دعواتكم لزميلنا المفكر د.الباقر العفيف بالشفاء العاجل
|
|
 كيف أحوالكم ... بعد إفطار اليوم الأول من رمضان الكريم
|
دروخة ... نعاس ... وجع راس ,
المكيفات عملت عمايلا طبعا ,
العادات اليومية تغيرت بشكل درامي ,
إجتماع أهل البيت حول مائدة الإفطار
وفي توقيت نادر ما يجتمع فيه شمل الأسرة .
ومن قبل بالطبع تم الإعتقال التحفظي للشواطين
وفتحت القلوب أبواب العبادة والرحمة .
كان يوما طويلا كما عقابات الصيف فى البلاد الباردة .
وكانت الأحاسيس شاردة إلى بلادنا , فكل يومي كنت
أفكر كيف يعود عليهم رمضان هذه المرة ... وهل ما
تزال شمسهم تتدلى على الرءوس منذ السابعة صباحا ,
وكيف سيقضون وقتهم وماذا سوف يأكلون ويشربون .
كما إستحضرت بالمقابل المساق الإجتماعي الرمضاني
حيث الموائد الجماعية والونسة والإستغفارت والصلوات
وأحاديث رمضان وأطعمة رمضان وألعاب رمضان
وسحور رمضان ... وكل الصورة تعلقت بذهني .
فى منفانا ... هو فقط عبادة ... والحمد لله ... فطرنا
دون مشاركة أهل ولا صحاب ... ودون حلومر ودون
قراريص تهجر المعدة ... والله يقبل .
كده نتونس شوية ... ونشوف رأي القراء
|
|
 
|
|
|
|
|
|
|
|
Re: كيف أحوالكم ... بعد إفطار اليوم الأول من رمضان الكريم (Re: صلاح شعيب)
|
سلامات يا حيدر
بس نعاس وصداع
حاجة غريبة،، البيت أميل إلى الهدوء
ما عدا صوت (العيال)
معز لم يستطع تناول إفطاره حتى،، بلحة وكوب من الشوربة
وصلاة مغرب، ثم نام
أمه وأمي آمنه وألعم هاشم ايضا
لو ما العيال، كان أكون برضو في سابع نومة
رمضان كريم يا حيدر عليك
وعلى الأسرة الرائعة الكريمة
ودي
غادة
| |
|
|
|
|
|
|
|
|
|
Re: كيف أحوالكم ... بعد إفطار اليوم الأول من رمضان الكريم (Re: HAYDER GASIM)
|
العزيزة ... غادة ... كيفنك
تصومي وتفطري على خير ... وكل أسرتكم الكريمة
قلت لي:
أشترك معك فى كلاهما وأضيف الدروخة , والتي أظنها
تخص الرجال لحد كبير و { عمايلهم } ذات الوصل بالمكيفات .
يقال أن النوم بعد الإفطار غير موصى به طبيا , فأقله يربك بقية
اليوم وربما يستيغظ النائم فى وقت لن يستطيع بعده أن ينام , كما
ليس فى الإمكان كذلك أن يظل صايحا حتى صباح اليوم التالي ,
إذن أخليك فى الحتة ده ... عشان تمشي تصحي معز وتناوليهو
فطوره المتأخر ... ولو حبيتي تجينا راجعة تاني فمرحب بيك ,
فنحن الليلة حدنا السحور ... ودلاليكنا جاااااااااهزة .
معاي أسع صديقي صلاح شعيب وطالب قهوة مدنكلة , كده النمشي
أتبنا قبل ما تفور ونعدم { وش الجبنة }
مع مودتي
| |
|
|
|
|
|
|
|
|
|
Re: كيف أحوالكم ... بعد إفطار اليوم الأول من رمضان الكريم (Re: HAYDER GASIM)
|
أستاذ .. حيدر
رمضان كريم وتصوم وتفطر على خير .
اليوم الأول ، الجو كويس جداً لكن الساعة سبعة دى بقت بعيدة، والفطور فى الشغل
ماعندو طعم ، خمسطاشر دقيقة وترجع تانى للموال، لحدى الساعة تمانية.
غايتو قسمتها خمسة دقائق صلاة و عشرة لسجارة الفطور، و الساندويتش فى اليد.
ربنا يرجعنا و نفطر فى السودان ، بره فى الضراء البروش مفرشة فى الشوارع
و النفوس متطايبة.
والبلد تكون إستقرت يارب.
