|
|
 أفضل صحفي رياضي
|
كاتب سوداني.. تخرج في جامعة امدرمان قسم الصحافة والاعلام. توج بلقب افضل صحفي رياضي في العام 1999 من المجلس القومي للصحافة والاعلام، واصبح اصغر رئيس تحرير سناً في تاريخ الصحافة السودانية في الثلاثين من العمر. اول من اصدر صحيفة سودانية عبر الانترنت
|
|
 
|
|
|
|
|
|
|
|
Re: أفضل صحفي رياضي (Re: خالد الجبل)
|
من مقالاته الرائعة Quote:
مريخ مازيمبي .. الراسو دايش منو ؟!!
اتهمني الكاتب الظريف بابكر سلك بـ( لفة الراس) بعد هزيمة مازيمبي.. وقال فيما قال أنني فقدت الوعي وسكيت ضلي !!
وأنا فعلا (ساكي) سلك من زمان.. وبالتالي أنا فعلاً ساكي (ضلي) يا ضلنا !! لكن راسي تمام التمام..
وأنا واعي وصاحي ومفتح كمان يا سلك.. ممكن تقول علي حزين، ممكن تقول علي (صابر) في بنك السودان !! ممكن تقول علي أي
حاجة عشان ( تكاوي ) إن شاء الله تقول علي (مكاوي) بس ما (تقطع) بصحة أني دايش وتعمل فيها (اسامة) عشان انت (حمامة)
وواضح جداً انك انت دايش ومعاك ناس كتار خلاااااص..
والله الأنا شايفو انو المريخ كلو (دايش) إلا من رحم ربي ..
في دوشة يا سلك أكتر من انكم تتخليو المريخ هو مازيمبي !!!
في دوشة أكتر من انكم تفرحوا وترقصوا لهزيمة الهلال وكأن المريخ انتصر !!
في دوشة أكتر من انكم تشيلو (الجنازة) وتمشو عشان تدفنوها تلقو انتو ذاتكم ما عندكم مقبرة !!
انتو قايلين قصة العنقريب دي ساكت ! ما لازم يكون عندك مقابر مسجلة بي اسمك عشان تدفن.. لو ما إنتو راسكم دايش في زول
مدفون بدفن ليهو زول !!
هو إنتو طلعتوا من المقابر عشان تدفنوا !!
نحنا أول حاجة عملناها دفناكم.. بعدين لعبنا مع مازيمبي..
يعني لو انتو راسكم دايش ومتخيلين انكم (حييتو) وغيرتو اسم المريخ كالعادة من فكتوريا والاهلي والمسالمة والمريخ وسميتو المرة
دي مازيمبي.. احسن تصحو !!
شايفكم بي قوة عين كده.. عاملين فيها ولا مازيمبي ذاتو !!
بتتكلمو عن (موبوتو) زي التقول وارغو !!! وبترقصوا مع حارس مازيمبي زي التقول اكرم الهادي سليم .. يا سلك انتو عقلكم ما سليم !!
خلي بالكم الدوشة دي نستكم إنكم مغلوبين من الهلال بتلاتة وإن أقصى ما توصلتم اليه من الدرونات تلاتة ومن النقاط تلاتة ومن
الهزائم تلاتة وبالتلاتة !!
البشوفكم ترقصوا وتغنو كده يقول انتو الغالبين تلاتة ..عليك الله الدايش منو هسة يا سلك !!
في زول في بيت بكاء برقص جنس رقيصكم دا ؟ إلا يكون راسو دايش فعلا ..
يعني فريق طيش المجموعتين وبدون انتصار وبهزيمة علي أرضه وهزيمة خارج أرضه ودفن في المقبرة بثلاثية ومجلس ادارتو لا فيهو
نائب رئيس ولا مساعد رئيس والمعارضة بتطالب باقالة الرئيس والرئيس بطالب بعدم التعاون مع الاعلام السالب وبجتهد أيما اجتهاد وبـ(
الكربوني ) عشان يبقي زي الهلال.. والرئيس معترف بالطيش وانتو بترقصوا جنس رقيص وبتقولو خالد فكرو طايش !! يا طيش ..
