|
|
 سيناريوهات : شمهريره للبنى التحتية
|
صحيفة الرأى العام
عدد الجمعة 11 سبتمبر 2009م
موقع الكاتب www.alfatihgabra.net
البداية :
فى إجتماع دعا له مسئول البنى التحتية عقب الأمطار التى شهدتها عاصمة البلاد مؤخراً إحتشد كافة المسئولون عن قطاع الهندسة والإنشاءآت والطرق والجسور والكبارى إبتدر المسئول الإجتماع قائلاً :
- يا جماعة حقو الدولة تعترف بأنو أخفقت إخفاق شديد فى تعاملها مع الخريف ده ، يعنى الشوارع الإتعملت دى (إتماصت) فى خمسة دقائق ، والمصارف كووولها مقفولة زول نضفا مافى والمهندسين الجابوهم يرصفو الطرق ديل معظمهم فاقد تربوى سااكت شفتو ليكم مهندسين يعملو ليهم نفق يتحول لى حوض سباحه ؟ شفتو الحرفنة دى !! المدارس وقعت والبيوت إنهارت والناس رقدت فى السهلة ! الوضع يا جماعة وضع مأساوى وخطير للغاية والمشكلة إنو مافيش بنى آدم ممكن يقدر يصلح الشئ الخاصل ده ...
- شنو يعنى يا ريس نفهم من كلامك ده إنو مافى طريقه نصلح بيها الحاجه دى عشان نكون ذى باقى خلق الله الفى العالم دى؟
- والله يا جماعة مافى غير طريقة وااحده نصلح بيها البنى التحتية دى
- شنو؟ نستلف من البنك الدولى؟
- بنك شنو؟ الإستلاف والديون دى فترنا منها هو أنحنا العلينا قادرين ندفعو؟ الكبارى دى ما كسرت نصنا كووولها بالدين
- أها طيب نعمل شنو؟
- نستعين بى قوى خارجية
- الأمريكان؟ دى لكن ما بتكون مكشوفه
- لا نحنا ح نستعين بى قوى أكبر من الأمريكان ... نحنا ح نستعين بالجن المسلم !!
- الجن الياتو؟
- الجن المسلم ...
- وده ح نلاقيهو وين؟
- عادى نعمل ليهو إعلان فى الجرائد إنتو قايلين الجن ديل ما مثقفين ولا ما بقرو جرائد .. ديل العالم بتاعهم ذى العالم بتاعنا ده ... وحتى أقول ليكم حاجه : فى واحد شيخ صاحبى قال ليا برضو عندهم وزارة بتاعت بنى تحتية !!
- والخريف لمن يجى قاعدين يتجهجهو زينا كده يعنى!
- يتجهجهو شنو؟ ديل عشان قدراتهم العجيبة دى مظبطين حالهم وما زينا كده !
- وطيب هسه نجيب لينا جان بتاع بنى تحتية من وين؟
- (أحدهم) : حقو نشوف لينا شيخ من بتاعين عيادات التداوى الملت البلد دى نكلمو كلما يطلع ليهو جن من زول يحبسو لينا عشان نتفاهم معاهو !
- لا لا ... ديل كضابين ساااكت هو ربنا جل وعلا قال فى محكم تنزيله (إِنَّهُ يَرَاكُمْ هُوَ وَقَبِيلُهُ مِنْ حَيْثُ لا تَرَوْنَهُمْ) يجو يقولو ليك الجن ح يطلع بى صباع أيدو الشمال وبى ضفر ايدو اليمين !
- (أحدهم) : أنا عندى واحد صاحبى شيخ ممكن أكلمو ليكم يحضر ليكم واحد جان تماام !
- لا لا الكلام ده ما ينفع وتانى (قصة عندى واحد دى ) والشغل البى اللفة ده خلاص حقو ننتهى منها والمنافسة تكون حرة ! وما فيها أى (مجاملات) عشان المجاملات بتاعت العطاءآت دى هى الودتنا فى داهية !
