|
|
 جبنة بت أحمد وحبوبتي فاطنة بت ميدوب... إلى سلمى الشيخ و منى خوجلي بمناسبة العيد...
|
{font size=4}
جبنة بت أحمد...
منتصف النهار, الصمت يلف المكان حتى لكأنك تسمع ضجيجه يأتيك من جميع أنحاء الباوقة, فأشجار
النخيل ساهمة, والقماري مسترخية فوقها, والأغنام متفيئة ظلآلها تقصع جرتها من حين إلى آخر. بداء
يشق هذا الصمت صوت فندك بت أحمد وقد بدأت في دق البن الذي ما زال بعض منه في القلاية فوق
النار...
بدأت بت أحمد جالسة فوق البنبر وقد تدلت محفضتها حتى لآمست الأرض, وأمامها المنقد, وعلى
يمينها صفيحة ماء, وبجانبها الهبابة والشرغرغ على الأرض بجانب الصينية التي حوت الفناجين
تتوسطهن القداية بألوانها الزآهية, وصحن ينضح بعجوة ود لقاي مع عروق جنزبيل. توقفت بت أحمد
عن دق البن ليعود الصمت يلف المكان مرةً أخرى, وبدأت تحرك القلاية فوق النار, في هذه
اللحظة طارت قمريّة مصفقة جناحيها في الهواء ثمّ أستقرت على صبيطة تمر قوقت لفترة من
الزمن وصمتت. عاد الهدوء يعم المكان مرةً أخرى لتقطعه بت أحمد وقد بدات تحكي عن
زمن جميل مضى وهي توزع لنا فناجين الجبنة. قطع حكي بت أحمد, صوت حمارة في الخارج,
واتى صوت ود الأحمرمخترقاً الصمت: سلآم يا بت أحمد. كيف قيلتو؟.
بت أحمد: مرحب حبابك ود الأحمر. أدخل أشرب لك فنجان جبنة.
ود الأحمر: لا لا كتّر خيرك. سادر على الحواشات.
ثم تواصل بت أحمد الحكي وقلي البن وقد بدات حبيبات العرق تسيل في مجاري شلوخها
وهي تحكي وتبتسم بين الفينة والأُخرى, وتصب لنا الجبنة نحتسيها فيمازج طعمها حكاوي
بت أحمد الجميلة لتصبح عابقة في مكنون ذاكرتنا دوماً تذكرنا بت أحمد بعد أن رحلت
مع السمحين...
الآ رحم الله خالتي عآشا كما يحلو لأهلنا نطق الإسم على هذا النحو, ورحم
جميع من رحل من أهلنا الطيبين...
مجرّد خاطرة... ود المدير...
|
|
 
|
|
|
|
|
|
|
|
Re: جبنة بت أحمد وحبوبتي فاطنة بت ميدوب... إلى سلمى الشيخ و منى خوجلي بمناسبة العيد... (Re: معاوية المدير)
|
{FONT SIZE=4}
حبوبتي بت ميدوب...
كلما صدح الغناي مُردداً:
قايمي الصباح متكفلتي شايلي الحِليلىِ على المُراح...
تراءت لِي صورة حبوبتي فاطنة بت ميدوب أمامي. (مُتقرقبة بقُرقابها الأسود )
والحِليلة في يدها اليُمنى, تداعبها نسمات الصباح وقد بدأت الطيور تعزف
الحانها الجميلة فوق أغصان شجرة حرازتها واشرابّتَ غنيماتها يتصايحن
كأنما يؤدن لها تحية الصباح. تبدأ تحلب وقد فاحت رائحة المُراح في جنبات
المكان ممزوجة برائحة البرم, ونوار الليمون والبُرتُكان.أراها ماثلةً أمامي
وقد حلبت اللبينة ثمَّ توجهت بخطىً قد أثقل وقعها مر الدهور والأزمان
معتمدة على دفارتها نحو شجرة الحِناء النابتة بجوار (المارقون) وقد
تدلى من أحد أغصانها سِعن اللبن. تسكب فيه اللبينة, وتجلس فوق البنبر
وتبدأ في خش اللبن.
أذكرها وهي جالسة فوق عنقريب صغير قريب من الأرض, أمامها
براح واسع ممتد حتى الجنينة حيث لايوجد سور ولا سياج, ونحن نلعب
مثيرين الغبار, وهي تبتسم من بين ما خلّف لها الزمن من أسنان. إبتسامة
يتفجّر من خلالها إحساس بالرضاء عن النفس. إحساس بأنها قد أدت
رسالتها في الحياة وهي ترى أحفادها أمامها يمرحون في سعادة وحبور.
