دعواتكم لزميلنا المفكر د.الباقر العفيف بالشفاء العاجل
|
|
 في شأن غراميات البني كجه
|
في شأن غراميات البني كجه
يقع البني كجة، مثلهم مثل غيرهم من شعوب الله ، في حبائل الحب والغرام و مناكب الهيام، ينظمون الشعر و يتغنون به بلسما شافيا و شكوى من سوء الحال و المآل، بعضه لطيف و عميق ، مثل قولهم ( من يوم ما شفتك، قلبي للدنيا ابتسم)، و بعضه مريب و ذو مغزى، كقولهم ( الأشارة جاى ولا جاى) سؤال الى سائق البوباى في ظاهره، و المعني به كيوبيد على حسب اعتقادي المتواضع. و للبني كجة، تقاليد مرعية ، و حدود لا يتجاوزها الناس حين يتعلق الأمر بشأن من شؤون الغرام، منها مثلا، عدم جواز مناداة الحبيبة باسمها المجرد غير مقترن باسم أبيها أو حتي جدها، فالحبيبة ليست حبيبة أن لم يكن اسمها ( فاطمة حسن)، أو ( علوية خدر)، و غير ذلك و عدا ذلك، فالأب السوداني يتبع بناته مثل الظل أنى حللن، و لا توجد في السودان حبيبات منفردات الأسماء مثل ( جينيفر)، و( ناريمان) و ( سبنا)، كما يحدث في بقية أصقاع الدنيا، فان كان لابد من تسمية ( ناريمان)، فأنها لا محالة ( ناريمان خلف الله).
و بذكر التقاليد المرعية، فأنه لا يفوتنا ذكر تقليد التظاهر، وهو أن تتظاهر بأنك لا تعرف الحبيبة ( من حوا وآدم)، حتى ولو (قرا معاك) أخوها الأكبر في المدرسة الشرقية، و ذلك حتي تطمئن إليك، و بإمكانك دعم قصة حياتها التي ابتكرتها مفصلة على مقاسك، حتى لا يفر الحمام من بين يديك، فتقعد ملوما حسيرا. و قد عانى صديقنا ( عصام) من رزية اختفاء الحبيبات من حياته، بعد المقابلة الأولى، بسبب من صديقه ( عبدو) ، و الذي كان مغرما بالتعارف و تقصي القرابة و النسابة في كل فتاة يلتقيها أو يقدمها اليه احد أصدقاءه، كان حاذقا مثل قصاص اثر، فما أن يقدمه ( عصام) إلى صديقته الجديدة ( حنان)، حتي تشتعل قنوات بحثه و تحرياته (أنا شفتك وين قبل كده) ،و قبل أن تخفض حنان رأسها تفاديا لمزيد من محاولات عبدو تفتيت قسماتها، متمتة ( ما اظن)، حتى ينبري لها و نظرات ( الأكيدة) تلسعها من ناظريه ( محمد اب جيبين ببقا ليك شنو؟؟)، و رويدا رويدا يحكم عبدو سيطرته على الموقف (على لسة في ليبيا؟؟)، و يتحول بقدرة قادر الى ( ود بيت)، خاتما حديثه ( عليك الله خلي خالك حسن الطهار يضرب لى)، ثم ملتفتا الى ( عصام) و قد كشر عن انياب تشبه ابرا غير معقمة ( الزولة دي في الحسبة بت عمي)، و تنتهي الميلودراما بعودة عصام إلى سوح الجهاد يبحث عن( ليلى) جديدة، قانعا بحقيقة انتفاء خيار ( حنان جيب الله ) الى الأبد.
و بنات كجه ، مثلهن مثل بنات آوى، لا نفرق بينهن في الحصافة و المكر، فما أن تهل عليهن خاطرة التخلص منك، حتي يرخين الثوب ، تنكمش رقابهن الى نصف بوصة و( يتضارين) تحت الداش بورد، مولولات بصوت غريب ( ووب على، ده أحمد ودجيرانا، نزلني نزلني)، و قد يكون الرجل العابر للطريق تلك اللحظة، ( اوكامبو) شخصيا. ينبهنك إلى وجودهن أن أغفلت لحظة، وقد حدثني صديق، اختلط فى مطلع شبابه بطبيبة، كانت تذكره كل لحظة أن نسي أم لم ينس بوظيفتها ، بعبارات مثل ( يا عادل ، الليلة مالك ديهايدريتد كده؟؟)، و اذا قدر له أن يتأخر عن موعد، سارعت باتهامه بنقص في ( الأستروموسيس)، حتي قصمت ظهر البعير ذات يوم، مرة و إلى الأبد، فبينما هما في قمة حميميتهما، مالت على أذنه، و أمسكت برسغه و هي تضغطه ضغطا قويا، و تهيأ هو إلى همس طال شوقه إليه، حتى فوجيء بصوتها يصيح من هلع في اذنه ( عادل...نبضات قلبك دي ما منتظمة، تعال بكرة اكشف)!!!!
