|
|
 صــك بـبـراءة أبـلــيــــس
|
كلامك كان خاطــر غنية مجروحة بتنزف بي نغم القصـــايد ديك ,هــموم الســفرة
للمجهــول وحس الناس بتنده في اللي طال غايب , وشال منك خريطــة الـــشارع
الجاييك , صلاة شوقك بصليها خمسة اوقات , لا خمــسة شوية انا بلغي التخـفيـض
وبرجع تاني لي سدرة المنتهي ولو اتحرقت , واقول ليهم رجعوها خمســـين تاني
عشان اقدر أوريك حــــجم ايماني بيك كقضية .
ايوة صاح نحن بنغلط ونسب الدين
لي ابليس حيطتنا القصيرة , الراجل دة مسكين شديد , اتحمل كل أخطاء التاريخ , لو نامت قمحة علي الابـــيض تتــشرد زيو وزاد الابيـــــــــض في غيـو ومدد
رجلو اليسري , والكسرة جات منكسرة في طبق حاجـــــة زكــــية وما حـــاقت في
خشـوم الامل الغـش , برضـو أبليس هو المسؤول , ولو عثرت بغلة في الــعراق
وما وجدت معتصماه ولا أسلاماه , أبليس هو الســبب , لو أصــطدم نيزك متهــور
بالصحراء الكبري , وكسر رجل النخلة الشافعة العمرها يادوب تلاتة سبيطات
برضو هو المسؤول هو المسؤول , وأعتقد جازما كما يقولون هو صـــاحب اليد
الطولي في تدهور الحالة النفسية لطائر البطريق في الدائرة القطبــية
الشمالية , التي حدثت نتيجة لظاهـــرة الانحباس الحراري وذوبان الجليد
بسبب التغيير الكبير في المناخ , وكذلك تشير أصابع الاتهام لابليس في
حالة العقم الذي أصاب دجاجة حاجة زكية وانقطــعت عنها البيضة الشهرية
ووصلت الي مرحلة يأس لا تجدي معها نفعا كل محاولات الاطباء البيطرين ولا
دهاقنة مزارع الدواجن , ولم تعد تغني في عمق المســـاءات , في الليلة
ديك لا هان علي أرضي وأسامحك ولا هان علي أعتب عليك.
اتعودنا اننا نتمسك بي سلبيتنا ونرجع ورا , ولسة ماسكين في أمبارح
أمل كضاب , بننحني في وجه العاصفة وندفن الرؤوس في رمال الانهزامية
مع توفر أمكانية ألانطلاق بسرعة الصاروخ لي عالم بي رؤية متفائلة ,
لكن نعامل شنو لي كلب الحلة البنبح في شفع حلتنا , وخلي حرامي الليل
يسرح واسرق كيس العيش , واولاد المدرسة بكرة يمشوا حفايا لابسين الشوك
وتشرق شمس الصباح متسخة كالعادة , ملطخة عتمة و ما فيها صــوت الحقيقة
الكانت مبدأ , وعبادة ناس لي فكرة انو يقولوا الحق ولو كان السيف فيهم
واقع واقع , وما علينا ,,, بس يا ريت نشيل الحمل الثقيل من أبلــيس , ونخلي
القول الشال خطــواتنا رمانا بعيد من درب الغيمة , ونجمة شــبق الليل لي
عالم خالي الطرف من شكل اللون الاسود ,و مفهـــوم ادم انو اتغــشي بي كلمةزيف .
--------------------------------------------------------------------------------
|
|
 
|
|
|
|
حبيب نورة
فيس بوك
تويتر
انستقرام
يوتيوب
بنتيريست