|
|
 إهدار أم (قصه واقعيه)
|
المكان/ ردهة انتظار المرافقين بحوادث قسم النساء والولاده بمستشفى الخرطوم
الزمان/ الاول من سبتمبر2009 العاشره مساء
زخات المطر ودوى الرعد المتواصل يدوزن فى زنكية الردهه لحن اشتر يضيف لقسمات المنتظرين
كآبه تعتلى الوجوه التى اعيآها طول الانتظار...ورغم الرطوبه والجو الخانق المعبق برائحة
الدورات الطافحه الا ان الكل كان يرقص بطريقته الخاصه مترقبا لحظة ميلاد ...كنت اشغل نفسى
بمتابعة انعكاسات البرق على زجاج برج مستوصف فضيل والمبانى المجاوره لعلنى اظفر بصبر يعيننى
على صرع الانتظار ولكن هيهات....فجأة حط الصير رحاله إمرأه فى منتصف العقد السادس لكنتها
المكسوره توحى بأنها من قبائل الشمال العريقه..وتقاطيع وجهها تشعرك بشى من الطيبه والالفه
خرجت من عنبر الولاده وهى تتزمر وتلعن ابواهل الحرس ...حسبتها فى اول الامر انها احدى المرافقات
فلقد كانت تتأبط تحت يدها اليسرى بقجة ملابس وبيدها الاخرى ورقة بيضاء تشبه روشتات الاطباء...
اتجهت نحو كومتنا فلقد كنا متراصين متلاصقين فى شبه قوسين نتحاشى زرات المطر..خطواتها المتردده
الغير عابئه بالمطر جعلتنى افسح لها مكاناوادعوها لمشاطرتنا الانتظار..
|
|
 
|
|
|
|
|
|
|
|
Re: إهدار أم (قصه واقعيه) (Re: tarig alnour)
|
لم تكترث لدعوتى ...ولكن دار بيننا هذا الحوار
ياولادى... مافى زولا فيكم يودنى عنبر النص
كدى ياحاجه خشى من المطره
انتو مافيكم مرءوه ياولادى
ياحاجه انتى عايزه تصرفى دواء من صيدلية النص انا بمشى بجيبو ليك واجى
( تصمت )
كدى ياحاجه خشى من المطره واتكلمى
( لم تبارح مكانهاوتتابع حديثها)
انا الع..ده طردنى من جوه
انتى عيانه ولا مرافقه...كدى خشى لجوه من المطره
( نفج لها وسطنا فتدخل تسبقهاريحه تجيب الصقر من السماء)
انتى ياحاجه ما معاك زول (نظام مخارجه وكده)
انا ولدى الله لاكسبو دنيا ولا اخره
(دعوتها تلفت انتباه الكل فيضج المكان)
ياحاجه لحظة نزول المطر دى ربنا بستجيب فيها الدعاء
الله لاكسبو ولا ريحو محل ما يقبل
| |
|
|
|
|
|
|
|
|
|
Re: إهدار أم (قصه واقعيه) (Re: tarig alnour)
|
الله لا قدمو الضيع تربيتى ساى
كدى ياحاجه استهدى بالله ..ولدك مالو بتدعيهو كده؟؟
الولد لمن ما يكون فيهو خير لامو يسوبو شنو؟؟
صدقتى ياحاجه..لكن برضو ده جناك
الجنيه التجننو
ياحاجه استهدى بالله ..الحاصل شنو اصلو؟؟
( تصمت )
( الشمار وحب الاستطلاع يتحكحك فى الدواخل ويفلت )
انتى من وين ياحاجه؟؟وولدك ده عمل شنو اصلا؟؟؟
نحنا من الد..
