دعواتكم لزميلنا المفكر د.الباقر العفيف بالشفاء العاجل
|
|
 حينما يقسو شوقي بدري - محقاً - على الصادق المهدي
|
تتذكر يا الصادق
تصريح الصادق المهدى الاخير بان تقديم البشير الى محاكمه سيسبب فى سيل الدماء فى الخرطوم حير القريب قبل البعيد . هل المقصود هو تخويف الناس . انت نسيت يا الصادق الدماء السالت فى دارفور ودى دماء اهلك وجدودك . وكان معاها اغتصاب وحرق وترويع . وكمان نسيت تكلمنا دماء منو الحتسيل فى الخرطوم . ومنو الحيتسبب فى اساله الدماء .
انت يا الصادق ما ود امدرمان مفروض تكون بتنزل عكس . كيف يقدروا يغشوك . اولاد الاقاليم . زمان بتاعين الملوص والثلاثه ورقات بيصطادوا الاغراب . وبعرفوا اولاد امدرمان بالشكل , بتجنبوهم . ليه تخلى الانقاذ تبيع ليك الترماج . هل معقول تكون صدقته انه الناس ديل لمن جوك فى البيت واشادوا بيك وعملوا ليك الاشعار والاوراد انهم كانوا جادين . توافق شنو يا الصادق . قالوا الجرب المجرب حاقت بيهو الندامه. ناس الانقاذ كان عارفينها حتطلع ملوص بس الغريبه انت ما كنت عارف يعنى عيال الانقاذ ديل طلعوا اشطر من ود امدرمان . انت نسيت يا الصادق الاهانات والاتهامات الوجهوها ليك لمن قبضوك وزلوك وسجنوك .
تهانينا بعيد ميلادك الثلاثه وسبعين . لكن انت نسيت انه العمر ما فضل فيه كثير . وانك بتعيد كثير من الغلطات وتلدغ من نفس الجحر عشرين مره . نسيت لمن فى اكتوبر 64 لمن قدام اللورى الشايل جنازه القرشى انو الترابى كان واقف جمبك ومتقوى بيك وقال للناس امشوا اتوزعوا وانحنا حنتولى الموضوع ده من هنى . وكادت اكتوبر ان تفشل لان الترابى كان يريد لها ان تفشل . الى ان قيد الله لاكتوبر المحامى بشير الطيب والذى هتف الى الجحيم يا عبود وانطلقت اكتوبر التى كنت انت والترابى على وشك ان تجهضوها .
نسيت يا الصادق يا اخوى لمن الناس طلبوا من بابكر عوض الله يترأس حكومه اكتوبر ورفض . واتصلوا تلفونيا بشداد ورفض ما دام عبود لا يزال على رأس الدوله . واقترحتم انتم السر لانه رجل ضعيف ويمكن قيادته . وبعد شهور طلبتم من السر ان يستقيل . حتى تنهار اكتوبر . وبالرغم من مناشده الوطنيين اصر السر على الاستقاله . حتى ان الاستاذ شوقى ملاسى اضطر على ان يبصق على وجه السر امام الجميع .
ثم اتت الديمقراطيه وكنتم ترفضون محاكمه عبود ورجاله . اين كنت يا الصادق عندما ذبحوا الديمراطيه وقرروا طرد الحزب الشيوعى . نسيت انه ربنا ما فتح عليك باى كلمه بادانه هذا التصرف الغير ديمقراطى . وخليت على عبد الله يعقوب يغشك .
نسيت يا الصادق لمن عمك احمد استعمل عكازه واعتدى على نائب برلمانى بالعكاز فى داخل البرلمان. واحمد وزير داخليه لانه النائب كان من جماعتك . ولمن عمك صادر المطبعه التجاريه وقالوا ليهو ده اجراء غير قانونى والمطبعه دى ما بتاعه الحزب الشيوعى , بتاعه شخص وبأسمه وعمك قال حأصادرها وخلى اى ابن ...... يجى يتكلم . انت كنت وين يا الصادق ؟. ولا نسيت . ياتوا ديمقراطيه دى البصادروا فيها المطابع ؟ .
ياتو دم يا الصادق الانت خايف عليهو ؟. الالف دينكاوى جنوبى القتلوهم فى الضعين وانت فى الحكومه ديل ما كانوا سودانيين . وبلدوا وعشارى كتبوا ليك بالحرف وادوك اسامى المجرمين واوصافهم . نسيت يا الصادق انك ما عملته حاجه ؟ . وبعد ما بلدوا خله البلد انت ختيت البروفسور عشارى فى السجن والانقاذ جات لقتوا بايت فى السجن . ورسلته ليهوا الفاتح سليمان مدير الدائره وهددتوهو ورغبتوهو الا انه رفض . نسيت يا الصادق ولا شنو . نسيت يا الصادق ان البطل جون قال ليك فى مفاوضات السلام المليشيات البتسلحوا فيها دى , جندوها وادوهم نمر وذى عسكرى . وخلوهم يحاربونى . لانه اذا وصلنا الى سلام او اى اتفاق بيكون كويس . لكن بالطريقه دى نحنا بعدين ما حنقدر نجمع السلاح ده من ايد الناس . ودلوقت يا الصادق السلاح الماتوا بيهو الفلاته والهبانيه ده امتداد للسلاح الانت كنت بتسلح بيهو المراحيل وبقيه قبائل الالتماس لمحاربه قرنق والحركه الشعبيه .السلاح ده ما تسبب فى النهب المسلح وحل النزاعات بالسلاح . وهذه بدايه مشاكل دارفور ولا ما متذكر يا الصادق . انت وقتين ما عاوز الدماء تسيل ليه ما حاكمت مجرمين مجازر الضعين ومجرمى اكتوبر . ولماذا سلحت المليشيات . انت نسيت يا الصادق لمن عمر نور الدائم رحمه الله عليه كان بيقول البلد بلدنا ونحنا سيادها والبتكلم حنضربوا بمليشياتنا فى الديمقراطيه الاخيره . نسيت يا الصادق لمن انت وعمك احمد راكبين الحصين من القبه وعلى شارع الاربعين فى 53 قبل ما يترصف وبتهتفوا البلد بلدنا ونحنا سيادها . هل دى كانت دعوه لحراره , ولا دواس .
