دعواتكم لزميلنا المفكر د.الباقر العفيف بالشفاء العاجل
|
|
 في شأن الحنان العظيم..إعادة تدوير وتسريح باحسان..
|
ود العبادي ايها العزيز..
ليس الامر كما ذكرت وليته كان كذلك ولكن ذروة سنام الحنان هي الحنة ..ان عزلتك زوجتك عن حنتها فقد مرقتك من نفسها واصبحت خارجا عن حدود حنانها ...
ما تقعد تقول لي دي مسالة ما قادر احقق فيها وانو انتا لاتدري هل اعتزالها الحنة بوادر تمرد لي حاجات تانية ام أنها مسالة لاترقى لطرحها ككارثة..
شوف يا صحبي :الحنة ثابت لا تفاوض فيه سرك ذاتو ..لاتقبل عليه مزايدة او حوار .. ان تتحنن لك زوجتك فذلك يعني أن لك وطنٌ وآمال...
وال(ح) في كلمة حنة حرف حنانٍ جليل لا يستطيع كل الناس إدراكه واجدادك صعاليك العبابدة كانو يفاخرون بنطقه ويضفونه على معاني الألم والجمال على السواء (حسن، حباب ،جرح) وعلى عبارات الاسى والصعلكة (احييينا ، حليلو ) وقد ُحرم الإنجليز من نطق ال(ح) فما عرفت نسائهم الحنة فسموا بالشعب البارد..ده موش كلامك لي في جبل اولياء في اواخر 94 ؟؟
شفتا ليك خواجية بتتحنن هسع ؟؟ رحاب ليه تابى الحنة..ارجل من نسوان الحارة السابعة ولا عندها جواز انجليزي؟؟
الحنة دي ياخوي تاريخ ومدونات ..
الحنة دي ُضربت اليها اكباد الابل وقوافل التجارة قبل خمسة الف سنة او يزيد.. تحركت لها ابلٌ وقوارب من اقاصي غرب المتوسط إلى أطراف الهند وشواطي عيذاب من اجل الحنة ..
سُُفنٌ ضخمة ذات صوارٍ ُطليت بدهنِ حيتان ِصيدت من بحارِ الشمال..
رجالٌ بسحناتٍ برونزية وقامات مديدة ودعوا زوجاتهم على شواطى مراكش ومواني جنوب اسبانيا..
قباطنة قليلي الكلام بعيونٍ زرقاء خرجوا من جزرٍ فرنسيةٍ مجهولة ..
قراصنة اشتهروا في شمال غرب المتوسط ..
تجارٌ من الدولة الفاطمية والعهد المملوكي ..
مغامرين ومعتادي اجرام ماتوا على مجاديف صنعت من اخشاب الصنوبر من اجل أن تبلغ السفن شواطي الهند والحبشة ..
كل هؤلاء استماتوا من اجل حفنة من حناء ..اممٌ ومشاهير..
خرج هؤلاء من اجل أن ُتزين النساء كفوفهن والأرجل ....خرجوا لأنهم عرفوا اثر حنان الحناء البليغ في نفوس الرجال...
تجي رحاب بت امبارح والحنة مردمة بالكوم في دكان الماحي - عشرة متر- من خشم بيتكم وتقول ليك ده ضياع زمن وجلبطة وقشور ساكت ..
رحاب عثمان بت خشم القربة ..خشم القربة التى بالكاد يتوقف عندها سائقي الهوستن والبصات السفرية تجي تجدف لينا في تاريخ القوافل والقرصنة وتجارة مواني الشرق القديم..
تاريخ طويل من نضال بحارة ..وعطش قوافل وعواصف المتوسط وليل المغامرين في المحيط الهندي تقول انو عبارة عن مضيعة زمن وجلبطة وقشور ساكت ..
الغلطة ما غلطة رحاب ..
دايما انتا كنتا بتديها فرصة انها تتكلم فيما يجب التحدث فيه وفيما لا يجب.. ما علمتها أن تفرق بين ما يجب أن تقوله امام زوجها وبين ما يجب أن تقوله امام صويحباتها في ونسات القطيعة ..
