|
|
 عريـــس نُص كلتش
|
،،كل سنة وانتو طيبين،،
النكتة التي احكيها دائما حتى أُخفف حدة النقاش حول الموضوع الممل (العزوف عن الزواج) او (العنوسة) كما يحلو لمعشر الرجال ، هذه النكتة سوف افتتح بها موضوعي:
يحكى ان واحدة من البنات بلغ بها الانتظار مبلغ ، فاصبحت تتوكأ على عصا الشيوخ حتي تبلغ مرتجاها، ذهبت هذه الفتاة الي الشيخ المشهور بطبخ اعمال التزويج ، فقالت للشيخ:ابوي الشيخ انا واقعة ليكـ في الواطة ، تشوف لي عريس باي طريقة الناس اكلت لحمي ، فقال لها الشيخ : امركـ مقضى يا بتي ، امسكي دي بخرات ودي محاية ، الحاجات دي تعمليها في اسبوع وتجيني بعد الاسبوع للمقابلة ، اخذت الفتاة تلك الحاجيات ظنا منها ان امرها انقضى بالفعل وبينما هي مسرعة نحو الباب اذا بابونا الشيخ يستوقفها لوصية مهمة قائلاً: اسمعي يابتي في الاسبوع دا لازم تساعديني ، صاحبتنا شالت هم طبعا : اساعدك كيف يا ابوي الشيخ
فقال لها الشيخ ناصحاً::
قابضي ،، قابضي ،، قابضي
--------------
يقيني ان هذه الفتاة ضحية ضغوط اسرة ومجتمع.
عودة
|
|
 
|
|
|
|
|
|
|
 Re: عريـــس نُص كلتش (Re: طارق جبريل)
|
المقصود ليس (المقابضة) في حد زاتها ...
المقصود طبيعة النكتة في حد زاتها .. يعني شمائل دي بنت ما (ود الجيران يعني) ..
_
شمائل ..
مشتاقين يا فردتي اليمين ..
| |
|
|
|
|
|
|
|
|
 Re: عريـــس نُص كلتش (Re: فيصل نوبي)
|
فيصل نوبي و ودالصايم
البوست دا علي الطلاق نُص كلتش
المقصود يانوبي ضغوط المجتمع والاسرة والحصار الذي يفرض علينا ، يجعل الكثيرات يقبلن بالزواج من اجل الزواج والسلام
بعدين فردتك اليمين دي شنو ، ايه الالفاظ البيئة دي ، انا بعد العيد حصل لي تحول حضاري
| |
|
|
|
|
|
|
|
|
|
Re: عريـــس نُص كلتش (Re: طارق جبريل)
|
Quote: اذا بابونا الشيخ يستوقفها لوصية مهمة قائلاً: اسمعي يابتي في الاسبوع دا لازم تساعديني ، صاحبتنا شالت هم طبعا : اساعدك كيف يا ابوي الشيخ
فقال لها الشيخ ناصحاً::
قابضي ،، قابضي ،، قابضي
|
شيخ تاني قال لي واحدة كملانة من لحم الدنيا انتي برضو ساعديني وساعدي روحك ... اساعدك كيف واساعد روحي ياعمو الشيخ :
بس بي شوية لحيمات كده مابطال.........
| |
|
|
|
|
|
|
|
|
|
Re: عريـــس نُص كلتش (Re: شمائل النور)
|
Quote: يقيني ان هذه الفتاة ضحية ضغوط اسرة ومجتمع.
|
شمائل العيد سعيد ..
كل سنة وانت بألف خير
دائماَ بتجيبى الحاجات الحارة التى تمس عمق الواقع أو المجتمع
أو الأسرة كما ذكرتى وسوف ننتظر عودتك ..!!!!