لمن دكتور خليل جاء امدرمان ليه انت ادنت مسيرتو مع انه نفس الناس ديل انت جبتهم قبل كده بتسليح هزيل وبتجهيزات ضعيفه وكما قال رجال المدرعات دسناهم بالدبابات وفجخناهم . هل ده كان حقن دماء او خوف من سيل الدماء . مبارك قال انت قبضته وحتنفذ سياسه الانقاذ . وقالوا اطعم الفم تختشى العين . الصادق هنالك البعض الذى لا يزال يثق بك ويتمنى لك الخير , فأقل شئ ياخى اسكت عليك الله . انا احد اللذين قررت ان لا اتعرض لك لكن كمان يا الصادق انت ما بتدينا فرصه , القلته ليك ده شئ بسيط من لسته طويله . والناس لمن بنزلوا الناس المعاش فى سن الستين او الخمسه وستين لانه الانسان عنده مقدره معينه لفتره معينه . انا اصغر منك بمجموعه من السنين تكتب برقمين وافتكر ان جيلى فات عليه الفوات وانه من المفروض ان نترك الصغار يقررون لان هذه حياتهم ومستقبلهم . انت نسيت يا الصادق ان الانسان بنزل المعاش فيما عدا البابا وانت مش بابا ياخ ولا شنو ؟..
ع.س. شوقى
|
|
  
|
|
|
|
|
|
|
|
Re: حينما يقسو شوقي بدري - محقاً - على الصادق المهدي (Re: عبدالوهاب علي الحاج)
|
| Quote: ودلوقت يا الصادق السلاح الماتوا بيهو الفلاته والهبانيه ده امتداد للسلاح الانت كنت بتسلح بيهو المراحيل وبقيه قبائل الالتماس لمحاربه قرنق والحركه الشعبيه .السلاح ده ما تسبب فى النهب المسلح وحل النزاعات بالسلاح . وهذه بدايه مشاكل دارفور ولا ما متذكر يا الصادق . |
عبد الوهاب والله اروع اختيار ويستحق جائزة العام
لان كثير من حقائق التاريخ المقلوبة لم تجد الكاتب والمؤرخ الشجاع الذي يعيد ترتيبها
شوقي شجاع وخزينة اسرا
وخسارة لو صمت
| |
|
|
|
|
|
|
|
|
|
Re: حينما يقسو شوقي بدري - محقاً - على الصادق المهدي (Re: علاء الدين يوسف علي محمد)
|
يأخ عبد الوهاب ما قاله السيد الصادق عن الدماء التى ستسيل فى حالة تسليم البشير لا يحتاج الى درس عصر او دليل او تعليل . و لا يبرر ذلك القول الهجوم على الصادق او غيره من الذين يتنبؤن بما سيفعلهالانقاذيون اذا سلمت حكومة سودانية البشير_ نعم سيسيلون دما حتى يصل الركب. الا ترون كيف انهم بدأوا الآن يخربون ندوات الاحزاب المعارضة بالقوة - حملات الاتحاديين ومبارك الفاضل وحزب الامة. هذه فقط ندوات . كيف يحتملون تسليم البشير . ارجو ان لا نغمض عيوننا عن الواضح والفاضح . وربنا يكضب الشينة .
| |
|
|
|
|
|
|
|
|
|
Re: حينما يقسو شوقي بدري - محقاً - على الصادق المهدي (Re: نيازي مصطفى)
|
سلام يا نيازي
Quote: طبعا ما خرماج لما تتقاطع المصالح
لاعجب ان تجتمعوا مع الكيزان فالعدوء المشترك هو الصادق المهدي بالنسبة لكم ..
القافلة تسير وسترون ما يزيد غيظكم قريبا ان شاء الله .. |
شوقي بدري رجل شجاع ما في ذلك شك؛ وهو لا يخاف منكم؛ وقد قال في الصادق المهدي ما لم يقله مالك في الخمر؛ وانتم وصادقكم تخافونه لذلك لا تردوا عليه ولا تذكروه بخير او شر ؛ لأنكم عارفين ان فعلتم لن يسكت لكم وحيزيد الطين بلة من مخازي الصادق .