إن رأي زوجتك في اشواقِك إلى رائحة الحنة في عمومِ قدميها هو ما تستطيعُ زوجتك أن ُتناقشة قدام العواليق فقط ..موش قدامك انتا ..
ودي حاجات إن حصلت ليك تاني اطلع مُـسرح والبس قميصك الهزاز اب رسومات واقعد راقب مؤخرات السابلات قدام باب بيتكم في الحارة السابعة...واقصد بعدها اقرب ماخور... ولاتكاتب بها احدا..
عزيزي : إن الرجل ببساطة عندما يُحرم من حنان زوجته يصبح مجرداً من وسائل السلامة والنجاة وذاك درب قد يؤدي به إلى الكفر البواح وال(ح) في بواح ترمز إلي فداحة ما آل إليه ...
لقد مات من أهل الحنان في السودان خلق كثير دون أن يسمع بهم أحد ، ماتوا وهم على حواف الحنان العظيم..
فاطنة خيري ماتت وهي تتلمس اطراف بنانها التي غدت سوداء بفعل عمليات الحنة المتعاقبة ...
سألت انيسة أمها الحاجة فاطنة خيري : بتحننو ليه يمة؟؟ فاطنة خيري وهي سيدة حنينه يتّلم الناس عليها وينعصروا عليها ،ويعصروا الفراش إن جاهم حزن ...
ود أخوها بجيها من نواحي عطبرة يسلم عليها ، يخلي شغلتو ويجيها ..وحين تسالة عن سبب جياته ..يجيب : (والله مَحَنَّة ساكت(
قالت لي بتها ردا على سؤال الحنة المشار اليه اعلاه وفي بالها تحركات ضحوي البقى يجي محنة ساكت : عشان الرجال ما يمشوا الخرابات ..انهضي قومي شطفي الوليدات ديل..
شوف ياخوي ما تقعد تقول لي حُبها الكبير وايام كافتريا الصخور ونجيلة الميدان الشرقي .. وجود الحاء المضمومة مع حرف الباء ليس إلا بدعة فالأصل في المشاعر الحنان ومن بلغ الحنان، بلغ ضمناً ما فوق الصبر والعشق والإيمان ..
وحين جلسنا صيفئذ بقهوة ابو ضلوع في صحراء بيوضة اعتلاني الشجن فشعرتُ بالحنين فتنبهت انيسة إلى ذلك.. فالحنان جلي ..قالت
جدك مات وحيداً في هذه الجهات قبل اعوامٍ غميسة قاصدا امدرمان فما وصلها .....وبعد شهور من خروجه وجده أبناءه ميتا في هذه النواحي ممسكا بفرع يابس من حسكنيتة .. اغلب الظن انه مات صابرا خالطا بين ملامح حسكنيت بيوضة والجهنميات في اطراف شمبات ..
وبنوبيةٍ بليغة قات لي حبوبة حين عبرنا النيل وبلغنا مقامنا:الحنان دليل الرشد عن آل ضحوي ..اجدادك عاشوا فقراء لا يملكون شيئاً، ما جالدوا الملوك ولا أبناء الملوك على سلطانهم بل تقاسموا المحنة، كانوا ينامون بلا بطاطين لأن الحنان دفء.. كانوا يتزوجون قبل أو بعد البلوغ بعامٍ أو عامين لان المراة دفءٌ وحنان...كانوا يركبون الدواب ويمشون في الأسواق ويقتلون الشراميط في الطرقات لان الدعارة تجارة بالحنان .. ولشد ما كانو يخافون يوما تتحنن فيه الداعرات..
اجدادك ولدو في هذه الجروف وماتوا في تلك الهجيرة ..
يا صديقي ..تتحنن المراة وتضع الحناءَ متاهبة بذلك لحنان كبير ..
والمتزوجات في حلتنا كانوا يتبادلون المجموع ..
أن شئت الدقة فهم كانوا يتبادلون الحنان ضمن ما يسمي بالمجموع..
المجموع حين ياتي مع الحنة وتجي المرة مارقة عليك مجموع في مجموع كدي ..فذلك يعتبر تسعة أعشار المرة لو بتصدق ..
