|
|
 عندما يقال الحلة الجديدة ( الخرطوم) انتهي الكلام يلا نرفع تحياتنا للحلة
|
الحلة الجديدة و تدفق الذكريات و ينتهي الحديث فيها لما تحمله من شجون للسكان ذلك الحي العريق و ذكرت الحلة سواء الشمال او الوسط او الجنوب لا بانت لك تلك الاعلام من مباني و شخصيات تاريخية اذكر منهاميدان المولد و مجمع ابراهيم مالك و معهد الموسيقي و المسرح و هاشم عبدون ( مدرسة الحلة المزدوجة) و النموزجية و نادي الجلاء و البرنس و ديم سلمان و الدفاع و الزومة سابقا و مساجد ذات تاريخ مثل جامع ميرغنى و نواصل
|
|
 
|
|
|
|
|
|
|
 Re: عندما يقال الحلة الجديدة ( الخرطوم) انتهي الكلام يلا نرفع تحياتنا للحلة (Re: elnawrani margan)
|
يا النورانى ما تلخبط
شوف مداخلتك الفوق دى انت اتحركت من وين وصليت المغرب وين
دا كلام دا ،،،، معقولة بس
يا صلاح عبدالله ناس الديم بيقولو ليهم ديامة
اها ناس الحلة بقولوا ليهم شنو ،،،
غايتو يا سيد البوست بعد شوية حيجى واحد يشلخ ليك البوست ده T
عارف ايام الثانوى فى مدرسة المقرن كنا بنحسد زملائنا ساكنى الحلة الجديدة
من سهولة المواصلات بتاعتكم ، البص الاحمر فاضى وكل واحد قاعد مرتاح فى كرسى
ونحن ناس الصحافة بندافر يومنا كلو فى الحافلات
مدارس العباسى وابو حمامة مش تبعكم برضو
خالص الود
| |
|
|
|
|
|
|
|
|
|
Re: عندما يقال الحلة الجديدة ( الخرطوم) انتهي الكلام يلا نرفع تحياتنا للحلة (Re: omer osman)
|
قصدك ياجنابو فيصل جقود ... الزول المرح الجميل
اخوه لاعب الهلال السابق اسامه جقود ....
.....................
صديقى عبد الريحم مخمد احمد منصور .. اخبارك .. مشتاقين والله
سوف ارسل لك تلفونى + ايميلى فى رسالة خاصة ...
.....................
خلونا نبدأ بلعيبة الكورة ..شنو بادينها لينا بامانه فراج وثوره وباعوضه
اولاد قاقارين طبعا الاشهر بالاضافه الى اسامه جقود
وعلمت ايضا ان فيصل العجب قد ترك بحرى وسكن الحله الجديدة
شمال قريبا ... وهيثم كمال لاعب الهلال السابق ايضا
واخونا عادل ادم حارس المريخ ...
| |
|
|
|
|
|
|
|
|
|
Re: عندما يقال الحلة الجديدة ( الخرطوم) انتهي الكلام يلا نرفع تحياتنا للحلة (Re: برير احمد إبراهيم)
|
يا ناس الحلة الجديدة هوووي ، ما تنسوا ناس الكورة مولانا الفاتح محمد مختار
وأظنو هسع في مجلس إدارة الهلال ،، وشقيقه محتار محمد مختار
وجعفر مجيد ، وحيدر عبدالحفيظ ، وديل زملان وفرد ناس أسامة جقود
ولاعب الاهلي السابق صلاح عبدالدايم ، وده شوتو ما تقابلها رجلو اليمين فيها شيطان..
والملحن وعازف الطرمبة المرحوم سليمان أبوداؤود أبرع الملحنين الشباب
وبرضو الملحن وعازف الكمان الماهر النور محمد جمعة (الفي الحلة بيتو) كما يحلو له أن يقول
واستاذ نصرالدين
وبرضو إنتو جايين كده جيبو لينا حاجة من المرحوم عبدالوهاب حريقة وكده....
يا جنايو عمر عثمان كمال خليل عبدالواحد أخونا ودفعة أخوي الرائد معاش وحيد عبدالله الدفعة (50)
بالمناسبة أنا مفروض من ناس (51) لكن كبيت الزوغة..
