وللناس البشاركونا في بوست يوميات خلّوصة.. نقول ليهم مواصلين ان شاءالله.
نبدا المذكرات الجديدة..
مذكرات واحد..رمتــالي فارس جستب
-1- اصبحنا واصبح الملك لله..الدنيا لسة بدري اذان الضُهر يادوب أذن ، كدي بعد الحمام والشاي يمكن اذان العصر يأذن والواحد بعد داك يبدا يومو ناس (ام بي سي تو) ديل بقو يعيدو في الافلام ، والحاجة دي ملت البيت بريحة البصل الطالعة من حلتها دي.. نسلم على ست الحبايب ونديها بوسة عشان يومنا يسلك.. - صباح الخير يا حجة - صباح؟ دا ياتو صباح دا؟ يا ولد انت جايب لينا الفقــُر بنومك الكتير دا ، تساهر الليل كلو وتنوم النهار ، السرير يضرب فيهو الشمس تصحى تجرجرو من ضل لي ضل زي غنماية الاشلاق ، الارزاق زماااان قسموها واسيادها شالوها وانت نايم. - الحمدلله والله مافي اي عوجة ما دام لاقين حنيتك دي. - يا ولد امشي شوف ليك شغلة ، ابوك الشقيان دا فتر خلاص وأختك الكرعينها اتغبرت من مشية الشغل بالمواصلات ، يا ود انت ما بتخجل؟ - طابخة لينا شنو بالله الليلة؟ - واااااااي انا واااااي ، سويت شنو انا في دنيتي دي. يا الله الهمني الصبر.. بارك الله في حسنية بتي لكن فارس دا رميت طوبتو خلاص. - انا طالع شوية على الشارع يا امي. - امش اصلاً دا الفالح ليهو ، يا خسارة القروش الدفعناها فيك..يا خسارة..... يا خسارة...... يا ولد ما تتأخر ابوك كان جا بنتغدا طوالي.
***
يا ربي الشفوت ديل مشو وين؟ قدام الدكان مافي ، في دكان البلي ستيشن والبلياردو مافي ، يكونو الليلة عملوها فيني ومشو بالجد الرحلة القالوها ، ما اظن ، ما مشكلة نسقي الشجر القدام البيت دا وهسي حيتلبو اها ياهدا ابو الجوكس ظهر.. - يا جستب - سلامات يا حنين طاخ طراخ طاخ- انت الشفوت ديل وين يا جووكس؟ - الناس دي مشت علي حاتم عندو عرس اختو الليلة ششششششش فشششششششششش (الخرطوش) يا زوول؟ ما عزمنا؟ - ياخي العرس بعد خمسة يوم ، لكن الناس قالو يمشو يدوهو طلة ويقيلو معاهو عشان ما يزعل. - والله يا جوكس ناس الحلة دي مع انهم ....... لكن اصليين. بقيفو معاك للطيش. - يا زول كيف دا كلامك؟ بس الظروف خاينة ، يشتغلو الوهم ونحن نقعد عواطلية. - اي والله الدنيا دي ظالمة..يشتغلو ناس الصادق ود الحاجة ونحن ما نلقى شغل. - انت عارف الصادق دا بياخد مرتب كم؟ - كم؟ - انت ما شفت العربية الشديدة الاشتراها دي؟ - قال ليك بياخد مرتب.... ، ناس الاتصالات..مرتبات..البترول..ام تي ان..سوداتل..الصينيين..الماليزييين..يازول؟..العمارا ت.. مرتبات..اللوتري..الرياض..هجليج..بنك ام درمان..بالله؟..وزارة الصناعة..أممم! كنار..السعودية..منظمات..الامارات..بنك قطر..وشوف بالله؟..وأحيي انا..وياخي مالك.. اسمع انساك من النفسيات دي. شفت الهلال امس؟ - يا مان الهلال - بالله؟ المريخ - اي والله الهلال زاتو - انت متأكد المريخ؟ - والهلال - الهلال! - المريخ - مريخ - هلال.