انقضى عهد بص السيرة، و مضت عهود الأتصالات الرومانسية العسيرة، و تحولت المطارات إلى مساكن بسبب الزحف السوداني على الخرطوم، و حلت محل كل ذلك، الأيميلات و المسنجرات، و اصبح بأمكانك أن تهيم ببنت كجة، و أن تهيم بك، و أنت و هي ( من منازلهم)، دون أن تراها حتى، و أعفيت قبائل العشاق من عنت الوقوف تحت رحمة حرارة ( زنكي المزيرة)، بل و أصبح بإمكان العاشق، التردد بين غرف البيت أو المكتب المختلفة ، وأداء العمل، و استعمال المرحاض، أثناء مطارحة الغرام دون حرج، و قد يسف التمباك دون أن يسمع كلمة ( يخسي).
تبدأ فصول المشهد الرومانسي، بمجرد سماعك نغمة....بلييينق...و ذلك إيذان بدخول العصفور إلى الشرك، فتسارع أنت إلى تلفيق أول كذبة، فتضع تحت اسمك كلمة ( أن افيلابل)، فرارا من ( عبد المنعم) و بقية المتسكعين، و أنت في حقيقة الأمر ( افيلابل اكثر من اى وقت مضى )، ثم (سلام) كليك، ..سلام، يجيئك الرد، أخباركم، فتجيب بورع ( نحمدو)، صمت، وجه ضاحك دون الحاجة إلى نكتة، ( في المكتب ولا في البيت)، ( في البيت لكن طالع بعد شوية)، ( يا زول ما اقوم ااخرك)، (لا لا لا ) تصرخ في دواخلك جزعا ( الليلة بنبدا متاخرين اصلا، احتمال ما امشي زاتو)، ( بالجد؟؟)، ( بالجد و الله المدير زاتو مات)، ثم انك تهم بزرع كلمة (مشتاقين)، فتسبقك الى القول ( دقيقة تلفون)، فتنهار مشاعرك بددا، فتمسح ما كتبته ، حتي تقدمه طازجا حال عودتها، تمر الدقائق بطيئة بطء سلحفاة مشلولة، تتململ، و تعاودك الأفكار الأنتحارية المظلمة، و ما أن تهم بزرع الطلقة في صدغك الأيسر، حتي تسمع.... بليييينق...، فتتهلل اساريرك، (دي خالتي)، ( اوكي) ، متحرقا إلى وصل ما انقطع ( أحب خالتك) ، تحجم عن كتابة ذلك حتى و لو كنت حسين ملاسي شخصيا، و تستمر رحلة العذاب، غياب مفاجيء، ثم عودة ميمونة، ( سورى مشيت عملت لى كباية شاى)، و أنت تحمل كلمة ( مشتاقين) مثل صخرة سيزيف، ( بالهنا) تجيب وانت تكور حروف ( مشتاقين) حتي يأتيك الدور، ثم يأتيك ما تحسبته، تلك الكلمة التي لا يعقبها خير أبدا ...( عارف)، و ببلاهة ترد ( اها)، تنقلب الموازين قلبة لوري ( الدوينيب)، ( قريت الموضوع بتاع حبيب نورة في سودانيز؟؟)، ( لا ما قريتو...لكن ح اقراهو بعدين)، يتوجب عليك قول ذلك حتى و أن كنت قد قرأته عشرين مرة، ..بلينق... و اذا باللينك ماثل امام عينيك لا تملك الا أن تطأه مثل لغم، ( بسيفو و بقراهو بعدين بمزااااج)، ( لا في حتة كده دايراك تقراها هسة)، يا أله السمااااااا، ننمنمنمنمننمنم..ممممممم....قريتو...لوووول) ظريف شديد.
اسمعي
عاين
( نتلاقى متين؟؟)، ( الأسبوع ده كلو انا شغالة ضهر، انت عاوز تشوفني عشان شنو...وش محمر الخدود....وات ار يو ثينكينق)، توتر...بلينق...لوووول، ( هسة بعد ده كلو كان طلعت ليك شينة)، و انت تدعو ربك سرا( ياخي الجمال جمال الروح)، ثم وفي سرعة ( دبل جاز)، (أنتي مش قريبة ناس منال؟؟)، ( اااى، لكن هن طالعين حمر على ابوهم، نحنا خدر)، ( ياخ الخدرة ما لذيذة مالا)، (......)، ( مالك سكت)، وردة وقرد بنطط، ( رسلي لى صورة)، ( ده ما كمبيوتري، لمن امشي لى كمبيوتري برسلا ليك، داير بيها شنو لكن؟؟)، ( دايرا ساكت)، ( ساكت كيف يعني)، يبلغ بك الغيظ منتهاه، فتصرخ في سرك ( ياخي انعل د..........)، و لكنك تطرق رغما عن ذلك مفاتيح الكيبورد طرق غرائب الأبل، فلا يظهر من غضبك على الشاشة سوى ( لووووول) شاحبة كاذبة.