قال ليك يا سلك في واحد (فلسطيني) عمل (شكلة) مع (بنغالي) بي حركة حركتين بتاعة ( كراتيه ) كده رمي ليك البنغالي .. البنغالي
قام ومشي هناك و(كورك) ليك للفلسطيني .. فلسطيني .. فلسطيني .. اسرائيل كيف !!
هلالابي هلالابي .. مازيمبي كيف .. دي ما بتحلكم مننا..
أول وآخر انتصار في دوري الأبطال لصالح الهلال..
أول وآخر هزيمة للمريخ في دوري الأبطال من الهلال ..
ثلاثية المقبرة حدث تاريخي بعمل أكتر من الدوشة الحاصلا ليكم هسة دي ومخلياكم تتخليو مازيمبي المريخ !!
في واحد مريخابي كترت ما اتخيل مازيمبي المريخ .. بتكلم معاهو قال لي جمال الوالي قال ما بخلي (موبوتو) يحترف في الرائد
السعودي !!
أصحوا يا سلك وشوفوا الحاصل للمريخ دا قبل مباراة الدوري الممتاز.. عشان نحن لو جينا زعلانين.. بندفنكم المرة دي دفن الليل..
بتعرف دفن الليل كيف ؟!!!!
(غسّل) وشك و( بل ) راسك وتعال بوريك ؟!!! |
| |
|
|
|
|
|
|
|
|
|
Re: أفضل صحفي رياضي (Re: خالد الجبل)
|
ثقالات المواسير
Quote: ثقالات مواسير ..
ماسورة وانسكرت !!
سمعنا بي كسرة يا ابوعلي .. وسمعنا بي اكسر منو .. وسمعنا بي ( كسير) مقصورة ناس ود الياس
الكان بترجف خوفا من السقوط فحولها الوالي الي مقصورة ترقص فرحا من الجمال ولكن ولا كاس ممتاز
ما شافتو !! حتي البطولة الوحيدة والمشيحيدة شالوها في مقصورة الهلال ..
وسمعنا بالموية الانكسرت في استاد المريخ ايام المطرة وخلت دحية يغرف والدقير يقرف وقريش يغرف
.. حالة تقرف !!
سمعنا بي بتاع الموية الكان عايزين ( يكسروا ) في نادي المريخ قام طلع ليهم عقد البيع !!
عاملين عقد لبتاع موية وغالبكم تعملوا عقد لي لماسورة !!
سمعنا بالتكسير العشوائي وسمعنا بي كسر القزاز.. وربنا يسترنا ويستركم سمعنا بالكسر في السوق
الدخل الناس السجون ..! لكن كسرة ماسورة في الكورة دي ما سمعنا بيها ..!!
والناس خلاص قايلين الكورة ماشة درون وعايزين ضربات الترجيح امكن تلحق صلاح ادريس
( امات) طه علي طريقة الاهلي شندي والشمالي عطبرة ..
والجماعة خلاص قالوا نتعادل مع الهلال والموضوع يكون مريح عشان نحن محظوظين في
ضربات الترجيح ..
ناموا في العسل لمن حصل الحصل .. قام يوسف عكس الكورة ونطت عليها الماسورة وانكسرت ..
يا محمد كمال ما نطيت معاه لييه ؟ قال .. انا قايل جمال الوال متفق معاهو برضو ؟!
موية ماسورة ايفياني من عالم تاني .. اول حاجة فيها ملح غريب .. ما موية بحر !! مش ايفياني
لاعب كرة شاطئية .. وفيها لون ورائحة .. تقول ما موية .. ريحتها نيجيرية ولونها ترابي ..
مش سيدها حفيان .. شايل الطين في كرعينو !!
ومع حفياني .. مشت حتقدر تلبس تاني ..!!
بالمناسبة ايفياني بلبس مقاس كم .. مقاس 43 .. 43 بوصة !!