- يعنى ح نعمل شنو فى الحالة دى؟
- ح نعمل عطاء واضح لتتشييد البنى التحتية .. بس خاص لشركات الجن !
- (أحدهم) : وشركاتنا يا ريس ما تشتغل يعنى
- هو بلا شركاتكم دى الوداى البنى التحتيه فى داهية منو!
- وطيب الإعلانات دى ح تنزل وين؟
- فى جرايدنا دى ذاااتا إنتو قايلين الجن ديل ما بيقرو !
ونزل الإعلان :
ترغب (وزارة البنى التحتية) في تقديم عطاءات من مقاولين أكفاء(من الجان المسلم) من ذوي الخبرة والمقدرة لتشييد كافة مشروعات (البنى التحتية) بالعاصمة المثلثة .
1- يمكن الإطلاع علي مستندات العطاء داخل الدرج (اليمين) لمكتب وكيل الوزارة
2- سيطلب من (الجان) صاحب العطاء الفائز التوقيع علي عقد التشييد وذلك خلال اسبوعين بعد ان يتم اخطاره بقبول عطائه .
3- يتم تسليم مبلغ العطاء المتفق عليه عند نهاية تنفيذ المشروع وتسليم كافة الاعمال الإنشائية والتأكد من صلاحيتها
4- يجب علي مقدمي العطاءات ارفاق السيرة الذاتية للمؤسسة تحتوي علي: شهادة السجل (الجنى) التجاري وشهادة التاسيس كما يجب إرفاق الاسماء والمؤهلات وخبرة المهندسين والفنيين (الجان)الذين ستقع عليهم مسئولية تنفيذ الاعمال
6- لا يشترط بان يكون العطاء مستوفيا الدمغة القانونية وترسل العطاءآت داخل مظاريف مختومة بالشمع الاحمر مكتوب عليها – عطاء تشييد مشروعات البنى التحتية للعاصمة المثلثة (بواسطة الجن المسلم) علي ان يكون من ثلاث نسخ مصورة بالاضافة الي النسخة الاصلية
7- توضع العطاءآت داخل الدرج (اليمين) لمكتب (السيد الوكيل) فى موعد أقصاه ثلاثة أيام
8- وزارة البنى التحتية غير مقيدة بقبول اقل عطاء او أي عطاء اخر من أى (جان)
صدى الإعلان :
ما أن ظهر الإعلان فى اليوم التالى بكافة الصحف اليومية حتى إنقسم المواطنون بين مصدق ومكذب وقد تباينت ردود الفعل والتعليقات :
- والله الجن ذاااتو بعد ده ما يعمل حاجه !
- أنا خائف بعد شوية يمسكوهم أى حاجه وشوية الوظائف دى تروح على الناس والعطالة تبقى 100% بدل 90%
- والله أنا خائف العنوسة ذااتا تبقى 100% يقوموا يلمو ليكا فى الجنيات (المسلمات) ديل مثنى وثلاث ورباع وبناتنا ديل يروحو الخور
- وهسه الجن ده ح يدوهو قروش وإلا ملح ساااكت ؟
- كمان حقو يشوفو لينا باقى الحاجات ذى المستشفيات الوسخانه دى والدواء المافى ده !
- (الجن) ده ما بقدر يتم لينا المدينة الرياضية الخلاها رامبو (أطلال) وفات دى ؟
- القفة ... القفة ... القفة يا جماعة .. والله بقينا ما قادرين عليها كيلو الطماطم حصل 12 ألف !!
خلو (الجن) ده (يلز) لينا النفرة الزراعية القالوها دى
- والله لو بس فريقنا ده (لقا) ليهو راس حربه (جنى) لهلوبه كده كان سكتنا ليك (الرشاشات) ديل جنس سكات !
- بس اليجيبو لينا (جنى) بدل (مكاوى ده) عشان الكهرباء دى تستعدل !
- (الجن المسلم) ده (الكلى) بتاعتو ما قاعدة تبوظ؟ خليهم يجيبو لينا (مكنات غسيل) عشان نرتاح من قصة الحكومة مرة تدعم ومرة تشيل الدعم دى !