و سلام ،،
| |
|
|
|
|
|
|
|
|
|
Re: كيف أحوالكم ... بعد إفطار اليوم الأول من رمضان الكريم (Re: امبدويات)
|
Quote: والله يا حيدر
اليوم طويل بالحيل الشمس التقول مربوطه فى امريكا دى وبعدين كمان
المعافره هنا كتيره ومسيخه
الافطار اليوم الاول كان الساعه 7.20 دقيقه
بتوقيت Alexandria VA
وانشاءالله رمضان السنه الجايه فى البلد كان
بقينا فى ضهر الدنيا
سلام ورمضان كريم لكل ابنا بلادى فى كل بلدان
المهاجر . |
عتمان موسى ... كيفنك
كلامك صاح ... الوكت فعلا طويل , لكن قالوا
{النقة} فى الحاجات ده بتفسد الصيام , فأجعله اللهم
أجرا ... وسلام .
بعدين تختار ياتوا ... أربعطاشر ساعة صيام فى
أمريكا ول تلطاشر ساعة صيام فى السودان ؟؟؟
المهم يا حبيب ... كرب الفطور ... والباقي ونسة .
مع مودتي
| |
|
|
|
|
|
|
|
|
|
Re: كيف أحوالكم ... بعد إفطار اليوم الأول من رمضان الكريم (Re: HAYDER GASIM)
|
أخي عبدالرحمن عزاز ... سلامي وأشواقي
والبركة فى رمضان الجابك لينا ... الظاهر
الزنقة حاصلة ... لكن أهو ده الحياة .
ما عجبني حالك فى أول أيام رمضان , فطور
مجهجه وخارج السياق الإجتماعي لرمضان
الذي نعرفه , لكن الظروف تجبر الناس على
ذلك وإن شاء تلقى حظك مع نفسك والناس
فى مقبل الأيام ... حصلت لي ذات الظروف
السنة الماضية , وربما تجبرني كذلك على
أيام من هذه السنة برضو ... لكن إتعودنا
على الملطشة وعلى معايشة الظروف
الإستثنائية .
كنا دايرين نكرم مثواك بي كورة حلومر
لكن شايف غادة مقدمة للناس شاي , فأختار.
تصوم وتفطر على خير
مع مودتي
| |
|
|
|
|
|
|
|
|
|
Re: كيف أحوالكم ... بعد إفطار اليوم الأول من رمضان الكريم (Re: حيدر حسن ميرغني)
|
سميي ... وصديق الناس الطيبين ... حيدر حسن
تسلم ... وإدوم ودك
رمضان كررررررريم ... فهو يجمعنا على الشتات ,
ويقرب النفوس والأحاسيس ... ما كان الصدق عنوانا.
فلنهنأ بهذه اللحظات الروحية العالية فى خضم أمواج
الحياة المتعبة التي نعيشها اليوم ... وأسترخي عزيزي
على دبيب { تلك السفة } وأخلع عن نفسك أردية الهموم
... ونم فى هدوء ... ريثما تمسح الشمس وجهها { اللاظي }
لتطل علينا فى يوم نسمية جديدا ... بينما الشمس هي هي .
ما تنسى السحور ... وإن تجأر المعدة بالشكوى من طعام
أنصاص الليالي ... لكنه الدخري لنهار مستحق .
تصوم على خير ... وتفطر عليه .
مع مودتي
| |
|
|
|
|
|
|
|
|
 Re: كيف أحوالكم ... بعد إفطار اليوم الأول من رمضان الكريم (Re: HAYDER GASIM)
|
طبعا اليوم قهوة الصباح الفطيناها ظهر مفعولها وأبتداء من الساعة 2ظهرا توقف الرأس عن التفكير ... صليت العصر ثم نومة عميقة بالجامع بعد الصلاة أنتهت مع أذان المغرب .. فإذا بالجامع يعج بالعزابة من المفرب ومصر وكثير من البلاد العربية .. فالجامع هو الملاز في رمضان لكل العزابة .. هربا من أكل المطاعم المسيخة ...
كالعادة وكل رمضان يتم وضع جدول خالي بلوحة الأعلانات وسرعان ما يتمتلى الجدول بأسماء من تطوعوا لعمل الولائم فهذا يوم فلان والأخر محجوز لعلان ..
الطعام مجود .. من مختلف البلاد الأسلامية .. شئ باكستاني شئ مصري . يوم جزائرى .. يوم مغربي
ما أسهل رمضان في هذه البلاد فاليوم كله يروح شغل ولا وقت للشعور بالجوع
ورمضان كريم وكل عام وأنتم بخير
| |
|
|
|
|
|
|
|
|
|
Re: كيف أحوالكم ... بعد إفطار اليوم الأول من رمضان الكريم (Re: HAYDER GASIM)
|
الاخ حيدر و كل الزائرين و الزائرات ..