اما كونه خرماج فهذا صحيح؛ وازعم اني الوحيد الذي رد على بعض خرمجاته؛ وخرمجاته لا تفي شجاعته وشجاعته لا تنفي خرمجاته؛ ويظل 99% مما يكتبه عن حزب الامة والصادق المهدي صحيحا
اما عن وهبة فهل هو كوز ؟ ما كنت عارف والله .. ليه ما كلمتنا يا وهبة؟؟ .. واذا كان وهبة كوزا فالصادق المهدي هو أكبر كوز .
| |
|
|
|
|
|
|
|
|
|
Re: حينما يقسو شوقي بدري - محقاً - على الصادق المهدي (Re: Abdel Aati)
|
زي ما قال الأخ عادل العم شوقي رجل شجاع يقول ما يراه لكن كمان عنده أشياء لا يتفق الواحد معه فيها... العم شوقي رجل قاص و كتابته ممتعة جدا و ذاكرته عجيبة لكن العيب أن ذاكرة العم شوقي تمثل وعاءا يجمع فيه كل ما يسمع و يفعل ذلك أحيانا بغير تدقيق. الصادق المهدي كأي بشر له أخطاؤه و ليس معصوما لكنه في تقديري يظل أفضل و أصدق سياسي في خياراته و لعله السياسي السوداني الوحيد الذي يفكر و ينظر أثناء اتخاذ القرارات التي يتخذها و يضع مصلحة السودان فوق أي مصلحة و هو يفعل ذلك. زي ما قلت كلام عمنا شوقي ممتع جدا لو الواحد قراهو كدا على الماشي لكن هسع دي لو الواحد فلفلو حيلقى إنه معظم الأحداث التي أوردها من الذاكرة و كلام الناس و عم شوقي بحكيها كأنه حضرها شخصيا و هناك عبارات غير مقبولة إطلاقا حتى لو جات على سبيل المزاح زي:
| Quote: انت يا الصادق ما ود امدرمان مفروض تكون بتنزل عكس . كيف يقدروا يغشوك . اولاد الاقاليم . زمان بتاعين الملوص والثلاش ورقات بيصطادوا الاغراب . وبعرفوا اولاد امدرمان بالشكل , بتجنبوهم . ليه تخلى الانقاذ تبيع ليك الترماج . |
| |
|
|
|
|
|
|
|
|
|
Re: حينما يقسو شوقي بدري - محقاً - على الصادق المهدي (Re: العوض المسلمي)
|
الأخ المسلمي
ابتدرنا مناظرة قبل بها مؤيدو المؤتمر الوطني، وطرحنا جملة أسئلة لم يردوا على سؤال واحد منها، وحين صعب الأمر عليهم جدا قمنا بـ Discount وخفضنا الأسئلة إلى سؤالين فقط في مقابل 10 أسئلة من مؤيدي المؤتمر الوطني، أرتفعت لاحقا إلى 25 - 30 سؤال من مؤيدي المؤتمر الوطني وحلفائه في السر إضافة إلى أسئلة من مستقلين، فلماذا فتح (مليون) بوست لـ(تشتيت الكرة)؟
تعال يا مسلمي ورد هناك على السؤالين أنت أو أي واحد من مؤيدي المؤتمر الوطني، وهات ما شئت من الأسئلة والمقالات، وأستعد جيدا لآلاف المقالات التي تفضح فكر وسلوك وممارسة المؤتمر الوطني.
كل من يأنس في نفسه الكفاءة للدفاع عن المؤتمر الوطني وجرائمه فليأت ويجيب على سؤالين فقط، سؤالين يتعلقان بـ(الفقه) و(الفكر)..قصرنا معاكم؟
| |
|
|
|
|
|
|
|
|
|
Re: حينما يقسو شوقي بدري - محقاً - على الصادق المهدي (Re: خالد عويس)
|
Quote: تعال يا مسلمي ورد هناك على السؤالين أنت أو أي واحد من مؤيدي المؤتمر الوطني، وهات ما شئت من الأسئلة والمقالات، وأستعد جيدا لآلاف المقالات التي تفضح فكر وسلوك وممارسة المؤتمر الوطني.
كل من يأنس في نفسه الكفاءة للدفاع عن المؤتمر الوطني وجرائمه فليأت ويجيب على سؤالين فقط، سؤالين يتعلقان بـ(الفقه) و(الفكر)..قصرنا معاكم؟ |
الاخ خالد عويس سلام
اولا يا اخي ما الذي اغضبك عندما ناديتكم اعضاء حزب الامة للرد علي هذا المقال ؟؟ كنت اتمني ان اري رائكم في المقال والرد علي المقال بان شوقي بدر كان مخطئا في الامر المعين , لا ان ترد علي وتوجهني
بالرد في بوست محدد قد فتحته انت تحديا لعضوية حزب محدد .. اذا تصدق او لا تصدق انا لا اتابع بوستات التدحيات لانه فيها انتصار للنفس وهذا لي فيه وجهة نظر ...
ولمعلومية الجميع انا لست عضوا بالمؤتمر الوطني .. اكتب ما اراه صحيحا وارفض ما اري خطأة ..
وعليك اخي خالد الالتزام بادب الحوار ولا تقول ما ليس لك به علم ...
| |
|
|
|
|
|
|
|
|
|
Re: حينما يقسو شوقي بدري - محقاً - على الصادق المهدي (Re: د.محمد بابكر)
|
الاخ عبدالملك
والشقيق عثمان رغيم
الاخ علي حمد
علاء الدين يوسف
الاخ عادل عبدالعاطي
الاخ العوض الما مسلمي
د.محمد بابكر
تحياتي وشكرا على المرور والتعليق
_________________________________
والاخوان التانيين
نيازي
والمسلمي
وخالد عويس
برضو شكرا لمروركم
وهذا البوست لم اقصد به عملا سياسيا -انا لست من اهل السياسة -
بقدر ما هو عمل ادبي وانا من هواة ادب الرسائل والاخوانيات ماعارف ليه ؟
قد اعود لتلميحات نيازي بالكوزنة ماعارف هل يقصد شوقي بدري ام يقصدني انا ام العوض المسلمي ؟
خالد عويس عن اي بوست تتحدث ؟ رابط لو سمحت !!!
