|
|
|
 Re: سيرة الظرفاء في بيت نور الهادي !! (Re: Faisal Al Zubeir)
|
| Quote: واترك هذا الخيط لكل من شارك ليروي حديث الذكريات وخاصة عن (ظرفاء كل مدينة) .. |
فيصل الزبير
لك منى التحايا
نشارك بالمتابعة كل من شارك هذا النور الهادى
فما أجمل وأصدق الذكريات...عندما تكون بعيون فنان
لكم مودتى
سمية الحسن طلحة
| |
 
|
|
|
|
|
|
|
|
Re: سيرة الظرفاء في بيت نور الهادي !! (Re: Faisal Al Zubeir)
|
فيصل عباس ... كان هناك .. وعلى طريقته كان حضوره ، معنا بروحه الشفيفة ، ومفرداته التي لاتفهم على ظاهرها ، فهو تماما كصوفي قضى العمر نشوة وابتهالا ، فهو في مواكب الليل يمشي ، ويناجي نفسه والظلالا، وهو من عناه الشاعر ادريس جماع :
هين تستخفه بسمة الطفل .......... قوي يصارع الاجيالا
حاسر الرأس عند كل جمال ......... مستشف من كل شئ جمالا
هو طفل شاد الرمال قصورا ......... هي اماله ودك الرمالا
كالعود ينفح العطر للناس ......... ويفنى تحرقا واشتعالا
ليت الزميل فيصل ينفح عطر كلماته عن تلك الجلسة .
| |
|
|
|
|
|
|
|
|
|
Re: سيرة الظرفاء في بيت نور الهادي !! (Re: Faisal Al Zubeir)
|
سيرة الظرفاء
عنوان ليلة الجمعة الفاتت
شكرا فيصل خالد وده بقى زي توثيق بدون ما نشعر
زي لمتنا الكان القصد منها الونسة والتفاكر في كل شئ بتلقائية وعفوية يعني منتدى ظريف لايفرض عناونيه ولايخطط لجدوله الإسبوعي ولا لأجندته كل شئ ياتي تلقائيا وهذا المقصود اما توثيق كل الليالي
هذا يخص روح الصحفي عندك ويوثق لنا لتجاوز العادي فينا ولكن مع نشر ما يهم الناس أما ما يخصنافهو لنا مع تقديري ومحبتي ..
بدأنا الونسة زي ما قلت بصورة عفوية وفجأة انزلقنا في درب الظرفاء
لكل مدينة في بلادي ظرفاء من ود نفاش لي العم تنقو وكل حي به ظرفاء وكل المدن بها محسنين وناس
مبرووكين وناس لابهمهم شئ ولابسألوا في شئ وفي ناس لابعجبهم العجب ولا الصيام في رجب وفي ناس بداخلوا في كل حاجة حتى مستعدين ادخلوا بين البصلة وقشرتهاوفي ناس مارقة للربا والتلافوفي ناس مارقة لي عمل الخير واحد من ديل ( درمة البدفن الناس في احمد شرفي ) وليه بوست من اظرف ما يكون خلال لقاء اتعمل معاهو في جدة ..
تعالوا نسجل لي الظرفاء ..كل واحد احكي لينا عن الظرفاء البعرفهم ..
ولي فترة طويلة وانا صغير باكل الفول في مدني في محلات ( ابوظريفة) عشان نكون ظراف
وكان لي صاحب ظريف لي درجة انو حيوانو المفضل ـ الظرافة ـ بالظا ـ
ونواصل ــ ــ
| |
|
|
|
|
|
|
|
|
|
Re: سيرة الظرفاء في بيت نور الهادي !! (Re: nourelhadi awad)
|
كتب نور :
( الآن أترك الكيبورد لأقف إجلالا لهذا الحضور فهو يعطي مشاعري وسامة)
لقد كان هو الضيف والتشكليون اصحاب البيت ، اكرمنا وشاركنا ببعض من مخزون ذاكرته ، وهنا يضن علينا ببعض التفاصيل ، ليته اكمل ، ولكن يبدو ان كلماتي اثقلت عليه وهويستحقها ، فهو من ذلك النبت الطيب ، من تلكم الكوكبة المبدعة من اولاد كلية الفنون الجميلة .
| |
|
|
|
|
|
|
|
|
|
Re: سيرة الظرفاء في بيت نور الهادي !! (Re: Faisal Al Zubeir)
|
أخي العزيز الفيصل
قد إسترقنا من الزمن التجافي شيئا من حنين
كنت أنت والآخرين جمع كثرة لورود جملتني حد العشق
ولايزال عبقها يسد المداخل والزوايا ويلتزم الدواخل
كان حديث شجون
سأعود أليكم
رغم أنكم لم تبارحوني
لبعض شيئ في نفسي أقضيه
كونوا معنا
فدونكم
تفقد الأشياء معنى أن تكون
نورالهادي
| |
|
|
|
|
|
|
|
|
|
Re: سيرة الظرفاء في بيت نور الهادي !! (Re: nourelhadi awad)
|
الآخرون يكيلون ما يكيلون ..