ثمَّ تنهض وتدلف متوجهة الى داخل المارقون الذي تتوسطه شِعبة تساعد
العرش على التماسُك, قد حفرت (الدنانين) أجحارها فيها مُشاركة
بت ميدوب المكان برفقة (الزرازير) التي هى الأُخرى طول النهار في
حالة دخول وخروج من خِلال الطاقات في عملٍ دؤوب لِجلب الطعام
لصغارهن, لايهدأ لهن بال إلا بعد أن ترتمي الشمس في أحضان الغروب.
ما ضجرت بت ميدوب يوماً ولا تضايقت من هذه الرفقة. ثمّ تفتح
السحارة لتأخذ شئ فتفوح رائحة السحارة في جنبات المارقون وقد
عبقَ في جنباتها عطر بت السودان ورائحة الصندل والمحلبية وحتى
رائحة (الحنوط) الذي إحتفظت بِهِ بت ميدوب في السحارة مع كفنها
إستعداداً للرحيل. رائحة السحارة هي رائحة بت ميدوب. ما زلتُ أشتمها
كلما عصفت بى الذكريات المحزونة والحنين للزمان والمكان.
أذكرها في عِزّ الهجير وهى تقلّب سعون العجوة حتى تتعرض لأشعة
الشمس, ثمّ تتوجه إلى عنقريبها تحت ضل الحِناء. نعم شجرة حِناء,
ووالله كنا نتسلق أغصانها. الأرض كانت مِعطاءة, والنفوس كانت صآفية
كما النسمات تحتَ أشجار الجزائر...
هكذا عاشت حبوبتي بت ميدوب. معتمدة على نفسها في كل شئ حتى
بعد أن تجاوزت المئة. ثمّ رحلت في هدوء. وبعد رحيلها غادرت
الزرازير والدنانين المكان, وآثرت الحِناء السقوط على البقاء من بعدها,
وأصبح المكان لاهو المكان ولا الزمان هو الزمان بعد رحيل بت ميدوب
والناس السمحين اللذين ابت البركة إلآ أن تتمسك بأكفانهم وترحل معهم
بلا رجعة...
كانت الباوقة بخيرها, وكنتُ أتعجب وأقول لأُمي: يا يُمّة البلد, ما شاء
الله خيرها كتير!!. فترد عليَّ قائلة: يا ولدي الخير ما راح مع أهلو,
زمآن كُنا لامن تهب الهبوب الصباح ندلي كِرعينا فوق التمُر!!!...
أيِّ زمان هذا الذي نعيش فيه الآن؟؟؟... خنقتني العبرة في لحظة
طرح هذا الســــــؤال...
| |
|
|
|
|
|
|
|
|
|
Re: جبنة بت أحمد وحبوبتي فاطنة بت ميدوب... إلى سلمى الشيخ و منى خوجلي بمناسبة العيد... (Re: معاوية المدير)
|
الي روح حبوبتي عائشة بت الحفيظ الطاهرة كما الطفل يوم مولده..
والي روح حبوبه فاطنه بت ميدوب وذكري أيام المحنة والعفه تدثر كل القرية بدفئها وحنانها..
الي كل حبوباتنا..
الارادة القويه..
النظافه والايمان..
الصدق وطولة البال..
أهل الحكاوي ذات الخيال والعبر..
أهل الجلسات النقيه والضحكة البريئة من القلب..
حبيبات القمر وشجر النيم والأطفال..
أهل البركة والدعاءات النقيه..
الي حبوباتنا جميعا..
الي من هن مازلن معنا..ومن غادرننا تاركات في القلب حزن وفي الحلق غصة..
أهدي معك وبفضلك ونستنا هنا لهن..
كل سنة وانت طيب معاوية أخوي..
| |
|
|
|
|
|
|
|
|
|
Re: جبنة بت أحمد وحبوبتي فاطنة بت ميدوب... إلى سلمى الشيخ و منى خوجلي بمناسبة العيد... (Re: معاوية المدير)
|
أكثر ما يحير في الحبوبات هو رسوخ تلك الصفات المتطرفه في نوعها...
يمارسنها في ثقة وبتعقل تام يناسب الموقف..
فكلمة لا عند الحبوبة تبدو حازمة ولا تراجع عنها..
وبنفس القدر القبول والرضاء سهلحتي تظن انهن لا يرفضن امرا ابدا..
حبوبة..
كلمة في غاية الحنية تأتي بصفات الحب المرتبطة بشخصية الجدة..
تري..من هو او هي اول من استخدمها أو اطلقها؟؟
هي امرأة صاحكة..طيبة..بسيطة وقوية الشكيمة..