إن تركت رحاب تسعة اعشارها .. ماالذي ابقته لك؟؟
نسوان حلتنا كم كانوا حنينات ..ما رايتهن قط دون حنة ...
لذلك ظلت حلتنا تفيض حنية وولف ..وظل الرجال سعداء بالرغم من تراكم الديون ..
تجاوز دين احدهم السقف الائتماني فاخبرته زوجته ذات فجرٍ باردٍ بأنه قد يحتاج إلى 11 عام لتسديدِ ما عليه لسيد الدكان جراء جرورة المحلبيات والمجموع ..قبلها زوجها عند مفرق شعرها المخضوب بالحناء ونهض لوضوء ِ الفجرِ غير هياب..
ختاما يا عزيزي لو راجيني اضرب ليك تلفون عشان النصيحة فيما ذكرته عن مشكلتك مع رحاب فذاك ُبعدك ... خالتك انيسة نفسها انا طولتا منها واكتفي بما نتقله (تنهاس) العزيزة عنها عبر رسائل الإس إم إس ..
وشوف يا غالي يا ود الغالية بي اختصار كده وبلا تنميق وانتا زول كنت بتكره السوليفان والتغليف والبهارج : لو رحاب ابت الحنة : طلقها ..
طلقها واسترح لانك لن تخلو إلى نفسك مع امراة خالية من الحناء...خالية من المنطق ..خالية من تاريخ قوافل الحنين..
زولة خلا ساي ..
رجعها لي اهلها بما تيسر ياخي ... وكما كنت من أي حاجة وارجع عنقالي..
حمودي لو عاش معاك او مع نسابتك او في الشارع ما بتفرق ..
لن يحتاج لى رعاية باي حال .. شافع من ام عندها رأي في الحنة ما حيمرق إلا ُمحارب او قاطع طريق ...
والله إلا تدخلو الكلية الحربية بعدين ..
ما تحاول تعمل لي فيها ليبرالي ومستنير وبتاع حوارات .. وما تقدني
ولي قدام حاول امرقني من طرطشة زوجتك دي ياخي ..دي شنو حركات الارامل البتسوي فيها رحاب دي ؟؟
انا ما بهظر ولا قرفان منك ولا قرفان منها..
انا اتعفن هنا وافقد الوزن والاحترام عند كل صباح ..
قد حاصرتني الغربة والزيف وفارغ القول والجرايد الحائطية والأسئلة التي لا تنفك تسالها شوق ثم وجهها المنحوت من خيال جميل ..
الناس ترفس النعم حين ينشغلون عنها بالسوق والفحشاء وكراع رحاب البلا حنة ومكاوشة الاشياء التي تقبل المكاوشة على اربعة ..
دوما ..
عزيز
|
|
 
|
|
|
|
|
|
|
|
Re: في شأن الحنان العظيم..إعادة تدوير وتسريح باحسان.. (Re: ابو جهينة)
|
ابو جهينة
مستشار الحنة
اعتذر عن التاخير في الرد
بقيت اجي الرياض يومين في الاسبوع ومحروم من النت في بقية الايام ..لذا اجد نفسي متاخرا ...
حدثتني عن وضعيات الحناء واراك خبيرا بكافة الاوضاع..
Quote: فإن كانت بالإصبع اليسار .. فهي روح مشحتفة و نفس أمارة بحنان قادم.
و إن كانت في بطن الكف دون زخرفة منقوشة .. فهي إستعداد لإستقبال زول يستحق حنان و لكن ( موعد جيتو ما مؤكدة ) ..
أما إذا تم إستعمال النشادر في تسويد الحنة فذاك بأن الحنان قد داهمها على حين غرة. و أن زولها فتر من الحجز على السودانية و جاييها باليمنية.
أما إن كانت الحنة بمحلبيتها و سريتيها و مجموعها و قرطاس نقشها .. فذاك حنان بمزاج مرتفع ذو نكهة حميمية .. و تُنْصح المرأة بعدم غسل الصحون و الملابس و عدم أكل أطعمتنا اللايوقة حتى لا تستعمل صابون تايد في إزالة بقايا هذه اللواييق. |
واجلسني الضحك في الوضعية بتاعة سودانير..
