ارجو ان اجد اجابات واضحة يمكنني من خلالها ايصال تعريف لا سفسطة فيه الي بنتي وابني وانا ما زلت علي وجه البسيطة كوني المسئول عن سودانيتهم.. ؟؟ ما في الكتب والتاريخ والافلام والحواديت والقصص والفضائيات عن السودان صار يشوش الدماغ او لا يساعد في تعريف محدد؟؟
امل في اسهامكم ...؟؟
11-03-2009, 10:04 AM
هواري نمر هواري نمر
تاريخ التسجيل: 04-29-2009
مجموع المشاركات: 1833
عنوان مكتوب أمام ( كلمة ) الجنسية ... علاقتكـ بيهو تعتمد على علاقتو بيكـ ... ضرب بيكـ الحيطة مما قمت سيظل ( كلمة ) أمام الجنسية .. أداكـ قيمة فيهو وبره منو !! بتعاين للكلمة المكتوبة امام الجنسية بموده كلما جيت تعمل تأشيرة خروج منو .. لو اتذكرتو بي حبانكـ الفيهو بتجري الدموع من عيونكـ .. بي مناسبة ومن غير مناسبة ..!! ولو اتذكرتو باليعملو في حبانكـ الفيهو بتتأوه بس وتحجز مقبرتكـ محل ما " ركت " بيكـ الدنيا
التعريف بالوطن في حالة السودان يصبح نسبي ولا ثوابت له ومهما أتفقنا على تعريف كأضعف الإيمان يبقى السؤال المؤرق هو :
كيف نستطيع إقناع الأبناء بهذا التعريف
سألت أولادي هذا السؤال فرد أصغرهم بالحرف الواحد: ( هو أخيس مكان يمكن أن نذهب إليه ) صدمت من الإجابة لأننا دائمًا نزرع فيهم أن الوطن هو أجمل القيم وهو وهو ... ولكنهم أذكى وأعمق منا فيجب أن نملكهم الحقائق عسى أن يكون بيديهم الحل
11-03-2009, 04:03 PM
مهيرة مهيرة
تاريخ التسجيل: 04-28-2002
مجموع المشاركات: 946
Quote: عنوان مكتوب أمام ( كلمة ) الجنسية ... علاقتكـ بيهو تعتمد على علاقتو بيكـ ... ضرب بيكـ الحيطة مما قمت سيظل ( كلمة ) أمام الجنسية .. أداكـ قيمة فيهو وبره منو !! بتعاين للكلمة المكتوبة امام الجنسية بموده كلما جيت تعمل تأشيرة خروج منو .. لو اتذكرتو بي حبانكـ الفيهو بتجري الدموع من عيونكـ .. بي مناسبة ومن غير مناسبة ..!! ولو اتذكرتو باليعملو في حبانكـ الفيهو بتتأوه بس وتحجز مقبرتكـ محل ما " ركت " بيكـ الدنيا
الاخ الكريم ابوبكر:
أنا غايتو موافقة على كلام عمران اخوى الفوق الاقتباس دة!
تحياتى
11-03-2009, 04:19 PM
abubakr abubakr
تاريخ التسجيل: 04-22-2002
مجموع المشاركات: 16044
الفضليات والافاضل :سمية مهيرة هواري عمران ...شكرا لا سهامكم ان الامر جلل والقادم يستوجب اليقظة فاشكال الوطن الارض ربما تعدد او تتبدل وتتغير فانا امل في اسهام اكبر من روادهذا المنبر"ان وقع كلامي دة في عينكم " ربما يساعد اجيالنا القادمة في تحديد معالم وطنهم او اوطانهم
11-03-2009, 05:24 PM
عزام حسن فرح عزام حسن فرح
تاريخ التسجيل: 03-19-2008
مجموع المشاركات: 8891
أمانة عليك يا بلد وِكتين أجيك وأشُمْ عبقِك في التُراب مختوت ... وأشوف ناسًا نُحاف عُروقُم بارزة لِبره زي مسار النيل راسمة خُطوط ... تـكَـنـْكـِشـي فِيا ما تخليني تاني أفوت ... ويِضيع عِنواني ... وأصبح بلا عِنوان ... بلا جواب ... بلا مخطوط ...
عِندي أخو ما شقيق ود أبوي ... وكتين مات أبونا ... ورثنا غُرفة واحدة في حوش كبير ... أنا وأخوي ود ما كان البيناتنا عامِر ... أمو أكانت بِتكيد أمي ... وبِصراحة كِده ... أمي زاتا ما قصرت ... أها أنا وأخوي الصباح الصباح صوتنا واصِل آخِر الحِله ... شتايِم ونِبيذ ... المَوضوع إتطَور ... بقى فيهو خبِت عديل كِده ... أولاد خالتي واقفين معاي وأولاد خالتو واقفين مع أخوي ... الأُسرة إنشقت تب ... والحِكاية مع السِنين جابت ليها أحقاد ... الحاجة المُتأسف عليها ... إننا ورثنا أولادنا أحقادنا ... إنتهى الأمر إنو ولدي في الإصلاحِية هسِع ... ضرب ود عمو بِحجر ... بعد شهرين مات ... قُلنا أخير الغُرفة دي نقسِما ونبقى جيران ... يِمكِن الحيله دي تنفع ...