كل الود
محمد كابيلا
| |
|
|
|
|
|
|
|
|
 Re: عريـــس نُص كلتش (Re: محمد عبد الماجد الصايم)
|
الاخت المكرمة / شمائل النور
تحية واحترام
------------------------------------------
معاك انو المجتمع عندنا ما بريح وما واقفه على البنات وبس
حتى الولاد برضوا كتير بتسألوا ( حتقعد كتير )
ياخي ما تعرس قاعد كدة لمتين
مع انو الزواج ده مسألة شخصية بحته عرسته ما عرسته ماظن موضوع زول غيري
حته النص كلتش دي
معتمدة على الشخص الممكن تكون ظروفوا كعبة
لكين برضوا ممكن البنات يكون عندهم نظرة في الشخص (كشخص )
هل هو قابل أنو يصلح ظروفوا ويمش لى قدام
ظروف أغلب الناس في بداية حياتهم ما حتكون بالمواصفات العوزنها معظم البنات في عريس المستقبل
مع انهم بكونوا مؤهلين كويس ولسه مستقبلهم قدامهم
بس بناتنا ما بحبن يراهنن على المجهول
وعوزين كل شي في لحظتوا ... لا حيصبروا ولا مستعدين يمشو الحياة خطوه خطوه
ودي مشكلت أغلبهم
وربنا يعين الجميع ويوفقهم
------------
تقديري
| |
|
|
|
|
|
|
|
|
|
Re: عريـــس نُص كلتش (Re: عبد الناصر الخطيب)
|
عبد الناصر
شكرا على المداخلة الجادة
لكن تعرف ان الضغط الواقع على البنات افظع مما تتخيلوا انتو الرجال ، فكرة ربط الزواج بالسترة فكرة موغلة في الخطأ، مازال مجتمعنا ينظر للفتيات نظرة خوف وتوجس من العار ، ظنا منهم ان الزواج هو الستر الحقيقي ، حتى ولو كان نص كلتش ،، لدي صديقة عزيزة جدا ، تتمتع بشخصية مستقلة تماما وقادرة على اتخاذ قرارها ، فاذا بي افاجأ بانها سوف تقبل بذلك الشاب الذي لا يتوافق معها باي حال من الاحوال فعندما سالتها : هل انت مقتنعة؟؟ ردت لي::: مش عايزين اعرس خلاص بس اعرس ليهم عشان يرتاحوا
فكرت كثيرا في ردها ، واكيد غيرها كُثر
| |
|
|
|
|
|
|
|
|
|
Re: عريـــس نُص كلتش (Re: فيصل نوبي)
|
شمائل
كل سنة وانتي طيبة
| Quote: الحمد لله عريسكم دا ما طلع نص حاجة تانية! |
ود الصايم هوي هسة في زول جاب سيرة حافظ ابراهيم وللا حيدر الزين
انتو يعني ايي نص لازم يكون هيثم مصطفي ( فريق النيل ) ما الزهرة
خالص الود
| |
|
|
|
|
|
|
|
|
 Re: عريـــس نُص كلتش (Re: شمائل النور)
|
لالا اتلومت يا شمايل لوم الخلا عربسات ونايلسات شنو كمان ،،،،،،،
احنا ناس الهوتبير اها رايك شنو ،،،،،،
وبرضو بنراعي الناس الما عندهم ديجتلات وبنبث ارضي
رايك شنو في البث الارضي دي (وش متقطع من الضحك)
| |
|
|
|
|
|
|
|
|
|
Re: عريـــس نُص كلتش (Re: فيصل نوبي)
|
نقطة تانية :
| Quote: الزواج ليس من اولويات كثير جدا من الفتيات |
في دي أنا متفق معاك
ما أى بت أولويته الاولي إنها تتزوج
في البال أخت وزميلة عزيزة الله يطرها بالخير ويديها العافية
عندها فكرة زي دي شغاله وموفقة جدا في شغله
وبتصرف على بيتهم وأخوانه الكان معظمهم في مراحلوا الدراسية بعد وفاة والده
ومع إنها زوله بمقايس الجمال جميلة جدا
والعرسان كميات طالبين القرب لكين كان عندها هدف أجمل وانبل
في حياته يستحق أنو ( المجتمع ) يقدروا ويحترموا .
-----
أولويات الناس بتتحدد حسب ظروفهم الهم أدري بيها حقوا الناس تنتبه للنقطة دي
وفي مسأل كتيرة ما يشغلوا نفسهم بغيرهم كتير
أى زول بعيش حياتو دي زي ما عوز يعيشه
تحياتي
| |
|
|
|
|
|
|
|
|
 الشاب السوداني يتزوج بعد فوات الاوان (Re: على محمد على بشير)
|
الشاب السوداني من آخر شباب العالم زواجاً ... فتجد الرأس قد اشتعل شيبا وأصبحت العظام رميماً ....
وتتعاون في هذا عدة عوامل تختلف باختلاف الظروف والحالات والأوضاع وأذكر بعضها هنا وهي تعبر عن بعض الحالات وليس عن جميع الحالات ... وتنطبق جزء من العوامل التالية وليس جميعها على كل حالة بالإضافة إلى العديد من العوامل الأخرى غير المذكورة هنا:
0- الظروف ... وقد جعلتها رقم صفر لأنها شماعة أكثر من كونها سبب فبعض الشباب فتح الله عليهم الرزق الوفير ولكنهم لم يتزوجو رغم ذلك
1- عدم الجدية في والرغبة في تحمل المسئولية والميل إلى العلاقات المفتوحة التي لا تترتب عليها مسئوليات
2- يكون الشاب مرتبطاً بمسئوليات كثيرة تجاه أهله ومساعدة والده في تربية إخوته الصغار
3- مبالغة الفتيات وأهاليهن في طلبات الزواج وتكاليف الزواج ومتطلبات ما بعد الزواج ومبالغة بعض الفتيات في شروطهن لعرسان المستقبل
4- الأسعار الخرافية للمعيشة والمنازل والإيجارات والأثاثات والعلاج وتكاليف الحياة بمجملها ووو في السودان مقارنة بمستوى الدخول المنخفض.
5- أنانية بعض الأهل والتي تجعلهم يبعدون أبناءهم عن الزواج المبكر بحجة "رد الجميل إلى الأب والأم" ويبالغون في هذه النقطة فتجد الابن وقد حاصرته هذه النقطة إلى أن يتجاوز الأربعين من عمره.
