|
|
 مواقف وطرائف مع الكماسرة...
|
الكمساري ...
ومن منا لا يملك موقفا معه
شكلة في الباقي أو بحث عن الفكة..
او فوتك المحطة
تارة يكون ظالما ومرات كثيرة مظلوما
فالجو سخن..
والناس في السخانة بتكون أعصابها بايظة
وبصراحة بتفكها في الكمساري
ومرات هو بكون حقار شوية
وبينتهك حقوق الانسان في التعامل غير الادمي
نهير وحركات جيش وهرشات
لكن علي منو يا تغميضة
نحن مفتحين
المهم كما يقول تبارك شيخ الدين
هذه دعوة للجميع لكي ينداحوا
ويحكوا مواقفهم مع السيد الكمساري
|
|
 
|
|
|
|
|
|
|
|
Re: مواقف وطرائف مع الكماسرة... (Re: سيف اليزل برعي البدوي)
|
طارق صاحبي وود جيرانا
في الاجازات بحب يطلع مصاريف الدراسة
وبشتغل كمساري في دفار
أيام كان (ديدي) أو الدفار في أوج مجده..
واحد من المواقف التي غاظته شديد
واحد من الركاب قال ليه:لو سمحت نزلني المظلة
ولصعوبة تحديد المحطات في السودان
إجتهد طارق وصفر للسواق قبل مدة لكي ينزل الراكب في المظلة
بالضبط
ولكن السواق جلا المحطة بعدة اشبار
فما كان من الراكب أن صاح هائجا فيه وهو نازل:
دي المظلة..دي المظلة ..الله يزلط راسك
ومع تحرك الدفار صرخ فيه طارق مغتاظا:
الله يظلط راس أبوك إنت
ههههههههه
| |
|
|
|
|
|
|
|
|
|
Re: مواقف وطرائف مع الكماسرة... (Re: سيف اليزل برعي البدوي)
|
لكن الكمساري هو اهم موظف في العربية..
فهو الذي يتحصل الكاش (كاشير) يعني
والكمسرة مهنة ما ساهلة
داير خفة وسرعة في الحركة والفهم
وهي أيضا مهنة خطرة
والكمساري لازم يكون لماح
ويعرف منو الراكب معاه من الما راكب
مرة كمساري البص وقف في المحطة
والناس نزلت كمية
وتصادف خروج أحد الناس من شارع جانبي
وما كان من الكمساري إلا ان طقطق له أصابعه
فرد صاحبنا:في شنو ياخي
أجاب الكمساري:حقنا
فأجابه:حقك بتاع شنو
والكمساري يصيح:ما تبطلوا حركاتكم دي الما عندو ما يقول ما عندي
وشمطة وكواريك لرب السماء
ويبدو ان الكمساري تشابهت عليه الأشكال
لذا لابد من ان يكون الكمساري واعيا يقظا
عشان ما يحاسب الماشين في الشارع بديلا عن الركاب
| |
|
|
|
|
|
|
|
|
|
Re: مواقف وطرائف مع الكماسرة... (Re: سيف اليزل برعي البدوي)
|
ياكمسارى
دى حافلة وين؟؟
دى ماشة الشعبى
اركب واسرع نفر .. ونقوم
ياولد جنيت؟؟
وكمان بتكورك وبالحقلوم
وتقول الشعبى؟.!
.........
انا ماشى... ماشى الـ.... الـ.....
وين ياعم؟؟
لو ماشى الحركة
برضو بنمشى
بنفس الشارع
ياولد
انت مسلط؟!
حركة وشعبى
وفى وشى؟؟
دى خلطة وين؟؟
انا عندى قلب
ماتوقف قلبى
طيب يا عم
وين ماشى ؟؟
اسرع اقول
انا ماشى ....
ما شى ....
يا ربى لوين
ياود جاد الله؟؟!
نسيت يا زول
طيب يا عم
خلينا ننادى
( يصيح)
تيجاني الماحي
تيجااانى الماااحى
باقي نفر
نفر ... وسفر
سفر .. و.. نفر
يوماااتى
ليلاااتى
صباااحى
نفر... وسفر
لا ياولدى
كورك وقول:
جوع .. وسهر
حفر .. مطر
.. غم .. وكدر
فلس فى شهر
طشاش فى نظر
عمر..وهدر
طيب يا عم
ما انت العاقل
ورينا الناس
اللاقو الراحة
لقوها فى وين؟؟
كفر..ووتر؟؟
لا لا
تبيع لى روحك
تخون لجروحك
وتختا الشر
تعوم فى البر
تكون نص
حاجة
وتصبح واحد
تكون كضباب
ونجمك صاعد
تكون سراق
لا ضمير
لا شاهد
تكون ود موية
او حربوية
وزمنك واعد
يا عم مالك؟؟
مرات مجنون
مرات عاقل
مرات خايف
مرات راجل
حتجننى ...
انت منو ؟؟
انا ولد جاد الله
فى كل محطة
فى كل مظلة ......
