دعواتكم لزميلنا المفكر د.الباقر العفيف بالشفاء العاجل
|
|
 الرقصة القومية
|
الرقصة القومية
تاج السر الملك
أفتقد الحضور السودانى بشدة فى كثير من المواقع والمحافل العالمية, بعضها مهم و بعضها غير ضرورى كمسابقات ملكة جمال الكون( فكل النساء السودانيات ملكات جمال كون) أن رغب (راغب) أم أبى وعلى السياق منافسات التزحلج على الثلج و عدد من الفعاليات التى (ما عندنا صبر ولا أخلاق) لها بصراحة .أما الطبق السودانى فأننى أفتقد وجوده هذا أذا سلمنا بوجوده أصلا ففى خلال سنى الدياسبورا العديدة الممتدة ظل مقعد الطبق السودانى فارغا جنبا ألى جنب مقعد الأغنية السودانية والتى لم تتعد حدود القرن الأفريقى تلوب فى أقليميتها بصبر وعناد لا تحسد عليهما, والأدب السودانى( بأستثناء موسم الهجرة والتى صارت قدرنا وقدرتنا حتى تحولت ألى لعنة) منذ الستينات نعيد مضغها واعادة أكتشاف أكتشافها حتى فقدنا قدرتنا على كتابة غيرها ثم الشعر السودانى والذى رغما عن عذوبته ورصانته و تفوقه فهومحرم على مناهج المدارس العربية و مدارسنا حلال زلال على أيليا أبو ماضى و عباس أبو وردة (أن كان هنالك شاعر بهذا الأسم!) و قد حلمت بتواضع سودانى جم موغل فى سودانيته بيوم أمر فيه على مغربى أو مشرقى على حين غرة وأفاجأ بهما (يجران النم) فى الشم التى خوخت أو يتمايلان صوفية وبلهنية على نقرات طار أو طارات أولاد حاج الماحى أو أن يتسع الأثير فى محطات الفرانكواراب ليشمل عمر أحساس ضمن قائمة طلبات المستمعين والذين أذكر منهم ( طارق أبو الركب) من صيدا والذى كان أشد الناس طلبا لأغنيات (البونى أم) فى سالف عهد الديسكو.و تمنيت و ما بحرام على المرء التمنى أن أدخل مطعما واحدا خارج حدود السودان أنعم فيه بطلب واحد (رغيف باللبن) ك (ديزرت) أو عصيدة دخن وسمنة أبو قوتة (صايد اوردر) أو مطعم واحد يسمى الأشياء بأسمائها مثل (جنا جداد مستوى) بدلا عن البيض المسلوق أو أن يقدم السمبر المحمر تحت أسم جداد مشوى كما يحدث دائما فى محطة أبو زبد حين يختلط الجوع بالنعاس بالظلام وأمنيات الوصول , و بالرغم من أننى لا أعلم السر وراء تسمية (الجقاجق) بالجقاجق ألا أنها تشابه فى صداها ووقعها كلمة مقانق ..فتأمل أين تجلس المقانق من الجقاجق ..أما التركين فهو صنو (السوشى) أضافة الى حضارة الاف من السنين قبيل ميلاد المسيح و (مديدة الحلبة) كم تمنيت أن أكحل عيونى بصورتها على (المنيو) و كذا الكسرة و( الكسرة كومبينيشن) بأضافة الطماطم (مانيوالى) بطريقة التعفيص اليدوى , و (الموص) و هو الكسرة أياها مضاف أليها ماء السكر وهى غذاء حاسم لتشحيم العروس لرفع قيمتها الشرائية و لا يغيب عنا ذكر اللماصة و هى العجين السائل الساعى نحو حدود التخمير..أما خبزا أو (فرح معبأ فى الجرار) أن تخابثت عليه نفس أمارة بالسوء!!وهى عزيزة قريبة ألى قلب (غنماية ) الجيران(والحديث لا يزال عن اللماصة) أن أغفل طرف عنها فما هى لحظة ألا و قد التحت بياضا مثل ذقن الشيخ الحبيس