6- إذا كان للعريس أخوات تأخرن في الزواج فإنهن قد يحاولن أن يؤخرن أخاهن بأي طريقة ... وإذا حدث وتزوج ترى أنهن قد يقمن بافتعال المشاكل مع زوجته
... نواصل
| |
|
|
|
|
|
|
|
|
|
Re: الشاب السوداني يتزوج بعد فوات الاوان (Re: Hani Arabi Mohamed)
|
في الهند
الدولة المزدحمة
التي يفوق سكانها المليار نسمة
والتي يصعب فيها إيجاد مساحة للسكن وسط ذلك الكم الهائل من السكان
كان زملائنا في الدراسة يخططون لزواجهم بمجرد تخرجهم.
وانتهت معظم قصص الحب التي دارت في الجامعة التي درست فيها بالزواج .
بعد عودتي من الهند في 2004 ... تابعت بالإيميل ومجموعات الياهو أخبار شباب وبنات الدفعة
فوجدتهم قد خططوا لحياتهم ونهضوا وتزوجو خلال ما لا يتجاوز العامين بعد التخرج وفي سن لا تتجاوز
الـ 25 سنة للأولاد.
| |
|
|
|
|
|
|
|
|
|
Re: الشاب السوداني يتزوج بعد فوات الاوان (Re: Hani Arabi Mohamed)
|
Quote:
لكن نحن مواجهون بمشكلة اقناع المجتمع بان الزواج ليس من اولويات كثير جدا من الفتيات.
|
الاخت شمائل
اسعد الله اوقاتك بكل خير ،،
وكل سنة وانتي طيبة ،،
مع احترامي التام لوجة نظركم وموقفكم من الزواج بشكل خاص والرجال بشكل عام ، دعيني اتسآل
الآ يتنافي ذلك الموقف مع الطبيعة البشرية وحاجاتهاالمستمرة لما يسمى بمؤسسة الزواج .؟؟
| |
|
|
|
|
|
|
|
|
|
Re: الشاب السوداني يتزوج بعد فوات الاوان (Re: ابوعبيدة حسن محمد)
|
طيب ..
فعلاً الزواج بقى ما من اولويات الفتاة السودانيه الـ اتوفر ليها التعليم ولقت فرصه في مجال العمل
التى هي برضو بتكون دايره العرس بس ما بتكون لقت ود الحلال او لقتو وادها درس ما تنساهو طووول عمرها 
العرس المجهجه او العريس النص كلتش زي ما قولتي اخير عدمه بس في نفس الوقت يا اختي
لمن الوقت يمشي حتى ابو الهول ح يقول يا لهوي .. اذا انا اعتقد انو مافي داعي للمكابره بتاعت البنات الشغالات ديل ..
واحسن يكسبن زمنن بالبحث عن ود الحلال حتى وان كان بالدعاء نص الليل
هذا ووفقنا الله واياكم لما فيه خير البنات الشغلات .. وشكراً
| |
|
|
|
|
|
|
|
|
|
Re: الشاب السوداني يتزوج بعد فوات الاوان (Re: Dalal Ezzaldin)
|
إلى الزميلة الكريمة التي ذكرت أن العمل أهم من الزواج لدى بعض الفتيات ...
هل تستغني الفتاة عن أن تعيش تجربة الأمومة الجميلة وتتمتع بتربية أبناء وبنات
هل تستغني الفتاة عن عاطفة الأمومة ؟
هل تغني الوظيفة عن ضحكة طفل صغير يملأ البيت حنينا وبركة ؟
هل تغني الوظيفة عن إحساس الأمان في كنف زوجً عطوف حنون حازم قوي ؟
| |
|
|
|
|
|
|
|
|
|
Re: الشاب السوداني يتزوج بعد فوات الاوان (Re: Hani Arabi Mohamed)
|
سلامات شمائل...
سلامات Hani Arabi Mohamed
| Quote: هل تغني الوظيفة عن إحساس الأمان في كنف زوجً عطوف حنون حازم قوي ؟ |
What is that bout?
زكرتنى روايات زهور ب "زوجً عطوف حنون حازم قوي" دى.
بعدين "كنف" دى شنو?
مالك عاوز تطفش البنات من العرس?. كلمة كنف دى بتدى شعور بانها مواطن درجة تانيه محتاج للعطف و الرعاية. و برضوا محتاج للحزم عشان يمشى عديل.
________________________________________________
حازم مع منو ? مع زوجته ام مع اولاده ولا ناس الشغل?
