهمسو
الحب كده
شلال وعابر روح
مجنون
لو تسبحو
مجنون عشق البعشقو
يناير 1999
تعرفى الولد كان مجنون بحبها
يا ولد يا نيل طول معاك زمن الغياب
لكنك هنا فى القلب وهنا فى الزمن حاضر ابد
| |
|
|
|
|
|
|
|
|
|
Re: مجدى النور ........الولد النيل (Re: خضر حسين خليل)
|
خضر يا اخضر لون الزهو
يا مرسومة عليك احلامنا
كنت قد ودعت مجدى يوم فارقنا
قلت له
كانت تخب اليك خيولى وتشتهيك كما العافية
وكنت اذا ما عبرت الى فيحائك تدعونى كلماتك الدافئة
حبيبتى تدعونى واصغى
واناديك تجئ بلا موعد وانت الميعاد الذى لم يكن سوى الارتباك والقافية
غدوت بعيدا ايا قاتلى ونلت منك العبور ،
دعوت ان تهل عليك دوما امطار من العافية
وهل مضيت بعيدا حقيقة ام ماتزال فى المنحنى ترقب فيض الامانى اليجئ معبا فى المنى
وانت المنى طيرا تحلق فى سارية الضوء يلوح للاماكن هل ترى اراك فى الموعد الذى نصبناه خيمة ام انك تنسى ميقات الحبيبة ؟
كنت الحبيبة التى ارادت لقاؤك ولؤلؤ العينين يبرق وهج الحروف لدنها
ويخرج (ايقاع نوبة ) يخرج طفلا احب المشى على رمش الحقيقة اليك
وانت تطارد المعنى غناءا ونشيد
يا نشيدى ... تاهت الكلمات هل من مجيب ؟
وكنت تحب النشيد يجئ النشيد وانت لا تاتى يا قاتلى رد على سؤال الابد هل حقا مضيت ؟
وانت النشيد وراءك يشدو تعال ؟
وانت غارق فى المدى
نحج اليك مع النشيد يا قبلة نشتهى الصلاة عليها ونركع خاشعين لحظة ان نتلو حضورك ذاك الحبيب ، حبيبنا اليوم كان عيد لنا لكن هلال العيد اختفى ، تغالطنا ثم مشى كل الى حيث المنتهى سدرة اشترعتها فتعال نكمل احلى نشيد ، نشيد الحضور فى حضورك ونشيد الحضور فى ريحك الطيب ايها النشيد الذى ما اكتمل
ما تزال الان طازجة امانيك.
| |
|
|
|
|
|
|
|
|
|
Re: مجدى النور ........الولد النيل (Re: Adil Osman)
|
عادل عثمان
يقول الشاعر قاسم ابو زيد فى معرض تقديمه لديوان مجدى النور
(فاجانى النهار )
"اللغة حمالة للمعانى والقيم
والشعر يستخدم نفس لغة المجتمع اليومية ويعيد انتاجها
فى صياغات وبغيات ومعالجات جديدة
ويتغنى بالمالوف شعرا ونظما بطريقة غير مالوفة
"صناعات فنية "لتدهش وتجذب جمهور الشعر وتحمله لتلك العوالم او
لعوالم شبيهة او عوالم خاصة
المهم ان تصل بهم ومعهم لحالة الامتاع
انا حلفت
بنات الشجر الماطر
ما تنزل صفقة
تعرى صفير الريح
يلقى غناهو صرصار الليل الماكر
اثر دراسة الدراما الاكاديمية يبدو واضحا فى هذه الكراسة
السفرية الخاصة على عوالم مجدى الشعرية
ففكر الشاعر الابداعى الدرامى مقارنا ومقاربا بين عناصر الصورة الشعرية
المسرحية ـ التلفزيونية ـ فى سطر او اسطر شعرية
والتى تظهر العلاقة بطريقة مباشرة وواضحة ، بين كل تلك العناصر ،
حتى يصل لقوله
نوع اللقطة التلفزيونية وحركة الشخصية المسرحية لرؤية الصورة الشعرية
اتلفت
من فوق كتفينا
ود العين ند
وطارعصفور
نبت فينى الريش
صفقت جريت
حفيان
ما تغطينى
لكى يرسم اللوحة الشعرية بدقة ، عين الشاعر التشكيلى وحدها هى التى ترصد
انطباعية ازمنة تحولات وانكسارات وتدرجات الضوء واللون
ومثل هذه الاسطر الشعرية ـ الصورة ـ تحيلنا لمكان العرض المسرحى
ومجدى قبل لفظ التنبيه "استعداد"فاجانا بتغيير نوع ولون واتجاه الضوء
"المؤثر الضوئى "
ليحرر الاشخاص ولاحجام والمساحات فى اطار المنظر المسرحى
تتداخل ـ تتماهى ـ تتغير الامكنة
فاجانى النهار
وانا ماشى
بيناتا
اتساقط باقى
حنين"
ولكم تساقطت احلامنا بفقده
| |
|
|
|
|
|
|
|
|
|
Re: مجدى النور ........الولد النيل (Re: سلمى الشيخ سلامة)
|
Quote:
كان يعمل على حضور بعض صديقاته من بائعات الشاي والمريسة لمسرحياته ، كان بعد العرض يسألهن عن المسرحية فيقلن له
ـ والله المسرحية سمحة لكن ما بنقدر نضحك شان الناس ما يشاكلونا ؟؟؟
هكذا حدثنى ضاحكا عن بطلات مسرحياته الحقيقات.
|
إنسان بكل هذا الجمال، لن يموت أبدا
| |
|
|
|
|
|
|
|
|
|
Re: مجدى النور ........الولد النيل (Re: عبدالغفار محمد سعيد)
|
Quote: هل حقا فاجاك النهار ؟
|
العزيزة سلمى..
لقد فاجأتينا أيضا بهذه الخلجات الدفاقة. للد درك!
مجدي النور الذي أضاء لنا شموعا، رحل مسرعا ولعله الآن يغيش هانئا وسعيدا. فمثله لا يموت ولكنه يبقى فينا. له الرحمة وجنة الرضوان..
شكرا سلمى على تحفتك الرائعة وان كنا في مقام حزن ولكنه حزن نبيل.