شديدة الحكمة وكثيرة اللطافة..
.......
.......
تجد حتي الرجال ممن يقاربونها في العمر وربما يكبرونها..مازالوا يحتفظون لرأيها بمساحته الكبيرة..
فأغلب الحبوبات من ذلك الزمن الجميل عركتهن الحياة بتجاربها في حدود مجتمعهن..فتربين علي الصبر ..
وعلي النظر للأمور بشكل عقلاني مختلف عن الاجيال التالية لهن..
.....
......
بجانب العنقريب والمزيرة الصغيرة..
والكانون وعدة القهوة..وقفت تقصقص بعض اوراق نباتات تسلقت عامود راكوبتها..
نظفتها من بعض العروق الميتة وهي تدندن ببعض ابيات المديح..وثوبها السماوي ملتزم تمامابمكانة علي جسدها النحيل..
وفي قدميها انتعلت حذاء جلدي خفيف أسود اللون كانت قد اشترته لها ابنتها هديه في العيد السابق..
كانت حبوبه في انتظار جاراتها للذهاب الي منزل حاجة فاطمة التي رجعت قبل ساعات من الخرطوم بعد رحلة علاج استمرت 5 اسابي!
........
..........
| |
|
|
|
|
|
|
|
|
|
Re: جبنة بت أحمد وحبوبتي فاطنة بت ميدوب... إلى سلمى الشيخ و منى خوجلي بمناسبة العيد... (Re: Muna Khugali)
|
كل سنة وانت طيب
يا معاوية المدير
ومعاك حبوبة سعيدة اجمل حبوبة فى الدنيا
حبوبة سعيدة
تفتحت العيون في اسرتنا علي لمعة ضحكتها الناصعة واعتادت الاذن صوتها
متخللا الاوصال ، فتنام الاحزان بضحكة منها ، فهي تمتلك المقدرة علي جذبك
بمغناطيسها الضاحك المشع فرحا ، دعابة لا تنقطع قط .
منذ ان وعينا الحياة وهي امامنا وخلفنا ، معنا في كل لحظة لا نذكرها في غيابها الا وتجئ داخلة كخزانة جليلة مفتاحها مدسوس في قلوبنا .
لكل واحد منا مكانة خاصة بها ، فهناك من يعرفها وهي تميس في حلبة الرقص في حفلاتنا ، ايا كانت نوعية الحفل فهي الجرتق الذي ينسدل عطره علي كل فرد ، ويتشتت حريره علي كل من يود شبالا ، في المناسبات الكبيرة كالزواج ، تجئ باكرا توقظ من كان نائما ،تدخل رواكيب القلوب بزغاريدها ، تجئ من مدينة مدني حيث كان عم الجاك زوجها يشتغل هناك ، كنا لا نعرف اين تقع مدني لكننا نحبها لانها تجئ الينا كل حين بحاجة سعيدة مصحوبة دائما بعم الجاك وأطفالها الذين غدوا الآن رجالا ونساءا ، تدخل من شراعة الروح بلا موعد ، تطلق زغرودة الترحيب
الاولي من( خشم الباب) ، ليصحو من كان متكاسلا ، ويفرح من كان محزونا ، فهي الحاجة سعيدة قد جاءت
- مبروك وبخيت ، بيت مال وعيال ، تغلبو بالمال ويغلبا بالعيال ، احي يا يمه ، والله والله دي نهزة من الساعة خمسة الدغش ،صلينا انا والحاج الفجر ، ومن ساعتنا ديك علي محطة( الباظات )الحمد لله (الباظ ) ما اتاخر، اها ، دحين وين بكان العواسة ، وفيها منو من اما ت (دزه )بري ديل ماناسي ، ولا اقول ليكن ، المرارة والكمونية ديل حقاتي ، اها النقوم نشوف حالي بي غادي .
