الناس انكرت كل شي.. وموخرا صار كل من ياتي من الخرطوم يردد: (البلد انتهت..البلد بقت خره بس ومابتنقعد.. لا اخلاق لاخلائق لانضافات لاخدمات ولا امن...حتى الرحمة زحت..) يقولون مايقولون وسناء بين ظهرانيهم.. بطروا بالنعمة فماحمدوا الله وماشكروه وهو ولى النعمة ومستوجب الحمد.. فعم البلاء، والناس من بعد ذلك خاضت في سيرة الغافلات المؤمنات فتعاظمت الذنوب الى ما مقداره جبل مندرة.. وظَلمت النفوس نفسها بالغفلة والجحود والنكران، واحتال الناس في كيل الميزان.. فساء حال البلاد وانفرط امنها وعم الناس هلعُ ُ في الرزق .. فلا يصبح صباح بيتٍ بالخرطوم إلا وقد خرج كل من فيه الى ناحية من نواحي الدنيا.. يركضون ركض الوحوش في البرية ابتغاء الرزق.. حتى خلت المنازل من ساكنيها فلا تكاد تجد هاتفاً ثابتا يعمل.. وأُكلت اموالُ ُ بالباطل، وذهبت فضائلُ الأعمال، وقل المعروف بين الناس فتكثفت ظلمات الانفسِ إلى ظلماتٍ تغشت الابصار والبصائر، طبقاتٍ فوق طبقات.. وظُلم الناس ظلماً عظيما.. فخرجت دعوات المظلومين وشواهد الاحوال في ثلث الليل مثقلة بالانات والبكاء والتضرع من ارض الخرطوم إلى سماوات الله.. وتصاعدت اليها كما مشاهدِ العارف محي الدين بن عربي .. وجرت نحو السماءِ جريانِ النيلِ في فصولِ الخريف عند محطة ود الماحي ..
فصعد اول ما صعد من ليل الخرطوم الظلم وشهدت له الاحوال،ثم صعدالذل فشهد له الاضطرار، وصعد القهر فشهد له اليتامى، وصعد التسول فشهد له السوق العربي، وصعدت الرشوة فشهد لها القطاع
الحكومي، وصعد الخوف فشهد له البوليس في الشوارع، وصعد الضنك فشهد له الإعراض عن ذكرِ الله، وصعد
الفُـسقُ فشهدت له الشقق المفروشة، وصعد النزوح فشهد له الاجتياح، وصعد الندب وشهدت له الارامل،
وصعد بيع الذمم فشهدت له عمارة ساجدة، وصعدت قلة الحيلة وهوان الناس فشهدت لها الامراض، وصعد
التشرد فشهدت له دارفور، وصعد زيف المصالح فشهدت لها اعمال قادة الحركات المسلحة، وصعد النهش
في الاعراض فشهدت له قوالات ومقالات، وصعدت النجاسات فشهد لها فيضان النيل، وصعد الفقر المدقع
فشهدت له مخصصات أولى الأمر، وصعدت مسؤولية الراعي فشهدت لها قوات الامم المتحدة، وصعد اكل مال
الناس بالباطل وشهدت لها جهاز شؤون المغتربين، وصعد الضيم وشهدت له جباية المحليات، وصعد ظلم ذوي القربى فشهد لها النوبيين..
فما تزال البلايا تتصاعد والشواهد تترداف ثقيلة تنوء بحملها السماوات حتى فُــتح لها ابواب تقبل الدعاء مُـشرعاتٍ بلا حُجب.. فإذا ماهمَّ الله بأخذ البري بذنب المسي، والقاصي بذنب الداني، والرعية بذنب الراعي، والغرير بفعائل المترصد القاصد، ودارفور باعمال مسلحيها، والحِـلة بذنب المحلية..