يا بنات....انتو ذاتكم خليكم حازمات
| |
|
|
|
|
|
|
|
|
|
Re: الشاب السوداني يتزوج بعد فوات الاوان (Re: smart_ana2001)
|
سمارت
والله فاقداك عديل كدا
طبعا هاني رايو واضح تجاه الزواج وهو بيشوفو اولوية الاولويات ، لذلك هو بيشوف ان الزواج بيوفر الحماية والاحساس بالامان ..... الخ
وهو ماعارف كثير من الرجال اصبحوا يبحثون عن زوجة توفر له الامان ولقمة العيش الكريمة
| |
|
|
|
|
|
|
|
|
|
Re: الشاب السوداني يتزوج بعد فوات الاوان (Re: Hani Arabi Mohamed)
|
سلام يا شمائل
عندى زولة صاحبتنا وسطتنى اتكلم مع بنتها فى العرس
قالت كل ما يجى عريس البت بترفض و تقول يا ماما ما بينفع!!!!
والام بحكم قرابتها الشديدة من بتها هى متأكدة مافى زول فى حياتها
المهم جيت انا يا الواسطة للنقاش وكده
من قولة تيت قالت لى اسمعى يا خالتو اى زول فيهم بديهو فرصه اعرفو
و كلهم لما عرفتهم لقيت نفسى more mature than them !!!! على الرغم من انهم كبار منى!!!!
قلت ليها يعنى لازم يكونو انضج منك ايه الدونية بتاعتك دى
قالت يا خالتو ياخ ما المقصود.. المقصود انو ما ناضجين معناها ومعاها ما مسئولين
انتى يرضيك اشارك حياتى مع زول ما مسئول واقعد اتلهله طول عمرى
قلت والله عاد يا بتى ما برضينى طالما كلهم ما قدر المشاركة
يبقى خلاس
مرقت على امها قلت ليها هووووى ابعدى من درب البت وخليها تختار حياتها
اها يا شمائل
القابلة فى بيتك 
| |
|
|
|
|
|
|
|
|
|
Re: الشاب السوداني يتزوج بعد فوات الاوان (Re: Siham Elmugammar)
|
سهام المجمر
كل سنة وانت طيبة
طبعا فاجاتيني انكـ .... ما علينا
| Quote: more mature than them |
تعرفي يا سهامبالضبط كدا ، دا المسكوت عنه في مسالة الشراكة
وعندما تتحدث احدانا عن المتيرة او النضوج ، تفهم انها شايفة روحها ، لكن للاسف هذا واقع ،، لكن ماشاء الله على بت صحبتكـ ، ربنا يكبرها يعقلها.
Quote: اها يا شمائل
القابلة فى بيتك |
المشكلة القابلة برضو ما ح نخلص ، ح تقولى لى القابلة تبقوا 3 ، والقابلة البعدها ، النبي فيكـ ما تجيبي ليهو اخو يلعب معاهو ...... الخ
| |
|
|
|
|
|
|
|
|
|
Re: الشاب السوداني يتزوج بعد فوات الاوان (Re: ابوعبيدة حسن محمد)
|
ابو عبيدة
تحياتي،،
صدقني نحن ما ضد الفكرة باي حال ، لكن انا اتحدث عن ترتيب الاولويات لكثير جدا من الفتيات وليس كل الفتيات طبعا ،، يعني مثلا يا ابو عبيدة النموذج الاورده الاستاذ/عبد الناصر الخطيب عن صديقته الناجحة جدا في عملها وتقع على عاتقها مسئولية اسرة ،، في رايكـ الاولوية ان توصل اخوانها مرحلة اي واحد يعتمد على نفسه وتكون بهذا ادت رسالة عظيمة. ام الأولى لها ان تتزوج وتبيع القضية ؟؟؟
وهذا كله برضائها....
| |
|
|
|
|
|
|
|
|
|
Re: الشاب السوداني يتزوج بعد فوات الاوان (Re: Hani Arabi Mohamed)
|
هاني عربي
تحياتي،،
زي ما قلت انا في مداخلة سابقة الفرق كبير بين الضغط على الشابات والضغط على الشباب ويرجع ذلك للتكوين الثقافي والفكري حول فكرة الزواج بالنسبة للشابة ومزاياه وكيف ان الزواج يمثل ستر للفتاة...........الخ الدوامة ،، وخصوصا اذا تقدم عدد من العرسان للفتاة ورفضت لاي سبب تراه هي مناسب ، اذا العبء الواقع على الفتيات اكثر من الواقع على الشباب
وكون نقول ان الزواج ليس من اولويات الاولويات لكثير جدا من البنات هذا لا يعني ان فكرة الزواج مرفوضة تماما(اوع اتفهم غلط ) ، المرفوض هو نُص الكلتش ،، يعني بحسابات 1 و 2 و 3 // ليس من العقل ان ادخل في شراكة وانا في قرارة نفسي مقتنعة انها لن تستمر ولو انطبق السماء مع الارض ، والا يبقى دا عبط
اشكرك على مداخلتكـ ، واتمنى عودتك،
| |
|
|
|
|
|
|
|
|
|
Re: الشاب السوداني يتزوج بعد فوات الاوان (Re: شمائل النور)
|
الزميلة شمائل النور .... شكراً على ردك ....
نعم أختي اتفق معك ... أن عدم الزواج أفضل من الدخول في شراكة ناقصة مع شخص لا يقدر المسئولية أو لا يحترم المرأة ويقدرها أو لا يتعامل معها بطريقة محترمة تحفظ استمرار الحياة الزوجية بينهما .