- ناس الكلى برهم؟ ناس (القلب) ما برضو عاوزين ليهم (مستشفيات) وعمليات بالشئ الفلانى والحكومة رافعة أيدا .. والله غير الجن المسلم ده زوووول يساعدهم مافى !!
- هسه مش ح يجيبوهم للبنى التحتية شوفو لو ما بعد شويه حولوهم (للإنتخابات)
فى مملكة الجن :
بينما كان الجان شمهريرة يجلس مع بعض اصدقائه فى صالون منزله الكائن بإحدى الكوش يتحدثون عن ما آل إليه الحال من من بطالة وعدم وجود شغل
- والله خلاس زهجنا من العطالة وقلة الشغلة دى ؟ زمانك بالله الشغل راقد و الواحد من الصباح يوسوس ليهو لى نفر نفرين ، يحرش ده عشان يختلس ويوسوس لى داك عشان يقبل ليهو رشوة ويكلم داك يغش فى مواصفات هسه بالله بقوا يقومو بالحاجه دى أحسن مننا !!
- إنتو ما قريتو (جرائد الإنس) بتاعت أمبارح؟
- فى شنو؟
- فى جماعة كده قالو عاوزين ليهم (جان) يمسك ليهم مشاريع البنى التحتية
- الجريده عندك ؟
- والله كنت لافى فيها (طعمية) كدى النشوفا ليك !
- (بعد قراءة الإعلان) : لا خلاس كان كده فرجت ... نآخد العطاء ده وننفذو ونطلع لينا بى قرشين حلوين
- لكن يا شمهريرة إنتا الهندسة والإنشاءآت دى قريتا وين؟
- والناس العملو ليهم (نفق عفراء) ديل قروها وين !
- ياخى إنت (جن مسلم) حرام عليك تغش الناس ديل
- والعملو ليهم النفق ديل ما كانو مسلمين؟ خلونا يا جماعه نشتغل شغلنا (يلتفت نحو إبنه) يا ود يا زمهريره أقرأ بنود العطاء ده كويس وشوف وزارة البنى التحتية بتاعت الجماعة ديل وين وأمشى خت ليهم العطاء بتاعنا فى درج المسئول الشمال فى مكتبو ذى ما طلبو
لم تكن شركة شمهريرة للهندسة والإنشاءآت والبنى التحتية (كما أطلق عليها) هى الشركة الوحيده التى تقدمت بعطائها بل شاركتها فى ذلك عدة شركات أخرى كشركة (الريح الأحمر للإنشاءآت) ومجموعة شركات (الجن الأزرق المتوسط) لأعمال البنى التحتيه و
فتح المظاريف :
بعد ثلاثة أيام أجتمعت اللجنة التى تم تكوينها خصيصا لفتح مظاريف عطاء مشروع البنى التحتية المخصص لشركات (الجن المسلم) ، على طاولة مستديرة جلس اعضاء اللجنة حيث طلب رئيسها من (المقرر) أن يقوم بفتح درج مكتبة اليمين لإحضار مظاريف العطاءآت والذى لدهشته وعند فتح الدرج الذى كان مغلقاً قد فوجئ بعدد من المظاريف تفوح منها رائحة غريبة جعلت (شعرت جلدو تكلب) !
- بسم الله الرحمن الرحيم نفتح يا جماعة المظروف الأول
-(المقرر يقرأ فى تلعثم) : ده من شركة إسمها (شمهريرة للهندسة والإنشاءآات والبنى التحتية)
-الشركة دى مستوفية كل الشروط؟
-أيواا جايبين لسته بالأعمال القاموا بيها قبل كده وكمان السيرة الذاتية بتاعت كل المهندسين والعمال وموافقين على كل الشروط !
- العطاء بتاعهم بى كم ؟
- .......................