يا سلام على الحلة الجديدة وناسها ..
| |
|
|
|
|
|
|
|
|
|
Re: عندما يقال الحلة الجديدة ( الخرطوم) انتهي الكلام يلا نرفع تحياتنا للحلة (Re: Salah Abdulla)
|
دفعة الدراسة والكورة ,و اخونا هاشم اسحاق لاعب النيل
عبد المنعم ابراهيم لاعب البرنس,, زملاء الدراسة,,
فتحي عبد الوهاب, محمد النقر ادريس, كاب الحجا
عصام عبد الكريم, عادل عثمان الحاج و محمد عبد اللطيف
حمزة الجلال, ابراهيم جعفر,عمر عبد السلام, ازهري وعمر
فضل المولي, جنابو ازهري نورالدايم, والمرحوم عادل صديق
فتخي لاعب الرميلة,, شباب حلوين قضينا معاهم ايام حلوة,
عبده T وعراقي الساكوبيس.. بس الخانات كانت كتيييرة,
ما انسي مولانا ونان الدفعة القدامنا.
واصل ,و عسا نحصل واحد من ناس الزمن الجميل.
| |
|
|
|
|
|
|
|
|
|
Re: عندما يقال الحلة الجديدة ( الخرطوم) انتهي الكلام يلا نرفع تحياتنا للحلة (Re: Salah Abdulla)
|
يا جماعه أنتو مشيكم دامالو مكعوج وكمان. بالنهار. يعني الواحد لو مشي غرب من ميدان الليق وما ترتع زي الترتعه البتسو فيها دي اول شي حا يلاقيه دكان سعيد. وبعدين بيت الموسيقار النور جمعه. واول مره أشوف زيدان ابراهيم شحما ولحما شفتو مع النور دا بعد ناس النور دا البيت الكنا ساكنين فيه. بالمناسبه كان في واحده قبطيه ساكنين جيراننا وهي اول امراه في حياتي اشوفه سايقه عربيه. و اعتقد أيضاً انو الشاعر اسماعيل حسن كان ساكن في الشارع دا. حاتم السر بس نشوفك و نسمعبك هنا تحياتي لك وللاسره
| |
|
|
|
|
|
|
|
|
|
Re: عندما يقال الحلة الجديدة ( الخرطوم) انتهي الكلام يلا نرفع تحياتنا للحلة (Re: برير احمد إبراهيم)
|
حاتم العزيز تحياتى
انا قصتى مع الحله الجديده قصه
جئتها مصادفه ولم ابرحها الا وانا مغتربا ولكن لم يزل فى قلبى لها منزله خاصه.
و حبب الاوطان الى اهلها مارب قضاها الشباب هنالك
فلى فيها غيمة وشجرة وظل واخوة افاضل.
انا من مواليد امدرمان ولازلت اقطنها ومفتون بعشقها هذه المدينه القريه
ولا اغالى ان قلت لك ان الحله تشبه امدرمان كثيرا اقل شى اجتماعيا.
جئتهم ضيفا ذات صدفه فشملونى بعطفهم ورعايتهم لدرجة ان ادمنت الاقامه فيها
عندما اغتربت وصادفت بعضهم فى دروب الغربه وياتى الحديث عن الحله واسهب فى
الحديث عن الحله واهلها ومواقفهم المشرفه وترحابهم بالغريب كان السؤال الذى يورقهم.
صديق الموج انتو بيتكم كان وين فى الحله؟؟
جوابى دايما كل بيوت الحله بيوتى وكل اهلها اهلى ولم اكن ابالغ اذ هى الحقيقة.
وعندما اخبرهم اننى كنت احضر يوميا من امدرمان واعود بعد ان يغلق
نادى الدفاع ابوابه كانو لايصدقون ذلك .
قضيت حوالى تسعه اشهر اخرج من منزلنا فى الثورة الحارة 12 الساعة الثالثه
عصرا مستغلا بص الثورة حتى المحطه الوسطى امدرمان ومنها استغل بص ابورجيله
حتى المحطة الوسطى الخرطوم ومنها الباص الاحمر حتى محطة ود المبارك،لاجد
فى انتظارى فيصل ودابرق وحاتم محمد بخيت ومحمد محمود التنقيتو وكمال خليل
فى بوابة النادى وقتها كان النادى فى شارع الحله الوسطانى ومقابل دكان عيسى
الترزى وجنوب دكان ود المبارك.
كان النادى خلية نحل يموج بالشباب النشط ويمور بالشابات النشيطات
واسطة عقدهن الاخت شامة محمد بخيت وكانت اول امراة سودانية تشغل
منصب سكرتير فى نادى رياضى وحق لكم ابناء الحله ان تفاخروا بذلك.
يساعد شامه المرحومة فاطمه ابراهيم صالح عليها الرحمة وسلوى وباعوضه
بنات امنه فراج.