| |
|
|
|
|
|
|
|
|
|
Re: حينما يقسو شوقي بدري - محقاً - على الصادق المهدي (Re: عبدالمجيد الكونت)
|
| Quote: تصريح الصادق المهدى الاخير بان تقديم البشير الى محاكمه سيسبب فى سيل الدماء فى الخرطوم حير القريب قبل البعيد . هل المقصود هو تخويف الناس . انت نسيت يا الصادق الدماء السالت فى دارفور ودى دماء اهلك وجدودك . وكان معاها اغتصاب وحرق وترويع . وكمان نسيت تكلمنا دماء منو الحتسيل فى الخرطوم . ومنو الحيتسبب فى اساله الدماء . |
اخونا وهبة
الفرق واضح بين تقديم البشير الى محاكمة ( والمعنى هنا المحاكمة بصورة مطلقة ) وتصريح الصادق المهدي بشأن الجنائية الدولية ورغم أنني من أنصار ان يسلم البشير الى الجنائية الدولية الا ان الصادق المهدي لم يرفض محاكمة البشير بل رفض محاكمته خارجيا وموقف حزب الأمة هنا واضح وهو يرى ان تسليم البشير في حينها وحتى الان سيدخل البلاد في ورطة ومشاكل اكثر تعقيدا ولكن محاكمته وفق قضاء داخلي نزيه هو المطلوب
دعك عن الصادق المهدي وموقفه من الجنائية انشا الله يعمل للبشير ده تمثال
انت البشير زااااااااتو والمؤتمر الوطني ما قبلوا بالمحكمة الهجين ووافقوا عليها
الغرض مرض وكاتب المقال صاحب غرض نسأل الله يشفيه اما انت يا اخ عبدالوهاب فيا ريت تورينا هو محق في ماذا حتى نستطيع ان نناقشك ان كنت تريد ذلك
| |
|
|
|
|
|
|
|
|
|
Re: حينما يقسو شوقي بدري - محقاً - على الصادق المهدي (Re: عبدالمجيد الكونت)
|
اخوي وهبة
مسكاقمي
صاحبك دا كان بيكتب معانا هنا خرمجاتو دي
وكان عضو هنا
ولمن طلعنا كل كلامو فشوش وما ليها طعم ولا رائحة ولا نكهة
قام عمل فكيك
الزول دا ما عندو موضوع وعامل فيها عارف اي حاجة
وبيحكي عن حاجات كأنها قديمة بس نحن حاضرنها وناقشنها
ولمن كان بيجي يكتب عن الخرابيط بتاعو كنا بنقول ليه نحن حاضرين
ولمن لقى مافي طريقة يفكها هنا عمل زغبير
انا بستغرب لمن يقولوا ان شوقي بدري مؤرخ وكاتب
غايتو السودان دا فيها جنس حاجات
| |
|
|
|
|
|
|
|
|
|
Re: حينما يقسو شوقي بدري - محقاً - على الصادق المهدي (Re: عبدالوهاب علي الحاج)
|
الأخ العوض المسلمي
البوست المعني هو بوست المناظرة بين حزب الأمة والمؤتمر الوطني، تجده في الصفحة الأولى لهذا المنبر. لا يمكن لعاقل أن يصدق أن هذا البوست مفتوح لغرض (أدبي)، فالتوقيت ليس توقيتا أدبيا، وهو بوست مقصود لتشتيت الكرة !!
المعركة الآن واضحة، ولا سبيل لادعاء الاستقلالية بين (الشمولية) و(الديمقراطية)، خضنا وسنخوض - حتما - في نقد كل أحزابنا السياسية، لكن نقدها في هذا الوقت يصب في مصلحة طرف واحد فقط ولا يقبل الجدال. أي تشكيك في هذه القوى التي تنشد الديمقراطية الآن يعد ضربا من ضروب دعم المؤتمر الوطني سرا وعلانية.
لذا قلنا بوضوح إن من يرغب في الدفاع عن المؤتمر الوطني فليأتنا وراء (وادي بوست المناظرة)، ولا يحتمي بالاستقلالية المزعومة.
| |
|
|
|
|
|
|
|
|
|
Re: حينما يقسو شوقي بدري - محقاً - على الصادق المهدي (Re: خالد عويس)
|
الاخ العوض المسلمي | Quote: فالتوقيت ليس توقيتا أدبيا، |
مين القاليك البوست دا بالتوقيت الادبي
البوست دا مفتوح بتوقيت قرينتش 
وبعدين يا العوض المسلمي منو القاليك دا مقال
انت يا العوض ما بتعرف المقالات ولا شنو ؟ 
_____
شوقي بدري عندو مقال بعنوان "كنكوج الامام" برضو بكشف المستور من المهدي ولحدي الامنجي بشرى الصادق
انا ما جبتو ولا بهمني انا ما مهتم بكل كتابات شوقي بدري ولا كل ما يُكتب عن الصادق المهدي انما مهتم بادب الرسائل كما نوهت فوق
الرد دا للعوض المسلمي ولعبدالمجيد الكونت مع بعض ....