وقد تبين لى بعد فحص و تمحيص أن مأساتنا كشعب تكمن فى حساسيتنا المفرطة و حيائنا غير المبررفنحن نخشى جل خشيتنا ..النقد والتقريع و السخرية أو هى ضآلة مقدار الثقة بالنفس الحادث بفعل الجلد المبرح منذ سنوات الخلوة مرورا بالروضة و حتى ساعة التخرج تحت ظلال حكم العسكر (والذين يأخذون أجازات قصيرة جدا جدا بين أنقلاب وآخرأجازة مدفوعة الأجر وأنقلاب خلال ساعات التكليف الرسمية), و بسبب هذه الثقة المتضائلة أن لم نقل (المنعدمة) فأن كل عظيم نفعله يتحول بفعل الأحباط ألى شىء لا يستحق الذكر وكل معضلة وطارىء الى(مافى عوجة) وكل معجزة ألى (حاجة بسيطة) أو (من طرف دولاب) وهمى ,و أذا درنا حول القمر على ظهر عنقريب فذلك (عادى)..و قد قادتنا هذه (الهيوميليتى) اللعينة وذالك الصبر الفضفاض المخنوق (بأعصاب بايظة)الى الأنبهار بكل ما يفعله الأخرين فنمت فى قواميسنا كلمات باقيات غير صالحات (رهيب...رهيبة..مبالغة..شاذ..حاجة ما معقولة..اسكت ساى..حاجة ما تخلس الخ الخ..) فأحببنا (أم على) و(بابا غنوج) و تضايقنا من (أم دفسو) و (ابو مركوب)مع العلم بأننا الأمة الوحيدة الباقية على ظهر هذا الكوكب والتى تأكل دواخل الخراف نيئة و أننا لا نموت بفعل ذالك و لكننا نموت بفعل الحماقة و (المغسة)..
نقة أخيرة
ذهبت الاسبوع الماضى لتلبية دعوة كريمة من أسرة أثيوبية لحضور حفل زفاف قضيت سهرة ممتعة أجمل ما أزانها أن حضورها كانوا قليلى الثرثرة منسجمون بأخلاص مع تفاصيل الفرح والأحتفاء بالعروسين و برغم من عدم معرفتى باللغة ألا أننى أستطيع الجزم بأنهم لم ينغصوا ليلتهم ب(ساس يسوس) ثم جاءت فقرة الرقص فرقص الجميع بتناسق و أنسجام فكانوا و كأنما يرقصون حسب نوتة معلقة فى فضاء الصالة أو كأنما رضعوا الخطو والأيقاع مع حليب الأم ..لم يشذ أحد و لكنهم أبدعوا جميعا داخل أطار موحد متفق عليه..أستبانت حسرتى حين هاجمنى خاطر مثل الكشف بأننا لا نملك (رقصة قومية)!!!!و أقصد بذالك رقصة واحدة موحدة يجتمع على أدائها كل السودانيين و استثنى من ذالك البشير بتشديد الشاء والذى يسود أعراسنا وأحتفالاتنا فهو فهو طقس(سودان اوسطى) و هو ليس رقصا بقدر ما هو طرقعة لأصبعين فى الهواء فأذا أستثنينا البشير بتشديد الشاء تبقى لنا رقص البشير بفتح الباء وكسر الشاء كمشروع رقصة قومية هذا أذا وافق (كير) بالطبع ...فحالنا أسوأ من مآلنا...وحسبنا الله ونعم الوكيل.
|
|
 
|
|
|
|
|
|
|
|
Re: الرقصة القومية (Re: Tagelsir Elmelik)
|
صباح طيب يا أخانا المجقلب ..
أثني أملك في رقصتنا القومية ( من مصدر الكلمة : القومة , و هي أن يهب الرجل واقفاً على ساقين , و نقيضها القعدة ) يقال مثلاً للكلب و غاشي الدرب : " القومة ليك " .. بس ياها ديك . | Quote: رقص البشير بفتح الباء وكسر الشاء كمشروع رقصة قومية هذا أذا وافق (كير) بالطبع |
على ما تقدم من مشروعك المحترم , نقترح رقصة ( البِشكير ) حتى لا يتحسس المتحسسون الوحدويون الوطنيون , و تبقى لنا " اللُحْمَةُ " الوطنية , و هي نوع من اللحم الذي يطرشني بيهو , تطفحه فتتناول أقرب خِرقة فتتبشكر راقصاً .. و شَمَطَتْ و قَمَطَتْ .
