اشتقت لي اهلنايامجدي.... اشتقنا للسودانيين الطيبين ومساكين ونواياهم طيبة وعفوية!!! تعرف انا كل ما امشي السودان لازم مهما كانت اجازتي ضيقة امشي على القرى،،، برتاح لما اشوف الناس لسه بي بساطتها والدنيا مازحمتهم،، بقضي اجمل ايام اجازتي في الحلال والقرى... ادفع نص عمري واكون اسه في نص حوشنا وريحة الطمي المبلول وندي مالية الحتة،،، بيتنا فارقو بيت واحد من النيل ....حليل بيتنا وقعدة بيتنا ولمة بيتنا وناس بيتنا....
* شكلي حأموت في الغربة دي...
11-23-2009, 10:32 PM
Magdi Ahmed Elsheikh Magdi Ahmed Elsheikh
تاريخ التسجيل: 03-11-2008
مجموع المشاركات: 7720
Quote: طيب ياحنين ماتحصلى الضحيه الماسكك شنو ياخ اناهسى من قبيل بفكر اعمل كدا لقيت التركيه بى تسعميه وخمسين قلت لامى جاى اسبوع احصل العيد وارجع احصل باقى السمستر حلفت على مااجى قالتلى اصلك انتا الاسبوع الاول بتعديهو نوم فاحسن تنوموقبلك وبعد ينهى سمسترك تعال انا اصلو الضحيه دى بتفرق شديد معاى فى البلد وانشاء الله ربنا ييسرلكل الناس المشتاقه للبلد كل سنه وانتى طيبه والسنه الجايه كل امانيك محققه
ود القلع على قول سارة :)
حاميني الشديد القوي، والله اسه بكتب وانا بجعر في نص المكتب ماشغالة بي زول،، اشتقت للسودان تتخيل انا لي ثمانية سنين يعني 16 عيد ماحضرتهم في السودان، نسيت زاتو العيد شكلو كيف !!!! والغريبة بمشي السودان مرتين في السنة ولا مرة صادفت العيد!!
11-23-2009, 10:37 PM
Magdi Ahmed Elsheikh Magdi Ahmed Elsheikh
تاريخ التسجيل: 03-11-2008
مجموع المشاركات: 7720
انا لما امشي السودان بحاول اجمع اكبر كمية من التفاصيل الدقيقة اليوماتي.... كنت في مشيتي الأخيرة مواعدة شادية عبدالله...وانا ماشة عليها في واحد من شوارع الخرطوم اتنين لقيت ليك شابات وشباب قاعدين تحت ضل شجرة نيمة وبشربو في شاي وكركدي وقهوة،، والله يا منال وقفت عربيتي ونزلت سلمت عليهم وقعدت لي في بنبر طلبت شاي، كانوا شباب وشابات بشبهو البلد ديك،،، حلوين ومتحمسين وفاتحين ليك موضوع كدة لقيت ليك روحي نسيت انا اصلا ماشة وين ودخلت معاهم في نقاش عفوي وفجاة بقوا اصحابي اتونسنا وضربت لي شادية وصفت ليها انا وين جاتني ،، اليوم داك اظن عندي ديشيليون حاجة ولا واحد فيهم ماانجزتها،،، لكن انجزت احلى يوم بستحضر في اسه وكل يوم حلاتو تزيد...
يحليلكم...ياحليلكم بالكتير مابالشوية...
11-24-2009, 02:21 AM
كمال سالم كمال سالم
تاريخ التسجيل: 02-13-2008
مجموع المشاركات: 4786
Quote: اشتقنا للسودانيين الطيبين ومساكين ونواياهم طيبة وعفوية!!! تعرف انا كل ما امشي السودان لازم مهما كانت اجازتي ضيقة امشي على القرى،،، برتاح لما اشوف الناس لسه بي بساطتها والدنيا مازحمتهم،، بقضي اجمل ايام اجازتي في الحلال والقرى... ادفع نص عمري واكون اسه في نص حوشنا وريحة الطمي المبلول وندي مالية الحتة،،، بيتنا فارقو بيت واحد من النيل ....حليل بيتنا وقعدة بيتنا ولمة بيتنا وناس بيتنا....