قامت اللجنة اللجنة بفتح جميع جميع المظاريف وبعد نقاش مستفيض أجمعت اللجنه على أن العطاء المفدم من شركة (شمهريرة للهندسة والإنشاءآات والبنى التحتية) هو العطاء الأقل قيمة وهو أيضاً العطاء الذى إلتزم بجميع البنود الواردة والتى كان أهمها نماذج المشروعات المشابهه والسيرة الذاتية للمهندسين والعاملين بالشركة والذين سوف يقومون بتنفيذ المشروع !
-أها هسه الجماعة ديل يتصلو بيهم كيف ؟ ما خاتين ليهم رقم تلفون وإلا موبايل !
-(المقرر) : تلفون شنو يا سعادتك .. الناس ديل قالو لو عاوزين يتصلوا بيهم لازم يهيئوا ليهم الجو ويعملو ليهم عملية بتاعت (إستحضار) عشان هم جن مش بنى آدمين !
- كيف يعنى؟
- أهو أقرأ سعادتك (يمد ليهو الورقه) ..
- (يقرأ بصوت عال) :
- حتى نستطيع الحضور لمناقشتكم يجب عليكم إستحضارنا وذلك بعمل الآتى :
- قفل شبابيك وأبواب الغرفة التى توجدون بها وإطفاء الأنوار وأى مصادر مضيئة
- إطلاق بخور مكون من اللبان الضكر ولسان العصفور والسندروس والميعة السائلة
- قراءة الكلمات والأسماء التالية والإستمرار فى ترديدها حتى ننزل عليكم وهى : سمسمائيل ، طسميائيل ، شيغاب ٍشيعايوب ، هلهليوه ، شليطاه ، شيلطاه ، امرهوش، بطميش ، اهيالموش ، مهيالموش ، كرهتيه ، برهتيه أحضر يا شمهريرة يا مدير شركة البنى التحتية
- وهسه الحاجات القالا الزول أقصد (الجان) ده نجيبا من وين؟
- بسيطه سعادتك بس ندى السواق لسته بيهم ويمشى يجيبهم لينا من التيمان كلها نص ساعة !!
فى الوقت الذى ذهب فيه السائق لأحضار قائمة البخور من التيمان تم تصوير (الورقة) التى عليها الأسماء حتى يقوم الجميع بحفظها والتعود على نطق الأسماء التى كتبت عليها لا سيما وأنها صعبة النطق ، بعد قرابة الساعة من الزمن حضر السائق يحمل الأغراض التى وضعها على الطاولة :
- يا موسى أقفل معاك الشبابيك والابواب دى وجيب لينا شويت فحم و(نار) من حنان ست الشاى دى
قام السائق بقفل النوافذ والباب خلفه فى طريقه لإحضار النار من (حنان) بينما أخذ الجميع أماكنهم فى إنتظار قدوم شمهريرة ، إمتلأت القاعة بالبخور، بدأ الجميع فى قراءة الأسماء وفجأتن إرتفعت حرارة القاعة ودوى صوت إرتطام بالأرض وظهر شمهريرة :
- (فى خوف وهو يخاطبه) : يا شم شم شم هر هر ريرا ... والله نحنا بس الشديد القوى الخلانا نستعين بيكم !
-هل فاز عطاءنا بالمشروع ؟
- آآآى آآآ ى وعشان كده نحنا ناديناك هسه
-(أحدهم) : طيب يا شمهريره ممكن تقرأ لينا من الآية 6 للآية 11 من سورة الجن !
- (فى إستغراب) : إنتو حركاتكم دى ما بتخلوها ؟ إنتو جايبننا نعمل ليكم البنى التحتية ولا عاوزين تشغلونا أساتذة تربية إسلامية؟
- لا بس عاوزين نتأكد إنكم فعلن جان مسلم ! عشان الإستعانة بالجان الكافر حرام
- والإستعانة بالأنس الكافر حلال ؟
- خلاص خلاص يا شمهريرة ما تزعل نحنا خلاس مصدقين إنك مسلم يلا ورينا ح تعمل لينا شنو
- وإنتو شركاتكم الكتيرة ومسيخة دى ما قدرت على الشغل ده مالا؟
- لا ما أصلو الحكاية فى الحقيقة يعنى
- (مقاطعاً) : هسه أمانه فى ذمتكم ده شغل تستوردو ليهو (جن) من الخارج؟
- لكن القصة ما غلبتنا
- ما لازم تغلبكم إذا كل مسئول هو ونسيبو وإلا ود خالتو عملو ليهم شركة ورسوا عليها العطاءآت
- وإنتو الكلام ده عرفتوهو من وين؟
- نحنا كمان بيقولو لينا عرفتو من وين؟ هو المواطن العادى عندكم عارف الكلام ده لامن نحنا ؟ مال شوارعكم دى مطرة واااحدة بتموصا ليه؟ ما عشان شغل التلاته ورقات ده !