و اشّا الله ربنا يديم المعروف ياخ .
| |
|
|
|
|
|
|
|
|
|
Re: الرقصة القومية (Re: Tagelsir Elmelik)
|
كتابة عجيبة وغرائبية. ماركيز ما كتب زيها. تعرف يا تاج السر الملك: لو كان السودانيين يحلون (من تحلية) ويربطون بالرغيف او الكسرة بالروب، لاجترحوا المعجزات!
| |
|
|
|
|
|
|
|
|
|
Re: الرقصة القومية (Re: Adil Osman)
|
الأخ العزيز
تاج السر الملك
| Quote: جاءت فقرة الرقص فرقص الجميع بتناسق و أنسجام فكانوا و كأنما يرقصون حسب نوتة معلقة فى فضاء الصالة أو كأنما رضعوا الخطو والأيقاع مع حليب الأم |
أخبرتني صديقة انهم عندما يذهبون إلى حفل,,
سواء زفاف أو غيره
فهم لا يستطيعون الرقص بحرية على أنغام الموسيقى
بل كثيرا و ما يلتزمون المقاعد
لماذا؟
خوفا من عيون الناس و من القيل و القال
(دي حالة دي)
كما قلت, نحن قوم نخاف من النقد
و نحاسب كثيرا بعضنا البعض
كل الود
غادة
| |
|
|
|
|
|
|
|
|
|
Re: الرقصة القومية (Re: غادة عبدالعزيز خالد)
|
النقد عندنا {نبيشة وشيل حال}
ارجع لمناهجناالبترسخ للانكسار والخنوع
خاصة {ملكات الجمال- وكل آدم معجب بحوائه}، علموهن كيف يكونن طيعات ومطيعات ومايرفعن رأسن
البتعاين ليك جوه عينك عشان تتابع حديثك تكون قليلة ادب ومامربية
حتى النظرة ياكافى البلاء نسرقها سرقه
ولو جيت اوربا وجرت فيك الاوربية نور السموات والارض تكون مكسرة فيك
ونحنا ماعارفين انها مكسرة فى البسموه بالالمانى عندنا {الاوقن كوناكت، يعنى قمة التواصل الانسانى {تواصل العوينات} عشان تستوعبك وتستوعب حديثك لابد منو {شفت العين القوية دى، ياربى برضو سنها ملوية؟}
بعلموهم من الصغرة هذا التواصل، لو زحيت عينك تكون عامل عملة وتفقد بالتالى قيمة التواصل المبنى على لغة العيون واليدين وكل الجتة.
الغريب فى الأمر جننا نقة وشيل حال، بس مانلقى فرصه
اول النقة قلمك السانيهو ده وشايل حالنا ماخليت لينا جنبة، لقيت فرصتك واتفسحت فينا
وياريت لو النقة زى نقة قلمك كان حالنا انعدل لو اخدناها مأخذ جد ووضعنا خططنا على اساسها مثلا خطة لايجاد رقصة قومية....فكرة جيدة والله
قلت رقصة يتفق عليها كل السودانيين؟
ماتخليهم اول يتفقوا على قسمة الموارد والسلطة
بعدين بتجىء الرقصه القومية
كيف؟
بعدين بنعرف
أها شفت بنرجى فى الحاجات كيف؟ تقول عندك ملاريا يقولوا ليك الله كريم و {نعم بالله} الناس ذاتهم استلبهم استهبال الدولة ينعمون بفوائد البترول ويأكلون الطيبات ويتزوجون مثنى وثلاث ورباع وفى النص يطلقوا التانية عشان تجىء الخامسة وهلمجرا....ويخدروا الشعب المسكين ويمسكوه من شجرة ايمانهم ويشرب العرديب بالقرض وتتهرى روحه قبل الملاريا الساكنة دمه {هى الباعوضة دى لاقية فى دمهم شنو؟ غريبة والله}
وسلامات
| |
|
|
|
|
|
|
|
|
|
Re: الرقصة القومية (Re: Adil Osman)
|
تحياتى يا عادل عثمان
شكرا على التقريظ المهول ( ماركيز) ..أسعدت يومى
الرغيف و الكسرة ..مربط العجل..لا طعام و لاسلام دون غموس..أتذكر فى بغداد
الفاصوليا و التمن ( الرز)..نصيح بصاحب المطعم..بس كده..الرغيف وينو؟؟
حاجة مافيها تتبن ..ما بتعتبر عضة..