( فرضى على كده ) زى ما قال محمد أخوك . خليك فى جنس الكتابه السمحه دى وأبعدى من الحتت الكلها غبار ديك ! مشتاقين والله ,, تحياتى ,,
11-24-2009, 03:05 AM
قاسم المهداوى قاسم المهداوى
تاريخ التسجيل: 11-26-2004
مجموع المشاركات: 8640
Quote: مالك علينا ياحنين ..أحيييي من بياخة العيد في الغربة ..
والله العيد ده كنت ماشة السودان لكن أمي مشت الحج ..
عيد بلا أمي مااااعيد ..الله غالب
وبرضو كل عام وإنتي بالف خير
حجا مبرورا وسعيا مشكورا لي امك... عليك الله يا داليا اقرب اجازة امشي السودان...امشي قدر الله يديك... ياداليا انا كنت هناك شهر تمانية، لما مشيت طلبت اجازة المدير عاين للورقة كدة وعاين لي ...وبكل برود قال لي Are you serious.
11-24-2009, 08:10 AM
سارة كرودى سارة كرودى
تاريخ التسجيل: 05-06-2009
مجموع المشاركات: 764
ما بتنطاق.. ادفع نص عمري وانوم في حوش ابوي الحدادي مدادي والهواء يضربني وريحة النيل القريب من بيتنا وريحة الشجر.. ياخ نبيح الكلاب انا اشتقتا ليه.. ومتين ياربي انشاء تلمنا.. ومتين يا ربي العودة لامدرمان..
مشتاقة لاخواني شدددددديد.. ـــــــــــــــــــــــــــ يا حنين هانت الحجاج بيجوا
11-24-2009, 08:22 AM
سارة كرودى سارة كرودى
تاريخ التسجيل: 05-06-2009
مجموع المشاركات: 764
بقيت يا سارة لا قادرة ارجع لا قادرة اقعد مستقبلي ووظيفتي بي جاي.. واهلي بي هناك.. المطمني انو امي وابوي بشوفهم كل سنة..لكن برضو ما بالا شوقي.. البلد هنا جافية..وكان كسرتا رقبتي ما بيدوني اكتر من تلاتة اسابيع اسبوع منها سفر ونوم..
11-24-2009, 08:33 AM
Mohamed Yassin Khalifa Mohamed Yassin Khalifa
تاريخ التسجيل: 01-14-2008
مجموع المشاركات: 6316
الأخت العزيزة حنين كل عام وانت بخير وكل أهل كردفان الغرة أبكيتني يا حنين، تذكرت حينها "أبو اللمين" وهو يغرد "" ولو صوت الريح وشوش في الباب يسبقنا الشوق قبل العينين ونعاين الشارع نلقاهو .. بس كفى ما جرت دموعي كما جرت ولو كانت الغربة رجلاً لقتلته .. الله يجازي اللي كان السبب مع خالص تحياتي د. صلاح البشير
مشتاقة لامي الحنينة اشتااااقك كثيرا... اشتاق لوالدي .. لاخواني و اختي الوحيدة مي .. اشتاق لسريري .. لكتبي .. لرائحة شاي امي و ليدينها.. لكي الله يا امي :(
مشتاقة لحبوبتي (رحنة الله عليها) و انا جارية ليها و بعمل حركات بيدي ورجليني (بمشي و انا بتمايل للامام و الخلف) كانت بتزعل شديد تقوم تشاكلني و تقول لي امشي كويس .. مشتاقة لشكلتا دي.
مشتاقة لسريري الفي الحوش الملاصق و قريب من سور الجيران نقوم نتونس بالحيطة و نسة غريبة كدا لغايت ما نسمع زول بيزجرنا بكلمة هوووس يلا نوموا .. مشتاقة لذات الجيران لما نكون ملممومين ف ترح او فرح .
مشتاقة لمشيت المدرسة .. للطابور المدرسة الفظيع و غناءنا الكارثي لنشيد العلم و نحنا بنخرب كلامتو و تسمعنا الاستاذة و تقوم تحرمنا من اليوم الدراسي عقاب لنا ...
