|
|
 فكي موديل حديث جدا
|
أحمد الملك
فكي موديل حديث جدا
فصل من رواية تحت الانشاء
مات الشيخ النور ود حمدان، طوال سنوات كان يمثل للقرية سلطة دينية علاجية، وكان من النادر ان يحتاج أي من اهل القرية الي خدمات الطبيب حيث المستشفي الذي يقع علي بعد حوالي عشر كيلومترات ويمكن الوصول اليه عن طريق المواصلات القادمة من مدينة ارقو او عن طريق الحمير، كانت وفاة الشيخ متوقعة منذ عدة اشهر وهو يعاني غيبوبة شبه يومية كما ان هلوساته العلاجية باتت جزءا من الاوهام اليومية فقد لاحظ الكثيرون انه كان يخلط بين اعراض الأمراض وانه قدم وصفات علاجية لعلاج امراض اخري، فشفي الناس من السعال الديكي قبل حتي ان يصابوا به، وشفوا من التهاب الكبد الوبائي رغم انه لم تسجل ولا حالة اصابة واحدة به في القرية، طوال قرن كامل، تم الدفن في يوم قائظ في شهر اغسطس، كان الزين ود الحاج هو احد الذين طلب منهم الذهاب الي المقابر قبل وصول الجثمان للإشراف علي حفر القبر، وجد مجموعة من الشباب يقودهم الطاهر ود ابراهيم يقومون بالحفر وفجأة لمح شاهد القبر الذي كان الشباب يحفرون بجواره : هنا قبر المرحوم عبد الرحيم الزين، صديقه الذي انتقل فجأة الي العالم الاخر تذكر ايام صداقتهما الغابرة ولحظة ابلاغه بخبر وفاة صديقه عبد الرحيم كان مخمورا حتي انه لم يستطع فهم الخبر وضحك هازئا من الطاهر ود ابراهيم الذي نقل اليه الخبر، في تلك اللحظة حينما رأي شاهد القبر استطلع للمرة الاولي البعد الكوميدي للمأساة فقال :
والله رقد رقدة ! عليك امان الله يكون في الساعة دي مزنوق زنقة كلب في طاحونة، الجماعة حيسألوه ليك العرقي الشربو، ويوم مشي معاي الانداية والبنت التي ضاجعناها، يمين يكون هاري هرار! .
وضحك الطاهر ود ابراهيم وقال : يعني انت فاكر اليوم دة ما جاييك ولا شنو، اخير ليك يا الزين بعد دة تستعد العمر فات، فقال الزين : صحتي زي الحصان وانشاء الله انا اللي ح احفر قبرك يا حلاق الحمير، الا ورونا مين حيخلف الشيخ ،
والله يقولو عندو ولدا كان طافش في بورسودان ويمكن يجي يستلم مكان ابوه، لكن الناس خايفين
- ليه خايفين؟
قالوا ولد خايب بتاع نسوان وكمان ما يقدر ينوم لو ما شرب العرقي ! غايتو يمكن ينفع معاك يا الزين !
وضحك الزين وقال : يا زول دة فقير موديل حديث جدا !
وقالوا ابوه زمن طويل ما كان راضي عن افعاله بالليل سكران وبالنهار نايم، حتي ما كان يحب انه يقعد معاه في الاكل ومرة كان في ضيوف مع ابوه، وجاءت صينية الغداء ولم يستطع الاب طرد ابنه من الاكل حتي لا يشعر الضيوف بشئ فأمسك بالليمون وعصر في الاكل كله حتي فوق الكستر وكان الابن يكره الليمون فترك الاكل ثم سافر بعد أيام وانقطعت اخباره فترة طويلة .
وقال الطاهر ود ابراهيم وهو يمسح العرق والتراب من وجهه بعد ان فرغ القبر: واها لغاية ولد الشيخ ما يجي حنعمل شنو ورمضان داخل حنعيش في فراغ دستوري زي ما بيقولوا في الراديو! فقال النور ود بابكر : فراغ ليه ما عندك شيخ الصاوي وشيخ بدر!
ضحك الزين وقال شيخ الصاوي ما سمعتو قال شنو لزينب بت النور لامن مشت تسأله حل لي جري زوجها حسين ود بابكر ورا النسوان، عارف قال ليها شنو؟ قال ليها وعرفتي كيف انه قاعد يمشي لنسوان تانيين قالت ليه حمامو كتر كلما يرجع البيت يدخل ياخد حمام.