رد الله غربتنا ووهبنا امراة تقدر الحنان والحناء والنقش والطقوس ومالى ذلك..
| |
|
|
|
|
|
|
|
|
|
Re: في شأن الحنان العظيم..إعادة تدوير وتسريح باحسان.. (Re: DKEEN)
|
Quote: لن تخلو إلى نفسك مع امراة خالية من الحناء...
خالية من المنطق ..خالية من تاريخ قوافل الحنين..
زولة خلا ساي .. |
منطق الحنة والحنين
فيما ورد عن دكين
يا دكين انت قايل بفرزوا بيها المعرسة من الما معرسة ليه
واصلا الفرق بينهم شنو لو ما كان دي عندها من تحاننه وتتحنن له
| |
|
|
|
|
|
|
|
|
|
Re: في شأن الحنان العظيم..إعادة تدوير وتسريح باحسان.. (Re: abuguta)
|
ابو قوتة الاجمل
الحنة في قناة النيل الازرق تظهر جلية واضحة ..لانو الناس الفيها جميلين واضحين ويدينم ملبس بس..
تضيع ملامح الاستديو وسط ابتسمات مقدمات البرنامج ..
تضحك سلمى فيسقط الريموت من يدي..
تبتسم نسرين فيسقط الزمان والمكان ..
تحرك راسها فاغلق التلفاز وابكي الزمان والمكان والتلفاز والخيال الذي تشتت في اصقاع الدنيا ..
كل سنة وانتا طيب يا ابوقوتا
انتا متزوج ؟؟
كل سنة وهي طيبة طيب..
| |
|
|
|
|
|
|
|
|
|
Re: في شأن الحنان العظيم..إعادة تدوير وتسريح باحسان.. (Re: تيسير عووضة)
|
تسير
مقتنع شديد جدا انا انو المرة التي لا تثق في الحناء هي مرة لا تصلح للمسير الطويل
اصلا كيف تطاق المرة بدون اكسسوار وحنة وبهارج البيت السوداني من دخان وغيره ..
بقالك حريمنا ديل ممكن يتقابلو بدون القصص دي؟؟
زوجة صديقي نحت منحا صعبا حين قالت لصديقي يا انا يا الحنة..
اخر واحد فيهم كانت الشيشة عنده من اهم الاشياء ..
فخيرته زوجتة وقات ليهو يا انا يا الشيشة دي..
قام رجع الشيشة الكبيرة بيت ابوها طوالي ..
كيف تقارن عاقلة بينها وبين شيشة عليها معسل بحريني ؟؟
كم في السر تمنى يشوف اي ايديها حنة ..
حريرة يا عاجباني ..
والفاقد المحنة دايما ليك احنة ..
زينة وعاجباني ..
هكذا غنى الكابلي..
انا شي غناهو الكابلي ده ما بفاوض فيهو ..
اتعلمي حبي الحنة يا تيسير..دي منحة والحياة بي حنة اجمل واحلى..
| |
|
|
|
|
|
|
|
|
|
Re: في شأن الحنان العظيم..إعادة تدوير وتسريح باحسان.. (Re: حمد فتح الرحمن)
|
حمد اخوي
المواضيع كلها باظت بالمناسبة..
قدر ما نلتقها بي جاي تتخرب بي هناك.. ده من ناحية
كما وليس ثمة اي اغراض اخرى لهذا البوست سوى انني احتفل بالذكرى الثانية عشر للقاء صديق عزيز ..
في مثل هذه الايام في شتاء 94 التقيته في اللواء 11 مظلي - جبل اولياء..
صديق بلا شروط ..
اهداني هذه المنافي وذهب يتجول في الشنقيطي وميدان عقرب ..
| |
|
|
|
|
|
|
|
|
|
Re: في شأن الحنان العظيم..إعادة تدوير وتسريح باحسان.. (Re: DKEEN)
|
Quote: المواضيع كلها باظت بالمناسبة..
قدر ما نلتقها بي جاي تتخرب بي هناك.. ده من ناحية |
و الله انتا يا دكين براك بتطبظ عينك بي يدك
او زي ما قال ليك خدر تاباها مقشرة ( تفتش عليها بي صوفا ) و بعد دا ما لاقيها .
