يا مُزمِّل .. يا مُدثِّر .. لادِينك.. دِينك ((قيامة))

يا مدثر......... يا مزمل
يا مزمل صمتك .. أهتف ... أنسف كل سكاتك قول
عبِّي لهاتك و أعرف .... كيف كلماتك تبقي رسول

يا مدثر أنو ضراك الزيف ,,, بتخدع نفسك
قِيم الليل بي شاهق .... حسك
لسانك طهـِّر ..... أطرد منك معني بدسك
ماك مسيطر يا مدثر
يوم الخوف بي وجعوا ...... بمسّك

ما تتدثر و لا تتحسر
فاكر زيفك ما بتفسر ؟
فاكر الوهم الساكنك جوة
بفضل حاضنك وما بتكسر ؟
أكشف حال الزيف في السكة
أخسف أرض الخوف و أنفكّ
يا مدثر
ولست عليهم يوم بمسيطر !

يا مزمل أوعك تهمِل
أنوا غطاك الوعد الهسة
حاول جمِّل كل مداخلك
المارق منك ما بتدسّي
يا مزمل وهم الفكرة
ما تتغابي الشمس البكرة
و أفهم أنو صباحك لسة !

يا مدثر محلك غيمة
باكر تلقي المطرة نشاف
يا مزمل موجة و شيمة
بتحلم تبقي الموية ضفاف

يا متلحِّف وهمك
وهمك ظلمك
يا متخوِّف ألمك
زيفك ألمك
ما تتضارا ورا مقداف
شايف جُزراً ما بتنشاف

يا مزمل ........ يا مدثر

يا متوكل علي لادينك ... دينك
ما تتخيل أنو يقينك
مارد حرفاً باقي سجينك
يا متباكي علي ميتينك ... دينك
دينك ممشي و خطوة عديلة
دينك شعلة تبُق في سنينك

يا مدثر ......... يا مزمل
يا مزمل وهم الممشي
ما تتغشي
يا متوهِّم أنو المنية
كلام مصرور في قافية وغنية
تعتِّر ليك أنشاء الله القشة
لا بتجيك مبتسمة الدنيا
ولا فد غنية

ياخي تجيك أنشاء الله الكشة !

يا مزمل .......... يا مدثر