| |
|
|
|
|
|
|
|
|
|
Re: مجدى النور ........الولد النيل (Re: Osman Musa)
|
عثمان موسى
فعلا مرت سنه
مرت سنه واكوام الحزن استعدلت فى قعدتا
مرت سنه
كان نور مولع فى الحيشان
اذاعة تلفزيون وابوهم المسرح
كان خشبة المسرح
وكان روحه المسرح
فى الايام الاخيرة كان بستعد لمسرحية
من دارفور
وعن دارفور
مهموم بالمسرح والناس الغبش
وفاتت سنه
ومازال
وحيظل
فينا نور المسرح وقلب المسرح
| |
|
|
|
|
|
|
|
|
|
Re: مجدى النور ........الولد النيل (Re: عبدالأله زمراوي)
|
يا زمراوى كان فرحان
كان فرحان بالعربية
كلمنا وقال اشترى عربية
وحام بيها على كل الاهل فى اخر يوم
كل الناس الكان زعلان معاهم
مشى ليهم
تحكى اميرة
ـ جانى بدون ميعاد قال لى يا اميرة العفو ياخ
ـ قلت ليهو العفو والعافية لكن ادينى (سحبه فى العربية ) لفيت الحلة وفى الميدان زين
سقتها عربية النحس
وودعتو
اليوم التانى سمعت الخبر الفاجع
كان حاسى بانه مفارق عالمنا
مشى للكل وما كان عارف انه دى اخر مشياتو
لك كل الرحمة يا مجدى يانور
| |
|
|
|
|
|
|
|
|
|
Re: مجدى النور ........الولد النيل (Re: عبدالغفار محمد سعيد)
|
عبد الغفار محمد سعيد
جميل ان تظل انوار مجدى فينا تحرك السكون لدنا
جميل ان يكون مجدى بيننا بشخوصه التى اختارها بعناية النحات
تعرف ان النحاتين اكثر الناس صبرا
واكثرهم دقة فى اختيار منحوتاتهم
مثلهم كان مجدى
يرى بعين لانرى بها
يسمع بعين لانسمع بها
اعنى ما اقول
فالكلمة لديه مسموعة بالعين
والكلمة مقروءة بالعين فى نفس الان
حزن
نام
فى
حزنى
صوت
ساقى
النهار
بقدرتو
زاد
فى
خوفى
شوق
شفيف
لو
اوصلو
وبينى
بين
الصمت
لون
ولون
حقيقى
ارتاح
لواتخيلو
ابريل 1987
| |
|
|
|
|
|
|
|
|
|
Re: مجدى النور ........الولد النيل (Re: محمد عثمان)
|
محمد عثمان
سوقنى معاك
حلوة الخطوة فى الرملة
فوق غيمة
ناداها نشيد
والعين
تدور مغمضة
دايراها راحة البال
والروح
نعسانه تتمد
اصلو الخيال الوان
فى لوحة تتحدى
سوقنى معاك
معاك
سبتمبر 2003
وساقنا معاهو للوحشة
| |
|
|
|
|
|
|
|
|
|
Re: مجدى النور ........الولد النيل (Re: خالد عبد الله محمود)
|
الاخ خالد
حين استمعت اول مرة لاغنية (فاجانى النهار )
لم اكن اعرف ان من كتبها مجدى
لكنى لسبب ما قمت بتسجيلها لعدد تجاوز السبعة مرات
وشاءت الايام ان اسافر الى ولاية اخرى
هناك التقيت باحد زملاء مجدى عليه الرحمة
فى العربية قمت بتشغيل الشريط فضحك منى عوض كوبر
وقال
ـ بس سبعة مرات انا مسجلها تسعة مرات
حتى تلك اللحظة لم اكن اعرف من هو شاعرها
حتى فاجانى عوض انها من شعر مجدى النور
حين عدت للسودان والتقيته حدثته بما حدث من امر الاغنية
والحوار الذى در بينى وبين عوض كوبر
ولك ان تتصور دمعة سالت وحضن عميق جميل بادلنى اياه مجدى
وابتسامة فخورة بدت على محياه
يا لبساطته يا لجمال روحه التى افتقدناها
كنت كلما دخلت المسرح يجيئنى جريا
ـ جبيبتى جات طولت منك وينك ووين اراضيك تلفونك مالو معاى ؟
ونقعد فى ضل الشجرة فى المسرح نضحك ونتحدث عن هم المسرح ونحاول الى ترتيق ما امكننا
لكم افتقد كل ذلك الان
| |
|
|
|
|
|
|
|
|
|
Re: مجدى النور ........الولد النيل (Re: محمد اشرف)
|
سلمى الوفية ..
أي قلب هذا الذي حباك به الله يا ودودة ..
ذاكرتك دائما يجليها حب الآخرين والوفء لهم ..
رحم الله اصحابك الذين رحلوا وتركوا أقلامهم بيدك ..
وذكراهم محفوظة بين حناياك ..
متعك الله بالعافية ياابنة الاكرمين .
| |
|
|
|
|
|
|
|
|
|
Re: مجدى النور ........الولد النيل (Re: محمد على طه الملك)
|
صديقى محمد على طه الملك
وماذا تبقى غير ان نكتب عن احباءنا احياء واموات ؟
فالقلب دائما ينوء بالاثقال اولها ثقل الفقد
دائما يمضون غير هيابين بما يتركونه خلفهم من انين وحزن يخيم على روحى
دائما كنت انتظرهم لهفة للحياة
للمشى بين ازقة الحياة
نضحك منها ونتلمس خطانا
نمشى بيننا وتمشى بينا المحبة
دائما كنا متحابين
حتى فى غيابنا كل منا يحفظ الاخر كانما هو موجود
يدافع عنه اذا ما حدث ان تم وخز ما فى الغياب
يحكون لك ان فلانا قال كذا وكان الرد كذا
غالبا ما ينسون انفسهم لانك تحتاجهم
كل من تعرفت اليه وامتدت علاقتى به من كل الاصدقاء لم تنقطع منذ عقود
فللاحياء منهم لهم حبى ولمن رحلوا لهم كل الرحمة
| |
|
|
|
|
|
|
|
|
|
Re: مجدى النور ........الولد النيل (Re: معتصم ود الجمام)
|
معتصم يا جمام
عودا حميدا اولا
ثم انى لست وحدى من احبت كل هؤلاء الناس
فلقد احبونى مثلما احببتهم
بتعرف زول اسمه عرقلة؟
عمرى ما شفتو الا مؤخرا
اول مرة قابلته قال لى
عرفتك من ناس صوصل ومجدى وجمال حسن سعيد
تخيل انى مافى وبرضى معاهم
مش لى حق احبهم
اول يوم رجعت السودان مشيت المعهد ومشيت بعد داك شجرة الزهاجه
لقيتهم منتظرنى بلهفة ممكن تشوفا فى دموع امنه امين وعيون صوصل وضحكة مجدى النور
تعاين فى كل الوجوه تلاقى الحب مرسوم
يسالمك الرشيد ويبكى وتقالد كل الناس السمحة وما عندك غير تحبهم
فلهم الحب والحب ولاشئ غيره حيث انالانملك سواه يا صديقى
| |
|
|
|
|
|
|
|
|
|
Re: مجدى النور ........الولد النيل (Re: محمد اشرف)
|
الاعمال الاخيره للراحل المقيم... عبدالعظيم عبدالحي..
كنت اود ان اعود اليكم حاملا في جيوبي شوارع المدن اللتي زرتها.....
كنت اود ان احكي لكم عن عم ادم اللذي اسكرني بخمر اوصافه التي كادت ان تنبت اشجارا لغويه بينيه !!!
كنت اريد ان احدثكم عن انتوانيت التي وجدتها (بعد ان غابت عني سنينا)... وجدتها تغني اثنتا عشر كلمه جمعتها في شكل قصيده .....
وددت لو حدثتكم عن صديقتي التي تتمدد مواعين الجمال في كل شوارع ملامحها ويأن منها حاجبها الايمن فترفعه الي اعلي في دهشه خجوله
حتي تستوي علي عرش وجهها ابتسامه تسقط مني كل اقنعة التمعن......!
كم اود ان اعتذر لمني خوجلي عن عدم امكانية حضوري معهم لدار العجزة....
كنت اتمني ان اقول العيد مبروك لصديقة اخي عادل( سلمي الشيخ سلأمه واحدثهاابنته وابنه ( عزه والشريف ).
اعتذر لعماد عبدالله اللذي حلفني بكل ما هو موبوء( بالأعشاب التي تنبت بين مفاصل الذكريات) ان اكتب عن عم ادم و اكتب عن انوانيت ووووووو
اعتذر لخالد كودي.. وطلأل عفيفي.. و عادل اسحق..و نور الهادي و اشراقه مصطفي..
اعتذر لهم جميعا لانني لم اقرأ لهم كما ينبغي ... و لم اراسلهم كما وعدتهم.
كيف لي .... كيف لي ... وقد قضيت الشهرين الاخيرين مع احد اعز اصدقائي..
عبدالعظيم عبدالحي ...
هذه هي الاعماله الاخيره التي نفذها قبل رحيله .... كان لي شرف حضور فترات التكوين.. أنات الولأده... وقسوة اللون...
ادخلوها... و تجولوا داخلها بصمت ... فلن تصابوا منها الا بعميق الياسمين ... وشرف الصمود...
وقوة المكان...
عبدالعظيم عبدالحي هو معنا ..لم يمت فقط....... تصاعد..
فلنحتفي به كما ينبغي ...
*******
العزيزه (كالنهار الذي فاجاءه الراحل المقيم مجدي النور)
سلمي الشيخ....
الكلام الذي سبق هو الذي حال دوني والتواصل...
فقد عرفني الراحل عبدالعظيم بالراحل مجدي......
وقبل ان استوعب ماحدث!!! .....
رحل عبدالعظيم في الرابع من اكتوبر المنصرم.. هل هي صدفه ام سخرية القدر اللعين!!؟؟
وقبل ان استوعب رحيل عبدالعظيم ....