عاين
ياخ ما بعاين ولا حاجة
ثم كليك، و انت ( افيلابل)،
بلييينق
( عبدو كيفك، بتعرف ليك واحدة اسمها روزانا 76543؟؟
بليينق
( ايوة دي اخت ناس عثمان روسية، شينة ما سمحة، كدي اسالها ياخي ، الطيب بجي متين من كنانة؟؟).
|
|
 
|
|
|
|
|
|
|
|
Re: في شأن غراميات البني كجه (Re: دينا خالد)
|
Quote:
وانتو الشايفنهن شوف العييين ديل مابينهن مالكم ؟؟؟
تكابسو فى الحديد والكيبوردات
تقول خلاااااااص ال فى طرف التانى كاتلاهم الحلا !!! .. |
Thank you Dina
Mafi mokabasa wallahi
Elmelik
| |
|
|
|
|
|
|
|
|
|
Re: في شأن غراميات البني كجه (Re: Tagelsir Elmelik)
|
very funny
the social observer is in action
thank you for making us laugh on ourselves, including you
God bless
the next stage of romantic liaisons is gonna be by using telepathy and other psychic phenomenon
as i am writing this, i sent her vibes that she can only feel and decipher
| |
|
|
|
|
|
|
|
|
|
Re: في شأن غراميات البني كجه (Re: Hussein Mallasi)
|
| Quote: the next stage of romantic liaisons is gonna be by using telepathy and other psychic |
I thought we are already there lool + and a jumping monkey bita3at Tajelsir
-----------------
ياا تاج...
قرد بينطط دي دي لقيتها وين؟ رسلها لي عليك الله عشان اضيفها كان لقيت طريقه
BRB or on turtle time BB
hilarious, waiting for more
---------
ملاسي لكن ...
| |
|
|
|
|
|
|
|
|
|
Re: في شأن غراميات البني كجه (Re: Rihab Khalifa)
|
..
.
Quote: وقد حدثني صديق، اختلط فى مطلع شبابه بطبيبة، كانت تذكره كل لحظة أن نسي أم لم ينس بوظيفتها ،
بعبارات مثل ( يا عادل ، الليلة مالك ديهايدريتد كده؟؟)، و اذا قدر له أن يتأخر عن موعد،
سارعت باتهامه بنقص في ( الأستروموسيس)، حتي قصمت ظهر البعير ذات يوم، مرة و إلى الأبد، فبينما
هما في قمة حميميتهما، مالت على أذنه، و أمسكت برسغه و هي تضغطه ضغطا قويا، و تهيأ هو إلى همس طال شوقه إليه،
حتى فوجيء بصوتها يصيح من هلع في اذنه ( عادل...نبضات قلبك دي ما منتظمة، تعال بكرة اكشف)!!!! |
قرقر قرقر قرقر
بالله الطبيبات ديل كلهن كدا ..
والله انا واحده قصمت البعير شبكتنى
انت يا تيبو ما ممكن تقنعى عيونك دى حساسية لازم تعمل شيك !!
والله يا تاج حسي وكت ما التلفون يضرب اشوف اسمها
طوالى بفكر امشى الحلاق 
( شعر رأسي بقيف )
اسمعنى البنى كجه ديل شنو؟؟
فى السودان ما مرت علينا !!؟
_________
لكن لقيتك مجضم الماسنجر
| |
|
|
|
|
|
|
|
|
|
Re: في شأن غراميات البني كجه (Re: khatab)
|
الرائع تاج السر ...
مدخل للحمام ...
يوم لاقيتك جنب البير
لابسة عقد من حرير
حبيت حمار أبوك الأعبش ...
وبعد..
غايتو الحمام في البلد دي حمام ضكر بس ، والكلام القايمين بيهو جماعة البني كجة بتاعنك ديل دة غايتو أداء واجب واثبات ذات لا أكثر ولا أقل ...
ما يقومو يسمعونا ناس الأمم المتحدة ويجن بنات كجة وتبقى مشكلتنا مشكلة ، لكن الحمام برة بلخبط الشعور ويكهرب الذات ... لكن نقول زمان في السبعينات وبداية الثمانينات كان الوضع مختلف وكانت هنالك وردة من بنات بحري عندما غنى عليها الشاعر " يا بنات بحري ما قالوا بتحبوا أنحن من بحري يا الله حبونا " ما تسألني تقول لي الشاعر دة وين آسة ، الحمد لله إنو ما في جوانتاناموا ...
المهم في الموضوع هنالك مجموعة من البنات يقفن بشكل نظامي أمام نيمة الموناليزا وكانت وسط هذه " الكورجة" زهرة من زهرات بلادي وكان هنالك مجنون يقف بانتظام لمراقبة هذه الزهرة ....
كم مرة وقف هذا " البني كجة" في بالقرب من الموناليزا لا تسألني ولكنها أيام أقل ما يمكن وصفها بأنها بعدد أيام السنة الدراسية مضروبة في 3 .....
وذات مرة من "الممرات" قامت هذه الزهرة بالمجئ منفردة إلى النيمةالتي تظللهن وكعادته كان هذا المجنون يقف مبحلقا ولم تعره هذه الحمامة إنتباها كثيرا لأن الموقف معهود كما أن الموقف أمان ...