حتى اذا ما كل ذلك...إذا ببهاء الطلعةِ وحسنِ الصورةِ وصفاءِ الفؤادِ يصعدون مصاعد السماء على مهل..جليلاتُ ُ يُـضئن بحُـسنهن ليلَ الصعود الداجي، ويُـزلن بصفائهن آثار غواشي الذنوب العالقة بين السماء والأرض.. فاذا بالموكلين بالشواهد عند أبواب التقـبُـل يسالونهم: من يشهدُ لكم من ارضٍ يُـوشك الله ان يحِـق بأهلها العذاب من أفعال مترفيها؟!
فاذا بـ(سناء) بطلعتهامثل ماذكر، وصورتها مثل ماذكر، وفؤادهامثل ماذكر.. تقوم فتشهد..
فشفع البهاء والأُبهة والفؤاد الصافي في كل ماسبق فغفر الله للمذنب و المسي والجائر والظالم فيوض رحمةٍ من لدن الرحمن الرحيم.. وسناء جوهرة النفس النفيسة وصفاء نية الناس..وابداع الخالق في خلقه..
تُـدير سناء مشروع حياة للاخرين بوجودها حية على ظهر الخرطوم .. وماتزال البلاد في خير الله العميم ماظلت سناء ظليلة بلطفها، حيية بخُـلقها، اميرة بحسن طلعتها، وفاضلة تحث الناس وتذكرهم بفضائل المعروف المنسية بين الخلق.. قال حفدة مادحي الرسول الكريم بجهات كدباس: (بت الصالحين جدها مرق من جهات شندي.. وجدتها لي امها جات من صعيد مصر مع جيوش الترك) وقال شيخ من طابت عبد المحمود: (البلا مابجي حدانا .. متروسين بي صالحة يت صالحين ..عترة من جهات الباب العالي ). العارفون فقط يعلمون ان سعيها بين اهل الخرطوم رحمةً ونعمة .. ادركوا ان فضل وجودها نجدةُ ُمن عند الله المنجد واهب النعم بلا حصر ولاعدد .. رحمة باذخة قد وسعت كل شي .. فالحمد لله على سناء النفس المعمورة...
احمدوه على وجودها يزدكم طولا في الاعمار .. وتخيروا الحلال ثم اسألوه السلامة يستجب لكم..
... يا عزيز ياعزيز يا إنتا، State Of The Union ماعارف العلاقة شنو الخلّتني استدعى (خطاب حالة الإتحاد) لمّن قريت (أحوال زوالك)؟! في الثلاثاء الأخير من يناير كل عام يحرص (ساكن البيت الأبيض) على تنوير قطاعات وجماهير شعبه بالحاصل، يحكي ليهم بي إنجازاته وخططه وطموحاته.. طبعاً الخطاب ده بقت الدنيا والعالمين تننتظره لأنه مؤشر لي شكل السياسة الأمريكية في العام المنتظر.. وبديهي بيلقى بي ظلاله على شكل السياسة العالمية في مجملها، من جانبي ما لقيت تلخيص أوفى وأوعى للراهن السوداني من جميل نثرك هنا، أرشّحه لي ناس (خطاب الإتحاد) عندنا كموجز ضاف للوضع في السودان، طبعاً ده في حال افترضنا جدلاً وجود خطاب، وصحّت كذلك فرضية إنو عندنا اتحاد!!
Quote: صعد اول ما صعد من ليل الخرطوم الظلم وشهدت له الاحوال،ثم صعدالذل فشهد له الاضطرار، وصعد القهر فشهد له اليتامى، وصعد التسول فشهد له السوق العربي، وصعدت الرشوة فشهد لها القطاع الحكومي، وصعد الخوف فشهد له البوليس في الشوارع، وصعد الضنك فشهد له الإعراض عن ذكرِ الله، وصعد الفُـسقُ فشهدت له الشقق المفروشة، وصعد النزوح فشهد له الاجتياح، وصعد الندب وشهدت له الارامل، وصعد بيع الذمم فشهدت له عمارة ساجدة، وصعدت قلة الحيلة وهوان الناس فشهدت لها الامراض، وصعد التشرد فشهدت له دارفور، وصعد زيف المصالح فشهدت لها اعمال قادة الحركات المسلحة، وصعد النهش في الاعراض فشهدت له قوالات ومقالات، وصعدت النجاسات فشهد لها فيضان النيل، وصعد الفقر المدقع فشهدت له مخصصات أولى الأمر، وصعدت مسؤولية الراعي فشهدت لها قوات الامم المتحدة، وصعد اكل مال الناس بالباطل وشهدت لها جهاز شؤون المغتربين، وصعد الضيم وشهدت له جباية المحليات، وصعد ظلم ذوي القربى فشهد لها النوبيين..