الآن وقد مضت الاعوام كبرنا ( وكبرت احزانا ) عمت الفوضي التي ضربت بعصي الموت والترحال ذاك المكان الزى كان بيتا كبيرا ( الحوش) هكذا كانت تسميته ، تدخله من ناحية شارع الفيل أو من زقاق الشيخ اسحاق حمد النيل فهو (فاضي معلم الله ) الا من بعض الذين يجذبهم الحنين الي ذكرياته وايامه المجيدة فلقد رحل من رحل ممن كانوا يصنعون الفرح والحياة فيه ، تآكلت روحه كما تتآكل الجدران الرطبة ، ولم يتبق سوي الذكرى نلوكها نتعزى بها عن فقدنا
الحاجة سعيدة رحمها الله يا لتلك المراة الحميمة الضحكة حتي لكأنك تعرف تلك الضحكة منذ ان كنت في رحم الغيب ويا لتلك الرقصة التي عرفت بها والتي ازعم ان من اطلق عليها (الحمامة) كان قد شهد حاجة سعيدة وهي ترقصها الرأس يغوص حتي منتصف الظهر ، فلا تكاد تراه ن الصدر يعلو كابرع ما تكون راقصة الباليه ، الاكتاف مسدولة في ارتخاء تحسدها عليه ، والعنق يجئ ويذهب يمنة ويسرة في عذوبة ويسر، سبائب الشعر ( الديس ) تصل قرابة الارض ، لكنها تعود الي موقعهاالي صهوة الاكتاف ليستقيم العود الفارع ثانية كنت ارقبها وهي ترقص اتمني ان اكون في مثل لدونتها وبراعتها في الرقص الزى كنا نتسابق لمشاهدته ، ولعمرى كثيرا ما ما تصورت بعد ان تعرفت الي اغنيات الحقيبة انها حتام المعنية بكل تلك التخريجات الرائعة الكلمات ، والقصائد ، فلقد حكي لي جدي بشير عليه الرحمة انه كان مولعا ببيوت ( اللعبات ) وكانت هي مولعة بالرقص ، فكان بعد ان يهجد الكبار يناديهن للخروج ( مسارقة ) يخرج بهن كراع يخاف علي شياهه من الذئاب ن يدخل بهن الي بيوت اللعبات ولا يراهن الا بعد انتهاء اللعبة ( الحفل ) وما يزال بعض حبوباتنا وجدودنا يطلقون ذلك الاسم علي بيوت الاعراس ، وما يزال البعض ينادي وزير الرياضة بوزير ( بتاع لعب )
حاجة سعيدة علي وعد دائم مع الضحك حتي في احلك الاوقات ، لا تراها الا وهي ضاحكة لعلها ـ هكذا اتصور ـ ان اسمها جاء قبل ان تعرف القابلة ما اذا كانت ولدا او بنتا ، لكنها حين جاءت بنتا ضاحكة ، اسموها سعيدة ليتطابق الاسم مع المسمي الي الابد
لم ارها حزينة الا بمقدار ما يجعل الحزن لحظة غابرة ، تعود بعدها لمداراته بضحكة لا مرسومة ولا مفتعلة ، روحها الصفاء ، ليست صاخبة ، لها قلب دافئ ، علي نحوها ، وطعم خاص ايضا ، حتي بعد ان تساقطت الاسنان ، ظلت الضحكة مشرقة والابتسامة حلوة ، بروح طفولية وبريئة.
لديها قاموسها الخاص مفرداته من صنعها ، فهي صانعة جيدة للكلام ، بمقدار ما يجعلك ترجح ان هذه الكلمات ، معدة لتتعاطاها حاجة سعيدة ، فهي مع الاطفال طفلة ابرع منهم مع بعضهم البعض ، مع النساء الرقة والعطف والعذوبة ، مع الرجال القوة والصلابة والعزيمة والكرامة التي لا تنحني لها
( جبهة) لغة لكل انواع البشر ، تخاطبهم فتحس مبلغ الاحترام بين الطرفين فهي (حلال المشبوك ) وسند الضعيف ومفرحة الحزاني .
مع اولادها هي الام التي لا حدود لطاقة الامومة لديها ، ليتك تراها مع احفادها
ستاخذك الغيرة وتتمني ان تكون احدهم .
