|
|
 دى القلقلة الصاح يا بطيخاب
|
شوفو يا بطيخاب الليلة محمد عبدالماجد الليلة فى عمودو ( وان طال السفر ) فى صحيفة قون قال شنو ويا العلالاب ادونا رايكم
Quote:
* والله (ولادنا) ديل ما قصروا معانا ..زي ما قال رمضان.
* مجاهد يشيل ويغلط...تقول بجهز ليهو في مركب ثاني اكسيد (الغلطات).
* المركب دا يعني الضغط علي اللاعب ..وقطع الكورة والتمرير.
* مجاهد : دا انا غلبان.
* والباشا ..فعلا طلع (تلميذ) ..تقول مصور سينمائي ..يسك في الكورة ويعاين فيها لمن وصلها الشبكة.
* انت يا الباشا ما قالوا ليك (المقدم ما موصل).
* ما قصرت قدمت الكورة لمن عانقت الشباك.
* الباشا قالوا بين الشوطين المدرب اتكلم معاهو وعاتبو ..الباشا قال ليهو : (انا ما غلطت ...انا جيت اعاين).
* انت بتعاين ساكت.
* الباشا : دا انا غلبان.
* واكرم الهادي سليم ...(برة الشبكة)..انت يا ود الناس ما تصبر في شبكتك.
* الرقيص خرب طبعك..بقت تستقبل (الهدف) علي رأس خط 18.
* زي الزول الما بقعد في البيت وقت يسمع ليهو (صوت حفلة).
* اكرم الحفلة طالع ليها برة خط 18.
* انت يا اكرم ما قالوا ليك : سادومبا دا ابو السريع.
* الزول دا بتشوفو مرتين ...مرة بتشوفو رهاب ..رهاب ...والمرة الثانية بتشوفو زي (الصقر وقت يكفت الفرة).
* شبكة اكرم ..طلعت الشبكة الاوسع...الشبكة الاكثر استقبالا.
* اكرم : دا انا غلبان.
* قلنا ليكم ولادنا ما بقصروا معانا.
* الهدف الاول غلطة من مجاهد ..(ميساوي) قطع الكورة من (القدال).
* قدال في البرد دا.
* والباشا يعاين في الكورة ..تقول الي الان بيلعب تحت السن.
* انت يا ود الناس ...(النجيلة الصناعية) دي غريبة عليك.
* الاضاءة فيها مشكلة.
* الكراسي مركبة غلط.
* شابكننا السنة كلها ..الايميل اتمسح ..الايميل اتمسح ...الايميل اتمسح.
* اها (سادومبا) مسح دفاعكم كلو.
* الود يشيل ويمسح.
* اول حاجة مسح (مجاهد).
* تاني حاجة مسح (الباشا)...الباشا اتمسح بي جاي ...سفاري اتمسح بي غادي.
* اتمسح منو وليهو.
* سفاري ذنبو شنو؟.
* سفاري : دا انا غلبان.
* سادومبا يقدم لكم افضل خدمة (مسح).
* مسحوك وجرحوا سمعتك.
* مسحة..مسحة..القون نعدو.
* انتوا تعالوا هنا اكرم المسحو منو؟.
* الي الان في قولين.
* في ناس بقولوا اكرم مسحتو هيئة دولية متخصصة في (المسح اب كراعا برة).
* الهيئة دي رئيس مجلس ادارتها زول عندو دكتوراة في (المسحة)...ومسيخ مساخة تقطع الخميرة من العيش.
* الزول دا اسمو سا سا سا سا سا سادومبا.
* بالمناسبة (السوسنة) دي نوع من كبرتاتيك (الغتاتة).
* الغتاتة دي ما في داعي اشرحها ليكم...عشان عاوز ادخل ليكم في القول الثاني الذي ذهب الي ان اكرم الهادي سليم ..لحق (الايميل) واتمسح نتيجة الي (الغرغرينة).
* كمان جابت ليها (غرغرينة) يا هلالاب.
* انتوا مالكم بتفكوا (الغرغوة) وبتمسكوا في (الغرغرينة).
* الغرغرينة تعمل ليكم شنو في (البرد) دا.
* يا اكرم الهادي سليم عاوز اسألك سؤال ...(النجيلة الصناعية) دي من النوع (الكونتاكي)...والتسمية من دجاج كونتاكي...ام ان النجيلة الصناعية تلك من النوع (البيتزي)..والتسمية من البيتزا الايطالية...بقول كلامي دي عشان (سادومبا) واضح عليهو عمل تداخل بين (النجيلة الصناعية) واكرم ..في الحتة دي زي في انبثاق في عصب الروح.
* روح يا عم.. شنو انت يا ود الناس عاوز تقلبها لينا (شعر حر).
* الشعر الحر دي ضيع (الروس).
* عليك الله (روسك) المُساخ ديل ما تدخلهم لينا في اليوم دا.
* كرهتنا.
* الحاجة البتحيرني ..وبتخليني اشيل الكرسي واقعد قدام البيت ...اكرم.
* اكرم مالو؟.
* اكرم دا مالو بطلع وبخلي (شبكتو).