او النايم ليها شنو زاتو ؟؟ و هسع المقعدك في الرياض شنو ؟؟؟
و مشكلتك يا عزيزي انك حرقتا مراكبك في البحر ، و زرعت الغام في الغابة ، و الله تاني الا إرس ما تحلك ( ثم رددناه اسفل سافلين ) .
| |
|
|
|
|
|
|
|
|
 Re: في شأن الحنان العظيم..إعادة تدوير وتسريح باحسان.. (Re: حمد فتح الرحمن)
|
| Quote: و مشكلتك يا عزيزي انك حرقتا مراكبك في البحر ، و زرعت الغام في الغابة ، و الله تاني الا إرس ما تحلك ( ثم رددناه اسفل سافلين ) . |
البحر يظل بحرا يا حمد ..
طويل بال وصدرو ماهل..
والغابة لغموها ناس همزاوي واخوك مسكين ساي بشيل وببلع,,
ضحكتني في إرس اسفل السافلين دي لامن عاينت اتر الكامري قدام الرسبشن..
انا اول ما حرقتا حرقتا إرس دي ..معقول ابقى على جكس بعومو زي التمساح...
يعني ده خيار مستحمي ..
تيسير عووضة كيف؟؟
| |
|
|
|
|
|
|
|
|
|
Re: في شأن الحنان العظيم..إعادة تدوير وتسريح باحسان.. (Re: DKEEN)
|
تعرف جيدا الفرق بين جنان الحنة ، و صحاري عدمها .
Quote: يا دكين انت قايل بفرزوا بيها المعرسة من الما معرسة ليه
واصلا الفرق بينهم شنو لو ما كان دي عندها من تحاننه وتتحنن له |
كما وانها افضل من استمع و غني مع ابو سامر .
بعدين انتا قايل الصباح الباهي لونك دي قالوها في منو ؟؟؟ و الناس قاعده تحفظا و ترددا لي شنو ؟؟
و يا عزيز ما دمت مصرا علي اجتياز الاستوائيات ، فلك مني تبرعا بازالة الالغام التي تزرعها كل حين .
و ليكن في علمك يا دكين ان الغابة لا تزرع الغاما مهما كانت الدوافع و الاسباب ، ( ما تقول لي دا جهاد، و انا لازم اعمل استطلاع عشان اقدر اعرف كيف اهاجم ) . الغابة خلقت لزراعة المستقبل فيها ، و انتاج الوداد بين جنباتها ، و تصدير الحنان الي كلهاريك القاحلة .
حنان صافي يا عزيز فيه شفاء للناس و فيه لذة للشاربين ، يسعد من يشربه الي ابد الآباد ، و يكتب في سفر المحبين خالدا ابدا .
حنان لا تنتجه الا ملكات نحل خلقن فقط لاجل إشفائنا ، و اسقامنا ايضا لمن لا يقدر .
و للغابة اسرار يا دكين .اما ان تدركها ، فتسلك دربها سهلا غير ممتنعا .
او ان تجهلها ، فتجهل عليك فوق جهلك ، فتصبحوا علي ما فعلتم نادمين ، و ترتد انت الي اسفل سافلين .
اذا عرفت كل ذلك يا دكين فالغابة لك ، و انت لها .
| |
|
|
|
|
|
|
|
|
|
Re: في شأن الحنان العظيم..إعادة تدوير وتسريح باحسان.. (Re: DKEEN)
|
| Quote: عفا عنك الملاك يا صديقي فابتهج و احذر |
حمد اخوي
ياخي انتا اصلا ما تنبلا في خشمك فولة ؟؟
طبعا ده كان اول ملاك يقول ليك انتا والمدلل داك ملايكة ..تشيلو وترصو لي بعضكم بي رفيع الالقاب والتصورات ..
الملاك المسكين لا يعرف شيئا ..اقصى ما يعرفة عنكم هو انا، لذلك منحكم ذلك اللقب غير هياب ..
ملايكة يغلطو عليك ويجو يعفو عنك ..