حين تهل فلا مكان ( لبوزممدود ) ولا لاحد (حانف وشو ومطرم ) لانها حينذاك ستترك كل ما عندها وتجئ الي من كان( ممدود البوز او محنوف الوش او المطرم ) وتوجه كل طاقاتها الي اضحاكه ، لانها ستقول له علي رؤوس الاشهاد :
- هي بس كدي هيا اب دزه ، ساو حجباتك امات بعر ديل ، اجي مالك هسي ؟ خلاس ؟ طار ليك ولا قام بيك ؟ جاك البعرفو؟ مرض حامد ، من عويناتك ديل بخبرك هسي البنيات ما حلاتن ، زي النجف واسمح كمان ، ومالك حانف وشك كدي ؟ ماك شديد تحمد سيدك ، الشغل شغال واحسن وظيفة ، القراية ماخليت ليها حد ، البيت ماشاء الله تبارك الله ، العربية عندك تحمد سيدك ، الملالين عندك ، وحاشاك ماك بخيل ، اها نان مال عدوك ؟ انت قول خيروالباقي بنتم
فان كنت مكان ذلك الرجل حتام ستنفرج اساريرك لان طريقة الداء لا تضاهي بابرع الممثلين ، من الكوميديانات ، وغالبا ما ترد عليها
- يا حاجة سعيدة ام المحن وغالبا ما ترد عليك بقولها :
- اول البمرق النصيحة ياهو العندو المحن ؟ هسي أقول ولا ... بالله كان اقول ، بت الناس المزازي بيها دي ، اجي اجي ، ولا قايلني ما عارفة ؟ الضحك والتكشم بلا غرد ،يندخرلك ، ضحكن يجيب الرايح ، ولا قايلني ما بفهم غرودة العيون ، والتسبل ، والحس الناعم ؟ هوي يا ولد ارعي بي قيدك ، خلي البشتنة البتسوي فيها دي وقوم علي حيلك سد مالك وشوف احوالك ، ولا والله ان ما سويت كدي ياني الشايفا ليها عريس هايش وكباب درايش واخلي خشمك ملح ملح ، اجي يا يمه ، البشتنه ما سمحة والسترة واجبه ، وبنات الناس ماهن لعبة ، والله باكر تقول حاجة سعيدة قالت ، الله يديك العافية واللقمة الدافية ، والنية الصافية الكلام عجبك تتكشم بلا نارالقصب ، والرجفة ، اجي يا بنات امي شوفن جنس السخته دي ؟ اها اها لمن شعرة جلدي كلبت نان يا ولدي العرس ما سمح ، وهي ذاتا بتا هدية ورضية ، الغنماية تاكل عشاها ، والكلمة الباردة من حشاها ، والسماحة حقتا تب ، بتا تختها في الجرح يبري ، لا نضامة لا حوامة ، لا لوامه ، اللون يا الله بجيك وتسالني الدهب المجمر ، طول كدي ، مستورة ومحضورة بتا لا بتقلب الكلام لا بتخرب النظام ، مادبه ومهزبه ما سمعنا زولا قال تب عليها مالك يا ولدي ؟اخير ليك من هسي شوف جناك الولادة
( سغرة) سوي ليك تيرابا يشيل كبرك يشيل اسمك ويعدل هدمك ، قوم علي عمل الخير الله يجازيك بكل خير ، قوم الله يرضي عليك ويديك الفي مرادك وتخرف وسط اولادك
يا ود بتول بت الما فيها قول ، ونحما غير صالحك ما دايرين ، وغير سمحكن ما طالبين ، ولا ما ياهوكدي ؟
هي هكذا دائما مهزارة في غير ما ابتذال ، مدرارة لحلو القول ، تدخل البهجة الي قلبك قصدا ، رحمك الله ايتها المرأة الرائعة
رحمة الله على حبوبة سعيدة /B]
| |
|
|
|
|
|
|
|
|
|
Re: جبنة بت أحمد وحبوبتي فاطنة بت ميدوب... إلى سلمى الشيخ و منى خوجلي بمناسبة العيد... (Re: Muna Khugali)
|
نفيسي بت بغداد
كانت ((بت مجذوب)) اخرى في البركل
حكيت للطيب صالح رحمه الله عن نوادرها
وضحك حتى دمعت عيناه
رحمها الله كانت امرأة عظيمة في كل شئ
انت يا حبوبتي دحين قبل دة ما سكرتي مع بت عريبي
- نفيسي: نان يا ولدي هو داك يوم بيتنسي
- باقيلي طشمتن كله كله
- وحاتك يا ولدي رقدنا خل
- اصلكن لقيتنو وين
- مشينا يا ولدي لي عرس بت واحدي سرنا من البركل لي مروي انا وحبوبتك بت عريبي
- اها شن سويتن
- لقينا النصيبة اليقولولا صابرات شادي العرقي للعرس
- اي هي كانت دي شغلتها في الاعراس
- اي يا ولدي عندها عرقي كافر خلاص
- نان انتن اصلكن لقيتن الجر (الزير) أليل العرقي ووقعتن فيهو
- والله يا ولدي انا السويت النصيبي
- كيفن
- قلت لي بت عريبي ونحن طالعات علي نضوق عرقي الخرابة دي قبل نمشي علي بيوتنا
- اها
- اهايا ولدي قعدنا جنبها وبقت تديني كوري وراء كوري ونحن نشرب ونتمطق
- اصلها ما قلتلكن كفاكن
- آآآبتقدر عارفاني لساني علي الحبل أليل البير
- اها
- وحاتك يا طارق يا ولدي وكتين اشوف في بت عريبي تشرب في الكوريي
وتنزل عرقي الجن دة في حلقها وتكرمش وشها علي كروق الدوم وكتين يقدم
- ههههههههههههه الله لا تكسبك كتلتيها
- اها يا ولدي هي تجغم وانا اجغم .. وكتين شفنا راسنا سكرنا وبقينا نلغلغ
- شن سويتن
- قلتلا يا بت عريبي قوماك نمشي انا راجلي يصلي بالناس في خلوة القرونة
- راجلك امام وانت تطشمي
- نان يا ولدي هو كان عارفني دايري امشي اطشم في العرس هههههه
- اها
- قلتلك قلت لي بت عريبي نمشي من تالا التمُر لامن نصل قصاد بيوتنا ونطلع جري ننوم
- اها
- يا ولدي بقينا ماشين ماشين لامن رحنا
- الله يقلعكن اها
- قامت بت عريبي قالتلي: انت يا نفيسي نحن وين
وانا قمت قلتلا: انت في نحن وين ولا نحن ذاتنا منن (من نحن)
ازيكم كلكم ياخ
| |
|
|
|
|
|
|
|
|
|
Re: جبنة بت أحمد وحبوبتي فاطنة بت ميدوب... إلى سلمى الشيخ و منى خوجلي بمناسبة العيد... (Re: طارق جبريل)
|
Quote:
حبوبة..