- هسه إنتو عايزننا نعمل ليكم شنو بالضبط؟
- أيوااا ده كلام جميل ...شوف يا شمهريرة ذى ما مكتوب فى الإعلان وفى كراسة العطاء نحنا عاوزنكم العاصمة دى كووولها تعملو ليها صرف صحى ؟ وتردمو لينا الحفر الموجوده دى كوووولها .. وشوارع الظلط الما نافعة دى تعيدو لينا عملا تااانى ..
- أول حاجه قبل ما نبدأ الشغل عندكم ناس هنا أخير منهم الجن ذاتو .. لازم تشيلوهم لينا عشان بيئة العمل تكون صحية؟
- ديل منو؟
- ديل الناس الما عاوزين يشتغلو ولا عاوزين يخلو الباقين يشتغلو؟
- وإنتو عارفنهم بالله
- كييييف ؟ (يخرج من جيبه قائمة) دى بتغلبنا أهى دى أسماهم
-(المسئول يقرأ القائمة تبدو عليه علامات الإندهاش ) :الله لا كسبك يا شمهريرة خاتينى أول واحد ؟! والله إنتو فعلن جن ! ؟
وتم التنفيذ :
لم تمض ساعات قليلة على توقيع العقد حتى قامت شركة شمهريرة للهندسة والإنشاءآت والبنى التحتية بإنجاز ما طلب منها فى سرعة ودقه ومهارة ، إمتدت شبكات تصريف مياه الأمطار فى جميع الأحياء ، كما تم إنشاء شبكة صرف صحى غطت كل الولاية حتى الأحياء الجديدة ، تم تجفيف جميع البرك والمستنقعات التى خلفتها الأمطار الأخيرة (بذل الجن مجهوداً مقدراً فى تجفيف بركة نفق عفراء) كما تم رصف جميع الشوارع الرئيسية والفرعية كما تم ترميم جميع المنازل والمدارس التي تأثرت بالأمطار .. وبعد جولة تفقدية ضمت مسئول البنى التحتية بالوزارة وأركان حربه إلى جانب رئيس مجلس إدارة شركة شمهريرة للهندسة والإنشاءآت والبنى التحتية وإبنه المدير العام (زمهريرة)
- ممكن لو عندكم أى بيوت إستشارية أو هندسية تراجع الشغل ده عشان لو فيهو حاجه يورونا !
- يا شمهريرة هو أنحنا لو عندنا حاجات ذى دى كان لجأنا ليكم
- يعنى خلاس كده مبسوطين من الشغل
- مبسوطين 100% إنتو عملتو فينا جميل ما ح ننساهو ليكم كلو كلو ... تانى نشوف المواطنين ديل فى الخريف ح يقولو شنو؟ (يدخل يده فى جيب البدلة السفارى) : وأهو ده الشيك بقيمة العطاء
- وده نصرفو وين؟
- فى البنك المركزى طبعن
فى طريقه للبنك المركزى كان شمهريرة وإبنه زمهريرة يشاهدون ويستمعون لتجمعات المواطنين الذين إستولت عليهم الدهشة وهم يرون عاصمتهم وقد تحولت إلى عاصمة (حضارية) تضارع عواصم العالم الأخرى من حيث النظافة والجمال ...