لكن ... عندما يتوفر للفتاة شخص مناسب ... ترتاح له ويمكنها أن تتفاهم معه وتعيش معه .. فهل ستوافق أم سترفض لأنها تريد التفرغ لحياتها المهنية والعملية ؟
أسأل الله أن يعين الفتيات ...
فالضغط عليهن كبير جداً ...
من جهة المجتمع يضغط عليها كما ذكرتي .... ومن جهة أخرى فهي لا تستطيع أن تذهب وتخطب لنفسها الشاب الذي تتمناه أو تريده .... رغم أنني شخصياً لا أرى في ذلك أي شيء .....
لكن للأسف ...بعض الشباب (إن لم أقل معظمهم) يفهمون الفتاة هنا غلط لو صرحت لهم بمشاعرها ورغبتها...
=====
كلنا نتشدق بحب رسول الله (صلى الله عليه وسلم) وندعي دفاعنا عنه وغضبنا من الإساءة إليه ...
وننسى أنّ السيدة خديجة رضي الله عنها هي من تقدمت لخطبة رسول الله صلى الله عليه وسلم .....
=====
رأي الخاص أن الزواج من أولويات الفتاة والشاب ... بشرط أختيار الشريك المناسب ....
| |
|
|
|
|
|
|
|
|
|
Re: الشاب السوداني يتزوج بعد فوات الاوان (Re: Siham Elmugammar)
|
الاخت المكرمة / شمائل النور
والمتداخلين الاكارم
---------------------------------
نص كلتش ( يعني مهدن ) ودي حالة عارضة لانو (نص الكلتش ) من غير داعي بسبب تحميل على ( الطارة )
والحالة المثالية تبعد رجلك من( الكلتش) خالص إلا لو عوز تغير أو تهدن أو تقيف ...........
وهنا فهمتها بمفهوم مقارب لـ ( ماشي على عجل الحديد )
يعني ( ظرفوا المادي تعبان )
لانو إجتماعيا نحنه من مدرسة نمط تفكيرة بقول ( الراجل ما يعيبو إلا جيبو )
وبنهمل أنو ممكن جيبو يكون ملان وبرضوا هو ملان (عيوب)
لكين لو الفهم
| Quote: مع شخص لا يقدر المسئولية أو لا يحترم المرأة ] |
يعني العلة في الشخص كشخص فهم وسلوك وتفكير
نصيحة لله لو أخر راجل مفروض ( ما توافق عليهوا )
لانها حتكون عالجة مشكلة بمشكلة أكبر
مثال الاستاذة سهام للبت الواعية دي عجبني شديد مافي سبب يخليها تربط نفسه بزول أقل منها نضج ووعي
وما ننسي بعدين في الحياة الزوجية أغلبنا ما حيدي الزوجة فرصة كويسة في مشاركتوا في القرارات البتخص الأسرة
مع أنو المنطق أنو ليها نص القرار لكين البحصل ومهما وصلت درجة الوعي عند الناس بكون في حساسية في الحته دي
أى راجل بحب يكون عندو إحساس أنو صاحب القرار في أسرتو
يبقي من البداية ما تعرض نفسه إنها تكون تحت رحمة زوج ( غير ناضج )
---------
مع تكرير الملحوظة بإنو أولويات الناس حسب ظروفهم الهم أدري بيها
فلانه ولا فلان ما تزوجت ليه ولا ليه أتأخر
دي كلها حاجات ما بتخص المجتمع بحاجة
ولا حقوا الناس تعود التانيين يسالوهم منها
تقديري
| |
|
|
|
|
|
|
|
|
|
Re: الشاب السوداني يتزوج بعد فوات الاوان (Re: عمر صديق)
|
نعم ... تختلف الأولويات باختلاف الأشخاص والظروف والبيئات ... لكني تكلمت هنا عن رأيي الخاص الذي يرى أن الأولوية للزواج
والزواج لو وجد البيئة المناسبة والأشخاص المناسبة فإنه سيحل الكثير من مشاكل المجتمع
لكن مجتمعنا يقلب الزواج من حل إلى مشكلة
غلاء تكاليف الزواج وغلاء المعيشة وعدم القناعة بالبسيط ..... و"البوبار" وووووووو
| |
|
|
|
|
|
|
|
|
|
Re: الشاب السوداني يتزوج بعد فوات الاوان (Re: عبد الناصر الخطيب)
|
عبد الناصر
شكرا للعودة
نص كلتش اصبحت مصطلح للحاجات انصاف الحلول ، يعني اكيد ما المقصود الجانب المادي ، المقصود سوء التوافق من جميع النواحي
| Quote: مافي سبب يخليها تربط نفسه بزول أقل منها نضج ووعي |
اهي دي يا عبد الناصر الكارثة ، ضغوط الاسرة + المجتمع ممكن توصل الواحدة مننا لاسوأ درجة اختيار
صدقوني الفتيات يقع عليهن ضغط صعب تحمله
| |
|
|
|
|
|
|
|
|
|
Re: الشاب السوداني يتزوج بعد فوات الاوان (Re: أميرة فاروق عبد العال)
|
واحدة قريبتنا جاءها عريس موظف بنك اهلها كلموها , مافى راسها زول تانى
قالت ليهم خلونى استخير اصلى لى ركعتين صلت وجاءت,قالوا ليها صليتى خلاص قالت ايوة
لكن قبل نعرف نتيجة الاستخارة,,نحن سوف نعقد,,,اسى اولادها فى المدرسة
برضو واحدة جاءها عريس استاذ ابتدائى ,,قالت ما بنفع معاها
حبوبتها قلت ليها يابتى اتمسكى بيه ,,,
واخيرا ظهرت الداعية ندى القلة
لوكى القرضة امسى فيه
ابو وليداتك ما تفكيه
سلام شمائل,,العيد الجائى امور العذابة سالكة
| |
|
|
|
|
|
|
|
|
|
Re: الشاب السوداني يتزوج بعد فوات الاوان (Re: abuguta)
|
ابو قوتة
واحدة صاحبتنا قالت الاستخارة بتطفش العرسان ...لووووول...