كلمة في غاية الحنية تأتي بصفات الحب المرتبطة بشخصية الجدة..
تري..من هو او هي اول من استخدمها أو اطلقها؟؟ |
إخيتي منى...
الرجل حبوب،
والمراة حبوبة...
والكلمة تعني، الكريم، الشهم الذي يباشر
الناس ويهش عند لقآءهم كما نعلم جميعاً.
والحبوب إسم يطلق على الرجل تيمناً ولا
يطلق على المراة إلا كِناية إذا كانت تحمل
إسم حبوبتها كما يطلق على الصغير إسم جدو
إذا كان يحمل إسم جده، وتوصف المراة بانها
حبوبة إذا كانت تحمل الصفات أعلاه...
تجديني أشاركك السؤال في من أطلق أو أطلقت
إسم حبوبة على الجدة؟، لكن الإسم له مدلولات
في دواخل الحبوبة، وفي مظهرها الخارجي
سنظل نتحدث عنها دوماً...
والله يا منى، التسجسل عطّل وشلّ أفكاري لمدة
من الزمن، وحرت في الرد على كلَّ المداخلات،
وما أفقت إلا بعد حين. النعام آدم ومحمد
كرم الله قمة تدمي دون بلوغها الحناجر، والغربة
أصلو طِعيما مُر لكني قاعد بالجبُر.
ويا منى أنا مجدوع في خلاء البراري العظمى
وقليبي رهيف ما بيقدر على الهبباي في عِز
الصيف، دحين بالراحه عليَّ.
يا رمال حلتنا زولاً كلن بأنسك يا حليلو...
بنات أخوي التومات كانن يغننها لأُختي الكبيرة،
وكانت تتذكرني وتبكي.
بعد غياب دام حداشر سنة، وأنا أحزم في أمتعتي
للذهاب للوطن كتبت:
يا رمال حلتنا زولك ليك عاد هيا أبسميلو
جاي يتتبع دِريبو الفوق بياضك كان دليلو
صوت قماري الشوق يحادي لشدرنا ولضليلو
لبحرنا ولتمرنا لعنقريبو ومقيلو
فوقو ينجمّه ويزحو كلما الرقراق يجيلو
.
.
.
الخ...
| |
|
|
|
|
|
|
|
|
|
Re: جبنة بت أحمد وحبوبتي فاطنة بت ميدوب... إلى سلمى الشيخ و منى خوجلي بمناسبة العيد... (Re: معاوية المدير)
|
هدية ليك يا ود عمي جبريل..
البنية سوقوها اتشوف البركل!
هكذا أمرتهم حبوبة بعد أن رأت تلكع بعضهم في اصطحابي لجبل البركل ..
كانت تلك أول زيارة لي لبلدنا الزومة..وكل معرفة سابقه كنت قد كونتها من حديث أمي وحبوتي عائشة بت
عبد الحفيظ...وبنات اخواتها وونسة كانت بينهم خزنتها في {اسي وقلبي حتي دون أن أعي!
الا أن الحديث وحده لا يمكن ان يأتي بالصورة الحقيقية..
حبوبة ام محمد الحسن كانت ومازالت الصورة العظيمة للحبوبة..
ترملت منذ فترة ولم اقابل زوجها من قبل.. قيل انه كان في غاية الطيبة..
اؤمن أن الحبوبة والأرض والنيل هم أصل استمرار الحياة فينا...الارض والنيل كالرحم يهبانا الحياة والتاريخ..