ودون سابق إنذار تسمع هذه البنت أصوات شخشخة شبشب تقترب منها أكثر وأكثر تصديقا لنظرية دوبلر ... وفجأة تشاهد المجنون أمامها لا يفصل بينهما إلا بضعة نانومترات ويمسك بأصبعيه " جضومها" ويقول بحرقة شديدة " أحينا منك إنت ما كاسرة فيني ضلعة " ........
طبعا البنت وقفت مشدوهة .... والمارة كلهم بما فيهم شنبات كثيرة وقفوا مكتوفي الأيدي بالله عليك ماذا أنت فاعل في مجنون ..... تحسر بعضهم لعدم الحراك المناسب في الوقت المناسب ولكن المجنون ذاتوا ما أدة الناس فرصة كلها وثواني معدودة لتتحرر جضوم البنت من قبضة المجنون ...
مخرج أول
لما يكون الحمام حمام حتى المجانين بيعبروا عن نفسهم لكن لما يكون الحمام ضكر بس وزي أي حاجة تانية حتى الشعراء بيغلبهم الكلام والتعبير وأها القصائد المالية المنبر دي أكبر دليل على إنزواء الحمام ....
مخرج نهائي :
الله يجازي محنك يا تاج السر دخلتنا في حتة ضيقة ... اللهم غفرانك ...
ولك تحياتي ...
| |
|
|
|
|
|
|
|
|
|
Re: في شأن غراميات البني كجه (Re: انور الطيب)
|
Quote:
ودون سابق إنذار تسمع هذه البنت أصوات شخشخة شبشب تقترب منها أكثر وأكثر تصديقا لنظرية دوبلر ... وفجأة تشاهد المجنون أمامها لا يفصل بينهما إلا بضعة نانومترات ويمسك بأصبعيه " جضومها" ويقول بحرقة شديدة " أحينا منك إنت ما كاسرة فيني ضلعة " |
hhhhhhhhhhhhhhhhhhhhhhhhhhhhhhhhhhhhhhhh
That was funny
Thank you soo much Anwar
| |
|
|
|
|
|
|
|
|
|
Re: في شأن غراميات البني كجه (Re: fadlabi)
|
Quote: داش بورد شنو يا عمك
اسمه طبلون... إنت طولت من البلد دي ولا شنو |
يا فاضلابي طبلون ده كلام ميكانيكية الشدر
و طبلون دي لعلمك من زمن الأوبل ابو تلاتة تعاشيق‘ يعني اقدم من زمن حفر النيل الأبيض
الناس بقت في الداش بورد من العربية و حتي الأوبريتينق سيستم بتاع الماكنتوش
دمت
تاج السر
| |
|
|
|
|
|
|
|
|
|
Re: في شأن غراميات البني كجه (Re: د.نجاة محمود)
|
| Quote: حررريف يا شيخ ... عرفة ممارسة ولا سمع؟؟ |
ياااا ..ز زعيم بنى كجة
إستمتعنا ببنى كجة (1) وقلنا عن ممارسة ومعاصرة وسمع من تجارب بنى كجة آنذاك
وإستمتعنا ببنى كجة (2) أبناء التكنلوجيا والإنترنت وخطر لى نفس سؤال عزاز (البرئ)
.. عرفة ممارسة ولا سمع! ونأمل فى كجات ممتعة قادمة
مع تقديرى وتحياتى للعزيز تاج السر الملك!
| |
|
|
|
|
|
|
|
|
|
Re: في شأن غراميات البني كجه (Re: نادر الفضلى)
|
Quote: ( عبدو كيفك، بتعرف ليك واحدة اسمها روزانا 76543؟؟
بليينق
( ايوة دي اخت ناس عثمان روسية، شينة ما سمحة، كدي اسالها ياخي ، الطيب بجي متين من كنانة؟؟). |
ايوة أنا زاتى بعرفها.. شناة العدو ..
سلام يا تاج وتسلم على الكتابة الحية
| |
|
|
|
|
|
|
|
|
|
Re: في شأن غراميات البني كجه (Re: rosemen osman)
|
يا ربي
اقول ليهو شنو اسع؟؟
*
وقال الرب لي
واتمنع في قدرتة فيك انت يا السر
وقلنا
حاضر فامر الرب واجبة اطاعتة ..
وانصرفت
ساي كدا
لكن !!
وفيما يبدو ان (خشمي ما زال مفتوحا) ولسانة يتحرك في
فراغ في محاولة منه ليجد ما يتركز عليه
ليخرج حوقلتة التي اصابته بهستريا اللعثمة
شئ تاني
حاجات عادل عثمان معروف مكانها بقليل من البحث هنا
بس المشكلة في حاجاتك انت دا بتلقاه وين مرتبة كدا
ياخ سحقا.