- شفت الشغل العملو أبوك؟ تقول ليا قريت هندسة وين؟
- والله يا أبوى أنا ما قايلك شيطان كده ! هسه البنى آدمين ديل إفتكرو عندك شركة وعملت مشاريع ذى دى قبل كده !
- الحياة يا إبنى بقت صعبة ولازم الجان يشيطن عشان يعيش
فى (هول) البنك الداخلى جلس شمهريرة وإبنه زمهريرة فى إنتظار (الصراف) بعد أن قاما بتسليم الموظف الذى على الكاونتر (الشيك) ثم ما لبث أن سمع شمهريرة إسمه يتردد مصحوباً برجاء التوجه للشباك رقم (5)
- أيوه أنا شمهريرة
- الشيك بتاعك ده تغطيه ليهو مافى !!
كسرة :
هنالك رواية تقول إنو شمهريرة طلع طوالى من البنك وراح جايط الشغلانية تاااانى ورجعا ذى ما كانت ثم إتجه إللى أقرب صينية وإعتلاها وأصبح يشير للناس والعربات قائلاً : تغطية مافى ... تغطية مافى ... الشئ الذى جعل إبنه زمهريرة يعود مسرعا إلى مملكة الجن طالباً النجدة و المساعدة !!!
|
|
 
|
|
|
|
|
|
|
|
Re: سيناريوهات : شمهريره للبنى التحتية (Re: الفاتح يوسف جبرا)
|
المبدع الاستاذ الفاتح جبرا
تحياتي ورمضان كريم
لك ننحنى وانت تواصل هذا العطاء الثر من قلب الحريق
وهو ديدن المبدع الحر الشجاع المعبر عن ضمير امته
في زمن الانكسار الذي مارسه كثيرون حسبوا على الابداع
وما هم بمبدعين لان اعلى مراحل الابداع عندما يتصالح المبدع
مع ضميره ولا يخون ابدا قيم الخير والجمال التي تعمل في دواخله ولا ينحاز للقبح والظلام
وهذا ماوقع فيه الكثيرون من حسبوا على الابداع وقد تجردوا من هذه الصفة
بهذا المسلك النشاز.
ودم بخير وسلامي للاسرةالكريمة
اخوك هشام هباني
| |
|
|
|
|
|
|
|
|
|
Re: سيناريوهات : شمهريره للبنى التحتية (Re: هشام هباني)
|
أخى الحبيب هشام
رمضان كريم وتصوموا وتفطروا على خير
مضى وقت طويل لم ألتقيك فيه عبر هذا الأسفير أرجو أن تكون والأسرة الكريمة بألف خير .. ما نقوم به أخى من إضاءآت على مكامن الخلل هو جهد المقل الذى لا حول له ولا قوة لكن يبدو أن القافلة تسير بينما (نحن) ننبح (سااااكت) ... كان الله فى العون أخى ... هذا مع سلامى وتحياتى وكل سنة وإنت طيب
| |
|
|
|
|
|
|
|
|
|
Re: سيناريوهات : شمهريره للبنى التحتية (Re: هشام هباني)
|
رمضان كريم يابارع .. ارجو ان يتصل السيد "المهندس" وزير البنية التحتية ( او ما شابه ذلك ) بالجن فهم ما زالو في الحبس لنهاية رمضان مما سيسهل عليه الوصول اليهم مجتمعيين ويحل نفسو من الزنقة الدخلو فيها الوالي السابق ومهندسيه ( افتراضا )..
| |
|
|
|
|
|
|
|
|
|
Re: سيناريوهات : شمهريره للبنى التحتية (Re: abubakr)
|
العزيز الفاتح جبرا
كما عودتنا السهل الممتنع و الحرف الساخر الذي يعبر عن إحباطاتنا وألامنا في حال البلد الأصبح مهزلة ومأساةيعوث فييه ملوك الجهل والفساد بلا ضمير ولاإنسانية.