* انت حارس شنو؟...حارس (الايميل).
* مية مرة قلنا ليك ما تطلع من المرمي.
* ما عارف انا البطلعك شنو؟.
* تقول ساكن ليك في (بيت اجرة)..كل شهر سيد البيت يجي يقول ليك اطلع من البيت.
* وانت المسكين تشيل وتطلع.
* انت بتطلع ليه؟.
* دا انا غلبان!!.
* قلنا ليك ما ترقص لينا ...نحن عقوبة (الرقيص) عندنا قاسية ...هدفين مع الغرامة والمسح.
* انت تاني عاوز ترجع لينا لي موضوع (المسح) دا.
* يا ود الناس الموضوع دا انتهي.
* ما انتهي ..انتهي ..ما انتهي.
* بصم.
* الله ...الظاهر الموضوع دا ح يفتح ليهو سيرة ما بتعجب ناس المريخ.
* والله تقللوا ..تكتروا هسع نجيب ليكم سيرة (التمهيدي).
* وسيرة (التمهيدي) دي لو جبناها ليكم كلكم بتقعدوا تتضايروا.
* نرجع ليكم للمباراة...مفروض ناس المريخ ديل يحمدوا الله.
* انتوا عارفين لو كان (ريتشارد) لاعب ...في ظل وجود مجاهد ..الكورة دي كان في (السبعة) ما بتقيف.
* ريتشارد ذنبو شنو هسع.
* ريتشارد: دا انا غلبان.
* كلو من اكرم....ما بقعد في شبكتو.
* انت خط 18 عاملين ليه (خط) ليه؟....عشان ما تطلع ساكت.
* قالوا ليك ...مريخابي قاعد يتابع في الكورة ..ينوم ويصحي...ويأكل في الترمس.
* كل ما يشوف اكرم بيبلع ليهو كيس ترمس.
* المريخابي دا وقت الهلال جاب الهدف الاول ..صحي من الكواريك ..وقال الهدف الجابو منو؟.
* قالوا ليهو (سادومبا)...رجع نام تاني.
* وقت الهلال جاب الهدف الثاني ...زولكم تاني صحي وقال الهدف الجابو منو؟.
* قالوا ليهو : سادومبا.
* قال ليهم : تاني ...انتوا الهلال دا لاعب ضد (الايميل)... ورجع نام تاني.
* في زول بنوم في الظروف دي.
* (الترمس) الي الان قاعد في مكانو.
* الترمس ذنبو شنو في (البرد) دا.
* والله تكتروا ..تقللوا ...هسع اجيب ليكم سيرة (الروس).
* وانتوا عارفين لو جبت سيرة (الروس)....بجيب سيرة (البصمة).
* ولو جبت سيرة (البصمة) بجيب سيرة (التمهيدي).
* وانتوا سيرة (التمهيدي) بتعمل ليكم انتفاخ في (المصران الاعور)..والعصب الاحول.
* المصران الاعور عرفناه ...كمان العصب الاحول دا شنو؟.
* انتوا اقعدوا اتغالطوا لي كدا ...والله اقوان سادومبا دي تجيب اي حاجة.
* سفاري بعد المباراة ما انتهت قالوا مشي لطبيب الفريق قال ليهو: شوف لي (الركب) ديل مالهم ..فيهم صوت غريب.
* ركب هن وإلا (طار) يا سفاري.
* انتوا ما شفتوا (الباشا) بعد المباراة عمل شنو؟.
* عمل شنو يا ود الناس؟.
* الباشا بعد المباراة قالوا لقوه شايل ليهو زهرة وبقطع فيها وبقول : طلع ما طلع ..طلع ما طلع.
* طبعا هو قاصد اكرم.
* دا انا غلبان.
* عشان ترقص تاني ...نحن مية مرة حذرناك ..قلنا ليك ما ترقص.
* نحن (الرقيص) في الحفلات مقاطعنو...انت عاوز تجيبوا لينا في الكورة.
* قالوا ليك في ولاية الخرطوم في قانون جديد يمنع (الرقص) حتي في المناسبات الرسمية.
* القانون دا اسمو قانون (السندبة)...وهو حسب اللائحة 36 ب من قانون لائحة (المسح) ..المادة المعدلة لسنة 2009ج تقضي بالجردقة.
* الجردقة دي يعني اكرم الهادي سليم مسكين ..قايل المباراة دي بتلعب في (الاردن).
* في زول ادي اكرم دا معلومة غلط.
* دا اصلو ما اكرم ...ما بصدق ..ما معقول..ما تحاولوا تقنعوني.
* غايتو المريخاب ديل عندهم (جبل جليد) المباراة كلها بطلع من مرماه.
* عمليتك دي يا ود الناس (لوح تلج) ما بعملها.
* تقول لي (جبل جليد).
* دا انا غلبان.
* وقت غلبان بترقص ليه؟.
* الحاجة البتزعل بالجد ..(كلتشي).
* كلتشي من (الوصافة) بقي زي القلم المبري من الجهتين.
