المَطــر .. !

Quote: دقَّ المطر دقَّ .. فتح الملاذ للهم.. صدر الغنا اتلقَّ .. قبل السقوط النم

Quote: لكم افتقد السماء الصافى والليل ولحظة "تهضلم " فى اغسطس ويبدأ رزاز المطر ليقطع حبل النوم وتبدا رحلة الدخول الى الغرف البعض يدخل متبرما والاخر متكئا على حواف الاسرة فى انتظار انتهاء نوبة الرزاز ، وبصره يرنو الى عنقريب متكول الى حائط خارج مكانه ذاك فيما البعض احلوت له اللعبة واستطابها وبدا فى ونسة حميمة وصوت امى المتلهف يتساءل حينذاك ـ فصلتو نور التلاجة ؟ كان الكهربا قطعت بتبوظ ، واحد يجرى يغتى الصاج ، غتيهو بالطشت الكبير ، وماتنسى شوال الفحم ، والحطب حق العواسة ، انت حبيبى امشى بيت الغنم والجداد ، اقفل معاك شباك بيت الحمام ، محمد حبيبى انا ما قلت ليك من النهار نضف السبلوقات ؟ نضفتهن وتجئ الاجابة نعسانة ـ معليش يمة والله نسيت ـ ينساك الموت ، انشا الله المطرة ما تكون كتيرة ، باكر من الصباح تنضفن الله يرضى عليك حبيبى ، هسى عليك الله اجرى جرى الازيار ختيت الخرطوش فيهن لو اتملو ختو فى البرميل وما تخليهو فاتح الله يستر وما تقطع الموية كمان كان قطعت الا نشترى من ناس الكارو ، ومعاك كمان الازيار غتيهن ، الله يغتى عليك الكل راكض تلبية لما طلبته امى ، البعض متغطى بالبطاطين والاخر حاسر الراس ، ويعود الجميع ليطمئن قلب امى يا لك ياامى تخفت الاصوات وتبدا هى بالهم الذى لا يجعلها تسكت تبدا بحديث سردى عن السباليق ، فى الاوضة ، السنة الفاتت كبينا الرقيطة ، والسنة دى كمان بتبقى تقيلة على العرش ، الله يهون ويقدرنا نعرش البيت بالزنكى ونلقمه من جوه ، لانه السباليق دى مشكلة كل سنة ، هسى عاينو السبلوقة التانية دى دا الرشاش دا خلاها تسيل ، اجرى يامحمد اجرى ود امى جيب جردل للموية دى ، الله يهون هذا ما كان من امر المطر فى بيتنا لك الاخاء هشام

ياسلاممم ما أحلاها من حكاية ..مـا أجمل التفاصيل التي أثريتها بصور لطيفة ..
في كتابتك احاسايس وذكريات عشتها في ليله ممطرة قضيتها مع حبوبة آمنة في خريف جميل مضى..
شكراً جميلاً على هذه الكتابة الجميلة ..
وصولك هنا يعني لي الكثير أ. سلمى
التحـايا