صدقني الوضع المادي او الاجتماعي ما هو المعيار ، يعني استاذ الابتدائي البيصرف مرتب متواضع ممكن يكون افضل من فيصل نوبي العامل فيها مغترب دا ، وطبعا كل فتاة تختلف فيما تريده من الرجل عن فتاة اخرى ، ربما الوضع المادي ممكن يكون اولوية لواحدة بينما ياتي في المرتبة الاخيرة لواحدة اخرى
اما قصة لواكة القرضة دي ، مرحلة تاتي بعد التمسك بتاع حبوبة صاحبتنا دي ، يعني بعد الورطة ما تقع يقولو ليك لوكي القرضة ، لكن انا في البر قرضتك دي ترجع ليك يا ابو قوتة
| Quote: سلام شمائل,,العيد الجائى امور العذابة سالكة |
ابو قوتة
اي نعم نحن.......لكن ما للدرجة دي
| |
|
|
|
|
|
|
|
|
|
Re: الشاب السوداني يتزوج بعد فوات الاوان (Re: حيدر حسن ميرغني)
|
ياشمائل
عيديك سعيد والعيد الجاي زي ماعايزه
انا بعرف لي واحد اتزوج وهو نص كلتش لكن الحمد لله اسع زول كويس جدا
الاحلام الزايدة عن اللزوم هي السبب الرئيسي في عزوف الشباب عن الزواج ( المقصود بالاحلام الزايدة دي يعني ماممكن تلاقي كل المواصفات الجميلة في زول واحد ممكن يكون وسيم ومفلس او مقرش وعجوز او غير متعلم او شكلو ماسياحي http://www.sudaneseonline.com/db/attention/010_Smile.gif)
انت ماسمعتي بي البت القالت لي امها جاني عريس شغال استاذ اها الام قالت ليها اتصبري بيهو لحدي ماتلاقي ليك راجل كاااااااك دي من الناحية المادية
من الناحية السياحية ام واحده مكجنة ليك العايز يخطب بتها كجينة عجيبة جدا مع انو مقتدر اها كل البيت بيحاول بيقنع فيها وهي مصرة على موقفها واحد من الاولاد قال ليها ياخي ده زول عصامي الام قالت ليهو عصامي يعني شنو قال ليها يعني خلق نفسو بي نفسو اها الام قالت ليهم انا من زمان اقول الخلقة دي ماخلقة الله كااااااااااااك ).
ومن تواضع لله رفعه
ارقدي عافية
زاتووووو
| |
|
|
|
|
|
|
|
|
|
Re: الشاب السوداني يتزوج بعد فوات الاوان (Re: طارق جبريل)
|
لماذا اصبح الزواج ليس من اولويات الفتاه ؟
هل لعدم وجود العريس المناسب ام لان الزواج يشكل نهاية احلامها وطموحاتها
ام لعزوف الشباب وعدم المسؤليه واللامبالاه عند اكثرهم ؟
ايضا
ماهي اسباب عزوف الشباب عن الزواج ؟
كل سؤال هنا يشكل حالة او ظاهره تحتاج لبحث ونقاش مستفيض
شمائل كل سنه وانت طيبه
والسنه الجايه عروس معانا لووووول يكه ( الحقوق محفوظه للزول ذاتو )
| |
|
|
|
|
|
|
|
|
|
Re: الشاب السوداني يتزوج بعد فوات الاوان (Re: عبدالعزيز الفاضلابى)
|
تسلمى يا شمائل
سلامات عبدالعزيز الفاضلابى
| Quote: هل توافقين رأى من يقول ان الزواج بأكثر من واحدة يساهم فى حل مشكلة العنوسة هذه.? |
هسى القال فى مشكلة عنوسة منو???
قالوا العرسان كتار...بس دون المستوى المطلوب.