رحل عصام الخواض قبل اسبوعين... احد اجمل اعضاء المسرح الجامعي.. في فترة الثمانينات ...
وقبلهم.. نازك..
والعميري الذي حدثني عادل عنه كثيرا... وبكاء دائم...
دائما يدخلون الينا من باب الفرح الجميل ... ويخرجون منا من باب الرماد المر...
يا الهي لما كل هذا الحزن....
يا الهي لا نريد المزيد فقد فاضت روحنا وامتلأت بالحزن..
ولن تسأل ابدا هل من مزيد... لن نسأل ابا هل من مزيد!!!!!!!!
لك السلوي... لك السلوي...
سلمي... الحبيبه كما ينبغي ...
الحزن ينمو كما الاشجار فينا... سلوانا أنهم معنا بخوالد أعمالهم....
سلمي مع الصبر والسلامه... ولقاء قريب......
ابراهيم.....
| |
|
|
|
|
|
|
|
|
|
Re: مجدى النور ........الولد النيل (Re: ibrahim kojan)
|
يا ابراهيم كوجان
لقد ابكيتنى
فنحن كما قلت
الحزن ينمو كما الاشجار فينا... سلوانا أنهم معنا بخوالد أعمالهم....
وهم كذلك خالدين فينا
لصديقك عبد العظيم كل الرحمة
وشكرا لحزنك
شكرا لمجدى الذى افرحنا دائما بمسرحه ومسلسلاته واغنياته
شكرا لكل المبدعين الذين سبقونا للضفة الاخرى
مقدمين لنا انفسهم قرابين لفن لن تمحوه الايام
| |
|
|
|
|
|
|
|
|
|
Re: مجدى النور ........الولد النيل (Re: بخاري عثمان الامين)
|
بخارى ايها الانسان
اتمنى لك طول العمر يا صديقى
خلينا من كلام الموت
تعال نتكلم فى الحياة
الديم
وما ادراك ما الديم
كنت فيه التقى اصدقائى الذين احبهم وساظل
ميرغنى عطاالمنان وزوجته الرائعة نصرة
وحسن عطا المنان الذى حضرت زواجه فى زمان مضى
ما زال عبقه يدخل الرئة ولا يخرج
ومجدى الذى كان احد محبى الديم وقرنى وعادل الياس
كل هؤلاء احببت الديم لاجلهم
وبالمناسبة مرة كنت اقرا لصديقنا عبد الرحمن بركات قصة كتبتها للعميرى
فقال مثل ما قلت ان انعيه لو كنت على قيد الحياة
واقول لك عمرا مديدا ايها الانسان الجميل
ومثله لعبد الرحمن بركات
| |
|
|
|
|
|
|
|
|
|
Re: مجدى النور ........الولد النيل (Re: سلمى الشيخ سلامة)
|
فاجأنى الغياب
يا مجدى ( ضي ) النور
كنت حينها وإلى الآن أعرفه من خلال أعماله
التى تميزت عن سواها
وعن الآخرين ببصمتها المتفرده فى التوحد
فى التفرد
فى الغرابه
وفى الجمال
حتى هذه اللحظه أحسه ( الله يرحمو )
يمشى فى الشرايين وخزاً ووشماً لا يمحى
جميلاً كما أردت أن أراه
الله يرحمك يا أجمل ضو
سملى ...
لنا العزاء
لك الصبر
والذكرى
| |
|
|
|
|
|
|
|
|
|
Re: مجدى النور ........الولد النيل (Re: عبدالله داش)
|
يا لوفائك يا سلمي كل يوم تزداد محبتنا فيك يا بت الشيخ , رحم الله مجدي النور واسكنه فسيح جناته
مع الصديقين والشهداء .
انتٍ النيل في وفاهو ونور القمر في سماهو
انت الأرض صامدة وابية صابرة للهم والأسية
إنشاء الله اخر الأحزان يا سلمي .
| |
|
|
|
|
|
|
|
|
|
Re: مجدى النور ........الولد النيل (Re: الطيب شيقوق)
|
صديقى الاسفيرى الطيب شيقوق
مجدى النور كان علامة من علامات المسرح والشعر والانسانية
كان مهموما بالاخرين
حين اشترى عربية كان القصدمنها كما قال
ـ تعرفى امى واخواتى واولادى حيرتاحوا من زحمة المواصلات
واصحابى كمان وديل لازم يرتاحوا لانه دى عربيتن
انه الانسان يقتسم كل شئ والاصحاب
الهم واحد والفرح واحد
حين كان يسجل فى شريطه التسجيلى لمحجوب شريف
كنا ذات يوم فى مسرح البقعة لم يكن بينا موعد
لكنه جاء
تحدثنا عن اشياء لم يكن بينها ما يشتغله فى الشريط التسجيلى
فجاة قال لى
ـ امى انا حبيبتى قومى ارحكى معاى
ـ وين ؟
ـ الاستديو
ـ ليه ؟
ـ خطرت لى فكرة ولازم انفذا
لحظتهاكلم مريم محجوب شريف
ـ مريم قابلينا فى الاستديو وجيبى معاك رسايل اميرة لمحجوب فى السجن
مشينا الاستديو وسجلنا الرسائل بصوتى
وفى نفس اليوم قام بالمونتاج
لكنى لا املك نسخة من الفيلم التسجيلى
فلقد وعدنى ان يهدينى نسخة لكن لم تمهله المنية كيما يفعل
رحمه الله كل الرحمة وجعل مثواه بين الصديقين والشهداء
| |
|
|
|
|
|
|
|
|
|
Re: مجدى النور ........الولد النيل (Re: عبدالله داش)
|
يا داش مجدى قال
والشوق هطولو تقيل
والموج يشابى مروق
والسكة تواهة
ودوبى دوب
يادوب
ماداير الراحة
والحق ظنونو دروب
دروب ودروب
ننسى جواها
احزانا تمشى تدوب
خلينى زى وردة
مولودة جوه الطين
ملعونة من الليل
مسكونة اخر الويل
وعارفه الضلام طول
وبرضو فواحه
مارس 2000
| |
|
|
|
|
|
|
|
|
|
Re: مجدى النور ........الولد النيل (Re: سلمى الشيخ سلامة)
|
من هذا البيت تحديدا
خرجت انا .. انادي ميرغني بالخال
وحسن بالعجوز ولنا في الليل اسرار واسرار
( ولكنني جاد فيما يخص انك تمنحي الميت حياة
أجمل ،،، ناديتك في بوست .. سلمي الشيخ نسيتي العميري )
كنت ادرك انك ستستوعبين انني وبعد رحيل عميري في الابيض
ظللت مصرا انني سالتقيه وبالتحديد في المرابيع او سوق ابو جهل
لست من الابيض ولكني شعرت ان العميري سيمر من هناك .... اظنني مجنون
بس مجنون بمن يستحق ... اقابل ميرغني/حسن عطا المنان كثيرا
سانقل لهم تحاياك ولمجدي ( كل ) النور
| |
|
|
|
|
|
|
|
|
|
Re: مجدى النور ........الولد النيل (Re: بخاري عثمان الامين)
|
اظنني مجنون
ولا اقل عنك جنونا اخى فلهؤلاء القوم انتمى
ولك بت اكثر انتماءا
مرة كتبت للاستاذ حسن موسى حين كان يصدر مجلة (جهنم)والتى كان يصدرها من باريس
عرفته علىّ
وقلت له (صاحب صاحبك صحبك )
حيث هو زميل دراسة لاستاذى محمود عمر الذى بدوره درسنى فى الابيض (كلية المعلمات ) وغدونا اصحاب باكثر من تلميذة واستاذ
وكذا كان صديقا لصديقى الراحل الجميل زهاء الطاهر
وتلميذا لخالى الفنان التشكيلى عمر خيرى (جورج ادوارد)
فصار ينادينى بقوله (صاحب صحبك صاحبك )
وهانت يا صديقى المجنون الجميل بت صديقا لى كما لاصدقاء الزمن الجميل
واخرهم مجدى النور عليه الرحمة تغشاه وتنير قبره
لك طول العمر يا صديقى واتمنى ان تعيش زمنا جميلا مع كل اولئك البررة
لك ولهم الانحناء والتقدير
| |
|
|
|
|
|
|
|
|
|
Re: مجدى النور ........الولد النيل (Re: سلمى الشيخ سلامة)
|
آخر لقاء لي معه..