الله يحفظك وليدوم إبداعك دوما صوتا لشعبنا المغلوب الي حين
لك إحترامي
| |
|
|
|
|
|
|
|
|
|
Re: سيناريوهات : شمهريره للبنى التحتية (Re: Magdi Is'hag)
|
Quote: لا بس عاوزين نتأكد إنكم فعلن جان مسلم ! عشان الإستعانة بالجان الكافر حرام
- والإستعانة بالأنس الكافر حلال ؟ |
والله يا استاذ من ما وقعن عيوناتي على السطرين ديل , قعدت اضحك لمن شرقت ...!!!
والشرقه في رمضان دا مشكله , لا تقدر تشرب لا تقدر تعمل حاجه , بس تقطعها في حنانك كده وتسكت ...!!! ( وش مدردق من الضحك)
استاذ الجليل , ابداع لا ينضب , ارحنا به ....
تحياتي ....
| |
|
|
|
|
|
|
|
|
 Re: سيناريوهات : شمهريره للبنى التحتية (Re: Abd-Elrhman sorkati)
|
Quote: -(أحدهم) : طيب يا شمهريره ممكن تقرأ لينا من الآية 6 للآية 11 من سورة الجن !
- (فى إستغراب) : إنتو حركاتكم دى ما بتخلوها ؟ إنتو جايبننا نعمل ليكم البنى التحتية ولا عاوزين تشغلونا أساتذة تربية إسلامية؟ |
** البروف ابو ناجى..
** جُمعه مُباركه..
## المُعاينه الفوق دى لترسية العطاءات مع الجهات الخارجيه مُش ناقصه :-
## مفروض السؤال الاول :- آخر آيتين من سورة البقره ..
## السؤال التانى:- الآيه 86 من سورة الكهف ...
## السؤال الثالث:- الآيه رقم 67 من سورة مريم..
## السؤال الرابع:- نواقض الوضوء.. حتى بعد داك يجى سؤال سورة الجن ..
## الاسئله الفوق دى لإختيار الدبلوماسيين لوزارة الخارجية بدولة سازونيا الاسلاميه اللاحضاريه.. وكذلك يجوز إستعمالها عند ترسية العطاءات ..
## قلت لى الجان ذاتو ركبوهو الصينيه ,, الحمد لله اللقى ليهو صينيه فاضيه عشان يُعبر عن ذاتو ..
(لك التحيه ودام الود بيننا)
(ابو محمد فؤاد - دبى)
| |
|
|
|
|
|
|
|
|
|
Re: سيناريوهات : شمهريره للبنى التحتية (Re: عبدالكريم أحمد الامين)
|
Quote: - حتى نستطيع الحضور لمناقشتكم يجب عليكم إستحضارنا وذلك بعمل الآتى :
- قفل شبابيك وأبواب الغرفة التى توجدون بها وإطفاء الأنوار وأى مصادر مضيئة
- إطلاق بخور مكون من اللبان الضكر ولسان العصفور والسندروس والميعة السائلة
- قراءة الكلمات والأسماء التالية والإستمرار فى ترديدها حتى ننزل عليكم وهى : سمسمائيل ، طسميائيل ، شيغاب ٍشيعايوب ، هلهليوه ، شليطاه ، شيلطاه ، امرهوش، بطميش ، اهيالموش ، مهيالموش ، كرهتيه ، برهتيه أحضر يا شمهريرة يا مدير شركة البنى التحتية |
بره النص
تفتكر يالفاتح هسع مافى اجتماعات بتم بالطريقة دى !
الحاجة الوحية هى الكلمات و الاسماء
و يا حليل شمهروش .. ال فى البال
| |
|
|
|
|
|
|
|
|
|
Re: سيناريوهات : شمهريره للبنى التحتية (Re: اسعد الريفى)
|
الأحباء الأعزاء :
- أبوبكر
- د. مجدى إسحق
- د. مصطفى محمود
- داليا الكباشى
- عبدالرحمن سوركتى
- أبو محمد فؤاد
- أسعد الريفى
كل الحب والود والشكر والتقدير لمتابعتكم لما أكتب ولمداخلاتكم التى التى أحس فيها عظيم تقديركم .. ربنا يقدرنا نكتب ليكم الشئ المفيد ... لكن بينى وبينكم (القربة مقدودة) ! تحياااااتى وسلاااامى ،،،،
| |
|
|
|
|
|
|
|
|
|
Re: سيناريوهات : شمهريره للبنى التحتية (Re: الفاتح يوسف جبرا)
|
الأخ الفاتح يوسف جبرا
تحية طيبة ... احترامي وتقديري لك وأفكارك النيرة وكتاباتك الهادفة الساخرة ...