قون ماسورة اتنين بوصة .. بوسة لي قلبو وبوسة لرجلو .. المصيبة ده قلنا عيدوا ليهو كشف القلب
ولبسوا كدارة .. طع ثقيل ثقالة .. قال انا بجيب القون بي راسي .. الا تشوفو لي طاقية ..
والله مية المية .. لا نفع معاهو باشا ولا عطية .. انتو سعد ده ادوكم ليهو عطية مع الزهراء !!
ومن الواسوق ابت تطلع .. من الابرول ابت تطلع .. من المدفع طلع خازوق .. مواسير البلد زادت ..
والله نحن ما سورتنا دي مرة مرة بتجيب موية .. لكن ماسورة (اوبينا) دي في صحراء ما لقيناها ولا
نقطة ساكت يا كافي البلا .. وقال عامل ضفيرة !! حلوة منك والله يا كابتن !! انا قلت باجيو ده الجابو
كورة المواسير دي شنو ؟!!
قلنا لي همد ..الماسورة المكسورة دي عايزه ليها مجاري .. قال انا مالي ؟ انا ذاتي المعتمد الجديد
ده وقفني وعمل لي تحقيق !!
قلنا لي حسن محجوب شوف لينا الوالي يعمل لينا مجاري ؟! قام جاري ..
قلنا لي احمد محمد احمد شوف طريقة لي ماسورة ايفياني دي ؟ قال هو القون جابو ايفياني !!
مسكين احمد كان قايل المريخ بغلب الهلال في الدوري الممتاز .. طلع زعلان لكن الكاس صبروا شوية ..
قام كتب في العمود ثلاثية للابادة .. قامت المكسورة انكسرت ..
والله جنس موية .. سوبا بس !!
قالو احتياطي المريخ اخير من احتياطي الهلال .. طلعت مواسير الهلال احسن مواسير ..
يكون الجماعة ديل يا عصام مسكين غشوا في المواسير برضو !! متعودة .. دائما ..
الخندقاوي الصغير ( ناصر ) ربنا رزقوا بي بت نهار امس .. خلاها عمرها ستة ولا سبعة ساعات
وجري فرحان دخل الكورة .. قايل المريخ بغلب .. بعد الكورة سالوه حتسمي بتك منو ؟ من غير ما يشعر
قال ليهم ( ماسورة )وكل ما سالت عليك يقولوا مكسورة .. ليه الزعل والضيق .. ما قلتو ماسورة !!
كنت عايز اعمل زي مزمل وكل يوم اجيب صورة لي لاعب من لاعبين الهلال في العمود ..
لكن خفت الماسورة دي تنقط في حكايات وتبقي حكاية ..
وحكاية الماسورة حارة خالص .. اقصد كاسرة خلاص |
| |
|
|
|
|
|
|
|
|
|
Re: أفضل صحفي رياضي (Re: خالد الجبل)
|
ثقالات البلنتي
Quote: الكلام مافي البلنتي..!! أحرجتونا مع ضربات الجزاء..
لم يكن الخبراء والعلماء الذين أثبتوا النظرية الجديدة في عالم كرة القدم (الكورة تعادل وهزيمة ) يحتاجون للقول أن لكل قاعدة شواذ.. لذلك فإن الذين اتصلوا بي بعد انتصار المريخ علي الاتحاد مدني سائلين عن أسباب هذا الفوز وهل يؤثر علي النظرية الجديدة.. قلت لهم أن لكل قاعدة شواذ وإن الاصل هو (التعادل والهزيمة)، أحد القراء الثقلاء قال لي الجماعة شعارهم بقي (هزيمة.. فوز.. تعادل.. تعادل)..
أنا شخصياً أخاف أن تنهار النظرية الجديدة ايضا لتظهر بدلا عنها نظرية (الكورة درون) والله ودنوباوي يا (نهاد شاخور) لما كان في الاول ما كان بدرن قدر كدا !!