الى ..قدام
| |
|
|
|
|
|
|
|
|
|
Re: الرقصة القومية (Re: Tagelsir Elmelik)
|
هــالو تي أس ماليك..
كالعادة بتكتب عن حاجات بنمر عليها كلنا مرور الكرام وناخدها من المسلمات وعمرنا ما وقفنا فيها..
طبعا الليلة ذكرتني الرغيف باللبن أكلتنا المفضلة وإحنا صغار.. وكان لي منه سنين..
غايتو لو دايرنا نتعامل معاه كـ (ديزرت) في مطعم لازم نعمل ليه محسنات وإضافات زي الجوز واللوز واللذي منه مع دخيلو الفرن لمدة 5 دقائق حتى يسًمر الرغيف..
حقوق الوصفة للعبدة لله لو سمحتا ..
أمي بتابع قناة إسمها (فتافيت) بتاعت طبخ.. فيها كل الطباخين أصحاب الأسماء: جوني أوليفر (ذا نيكيد شيف)، وأميرل أجاسي، وجيادا دي لورينتس (إيفري داي ايتاليان).
أها معظم الأكلات البيعملوها وبدوها أسماء بتاعت لوردات وكونتيسات هي أكلاتنا البنعرفها وناكلها بأسماء تانية.. وحاتك بياكلو الكمونية زيهم زينا وبيزيدو علينا أكلهم للحم النًي. والعجب الحجارة (القواقع واللابوستر)..
يعني إحنا لو ختينا الرحمن في قلبنا برااااحة ننافس بأم رقيقة الخفيفة الزي (ريالة الديك )، والتقلية بألوانها المختلفة (بني، برتقالي واخضر )..
..
ما عارفة. لكن حاجاتنا وأكلاتنا السودانية ما بتنفع إلا لينا.. وحتى وليداتنا الإتربو برة السودان ما بتتخارج معاهم.
أنا الكبيرة دي بتصدم من طريقة أكل بعض الأصناف.. يعني ما تتخيل فضلت ليومين أستوعب كيف العصيدة والقرًاصة بيتأكلو بالإيدين؟!!
وما حأقول ليك باكل الكسرة بي شنو..
عندك حق في إننا بنخجل من أكلاتنا. لأنك مهما حاولت تشرح بتتعمل كيف لزول أجنبي ما حتقدر. فبنختصر الطريق ونغيًر..
بالمناسبة زملائي المصريين الكانوا معاي في دارفور إتصدموا من إسم ملاح التقلية (بالدارجة السودانية).. وأصبح الإسم مادة للتندر خلًت العرق الجعلي يكون في حالة غليان مستمر..
أها نبقى في جنس ده..؟
لك من الود الكثير
راجا أبًاسي
| |
|
|
|
|
|
|
|
|
|
Re: الرقصة القومية (Re: Raja)
|
عماد و عادل و غادة و رجاء
أستأذنكم فى الأبتداء بتحية
أختنا أشراقة..و سؤالها عن صحة والدتها
أما سنة القلم ..أسنها وين..؟؟ فى الصين الشعبية؟؟
أسنها فى ( بنى كجة) عسى و لعل..رؤيتك قادلة فى المنبر تشى بأن الأمور على شىء من ( اليرام)
دى ( حبيب نورة) لسة ما سمعها
عماد يا صديقى
انا منشده من السختة التى لا تزال تزاورك ...رقصة ( البشكير)!!!
هاهاهاهاهاهاهاهاها
و الله دى مايكل جاكسون ما جابا..ملعون يا تواتى ( نواياك السيئة ) دى الجابت الكتاحة...