| |
|
|
|
|
|
|
|
|
|
Re: في شأن غراميات البني كجه (Re: فيصل عباس)
|
Quote: شئ تاني
حاجات عادل عثمان معروف مكانها بقليل من البحث هنا
بس المشكلة في حاجاتك انت دا بتلقاه وين مرتبة كدا |
يا كمال سنسميلية اليومين دي من تندلتي‘ غالية شوية لكن بتستاهل
و الله دي عجبتني جنس عجب
قرقرقرقرقرقر
لك محبتي الدائمة
الملك
| |
|
|
|
|
|
|
|
|
|
Re: في شأن غراميات البني كجه (Re: نادر الفضلى)
|
| Quote: خطر لى نفس سؤال عزاز (البرئ) |
Ya Nadir Fadli
Bas jari jari lol
I imagine things sometimes. and to my surprise
they turn out to be true ( al girid albinattit) _maslan_I am
very happy to see you around
Regards
Elmelik
| |
|
|
|
|
|
|
|
|
|
Re: في شأن غراميات البني كجه (Re: د.نجاة محمود)
|
Quote:
سلام يا ملك
قصة ممتعة جدا.. بس ياخي حيبيب نورة دا حتكبر راسو شديد
الله لا وراك ليه وهو عامل مهم..
بني كجة جد يمحنو.. |
Najat
Always a pleasure to see you around
Noora laziz yakh
I like his Budah pose
salami to your family
Elmelik
| |
|
|
|
|
|
|
|
|
|
Re: في شأن غراميات البني كجه (Re: Tagelsir Elmelik)
|
ليه قلنا على تاج أنو كتاب ( أكتر من اللازم ) ؟
لأنو قمة الكتابة هى التى تثملك إعجابا ( موش بيقولو ليك أسكرته الكلمات ؟)
كتابة تاج دى . .
بتسطل عديل !
_____________________________________
معاكم الويك إند الجاية فيهو نانسى
| |
|
|
|
|
|
|
|
|
 Re: في شأن غراميات البني كجه (Re: د.نجاة محمود)
|
في شأن غرامياتي بنصوص البني سماح
جيتك بعد ما فكّت سكرة القراية الأولي
وفيني شوية ترتحة (يوجد صداع)
ما بتفكوا كباية شاي حمرا
وسجارة من نفس اللون !
حبيتك وانت وسرحت معاك في مصارين النص
(يوجد قولون عصبي)
في حالة مسكت نفسي من النقرشة في الكيبورد
و بتمسكني ليك (كاروشة) الكتابة
وتلقاني في حضرتك
درويش
(توجد محاية)
....
.....!!!
صديقتي النصف مسخوتة
متفقة معاي
انو تاج السر فيه سر من نورة
( لا يوجد حبيب)
ــــ
ياخي أنت حريف نضم
بتخلي الزول ما قادر يقول ولا كلمة
( لا يوجد بِغِم) !!!
بجيك صاد !!!!
| |
|
|
|
|
|
|
|
|
|
Re: في شأن غراميات البني كجه (Re: حبيب نورة)
|
Quote:
في شأن غرامياتي بنصوص البني سماح
جيتك بعد ما فكّت سكرة القراية الأولي
وفيني شوية ترتحة (يوجد صداع)
ما بتفكوا كباية شاي حمرا
وسجارة من نفس اللون !
حبيتك وانت وسرحت معاك في مصارين النص
(يوجد قولون عصبي)
في حالة مسكت نفسي من النقرشة في الكيبورد
و بتمسكني ليك (كاروشة) الكتابة
وتلقاني في حضرتك
درويش
(توجد محاية)
....
.....!!!
صديقتي النصف مسخوتة
متفقة معاي
انو تاج السر فيه سر من نورة
( لا يوجد حبيب)
ــــ
ياخي أنت حريف نضم
بتخلي الزول ما قادر يقول ولا كلمة
( لا يوجد بِغِم) !!!
بجيك صاد !!!! |
في الأنتظار
| |
|
|
|
|
|
|
|
|
|
Re: في شأن غراميات البني كجه (Re: بت قضيم)
|
و سلمتي يا بت قضيم
Quote: تاج يا فقرى
هسا دى حكاوى زول شقا المقابر بس
يا اخ انت متا واتكرفستا عديل كدا |
في داعي تكلم يا محمد سيد أحمد
الجماعه يهبشو بى برة برة
لك تحياتي
Quote: تاج السر
انت بتلم فى البتاع ده وين من الصباح (:
قمة المتعه
سمعت كلام منير ومشيت دخلت مكتبتك
مرقنى منها الجليل الرحيم |
العزيز مزمل
اهو كدة انت حكمت على براءة
الكلام ده حكاهو لى واحد اسمو ( عزو)
تحياتي
الملك
| |
|
|
|
|
|
|
|
|
 Re: في شأن غراميات البني كجه (Re: الوليد محمد الامين)
|
ألو !!!
منو معاي؟
معاك شيري
شيري وعين الله ترعاكي؟؟
طيب يا شيري متصلة من وين؟
قبل ما أقول ليك لو سمحت لقيت أيميلي وين؟
والله يا أنتي انا جيت ماري بي حلة مايكروسوفت ولقيت واحد زمان كان بحبك
كاتبو في الحيطة!!
لو سمحت خليك جادي شوية يا أنت عشان ما أبلكك!