كورك يا وليد
تيجانى الماحى
باقى نفر
تيجااانى المااحى
نفر..وسفر
تيجانى الماحى
يوماااتى
صباحى
ليلااتى
نفر... وسفر
جوع... وسهر
حفر...ومطر
طشاش فى نظر
عمر وهدر
http://vb.alhadag.com/showthread.php?p=2000
| |
|
|
|
|
|
|
|
|
|
Re: مواقف وطرائف مع الكماسرة... (Re: سيف اليزل برعي البدوي)
|
وعربي عربي عربي نفر طالع يا)
يطقطق نفر من الركاب : قرصة يامعلم
يوقفو وينزل بعد دة بقي في مقعد فاضي
واصرار الكمساري علي انو المقعد يشيل فيو زول ويوقف السواق العربية
ها عربي نفر عربي نفر-
راكب: يااااااااااامعلم ماتشيلو من السكة ياخي نحن عندنا مواعيد حركاتكم دي اصلو مابتخلوها-
نفر نفر عربي-
راكب اخر: ياخي ماتخلينا نفقد منطق ياسواق دور العربية دي بالله-
مواصلة: عربي طالع-
-حنكوشة(مع انو ماعارفة الركبها المواصات شنو): عاين لو سمحت ياخي اتحرك عندي امتحان انا بالله
سكسكسك طوالي طوالي مشيرا للسواق بالتحرك-
راكب: اها خلاص النفر دة حيغنيك ؟ كرهتونا البلد الناس دي مالاحقة مواعيدها-
الكمساري: يازول ماتجمع قول انت لاحق مواعيدك ماتتكلم لينا كلام فارغ من الصباح-
والكواريك تبدا ويتدخل جميع الركاب لحل المشكلة
زاوية اخري
يطقطق الكمساري طالبا القروش
ها قدام-
يطلع الراكب 10 الف ويمدها الكمساري يرجع الباقي ناقص مية جنيه
وداك لسة مادي يدو
يامعلم الباقي-
الكمساري: اي دقيقة بس مافي فكة-
انتو الفكة ماتخلوها معاكم عشان لمن اجي نازل تنسيني ليها وتقوم بيها مش ؟-
اصلو من ما الراكب بقي اربعمية بقيتو تقومو بالمية دي
يازول جيب الباقي هسة
الكمساري:ياخي ماقلت ليك والله ماعندي فكة وعليك الله هي كان مامية جنيه-
انت المية دي بتخليها هسة لو واحد اداك تلتمية تفرتق لينا راسنا-
مشكلة اخري والصداع حاصل
وزاوية
حاجّة كبيرة عايزة تنزل الطقطقة مابتخارج معاها حيث جميع المفاصل اتلجنت
فالكواريك هي الطريقة الوحيدة
يااااااااولد بس اقيف اقيف هنا-
الكمساري: ياحاجاة المحلة دي ممنوعة ياخي فيها خمسين الف دي-
خمسين سنة في كوبر قلت ليك اقيف اجي
ياحاجة بعد الاستوب ياخي-
بعد دة ماالا اركب تاني ارجع المسافة الوديتني ليها دي الله يازاكم-
ياحاجة ماتكوركي عليك الله قلنا ليك ممنوعة-
ياود اقيف تقيف مناعتك-
وطنطنة ودعا لحد ماتنزل
زاوية
الزحمة والناس البالكوم الراجية المواصلات الفي ازمة شديدة
عربي عربي-
تزاحم شديد الاولاد يتصدرون المناطق الامامية وجري علي باب الحافلة اللحق لحق والمالحق يالشباك جاك زول
وتللللللللللب
البنات وخصوصا القصار البتحاول تخش يااتفجخت جوة او واصلت مناضلة وولما ركبت ( لقت الاسكيرت عمل دوران 360
درجة وخطوتو بقت بي قدام والطرحة بقت في الكتف والتفة مرقت والدبوس خشة جوة التيشيرت )
لقت كل المقاعد اتملت
تنزل تاني حالة صعبة
طبعا في النوعية البتقيف بعيد ومابتحاول املا في انو الناس تخلص والزحمة تنتهي اظن ولا ماتعرف الفهم وين
عربي عربي ويبدا الدافوري كل زول قعد والحجز حجز
بت: لو سمحت يااستاذ شوية بس-
الحافلة قفّلت والله-
ايوة انا عارفاها قفلت بس انا حاجزة-
وتركب تلقي شنطتها مجدوعة بعيد وولد قاعد في محلها
لا يعني انت ماشايف الشنطة دي ولا شنو بس افهم-
شنطة؟ انتو يعني تحجزو بشنطتكم ونحن ندافر نركب مانلقي مكان-
الرجال ماتو في كرري لكن تشيل ليك شنطة بت وتقعد-
اشيل شنطتها واشيلها هي زاتها عندك كلام؟ ؟-
تتحرج البت وتنزل مطنطة ياقليل ادب يامعفن ان شاء الله ماتصل الحتة الماشي ليها-
ياخي امشي كدة عليك الله (دة النوع الاخلاقو في راس نخرتو وهناي-)
ومن الباقي المالقي مكان
يازول بنشمع-
السواق: اسمع يا ماتشيل اي شماعة يازول دي فيها 30 الف
الكمساري : انزل ياحبينا سمعت مش؟-
السواق : يازول بتدفعها لينا ال30 دي
وينزل بعد شمطة وصداع تاني
بت بعد ماتطقطق للكماسري وتنزل
اسمع الباقي متين لو سمحت-
والله مافي فكة وبي تحت كدة (ياعسل-)
يازول قلت ليك جيب الباقي اخير ليك-
والله مافي لو في اديك 200 وفوقه- .......