نوشٌ للدوحاب أو بورداب الدوحة ( مسيخة الطعم هذه الكلمة : بورداب ) ..
نوشٌ أظنه يطيش ما طاشت مقاصده ..
ما علينا , هي الدوحة في كل تفانين تخاريجها ..
دلفت إليها منذ العامين , ظننتها محطة في الطريق إلى حيث لا علم لي به , زمنٌ ما امتد إلا بمثل اللمة هذه ..
هؤلاء قوم ( كُتُر ) كما تحب أن تقولها جدتي بلسانها الأطعم ..
كتر بمعنى مختلفين .. لا يشبهون إلاهم ..
السني واسطة العقد ..
يا أضخم يا السني .. في كل شيء .
المعز .. نور .. ياسر .. محمد حسن .. الفيصلين ( الزبيري و العباسي ) محمد يوسف .. ود رملية .. خضر .. و غيرهم .
من لم يحظْ بمجلسهم فقد فاته الكثير ..
و أنت يا صديقنا الجميل فيصل الزبير ..
تثير دائما الأسئلة , ثم تبقى راصدا .
سأعود لظرفاء المدينة على مهل ..
( نور الهادي خِرَب , سمى العرديب : تمر هندي .. مسخرة )
و السني لا يعرف الفطير باللبن , فلفح له إسما عجبا قاطعو من راسو , لكنه لهط الصحن الباشري حتى الصرير ..
| |
|
|
|
|
|
|
|
|
|
Re: سيرة الظرفاء في بيت نور الهادي !! (Re: Emad Abdulla)
|
يعني الواحد يشد البورد بتاعو ولاشنو في حالة بوست زي ده
وانشاء الله عمك عثمان والعدس كانو حاضرين
ليكم سلام مثبت بالقامب بيبر
والاوتر كلر الف تحيه
جكس الدفع
والناس الداخله الحله وجايه مدروخه
بوست يخلي الواحد\ يمطق جنس تمطق
مودتي
وقريب بي طرفكم كان ما عندكم مانع
| |
|
|
|
|
|
|
|
|
|
Re: سيرة الظرفاء في بيت نور الهادي !! (Re: Faisal Al Zubeir)
|
الزميل الفنان : احمد العربي : تحياتي
مرورك اثلج صدورنا
انت جزء اصيل من ابداع بلادي
انت منا .. التشكيليون في الدوحة
ليتك تكتب عن حركة التشكليين في السعودية
لديكم ما يستحق التوثيق والنشر من اجل التواصل
تحية خاصة
من معتصم عبد الوهاب (ودرفاعة) ودفعتك
بيقول ليك ذكرتنا بعم عثمان وعدسه الذي يتمه بالماء و(ينغرف) وايضا الرز
قال ليك
لن ننسى اياما مضت قضيناها في كلية الفنون الجميلة !
| |
|
|
|
|
|
|
|
|
|
Re: سيرة الظرفاء في بيت نور الهادي !! (Re: Emad Abdulla)
|
الاخ فيصل الزبير وبقية الاخوه الافاضل سلام عليكم
دخلتني عمه نور الهادى دي اصلي ماشه وراها هي وابوبكر
اخر مرة دخلوني في الزهج كان زهجانين الاتنين وفي طرفم
دخلتا معهم اصلهم اخوان عزاز الزمن بجود بيهم مره واحدي
كويس المره دي طلعت دار ظرافه وكمان معك الفنان الرايع
صاحب الروح الحلوه والحضور الكامل الانسان الاستاذ محمد السني دفع الله
وانشاء الله يارب دايما مبسوطين
ام احمد
| |
|
|
|
|
|
|
|
|
|
Re: سيرة الظرفاء في بيت نور الهادي !! (Re: عفاف أبو حريرة)
|
الفاضلة : ام احمد : تحياتي
ربنا يبعد الزهج ويديم الفرحة
لا زلت مطاردا المبدع (السني) وهو يطارد(الزرافة) وفي روايته (الظرافة) فمن يقدر على اصطياد(ظرافته) ويخرج من فمه درر الذكريات ، اطل علينا ولم يقل كل الحكاوي ، ولكنه كان في تلك الجلسة ملكها ، كان نسيجا لوحده ، ومسرحا يعكس تفاصيل حياة واشخاص علقوا بذاكرته القوية ، وفعلا هو الانسان الحلو بكلامه ، فهل يستجيب السني ويروي بعض قفشاته .