سألها وهو قعد يجيك بالليل عادي نقص عليك حاجة؟ قالت ليه قاعد يجيني عادي وما منقص أي حاجة ! فقال لها طيب الحسادة العليك في شنو؟ انشاء الله يمشي لنسوان الدنيا كلهم انت مالك وكت ما مقصر معاك!
ضحك النور وقال : هو الحاسد يحسد حتي اخوه شيخ بدر، حكت لي نفيسة بت ود الماحي قالت مرة مشيت مع نسوان ضيوف وديتهم لي شيخ بدر ايام مرض الشيخ النور ود حمدان ومعروف ان شيخ بدر عالج مشاكل النسوان اللي ما قاعدين يلدن رغم انه هو نفسه لم يلد رغم زواجه من ثلاث نساء،وفي طريقنا مرينا بشيخ الصاوي لقيناه قاعد امام البيت : نادانا قال لي تعالي يا بت ود الماحي انتي لسع رافعة نخرتك في السماء متل ابوكي قلت ليه اوعاك تجيب سيرة ابوي ابوي كان ارجل زول في البلد دي كلها، قال ما قلنا حاجة سايقة النسوان ديل واداهم وين، قالت له واداهم لشيخ بدر ، فوجه كلامه للنسوان معي : تسون شنو عند شيخ بدر ؟
فقلن له : دايرنو يدينا الجنا ! فقال : هو كان لقي الجنا عشان يديكن !!
وقال الطاهر ود ابراهيم : غايتو الله يرحم شيخ النور والله رجل ما بيتعوض كرم وادب وتواضع ، مرة واحد من حيرانه شيخ عثمان ود فاطمة قاعد يتونس معاه الشيخ قال ليه يا عثمان سمعنا ولدك ساتي بقي غناي وبقي يغني في الاعراس بالقروش والكلام دة حرام ، فقال عثمان : ما قاعد يجيب لينا المصاريف، ويضحك الشيخ من رده، وكان يضحك دائما من كلام شيخ بدر وذات مرة قال له : يا بدر انت ليه ما قعد تحضر معانا صلاة الصبح في المسيد وكان الوقت شتاء في شهر طوبة، قال له ما شايف الامين ود محمد قاعد يحضر رغم ان بيتهم ابعد من بيتك ، وكان الامين في شبابه مشهورا بأنه هو من يطلق الرصاص في حفلات الاعراس ليعلن عقد الزواج فتزغرد النساء وذات مرة أفلت البندقية من يده فقتلت الطلقة امرأة عجوز حبوبة ناس بكري ولد تميم، ماتت العجوز وعافاه اهلها .
فيقول شيخ بدر : شيخ الامين ليه حق يطق المشوار .. كاتل رقبة انا ذنبي شنو في البرد دة !.
قال الزين ود الحاج وهو ينفض التراب من جلبابه : غايتو شيخ الصاوي مافي زول قدر يمقلبو غير فارس المجنون ، حكي لي فارس مرة قال مرة انا قاعد في البيت في امان الله افكر يا ربي الليلة حنلقي حق العرقي وين ، سمعت واحد خبط الباب ، فتحت لقيتو عثمان الفقري وطبعا عثمان انت عارفو ما سموه فقري ساكت اذا داير منك حاجة يفضل وراك بالليل والنهار لغاية ما تكره روحك وتديه حقو بالزيادة عشان يتحل من رقبتك، فتحت الباب لقيتو واقف زي الشيطان، قلت ليهو اتفضل قال ما داير معاك كلام داير الامانة، يقصد الف جنيه كان شلتها منو يوم في سوق السبت الله يجازي المرة كلو منها ، المهم فكرت القي من يحلني من الورطة دي اتذكرت شيخ الصاوي طبعا زي ما انت عارف كان عندو مشاكل مع الوالد في أرض واشجار نخيل، اتوكلت مشيت عليه، وقلت للسجم عثمان الفقري اقعد لغاية ما القهوة تجهز انا راجع ليك، كنت شوية ملخوم خايف ارجع فاضي ويشيل عثمان الفقري حالي، نسيت حتي ادق باب بيت الصاوي، دفرت الباب ودخلت، اول مرة اعرف انه فكي كنت قايل الزول بيستهبل ساكت لامن يتكلم في السوق ويقول للناس تعالوا لي انا بعالجكم ومرة قالوا قال لطيب ود بشير وكان عندو مشكلة مع ناس الامن، مرة وقف في السوق وسط الناس وشتم الحكومة علي الغلاء وعلي الشباب البيودوهم يموتوا في الجنوب وقال بالله المنافقين يودعوا الاولاد المرسلنهم الجنوب يقولوا ليهم : أها نتقابل في الجنة! فرسلوا ليه استدعاء عن طريق اللجنة الشعبية، واحد اظنه الطاهر ود ابراهيم والا مين ما عارف قال ليه احسن امشي لشيخ الصاوي قالوا عندو حاجات قوية يعملها ليك يحميك من الناس ديل لأنو الشايفو كدة انت مدقوق مدقوق! الغرقان يتعلق بقشة مشي لشيخ الصاوي اداه حجاب وقال ليه بعوضة ما تقدر تهبشك! عليك امان الله الزول صدق ومشي ناس الامن دقوه دق الرخصة! وجابو رموه في الحلة جنازة، لامن اهلو بقوا يستعدوا للفراش، شهر كامل ما قادر يفتح خشمو ولا يتحرك، كل عضمة في جسمو براها، قعد ابراهيم البصير قصادو شهر يرص في العظام ويجبر الكسور لغاية ما الزول اتحرك واهو لغاية الليلة بعكازين!
