دعواتكم لزميلنا المفكر د.الباقر العفيف بالشفاء العاجل
|
|
 أروع ما قرأت لسجيمان على الإطلاق ..( عمود يوم أمس فى صحيفة التيار )
|
الباب البجيب الريح
نحن حكايتنا شنو بالضبط كدا؟
ناس الحمد لله.. تامين.... عندنا ايدين وكرعين واضنين.. ووشي ونخرين... وما ناقصين حاجة من خلق الله.... فينا البيفهم.. وفينا الفهمو على أدو(يا قول المصريين...)....لكن لينا زمن وزمن طويل.. شغالين صلبطة... في التاريخ وفي الجغرافيا.. وفي خريطة الجينات الوراثية.... وفي أي حاجة نحس إنها قد ترفع من قدرنا... كأنو عندنا عوجة ودايرين نضاريها بالنضم دا.. اجتهدنا وكتبنا الكتب وبحتنا وكوسنا كواسة شديدة عشان نثبت إنو جدنا العباس..... لحدي ما أي زول فينا حذّر طاقيتو.. وشال عكازو.. وقدّل في السهلة وقال جدي العباس... لو العباس عم الرسول أبو لهب برضو عماً للرسول مافينا زول بالكضب ساكت قال بيبقى ليهو.... مع إني أشك في علاقتنا بيهو. وبامرأته حمّالة الحطب..... وشوفتو نسوانا جنهن حطب كيفن؟... من طلح وشاف. ويشيلن فيهو بالشوالات واللواري تنقل والركشات تنقل والبكاسي تنقل والدواب تنقل.. وهن براهن فوق روسنن ينقلن.... أها دي حِمالة حطب واللا ما حِمالة حطب...؟ وحمالة الحطب "أروى" ما حبوبتن لينا؟......... يعني جينات المغدوب عليها مرة أبو لهب فيهن فيهن.... قالو بلال، قلنا مننا.... لكن مافينا زول قال بلال جدن ليهو... لي شنووووووو؟.... النجاشي رضي الله عنه... قالو أصلاً كان ملك السودان.... والحبشة المقصودة ياها السودان دا.... والنجاشي جدنا ....عنتر أمه زبيبة من عندنا..... البحر الرمت فيهو أم سيدنا موسى.. وهو طفل البحر الليلينا دا..شفتوهو؟... البحر الدايرين نسويهو كلو سدود دا ونقعد نحرس للمصريين مويتهم دا ياهو البحر الرمو فيهو موسى.... ونبي الله الخدر..... لاقى موسى ونضم معاهو في المقرن... المقرن الحسي قاعد دا..... وأخبرني أحد المثقفين السودانين.... وهو جاااااادي... قال لي إنت عارف ربنا كلم سيدنا موسى بجبل البركل.. جبل البركل الما بغباكم دا... قال لي كان الجبل اسمو طور... والنضم البيتقال دا كلو إسرائيليات، دايرين يبعدوهو من عندنا.... وكل ما يطلع لينا واحد.... وعاجباهو روحو.. يقول لنا خليت لكم العباس، علا الرسول جدي... جمال عبد الناصر اصلبطنا فيهو.. وقلنا أصلاً سوداني علا المعايش ودت أهلو لي مصر.... السادات أمو سودانية...... وحتى نتنياهو رئيس وزراء إسرائيل طلعانهو شايقي حافض غنية آسيا بابورك في الأراك.... اتشبكنا في كلاي.. وفي بيلية... ولما أوباما فاز.... جرينا علي كتبنا نكوس فيها.... وقدر مافي عجوز عندها ولد طافش و مطول من البلد سعلناها.... يمكن يكون أبو أوباما ياهو ولدها السافر دا.... ويطلع أوباما بيبقى لينا.... عشان نقعد ننطط ونفجط في العالم ومافي زول يسعلنا ويقول لنا تلت التلاتة كم؟... لحدي ما ظهرت حبوبة أوباما في كينيا... لكن برضو ما خليناها مشينا بحتنا وارها... وناس الحركة الشعبية الله يطراهم بالخير.. طلعوها دينكاوية.... علا برضو المعايش رمتها في كينيا.... ليه نحن ما نحاول نتصالح مع نحن... ونقبل نفسنا زي ما هي.. ونطورها.. ونجتهد بعيد من العباس وبعيد من أبو لهب.... ونبقى ناس الناس تعمل لنا حساب..... بس كان خلينا الغتاتة شوية!