مشتاقة .. لموقف الخرطوم الاتغير ...
مشتاقة للاصحاب برغم ما فعلته الايام بهم
مشتاقة للكهرباء ... للكتاحة .. للمطيرة
يا ريتك يا مطيرة تصبي لي ف قلبي دا .. يمكن يهدأ و يمر العيد بسلام من غير أسي و الم
بالغتي يا حنين ف داعي حسه للسيرة دي !!
مشتاقة لذكريات زمان و عاتبة علي الزمن البيخلق العديد من الذكربات للاصحاب و للاحباب انا ما بكون جزء منها .
11-24-2009, 09:51 AM
هواري نمر هواري نمر
تاريخ التسجيل: 04-29-2009
مجموع المشاركات: 1833
مشتاقة لامي الحنينة اشتااااقك كثيرا... اشتاق لوالدي .. لاخواني و اختي الوحيدة مي .. اشتاق لسريري .. لكتبي .. لرائحة شاي امي و ليدينها.. لكي الله يا امي :(
مشتاقة لحبوبتي (رحنة الله عليها) و انا جارية ليها و بعمل حركات بيدي ورجليني (بمشي و انا بتمايل للامام و الخلف) كانت بتزعل شديد تقوم تشاكلني و تقول لي امشي كويس .. مشتاقة لشكلتا دي.
مشتاقة لسريري الفي الحوش الملاصق و قريب من سور الجيران نقوم نتونس بالحيطة و نسة غريبة كدا لغايت ما نسمع زول بيزجرنا بكلمة هوووس يلا نوموا .. مشتاقة لذات الجيران لما نكون ملممومين ف ترح او فرح .
يا ريتك يا مطيرة تصبي لي ف قلبي دا .. يمكن يهدأ و يمر العيد بسلام من غير أسي و الم
بالغتي يا حنين ف داعي حسه للسيرة دي !!
مشتاقة لذكريات زمان و عاتبة علي الزمن البيخلق العديد من الذكربات للاصحاب و للاحباب انا ما بكون جزء منها .
ياسحر جيتك راجعة، لاني حسيتك بتكتبي من حرف شوقي.....
تعرفي ياسحر، زعلانة العمر المر وانا مافي نصهم...الزمن البجري زي البرق ده...كم تفاصيل وتفاصيل وتفاصيل فاتتني... كم مناسبة انا ماكنت جزء فيها..وكم ضحكة مانورت ايامي،،وكم دمعة سالت منهم انا مااتلافيتها....يحليلهم.. ياسحر...العمر كمهو...العمر جرى شديد بقول لي روحي ياربي حاقضي الجايي من عمري كله هنا،،، انا ياسحر حاجاتي كلها بقت هنا، شغلي وبيتي وولدي ومستقبله،، خلاص بقيت ترس من ساقية البلد دي..ترس آلي لابقدر يوقف الساقية ولابقدر يقيف... تتخيلي انا ماحصل في يوم من الايام اتمنيت الغربة ولا اتخيلت نفسي ا كون بعيدة من اهلي وبلدي ،،لكن القسمة بس. تعرفي ياسحر كلما امشي السودان بقعد بعاين في عيون الناس من طرف زي البفتش لي في زول رايح مني، بحاول اقراهم حتى لو قراية بدون تركيز بحاول اتمسك بي تفاصيلهم وبتوه فيها.... رغم انه المجتمع اتغير نوعا ما مابقى زي زمان لكن لسه ياهم همهم السودانيين،، لسه فينا البساطة والعفوية والنية الطيبة، بالذات لو مرقتي لي برة القرى والحلال،، ناس حلوة طبيعية على سجيتها،،بحبهم حب ماعادي ،،تعرفي عندنا اهل في بارا ابوي زاتو الولدوهو هناك علاقتو بيهم بحكم العمل ووتيرة الحياة اتباعدت،،اها ديل انا كل ما امشي اجازتي لو اسبوعين خمسة يوم بتكون من نصيبهم، او بالأصح بتكون من نصيبي،، بمشي ليهم اتزود منهم طعم الحياة الواقع،، وبلقاهم كل سنة ياهم ياهم، بحكو عن طموحاتهم القنوعة، والحبيبات بحكو عن الحبايب السافروا الأبيض "تتخيلي" والسافرو السعودية وليبيا،، بحكوا بي قدسية اتفقدت الزمن ده... تعرفي انا كل سنة متعودني اكون في نصهم ابدا ما استغربوني وحافظاهم وحافظة قصصهم وحكاياتهم،، الخطبوها والإتزوجت والولدت والدايرة تواصل قرايتها،، حلوييييييييييييييييين وحبوبين...تتخيلي انا علاقتي اسه بقت بيهم اقوى من اهلي الفي الخرطوم،،رغم اني مما كبرت ماشفتهم الا بعد ما اتغربت وجيت هنا،،،مشيت افتش بيناتهم عن طفلة تاهت في الغربة...