لا أملك أن أكون في مقام الرد عليك .... ولا أملك أن أقيم كتاباتك لكن هل تقبل هذه الملاحظات من أخيك الأصغر ؟
- أخشى أن تتحول كتاباتك إلى جزء من آلية النظام لتخدير الناس وإلهائهم عن المهم -
- أخشى أن يدخل التكرار وتوارد الأفكار والخواطر إلى أفكارك وكتاباتك فتصبح المقالات نسخاً مكررة من بعضها -
لك احترامي أخي الكريم واحترامي لجميع القراء والأعضاء والمشاركين والرقباء والمراقبين ..
| |
|
|
|
|
|
|
|
|
|
Re: سيناريوهات : شمهريره للبنى التحتية (Re: Hani Arabi Mohamed)
|
عزيزى هانى
التحايا والود :
Quote: - أخشى أن تتحول كتاباتك إلى جزء من آلية النظام لتخدير الناس وإلهائهم عن المهم -
- أخشى أن يدخل التكرار وتوارد الأفكار والخواطر إلى أفكارك وكتاباتك فتصبح المقالات نسخاً مكررة من بعضها - |
طبعاً الجزئية الأولى أن ما عندى فيها يد !! وحتى إن إفترضنا ذلك فلا يمكن التوقف عن (إنتقاد السلبيات) على أساس هذه الدعوى (مش كده؟) !
أما الجزئية الثانية فالكاتب - أى كاتب - يبذل أقصى ما لديه لتجاوز تكرار (الأفكار) ومهمة القارئ (الناقد) أن يقوم بتنبيه الكاتب عند حدوث ذلك حتى يتلافى أوجه التكرار مستقبلاً .. (يعنى دى مهمتكم يا هانى) !!
هذا مع فائق إحترامى وعظيم تقديرى
| |
|
|
|
|
|
|
|
|
 Re: سيناريوهات : شمهريره للبنى التحتية (Re: abubakr)
|
** البروف ابو ناجى..
** مساءك خير..
## بناءاً على طلب الجن المُسلم اللسه ماجنا ,, قال يرفعو ليهو البوست عشان يشوف موضوع قروشوم اللحسوها الجماعه ,, وهو راضى يشيلوا عمولتمالـ 20% ويطلعو ليهو باقى الفله..
(ودام الود بيننا)
(ابو محمد فؤاد)
| |
|
|
|
|
|
|
|
|
|
Re: سيناريوهات : شمهريره للبنى التحتية (Re: الفاتح يوسف جبرا)
|
| Quote: هنالك رواية تقول إنو شمهريرة طلع طوالى من البنك وراح جايط الشغلانية تاااانى ورجعا ذى ما كانت ثم إتجه إللى أقرب صينية وإعتلاها وأصبح يشير للناس والعربات قائلاً : تغطية مافى ... تغطية مافى ... الشئ الذى جعل إبنه زمهريرة يعود مسرعا إلى مملكة الجن طالباً النجدة و المساعدة !!! |
الراجل شكلوا كدى "انس" بتشديد النون
لأن الواحد مننا بكون"جن"
| |
|
|
|
|
|
|
| |
الفاتح يوسف جبرا
هشام هباني
abubakr
Mustafa Mahmoud
داليا الكباشى
Abd-Elrhman sorkati
عبدالكريم أحمد الامين
اسعد الريفى
Hani Arabi Mohamed
ياسر عبدالكريم محمد
MOHAMMED ELSHEIKH
محمد عبد الماجد الصايم
عماد الدين عبدالله
فيس بوك
تويتر
انستقرام
يوتيوب
بنتيريست