دعنا نؤلف لها مقطعا
رقصة البشكير الليلة
جنابو فى التمرين الليلة ( لازم يكون فى ضابط) و القافية ما مشكلة
المسكو البشير الليلة
حمادة مالو مسيل الليلة...
| |
|
|
|
|
|
|
|
|
|
Re: الرقصة القومية (Re: Raja)
|
| Quote: أنا الكبيرة دي بتصدم من طريقة أكل بعض الأصناف |
يا راجا
واحدة اجنبية قعدت فى السودان و احنت البلد الى درجة الهيام
قالت لى فى الهلتون تاكل اة طبق عالمى ما عدا الطبق السودانى!!!
و حينما استجابت الى عزومة سودانية..شبهت ملاح الشرموط فوق اللقمة ( بالدودو)
طبعا ما شاكلتها و لا شى ..اللقمة و الحرف باقى عندنا ليهن معزة شديدة خلاس
اعتراف اخير
السودانيين طباخين ..كان ختو الدهن المطمبج.
| |
|
|
|
|
|
|
|
|
|
Re: الرقصة القومية (Re: Tagelsir Elmelik)
|
شكرا من الأعماق .. على هذه الكتابة .. الحادقة .. اللذيذة .. تثبت لي يوما
بعد يوم .. أستاذيتك في الإبداع الأدبي الراقي ..الأصيل..
ومن ثم .. نحن أصلا ما عندنا أول حاجة " رؤية قومية " عشان نعمل مؤسسات قومية عشان تشكل " شخصية قومية " عشان ترسم أهداف قومية .. عشان نتواضع على وسائل " قومية " .. زي الرقصة القومية والأكلة القومية ، واللبسة القومية .. لتؤدي جميعها في نهاية المطاف إلى تحقيق الرؤية القومية ...
شفت كيف .. نحن للأسف صورتناالقومية مبنية على أنماط ذهنية .. متوارثة في عقولنا ويشوبهاالكثير من المبالغات والمغالطات .. وأنماط أخرى .. محمولة في أذهان الأخرين .. مبنية أيضاعلى أخيلتهم وتفاسيرهم لما نطرح من دلائنا .. إن كنا نطرح شيئا بالأصل .. بل على عدم مقدرتنا على طرح أنفسنا بالجرأة الكافية .. والوضوح الكافي ..
بعدين موضوع عدم الثقة في النفس ( اللوبروفايليزم)..نتاج طبيعي .. لطرائق وأساليب التنشئةالتي مورست .. وتمارس .. بل نحن ذاتنا مرات مرات بنقدس ونستنسخها على أبنائنا .. يا خي كميات خرافية من النهير ( من نهرة) ..والشتيمة.. وتفريغ الشحنات النفسيةالسالبة ..في أدمغتناالغضة...شربنا كل ذلك بإسم التربية ..سواءا من
الأسرة الصغيرة( بحسن النية) أو من المجتمع الكبير ..بشوارعه ومدارسه ومكاتبه ومؤسساته .. .. أو من بعضنا تجاه بعضنا في نهايةالمطاف...يعني حاجة تهز جبل .. مش حبة ثقة في النفس ..لسة ما تكونت في نفسية شافع شويفع..
لكنني لا أشك إطلاقا..بأن لديناالكثير من الاشياءالجميلة الأصيلة ..والتي يمكن أن نسهم بها في رقي الجنس البشري .. فضلا عن كونها مدعاة للتباهي والتفاخر..كتحصيل.. للحاصل..
لغاية هنا .. أشكرك بطريقة قومية " للطيش" أشكرك.. لامن تتفرجخ.. والقومة ليك ..
| |
|
|
|
|
|
|
|
|
|
Re: الرقصة القومية (Re: ibrahim fadlalla)
|
| Quote: لكنني لا أشك إطلاقا..بأن لديناالكثير من الاشياءالجميلة الأصيلة |
أخى ابراهيم فضل الله
هذا هو
لخصت لى كل رؤيتى فى الكليمات ديل و مجمل مداخلتك
لك ودى
| |
|
|
|
|
|
|
| |
Tagelsir Elmelik
Emad Abdulla
Adil Osman
غادة عبدالعزيز خالد
Ishraga Mustafa
Raja
ibrahim fadlalla
فيس بوك
تويتر
انستقرام
يوتيوب
بنتيريست