لايختي انا جادي معاك جنس جداد اها عمرك كم؟؟
واللا ما مهم تقولي أنت عمرك تمنتاشر حسب الأستاندرد بتاع الشات في لجنة الآيزو والمواصفات!!
معاي منو لو سمحت؟؟
معاك حبيب نورة!!
منو؟؟
لا سوري انا غلطت معاك حبيب النور مضوي( توجد كبكبة)
قلتي لي يا شيري
انتي ساكنة وين و بتقري وين؟
انا ساكنة في أستراليا و بقرأ في الأحفاد!!
كككيف يعني ساكنة في أمريكا و بتقري في الأحفاد في نفس الوقت
لا انا ما بمشي الأستيت في الويك أند وكدة ( توجد ضحكة)
اها يا شيري معاك ويب كام!!
شور معاي لكن ما بقدر أشغلا!!
المرة الفاتت شغلتها لي واحد من سودانيز أتلاعب بي قضيتي
قضية شنو انتي شيري واللا تراجي مصطفي
ما تقومي تطرحي لي نفسك مناضلة( يوجد منبر حر)
عارف يا حبيب
انا مضطرة أطلع عشان ريري عايزة اللاب توب!!
وريري دي منو كمان؟؟
ماي نايس كلوس فريند!!
ياخي عليك الله أديها أيميلي خليها تضيفني
أها باااااااااي !!!
| |
|
|
|
|
|
|
|
|
|
Re: في شأن غراميات البني كجه (Re: محمد الطيب يوسف)
|
العنوان والمضمون مليء بالسخرية وفيه كشف عن الخلل في البنية الثقافية للمجتمع النامي ، ، فبعين السخرية نرى الضعف ، ويتحول العجز إلى أفكار ...مفارقة كبيييرة بين عالم الأمس الذي يجلس القرفصاء لينتظر ما يقوله الحبيب على لسان رسول المحبة ، وعالم اليوم المليء بالكذب المقرف ، ذلك الحب الإلكتروني وسهولة إختراق الآخر !!!.
شكراً تاج السر فأنت فولتير السودان ...ولست أبعد من برنادشو ..فوراء كل سخرية فكرة ناقدة ، رحم الله عبدالقادر المازي فقد كان يتخذ من السخرية سبيلاً إلى ملاقاة الشدائد والمحن بالابتسام .
___________________________________
عنوانيك متفردة
الأحمسة
البني كجة ...
الدراما في النص فكاهة مليئة بالسخرية ...ضحكت كثيراً مع جنيفر ، فاطمة خدر ، زينب الحسن ..إلخ إلخ تذكرت باريس هيلتون فعقدت مقارنة مع ناس مرنقو قرنمبو!!وناس الحي الأمامي جوار الاسبتالية .
| |
|
|
|
|
|
|
|
|
|
Re: في شأن غراميات البني كجه (Re: عبدالرحمن الحلاوي)
|
Quote: العنوان والمضمون مليء بالسخرية وفيه كشف عن الخلل في البنية الثقافية للمجتمع النامي ، ، فبعين السخرية نرى الضعف ، ويتحول العجز إلى أفكار ...مفارقة كبيييرة بين عالم الأمس الذي يجلس القرفصاء لينتظر ما يقوله الحبيب على لسان رسول المحبة ، وعالم اليوم المليء بالكذب المقرف ، ذلك الحب الإلكتروني وسهولة إختراق الآخر !!!.
شكراً تاج السر فأنت فولتير السودان ...ولست أبعد من برنادشو ..فوراء كل سخرية فكرة ناقدة ، رحم الله عبدالقادر المازي فقد كان يتخذ من السخرية سبيلاً إلى ملاقاة الشدائد والمحن بالابتسام .
___________________________________
عنوانيك متفردة
الأحمسة
البني كجة ...
الدراما في النص فكاهة مليئة بالسخرية ...ضحكت كثيراً مع جنيفر ، فاطمة خدر ، زينب الحسن ..إلخ إلخ تذكرت باريس هيلتون فعقدت مقارنة مع ناس مرنقو قرنمبو!!وناس الحي الأمامي جوار الاسبتالية . |
Thank you so much Halawi
Ya Halawi
We worked together in Alsudani news paper
Are you the same guy??
Elmelik
| |
|
|
|
|
|
|
|
|
|
Re: في شأن غراميات البني كجه (Re: Tagelsir Elmelik)
|
بليينق...
اعمل apear offline سرييع
انتي عارف دي منو؟
دي
دي
دي
مع انو صورتها بالجنبة وردة وقلب!!