تاني في صلاحيات اكتر من كده ؟؟
| |
|
|
|
|
|
|
|
|
|
Re: في شأن الحنان العظيم..إعادة تدوير وتسريح باحسان.. (Re: DKEEN)
|
فيصل نوبي العزيز
الصورة يا حبيب هي لجريدة (فأجتك السنين) التي اصدرت بدار بورداب الرياض ..اصدرناها لان عذوبيتنا قد طالت وامتد ليلنا دون انيس
كانت الإصـدارة الأولى لـذاك الهـرب ..
محاولـة للخـلق .. لكسـر رتابة المدينة القفـر واحتمـال الواقع وإدراك ما تبقـى من حـياة ..
خفناان هزمتنا السـنين ولم يفاجئنا القرمصيص بأنثى دربنا .. ان يهزمنا المكان وليل الموحدين ذلك.. فيفاجئنا السوس في مخادعـنا ..
تخيل تكون في مدينة قطهرها اكثر من 80 كلم وما تشوف ليك في خلال 4 سنة بت سودانية في بلكونة ..اوليس شيئا يدعو للخوف والجذع ؟؟
فيصل كانت تلك محاولة جيدة لرأب الخوف ومساحات الجذع والعمر الهارب كل صباح بيد ان المعايش الجبارة ونجاح البعض في ان يجد انيسا لمفازة الحياة حال دون بقية الاعداد ..
وجاء في محتواها:
1- متسع من السنين متسع من الدروب ....................دكين
2- ترحيب السنين......................................معتصم دفع الله
3- حوارات السنين ........................................صلاح شتات
4- اهداءات السنين....................................... اسرة التحرير
5- وجه الشمس..........................................تمبس
6- ناطور السنين...........................................وليد طه
7- مقامات السنين....................................... محمد الشيخ
8- شوق السنين......................................... شوق آل ضحوي
9- رسائل العنقالة ......................................دكين
10- شعر......................................... الفيتتوري- يوسف حمدالنيل
11- غاليري السنين................................عبد العزيز قيسان
| |
|
|
|
|
|
|
|
|
|
Re: في شأن الحنان العظيم..إعادة تدوير وتسريح باحسان.. (Re: DKEEN)
|
دكين يا حنين .. شوق قدر محلبية الدنيا كلّها
هذا نص عالى المزاج
مالك تعيدنا لعوالم نحن فيها و نشتاقها!
و ماذا دهاك أيها العنقالى تدودرنا بين أوراد القرمصيص و ريحة الحنّة و المجموع .. ألم تدرى أن حنانا واقف على الهبشة .. تقتله الغربة و يقتلها
شكرا لأنك أعدتنى لرشدى .. كنت مع رحاب فى مركب واحد .. لأ أرى فى الحنّة إلّا "ضياع زمن وجلبطة وقشور ساكت "
.. حسنا لأنى لم أناقش و ساويسى هذى إلا مع نفسى و "بعض العواليق" .. ستكون وصيتى لمن أحبهنّ .. تخضبوا بما شاء لكم من الحناء .. مثنى و ثلاث و رباع و أنبذوا النشادر .. تحاننوا تحابوا
| |
|
|
|
|
|
|
|
|
|
Re: في شأن الحنان العظيم..إعادة تدوير وتسريح باحسان.. (Re: Ali Alhalawi)
|
لولا النفس الامارة بالسوء يا عزيزي دكين ...
وبعض تداعيات الغربة والتشوهات الخلقية المصاحبة لها ..
لاعتبرتك كاتب زمانك .. وراوي عموم البورداب من هنا لحدي الحتة الفيها الحسكنيتة ..
غير ان ان صورتك تفأجني وتطل علي وانا في غمرة نشوة ما تكتب ..
فأحدث نفسي مبتسما .. بالله شوف الزول المعولق دا كتاب كيف .. !!!
لك العتبى حتي ترضى .. 
| |
|
|
|
|
|
|
| |
معتصم دفع الله
خدر
ابو جهينة
تيسير عووضة
abuguta
حمد فتح الرحمن
المسافر
فيصل نوبي
bayan
humida
فيس بوك
تويتر
انستقرام
يوتيوب
بنتيريست