كنا بايتين معا..
في بحري جوار ميدان عقرب..
بيت نطلق عليه - تهكما-
.. قصر عابدين ..
وهو أعلى وأجل..
تعودنا أن نلتقي هناك كل (ويك إند)..
ثلة من الأولين وقليل من (الآخرين)..
جاءآ آخر الليل..
.. مجدي وعاطف..
متأبطان الفرح..
ودائما ما يأتيان هكذا..
آخر الليل..
ومتأبطان من الفرح ما تيسر..
نشرنا دبابات الكمون
في كل (كبارينا) الداخلية..
أعلنا حالة الـطوارئ ..
ورفعنا درجة إسـتعدادناالقصوى..
لإستقبال عائدين..
من غابات الليل الـغامضة..
.. أعلنا بياننا الأول
لإستدراج (العدو)
وإعلان جمهورية الشغب....
فتحنا نار الغناء
في أرجاء المكان..
ولم نصب سوى بهمسات (صديقة)..
وضجة لا يعكرها سكون..
ولا تحدها أسرار..
لم يكن إلا لقاءا وافترقنا..
كالفراشات على نار الهوى..
أو...
يالهذا الفراق..
ويالتلك الأيام..
وسلام على مجدي في الأولين وفي الآخرين ..
| |
|
|
|
|
|
|
|
|
|
Re: مجدى النور ........الولد النيل (Re: Saber Abdelhadi)
|
"وداعاً مجدى النور – عرفتك فناناً اصيلاً --- قبل ان يكتمل مشروع لحننا الاول فاجأني الرحيل
طفقت أدوذزن جيتارى بحثاً عن لحناً يعبر عن القصيدة التى اهديتنى لها بخط يدك بتاريح 4 يوليو 2001 والتى تحمل عنوان (أسى) وهى تتمدد امامى حزناً على فراقك ، أصدقك القول صديقى الراحل بعد كل هذه السنوات طاوعتنى الالة وانا بباريس لتتواصل فى القاهرة محاولات اكمال اللحن الذى أحسه تماماً ...............
أسى
قادل محمل
أسى
وماسك وجع الرهيفة
وكاتم نفسا
صادفنى ضى
مشتت فى المساء
منية يا احلام
معاكى عجزت ألامسا
طلة وردة
بين رقراق
كلمة حلوة فى الشباك
لحبيب ودع
حبايبو وغاب
عتمة وأسى
وماسك وجع الرهيفة
وكاتم نفسا
كم اتوق ان أسمعك لحنك ويقينى أن ما تبقى من وهج كفيل بإكمال اللحن "
د.الفاتح حسين
من مكتبة مجدى النور
| Quote: وسلام على مجدي في الأولين وفي الآخرين .. |
وداعا مجدى النور
| |
|
|
|
|
|
|
|
|
|
Re: مجدى النور ........الولد النيل (Re: Inaam Saad)
|
Quote: هل حقا فاجاك النهار ؟
العام انصرم وانت ما تزال بينا حاضرا
ايها المولود من دفق الارض ورائحتها
ملون بطميها ومدثر بنيلها متحليا بصبر اهلها
متجليا كقمرها ومتخذا صورة الحياة ملمحا |
الحبيبة الغالية سلمى
حتى فى حزنك عميقة ووفية حد الدهشة
ان المفردات تنساب منك كالماء النمير
يسرى الاحساس فى دواخل القارىء سريان الدم فى الاوردة والشرايين
حين اقرأ لك فى كل حالااتك ينتابنى احساس عميق بعمق وجودك فى الوجدان
اهديك اعجابى يا ملكة الكلمة والمفردة العتيقة
الرحمه والمغفرة للراحل المقيم مجدى النور
حاضر بيننا بكتابته العظيمه
الصبر للاسرته ولكل محبيه
| |
|
|
|
|
|
|
|
|
|
Re: مجدى النور ........الولد النيل (Re: soma)
|
Quote: خلينى زى وردة
مولودة جوه الطين
ملعونة من الليل
مسكونة اخر الويل
وعارفه الضلام طول
وبرضو فواحه |
يا سلمى تسلمى يا سلمى ليه حركتى جوايا الوجع الساكن فى الضلوع مجدى عبرته لسه ما انفكت والدموع محجوزة فى حد خبره الفاجعة هناك
ياسلمى كنت احتضن المساءات بفرح عند لقياه فكان مجدى يتجول بنا فى مكان غير المكان وزمان يصنعه هو للفرح،
احبك ياسلمى وانتى تجرحين جرحى مرات بحكاياك احكى عنه وكلمينا اكثر وبجيك راجعة بكل قصة ملونة بالضحك والدهشة مجدى هو مجدى وبس لا احد غيره يبدع فى صناعة مدن الفرح
يا سلمى نوال النور تستعد هذه الايام لاحياء ذكرى مجدى كلميها واحكى ليها عن الولد النيل الممدود فينا نبعه ومصبه.
وبجيك تانى ياسلمى رغم الحزن
مودتى
نجلاء الماحى
| |
|
|
|
|
|
|
|
|
|
Re: مجدى النور ........الولد النيل (Re: Abdulbagi Mohammed)
|
افتح ابواب بخورك
ياحلم
دليه سورك
يتحسس الاعمى
البصر
اهبطى
آن ميقات اللغم
ضى
يفتش فى العتمة
عصب العشم
يا قنعان
ومرتق النيل
بالالم
حفيان مغبش
مندلى وين؟
نزل شريان
حبيبى
انشل الخوف
بالنغم
وغنيت
يا حنين
ما وقفنى هم
روح
تقالد الروح
نتمد بوح
نتلم لم
افتح
ابواب بخورك يا حلم
دليه سورك
يتحسس الاعمى
البصر
اهبطى
آن ميقات النغم
ابريل 1994
وكان الفتى النيل مجدى ينسج من غزل المحبة روافد يتمدد هو فى قلوبنا صانعا مدائن الفرح ولا يزال متحكرا فى القلب وشما.