والحبوبة رحمأنجبنا وربط بيننا فاستمرت الحباة..
................
.................
اختكم ماسكنها عشان ماتقع من الجبل!
بيتكم بي وين للجبل يا طارق؟؟
ياربي شايفه؟؟
..........
..........
......
| |
|
|
|
|
|
|
|
|
|
Re: جبنة بت أحمد وحبوبتي فاطنة بت ميدوب... إلى سلمى الشيخ و منى خوجلي بمناسبة العيد... (Re: Muna Khugali)
|
Quote: إخيتي منى...
الرجل حبوب،
والمراة حبوبة...
والكلمة تعني، الكريم، الشهم الذي يباشر
الناس ويهش عند لقآءهم كما نعلم جميعاً.
والحبوب إسم يطلق على الرجل تيمناً ولا
يطلق على المراة إلا كِناية إذا كانت تحمل
إسم حبوبتها كما يطلق على الصغير إسم جدو
إذا كان يحمل إسم جده، وتوصف المراة بانها
حبوبة إذا كانت تحمل الصفات أعلاه...
تجديني أشاركك السؤال في من أطلق أو أطلقت
إسم حبوبة على الجدة؟، لكن الإسم له مدلولات
في دواخل الحبوبة، وفي مظهرها الخارجي
سنظل نتحدث عنها دوماً...
والله يا منى، التسجسل عطّل وشلّ أفكاري لمدة
من الزمن، وحرت في الرد على كلَّ المداخلات،
وما أفقت إلا بعد حين. النعام آدم ومحمد
كرم الله قمة تدمي دون بلوغها الحناجر، والغربة
أصلو طِعيما مُر لكني قاعد بالجبُر.
ويا منى أنا مجدوع في خلاء البراري العظمى
وقليبي رهيف ما بيقدر على الهبباي في عِز
الصيف، دحين بالراحه عليَّ.
يا رمال حلتنا زولاً كلن بأنسك يا حليلو...
بنات أخوي التومات كانن يغننها لأُختي الكبيرة،
وكانت تتذكرني وتبكي.
بعد غياب دام حداشر سنة، وأنا أحزم في أمتعتي
للذهاب للوطن كتبت:
يا رمال حلتنا زولك ليك عاد هيا أبسميلو
جاي يتتبع دِريبو الفوق بياضك كان دليلو
صوت قماري الشوق يحادي لشدرنا ولضليلو
لبحرنا ولتمرنا لعنقريبو ومقيلو
فوقو ينجمّه ويزحو كلما الرقراق يجيلو |
ربنا يجمعك بيهم في فرح دايم معاوية اخوي..
عارفاها كيفينها حارة الغربة!
.............
...............
لحبوبة ام الحسن جسد فارع في طوله وقوته دون سمنة او نحافه..
تسير بخطوات معتدلة في الحوش او في الطريق الي دكانها او راكوبتها في الشارع عند الصباح الباكر..
تتوضأ دون أنة ألم في أي من مفاصلها ولا تنام الا بعد أن ينام الجميع..
أهديتها ثوبا بسيطا فاحتفظت به لمناسبة عزيزة حتي تعلمني وتعلم الجميع بمدي اعزازها لي وهي المحتفظة بمجموعة ثياب جميلة
اهداها اياها ابناء بناتها المغتربين..
هذه الحساسية في التعامل وفي الشكر..تشبه ذلك الجيل من الحبوبات..تأتي تصرفاتهن بمحبة تلقائية تجعل من كل شيء حولهن
بسيط ومريح..
...............
................
لحبوبة ماشاء الله أسرة كبيرة ممتده..
أحفادها كما بناتها وابناءها..يقومون بواجباتهم المنزلية دون حاجة منها لاعادة الامر بصراخ او لوم..
ولا يتجرأ اي منهمعن التأخر في القيام بها..
.......................
.......................
الذهاب للزراعة مع حبوبة أمر ممتع..
الزراعة في حد ذاتها كلها من روح ورائحة الأجداد..
تقول حبوبة..
بي هنوك زراعة جدك الحسين..
وبي هني دي زراعتنا..
والبوكان البي هنوك داك كله كان زراعة..عللي النيل غرقه!
تشرح وهي تتفحص زراعتها بعين الأم التي تتمتم اطمئنانها علي ابنائها..
ثم فجأة تستدير لفتحية ابنتها الكبري وتسألها عن حال زراعة قريب لهن سافر بعيدا..