قدر ماحاولته اوقف دموعى ابت حسيت بى نفس احساسك لمن كنته بعيدة والله امره منو مافى ولا بتوصف ...
ياخى ربنا يخلى لينا اهلنا الحناااان ..
سرورة....كل ما القى نفسي ببكي من شوقي لي ناسي واهلي بحس بالإطمئنان انه الغربة لسه ماحجرت مشاعرنا... انا عقدتي ف يالحياة هي ناس بيتنا، للآن رغم اني بقيت ام وخلاص زي مابقولوا الدنيا عركتنا وعجنتنا، لكن نقطة ضعفي الوحيدة هي اهلي... تعرفي يا سرور انا كل اجازة بمشي ببكي من اصل لحدي ما اجي راجعة، امي تقول لي نهايتك شنو؟؟؟ بقول ليها يا امي ماقادرة اتخيل اني قطعت كل المسافة دي واجي القى البيت فاضي، تقول لي يعني نعمل شنو نرجع اخوانك واخواتك نقول ليهم خلوا بيوتكم ونسوانكم ورجالكم وتعالوا ارجعوا ورجعو الزمن لي وراء عشرة سنين، ياها يابتي الدنيا ودي سنة الحياة....
* حكمة الله لي اسه سنة الحياة دي ماواقعة لي،، سنة الحياة شنو البتحرمني من اصوات اخواني وهظارنا ونقاشتنا وماوشاتنا،، ولمتنا وعصرتنا على بعض
Quote: فرضى على كده ) زى ما قال محمد أخوك . خليك فى جنس الكتابه السمحه دى وأبعدى من الحتت الكلها غبار ديك ! مشتاقين والله ,, تحياتى ,,
الاخ كمال سالم,,,,,,,
* محمد اخوي ده بالذات مشتاقة لي شوووووق عجيب، الطف شخصية في الدنيا... محمد اصغر مني بي تسعة سنين، لكن زول مصيبة ،، زول مدردح وأخو اخوان في نفس الوقت، يسد في اي حتة تختوا فيها، ورغم انه عندي خمسة اخوان لكن هو اكتر واحد بعتمد علي لانه ظروفة مرنة شوية اكتر من الباقيين الغالبيتهم برة السودان...والله ياكمال إجازتي بكون رفيقي واخوي وصديقي..ولما اصل المطار يحاول يتزاوغ مني، لانه لما نتقالد ونبكي بنبكي المطار كله معانا....ياحليلو برغم شخصيته الحازمة الرسمية في نفس الوقت هو زول مرح حبوب...الله يدي العافية انشاء الله .
11-24-2009, 06:26 PM
Sahar Yousif Sahar Yousif
تاريخ التسجيل: 12-02-2007
مجموع المشاركات: 318
كنتا ف الماضي بقول انا راجعة جنوبا نسبة لاقامتي سابقا بمصر و كنت عازمة و اظنو و بعض ظني ف النهاية طلع فشوش ساي .. ان المرحلة ديك اخر مراحل اغترابي و ان الزمن خلاص حينصفني وخلاص حارجع و ما جا ف بالي انوا ف رحلة ابعد من كدا .. كنتا اتصبر علي مرارات الغربة بزيارات خاطفة مصادفة الاعياد و في كل مرة بمشي قدر ما بحس باني بملئ خزان الشوق عندي و الا كنت بحس بالخواء جد جد و دا ليهو حديث تاني.