Quote: تُـدير سناء مشروع حياة للاخرين بوجودها حية على ظهر الخرطوم .. وماتزال البلاد في خير الله العميم ماظلت سناء ظليلة بلطفها، حيية بخُـلقها، اميرة بحسن طلعتها، وفاضلة تحث الناس وتذكرهم بفضائل المعروف المنسية بين الخلق.. قال حفدة مادحي الرسول الكريم بجهات كدباس: (بت الصالحين جدها مرق من جهات شندي.. وجدتها لي امها جات من صعيد مصر مع جيوش الترك) وقال شيخ من طابت عبد المحمود: (البلا مابجي حدانا .. متروسين بي صالحة يت صالحين ..عترة من جهات الباب العالي ). العارفون فقط يعلمون ان سعيها بين اهل الخرطوم رحمةً ونعمة .. ادركوا ان فضل وجودها نجدةُ ُمن عند الله المنجد واهب النعم بلا حصر ولاعدد .. رحمة باذخة قد وسعت كل شي .. فالحمد لله على سناء النفس المعمورة...
تعرف يا حبيب مشكلةالبلد الاقتصادية دي قديمة قدم ميلادي .. لامن مرقنا منها مرقنا عشان نعالج مشاكل اهلنا الاقتصادية ..وانا بها زعيم .. وكنا حتى اواخر هذا العام بنرسل بي انتظام وامورهم في الشمالية ماشة وفي الخرطوم ماشة.. ليس مهما كم ترسل ولكن المهم ان يظلو في خير.. اها في آخر اجازة مشيتها تطورت مشاكل الاهل فبقت اقتصادية وامنية.. وفقدنا قريبتنا في احداث الاتنين لا ايد لاكراع ..
فاصابني القنوط الاقتصادية وقنا بنحلها بي التحويلات .. اها الاشكال الامني ده احول ليهم مسدسات ؟ ولا ارجع احرسهم بي ضراع إن اغنت فبالغت فلن تغني طويلا في بلد بها اربعين مليشيا مسلحة؟!
خدر مسميك ( دكين الوغد ) وهو رجل صاحب كرامات .. و ما بيتكلم ساكت .. مكشوف عنو الحجاب .. و تمبس بيرتكب فيك ما أعطاه الله من نعوت .. و ما اختلف حول مخالفتك نفر . و الموت مع الجماعة عرس .. يا وغد
و أنا قلت عليك في أحوال النوار ( ........................ ) دحين يا دكين .. كيف الدبارة مع جنس سناءك دي ؟ نقوم جارين يعني ؟؟ و كتاباتك طاعمة ( طاعمة دي صديق الموج بيقراها شيتا كعب خلاس ) .. و بتفلق بيها مرات لما الواحد يلبد ..
ياخي إنت زول حلو .. ( و سنويتك ) عسل ..
Quote: دكين اوعى يكون بتقصد التركين افييييييييييييييييييييييييييييييييى!!
ياخي دي اكلة عمرها سبعة الف سنة.. اقدم اكلة في وادي النيل ..
قالو واحد قريبنا ماكل تركين خشى الشركة وسلم ليهو على لبناني.. اها اللبناني بعد السلام قام شمى ريحة يدو لقاها صعبة خلاص قام عاين لي قريبنا ده بي دهشة وقال ليهو :
ياخي حاول طور الفاظك دي شوية سافل دي انتا مرقتها لي من وين؟؟
بعدين يا حبيب سنوية دي لو كنتا مشيت عليها كانت كسرت ليك ارنبة انفك العاجبك ده.. شايف روحك ورافع نخرتك في شان شنو انا ماعارف..