سلمى الشيخ سلامة حبيبة حبيبنا احن الى كتاباتك عن النيل مجدى
فمساحاتنا تفتقد صانع الفرح
نجلاء الماحى
| |
|
|
|
|
|
|
|
|
|
Re: مجدى النور ........الولد النيل (Re: Najlaa El Mahi)
|
يا نجلاء
الولد النيل عب القلب وستف ارواحنا بحبه وفات
الولد النيل
الكان النيل بسمع صوته
والنيل الولد الغناهو
ياقمره نص الليل
ونجوم تغنى غناك
راجيه الصحارى دليل
وبنات فى الضهارى هناك
سايقين الولد للنيل
شارين الرحط بالحيل
يا ولدا بشد الحيل
خجلت النيل
فجيت القلب وسكنت
ما تطلع من القلب
يا ولد القلب دليل
منشور موزع فى البلدان
مجدى النور الولد النيل
يا ماسك حلم اليوم والغد كم بيك جميل
يامازن قول للناس ابو مازن هو دليل
ودليل يهدينا الحلة والحلة ضراها جميل
للود السامق وعالى اسمه الولد النيل
يا مجدى النور واحشنى
واحشانى الضحكة دليل
واحشنى النضم الحالى
والبيهو بعبى الليل
والبس احزانى وما اقدر
غير لونك اشوف فى الليل
ياود يا نيل
يامخيط لون الحلة بلون الناس والهيل
ياهيل قهوتنا الفايح
ماشفت الولد النيل
الكان مجنون بالحلة والحلة تبادلو جنون
ويضاحكوا لمن تهمس قمراتنا فى عز الليل
ياود يا نيل
مسخت علينا الحلة والقعدة حداه النيل
لو كان الدمع بجيبك
انا دمعى فاق النيل
| |
|
|
|
|
|
|
|
|
|
Re: مجدى النور ........الولد النيل (Re: Abdulbagi Mohammed)
|
يا ود يا بقة
مشيت لوين ؟
خليت الكف ممدودة وسؤال الجوف مخضوض
ما شفت الولد النيل ؟
مالاقيت الضحكة تساسق بين الموجة تفر وتجيك عديل ؟
اخ يا بقة
انعقد الدمع مصاحب للعبرة
ودموعنا تساوى دموع النيل
للولد الفات معبى بحب الناس
الولد الكان بحب النيل
النيل قصاها ضفيرتو
واهداها الولد النيل
اخ يا بقة
كل يوم بيزيد الم الجوه الحارق
كل يوم زول سمحا وفارق
يعلن ويقول
انا هسى مفارق
ما كفاهو الحزن الكان؟
قال اترش بموية النيل عشان يبقى (عميرى)
والصورة تبق مرشوشة بضو النيل
غسل شعرو
ومشى واتقدل
فات بضهرو
ما شفنا الوش الاصبح متل القمر الهل
ما جانا عديل
يا مجدى النور الولد الضو
ما شفتنا كيف بعدك فى الوح قليبنا يسو
| |
|
|
|
|
|
|
|
|
|
Re: مجدى النور ........الولد النيل (Re: Najlaa El Mahi)
|
نوال النور تستعد هذه الايام لاحياء ذكرى مجدى كلميها واحكى ليها عن الولد النيل الممدود فينا نبعه ومصبه
مجدى النور الضو الشال
والقمر الخت على ايدين بنات حلتنا رسمة حنه
رسمة مسورة بالازهار
ومقسوم القلب الفى النص على مليون
كل لحظة يغيب بترسم من تانى
قلب البت الشالت وعبت لون الحب لمجدى نور
ومجدى النور ما غاب شان نتذكرو يا حبان
مجدى النور فى سمانا يضوى كل يوم
مجدى النور
عاينو الاسم المدلول
مجدى النور
ياضو الحى
يا عم الكل
ياجد الكل
ياحب الكل
يا وجع الكل يا مجدى النور
| |
|
|
|
|
|
|
|
|
|
Re: مجدى النور ........الولد النيل (Re: soma)
|
الحبيبة سوما
شكرا لك
لكنى موجوعة
محزونة
كل اصحابى الذين احبهم رحلوا
تفتت اواصر روحى
احيانا هكذا احسها
احسها (مرقت روحى)
لكنى اتماسك بحبهم الذى دفعوا الى به
فلعدد من الاعوام ظلوا يدفعون الى بجميل كل شئ
بدءا من الكلمة نهاية بالحلم
فى زمان كان الحلم ممكنا
كنا نحلم
بالقادم احلى بالقمح وبالنيل يغسل اوجاعنا
لكنهم مضوا وتركوا الحسرة داخلى
عزائى انهم فى القلب دائما
| |
|
|
|
|
|
|
|
|
|
Re: مجدى النور ........الولد النيل (Re: Inaam Saad)
|
يا انعام
مجدى النور مافات
محكر فى الوجدان
ومعشعش فى الرايات
من راية لراية محمول الولد النظم الحب قصايد
من يوم ليوم بتمدد فى جوانا مداين
تمسح عن الغبش الهم
وتزيل الغم
مجدى النور يا سيد القص
قصيتا ضفيرة النيل ومشيت
ماشفت النيل الكان فرحان
صبح حزنان ويشكى الوجد يسال عن الود
القص ضفيرة النيل
ولمن شالت الدمعة ونزلت
كانت نازلة على الوجدان
كانت بتقول
يا سيد الحلة القامت هسع
افتح لكل الابواب
مستورة معانا
وجاتنا السرة
واتلمن كل نسوان الحلة القامت هسع فى ديوان القلب
والقلب الكان مرسوم فى وسط اليد اتفتق لمليون حته
ومليون زهرة
تصابح صبحك يا مليان بزهر الحب
يا مليان بسيرة الناس الحب
يا مجدى النور
يا مجدى النور ياقاسى على الدمعة
وقاسية الدمعة عليك
يا
مودر مفتاح القلب
والقلب الكان مليان بيك
يا مجدى النور
احى يا ود يا مبكى النيل
يا فاتح كل ابواب الضد
الله عليك
| |
|
|
|
|
|
|
|
|
|
Re: مجدى النور ........الولد النيل (Re: Saber Abdelhadi)
|
صابر الجميل
هكذا ظل يرصد الفرح ويجئ حيثما كان
يجئ الى المسرح فيجلب معه كل الجمال
يدخل الى بوابات الروح فتنفتح على مصراعيها
ضاحكا كعادته
مؤملا ان الحياة هى المسرح فيندغم فى ثناياها
كل يوم يجئ وفى جعبته عمل جديد او فكرة عمل جديد
يحسنا ان نستمع اليه
ولعل صديقه وزميله مخاوى كان يرى ما لانرى
فقام بتسجيل حياته تاريخا للتاريخ
رغم انه كان من المفترض ان يعاد تسجيل الحلقات لكن غيابه جاء مسرعا
وباتت تلك الحلقات مرجعا لحياته القصيرة
لمجدى النور كل الرحمة ولنا العزاء فى كل ارثه الفنى الذى تركه لنا
| |
|
|
|
|
|
|
|
|
|
Re: مجدى النور ........الولد النيل (Re: سلمى الشيخ سلامة)
|
Quote: كل اصحابى الذين احبهم رحلوا
تفتت اواصر روحى
احيانا هكذا احسها
احسها (مرقت روحى)
لكنى اتماسك بحبهم الذى دفعوا الى به
فلعدد من الاعوام ظلوا يدفعون الى بجميل كل شئ
بدءا من الكلمة نهاية بالحلم
فى زمان كان الحلم ممكنا
كنا نحلم
بالقادم احلى بالقمح وبالنيل يغسل اوجاعنا
|
| |
|
|
|
|
|
|
|
|
|
يامجدى (Re: سلمى الشيخ سلامة)
|
كنت دائما ارى الحياه السودانيه بعيده عن خشبات المسرح ذلك الهامش الممتلىء بالحياه فى اطراف المدينه معاناه الانسان فى بيت من الخيش من شوالات لاسمنت عطبره او كنانه اوخيش فبدأت الكتابه حول ترزى بسيط موجود فى كرتون كسلا
هكذا كتب حول مسرحيه عجله جادين الترزى
له من المسرحيات
لمه نقاره
مستوره
مسرحيه خطيه لاذعه ضد رجل جالس
الجاروف
الضيف
ناس الحله
الناس السعرانين
دائره وخط مستقيم
ود الجردقو
الحله القامت هسه
تاجوج فى الخرطوم
سيد الربابه
شكرا سلمى على هذا البوست وارجو ان يتواصل رد الجميل مع مرور الذكرى الاولى لرحيله
| |
|
|
|
|
|
|
|
|
|
Re: يامجدى (Re: معتز الامين)
|
سلام يا شرف
الفيكى يادنيا اتعرف
ضل بيت
بالجريد
اتسقف
ماداير طوابق
قزاز
وخزف
نقاع