وساكنه وين فى الخرطوم
انا من الد..والجابنى البلد دى العلاج ..والبلد دى ماعندى فيها زول الاخايب الرجا ده
ماعندك اولاد غيرو
فى
طيب ماجو معاك المستشفى لى ؟؟؟
عندى بتين واحده مع راجله واولادا فى الغ...والتانيه صغيره فى المدرسه
وابو عيالك وين ياحاجه؟؟
اتوفى من زمن
رحمة الله عليهو
( ترسل عينيها دمعتين تفطر بهما قلبى )
| |
|
|
|
|
|
|
|
|
|
Re: إهدار أم (قصه واقعيه) (Re: tarig alnour)
|
يقف المطر الا من عينيها..وتواصل الحديث بعد ان تضجع على الكنبه المقابله
انا ياوليدى من الد..وابو عيالى مات من بدرى خلاهم لى صغار..الا ماقصرته فى تربيتهم
وتعليمهم تب ..ووالله لبن الطير لو داروهو بجيبو ليهم..فى مره ياوليدى ولدى ده قبضوهو
مع اولاد الجيران سارقينلهم فواكهه من جنينة ...مسكتو والله جلدتو وربطتو وتشتشتلو يديهو
لمن بال عشان لمن يكبر مايجيبوه لى حرامى وعشان ما يعاين لحق الناس ولازم عينو تبقى ملانى بحقو
الا يا وليدى تعبى راح شمار..والله نحنا فى البلد باراضينا وبلحنا وسواقينا واهلنا نحمد الله ونشكرو
خيرو علينا دافر...الا الدنيا قداره تديك بجاى وتشيل بجاى..الا شيل الصحه ده قاسى وصعيب...وانا
قبل كم شهر حسيت بوجع فى كلوى ديل ماخلتلهم شى ما جربتو الا ابن يطيبن..اها قالولى ادلى الخرطوم
امشى لوليدك يعالجك عند الحكماء...والله قدر ماابيت الا اصرو على قمته لميت بلحى وحشيت زرعى وبعتو
وجيت الخرطوم ببص ناس الامين لاشالو منى قرش لاتعريفه..وطوالى مشيت شرق النيل العس...لولدى شان
يودنى الحكيم
| |
|
|
|
|
|
|
|
|
|
Re: إهدار أم (قصه واقعيه) (Re: tarig alnour)
|
اها مشيت لولدى وكل يوم اقولو نمشى الحكيم يقولى نمشى بكره..لمن حسيتبو ماعايز يودنى
لمن يوم قال لى لمن شددت عليهو السؤال انتى ماعيانه...والله كلامو ده دخل على وقطع حشاى بالزعل
التقول دخل جواى وشافنى ماعيانه..الا هو عايز يخرفنى قبل يومى..خليتو لرب العالمين العالم بكل
شى...اها فى يوم براحه اسحبته واسرقته لمن طلعته من البيت وركبتلى عربيه ودتنى السوق ومن السوق
سألته وسألته لمن وصلته مستشفى بقولولو ابراهيم مالك.. وقابلته الحكيم سعلنى وكشف على بجاى وبجاى وقالى انتى عيانه شديد ولازم ترقدى فى المستشفى عشان نسويلك عمليه..والله حكيم ود حلال وراضي
عليهو امو...والله مافى زول بشتهى المرض الا كلام الحكيم ده فرحنى فرح شان طلعنى صادقه.. مخير الله
يكذبك جناك ويصدقك غريب المهم الحكيم قال لى لكن مابنرقدك الايجى معاك زول من اهلك يملى لينا
الورق حق العمليى ويكمل اجراءات الرقاد..
( ونواصل )
| |
|
|
|
|
|
|
|
|
|
Re: إهدار أم (قصه واقعيه) (Re: tarig alnour)
|
اها ياوليدى قمته اديت الحكيم نمرة التلفون الت ولدى شان يضربلو ويوريهو بعياى الماكذب
ولاخرف...وشان يجى يقيف معاى ومع امو الكبرتو وعلمتو وعرستلو...انا من شفته وش الحكيم اتبدل
قلبى انقبض... وزى الجابولى خبر...ياريت لو جابولى خبر ....الا قلته ده من التعب والجوع...
لامن الحكيم قالى الزول ده قال مابعرفك...وقال المره دى مصلبته فيهو ساهى ..
(تصمت ثوانى خلتها ساعات ثم تنحدر دمعتان لم امتلك معهما الجرأه لتطييب خاطرها)
همهمت...امكن ياحاجه النمره غلط
مو غلط ( لفظتها والعبره تسد حلقها) ضربتلو فيها كتير قبل العيا والمرض
طيب عملتى شنو بعد داك يا حاجه؟
الحكيم قالى امشيلو وجيبيهو معاك شان العمليه دى مابنسويها الا لمريض يكون معاهو زول من لحمو
ودمو...عشان يطايبو ويرافقو ايام المرض
اها ما مشيتى ليهو ياحاجه
امشيلو؟؟ امشيلو كيف وزول لفظنى زى العضمه؟انا والله نفسى عزيزه..وانشاءالله اموت ولا ازله لزول
وانا جنى وجن الصرصره والكلام المقتقت ..المره خاشه تصرصر.. والراجل مارق يصرصر
(ونواصل)
| |
|
|
|
|
|
|
|
|
|
Re: إهدار أم (قصه واقعيه) (Re: tarig alnour)
|
الا ياوليدى...ولدى ده كان كويس وعشا ضيفان قبل مايعرس...الا بعد العرس اتبدل واتغير
تكون العربيه دى كتبتو...اصلو الناس ديل بكتبو الرجال ...والراجل كان انكتب ببقى زى
الخاتم فى صباع المره...والله تانى الا الكريم..
( قاطعتها وكأنى اضع يدى على الجرح ) هو قاعد مع نسابتو؟
لا لا ..والله بى بيتو ...بانيلو بيت جنب نسابتو مو بعيد منهم
وشغال وين ولدك ده ؟؟
شغال فى الحيكومه فى جبره
وانتى يا حاجه ماعندك اخوان ولا اولاد اخوان واخوات
فى ...الا فى البلد
والخرطوم دى ما عندك فيها زول؟؟
فى الا ما خابره بيوتهم..