ياحبة دي شي كده خليط بين ناس السي ديهات وناس الصور ... مابين الرياض وشمبات.. مابين قانون واقتصاد.. مابين الازرق والابيض.. مابين هذا وذاك... انها سناء ..
Quote: بالمناسبة هذه السناء تحب الماكولات البحرية .. ماعندك لينا اخطبوط على شرف محبتها دي؟؟
لك ولسناءك ما تشاء من المأكولات البحرية والبرية والبرمائية زاتو، كدي تعال ممكن نضبح ليك تنقو زاتو بمناسبة سناء دي ... تتخيل كان حيغرق الأسبوع الفات في البحر، والأسبوع القبلو زكاه سرب سمك السمكة الواحدة قدر الكريسيدا، فبدل تاكلو الأسماك نضبحو ليكم ونعمل كوارع ولا شنو يا حمد؟
والله بوستك عجبني شديد وقلت أرجع لي كلامك المحبوك ده تاني، لكن زي ما شايف ماسك لي موية بي غادي ...
والله بوستك عجبني شديد وقلت أرجع لي كلامك المحبوك ده تاني، لكن زي ما شايف ماسك لي موية بي غادي ... نادر ياخوي ما تسك الشغلةكتير القم البورد بامبرز والموية بتقيف
انتا ياخوي وجود حوتة ده مفترض يكون علمك كيف تترس الموية..
بعدين في ذمتك تنقو ده هسي كان اديتو احرف جزار بمرق منو ربع كيلو؟؟ والله من يوم طهروا وشالو الجلد دفنوهو تنقو ده تاني مافضلت فيهو لحمة حايمة..
عمر الفاروق تعرف يا مان اجمل حاجة لمن يكون الكاتب ود حلة ساي .. دي مشكلتك يا عمر انك فاكرني زول ود حلة وبتاع عمدان وضللة .. ياخوي انا ودعز والعز ذاتو فايتنو بي غادي.. اوع تظن اني جيت هنا محتاج..انا حرم غربتي دي ترف ساي ..
والدكاكين دي ماسمعنا بيها إلا من عندكم.. انحنا حاجاتنا كنا بنجيبا بي الاسبوع يا حبيب .. قال ود حلة قال؟؟ سجمي
نادوس
المحبات دي ياحبيب تعال نديك منها مامقداره جبل مندرة.. وزع لي جكس قطر معاك بلاي
ونات سيد العارفين من النادر جداً ان يتظارف الضكر مع الضكر وما بالك إن كان الضكر الاخر دكين !!!!!
Quote: لكن حرم من المعمورة ..
Quote: كنتا خايف ماالقى زول يفهم الحتة دي .. بس الله جابك يافهيم.. كتلتها كتل..
تعرف يا مان اجمل حاجة لمن يكون الكاتب ود حلة ساي .. والاجمل لمن يكون القارئ برضو ود حلة ساي ... بيكون من الساهل جداً ان يفهم ود الحلة ود الحلة وإن إختلفت(الحلل).. فكلاهما بيكون من النوع الكان بيقضي نص يومو في ضللة الحلة واركان الدكاكين يلعب الكونكان والضمنة وغالبية ليله بيشرح لي بنات الحلة الممتحنات شهادة وما بين حفلات الحلة والصف الخلفي ورحول الجيران الجدد وتنزيل العفش لنيل عاطفة البت الوسطانية وما بين الزوغان من دفع الشيرنق لشراء كفر موزة ثم الحضور اول زول للتمرين .. وقمة البيضنة تكمن في جلسة يتوسطها قلم الرصاص وورقة من نص كراس العربي مطبوقة نصين ومكتوب فيها اسماء بنات واولاد الحلة والسبب رحلة مزمع قيامها للفكي هاشم بمناسبة اللا مناسبة ومسكين هو شم النسيم الذي نرمي عليه الاعذار ابتقاء مرضاة ولي الامر.. وما الذ فتح التلاتة زراير الفوق مع ربط القميص من تحت وتجنيح اليدين وانت ماشي وتساعدا بي كم كلمة كده وانت بتسلم شنو يا مان ووين يا حبيبو وكيف يا بشكة وإزيك يا حنين وجيب سفة وفك النفس .. وقمة التعاون لمن كل واحد يشتت البيت ويجي طالع بعد شوية في يدو بصلة والتاني معاهو باقي عيش بايت ليأتي الحنفولي بي علبة الساردين والجبنة ويتربع سيد الدكان الذي يكون غالباً شاب في سنكم صاحبتوهو لشئ في نفس يعقوب فيتكفل بي موية الفول وصناديق الكولا للجلوس عليها مع شوال خيش وبي كده الفطور طلع ...