زير
ولحاف ورف
وينو الترف؟
سلام ياشرف
الفيكى
يادنيا
اتعرف
مايو 1999
| |
|
|
|
|
|
|
|
|
|
Re: يامجدى (Re: معتز الامين)
|
هاقد مضى العام
ومازال يامعتز مجدى يورق بيننا
مازالت اوراقه ناصعة
وحضوره معقود
له الرحمة
ولك اجزل الشكر ان اضفيت علينا بكل هذا الارث الغير قابل للمحو
او النسيان
لك التجلة
ولمجدى فى عليائه الخلود مع كل عظماء بلادنا
الذين قدموا لنا اجمل ما لديهم
| |
|
|
|
|
|
|
|
|
|
Re: مجدى النور ........الولد النيل (Re: سلمى الشيخ سلامة)
|
Quote: مشيت يا صابر
والموج فى صدرك
حتى النيل عداهو مراكبو
تشيل من صبرك
فاتح باب الديوان
مرشوش
ومفرش
اتفضل قدام
نقعد
فى ضل الوجدان
نتشرف
يا شاى الجيران
ياعادى ومرهف
يا روح التيمان
يا تمرة ياسر
وصفصف
يا ابو خليل
روحك قنديل
صليت
سلمت
سكت
سرحت
قايلنك غبيت
تاريك فى الحضرة دخلت
وانت بتسرح فجاة بتسال
مهموم بالمسرح
وتانى بتسرح
شايل قلم الرصاص وترتب ترسم وتكتب
لمن تكتب زى الشفع تفرح
والغيم من فوقك يسلم ذوقك يا بدر جميل
اتبل المنديل ودع بمهلك
شهيت الجبنة مجيك
حاتل قلم الرصاص فى شعرك تترنم ووازن عودك
يا صادق وصادقة وعودك
وين الليلة بلودك ؟
صحيت القمرة ندندن ابيات من شعرك
شفتى القمر يا ليلى ؟
(سلى القمر عنى
واحكيلو عن حالك
اصلو القمر صاحبى اديهو مرسالك )
لقيتى القمر يا ليلى ؟
وليلى حزينة تاسق شان تصلك
مارقة تلون فى الموج المارق من صدرك
نعسانه عيونك
وبتحلم تملا بيوت الفقرا كهارب
وكسرة
وموية
يا زاهد
فى قدله
وجبه
وعمه وطاقية
يا مجذوب من غير حولية
احساسك تم الالفة واورادك
واورادك هى الحرية
هى الحرية
هى الحرية
هى الحرية
نوفمبر 2007
|
يامجدي النور سلام
| |
|
|
|
|
|
|
|
|
|
Re: مجدى النور ........الولد النيل (Re: محمد عبدالغنى سابل)
|
اليوم يكمل الفنان الراحل مجدى النور عاما من الحضور
اليوم
كان يوما فارقا فى تاريخنا المعاصر
اليوم
يزداد الحزن عبرة جديدة
ونسبل على الروح روح جديدة
للفن
ولاهل الفن
لك الرحمة يامجدى
يامن الهبت روحنا بحضورك وغيابك
لك حبنا
لك وجدنا
لك الحضور فينا
لك الاشراق فينا
لك الرحمة
ايها الولد الذى ما انفك اليفا لروحنا
وسيظل ابدا
| |
|
|
|
|
|
|
|
|
|
Re: مجدى النور ........الولد النيل (Re: Mohamed Ahmaed Olyesh)
|
ياهـ مر عام ولا زلنا من الدمع نغزل ثوب الحزن
حزن تقيل
غطى على اى فرح
ما كنت الفرح
وكان الفرح بيك كتير
مر عام و ضحكتك لسة بتسكن مسامعنا
ثم ماذا بعد؟
حزنت وحزنت وحزنت ومن الحزن ما قتل
االقاك يا فرح المواسم؟
ولسة وينك تحاصر بين اللحظات
ومن غزل الدمع نصنع توب الحزن
نجلاء الماحى
وجع مكوم فى القلب والعبرة تخنق فى الحلق من الصباح
مشتاقين يا فردة
| |
|
|
|
|
|
|
|
|
|
Re: مجدى النور ........الولد النيل (Re: سلمى الشيخ سلامة)
|
الاستاذه سلمى الشيخ
تحياتى
ينظم الاستاذ طارق الامين اليوم بالمسرح القومى امدرمان 5\12\2007م الذكرى السنويه الاولى لرحيل الفنان مجدى النور بمشاركه العديد من المبدعين :
معرض اعمال الراحل من الــ 3 ـاعه ظهرا
الورشه المستمره فاجأنى النهار 5 _ 6 مساءا
البرنامج المسائى
افتتاحيه
كلمات ، المسرح القومى ، وزاره الثقافه ، الجهه المنظمه ، اسره الراحل
قراءات شعريه
لوحات من مسرحيه الحله القامت هسه للراحل مجدى النور
مشاركه من اتحاد التشكيليين
مشاركات اخرى
| |
|
|
|
|
|
|
|
|
|
Re: مجدى النور ........الولد النيل (Re: معتز الامين)
|
الاخ الحبيب معتز
خلوها صاحية خطوط التماس
خلوها صاحية ذكرى مجدى النور
فهى الخيط الواصل بينا
تحياتى لطارق الامين وكل من يقف على هذه الاحتفالية
التى تليق بقامة مجدى الفنية والحياتية
بلغهم محبتى واملى ان تظل ذكراه دعامة لمسيرنا المسرحى والفنى
بلغهم انى حزينة لفراقه
بلغهم معزتى جميعا
| |
|
|
|
|
|
|
|
|
|
Re: مجدى النور ........الولد النيل (Re: سلمى الشيخ سلامة)
|
اه واه
يا سلمي علي فراق الاحبه هل مضي عامآ علي فراق الولد النبيل
هل تعلمي يا سلمي حتي الان اتخيل غيابه عنا كأنها احدي مسرحياته
وانه عائدآ يومآ لا محاله.
فكان دئمآ يقول اجمل الايام تلك التي لم نعشها بعد واجمل الايام قادمات.اه واه
| |
|
|
|
|
|
|
|
|
|
Re: مجدى النور ........الولد النيل (Re: Nawal giha)
|
نوال جحا
ما زالت تلك الايام فى نادى التنس والبروفات تصهل باذنى
ما زال صوته يدير راحة الكلام
وينقلنى معه الى حيث ذلك المعسكر
يا لنا من غرباء
يا له من ولد فاض كالنيل
ثم انحنى ليلتقط موجة ومضى
له الرحمة
ولنا حسن العزاء
انا لله وانا اليه راجعون
ولاحول ولاقوة الابالله
لله ما اعطى ولله ما اخذ
لاحول ولاقوة الابالله
لاحول ولاقوة الابالله
لاحول ولا قوة الابالله
| |
|
|
|
|
|
|
|
|
|
Re: مجدى النور ........الولد النيل (Re: سلمى الشيخ سلامة)
|
المبدع مجدي النور بالمسرح القومي أم درمان:كتابات حرة، أداء مسرحي، رسوم وتلوين، في ذكرى رحيله الأولى
صحيفة السودانى عدد اليوم
10\12\2007
رصد:الصادق الرضي
مجدي النور (1967-2006) ولد بمدينة بحري، كاتب ومخرج مسرحي وتلفزيوني وشاعر. صدر له عن شركة (قاف) ديوان (فاجأني النهار) 2005م، قدم العديد من المسرحيات في مسارح السودان المختفة في العاصمة والولايات. أخرج للتلفزيون السوداني عدداً من الأفلام والتمثيليات، شارك في تأسيس جماعتي (المسرح التجريبي والنفير المسرحية)، يعتبر من طلائع ما يمكن أن تطلق عليه مسرح المهمشين.
صدر ديوانه (بطاقة المرسى الأخير) مؤخرا إثر رحيله بجهود بعض أصدقائه، وكان قد صدر عنه كتاب (مجدي النور: رؤى ومسافات أقرب)، عن منشورات المسرح الوطني- مسرح البقعة، من تقديم علي مهدي وتحرير السر السيد في مارس الماضي متزامنا مع الدورة السابعة من فعاليات مهرجان (ايام البقعة المسرحية)، متضمنا عددا من المقالات والدراسات التي تناولت تجربته وأعماله المسرحية وعمله الشعري.
هنا رصد لفعاليات الذكرى الأولى لرحيله...
مساحة حرة:
الثالثة ظهرا في المساحة الخلفية للمسرح القومي بأم درمان، شباب مسرحيون يعملون على تهيئة المكان لعرض مسرحي حر، بعضهم منشغل بكتابة أوراق، وبعضهم منشغل بإعداد (بوردات) على الأرض، بعضهم يعلق أوراقا على جذع شجرة، هناك مكتب في زاوية مميزة، مكتوب عليه (مشروع مكتبة الراحل مجدي النور- تبرع بكتاب أو أكثر).