وعبارة تعريفية "بيت شعر"
واسمها سالي 70 ، دانية 30 ، مواهب 40 ، ...... ، حلوة وكم وكمين
انت لقيت الايميل دا وين؟؟؟
صدقني ابير اوف لاين أو "بلوق" جنبلغ
لأنو بصراحة كدا
أمنا الغولة البايركس البراية المفتولة!!...عملت بليينق
عليك جنس محن يا استاذنا ابو التوج!
| |
|
|
|
|
|
|
|
|
|
Re: في شأن غراميات البني كجه (Re: محمد يوسف الزين)
|
بين اشعة بنى كجة و وغراماياتهم ملامح وجوه تبحث بين السطور
عن مراة تصلح لرؤية اطياف الابتسامات الهاربة
( بتنا ) ايضا داخل المكتبة واقتحمنا تلك الكلمات المقتحمة الراعفة الشاردة
الى ان انتهينا الى بنى كجة وغرامياتهم
تحياتى استاذ ملك
| |
|
|
|
|
|
|
|
|
|
Re: في شأن غراميات البني كجه (Re: Tagelsir Elmelik)
|
| Quote: اختلط فى مطلع شبابه بطبيبة، كانت تذكره كل لحظة أن نسي أم لم ينس بوظيفتها ، بعبارات مثل ( يا عادل ، الليلة مالك ديهايدريتد كده؟؟)، و اذا قدر له أن يتأخر عن موعد، سارعت باتهامه بنقص في ( الأستروموسيس)، حتي قصمت ظهر البعير ذات يوم، مرة و إلى الأبد، فبينما هما في قمة حميميتهما، مالت على أذنه، و أمسكت برسغه و هي تضغطه ضغطا قويا، و تهيأ هو إلى همس طال شوقه إليه، حتى فوجيء بصوتها يصيح من هلع في اذنه ( عادل...نبضات قلبك دي ما منتظمة، تعال بكرة اكشف)!!!! |
أول حاجة كدي خليني أقول ليك إني سعدت بي لقاك يوم 18 ديسمبر 2008 في مكتبك حوالي الساعة 10:30 صباحاكنا ثلاثة واحد وواحدتين .. شوف الصورة ووريني حرفنتك.
وبعدين الاقتباس الفوق ده مبالغة... تعرف انت شكلك حتساهر بينا الليلة في مكتبتك.
| Quote: فصول المشهد الرومانسي، بمجرد سماعك نغمة....بلييينق...و ذلك إيذان بدخول العصفور إلى الشرك، فتسارع أنت إلى تلفيق أول كذبة، فتضع تحت اسمك كلمة ( أن افيلابل) |
أنا في نهاية التسعينيات 1999 كنت مشرف على مركز خدمات انترنت في السعودية والبرنامج كان جديد بالنسبة للسعوديين وطبعا شعب كلو فضع الله (فاضي) الدوام ببدأ الساعة 1 ظهر لليوم الثاني 7 صباحا(ما تستغرب!) المهم عندما ينتصف الليل أخوك بزهج ما بعرف يسوي شنو بقوم بعمل لي لفة بشوف ناس (بني سعود) ديل بتشيتو وين وألقط النيك نيم بتاعهم وأرجع الماستر بي سي .. وأدخل عليهم على إني تشكسوية looking for her solemate ولمن أزهج منهم بس BRB وأمشي أشوف شغلي وأرجع ألقى الشباب لسع منتظرين المهم بخليهم كاسرين للساعة 7 صباحا بنقفل المركز ونتلاقى تاني المسا... بس عشان ما أبراك مرة واحد فيهم عايز يعرف أنا راجل ولا مرا كتب لي بالإنجليزي ARE YOU FEMAIL OR EMAIL?
برجع أبراك تاني
أمير
| |
|
|
|
|
|
|
|
|
|
Re: في شأن غراميات البني كجه (Re: Ammir Mohamed)
|
| Quote: أنا في نهاية التسعينيات 1999 كنت مشرف على مركز خدمات انترنت في السعودية والبرنامج كان جديد بالنسبة للسعوديين وطبعا شعب كلو فضع الله (فاضي) الدوام ببدأ الساعة 1 ظهر لليوم الثاني 7 صباحا(ما تستغرب!) المهم عندما ينتصف الليل أخوك بزهج ما بعرف يسوي شنو بقوم بعمل لي لفة بشوف ناس (بني سعود) ديل بتشيتو وين وألقط النيك نيم بتاعهم وأرجع الماستر بي سي .. وأدخل عليهم على إني تشكسوية looking for her solemate ولمن أزهج منهم بس BRB وأمشي أشوف شغلي وأرجع ألقى الشباب لسع منتظرين المهم بخليهم كاسرين للساعة 7 صباحا بنقفل المركز ونتلاقى تاني المسا... بس عشان ما أبراك مرة واحد فيهم عايز يعرف أنا راجل ولا مرا كتب لي بالإنجليزي ARE YOU FEMAIL OR EMAIL? |
هههههههههه
يا خي انا اتذكرتك تماما أها اختفيت وين بعد داك؟؟
سعيد انا بلقاءك هذه المرة على هذا المنبر
لكن ثبت انك بني كجة حقيقي في جهجهتك للأخوة السعاودة هي هي هي
منتظرين رجعتك تاني بالحكاوي الأسفيرية البحر أحمرية
تاج السر الملك
| |
|
|
|
|
|
|
|
|
|
Re: في شأن غراميات البني كجه (Re: الجيلى أحمد)
|
| Quote: أعفيت قبائل العشاق من عنت الوقوف تحت رحمة حرارة ( زنكي المزيرة)، بل و أصبح بإمكان العاشق، التردد بين غرف البيت أو المكتب المختلفة ، وأداء العمل، و استعمال المرحاض، أثناء مطارحة الغرام دون حرج، و قد يسف التمباك دون أن يسمع كلمة ( يخسي). |
النصيحة لى الله اول مرة احس بعفو ماعفو
غايتو انا العفو دا ماشملنى...