إنتو جمال الوالي دا مع (المؤتمر الوطني) وللا مع (العدل والمساواة)..؟
شعار المؤتمر الوطني.. حزب قائد لوطن رائد..
شعار العدل والمساواة.. الجميع متساوون في النقاط !!
نقطة نقطة الليل نعدو..
نحن في المريخ إخوة نعشق النقطة ونهوى..
واحد ثقيل رسل لي رسالة قال فيها (تعادل.. نقطة.. سطر جديد)..
ولا جديد !!
أنا ذاتي ما عارف أكتب ليكم شنو؟؟
نفس الموضوع بتكرر بعد كل مباراة للمريخ.. وقيل بعد كل تمرين..!!
ريتشارد يتعرض لهجوم قاسي من الجماهير..
حافظ يشتبك مع الجمهور..
قذف حافلة لاعبي المريخ بالحجارة..
الشرطة تفرق متظاهرين محتجين علي استهتار اللاعبين..
وارغو يواصل الاداء السلبي..
سعيد السعودي أسوأ لاعب في المريخ..
المريخ يواصل نزيف النقاط ويتعادل..
تشكيل غريب وتبديلات خاطئة..
الناس ديل ما بجددوا.. نحن نجدد كيف..
لا.. في حاجة جديدة (لنج) يا خالد ؟!!
شنو يا أبوالثقالة ؟!!
بلنتيييييين.. بيد واحدة.. ومن حكم واحد.. ومساعد واحد.. وبي هدف واحد..
الجماعة سجلو (سبت ليبرادو؟)..
سجلوا ولحقو امات طه !!
مصير سبت مصير كلتشي..
الزول دا كان معانا كويس.. يدينا بلنتي بنجيب قون بنطلع غالبين..
مالو في المريخ.. حصل ناس كلتشي!!
الناس ديل كلو ما يسجلو نجم كويس يفشلوا.. كلتشي وريتشارد وايفوسا ووارغو وصلاح الامير..
سايقا صلاح.. سايقا صلاح..
ودي قصة تانية.. أي لاعب يشطبوا يطلع كويس !!
يعني ممكن السنة الجاية.. عنتر يهزم المريخ علي طريقة صلاح !!
مسكين (موبوتو).. الدور عليهو.. ايفوسا كان ثاني أفضل لاعب في البطولات الافريقية.. وارغو كان هداف دوري الأبطال..!!
انتو ما بتخلو وارغو (يشوت) البلنتي ليييه؟
بالجوز يا سبت.. والله كتيرة..
والغريبة كل اللاعبين دخلو مع ايداهو وانت زي الما شايف!!
المشكلة ما في البلنتي..
المشكلة يدوك اتنين بلنتي وما تطلع غالب..!!
معقولة بس.. أحرجوتنا مع ضربات الجزاء..!!
يعني الهلال بي بلنتي واحد.. وفي الحصاحيصا طلع غالب..
كده بقي يا همد.. اتضح جليا إنو القصة ما قصة بلنتيات..
واتضح أكتر إنو القصة مافي البرمجة .. يعني بلنتي وأدوكم بدلو اتنين.. وبرمجة خلوكم تلعبو قبل الهلال بي يومين..!!
ولاعبين وجابو ليكم من الهلال خمسة ستة سبعة لاعبين..
انتو يا همد عايزين ليكم رئيس ومساعد رئيس..!!
عليكم الله مساعد الحكم أبوضربتين جزاء دا لقيتو وين ؟
نتكلم معاكم كدا لمن نسينا مباراة حي العرب..!!
عرب منو يا خالد..
قوووول انتهت درون.. قول اتغلبنا..!!
شنو يعني..
ما المريخ حيتعادل مع هلال الساحل ويتغلب من الميرغني !!
شعارنا.. تعادل هزيمة !!
الاتحاد السوداني رسل إسم الهلال و(ضلو) للاتحاد الافريقي..
القصة دي بقت واضحة ..
خمسة سنين الهلال.. سنة المريخ..
خمسة سنين الهلال.. سنة المريخ..