ولعناية السادة القراء ساقوم بنشر رسائل قمة الروعة في اناقة العبارة وجمال المفردة وحرية الفكرة
بين الشاعرين محمود درويش وسميح القاسم وكنا زمان بننتظرها بفروغ الصبر على صفحات مجلة اليوم السابع الاسبوعية في الثمانينات فهلمواااا
| |
|
|
|
|
|
|
|
|
|
Re: حينما يقسو شوقي بدري - محقاً - على الصادق المهدي (Re: محمد البشرى الخضر)
|
Quote: حليلك يا وهبة
بقيت تضاير بدري بدري |
ود البشرى ياعمك
حصل سمعت باغنية خلف الله حمد البتقول:
اعاين فيهو واضحك وامشي واجيهو راجع
بالتوزيع الجديد ؟
البوست دا فعلا القصد منو ادبي
لكن كان هبش في زول حتة حساسة
وداير توضيح لاي جزئية في الرسالة اعلاه بنوقعو ليو
مع المزيد وخالك بشتغل بي (ملتي تايمنق)
يعني بكلو بالتوقيت الأدبي بقرينتش بين الشوطين اي حاجة
اها قصرت معاكـ
_____________
بالمناسبة يا العوض المسلمي
كنكوج الامام هنا يامعلم
| |
|
|
|
|
|
|
|
|
|
Re: حينما يقسو شوقي بدري - محقاً - على الصادق المهدي (Re: عبدالوهاب علي الحاج)
|
Quote: الزول دا ما عندو موضوع وعامل فيها عارف اي حاجة
وبيحكي عن حاجات كأنها قديمة بس نحن حاضرنها وناقشنها
ولمن كان بيجي يكتب عن الخرابيط بتاعو كنا بنقول ليه نحن حاضرين
ولمن لقى مافي طريقة يفكها هنا عمل زغبير |
الحبيب حمزاوي
مسكاقني
يا اخي ظلمت الراجل ظلم كبير
هسي الرسالة الفوق دي الما صاح فيها شنو ؟
دي رسالة بتتكلم عن حقائق تاريخية باسلوب أدبي متفرد
انا غايتو عجبتني طريقة الكتابة
وتحياتي
| |
|
|
|
|
|
|
|
|
|
Re: حينما يقسو شوقي بدري - محقاً - على الصادق المهدي (Re: السيد المسلمي)
|
مازلت أبحث عن تفسير عن حالة " الغيرة والحسادة " التي تتملك الأستاذ شوقي بدري عندما يتحدث او يتناول سيرة الصادق المهدي .
هل هو مركب نقص هل هي عقدة من حادث ما في فترة الطفولة والحياة في ام درمان ؟ أم هي مجرد هوس سيكولوجي كثيرا ماينتاب الذين يبحثون عن تلميع اسمائهم برمي الآخرين من الأعلام .
ورغم كون نصفي رباطابيا فإن ذلك لايمنعي من اعتبار التجني المستمر على الصادق المهدي من قبل شوقي بدري يعتبره كثير من أسرة بدري العريقة تجنيا على تاريخ الأسرة بأكثر من كونه تجنيا على الصادق المهدي .
هل يفسر لنا الأستاذ شوقي بدري مباشرة أو بالوكالة عن سر استهدافه المستمر عن طريق الحكايات والونسات المشكوك في صحتها والمطعون في دقتها سر هذا الاستهداف الذي لايعيب الصادق المهدي صاحب التاريخ الناصع والمشرق حاكما ومعارضا بل يعيب من يحاولون تركيز الأضواء على انفسهم باستهداف واهي؟
هل من مجيب
هل من مجيب
حسن
| |
|
|
|
|
|
|
|
|
|
Re: حينما يقسو شوقي بدري - محقاً - على الصادق المهدي (Re: عبدالوهاب علي الحاج)
|
السيد حسن الحسن
تحياتي | Quote: هل يفسر لنا الأستاذ شوقي بدري مباشرة أو بالوكالة عن سر استهدافه المستمر عن طريق الحكايات والونسات المشكوك في صحتها والمطعون في دقتها سر هذا الاستهداف الذي لايعيب الصادق المهدي صاحب التاريخ الناصع والمشرق حاكما ومعارضا بل يعيب من يحاولون تركيز الأضواء على انفسهم باستهداف واهي؟ |
شوف يا أخي الكريم أنا شخصيا لا أمارس السياسة ولا داخل في شبهة منافسة مع الصادق المهدي أو غيرو وبالتالي لا تنتابني اي مشاعر غيرة او حسد وحلافو مما تفضلت به.
لكن وين الونسات المشكوك في صحتها هنا؟ هل قتل اكثر من 1000 جنوبي ووضع عشاري وبلدو في السجن ونسات مطعون في دقتها ؟ هل مصادرة المطبعة ونسات ؟
هل ضرب النائب بالعكاز المدون في مضابط الجمعية التأسيسية برضو ونسات ؟ هل تسليح المراحيل والمليشيات ونسات ؟ ياراجل اتق الله !!
أما تصريحاتو بشأن حملة د.خليل العسكرية التي أباحها لنفسه وأنكرها على غيره في تناقض يُحسد عليه موجودة على هذا الفيديو في هذا الرابط .
بس انت تعال ورينا وين التاريخ الناصع والمشرف حاكما أو أقول ليك حاجة تعال ورينا حاجة واحدة بس تُحمد له ناهيك عن الاشراق الاتحدثت عنو !! الصادق المهدي الشخص الوحيد الذي تآمر على وزير وضيّق عليه لا لسبب سوى أنو زول نظيف وسياسته اتضاربت مع مصالح تجار حزب الامة - ابو حريرة - ولا كلامي دا برضو ونسة .
عمل شنو الصادق في آخر حكومة انا اقول ليك انجازاتو :
1/ نقل رفات الامام الهادي الى امدرمان
2/ تعويضات آل المهدي
3/ محاكمة سدنة مايو
والقضايا المهمة والمصيرية كلها كانت حبيسة الادراج لا ناقش قضية تهميش ولا فاوض لوقف الحرب في الجنوب ودي ممكن تسميها غيرة سياسية لأن الميرغني هو صاحب المبادرة وهو طبعا وكالعادة يريد ان ينسب الفضل كله له وحده لا شريك له .