قفل الباب:
بيني وبينك طقس رمادي يميل إلى المطر ..
وأنا أشتهيك تحت المطر .. وقبل المطر .. وبعد المطر..
وأستنشقك كما يستنشق الأرنب أعشاب البراري ..
بيني وبينك حالة من الشعر لم أكتبها بعد ..
وحالة من النبوءة لم أبشر بها الناس بعد ..
وحالة من الانخطاف .. تجعلني سيد الدراويش ..
|
|
 
|
|
|
|
|
|
|
 Re: أروع ما قرأت لسجيمان على الإطلاق ..( عمود يوم أمس فى صحيفة التيار (Re: Emad Abdulla)
|
انا غايتو حاسي انو عندي اصول فرنسية كدا 
ما عارف لي ابوي - الله يرحمو يسامحو - هارب من الزول الفي المراية
عشان كدا لن اعيش في جلباب ابي ..
نشوف بنطلون الخواجة كدا كيف ..
المافي شنو!؟
--------
زميلنا و حبيبنا - الله يرحمو - النذير، كنا ساكين فيزة اوروبا ايام كاس العالم 98 فرنسا ..
اها امن ابونا .. كان بردد
اصلاً انا - هو يعني ما انا - مفروض اكون فرنسي ..
اقل حاجة مفروض مصري
| |
|
|
|
|
|
|
|
|
 Re: أروع ما قرأت لسجيمان على الإطلاق ..( عمود يوم أمس فى صحيفة التيار (Re: doma)
|
Quote: ونبي الله الخدر..... لاقى موسى ونضم معاهو في المقرن... المقرن الحسي قاعد دا..... وأخبرني أحد المثقفين السودانين.... وهو جاااااادي... قال لي إنت عارف ربنا كلم سيدنا موسى بجبل البركل.. جبل البركل الما بغباكم دا... قال لي كان الجبل اسمو طور... والنضم البيتقال دا كلو إسرائيليات، دايرين يبعدوهو من عندنا)
لوووووووول برضوا ما بتخلوا السلبطه جبل موسي بقي جبل البركل
يا سجيمان بشاشا كلامه جاب دخل
|
يا دوما ..لو خلوا السلبطة ما بيبقوا سودانيين لووول ..
لكن برغم السلبطة الوعى تطور شديد ..وفعلا الأبر الكوشية جابت نتيجة .
| |
|
|
|
|
|
|
|
|
|
Re: أروع ما قرأت لسجيمان على الإطلاق ..( عمود يوم أمس فى صحيفة التيار (Re: عمر ادريس محمد)
|
آمونه سلامات
وزي ما قالت دوما يبدو ان بشاشا آخير دروسه بدأت تثمر كما يبدو
(هههههههههه)
Quote: البحر الرمت فيهو أم سيدنا موسى.. وهو طفل البحر الليلينا
دا..شفتوهو؟... البحر الدايرين نسويهو كلو سدود
دا ونقعد نحرس للمصريين مويتهم دا ياهو البحر الرمو فيهو موسى |
الا اخونا سجيمان لم يستطع الخروج من غضبته كرباطابي من السدود
التي مست اهله المناصير و الرباط...(وجه غامز لسجيمان العامل انقاذي وصامت
عن حق اهله المناصير)
| |
|
|
|
|
|
|
|
|
|
Re: أروع ما قرأت لسجيمان على الإطلاق ..( عمود يوم أمس فى صحيفة التيار (Re: Tragie Mustafa)
|
Quote:
انا غايتو حاسي انو عندي اصول فرنسية كدا
ما عارف لي ابوي - الله يرحمو يسامحو - هارب من الزول الفي المراية
عشان كدا لن اعيش في جلباب ابي ..