كل رمضان و انتم بألف خير
رمضان هذا العام (معى) جاء بإحساس غير عادى .. أعاده الله علينا جميعا بالبركات و الطيبات ..
جاءنى من أخى المهندس عبد الفتاح فضل الله إيميل تهنئة بالشهر الفضيل و به مرفق ..
كلمات بسيطة نبهتى لأشياء أخذتنى منها زحمة الحياة ..
Quote: 1- أنت و الصلاة : الحرص علي الفريضة علي وقتها في جماعه – يفضل في المسجد – يساوي 100,000 (مئة ألف) حسنة في ليوم الواحد أو 3,000,000 (ثلاثة ملايين) حسنة طوال شهر رمضان !!!!
النوافل : الحرص علي 12 ركعة في اليوم : 2 قبل الفجر , 6 حول الظهر , 2 بعد المغرب و 2 بعد العشاء يبنى لك بها قصر في الجنة في غير رمضان بنص حديث الرسول – صلي الله عليه و سلم - فما بالك بالحرص عليها في رمضان.
2- أنت و القرآن: كل حرف بحسنة و الحسنة بعشر أمثالها و في رمضان بسبعين ضعفًا، إذن قراءة الجزء الواحد = 4 مليون حسنة تقريبًا، فكيف لعاقل أن لا يقرأ جزءًا علي الأقل يوميًا لتحقيق هذا الثواب غير العادي ؟؟ و لم لا نجتهد و نقرأ جزئين يوميًا ( بعد الفجر و قبل النوم مثلا ) لنختم مرتين ؟؟
3- أنت و الصدقة: بسبعين ضعفًا في رمضان و هي تطفئ غضب الله على العبد، خصص مبلغًا معينًا تتصدق به كل يوم و سترى لهذا أثرًا رائعًا في حياتك.
4- أنت و التراويح: الحرص عليها أفضل من تضييع وقت رمضان الثمين المليء بنفحات الله في التمثيليات و الفوازير و غيرها من مضيعات الوقت و حاول إن استطعت أن تصلي في مسجد يقرأ بجزء يوميًا لتضاعف من ثواب القرآن اليومي.
5- أنت و صلة الأرحام: و ابدأ بمن بينك و بينه خلافات و كن أفضل منه فلن يقبل الله صيامًا من مسلمَيْنِ بينهما مشاحنات أو عداوة. |
أسأل الله لنا جميعا الخير .. و أن تدوم المحبة و الإخاء ..
الاخت غادة : تحياتى لأبيك و كل الاسرة ..و كل عام و أنتم بألف خير
أخى حيدر ...
شكرا على السؤال .. ذكرتنا بأهلنا الحنان ..
و رد الله غربتنا جميعا .. و نسأله ببركات هذا الشهر ..
( أن نرى ..وطنا يجمعنا )
لكم مودتى
| |
|
|
|
|
|
|
|
|
|
Re: كيف أحوالكم ... بعد إفطار اليوم الأول من رمضان الكريم (Re: اسعد الريفى)
|
الفاضل حيدر وضيوفه الكرام..
رمضان كريم وتصوموا وتفطروا على خير..
يومي أمبارح كان زحمة في الشغل وإفتقدنا الشاي والقهوة والعصير الكنت عايشة عليه تقريبا..
لكن الصباح وحوالي الساعة 10 جاني تلفون من صديقة سودانية تعمل وتعيش هنا في عمان مع أسرتها أن أتفضل لأفطر معاهم..
وفعلا مشيت وفطرتا بعصيدة وملاح تقلية.. وطبعا الحاجات التانية الكانت خاتها ولا زول هبشها..
لي أكتر من 9 شهور ما أكلتا عصيدة.. وما صدقتا
رجعت لبيتي ولوحدتي وإتسليت شوية بالتلفزيون وشوية في بوست هنا (أنتيكة) لغاية ما قرًب وكت السحور.. أكلت الـ (ريزو) الكنت جايباهو وشربتا عصير أناناس (بديلا للحلو مر وكده).. ومشيت نمتا
الليلة إجازة.. وشكله كده اليوم طويل..
من هسع حاسة بالعطش والجوع..
لما الساعة تجي 5 ح أمشي ناس غادة نوري عازمني فطور..
ودي
| |
|
|
|
|
|
|
|
|
 Re: كيف أحوالكم ... بعد إفطار اليوم الأول من رمضان الكريم (Re: HAYDER GASIM)
|
كل سنة و أنت طيب أخي الحبيب حيدر و كل المداخلين
أول يوم افتقدت القهوة و الشاي
..