* وصافة في الدوري الممتاز...ووصافة في كأس السودان ...الشيء شنو؟..الشيء شبع.
* وصافة دبل قبينة.
* ليكم حق تحتفلوا بالذكرى عشرين لكأس مانديلا.
* (الذكريات صادقة ونبيلة ...مهما تجافينا بنقول حليلة).
* ذكريات ساكت.
* كأس مانديلا دا (اخر حب واول).
* الوصافات دي بتفوتوها ساكت ...ما بتجيبوا ليها سيرة.
* يعني نحن لو ما كنا بنذكركم بالوصافات دي كنتوا ح تنكروها عديل.
* دا انتوا طلعتوا اي كلام.
* كلتشي في سنتين حقق ليهو اربع وصافات.
* وقت كلتشي كان بيلعب في الهلال السنة الماضية الهلال حقق وصافة الممتاز ووصافة الكأس.
* السنة دي الوصافات قلبت العرضة جنوب.
* وصافة الممتاز ووصافة الكأس.
* وصافة سيكافا بنحسبها ليك يا كلتشي بي اربع وصافات ...عشان انتوا منظمين البطولة ...ومحفزين الحكام.
* كلتشي: دا انا غلبان.
* ملحوظة: ناس المريخ ديل فعلا (صفوة)..وصافتين في شهر.
هوامش
* الاستاذ الدكتور عبداللطيف البوني قبل ايام كتب في عموده (حاطب ليل) في صحيفة (التيار) عمودا كان تحت عنوان (خديجة وقعت من البلكونة) وربط بين الاعلان وهضربة ملاريا كان يعاني منها الكاتب ...عجبتني الفكرة والربط...واظن اني الان يمكن ان اجد تفسيرا لوقوع (خديجة من البلكونة) ...وهي ان هذا الوقوع كان بسبب هدف سادومبا الثاني ...عشان (تمريرة) هيثم مصطفي حفظه الله ورعاه تخلع ...وبترمي خديجة من البلكونة.
* خديجة ذنبها شنو؟.
* للعلم (خديجة وقعت من البلكونة) قول اصبح يضرب به المثل عندما يقع الشخص ضحية للخلعة والهجمة.
* اعتقد اننا الان يمكن ان نقول : (خديجة وقعت من البلكونة).
* خديجة مين يا عم؟.
* خلاص يا الهلالاب عاوزين تفكوا اي حاجة وتقبلوا علي (خديجة).
* ناس المريخ قالوا ح يشتكوا الهلال في لاعب الشمالي عطبرة خالد كوريا ..قالوا تصريحاتو بقت كتيرة.
* تصريحاتو نحن نعمليها شنو؟.
* تمريرات هيثم مصطفي لو لقوها (الروس) بعملوا منها (عسل نحل)...اصلهم هناك عندهم ازمة في (النحل).
* انتوا هنا بس اقعدوا اقعوا لي من (البلكونة).
* البلكونة عيشتها تطير.
* المجهود الذي بذله كامبوس وهو يقف طوال زمن المباراة ويوجه لاعبي الهلال ويصحح الاخطاء التي وقعوا فيها يجعلنا نقول ان لياقة كامبوس كانت اعلي من لياقة لاعبي المريخ.
* منير ام بدة الي جانب عمر بخيت كانوا من افضل نجوم مباراة القمة الاخيرة.
* عمر بخيت قدم اجمل مبارياته علي الاطلاق.
* الدافي وايداهور قدما خدمة كبيرة للهلال بمشاركتهما في مباراة القمة الاخيرة.
* ايداهور يحتاج الي من يذكره انه لاعب كورة.
* الظاهر عليهو نسي الكورة.
* الدافي الابتعاد اثر عليه.
* كلتشي يعتقد انه يستطيع ان يسجل هدفا في الهلال عن طريق (الاستفزاز).
* وكذلك يحسب اكرم الهادي سليم انه يستطيع ان يحمي شبكته بالاستفزاز.
* مازال اكرم وكلتشي يسيطر عليهم هاجس الهلال.
* مجاهد والباشا تخلصا من ذلك الهاجس.
* بقاء وارغو في كشف المريخ ..اجمل هدية يمكن ان يقدمها الوالي للهلال.
* بقاء وارغو في المريخ ..رغبة كل الهلالاب...ومن اجل ذلك يجب ان يعمل الهلالاب.
* جبل الجليد هداهو (سادومبا) اي جعله سريع الذوبان.
* لياقة اكرم الهادي سليم تأثرت بالرقيص.
* الموسم كلو يرقص.
* خروج مجاهد واستبداله في الشوط الثاني انقذ المريخ من الهدف الثالث.
* اذا كان في بطولة محلية ثالثة سوف يأتي فيها المريخ (وصيفا)...حتي لو لم يشارك فيها الهلال.
* الايامات دي (النت) تقيل.
* العلاج (سندبوه).
* خبر عاجل: يا اكرم ان شاءالله يوم شطبك ما يجي.
|
|
|
 
|
|
|
|
صلاح الدين ابراهيم الفضل
فيس بوك
تويتر
انستقرام
يوتيوب
بنتيريست