نشوف بنطلون الخواجة كدا كيف ..
المافي شنو!؟
--------
زميلنا و حبيبنا - الله يرحمو - النذير، كنا ساكين فيزة اوروبا ايام كاس العالم 98 فرنسا ..
اها امن ابونا .. كان بردد
اصلاً انا - هو يعني ما انا - مفروض اكون فرنسي ..
اقل حاجة مفروض مصري |
بونجور مسيو قيقراوي يا الهارب من الزول الفى المراية .
بطل سلبطة يا سلبااااااط ..
أهو شيخ السلباطين فى المنبر بدا يفوق ..
| |
|
|
|
|
|
|
|
|
|
Re: أروع ما قرأت لسجيمان على الإطلاق ..( عمود يوم أمس فى صحيفة التيار (Re: AMNA MUKHTAR)
|
Quote: العزيزة امنة كيفك..
عندنا صاحبا لينا ايام الجامعة كلما يجد حاجة تعجبو يقول والله الطب اتطور..
يبدو انو في الحتة دي برضو في تطور طبي كبييييييييييييييييييييييييييييييييييييييييييييير حسب ما اسمع عن ما كانه دكتور سي جي مان |
الطب تطور شددديد ..
والفضل للعلاج بالأبر الكوشية .............:)
...................
غايتو سجيمان دا طبيب متخصص فى الكدايس ..
| |
|
|
|
|
|
|
|
|
|
Re: أروع ما قرأت لسجيمان على الإطلاق ..( عمود يوم أمس فى صحيفة التيار (Re: Tragie Mustafa)
|
امنة ازيك
| Quote: وجه غامز لسجيمان العامل انقاذي |
عملتيني خلاس يا ترجرج.؟؟؟؟؟..... انت اصلك من زمااااااااااان بيتحوتكي* بي جنبي عشان تعمليني كدي.....لكن الله بيسعلك يوم الموقف العظيم.......وحات الله انا مليان سئيات اصلو ما بعفى لي زول بعدين!!!!!
واصلو منبر بكري دا كل شهر قاعد يغتس لو حجر زول!!!!
*تحوتكي...اي تحومي حول..... المرأة حوتاكة...والرجل حوتاك....رجال حوتاكين..ونساء حوتاكات....
وكدايس حوتاكة......
والله لوما خايف من ناس النظام العام كنت جبت كديستي معاي......
| |
|
|
|
|
|
|
|
|
|
Re: أروع ما قرأت لسجيمان على الإطلاق ..( عمود يوم أمس فى صحيفة التيار (Re: بلدى يا حبوب)
|
العزيزة آمنة سلامات
اسمحي لي أنت و د. سجيمان وبقية القراء أن اختلف معكم نوعا ما
كلامكم هذا يتجاهل دور الاسطورة البالغ الأهمية في التاريخ والأديان وتصور الهويات لدى الشعوب وفي التعليم ونظم الأخلاق والقيم
وفي تفسير الظواهر الطبيعية قديما وفي تصور علاقة الإنسان بالكون والطبيعة وبأخيه الإنسان
بهذه المناسبة إن قصة آدم وحواء وفيضان نوح وغيرها من القصص الإسلامي موجودة قبل الإسلام في الحضارات السومرية والمصرية
هذا على سبيل المثال لا الحصر.