البيت ده عاجبني بس ماعارفاه بيت منو في الزومة!
| |
|
|
|
|
|
|
|
|
|
Re: جبنة بت أحمد وحبوبتي فاطنة بت ميدوب... إلى سلمى الشيخ و منى خوجلي بمناسبة العيد... (Re: فتح الرحمن عثمان)
|
اللعبة ( الحفل ) وما يزال بعض حبوباتنا وجدودنا يطلقون ذلك الاسم علي بيوت الاعراس ، وما يزال البعض ينادي وزير الرياضة بوزير ( بتاع لعب )
بت الشيخ، حبابك والعيد يتبارك عليك...
نسوان الحِلة فشلن في ظبط عجين حبوبة البِخيتة
بتاع العيد قالت لهن: لكيتنو؟ لُكنو أدو اللكة.
فصارت عبارتها مثل يضرب حتى يومنا هذا.
حبوباتنا قندة وبت مختار وخديجة وبت الخليفة،
كان ليهن حضور جميل في المناسبات، وكان عندهن
بنابر في بُكان اللعب في الصف الأوّل، ولمان يقومن
يدخلن على الدارة ويبدن يبشرن وحاتك لايفضل صغير
لا كبير قاعد يضج المكان بالفرحة والبهجة حتى
الثمالة. كانن حبوبات بنكهة الفرح الجميل...
حبوبة قندة كانت عندما تسمع إسماعين حسب الدايم
يغني تبكي، وتقول: الوِليد ده كدي قاعد يحنني...
ما زالت بت الخليفة على قيد الحياة حريصة كل الحرص
على حضور جميع المناسبات محاطة دوماً بالكبار والصغار
وأحفادالأحفاد الكل على أهبة الإستعداد لتلبية رغباتها،
أخالها تعيش في نعمة لو علمت بها الملوك لجالدتها عليها
بالسيوف. نسأل الله لها الصحة والعافية، وأن، يرحم أمواتنا
وأموات المسلمين...
| |
|
|
|
|
|
|
|
|
|
Re: جبنة بت أحمد وحبوبتي فاطنة بت ميدوب... إلى سلمى الشيخ و منى خوجلي بمناسبة العيد... (Re: معاوية المدير)
|
ود جبرين المطموس، كيفنك؟
| Quote: وانا قمت قلتلا: انت في نحن وين ولا نحن ذاتنا منن (من نحن) |
ما تترجم عشان ما تفسد المعنى...
عارفك ريحتهن السمحة بتجيبك بجاي،
كدي شوف أبو ريم كتب عن حبوباتنا
شنو:
عمتنا السيدة الله يرحمها عملت صندوق (جمعية على قول بعض الناس) وكانت معاهم الله يرحمها عجب اليريد (عجوبة) فقامت عجوبة حجزت الختة الاولى وعمتنا الله يرحمها لمت القريشات وجات عجوبة شالتها.الشهر البعدو لمت القروش وماباقي الا عجوبة وساعة الحكاية طولت وكل يوم عمتنا ماشه وجايه من عجوبة قامت عجوبة قالت ليها شوفي يابت زين العابدين ماتزازيني تطبطبي في سفنجتك دي كل يوم قدامي سندوكك دا انا من الشهر الفات مرقت منو...... فما من عمتنا الا ان ماتت من الضحك وواصلت مع باقي المجموعة......
نقلاً عن منتدى الباوقة...
| |
|
|
|
|
|
|
|
|
|
Re: جبنة بت أحمد وحبوبتي فاطنة بت ميدوب... إلى سلمى الشيخ و منى خوجلي بمناسبة العيد... (Re: معاوية المدير)
|
Quote: معاوية المدير
سلمى الشيخ
منى خوجلي
طارق جبريل..
كل عام وأنتم بألف خير..
حقيقي أمتعتونا وعدتم بنا إلى الزمن السمح والحاجات السمحة والكلمات الأسمح.. وأهجتم أشجاننا فقد تذكرت حبوبتي (رحمها الله).. وودت ذكر بعض كلماتها مشاركة لكم لكنها كانت بالرطانة التي يستحيل تسطيرها هنا..
ونستكم هذه هي متعة حقيقية لنا.. متعكم الله بالصحة والعافية طول العمر.. |
فتح الرحمن، أخوي...
العيد يتبارك عليك...
ليس بالضرورة وجود اللغة للتعبير
فإحساسك أبلغ من أن تطيله اللغات
ووحاتك وصل حتى كأننا قالدناك إنت
وحبوبتنا وسلمنا فوق راسها...
مشكور على المرور...
| |
|
|
|
|
|
|
| |
معاوية المدير
Muna Khugali
سلمى الشيخ سلامة
طارق جبريل
فتح الرحمن عثمان
فادية اليمني
فيس بوك
تويتر
انستقرام
يوتيوب
بنتيريست