|
|
 سيد احمد الحردلو......واحد جميل
|
اعجبتني هذه القصيده
للشاعر سيد احمد الحردلو الي مصطفي سيد احمد (مصطفي المصطفي)
- 1 -
تانى قام واحد جميل فى بلدنا ... ماتْ
وكان بغنى للمساكين .. والمسولتين .. والحفاتْ
وكان بغنى للمنافى .. والعصافير .. والرعاتْ
وكان بغنى لى بلد فى الحلم ... جاي .. أغنياتْ
وكان بطنبر .. وكان بدوبى .. للحياةْ
- 2 -
تانى قام واحد ملك ... روّح .. وفاتْ
وكان ملك فى الريد ... وإنسان فى الصفاتْ
وكان مهاجر فى دموع كل البكاتْ
وكان وتر مشدود ... ومسكون دندناتْ
وكان - عليه سلام - تقول مازول حياةْ
- 3 -
يا مصطفى .....
فاكر الجماعة الكانوا ساكنّك دوام
من منفى لى منفى
ومن عود ... لى سفرْ
فاكر العصافير المسافرات دون جواز
فاكر اللى داجّين فى المطرْ
.... عبدالرحيم ... وهلم جرْ
فاكر القطر
فاكر النخيل .. فاكر الحراز
... الليلة كانوا جميع هناك
قسماً يمين .. كان الجميع باكين عليك
كان المطار فارش عليك
كان الجميع مشتاق إليك
ياسلام عليك
لمّان تكون زولاً عزيزْ
عنْ ناس عزازْ
- 4 -
يعنى كان لازم تفوتْ
والحزن مشرور فى البيوتْ
والدنيا مازال فيها حوتْ
.... وفيها لسع .. عنكبوتْ !!
.... يعنى كان لازم تفوتْ
وتخلّى أوتارك سكوتْ
ولسة عندنا ريد جديدْ
ولسة عندنا ليك قصيدْ
...... يعنى كان لازم تفوتْ
وتخلى هذا الحب يموتْ !
- 5 -
ياسلام عليك
لمّان تكون زولاً عزيزْ
عنْ ناس عزازْ
يا سلام عليكْ
|
|
 
|
|
|
|
|
|
|
|
Re: سيد احمد الحردلو......واحد جميل (Re: انعام حيمورة)
|
محمود جنا طه
للشاعر الأستاذ سيد احمد الحاردلو
-1-
محمود جنا طه
واحد من الاحياء
مع انوعمرى انا
لم امدح الاحياء
بس يا سلام .. سلم
زول .. يستحق القول
والحمد والتبجيل
-2-
عارف محمود دا
لو كان فى بلد
غير هاذها السودان
كان توجوه ملك
وكان عمدوه امام
-3-
شوف يازميل الزول
وكتين يكون مشغول
بالمولى .. صح بالصح
وكتين يشوف فى الدين
الجاى والجايين
من العديل والزين
وكتين يسوى الدين
شيتاً محبة .. ولين
كما زمان الرسول
عليه صلى الله
وجملة الصاحبين
ما فيه قسر وجبر
ما فيه زنديه
ما فيه شنق وجلد
ما فيه ايديه
ما فيه الا الحب
ما فيه غير الجمال
ما المولى حب وجمال
-4-
شوف ناس فلانين .. ديك
سوولنا كيف الدين؟!
شيتاً قطع يدين
شيتاً شنق وسحل
شيتاً رصاص وكتل
وشوف كمان دايرين
يجونا بى اللفة
استغفرك يا زين
-5-
تصور الدنيا
لو داك اصبح امام
حرم يهاجر النور
وسكن معانا الضلام
حرم يموت الكلام
فى ايها شافع
داير يسك الحمام
ويتاتى للعصفور
حرم نموت بالزور
والدنيا تبقى قبور
-6-
محمود جنا طه
ملك وملكه علم
وفقير وفقره علم
ويمين .. يمين الله
لو عندى ايد لاحقه
اديه تاج الرجال
وابنيلو فى الخرتوم
فوق البحر تمثال
لكين خسارتى انا ..
الما عندى ايها حال
-7-
هذا اخوى محمود
واحد من الاحياء
مع انو عمرى انا ..
لم امدح الاحياء
بس يا سلام .. سلم
زول يستحق القول
والحمد والتبجيل
كنشاسا 1975
http://www.alfikra.org/article_page_view_a.php?article_id=52&page_id=13
| |
|
|
|
|
|
|
| |
انعام حيمورة
عبدالله عثمان
سجيمان
فيس بوك
تويتر
انستقرام
يوتيوب
بنتيريست