نواصل : تابعوا
ود رملية
د.معز
| |
|
|
|
|
|
|
|
|
|
Re: سيرة الظرفاء في بيت نور الهادي !! (Re: عفاف أبو حريرة)
|
الزول القمره فيصل
التحايا العواطر من دبي
ومعتصم ودرفاعه زولا ضي
وما زالت محبته تنمو بداخلنا
بس قول ليهو برضو لازم نمشي مع الطيب
سلامه نسلم على عروستو
وكمان ابوسبيب وعبد الرحيم وتلج لقمان
خشاف اشراقه وبلاهة طارق عابدين
نوري الكرو شبا والعطا
كل التفاصيل الجميله وجايكم جايكم
كل الود
| |
|
|
|
|
|
|
|
|
|
Re: سيرة الظرفاء في بيت نور الهادي !! (Re: احمد العربي)
|
قال شنو السني ما بعرف الفطير باللبن@@@!!!!
انت تضحك على نور الهادي عشان قال تمر هندي
وكان من اللمفترض يقول عرديب
ولا حيكون عندك حنكوش !!مش ؟؟
طيب اقوليك حاجة
انا لمن كانو بعملو لينا البيض
اومليت واسكوتلندي
انت كنت بتفك الريق بي الكسرة بي موية
قال ملبعرف الفطير بي لبن
انت الحنكوش لانك بتقول اسمو الجديد فطير
وانا قلت اسمو الضارب في التاريخ القديم
ســــــــــــــلابــــيـــــة
قال فطبر قال
| |
|
|
|
|
|
|
|
|
|
Re: سيرة الظرفاء في بيت نور الهادي !! (Re: Faisal Al Zubeir)
|
وعم بابكر لايزال يغالب الزهايمر
أهلا عربي
وحديث الذكريات
لقد كانت كلية الفنون منزلنا الكبير
ولكنها الآن ماعادت تلك الأم الرءوم
شاخت وهجرهاأبناءها وجف حليبها
حاولت التقرب منها تعذبني الأشواق
عجبي
لم يعد حضنها بذاك الدفء
وعصفت بيا الذكرى
نجيلة الخزف وماأدراك
وجعية الرسم والSTS
ميز أنور والكنيسة
وسينما غرب عفا الزمان محلها فمقامها
والطلاب الإسكيز يسدون المكان
أتت الرياح على آثار من ذهبوا
كانو هنا ذات يوم يوزعون اللون في غفر المكان
أراهم اللآن جيوش جمال بكامل عتادهم بورداتهم مشدودة على الخواصر
وينهمر من أقلامهم الرصاص ليحرر الوطن الجمال
وتشرق الشمس وقت الغروب وتتجمع حيث هم خطوط العرض والطول والإستواء
وزرياب يساكنهم ويشد اوتار المغني يعزف لاندسكيب الفرح بورتريه عشتار
وتتمايل أشجار الغابة ويفيض النيل
نتوحد مهرجانات الثقاقةوعازة في هواك
ويموت إفلاطون بقهره ويذهب من حيث أتى
فمدينتا جنة
ليت الزمان يعود يوما
ليته
نورالهادي
| |
|
|
|
|
|
|
|
|
|
Re: سيرة الظرفاء في بيت نور الهادي !! (Re: Muna Khugali)
|
| Quote: ســــــــــــــلابــــيـــــة |
غايتو سلابية دي يطرشنا ..
تكون قاصد ( زلابية ) ؟؟ .. و عشان لسانك الدنقلاوي غالب قامت الزين قلبت معاك سين ؟؟
فطير .. إسمو فطيررررررر .. و لما يكون ناشف بيسموه رقاق ..
إنت شن خبرك .. عامل فيللتك السمحة دي ..
ده كلام بنعرفو نحنا الغبشانين ديل .
ياهو زي دلع نور الهادي للعرديب  .
على أيامنا كنا بنقول على ( المسكيت ) تمر أبونا ..
الديم القديم كان فيهو تمر أبونا ..
كبرنا شوية قامو سموهو لينا مسكيت ..
لكن طعمو ما اتغير .. الأصفر و يابس منو هو أحلاه ..
فيهو مصة عجب العجب .
برضو ( الدُنقليز ) .. كنا بننطقها كده .
شوية كبرنا عرفنا إنه ( قًنقليز ) ..
هسه في ناس بتقول عليهو : تبلدي .
أمشي كدي هسه قول لحجة هُجرة : اديني تبلدي ..
لو ما فكتك بالقفة .. الله ينعلني .
قال ( سلابية ) قال .. عولمة  ..
أحمد العربي ..
يا زول يا زين ..
كلية الفنون دي شيتاً براهو ..
الكلام عنها ما بيخلص .. و سيرتها بتجدد روح الزول .
حبابك في الدوحة يا عربي متى ما قررت ..
تشيلك العين .
| |
|
|
|
|
|
|
| |
Faisal Al Zubeir
محمد سنى دفع الله
فيصل عباس
Emad Abdulla
احمد العربي
عفاف أبو حريرة
عامر تيتاوى
Muna Khugali
فيس بوك
تويتر
انستقرام
يوتيوب
بنتيريست