هو تلك المساحة الجغرافيه التي تتفق مع مساحات المشاعر في داخلي.. هو ارتباطي التاريخي الذي يعني بحاضري وأمن مستقبلي.. احبه واعيش فيه بأمان ولا تضيع فيه هويتي.. افديه بعمري لانه أعطاني العمر ايضا..
بيتهيألي كده!
تحياتي..
11-04-2009, 09:34 AM
abubakr abubakr
تاريخ التسجيل: 04-22-2002
مجموع المشاركات: 16044
شكرا كثيرا قريبي عزام وصديقتي الملكة مني .... بحثت عن هذا الموضوع في قائمة سودانيزاونلاين فوجدته قد انسحب الي اسفل الصفحة الثالثة واكيد كان سينسحب الي الي اسفل السافليين فموضوع كهذا ندفن نحن اهل الارض الماهلة التي تحملت اوزارنا كثيرا رؤسنا كذلك في رمالها ولا نستحي من ذلك....قريبا ما كان يتطاول به اهل الارض الماهلة الساهلة علي غيرهم بانهم من ارض المليون ميل في سبيله لان ينسحب الي اسفل والغريب في الامر نسيو اول حصص الحساب في الاولية والاساس من جمع وطرح فماذا عن ال 20الف وزيادة في حلايب ومثلها شمال خط 22 عند حلفا وشرقا عند جبال بني شنقول وغدا مئات الالاف من الاميال المربعة ستذهب جنوبا وغربا وووووو .. التعريف بالوطن مهم ربما يعيد الي العقول الساهية اللاهية بعض من صحيان .......اصحو ياعالم ....
رشّة خريفا و زِهْرها رَمْضِةْ وَطَاتا و قـُــرّها طينا .. ورمالا ، و تِبرها لوحَهْا ، كتابا و سِفرها أكرم أنام من جذرها ناسَنْ بِـَتْسُبر غورها لو حرّت بتدخل أورها وإن بَِرَدَتْ بتسفر سرها
هذى البلاد مين قدرها كل البلود ما قدرها بسعة بحارا وبرّها ضاقت شديد بى كبرها كترت علي .. قسّمتها! بين البطون أوصدرها
مين قدرها ؟ هذي البلاد من دََرّها تسقى الطيبين والضَّرّها لوتعطش تموت فى نهرها ! يا نهرها إيدا وفؤادا وضَهْرَهَا
هَذِي البلاد مين قدرها أغنى البِلِود بى فَقَرها لو جاعت تنوم بى سُترها وإن شِبعت بتحزِم أمرها
لله دَرّها زانت جيود بى دُرّها و تجرى السيوف فى نحرها ! ضوّت أصابعها باليقين مدت ايديها اليمين رجعت مقلّع ضفرها فيا قهرها
هذى البلاد .. من عُسرها مرقوا الولاد من حِجرها .. تكتم بكاها فى جهرها .. تدفن شهيدها فى سرها تجبر جروحها و كسرها تكسر قيودها وأسرها و تطلع تزيّن فجرها
هذى البلاد يا قدرها كل البلود ما قدرها ..
11-04-2009, 10:06 AM
حاتم علي حاتم علي
تاريخ التسجيل: 11-04-2009
مجموع المشاركات: 1897
Quote: التعريف بالوطن في حالة السودان يصبح نسبي ولا ثوابت له ومهما أتفقنا على تعريف كأضعف الإيمان يبقى السؤال المؤرق هو :
كيف نستطيع إقناع الأبناء بهذا التعريف
سألت أولادي هذا السؤال فرد أصغرهم بالحرف الواحد: ( هو أخيس مكان يمكن أن نذهب إليه ) صدمت من الإجابة لأننا دائمًا نزرع فيهم أن الوطن هو أجمل القيم وهو وهو ... ولكنهم أذكى وأعمق منا فيجب أن نملكهم الحقائق عسى أن يكون بيديهم الحل
الاستاذة سمية ما هو مقتبس منك حقيقة مؤلمة و واقعية و تدل على وعي أجيالنا الحديثة بمدى كذبنا علهم ، فهم يعرفون جيداً الفرق بين الوطنية و المواطنة
هذا ما كتبته في غير هذا المكان يا أستاذ أبوبكر أتمنى ان يسهم معك في تعريف هذا (الوطن) :
Quote: تجربة الانتماء لوطن تجربة مهمة لاكمال دائرة تحقيق الذات في هرم ماسلو للحاجات الانسانية. المشكلة في الاوطان الناقصة - كالسودان - حيث ان الانتماء يكون للاهل و مكان مساكنهم بدون تحقق - العقد الاجتماعي - تنازل من حقوق و قيام بواجبات مقابل الحصول على خدمات.