ياخ دا من شدة ما ناشف كوراعو زاتا ما اظن فيها فايدة ،،،،، ركز في الود بدري الايام دي انتا ما شايفو جا من السودان سمين و تريان كيف بكون دهين و بطلع كوارع زي الناس
Quote: شايف روحك ورافع نخرتك في شان شنو انا ماعارف..
يا سافل بلاهي لسه ما عرفتا نخرتي مرفوعة في شان شنو ؟؟؟ النخرة هينة اوع من باقي البيارق التانية المرفوعة تهبشك
Quote: تولوس توي خبرتك في الرياض مابطالة اوعى تمرق من هنا ونحنا ماجايبين خبر؟؟
اعمل نايم لو من هنا ..حرم نجي نكسر ركبةعدييييييييييييييل
حبابك عشرة يا شيخي دكين لو جيتنا جاتنا البركة زاتوو امس كنت في الخبر وعملت تلفون لي صاحبك وكتر خيرو عزمني عشاء(فول) والمرة الجاية جاييك عديل كده و صايم معاكت الشهر الفضيل
بس اوعي تفطرني برحي وموية زرقاء وتقول لي ده شغل شيوخ وصيام ناس ام سبحة لالوبة
تخيلي سناء دي مافايتاك كتير.. شكلك برضو صالحة بت صالحين قبيل وان داخل حديقة جنب القراش الملكي جيتي في بالي وفجاة لقيت صحبتك العاملة زي الوزينة ديك قدامي ... يشهد الله انا لامن قتا مدد يا بت ابو الشام.. يعني الواحد بس تجي في بالو تقوم تجي إشارات.. ويالها من اشارات حلوة..
معزومة فطور رمضان اول خميس بيت ناس آل عمران تعالي اظبتي لينا تركين مع ام حمودي .. وقطعي لي الطماطم في شكل قلوب ..
منذ برهة كده من اسبوعين اكلت اكلة كاربة ما بعرف اسمها شنو غايتو بس كانت عبارة عن حاجات كده لذيذة مع بعض، لو حبيت ممكن اشوف ليك طريقة عملها وبقوم اكلمك تعلمها (براااااك)...
شكراً شيخنا العارف بالله دكين .. على هذا البهاء والسناء الذي يذهب بالإبصار وخلي سناء تنداح لتلملم شعث الوطن الممزق .. وسنكلم الخال حمزاوي ليحكم إغلاق الطريق الفوق "أعلى الخارطة" وهو بهذا (زعيم) ..
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
الفاتح وديدي
تولوس
Sidig Rahama Elnour
معروف حمدين
عمر الفاروق
ابو جهينة
Elawad Eltayeb
صديق الموج
Emad Abdulla
) عسل ..
عبد الله عقيد
Bakhaf
حمد فتح الرحمن
ناصر محمد خليل
معتصم دفع الله
nadus2000
عمران حسن صالح
AlRa7mabi
saif massad ali
Saifeldin Gibreel
شرووم
Mohamed Abdelgaleel
فيصل نوبي
انستقرام
يوتيوب
بنتيريست