كانت ادارة النادى فى ذلك الوقت على النحو التالى:
المقدم ادريس عبد الله عباس رئيسا
صلاح ابراهيم صالح نائب الرئيس
شامة محمد بخيت سكرتيرا عاما
صديق الموج سكرتيرا ثقافيا
النقيب محمد حسن مقبول امينا للمال وصل رتبة اللواء ونزل معاش
كمال خليل وحاتم محمد بخيت مسئولى النشاط النسوى
وعضوية صلاح عبد الله عباس وصلاح حسن وفيصل ابراهيم صالح واخرون لم تسعفنى
ماتسمى ذاكرة فى تذكر اسماء باقى اعضاء اللجنه،
عملنا تلك الايام عملا جبارا هذه هى اللجنه التى استطاعت ان تتحصل على
تصديق لارض النادى الحاليه،وشهدت الدار فى عهدهم نشاط ثقافى واجتماعى ماهول
كانت تقام كل ثلاثاء فى رمضان ذلك العام 1977 ندوة دينيه وكل خميس
لقاء اسرى واذكر ان غنى فى احد تلك اللقاءات المرحوم الخالدى وشهدت
الدار مولد اغنية سلمى وهى من الحان ابن الحله المرحوم سليمان ابوداؤد
ذلك الفنان الانسان وطالما اتينا على ذكر الاموات لابد ان نترحم على روح ريحانة
شباب الحله المرحوم عصام خليل.فقد كان شابا خلوقا وموهبه كرويه فذه
ولعب فى نادى النيل الخرطومى.و الشاب عمر محمود عليه الرحمه.
كان النادى يضم فى عضويته كل اباءنا من رجال ذلك الحى الوطن،عمنا ود المبارك
وعمنا ابراهيم صالح ومع رئاسته لنادى الفروسيه الا انه كان يهتم بنادى
الدفاع اهتمامه بمنزله،عمنا عبد الله عباس،اولاد دوكه،عمنا الجريفاوى،
وكل رجال الحله الاماجد لا مستثنيا احدا من الكرام،الرحمة تتغشى من توفاه الله
منهم ونتمنى طول العمر والصحه لمن تبقى منهم.
شباب الحله اولاد ابرق التاج، صلاح، فيصل، واخواتهم،عوض محمد بخيت (جولط)
حاتم،نابغ واخواتهم،محمد حسن مقبول،صلاح حسن،وشقيقهم الاصغر نسيت اسمه
عادل الجريفاوى،جمال ودالمبارك وشقيقته واذكر ان احد شقيقاته كانت تدرس
بروضة النادى،بدوى ،اسماعيل طبق،فيصل وعلى شرف الدين،ال شاطر،ادريس عبد الله عباس
واشقاؤه عمر وصلاح،وعمر الاخر كان يعمل مضيفانسيت اسم والده ولكن اظن محمود،الكشيف حسن وشقيقته الفنانه قسمه
وشقيقاتها،ابراهيم بلد،فيصل وهيثم وعاطف وشقيقاتهم،سلوى وباعوضه بنات خالتى امنه،
احمد حسن زوج سلوى ومع انه كان يسكن الخرطوم (3)الا انه وبحكم انه ابن اخت فيصل
شرف الدين كان تواجده فى الحله بصورة يومية عيسى الترزى صاحب القفشات الذكيه.
كل هولاء كان لهم القدح المعلى فى بروز نادى الدفاع كاول نادى فى رابطه يضم
فريق فى الممتاز فى الكرة الطائرة وفريق كرة سله للبنات ونشاط ثقافى تحدثت
عنه الخرطوم طويلا فى تلك الايام..
حاتم العزيز قطعا سوف اعود لهذا البوست انشاء الله وسوف اعود بالكثير عن الحله
الجديده بنيها لياليها ذكرياتها واجمل واغلى ما في الحله الجديده قطعا اهلها
فهم من اكرم ولطف اهل الخرطوم قاطبة.
رعى الله الحله ووقاها من كل شر وحفظ اهلها عنوانا للمحنه والالفه والتالف ودمتم،،،،
| |
|
|
|
|
|
|
| |
حاتم تاج السر المبارك
وليد محمد المبارك
محمد عبد الماجد الصايم
omer osman
elnawrani margan
Abdelrahim Mansour
عبد الدائم سيد أحمد
برير احمد إبراهيم
سيف الدولة كامل
عبدالرازق الطيب يس
صديق الموج
عبدالله ود البوش
فيس بوك
تويتر
انستقرام
يوتيوب
بنتيريست