أما تاريخو المشرق وهو معارض دي مثيرة للضحك او الابتسام ان اردت الدقة .
ايه كان دور الصادق في احداث شعبان 73 ؟ غير انو قال ليهم Keep hot لحدي ما كتب ليها الفشل وجود حزب الامة كان سيحدث تغيير .
وقبلها تسليم السلطة للفريق عبود
وحركة 76 بعد ان تحركت القوة في اتجاه الخرطوم ومحاولته لسرقة مجهود باقي التنظيمات المشاركة (الاخوان + الاتحاديين ) وقوله بالانجليزي : They are going to build Mahadiya State النصيحة لله دي كانت اول وآخر مرة المرحوم د. عمر نورالدائم يوحه كلام ينتقد فيه الصادق وقال له - بعد ان احس بالحرج امام الشريف حسين الهندي - دا كلام شنو ياسيد صادق .
وأسوأ من الصادق المهدي ياعزيزي حسن الحسن دائما وأبدا المثقفين الانتهازيين الذين حوله تجمعهم وتفرقهم المصالح بدون فكر معروف وواضح سوى انو ابن المهدي واي واحد من الحايمين حوالينو ديل احسن منو مليون مرة .
______________
الصادق المهدي لا يحتاج في آخر عمرو دا غير شوية مايكات عليها بعض شعارات المحطات العالمية ويقفلوهو في اوضة ويخلوهو ينضم ويحلل وينبغي ولا ينبغي وهلمجرا وادغام بغنة . خلاص قرفنا
| |
|
|
|
|
|
|
|
|
|
Re: حينما يقسو شوقي بدري - محقاً - على الصادق المهدي (Re: عبدالوهاب علي الحاج)
|
ونسيت حاجة مهمة اقولها ليك يا سيد حسن الحسن
أيه دور آل المهدي في رفع مستوى الوعي لمناطق الولاء التقليدي لهم في كرفان ودارفور والنيل الابيض ؟ ايه القدموهو آل المهدي الغارقين في النعيم من اغداق المريدين عليهم لمناطق التهميش ؟
ام ان ارتفاع مستوى وعيهم يتناسب عكسيا مع الولاء . هل سألت نفسك ليه حزب الامة كانت نتيجتو Nil في دوائر الخريجين في انتخابات 86 ؟
ليه حزب الامة فرصو ضعيفة في الفوز بالدوائر الجغرافية في العاصمة والمدن عموما وهو من اعرق الاحزاب وصاحب اكبر قاعدة جماهيرية ؟ ليه الصادق المهدي اترشح من الجزيرة ابا في 86 وليه باقي الاسرة الكريمة اتجهوا للاقاليم لضمان الفوز ؟
حكمة الصادق المهدي :
غيب وعي تابعك ينتخبك
والله اكبر ولله الحمد
هلال وحربة
| |
|
|
|
|
|
|
|
|
|
Re: حينما يقسو شوقي بدري - محقاً - على الصادق المهدي (Re: Yassir Tayfour)
|
Quote: أمين خال حمور بتكلّم معاي طوالي، وطوالي فالقني، ياخ وهبة ده عميق، عميق جداً، لما انا ذاتي خفت أغرق في محيطو..
|
زي ما بتقول الحجه (الله يطراها بالخير) : كضب السواد !!!! 
علاقتي بلمدعو ياسر طيفور تنتهي بانتهاء مراسم إغلاق هذه الاله اللعينه ، إذ لم يحدث أن تحادثنا أو تهاتفنا أو تماسنجرنا أو تاملنا !!! و كل من يدعي غير ذلك عليه بالاثبات !!! هذا من ناحيه !!!
من ناحيه أخري والدي العزيز عبد الوهاب علي الحاج من أعمق الناس في هذا المكان !! شاء من شاء و أبي من أبي !!
لا يجرمنا شنانه لسيد الصادق - غير محقا - في هذا البوست من أن نشهد له بل(عماغه ) !!!
*******
غايتو قصة أولاد امدرمان ما بتغشو من أولاد الأقاليم دي شوقي بدري بالغ فيها !! ما أهو ده ياسر طيفور و الطريفي بغشو فينا صباح مسا !!
| |
|
|
|
|
|
|
|
|
|
Re: حينما يقسو شوقي بدري - محقاً - على الصادق المهدي (Re: أمين محمد سليمان)
|
شوقى بدرى (مونساتى ) كبير ..واهلنا فى الجزيرة يقولوا ليك الزول
دا حكاى ..يعنى زول ماصادق ...اسى بالله الكلام الفوق دا عندو توصيف
اكتر من انو (ونسة) و(طق حنك) لااكثر ولااقل ..ماتجوا تحدثونا عن
معرفة شوقى بدرى بالتاريخ والتوثيق وغيرو...علاقة شوقى بالتاريخ
زى علاقتى بعلم الهندسة الوراثية ...طبعا الزول البقرا الكلام دا
بفتكر انو الراجل كان متابع وكان قريب من موضوع الاحداث ..مرة اتكلم
عن عبدالرحمن على طه واربجى ..وخلاف عبدالرحمن على طه مع الصادق المهدى ..
طبعا لو زول مامتابع يقطع الشك انو الناس ديل كان بينهم ماصنع الحداد ..
والله تصدقوا الكلام كلو تلفيق ساكت وخيالات وامانى ...قلت اصلو عم شوقى
دا مابخليهو الا يجى يعتذر ..وبقيت ارفع فى البوست قريب شهر ماجانى منو
توضيح او اعتذار ..عمل رايح ...فبالله فكونا من القصص المعلقة دى ...