البت لونها يتغير وبس تسمع (ياتافه) وان شاااااااء الله تخش عليك بالساحق والماحق المتين جنيه-
منقول
http://blue-nil.com/vb/showthread.php?t=13579
| |
|
|
|
|
|
|
|
|
|
Re: مواقف وطرائف مع الكماسرة... (Re: البدري عبد الله)
|
سلامات يا ابو السيوف
اجازتي السابقه للسودان كنت راكب حافلة من المركزي للفة وكنت راكب في المقعد الخلف الكمساري ... اه في كمية من طلاب المدارس كانو في الشارع عايزين يركبو و السائق بتاع الحافلة الظاهر عليه جديد في الشغلانية عايز يوقف للطلاب ... يا زول الكمساري بصوت كبير كده ... طواااااالي يا معلم عنكبوت عنكبوت ... اه قمت سالتو بتقصد شنو بعنكبوت دي قام قالي انته ما شايف الطلبه ديل بنقول ليهم عنكبوت عشان بيتشعبطو و ما بيدفعو لينا المبلغ كامل
| |
|
|
|
|
|
|
|
|
|
Re: مواقف وطرائف مع الكماسرة... (Re: سيف اليزل جعفر عبد الرحمن)
|
أبو السيوف شكرا علي طلتك البهية علي البوست
رغم غنك سافرت بدري
لكن شكلك كده زمان كنت منجض الكماسرة
تعرف ألذ حاجة الحافلة تشحن عربي فل
وتمشي ون قو ويكون الشريط الشغال وردي
تسرح كده لحدي السوق العربي
لكن طالع نازل دي ما بنفع
مشاكل وكواريك مع الركاب
يا حليل الهايسات والسيفيليان
مودتي
سيف
| |
|
|
|
|
|
|
|
|
|
Re: مواقف وطرائف مع الكماسرة... (Re: البدري عبد الله)
|
عندي خالا لامي كان عنده بص
وشغال معاهو واحد كمساري (زمان كانوا بقولو ليهو المساعد)
عند زمن الفطور مشوا المطعم عشان يفطروا
وده كان زمان زمن الدنيا بخيرها زمن كان تأكل أولا ثم تدفع
قيمه ما أكلته
وبعد ما أكلوا ( طبعا كل واحد براهو وفي تربيزه براهو)
جاء وقت الدفع
فسأل خال الوالده بتاع المطعم عن الحساب
فقال ليهو : حسابك انت قرش وحساب الكمساري قرشين
الخال : ليهوأصلوا أكلنا شنو؟
صاحب الطعم: انت اكلت فول والكمساري أكل كباب كبدة
فما كان من الخال ألا وأن توجه للكمساري وجدع ليهو مفتاح البص وقال ليهو :
من يوم الليلة أنت السواق وأنا المساعد.
ها هاااااااااااااااا
| |
|
|
|
|
|
|
|
|
|
Re: مواقف وطرائف مع الكماسرة... (Re: فيصل أحمد سحنون)
|
Quote: عندي خالا لامي كان عنده بص
وشغال معاهو واحد كمساري (زمان كانوا بقولو ليهو المساعد)
عند زمن الفطور مشوا المطعم عشان يفطروا
وده كان زمان زمن الدنيا بخيرها زمن كان تأكل أولا ثم تدفع
قيمه ما أكلته
وبعد ما أكلوا ( طبعا كل واحد براهو وفي تربيزه براهو)
جاء وقت الدفع
فسأل خال الوالده بتاع المطعم عن الحساب
فقال ليهو : حسابك انت قرش وحساب الكمساري قرشين
الخال : ليهوأصلوا أكلنا شنو؟
صاحب الطعم: انت اكلت فول والكمساري أكل كباب كبدة
فما كان من الخال ألا وأن توجه للكمساري وجدع ليهو مفتاح البص وقال ليهو :
من يوم الليلة أنت السواق وأنا المساعد.
ها هاااااااااااااااا |
هههههههههههههههههههههههههههههههههههه
| |
|
|
|
|
|
|
| |
سيف اليزل برعي البدوي
البدري عبد الله
فيصل محمد خليل
سيف اليزل جعفر عبد الرحمن
فيصل أحمد سحنون
فيس بوك
تويتر
انستقرام
يوتيوب
بنتيريست