- ياخ برشلونة. - مانشستر - هلال - برشلونة - مريخ
- يا جستب شفت بت الاتصالات الجديدة دي؟ - نجااااضة. نحول رصيد؟ هااااااااااهااااااااااي طاخ طراخ طاخ
***
(ام بي سي تو) دي افلامها مكررة ، وناس شركة زين ديل وقفو لينا مكالمات الساعة 12 الملح ، الواحد يقرا ليهو جريدة تنفعو لحدت ما تجي الساعة 3 صباحاً بعداك نشوف الحاصل. أخخخ بكرة يوم الجمعة ، يوم بايخ والبيت بكون فاير ، يعني لازم يوم الجمعة دا الناس تتعطل؟ كرهونا زاتو
-2- اصبحنا واصبح الملك لله شكلو البيت فاااااااضي صباح زي الورد ناخد لينا دش ظريف كدا ونشوف المطبخ فيهو شنو باقي الفطور. أخخخخ صابون حمام مافي..شيك سريع كدا من بتاع الدكان..هو الحساب حصل كم ما عارفو..المهم صابونة وعلبة سجاير بكون ظريف.
*** حسن (بتاع الدكان) كيف؟ اها حسابي بقى كم؟ المية دولار ابت تتفك لي صدق؟ وشنو الوجاهة القايمة فيك اليومين دي؟ عشان كدا يوم داك بالله توتو الشهادة العربية النجاضة ديك سألتني من اسمك... - صِح؟ هازول هوي ما تكضب.."فارس" قول الصِح. - اها اقسم بالله سألتني..كدي جيب صابونة وعلبة سجائر وبارد واكتبهم في الحساب وبعدين بوريك ، هسي مستعجل..
"فـــــــــــــارس" - ابو الشووووش يا...وييييييييين يا قلب - تمام والله ، الحاصل؟ - مية مية ، اهو عايشين فيييي البلد الفقر دي..شغال لسة مع الاستاذة؟ قلت لي قلبت الهايس القديمة جبت واحدة كرت! والله ايامك ، شنو! ما شفناك في عرس حاتم؟ - اسمع يافارس في شغلانية كدا في السلك.. - يازول؟ احلف..والله يا ابو الشوش انت اصلي والله. اها وين؟ بس ما يكون مع الاستاذة عارف اخوك "ماي مظر" في الحنك بتاع الساونات دا. - لا لا ياخ..عندي ليك شغلانة كويسة.. - اها ما تقول لي اخوك الشغال في السفارة الماليزية؟ - يازول اصبر.. - انت عارف انو انا خاطب ومحمد اخوي برضو خاطب والحاج كبر وما بدخل قروش والمصاريف كلها بقت على الهايس دي أهااااااا خشيت لي في حاجة كدا قلت اشغلها..اها والله جوني مليون نفر ابيت ليهم..اووول زول فكرت فيهو انت. - بالحضن يا شووش ياخ..احيييي انا والعنكبوت زاتو..علي بالطلاق انت ارجل منك مافي في البلد دي..اها ما تقول لي عملت ليك دكان بمكنتو ولا امجاد؟ - لا لا عمك ياخ ..طبعاً الشغل ما عيب..وانا حاشغلك شغل يكسبك دهب..قروش زي الرز..شفت شارع الطيارة؟ مش في مستودعات؟ اها ناس المستودعات ديل متعاقدين مع زول واحد بس يعمل ديليفري للزبائن..اها الزول دا أنا. - والله ما شاءالله..ما هين والله يا ابو الشوش. - اها نبدا متين؟ الدرداقة قاعدة في البيت ممكن هسي نرفعها ونمشي. شنو؟ حمضتها والله يا شوش
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
محمد يوسف الزين
فيس بوك
تويتر
انستقرام
يوتيوب
بنتيريست