تجربة - الانتماء - لوطن ناقص المواطنة - تفرز تناقضاً هداماً لمفهوم الوطن ذاته
حيث يحس الفرد بحنين - و انتماء - للوطن ، و لكن في المقابل تصرفات اهل الوطن - حكوماته و سلطته - من انعدام حرية التعبير وعدم العدل و التهميش و الظلم و عدم توفر الخدمات و سبل كسب العيش و بالتالي المقدرة على الحصول على الضروريات - الاكل و الشرب و المسكن و الزواج و الامن ، في مقابل وفاء الانسان بمطلبات - العقد الاجتماعي - دفع الضرائب ، اداء الخدمة العسكرية ، واجبات المواطنة ، تؤدي بالانسان الى السقوط في فخ حالة تناقضية بين كره الوطن - اللاشئ بحسابات المواطنة - و حب الوطن الخيالي المرسوم في الاناشيد الوطنية و كتب المطالعة و حكايا الاباء و الجدات و كتب التاريخ.
و مهما هاجر و تغرب الانسان - و نال الاحترام و المعاملة الانسانية و العدالة الاجتماعية - في اوطان "بديلة" ، يظل الاحساس بللا انتماء مسيطراً على الحالة الفكرية - النفسية - للانسان كما ان الانتماء للاوطان - البديلة و التي قد يحمل البعض جوازات سفررها و جنسيتها - يكون منقوصاً لتقلص حلقة مهمة في هرم ماسلو و هي الانتماء لمجموع بشري اولي هو الاهل و الاصدقاء و الاحباب - العشيرة القبيلة-و على نطاق اصغر - الاسرة.
كما انه من أسوأ التناقضات التي - قد يمر بها الانسان - داخل وطنه تناقض الهوية ، حيث يكون - جنسك قبيلتك لونك لغتك لهجتك ملامحك - موضع احتقار و سخرية من بقية مكونات الوطن ، هنا يصاب الانسان في مقتل ، فهو يطمح لتحقيق ذاته داخل الوطن لكنه يجد ان المكون الأدنى في هرم حاجاته - الانتماء لمجموعة - ينزل من قدره بشدة وسط المجموع الاكبر - الوطن- مما يقدح بشدة حتى الحصول على الاحترام و التقدير الحاجة الاهم في الانتماء لمجموع و هي العتبة الاهم في اطار تحقيق الذات ، فلا الانسان حقق ذاته و لا هو يستطيع الفخر بمكونه الذاتي مجموعته الاثنية او العرقية - اهلو يعني بالعامية.
خارج السودان - المواطنة تقييم على درجتة وطنيتك - بمعنى ما تنال من حقوق يرتبط وثيقاً بما تقوم به من واجبات.
هناك سودانييون كثيرون في المنافي و الغربة نالوا درجات اعلى من الاحترام و التقدير لما قاموا به من جهود مخلصة لتطوير تلك الاوطان - البديلة - و من اجل الانسانية جمعاء علماء شعراء ادباء مفكرون ، بينما وطنهم الام - السودان - لا يحتفي بهم الا عندما يعودون اليه في توابيت مقفولة.
الأستاذه سمية موضوع (الوطن) و (المواطنة) يتعقد اكثر معك عندما تلد (ابناء) و تربيهم في (الاوطان البديلة) هنا يصبح لزاماٌ عليك ان تكون كاذباُ - درجة أولى - فتقولي لهم هذا (الوطن البديل) الذي اعطاكم الجنسية و الجواز و الانتماء و التعليم و الرعاية الصحية و الاجتماعية الخ هو (وطن بديل) ساكت ، و هناك وطن (يقبع خلف المحيطات) حيث (الصحاري السمر) و (الحسناوات البكر) و (طيبة الاهل و المحنة) و (الخريف و الخير) و (الحق و الجمال) !
المشكلة (الكذب المتل دا حبلو قصييييييير) حتى لو مامشو (السودان اجازة) ، لو فتحوا الاخبار ساكت حايشوفوا الماسي السودانية (موتى دارفور) و (نسبة فقر 95% من السكان) و (جلد الصحفيات و النساء على ملابسهم) و (ناس مكفراتية شايلين سيوف و دايريين يقتلوا الناس من طرف )
و الكثير المثير البايخ المعروف داك خليك من دا كلو : لو سألوك : " يا ماما السودان لو - سمح و حلو - زي ما انتي بتقولي طلعتينا منو و هربتي و جيتي عشتي بينا هنا في الوطن (البديل) دا ليه يا ماما ؟ "
حايكون جوابك شنو ؟
11-04-2009, 10:55 AM
هواري نمر هواري نمر
تاريخ التسجيل: 04-29-2009
مجموع المشاركات: 1833
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
abubakr
هواري نمر
عمران حسن صالح
مهيرة
عزام حسن فرح
Muna Khugali
معتصم الطاهر
حاتم علي
فيس بوك
تويتر
انستقرام
يوتيوب
بنتيريست