يعني ممكن الاتحاد يرسل اسم الهلال في دوري أبطال أفريقيا لي خمسة سنين قدام..!!
وخمسة سنين عذاب.. خمسة سنين ألم..
أقول ليك حاجة.. أسمع الغنية الجديدة دي.. من تأليف واحد ثقيل اسمو مدثر علي البحر.. ومن غناء فرقة (الصفوة) توزيع الحجارة للموسيقار.. خالد ليمونة..
من أمدر يا ربوع ممتازنا .. نحييك وانت واجع راسنا..
في غربك فريقي اتنكب.. وفي شرقك حي العرب
شمالك ثورة غضب.. وفي (الرد) فريقنا اتغل ..
شعارنا.. هزيمة.. نصر.. تعادل وبالعكس..
افتقدنا في مباراة الخرطوم الهدف العكسي لأحمد الباشا !!
نفسي أعرف حافظ دا (حافظ ) شنو..
أنا زعلان لي ريتشارد.. بعد 15 سنة في ثانوي.. بتقولي اقعد!!
مسكين ريتشارد.. كل سنة كان بحتفل بالممتاز!! بقي كل يوم بحتفل بي حجر جديد!!
كملتو (حجار) الطابق التالت !!
كاربوني (ابو منديل) احتج علي عدم وجود عدد كافٍ من اللاعبين وقال ما عندو غير لاعبين السنية في الاحتياطي !!
مالهم لاعبين السنية يا كاربوني ؟ عيبهم لي..
ما شفت منير أمبدة ولا اتفرجت في النعيم ولا ساكت عينك وقعت في بركية ولا حتي صدام الدروشاب.. بالمناسبة سامي عبدالله كان في سنية المريخ، عمر بخيت من سنية الهلال..
سنة حلوة.. أقصد شهر حلو..!!
عشان (ريكاردو) تمت اقالته من الاهلي القطري..
جيبو ريكاردو مع يوسف محمد وكلتشي وريتشارد ومجاهد وسجلو علاء الدين جبريل بعد شطبو من الشمالي.. إمكن تغلبو الخرطوم !!
من باب الكرم لأننا أسياد البلد.. ندعوكم اليوم للاستمتاع بلقاء الهلال وحي العرب..
الهلال العريق صاحب الاسم الوحيد في مواجهة الأصيل حي العرب صاحب الشعار الازرق والابيض..
تعالو اتفرجو.. شجعو حي العرب..
عشان ما تنسوا التشجيع.. يعني حتنتظروا مازيمبي للسنة الجاية؟!!
أدرنكم ..!
|
| |
|
|
|
|
|
|
|
|
|
Re: أفضل صحفي رياضي (Re: خالد الجبل)
|
ده شكله كد أخونا وصاحبنا خالد عز الدين
فهو خريج إعلام الإسلامية ... وكان رئيس تحرير
جريدة إسمها الغد فى أوائل التسعينات وأصدر صحيفة
سودانايل أول جريدة تصدر عبر النترنت وما زالت من
المواقع السودانية المميزة بفضل الصديق طارق الجزولى ...
خالد عز الدين
صحفى (هلالابى) ثقيل ووغد
له التحية ... إن كان هو المعنى بالبوست
| |
|
|
|
|
|
|
|
|
|
Re: أفضل صحفي رياضي (Re: خالد الجبل)
|
سلام
والله مع إني هلالابي لكن لا يوجد صحفي رياضي في السودان أفضل من عبد المجيد عبد الرازق
رجل موضوعي لا يعرف المهاترات و يحبه الجميع هلالاب على مريخاب
| |
|
|
|
|
|
|
|
|
|
Re: أفضل صحفي رياضي (Re: احمد محمد بشير)
|
| Quote: لايوجد أفضل مِن الموسوعة الشامِل الكامل مزمل أبو القاسم اِطـلآقا |
الفرق بين خالد عز الدين ومزمل شاسع
مزمل دا ما حصل كتب عن لاعب مريخي إلا ولحقه أمات طه
من زمن ما كان بيكتب العجب الرجل الفضائي
العجب ما نزل الواطة الا بعد خمسة سنين (مدمر أبو القاسم)
| |
|
|
|
|
|
|
|
|
|
Re: أفضل صحفي رياضي (Re: خالد الجبل)
|
| Quote: والله مع إني هلالابي لكن لا يوجد صحفي رياضي في السودان أفضل من عبد المجيد عبد الرازق |
عبدالمجيد عبدالرازق أفضل صحفي مريخي وليس رياضي يا ابو الخلد بدون تعصب
كتاباته جادة وموضوعية
| |
|
|
|
|
|
|
|
|
|
Re: أفضل صحفي رياضي (Re: خالد الجبل)
|
أبو الخلد يا عمكـ
لا والله عبد المجيد الأفضل على الإطلاق ..