| |
|
|
|
|
|
|
|
|
|
Re: في شأن غراميات البني كجه (Re: Amira Elsheikh)
|
غراميات سلف البني كجة: الطيب ود ضحويةوطه الضرير:
طه الضرير والطيب ود ضحوية في طريقهما إلى أبو دليق وكان طه يبحث في اللاب توب بتاعه في الإنترنيت بال Wireless عن رد من محبوبته. فوجد رداً قصيراً. فأنشد قائلاً:
شديت ال HP واصبح يبرطع جايط
وال Internet دقش قلبتو صايت صايت
على ام شعراً حلال ما طولنو وسائط
وعطشان الغرام ما بيرونو 2 G.Bite
فرد عليه الطيب قائلاً:
الفيك يا طه Virus والله الكريم الشافي
ومفيدك طبيب حتى إنبقيت Mc Kafi
غير لخلوخة الهرفة أم قليباً جافي
وأركز للتجيك يا طه Options مافي
استسلم طه وأنشد:
إيميلك وصل زود علي الهم
والفكر انشغل ال Ram عليك وال ROM
يالصلاح جميع أنا والحبيب نتلم
ويا ساكن الضريح سيدى الحسن Dot Com
الليلة ام شلوخ لاقيتا عند ال Chat
و Virus ضرب قلبي ومحى الفايلات
يوم شافني الفقير البكتب البخرات
قال Defrag ما بفيد أحسن To Reformat
بعد ما كت فقير بخراتي Word و Excel
دقشتني أم رشوم خلت درايفي إختل
Mother Board القلب الكان زمان Intel
بقى Chipset رخيص كل ما ربطو أنحل
الخبر الأكيد اليلة جابو ال Yahoo
وقال ست البنات إيميلنا مي طارياهو
ست القوام Hardware نظامو براهو
غرامك Virus الهجعة البقرض الجاهو
| |
|
|
|
|
|
|
|
|
|
Re: في شأن غراميات البني كجه (Re: MOHAMMED ELSHEIKH)
|
Quote:
طه الضرير والطيب ود ضحوية في طريقهما إلى أبو دليق وكان طه يبحث في اللاب توب بتاعه في الإنترنيت بال Wireless عن رد من محبوبته. فوجد رداً قصيراً. فأنشد قائلاً:
شديت ال HP واصبح يبرطع جايط
وال Internet دقش قلبتو صايت صايت
على ام شعراً حلال ما طولنو وسائط
وعطشان الغرام ما بيرونو 2 G.Bite
فرد عليه الطيب قائلاً:
الفيك يا طه Virus والله الكريم الشافي
ومفيدك طبيب حتى إنبقيت Mc Kafi
غير لخلوخة الهرفة أم قليباً جافي
وأركز للتجيك يا طه Options مافي
استسلم طه وأنشد:
إيميلك وصل زود علي الهم
والفكر انشغل ال Ram عليك وال ROM
يالصلاح جميع أنا والحبيب نتلم
ويا ساكن الضريح سيدى الحسن Dot Com
الليلة ام شلوخ لاقيتا عند ال Chat
و Virus ضرب قلبي ومحى الفايلات
يوم شافني الفقير البكتب البخرات
قال Defrag ما بفيد أحسن To Reformat
بعد ما كت فقير بخراتي Word و Excel
دقشتني أم رشوم خلت درايفي إختل
Mother Board القلب الكان زمان Intel
بقى Chipset رخيص كل ما ربطو أنحل
الخبر الأكيد اليلة جابو ال Yahoo
وقال ست البنات إيميلنا مي طارياهو
ست القوام Hardware نظامو براهو
غرامك Virus الهجعة البقرض الجاهو |
ما تقول لى دي كتبتها انت يا محمد الشيخ؟؟
ياخي دي بطانة رقمية مبالغة
لك تحيتي على هذه المشاركة السخية.
| |
|
|
|
|
|
|
| |
Tagelsir Elmelik
خدر
Munir
دينا خالد
سارة علي
محمد على طه الملك
Adil Osman
Hussein Mallasi
Rihab Khalifa
fadlabi
khatab
انور الطيب
عزان سعيد
نادر الفضلى
rosemen osman
فيصل عباس
Rawia
الجندرية
حبيب نورة
نوفل عبد الرحيم حسن
بت قضيم
mohmmed said ahmed
أيزابيلا
Dania Elmaki
عبدالرحمن الحلاوي
MOHAMMED ELSHEIKH
محمد يوسف الزين
ناهد بشير الطيب
Hadeer Alzain
الجيلى أحمد
Marouf Sanad
فيس بوك
تويتر
انستقرام
يوتيوب
بنتيريست