اها انا كنت قايل قصة شيخ الصاوي فكي هزار ما جد، لغاية ما دفرت الباب لقيت زولك قاعد وسط النسوان يكتب في البخرات، اول الباب اتفتح رفع رأسه ونهرني : الجابك هنا شنو يا ابن الكلب! جاي تتم البداه ابوك، قاطعته زوجته التي كانت تقدم الشاي للنسوان، يا شيخ الصاوي ما تصبر تشوف الجاب الولد بدري كدة شنو يمكن امر مهم، دخلت بعد كلام زوجته وجلست صامتا اراقبه وهو يعطي النسوان البخرات ويصف لكل واحدة بعد ان يسمع مشكلتها طريقة الاستعمال واحضرت لي زوجته كوب شاي شربته بسرعة وفي تلك الاثناء كان هو اثناء كتابة البخرات يلتفت نحوي كل شوية شاتما: وكمان تشرب في الشاي والله بجاحة فعلا! راقبته وهو يمارس عيادته الجماعية ولاحظت انه يعرف مشاكل النسوان حتي قبل ان يحكوها له، يقول لفاطمة بت النور : اها الراجل استعدل ولا لسة مفكر في العرس، فتقول له لسة تراه يفتش في واحدة صغيرة! فيقول لها ولا يهمك انا اعمل ليه مصيبة تخلي ذكره ما يقوم ولا حتي للبول!واغرب حاجة هو بيسأل كل مرة قبل ما يديها البخرات سؤال تقليدي يقول ليها : بتصلي ؟ لأن المفروض اذا المرة ما بتصلي ما يديها البخرات قام ادي بت عمك عثمان الساكنة الخرطوم بخرات مدت ليه القروش وفي اللحظة دي سألها : انتي قاعدة تصلي؟ اتفاجأ وقت قالت ليه لا ، ما عرف يعمل شنو وهو مادي البخرات والقروش ممدودة ليه! قام حسم امره بسرعة مسك القروش ورمي ليها البخرات وقال : تصلي ولا ما تصلي انا مالي!
وكان كل ما اعطي واحدة من النسوان البخرات تعطيهالمرأة البياض في يده او تدس القروش امامه تحت البساط الذي يجلس عليه وفجأة انشغل مع سكينة محمد النور المرة البتعيش في السعودية قعد يسمعها باهتمام لأنو عارف ان البياض بتاعها بيغطي معاه حق كم يوم!قعدت تشكي ليه ولدها الصغير لسه بيبول في السرير رغم انه عمره عشرة سنوات، يا زول انا انتهزت فرصة انشغالو مع المرة المغتربة وبس قمت زي الهوا رفعت البساط وخمشت من القروش التحت البساط وجري!وصاحبك وراي جاري زي الكلب ما تقول عمره سبعين سنة! وصوته زي الرعد يكورك: علي الطلاق انت ابن حلال ابوك كان عايش كدة!