الحل???ربوا اولادك كويس. ما تفهموهم انو كونوا طلع فى الدنيا دى ولد فهو بالتالى افهم من كل البنات فى الدنيا
| |
|
|
|
|
|
|
|
|
|
Re: الشاب السوداني يتزوج بعد فوات الاوان (Re: smart_ana2001)
|
سمارت انتى
وعليك السلام ,, كيمان كيمان والعيد يتبارك عليك
| Quote: هسى القال فى مشكلة عنوسة منو??? |
والله كان ما أخاف الكضب شموّلة ذكرت مسألة العنوسة دى ألا يبقى أنا بشوف طشاش.
هوى يا سمارت ماتشبكينى فى ناس عزاز ,, ورفيقاتها كان دايرانى أمرق من البوست ده بمرق ,,
| Quote: قالوا العرسان كتار...بس دون المستوى المطلوب. |
والمستوى المطلوب ده شنو ؟ يمكن مجموعنا يدخلنا.
| Quote: لحل???ربوا اولادك كويس. ما تفهموهم انو كونوا طلع فى الدنيا دى ولد فهو بالتالى افهم من كل البنات فى الدنيا |
أول وبكل جدية أقر بأن البنات أكثر طموحا من الأولاد. ,مقتنع جدا بالقول (وراء كل رجل عظيم أمرأة) رغم تحفظى على الطريقة التى جاء بها القول فكان يحب أن يكون (وراء كل رجل عظيم امرأة عظيمة) بل هى أمامه.
المشكلة ياسمارت ناتجة فى جزء كبير منها بسبب أن الذكور Outnumbered بسبب الحروب وغيرها. وده موضوع طويل بجيك ليهو راجع بعد اتمام البوست الذى فتحته بخصوص البشارات بالرسول عليه الصلاة والسلام.
أها يا أختى فتك بعافية وتراك عرفتينى زولا خواف ما تجيبى لى الشبك ,, شمّولة دى عارفانى زول بمشى مع الحيط عشان كده عاتقاتى.
| |
|
|
|
|
|
|
|
|
|
Re: الشاب السوداني يتزوج بعد فوات الاوان (Re: عبدالعزيز الفاضلابى)
|
العزيز/عبد العزيز
موضوع العنوسة دا جانب من الموضوع الرئيس ، فانا هنا اتحدث عن الضغوط الواقعة علينا ،،علينا دي كيف،، الضغوط الفظيعة اللي بتخليك تكره حياتكـ ، فهنالك من لا يستطعن تحمل هذا الضغط فيتزوجن من باب المخارجة ، وهذه المخارجة هي نص الكلتش اللي بنقصده
بعدين مافي داعي للاسئلة المحرجة دي
| Quote: هل توافقين رأى من يقول ان الزواج بأكثر من واحدة يساهم فى حل مشكلة العنوسة هذه.? |
والعنوسة في تقديري ، صفة يفرضها عليك المجتمع ،، يعني ممكن اكون عناس بمزاجي ، وما يخلوني في حالي
حيدر
كل سنة وانت طيب
ليتهم يمسكون في مسالة قسمة ونصيب ، لكن دا كان زمان ، قاليكـ قابضي ،، قابضي
| |
|
|
|
|
|
|
|
|
|
Re: الشاب السوداني يتزوج بعد فوات الاوان (Re: نوفل عبد الرحيم حسن)
|
نوفل
وانت طيبة يارب
| Quote: هل لعدم وجود العريس المناسب ام لان الزواج يشكل نهاية احلامها وطموحاتها |
احيانا لا لهذا ولا لذاك ،، كل القصة ترتيب اولويات واحيانا كتيـــــــــر للسبب الاول
لكن نرجع تاني للضغط المجتمعي والاسري ، اللي بيخلي الفتاة تقبل بما هو اقل من موصافاتها ، ليس لغرور في نفسها ، ولكن مسالة توافق وانسجام ، فهذا الضغط يجعل الفتاة تقبل باي عرض وان كان غير مناسب ، لسبب ان تخلص نفسها من هذا الضغط
| |
|
|
|
|
|
|
|
|
 Re: الشاب السوداني يتزوج بعد فوات الاوان (Re: شمائل النور)
|
Quote: من قولة تيت قالت لى اسمعى يا خالتو اى زول فيهم بديهو فرصه اعرفو
و كلهم لما عرفتهم لقيت نفسى more mature than them !!!! على الرغم من انهم كبار منى!!!!
قلت ليها يعنى لازم يكونو انضج منك ايه الدونية بتاعتك دى
قالت يا خالتو ياخ ما المقصود.. المقصود انو ما ناضجين معناها ومعاها ما مسئولين
انتى يرضيك اشارك حياتى مع زول ما مسئول واقعد اتلهله طول عمرى
قلت والله عاد يا بتى ما برضينى طالما كلهم ما قدر المشاركة |
هذا احسن ما قرأت في هذ الصباح ...شكرا سهام المجمر ..وشكرا شمائل علي الموضوع الهادف ...