هكذا بدا لنا المكان ونحن ندلف إليه يوم الأربعاء 5 ديسمبر، حيث دعا أعضاء (الورشة المستمرة) بقيادة سيد عبدالله صوصل، لإحياء الذكرى الأولى لرحيل المبدع مجدي النور، الذي باغت الساحة الثقافية والفنية برحيله في الذات التوقيت من العام الماضي إثر حادث مروري لم يصمد أمامه الجسد.
سيد عبدالله صوصل قال لي، بينما هو منهمك في الإعداد لعرضه المسرحي: "تركنا مساحات حرة، على هذه (البوردات) ليكتب فيها أصدقاء الراحل ومحبوه انطباعاتهم الفورية مباشرة، ليكتبوا مقاطع شعرية أو رسائل عنه وله"، وقال: "نريد أن يكون احتفالنا بشكل عفوي".
كتب مجدي سر الختم- على (بورد):
(نزلت علينا كتابا جميلا
ولكننا لا نجيد القراءة
سافرت فينا لأرض البراءة
ولكننا ما قبلنا الرحيلا).
وعلى بورد آخر كتب الشبلي:
(إلى مجدي النور في برزخه:
أنت مفقود مفقود مفقود،
وبكلماتك موجود موجود موجود)
وعلى بورد آخر أيضا، كتب عبدالسلام جلود:
(يا حبيب الروح معاي
السكة البيت وغناي
القهوة تتنى معاي)
معرض ومكتبة و(فاجأني النهار):
محمود علي محجوب، من مواليد عطبرة في أغسطس من سنة 1965م درس بمسقط رأسه كل المراحل ما قبل الجامعية، تخرج سنة 1988م من قسم التلوين- كلية الفنون الجميلة والتطبيقية، عمل بعدد من الصحف بالداخل والخارج مخرجا فنيا ومعلما ببعض المدارس، أقام عددا من المعارض الجماعية والفردية بالداخل والخارج.
شارك بعرض لوحات تلوين بالماء وبورتريه للراحل، كما شارك بالرسم الحي على خشبة المسرح أثناء تقديم الفعاليات. قال لي إنه لم يلتقِ بالراحل شخصيا لكن التقاه من خلال أعماله المبدعة وسيرته الطيبة، وقال لي إنه يعتبر نفسه محظوظا إذ تمكن من هذه المشاركة التي قال إنها جاءت بصورة أكثر من عفوية، وأضاف: "عرفت عنه أشياء جديدة الآن".
الناقد والكاتب المسرحي المعروف عبدالله الميري، هو صاحب مبادرة مشروع (مكتبة مجدي النور بالمسرح القومي)، قال لي إن هم التوثيق للحركة المسرحية كان باعثا أيضا على الاقتراح، نظرا لافتقار الحركة الملموس للتوثيق، بالنظر إلى عدد الكتب التي تعنى أو تتناول الشأن المسرحي في السودان، وهو يرجو أن تجد مبادرته كل الدعم نحو أن تتأسس باسم المبدع الراحل.
وبالفعل وجد تجاوبا مدهشا حيث تبرع عدد كبير من الحضور بعدد مقدر من الكتب (فضل عدم ذكر اسمه)، كما تبرع مركز عبدالكريم ميرغني الثقافي بكل إصداراته- تفوق مائة كتاب، التشكيلي عصام عبدالحفيظ تبرع بـ(20) كتابا، وزارة الثقافة تبرعت بكل إصداراتها بجانب بعض الكتب التي تعرض الآن بمعرض الكتاب الدولي بأرض المعارض ببري (إضافة إلى تبرعها بجهازي كمبوتر لنجلي الراحل)، وبقي الباب مفتوحا أمام المزيد من التبرعات المؤسسية والفردية.
بدأ العرض المسرحي الحر، إعداد وإخراج سيد عبدالله صوصل، متلمسا الصور الدرامية في قصيدة الراحل المعروفة (فاجأني النهار) ومستنطقا الجمل الموسيقية التي أنتجتها مجموعة (عقد الجلاد) الغنائية في أدائها للقصيدة، وقد استعان المخرج والممثلون ببعض الأغنيات المعروفة الأخرى بما لا يخلّ بسياق العمل الشعري والغنائي ويخدم السياق المسرحي الماثل.
قراءات شعرية ولوحات مسرحية
السابعة من مساء ذات اليوم تحدث النجاشي مقدما كلمة المسرح القومي، وتحدث طارق الأمين مقدما كلمة (لجنة إحياء الذكرى السنوية للمبدع الراحل مجدي النور)، كما قدم ياسر عرمان كلمة في حق الراحل مبينا تميزه الخاص كفنان وملامسة حساسية وعيه لقضايا الاختلاف والتعدد الثقافي والإثني بالبلاد.. وتوالت القراءاءات الشعرية إثر ذلك بمشاركة الشعراء: يوسف مدني النخلي، الصادق الرضي، عبدالمنعم النذير، قاسم أحمد عطا، محمد عبدالمتعال الكتيابي، فرقة الهيلاهوب قدمت أحد أعمالها الغنائية التي كان الراحل حائرا بينها وأغنية أخرى. كما ذكر طارق الأمين عن التعاون الفني بين الراحل في أيامه الأخيرة وفرقة الهيلاهوب، ثم قدم المسرحي المعروف مكي سنادة كلمة السيد وزير الثقافة، وقبل أن تختتم الفعاليات قدمت نوال النور، شقيقة الراحل، كلمة الأسرة.
مسرحية (الحلة القامت هسع)، من آخر المسرحيات التي قدمها الراحل في حياته جماهيريا وقد وجدت قبولا ورواجا جماهيريا واهتماما نقديا شأنها ومسرحياته الأولى، في ختام الفعاليات قدم عدد من زملائه وأصدقائه المسرحيين لوحات منها نالت رضا واستحسان الحضور.
| |
|
|
|
|
|
|
|
|
|
Re: مجدى النور ........الولد النيل (Re: محمد عبدالغنى سابل)
|
هاقد مضى مجدى النور لكنه مازال بيننا
يا صديقى سابل
شكرا لك على هذه الافادة
الم اقل لكم انه لم يمت
ربما فى مكان اخر ينتظرنا بمفاجاة ما
رحم الله مجدى النور رحمة تتسع
وانزله فى جنانه مع الصديقين والشهداء وحسن اولئك رفيقا
لله ما اعطى ولله ما اخذ
وانا عليك لمحزونون يا مجدى
| |
|
|
|
|
|
|
|
|
|
Re: مجدى النور ........الولد النيل (Re: سلمى الشيخ سلامة)
|
ليتني كنت هناك
يوم التابين
كنت ساكتب مالم يكتبه الناس
كنت سارسم
كنت سامثل نصا في خاطري بيني وبينه
كنت ساغني له..
ود الجردقو: مسرحيه من فصل واحد كتبها وانا معه بالحاج يوسف كنت استعجلع وهو يكتب لي النص:ياشاب المسرحيه مانتهت لسه؟ يرد:انت نوم والصباح تلقاها جاهزة
ليتني لم انم
ليتني تحدثت معه قليلا فقد سافرت بعدها تمام
اه
اه لو كنت هناك
افتقدك يا ود الحاج يوسف
والله
عليش
| |
|
|
|
|
|
|
|
|
|
Re: مجدى النور ........الولد النيل (Re: Mohamed Ahmaed Olyesh)
|
عام 1994 اول مرة قابلت مجدي النور وكان ذلك في منزل الاستاذ يحي فضل الله ، واذكر اننا في ذاك اليوم قررنا ان نقوم بتسجيل اشرطة شعر لمصطفي سيداحمد وارسالها له في الدوحة .... امس بالصدفة وانا ابحث وسط مجموعه ضخمة من الكاسيت وجدت شريط هذه الجلسة ... اذكره تماما ، قرأ لنا فاجأني النهار ، كان ضاحكا بشوشا ، ظريفا ....
لم اقابله بعدها ،، ولولا ان الكاسيت به كثيرا من الخاص ، لما ترددت في نقله هنا ....