غالبية كتاب الهلال و إن كانو موضوعيين في معظم الأحوال لكن كتاباتهم لا تخلو من التهاتر إلا من رحم ربي أما بقية كتاب المريخ بخلاف عبد المجيد وكم نفر كده ديل أحرقهم بجاز طوالي .. جهل و سخافة و طولة لسان و عداء غير مبرر تجاه الهلال يصل لمرحلة الكراهية ...
عبد المجيد تجده مهموم بالكرة السودانية أكثر بكثير من إهتمامه بهلال مريخ
أقرأ الزول ده كويس يا خالد و ما تظلم حقو
| |
|
|
|
|
|
|
|
|
|
Re: أفضل صحفي رياضي (Re: خالد عبد الله محمود)
|
تحياتي لصاحب البوست وضيوفه
ومع كامل تقديري لكل الآراء الواردة هنا
فانني اري أن افضل صحفي رياضي هو الاستاذ الفاضل (ياسر عائس ) صاحب عمود (وهج الحروف)
الاستاذ ياسر عائس صاحب عبارة نظيفة ومسئولة وحتي مداعباته الرياضية مع المريخاب لا تخرج عن حدود الادب واللياقة
ياسر عائس في تقديري الافضل في بلاط الصحافة الرياضية
له باقة من الورد
| |
|
|
|
|
|
|
|
|
|
Re: أفضل صحفي رياضي (Re: خالد الجبل)
|
مع احترامي للصحفي المعني
لكن في رأي المتواضع لا يوجد صحفي رياضي واحد يستحق ان نقول عنه انه موضوعي والسبب التدهور الحاصل للرياضة السودانية تتحمل الصحافة الرياضية اكثر غيرها في التهور.
| |
|
|
|
|
|
|
|
|
|
Re: أفضل صحفي رياضي (Re: وليد شريف)
|
| Quote: لا يوجد صحفي رياضي واحد يستحق ان نقول عنه انه موضوعي والسبب التدهور الحاصل للرياضة السودانية تتحمل الصحافة الرياضية اكثر غيرها في التهور. |
أتفق معك يا وليد شريف علي أن الإعلام الرياضي له دور كبير فيما آلت اليه كرة القدم في السودان ولكن هنالك إستثناءات
فمثلا في الهلال
خالد عزالدين وياسر عائس
وفي المريخ
عبد المجيد عبدالرارزق ومأمون أبو شيبة
راجع كتابتهم عند النصر وعند الهزيمة
أما خالدعزالدين فهو من يجيد قراءة الواقع جيدا وحتي عندما خسر الهلال أمام مازيمبي وتحدث الناس عن الدجل والسحر كانت كتاباته بعيدةتماما عن ذلك
تابع خالد عزالدين وستعرف تماما.
| |
|
|
|
|
|
|
|
|
|
Re: أفضل صحفي رياضي (Re: وليد شريف)
|
كتب مزمل أبو القاسم
Quote: * أقل من خمسمائة مشجع شاهدوا لقاء صقور الجديان والسناجب.. وهتفوا بفشل قسطنتين.
|
وكتب خالد عزالدين
Quote: سنتابع باهتمام مباراة منتخبنا مع بنين لنرى الي أي مدى يسير مدرب المنتخب قسطنطين في طريقه لبناء فريق قوي للمستقبل..