الغريبة انا بكون مقلقة من لحظة قراري للسفر و لغاية لحظة ركوبي الطيارة .. لحظة الاقلاع :) اقول شنو بس .. بحس نفسي وصلتا.. بكون مستمتعة بكلام الناس الحولي و مرات بكواريك الزول القاعد ف المقعد الاول البيونس زول ف المقعد الاخير .. بحس بمدي مانحنا بسيطين ما ف تعقيدات ..
بعمل عمايل الشفع الصغار بلصق ف شباك الطيارة وكل ما بشوف نور بعيد قلبي بيرقص فرح و بينطط.. بحس بكل شئ من الهواء ف بلدنا غير .. الموية طعمها جميل.. شارع النيل.. الناس ( ملامح، عيون، تصرفات ، كلامهم ، حتي نظرتهم ليك لما تتقبضي متلبسة بانك بتعايني بفضول).
لما بصل بكون ما دايرة ارمش ..دايرة عيوني تسجل اي سكنة اي حركة اي لون اي شئ بخاف ارمش ف حاجة تروح ف اللحظة دي.
تتخيلي مرات بشتاق للاماكن انا ما شفتها ما غريبة .. بشتاق مرات لناس ممكن ما جمعتني بيهم اي مناسبة هل دا هو الجنون ياربي؟
حسة في بالي اغنية العركي دي: ياقلب أنا كنت قايلك تبت من تعب السفر ومن مخاواة القماري و من شراب موية المطر تاريك كامن لي بي شيتآ كتر ما زمان أنا و أنت لفينا المواني بالقطارات و المطارات و السفن دقينا أجراس الجديد و عدنا ترتيب المعاني
الله غالب
11-24-2009, 09:15 PM
سلمى الشيخ سلامة سلمى الشيخ سلامة
تاريخ التسجيل: 12-14-2003
مجموع المشاركات: 10754
الى من يشتاق لي نسمة من الوطن يا ريت نرجع جميعا بالسلامة للبلد الحبيب
الحنين ازيك وتحياتي سنين طويلة ما شفنا عيد وزي ما قال لي جاري وصديقي عاطف خيري : بقينا محبوسين ورا محيط ! والحقيقة محيطين ولا تلاتة مش عارف بمشي السودان بعد العيد! تلاتة اسابيع بس وبرجع لما وراء المحيط تاااني يمكن اتفشا شوية
حتى الطيف رحل خلاني ! وسلام
11-25-2009, 01:58 PM
محمد عبد الماجد الصايم محمد عبد الماجد الصايم
تاريخ التسجيل: 10-16-2005
مجموع المشاركات: 35312
كل سنه انت وكـريم وكل ا لاسره بخير ياحنين ودى ضريبةالغربه وصدقينى ما العيد براه الحاجات كلها مسيخه من غير اهلنا وحتى لمن نسافر لسع ما بنبل شوقنا بنكون دايرين نرجع ده قدرنا واسمعى الغنيه دى للفنان المبدع طارق ابو عبيده واكيد حنسمع الاغنيه دى يوم السبت واكيد يوم حجمعنا وطنا الحبيب بى اهلنا وحبايبنا
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Magdi Ahmed Elsheikh
إخلاص محمد أحمد
WAD ELGAALI#4
ALGARADABI
كمال سالم
قاسم المهداوى
omer osman
ياسر بيناوي
داليا حافظ
سارة علي
Mohamed Yassin Khalifa
د.يوسف محمد طاهر
على محمد على بشير
Sahar Yousif
هواري نمر
Hani Arabi Mohamed
willeim andrea
خالد علي محجوب المنسي
عفاف الصادق بابكر
سلمى الشيخ سلامة
خالد العبيد
محمد عبد الماجد الصايم
اناهيد كمال
محاسن أحمد محمد
فيس بوك
تويتر
انستقرام
يوتيوب
بنتيريست