طيب يا حاجه انتى ولدك ده ما تشكيهو لخيلانو
والله المعايش جباره وكل زول ساكى رزقو...ومافى زول فاضى لزول لمن يسيب معايشو ويجى الخرطوم
كويس ياحاجه هسه انتى فى المستشفى دى قابلتى دكتور
اقولك انا بى ورقى وما فاضل شى الا العمليه
طيب راقده فى ياتو عنبر؟
مرات برقد هنا..ومرات بمشى عنبر النص...هسه يا وليدى ودنى عنبر النص
(ونواصل)
| |
|
|
|
|
|
|
|
|
|
Re: إهدار أم (قصه واقعيه) (Re: سامى عتبانى)
|
Quote:
رمضان كريم
وكل سنه وانت طيب
|
سلام يا سامى...وكل سنه وانت طيب
وربنا يتقبل صيامكم وقيامكم
Quote:
سبحان الله يا طارق فى ناس متل الولد ده |
مثلك يا سامى كنت مغمض العينين ولا أرى الا كل جميل
خليك متابع وسترى الكثير...
| |
|
|
|
|
|
|
|
|
|
Re: إهدار أم (قصه واقعيه) (Re: tarig alnour)
|
( لم تنتظر استجابتى لطلبها..وبدأت تلملم اشياءها استعدادا للمسير )
خلاص يا حاجه دقائق اطمئن على اولادى واوديك
( لم تقل شى ..ولكنها حدرتنى بنظرة استجداء بأن لا أتأخر )..فأنطلقت مسرعا نحو باب العنبر لعلنى
اجد احدى الممرضات تطمئنى على صحة زوجتى...لم اغيب سواء دقائق فلقد كان الدخول ممنوع للرجال...
فأكتفيت باجراء اتصال تلفونى سريع وعدت .. وجدتها قد سبقتنى ببضع خطوات من المسير ..تتخبط بين برك الوحل واكوام الحجاره المكومه من انقاض مبنى قديم هو الفاصل بين حوادث النساء والولاده وعنبر النص...
مالك يا حاجه استعجلتى ..هسه لو وقعتى؟؟؟
انشاء الله اقع اتكسر ولا اموت
لى يا حاجه انشاءالله بعد الشر عليك ..كدى يا حاجه جيبى يدك انططك المجرى ده
( لم يكن المجرى متسعا ولكنه عميق...فتضع بدها بيدى متهجسه فأشعر بتجاعيدها ونبض عروقها وكأن الموت عشعش فيهما منذ زمن طويل..ومن ترددها فى تجاوز المجرى بدأ لى ضعف نظرها..ووهن عظمها الذى
لاتقوى معهما على المسير)
خلاص ياحاجه قربنا نصل
الله يديك العافيه
آمين..ويديك ليها كمان
(ونواصل)
| |
|
|
|
|
|
|
|
|
|
Re: إهدار أم (قصه واقعيه) (Re: أمين فاروق)
|
أمين فاروق
كل عام وانتم بخير ..وربنا يحقق الامانى ...
هو اللهث خلف الفانيه لم يترك لنا ثوانى نستظل فيها معكم...فعزرا على تأخير الرد على مداخلتكم
ونسعد كثيرا على متابعتكم اللصيقه...
ونواصل
| |
|
|
|
|
|
|
|
|
|
Re: إهدار أم (قصه واقعيه) (Re: tarig alnour)
|
خلاص ياحاجه وصلنا عنبر النص
ايوه ..شكرا ياوليدى والله يديك الفى مرادك
آمين ياحاجه ..ولا شكر على واجب
اخش معاك ياحاجه ؟
لا لا ..لحدى هنا انت ما قصرته
طيب يا حاجه قبل ما تخشى مانمشى نأكل لينا حاجه
شكرا يا وليدى انا اكلتلى فولات قبل شويه
طيب هاك يا حاجه القروش ديل امكن تحتاجى ليهم
قلتلك كتر خيرك شكرا ( بحزم)
( الح ولكنها تصر )
خلاص ياحاجه الله معاك
مع السلامه
عدت ادراجى مثقل الخطوات ..مفطور القلب ..شارد الزهن مذهول من هول ماسمعت ...اكيد فى غلط
معقول الدنيا دى من ادم ولحدى المسيح فيها ولد زى ده ...لا لا اكيد الحاجه دى زادت المحلبيه
شويه .. الحاجه دى بتكون شطحت ونطحت وانا المسكين صدقته هاهاها..طيب هى الجابرها تكذب شنو
بعدين الحاجه دى ابت تشيل القروش لو كان شالت القروش كنت اقول شحاته..والله لكن دنيا فرندكس
( نطقتها بصوت عالى ) وتابعت المسير
| |
|
|
|
|
|
|
| |
سامى عتبانى
أمين فاروق
فيس بوك
تويتر
انستقرام
يوتيوب
بنتيريست