سلمي هل لك وسيلة اتصال بيحي فضل الله ، لانني ارغب ان ابعث له نسخة من هذا الكاسيت ........
| |
|
|
|
|
|
|
|
|
|
Re: مجدى النور ........الولد النيل (Re: Mohamed Ahmaed Olyesh)
|
ومثلك افتقدته يا عليش
مثل كل الناس الذين مثلنا افتقدناه
مجدى النور كان ظلا
وشجرا طويلا
له افرع ممتدة فى كل الاحياء الشعبية
بين بائعات الشاى ونساء افتقدن حقهن الانسانى فى الحياة الكريمة
لكنه حاول ان يقف معهن
وان يمكنهن من انسانيتهن
الم يكن يجئ بهن الى المسرح ؟
الم يكن يمسح دمعهن ويحكى لهن با نسانيته العالية كيف انهن نساء وانسانات ؟
ولهن ما للمواطنات الاخريات من حق فى الحياة ؟
يا لهذا المجدى المجيد
يا لهذا الولد الفالت
له الرحمة
ولنا ان نترحم عليه كلما مرت ذكراه بالخاطر
| |
|
|
|
|
|
|
|
|
|
Re: مجدى النور ........الولد النيل (Re: سلمى الشيخ سلامة)
|
ده الفات وما كلم زول .. ولا قال للموت أبيت
مجدي النور أخوي الشفتو بس من خلال تقديمو لبعض القصائد في حفلات عقد الجلاد وكان اخو صاح لأنو بكتب جواي وجوات أصحابي معاني جديده كلما نسمعو , بكيتو شديد لأني حسيت إني فوت على نفسي ملاقاتو ومقالدتو وزين كلامو , بكيتو لأني حسيت إنو كان عندو اجمل واكتر من العملو , بكيتو لني فقدت اخو والاخو حار .
رحل صوت المغني وفات
وشال وياهو
في جواهو
حلو الكلمات
حزن فنان
هموم وآهات
أماني جميله
وإبداعات
تحلى إحساسنا بالحاضر
وتسرح بينا في الجايات
***
رحل صوت المغني شعاع
لكن الأتر ما ضاع
مره تشوفو في شاشه
مره في خشبة المسرح
ومره تحسو في الإيقاع
وكلو كلام جميل صادق
كلام يحمل هموم أمة
وحلم بتحسن الأوضاع
***
رحل صوت المغني وغاب
لكن الحلم موجود
نشيلو معانا في جواتنا
نعبر بيهو في كلماتنا
نفتح بيهو أي حدود
نتعلم منو حب أخواتنا
نحقق بيهو حلم أماتنا
نعمر بيهو بيوت وبيوت
* * *
رحل صوت المغني النور
رحل يا حبي مجدي النور
| |
|
|
|
|
|
|
|
|
|
Re: مجدى النور ........الولد النيل (Re: سلمى الشيخ سلامة)
|
السادرة في حزنها السامي .. سلمى الشيخ سلامة
يا سيدتي حواري دائم أنا على نواصي كل بوستاتك هنا أقرأ بمتعة عالية وأتمتطق ملئ ذائقتي ..
ثم أغادر غير معلقاً .. فقط أظل مخمور بنشوة حرفك الراقي .. ولكن لهذا البوست طعم مختلف تماماً برساخة حزنه وإخلاصك الراكز .. ويستحق الراحل المقيم فينا مجدي النور كل الذي نثرته يداك .. أنه سيرة حياة بأكملها والقيمة المطلقة للإنسان بتمام إنسانيته .. أنه حقاً ولدٌ نيل يجاور كل المقامات الوجدانية بداخل كل من يرافقه .. ليس بحوزتنا له غير كل هذا الحب والدعاء بأن يكون من أهل الجنة وأصحاب اليمين .. وليس بحوزتي لك الآن يا سلمى غير أن أشمر حزني معك ..
"لننصب خيمة كبرى ...
لتأبين مفقود .. ذكراه تبكينا ...
ونسرد .. قصة أخرى ..
لتذكار محبوب .. فديناه .. بأعيننا ...
لننثر حزناً ورداً .. والطلّ أدمعنا ..
ونحلم .. أنا .. حوله دوماً ..لا شيء يفصلنا ...
نسمر عند حضرته .. ونذهب .. لرمسه الطاهر ...
نكتب .. في كل ناصية .. أنه يحدثنا
لكنه .. اتخذ .. من لحده وطنا ..... "
((من مجموعة مداخل للحزن – سوباوي))
الآن يا سيدتي سأدعو نفسي عندك خيمة حزنك .. نرتشف القهوة بعمق ليخالط سوادها دواخلنا وينتظم الحداد ...
مؤكد تحياتي .. وكوني متعافية وبخير ،،،
| |
|
|
|
|
|
|
|
|
|
Re: مجدى النور ........الولد النيل (Re: السوباوي)
|
نرتشف القهوة بعمق ليخالط سوادها دواخلنا وينتظم الحداد
وحدادنا طويل الامد يا صديقى
حدادنا بعدد الاحرف التى خطها
منتظم يا صديقى
لكنه لايدور الا ليبقى
يلفنا بقتامة موجعة
يجعلنا محنظلى الحلوق
ويجعل الكلمات عصية الا فى حضرته
تخرج لقول ما يجب ان يقال فى حقه
لقد اورثنا غيابه الحسرة
ولم نبتلعها بعد
يا لمجدى النور
كنت تراه شعلة ضوء
وترى الضوء حالا يلف وجهه الطفولى
والابتسامة الشامخة التى لاتفارقه
حتى فى احلك الظروف
حين التقيته اخر مرة
كان فى المسرح
وكان يشير الى ان اكتب وان انشر ودلنى على ناشر
كان فرحا بما كنا نقراه من كتاباتى
فلقد تعودنا ان نقرا لبعضنا فى الفترة التى التقيته فيها مؤخرا فى السودان
وهى التى عمقت معرفتنا احدنا بالاخر
لا نفترق الا على امل اللقاء
وحين كان ملحا على الغياب
بت اجئ الى المسرح
اقعد فى مقدمة المدخل ممنية النفس بلقاء لن يتم
انظر من فتحات الباب الخارجى للمسرح عسى ان يطل
لكنه اطال الغياب
واطال امد حزنى
يا مجدى يا حبيبا اتوق اليه
ومعنى اتشابى للوصول اليه
تعال يا حبيبنا
فما زال المسرح مظلما
وخشبته تنتظرك لحلة جديدة تتسع لكل الناس
وبيوت من حب تبنيها لنا
واشجار من ظلال روحك تقوم شامخة
| |
|
|
|
|
|
|
|
|
|
Re: مجدى النور ........الولد النيل (Re: محمد عبدالغنى سابل)
|
سلمى أم عزة،،
ليتني عرفت هذا النيل السلسبيل العذب مجدي النورقبل أن أقرأ نعيه! قرأت عنه الكثير الذي يجعلني أضعه في مصاف أفذاذنا الذين أختطفتهم يد المنون وهم في ريعان شبابهم. الخليل ومعاوية محمد نور والتيجاني البشير ,اخيرا الولد النيل. أحمد لك وفاء قل أن نجده في زماننا وأنت تفأجيننا بهذا الكم الهائل من الأحاسيس الأنسانية الجميلة. فتح الله عليك وأمتعك بالصحة والهناء وأجزل العطاء لأهل العطاء يا أخيتاه!
محبكم عبدالأله
| |
|
|
|
|
|
|
| |
سلمى الشيخ سلامة
بكرى ابوبكر
mohmed khalail
محمد عكاشة
Inaam Saad
Muna Khugali
محمد سنى دفع الله
Mohamed Ahmaed Olyesh
حيدر حسن ميرغني
Mohamed Abdelgaleel
Adil Osman
خضر حسين خليل
Osman Musa
salma subhi
خالد عبد الله محمود
محمد اشرف
محمد على طه الملك
معتصم ود الجمام
ibrahim kojan
بخاري عثمان الامين
khatab
هاشم أحمد خلف الله
الطيب شيقوق
Saber Abdelhadi
Abdulbagi Mohammed
معتز الامين
Nawal giha
رقم صفر
tarig almakki
السوباوي
فيس بوك
تويتر
انستقرام
يوتيوب
بنتيريست