لقد استضاف الأستاذ رضا مصطفي الشيخ في برنامج الرياضية يوم الجمعة الماضي مدرب المنتخب في حلقة جيدة أجاب من خلالها المدرب بمنطق عالٍ وفهم متقدم علي كل الاسئلة التي طرحت عليه وفي مقدمتها معاداة المدرب للإعلام فقال إن الاعلام يبدل من أحاديثه أو يبرزها بصورة غير صحيحة وضرب العديد من الامثلة علي ذلك ونحن نؤيد المدرب في هذا الحديث خصوصاً وأننا نتذكر ما كتبته بعض الصحف عن العلاقة السيئة بين المدرب واللاعبين وها هم اللاعبون يؤدون بروح قتالية في كل المباريات.. كما أن مهند الطاهر الذين قالوا إن المدرب وصفه باللاعب السئ الذي يجعل المنتخب يلعب ناقصاً في حال مشاركته ما زال لاعباً في المنتخب رغم أن قسطنطين أبعد أي لاعب لا يرغب فيه وفي مقدمتهم أفضل لاعب في الدوري هذا الموسم عمر بخيت..
لقد كشف الحوار التلفزيوني عن قوة شخصية قسطنطين التي تحتاجها الكرة السودانية وفي نفس الوقت كشفت عن ظلم الإعلام لهذا المدرب الذي يجتهد ويعمل بإخلاص من أجل السودان ونرد له التحية بأسوأ منها..!!
لقد تحدث الإعلام عن طرد المدرب للمدرب محمود جبارة (السادة) فاتضح أن المدرب استغنى عن السادة لأن السيد السادة يترفع عن عمل بعض الأشياء للمنتخب لأنه مساعد مدرب، بينما يعمل قسطنطين علي توزيع المياه للاعبين دون أن يحس بحرج..!!
مرة أخرى نقول أننا لسنا مع قسطنطين في كل تصرفاته ولكننا ندعمه بقوة لأنه يعمل بإخلاص ولأنه لم يأخذ فرصته الكافية لاثبات وجوده، ولأننا نرى أنه قدم للكرة السودانية في فترة وجيزة نموذجاً للانضباط ووضع المنتخب في الطريق الصحيح..
نشجع المنتخب اليوم بحرارة ونساند النجوم الشباب وبالتوفيق لكل صقور الجديان.. |
لكم أن تقارنوا بين صحفي ناقد هدفه إرتقاء الكرة في بلادنا وصحفي يكتب بردود أفعال الجماهير !!
| |
|
|
|
|
|
|
|
|
|
Re: أفضل صحفي رياضي (Re: خالد الجبل)
|
لو قسمنا الصحفيون الي مريخ هلال يمكن ان نقول ان مزمل ابو القاسم هو الصحفي المفضل لكل جماهير المريخ وخالد عز الدين بالاشتراك مع اخرين هو المفضل الاول الي جماهير الهلال ومع حزننا علي عدم وجود صحفيين بلا انتماء الا انني اعتقد كما اعتقد اخرون ان العملاق عبد المجيد عبد الرازق هو الاول علي الاطلاق في الدفاع عن الوان السودان ليس مجرد ابداء الراي بل بالاجتهاد صحفياً في خدمة منتخب بلادنا متعه الله دوما بالصحة والعافية مع الاحترام الكامل لكل الصحفيين وفي مقدمتهم خالد عز الدين ومزمل ابو القاسم علما انهما لا يقصران تماما في الدفاع عن صقور الجديان وان طغي لونهما الرياضي في بعض الاحيان
مع شكري
| |
|
|
|
|
|
|
| |
خالد الجبل
Giwey
احمد محمد بشير
خالد عبد الله محمود
عبود عبد الرحيم
عبد الحميد عوض
فيس بوك
تويتر
انستقرام
يوتيوب
بنتيريست