دا فلم دخلناهو مائة مرة ...كلها فلان قال وفلان عمل ..والغريبة مرات يتكلم
عن موتى ويحكى عنهم قصص وروايات تكون سبب اذى لاهلهم ....والمتضررين
من شوقى بدرى كتار ..لذلك كلمو عمنا شوقى وقولوا ليهو رمى الكلام بدون
اسانيد واثباتات ماصاح ..وحتى مرات فى قصص باسانيد واثباتات مافى
ليها داعى طالما اصحابها اصبحوا فى ذمة الله ...
| |
|
|
|
|
|
|
|
|
|
Re: حينما يقسو شوقي بدري - محقاً - على الصادق المهدي (Re: محمد عبدالرحمن)
|
الاخ السيد المسلمي
اضحك الله سنك
د. سيف النصر Quote: البلد بلدنا
و نحن اسيادها. |
الله يسألك يا دكتور دي ونسة
ومال الجريمة كيف من وجهة نظرك الماركسية البحتة
ياخ كلمة نحن اسيادها بلشفت الدنيا دي زمن طويل
ولا شنو ؟
اب تفة والخال امين
جابت ليها عماغة كمان
قال عميق قال
انت صدقت انو اولاد امدرمان مفتحين ولا شنو ؟
اشهد انكم ما اتيتم لحوار | Quote: غايتو قصة أولاد امدرمان ما بتغشو من أولاد الأقاليم دي شوقي بدري بالغ فيها !! ما أهو ده ياسر طيفور و الطريفي بغشو فينا صباح مسا !! |
| |
|
|
|
|
|
|
|
|
|
Re: حينما يقسو شوقي بدري - محقاً - على الصادق المهدي (Re: ود محجوب)
|
حبيبنا المستشار ود أحمد الأمينQuote: ** وبمناسبة توجهك نحو فن الرسائل الادبيه التاريخيه للدوله السازونيه ومن ثم سوف تتجه الى الرسائل الادبيه العالميه ,, لذلك صدرت توصيه من البحراويين بترشيحك لجائزة :-
## الزرافه والشرافه (وهى تُعادل جائزة نوبل) ,, تسليم هذه الجائزه يتم فى الكرين .. |
يا حبيبنا اي هدية من بحراوي
مافي شك بتملأ العين وتفضل
مشكور اخوي على المرور
ودام الود بيننا
حبيبنا د. ود محجوب Quote: ما ترحموا يا ياسر
نزلوا الماسنجر على طول
اصلو خال حمور دا نكار |
والله جماعتك ديل الاتنين
ما في واحد فيهم بتخير عن التاني
هسي دي تلقاها مؤامرة ضدي تصدق ؟
ديل الاتنين اصحاب محمد E سليمان
خبير الألغام والكمائن
| |
|
|
|
|
|
|
|
|
|
Re: حينما يقسو شوقي بدري - محقاً - على الصادق المهدي (Re: ود محجوب)
|
Quote: ما ترحموا يا ياسر
نزلوا الماسنجر على طول
اصلو خال حمور دا نكار |
يا ود محجوب ، ياسر ما يقدر !!!
ماسك عليه حاجات و مسجل ليه تلفونات و قاعد ليه علي الهبشه !!
*******************
Quote: والله جماعتك ديل الاتنين
ما في واحد فيهم بتخير عن التاني
|
والله يا وهبه !!
يعني أنا اشكر فيك وراك و قدامك - بلكضب - و تجي تختني في حته واحده مع ياسر طيفور ؟!!!
هشام هباني اصلو ما خاتي عليك !!!
| |
|
|
|
|
|
|
|
|
|
Re: حينما يقسو شوقي بدري - محقاً - على الصادق المهدي (Re: محمد الواثق)
|
Quote: ...اسى بالله الكلام الفوق دا عندو توصيف
اكتر من انو (ونسة) و(طق حنك) لااكثر ولااقل |
سلامات يا محمد عبدالرحمن
نحن ذاتنا قلنا كدا وعشان كدا جبناهو هنا وقلنا من باب الادب ، هو من ناحية طق حنك ... طق حنك لاكين ما كل طق حنك معناتها خارم بارم ولا رأيك شنو ؟
الرسالة دي وعلى جمالها من ناحية ادبية الكلام الوارد فيها دا كلو حقائق تاريخية ومثبتة للداير يعرف .. أما الداير يماحك ويعمل فيها ما شايف نتيجة لتغبش وعيو او لموقف يخصو دا كلام تاني .
اي معلومة واردة هنا زي ما قلت ليك عندها سند ومعروفة للجميع مثلا انو الصادق ادان حركة خليل مع انو فعل نفس الفعل يوم من الايام موجود على هذا الرابط .. حكاية انو عمرو 75 سنة وفات سن المعاش دي كانت على كل الصحف قريبات دي واحتمال انت ذاتك تكون وديت ليو دبدوب كهدية ...
اما حكاية انو احمد المهدي ضرب النائب بالعكاز راجع مضابط الجمعية التأسيسية .. ومصادرة المطبعة كلو حقيقي ومعروف شفت كيفن ؟
أما حكاية الالف جنوبي الماتوا في الضعين وحكاية بلدو وعشاري وانو عشاري كان في السجن لحظة قيام الانقلاب دي حقيقة واي زول عارفا والمعروف برضو انو عشاري ما كان مقبوض ببنقو ولا لقوهو في بيت دعارة .. عشاري سجنو الصادق الديمقراطي البتبجح هسه بمطالبة الحريات وشفافية التحقيقات وهو اكتر زول بعيد عن الديمقراطية اسأل يا محمد واعرف قبل ما تجي تنضم ساكت ...