الدولة اليهودية ذات الستة ملايين المدوخة أكثر من مليار مسلم وعربي كلها قايمة على اساطير يهودية،
أكبرها أسطورة شعب الله المختار، رب الجنود المحارب الشرس في صف إسرائيل والمجتبي للشعب الإسرائيلي دون غيره والمنحاز إلى الإسرائيليين ضد كل الأميين أي بقية الشعوب غير الشعب اليهودي
الحضارةالغربية قائمة في جزء كبير منها على الأساطير اليهودية والمسيحية ثم أسطورة تفوق الرجل الأبيض ورسالته الحضارية
مامن قبيلة وشعب في السودان وفي العالم إلا وله أساطير عن أجداده
فيا أخوانا لماذا تحرمون على السودانيين أن يتصوروا أن موسى - الذي تذهب دلائل تاريخية قوية إلى أنه كان نوبيا، كما كان لقمان الحكيم وغيرهما- كان سودانيا. وإذا أخذنا بالاعتبار بحوث الشيخ أنتا ديوب (الماهو سوداني) وكذلك بحوث عدد من علماء الآثار بأن الحضارة المصرية أصلها سوداني أو أفريقي، خلونا كمان نمدد الحكاية شوية ونتصور ونصدق أنه موسى والخضر التقوا في مقرن النيلين، إيه يضيرنا وإيه إضير العالم؟؟
إن ذلك يشعرنا بأننا أعظم من المصريين، ونحن في الحقيقة أعظم منهم، دي ما فيها كلام (وجه باسم).. وأعظم من الأمريكان أنفسهم، ولا شنو؟؟ ما في شعب في الدنيا ما متصور نفسه بأنه أعظم شعب. وإلا دا شعب برضى بالهوان.
الأساطير دي يا أخوانا بتقوي إيمانا بأنفسنا وترفع روحنا المعنوية للسماء في زمن الإحباط دا.
كمان قصة هجرة الصحابة للسودان بدلا من الحبشة التي أراد أن يثبتها البرفسور العظيم الراحل عبد الله الطيب، رغم أنها أقرب إلى الخيال من الواقع، برضها أنا عجبتني. هو أصلو أولى بالنبي والصحابة نحن المسلمين البلدنا كلها مليانة قباب وأضرحة أولياء ومديح للنبي صباح مساء ولا الحبش النصاري؟؟؟
الإيمان بالأساطير دي ما عايازنو يجلعنا متكبرين ومتجبرين زي اليهودوالأمريكان ولا كضابين ونفاخين زي المصريين، اللي كل واحد منهم متصور نفسه فرعون إزاء الإنسان السوداني..
أبدا، عايزنها بس تخلينا نرجع ونتمسك بقيمنا النبيلة الأصيلة اللي كانت تخلي بعض الناس في الخارج يتساءولوا: السودانيين ديل ملائكة ولا أنبياء ولا بشر؟؟. هذه روايات سمعتها بأضاني دي. وحتى لو كانت أحاديث آحاد برضو عندها دلالة.
لما بطلنا نعيش على أساطيرنا القديمة ديك، انحطينا للمستوى النحن عليهو الآن.
أنا بهذا اعني الإنسان السوداني العادي اللي ما عندو في السياسة ولا الثقافة ناقة ولا جمل. ذلك الإ نسان السوداني في كل مكان، في الشمال والجنوب والغرب والشرق كان إنسانا متميزا.
المسخ اللي حصل للإنسان السوداني بسبب التعليم النظامي المطرطش، الما قايم على قيم، وبسبب المذاهب السياسية والغزو الأيديولوجي من الخارج عن بوابة مصر، أعتقد أن التمسك بتلك الأساطير وتصديقها مما يعيننا على التخلص منه.
خلينا عندنا عقل نقدي يميز بين الأسطورة وقيمتها الرمزية وبين التصديق الأعمى بحرفيتها. هناك فرق شاسع.
السودان أنجب أعظم حركة مهدية في التاريخ وأبعدها آثارا، حتى ولو أنها تحولت من حركة وطنية ضد الأستعمار إلى فتنة داخلية مدمرة في الآخر ثم إلى خازوق سياسي ما زلنا نعاني منه حتى اليوم.