رجعت البيت لقيت عثمان الفقري شرب القهوة يمكن خمسين مرة وفطر وقاعد راجي الشاي، يعني خلص حقو بالزيادة وبعد دة قاعد! رميت ليه قريشاتو وقلت ليه يا سجم الليلة كان داير تخرب بيتنا لو ما ربك ستر!
|
|
 
|
|
|
|
|
|
|
|
Re: فكي موديل حديث جدا (Re: ahmad almalik)
|
لكن ما كتلتني بالضحك يا احمد !!ا
دي اول قصة بالدارجية اقراها ليك وهي تجربة جديدة جديرة بالمواصلة
ونحن بانتظار الباقي
انت متأكد الفكي دا اسمه الصاوي ولا عايز تعمل لي مشاكل ساكت مع الحيكومة ؟! انا غايتو اظنه كان اسمه كمال
تحياتي
| |
|
|
|
|
|
|
|
|
|
Re: فكي موديل حديث جدا (Re: ahmad almalik)
|
والله يا الصاوي الفكرة فكرتك لو حصلت اي مشاكل وما نجحت يبقي الحساب معاك، بعدين بكل صراحة انا كتبت الجزء دة علي دفعتين في لحظة مزاج نادرة كما تعلم في هذا البلد، لكن لو في زول سأل اها وبعد دة الحصل شنو ما عندي اي فكرة ، لو الامور سلكت سنبعث المكتوب علي البورد مباشرة بالمناسبة حينما كتبت لك ردا في المرة الاولي علي الاقتراح اكتشفت ان هناك جملة راحت ذلك انني في البداية كتبتها ثم نقلتها علي دسكيت قبل ان ارسلهافكما ذكرت لك انا اضع وزنا كبيرا لكل ملاحظة ، فحينما كتبت الفرقة الموسيقية وكان راوي القصة كما تذكر علي لسان كلب قال البعض انني كتبت سيرة حياتي لذلك حرصت فيما بعد في محاولاتي الكتابية علي عدم استخدام شخصيات حيوانية حتي لا اظهر بمظهر غير لائق اذا تشكك احدهم في في هذا البورد بفضلك والصادق الرضي وما دام الامر كذلك فانني اتمني ان نري هنا انتاجك الابداعي الذي تحرص علي اخفاءه، اعتقد ان الوقت قد حان، لن انسي ما انسي ذلك الشعر الرائع الذي كنا نستمع اليه منك انا وكمال، وكذلك اعرف انك تكتب القصة القصيرة، فهل سنري شيئا قريبا؟
ودمت
أحمد
| |
|
|
|
|
|
|
|
|
|
Re: فكي موديل حديث جدا (Re: ahmad almalik)
|
تداعت أمامي العديد من الشخوص الحقيقيه الطروبه من مجتمعنا المدهش داك... البساطه و الكوميديا العفويه في تفاصيلنا اليوميه... تصدق يا أحمد ـ حاف كده بدون أستذه  ـ حسيت اني واقف مع الجماعه البتونسو في المقابر... أو ربما استدعت لي ذكرى منسيه مشابهه من صور الحقائق الكبرى في الحياة و تناقضاتها المربكه و البسيطه.... رغم قصر النص و كثاقته لكن الواحد قدر يخلق علاقه مع الشخصيات.. لكن بعد تعب... يعني في حبه احساس باللهاث و قومة النفس... أدينا زياده عشان المسائل تستقر... ملحوظه بسيطه: لو عملت توضيحات مع عناوينك بيكون كويس... زي مثلا بين قوسين.. نص قصصي... قصه قصيره... فصل من روايه... الخ.. أنا مثلا في البورد من الصباح و مريت على العنوان كم مره في الزحام و لم أقرأه الا قبل قليل... لك الود
| |
|
|
|
|
|
|
|
|
|
Re: فكي موديل حديث جدا (Re: ahmad almalik)
|
شكرا ياسر ملاحظاتك بالتأكيد حنعمل بيها، النص لا زال في بداياته كما تعلم عشنا جزء كبير من حياتنا في القرية تفاصيل الحياة فيها راسخة فينا بصورة أبدية وما نكتبه لا نتحري فيه الصدق بقدر ما نتخذه حائطا للمبكي نبكي عليه ذكريات الحياة الدافئة في الوطن،نبكي فيه علي اليوم الاتي دون ريب، حينما تصبح طقوس تلك الحياة الحميمية مجرد وقائع معروضة للنسيان، في زمان لا مكان فيه ولا حتي لومضة ذكريات
| |
|
|
|
|
|
|
|
|
|
Re: فكي موديل حديث جدا (Re: ahmad almalik)
|
سلام جميعا
شكر ا استاذ احمد على القصة الجميلة
طبعا انا عجبني تعليقك بتاع حائط المبكى
في انتظار البقية و تجربة رائعة حقا
اللهجة العامية لها طعم مختلف تماما
تحياتي
| |
|
|
|
|
|
|
| |
ahmad almalik
Yassir Mahgoub
فيس بوك
تويتر
انستقرام
يوتيوب
بنتيريست