وحكاية طرد الحزب الشيوعي انا اتحداك تجيب لي اي كلام للصادق دافع فيهو ضد الفكرة او حرك اي ساكن وانو ما اكتفى بالصمت ... الصادق لمن يكون قاعد في الكرسي بكون ما واعي وباختصار كدا يا محمد زولك دا أسوأ سياسي مرّ على افريقيا ودول العالم الثالث في الحالتين حاكم ومعارض شفت كيفن ؟ ..Quote: واهلنا فى الجزيرة يقولوا ليك الزول
دا حكاى ..يعنى زول ماصادق |
دي ياتو جزيرة القاصدها انت هنا يا محمد عبدالرحمن
هل هي جزيرة سرنديب ؟!!
| |
|
|
|
|
|
|
|
|
|
Re: حينما يقسو شوقي بدري - محقاً - على الصادق المهدي (Re: محمد الواثق)
|
حبيبنا ود محجوب Quote: يعنى الأولاد ديل شموا ......
غايتو اب تفة دا انا ما بضمنو ليك |
انت عارف اب تفة دا انا شاكي
فيهو انو من مدني شكلو كدا
حبيبنا ياخال Quote: والله يا وهبه !!
يعني أنا اشكر فيك وراك و قدامك - بلكضب - و تجي تختني في حته واحده مع ياسر طيفور ؟!!!
هشام هباني اصلو ما خاتي عليك !!! |
ياخ ان شاء الله يوم شكرنا ما يجي
وبالنسبة لهباني انت مالك مكبر منو اللفة
يعني عامل فيها ما امنجي ؟
أخونا حبيب نورة
مرحب بيك Quote: عمنا شوقي بدري دة
كلاموا ما بقع واطـة!
عفيت منو |
يازول كلامك دا بجيب ليك اللوم
ما شايف الحبايب ديل فايرين كيف ؟
الرسالة دي عبارة عن فتاشة
وشكرا على الطلة
محمد الواثق | Quote: تحال صحيفة الدعوى الى المنتدى الثقافي ما دام مقدمها قصد بها ( الأدب ) . |
ياتو نوع بتاع ادب لكن
المقصود هنا طبعا ادب المدائح
خلينا نشوفك
| |
|
|
|
|
|
|
|
|
 Re: حينما يقسو شوقي بدري - محقاً - على الصادق المهدي (Re: ود محجوب)
|
تصدق يا الرفيق ود محجوب
هذا المدعو بأمين
عندي ليهو تسجيلات لو نشرتها على الملأ، لتبرأ منه الآتية أسمائهم:
1)حمور زيادة
2)عبدالوهاب علي الحاج
3)(العوض، السيِّد، الطيِّب)المسلمي
وحتى لا تصيبني السهام التي وُجهت للترابي إثر نقله لقوالة أصابت الرئيس في مرقّص، وليس مقتّل..
___
حتى يأتي "اليوم الأسوّد"، خلوها مستورة
| |
|
|
|
|
|
|
|
|
|
Re: حينما يقسو شوقي بدري - محقاً - على الصادق المهدي (Re: Yassir Tayfour)
|
أب تفة Quote: هذا المدعو بأمين
عندي ليهو تسجيلات لو نشرتها على الملأ، تبرأ منه الآتية أسمائهم:
1)حمور زيادة
2)عبدالوهاب علي الحاج
3)(العوض، السيِّد، الطيِّب)المسلمي
وحتى لا تصيبني السهام التي وُجهت للترابي إثر نقله لقوالة أصابت الرئيس في مرقّص، وليس مقتّل..
___
حتى يأتي "اليوم الأسوّد"، خلوها مستورة |
بالله عليك خليها مستورة
المدعو أمين غرضو وهدفو محدد في هذا البوست
وهو تخريبه وحرفه عن مساره دفاعا عن ود امدرمان يعني عامل فيها بشتت في الكورة
ولكن طاش سهمه وستتواصل هذه البوستات عن ابناء امدرمان
بعد ما اخلص موضوع هذا الضلالي والانتهازيين الحولو .. حأخش على سيرة الهادي الضلالي
يعني الاضل ثم الاقل ضلالة ثم الاقل ... وهكذا لحدي ما احصل امين دا ذاتو وحاختمها بتمبس
___________
وبحري وييييييي 
| |
|
|
|
|
|
|
|
|
|
Re: حينما يقسو شوقي بدري - محقاً - على الصادق المهدي (Re: محمد البشرى الخضر)
|
Quote: | Quote: الداير يماحك ويعمل فيها ما شايف نتيجة لتغبش وعيو |
اهااااااا ...دي آخرة النقل من الفور اول ياوهبة
لسانك اتعوج وبقيت مثقف |
معقولة يا ودالبشرى ؟!!
هسي انت فرقك شنو من خالد عويص* بكلامك دا
يعني في البورد دا الواحد يكتب كلمتين
يقولوا لاطشم من الفواوول
يلبس على الله يبقى حزب امة
______________
* التصحيف غير مقصود
| |
|
|
|
|
|
|
| |
عبدالوهاب علي الحاج
osman righeem
علاء الدين يوسف علي محمد
العوض المسلمي
Abdel Aati
نيازي مصطفى
Elawad
د.محمد بابكر
محمد البشرى الخضر
Yassir Tayfour
أمين محمد سليمان
محمد عبدالرحمن
عبدالكريم أحمد الامين
ود محجوب
حبيب نورة
محمد الواثق
garjah
فيس بوك
تويتر
انستقرام
يوتيوب
بنتيريست