السودان كان فيه اقوى حزب شيوعي، أو أكثر الاحزاب الشيوعية تأثيرا في محيطه، في الشرق الأوسط وربمافي العالمين الإسلامي والعربي
والأفريقي. والسودان أول قطر عربي إسلامي (خلينا نقول "زعما" يا آمنة ويا تراجي) تصل فيه حركة الإسلام السياسي إلى الحكم، ما خلا إيران الشيعية. ومن نعم الله على السودان أن الإسلاميين قفزوا إلى السلطة عن طريق انقلاب فدمروأ أنفسهم مثلما دمروا البلد، وكان يمكن أن يصلوها عن طريق الانتخابات، فأهدروا فرصتهم في الربيع العربي الذي جاء متأخرا. ربما نكون يا دون ما شين نجرب حكم المتأسلمين زي بقية الأقطار، وبقية الأقطار لها ظروفها المختلفة عنا وقدامنا لسع عشرين سنة لنعرف المتأسلمين على حقيقتهم.
وكان عندنا الأستاذ محمود محمد طه الذي بشر منذ الخمسينات بأن السودان سيكون مركز دائرة الوجود، وحذر من أن يستهول الناس ذلك القول لكون السودان جاهلا خاملا ومتخلفا، لأن الله قد حفظ على أهله من أصائل الطبائع ما سيجعلهم نقطة التقاء الأرض بأسباب السماء في عهد إنساني جديد.
خلونا نؤمن بالبشارة أو الأسطورة الأخيرة دي، وشوفوا حانصل لي وين؟؟؟
ولا أنسى أن أوصيكم بأن تؤمنوا بكل ما ذهب إلى تنفيده سجيمان ووافقته عليه آمنة وبقية المتداخلين...
قولوا لي بس حا نخسر إيه؟؟؟؟؟؟؟
| |
|
|
|
|
|
|
|
|
|
Re: أروع ما قرأت لسجيمان على الإطلاق ..( عمود يوم أمس فى صحيفة التيار (Re: b_bakkar)
|
يا سلااااااام عليك يا صديقي العزيز واستاذي الكبير بشير بكار فتعليقك والله ينهض وحده ليشكل مقالا
دسما مملوء حد الدهشة بالتأريخ العبق وبالجغرافيا السودانية وبالأسطورة والفنتازيا ايضا ليربط الواقع الحزين الماثل بالخيال اللذيذ المنعش لقيم الوطنية ومحبة الوطن!
شكرا أ. ىمنة مختار وتحية خاصة لصديقي سجيمان وهو ليس كذلك وانما هو يسعى بين الناس كلقمان الحكيم والذي يقال بانه نوبي من اندينا والذي جاء من عبري (ولقمان العبري الخالص كان يوزع حكمته مثل حكيم نوبي آخر يرتشف العرق الأبيض منتشيا ويغني للفجر الحالم بالطمنبور) +مقاطع من ملحمة الوطن!
| |
|
|
|
|
|
|
|
|
|
Re: أروع ما قرأت لسجيمان على الإطلاق ..( عمود يوم أمس فى صحيفة التيار (Re: b_bakkar)
|
غايتو انا مما شفت المغال دا
قلت حاجةآمنة الليلة شرطا قايمة على سجم الرماد الليلنا دا
ولي هسع ماني مقتنع بي كلامها القالتو فيهو دا
يعني مايرقد قفا
والله يا سجمان تكتر تذبل الا يلحقوق الجماعة الطيبين.
]
| Quote: عن حق اهله المناصير |
ابدا قال لك انا منصوري ياتراجي؟
اها اكان راجل بصح اليجي هنا يقول انا منصوري كان ما كلمت لو العوض ود مصطفى البعرفو براهو[/B
| |
|
|
|
|
|
|
| |
AMNA MUKHTAR
أمين محمد سليمان
Nasr
Emad Abdulla
قيقراوي
عمر ادريس محمد
doma
صديق الموج
محمد عبد الماجد الصايم
Tragie Mustafa
سجيمان
ASHRAF TAHA
بلدى يا حبوب
MOHAMMED ELSHEIKH
عبدالرحيم أبراهيم العبيد
فيس بوك
تويتر
انستقرام
يوتيوب
بنتيريست