طريقة التربيه السودانيه للاولاد والاخطاء المتراكمه فيها بتجعل منهم فئات غير ناضجه وغير مسئوله ... حبوبتي ام هاني بتقول كتير من الرجال (هدوم) ساي ...
| |
|
|
|
|
|
|
|
|
|
Re: الشاب السوداني يتزوج بعد فوات الاوان (Re: ALZOLZATOO)
|
الزوول ذاتو
وينكـ ،،
المسالة ما احلام زايدة ولا حاجة ، المسالة وجود الشريك المناسب ، ومناسب هنا ليس من باب الوضع المادي او من باب الوسامة او او
يعني في عيوب الواحدة فينا ممكن تتجاوزها ، وكمان في عيوب لازم الواحدة تقيف عندها ، وعموما كل واحدة عندها مواصفاتها المعينة اللي بتختلف من واحدة لاخرى
| Quote: ومن تواضع لله رفعه |
والله المسالة ماعندي علاقة بالتواضع او الغرور
طارق نقد
ضل راجل ولا ضل حيطة دي لو قبلنا بيها حنبقي في حكاية ،،لوكي القرضة،، مع اني عندي تفسير تاني للاغنية
تحياتي،،
تحياتي،،
| |
|
|
|
|
|
|
|
|
|
Re: الشاب السوداني يتزوج بعد فوات الاوان (Re: شمائل النور)
|
شمائل وضيفان شمائل
الزمن العلينا البنات زاتن بقن يبحثن عن السريك الفيهو مواصفات معينة
قروش وكروش وهلم وهلم .....
وبعد فترة من الخطوبة وزعيط النجيلة وكلام وكلام والعربية المكيفة آخر صيحة
تلقاها ماشا وراهو على بعد كمين متر شايلة الولد والشنطة وشنطة الولد برضو
وهو يسب ويسخت
"ماتمشي لي قدام طلعتي زيتنا"
لووووووووووووووووووووول
| |
|
|
|
|
|
|
|
|
|
Re: الشاب السوداني يتزوج بعد فوات الاوان (Re: جلال جبريل)
|
Quote: ( ولقد كرمنا بني آدم وحملناهم في البر والبحر ورزقناهم من الطيبات وفضلناهم على كثير ممن خلقنا تفضيلا)
الإسراء ( 70 ) |
عبدالناصر ,, صباحاتك نور ,,
ردك فايت حد الجمال ,, والمنطق السمح لا يأباه الا مكابر ,,
تسلم ويسلمن معاك البنيات المادايرات النقة ديل.
| |
|
|
|
|
|
|
|
|
 Re: الشاب السوداني يتزوج بعد فوات الاوان (Re: عبدالعزيز الفاضلابى)
|
الزول الجميل/ عبد العزيز الفاضلابي
---------------------------------------------
تحية ومعائدة ولو متأخره ليك وللامور المعاك ده ربنا يخلي ليك
ونشوفوا بكره عريس ( كلتش كامل )
قلنا نوضح ( مكرمة ) أو مكرم البنكتبه جايه من وين
وربنا كرم البني أدم على كل الخلائق
فيستحق ينادي ( بالمكرم/مة )
ليك خالص التحية واكيد الود
| |
|
|
|
|
|
|
|
|
|
Re: الشاب السوداني يتزوج بعد فوات الاوان (Re: عبد الناصر الخطيب)
|
شمايل لك التحية
في نكتة ما بعيدة من النكتةبتاعتك ... بس بالقلبة .. يعني البطل والبطلة متزوجين ..
الراجل دخل البيت لقى المرة مبسوطة تغني وتكوي في الهدوم ..
قال ليها بلهجة حادة : يا مرة .. قومي لمي هدومك .. ويلا على بيت أبوك .. ما تقعدي معاي يوم واحد في البيت دا
المرا : سجمي في شنو .. الحصل شنو
الراجل : بعدين تعرفي .. يلا يلا .. لمي هدومك وختيهن في الشنطة وعلى بيت أبوك
المرا وقفت محتارة وشرعت سحابات الدموع في ا لتنادي
بعد شوية الراجل قال ليها : معليش كنت بهظر معاكي .. في الحقيقة بس أبوك اتوفي
المرأ نطت فرحة : هي الحمد الله لكن ما قطعت قلبي ّّّّّ!!!!!!!!!!
| |
|
|
|
|
|
|
| |
شمائل النور
فيصل نوبي
طارق جبريل
omer osman
محمد كابيلا
محمد عبد الماجد الصايم
Dalal Ezzaldin
ياسر بيناوي
طلال جبير جابر
على محمد على بشير
Hani Arabi Mohamed
ابوعبيدة حسن محمد
smart_ana2001
Siham Elmugammar
العوض المسلمي
عمر صديق
أميرة فاروق عبد العال
abuguta
حيدر حسن ميرغني
ALZOLZATOO
طارق عبد اللطيف نقد
نوفل عبد الرحيم حسن
عبدالعزيز الفاضلابى
bashir adam abdalla
Elsanosi Badr
جلال جبريل
فرحات عباس
فيس بوك
تويتر
انستقرام
يوتيوب
بنتيريست