بعد الفطور
بسرعة شاي بالغرنجال
ثم قهوة بالجنزبيل
وشوية تأنيب لروحي لأني نسيت ما مرقتا سلطة الروب ساعة الفطور
الغريبة أول رمضان ما نمرق بعد الفطور قعدنا في البيت
وأول رمضان أمي و أبوي يكونو مسافرين ما نفطر كلنا سوا ويمكن للسبب دة ما كان في نفس للمرقة
| |
|
|
|
|
|
|
|
|
|
Re: كيف أحوالكم ... بعد إفطار اليوم الأول من رمضان الكريم (Re: lana mahdi)
|
الاخ حيدر والمتداخلون
رمضان كريم وتقبل الله الصيام
أما انا حأبدا ليكم من السحور اللي هو عندنا شاي بي حليب قبل الصبح بشوية (ضروري جدا)
مبارية سودانيز اونلاين نمت واحدة ونص صباحا وظبطت الموبايل على تلاتة ونص
تلاتة ونص قمت قفلتو وواصلتا ما صحاني تاني الا الاذان.
انا غايتو الحمد لله ما فرق معاي لكن ابو العيال الكان متكل على الله وعليّ حلل الصيام بالبانادول 
لما المغرب اذن قرب يغمى علي الحكاية لسة جديدة والتوقيت لسة ما وقع ليّ اتفاجأت لي درجة انه الحاجات السويتها للفطور كلها طارت لي بقيت كلما اتذكر شي اجري اجيبو والفطور تم بالقطاعي.
لكن غايتو الحمد لله ما كان في ضيوف فكانت بروفة كويسة لي يوم الليلة عشان خلاص العوازيم حتبدأ وحأحاول الليلة ما اطبِّق فيهم نظرية امبارح.
شَيْماء
| |
|
|
|
|
|
|
|
|
|
Re: كيف أحوالكم ... بعد إفطار اليوم الأول من رمضان الكريم (Re: HAYDER GASIM)
|
الاخ حيدر
سلام ورمضان كريم
اليوم الاول كان طويل جدا الفطور عندنا فى هولندا الساعه 8:04
يعنى بصوم 14 ساعه
كنا شغاليين انا والكاشف اخوى)ابومهند وطبعا هو حالته كانت صعبه بعدم التدخين والقهوه
لمن رجعنا البيت تانى انتظرنا 3 ساعات عشان نفطر..
عملنا الفطور سوا وعلينا كبكبه ورجفه مبالغه اي شئ تشيلو يقع من يدك
ملينا التربيزه اكل وما اكلنا غير الشوربه والفول.. عصيده وملاح ما عملنا
عشان كدا كان الاكل بايخ
انا حسى فى الشغل وبرجع بدرى وطوالى على حلة العصيده
اليوم الاول بصراحه كان طوييييييييل , لكن مافى جوع بس زنه فى الرس من عدم الشاى
تحياتى
حليمه
| |
|
|
|
|
|
|
|
|
|
Re: كيف أحوالكم ... بعد إفطار اليوم الأول من رمضان الكريم (Re: طارق جبريل)
|
الاخ الحبيب
حيدر قاسم
رمضان كريم وتقبل الله منا ومنكم الطاعات
فى الصحافة كنا بنفطر جنب البيت ايام العز والدينا بخير
وكل ناس مربع فى الصحافة عندهم بيت معين بيفرشوا (البرش)
واللمه كريمة واللقمة تكفى ميه والمارى يسلم ويفطر معنا
والمدفع طرب (والشيخ صديق احمد حمدون) يؤذن للمغرب بصوته
الحنون والبطون فى المويه والحلو مر والابرى الابيض وما زول بياكل
حاجة الا بعد الصلاة ..
هسع فى الغربة الحبسة البيت والفطور بالعيون ما بالنفوس
الاكله السودانية معدومة من حريم الزمن دا المابيعرفوا يعوسوا
الكسرة ولا القراصة ولا يعملوا ملاح الشرموط والتقليه ..
الفطور همبرجر ومكرونه بالبشمل والتحليه ام على وكوتيل حاجة كدا
واللهم انى صائم
ود حجر
| |
|
|
|
|
|
|
|
|
|
Re: كيف أحوالكم ... بعد إفطار اليوم الأول من رمضان الكريم (Re: HAYDER GASIM)
|
Quote: اليوم الاول صداع مستمر حتى اليوم الثاني
لكن بدأت في التوازن والصداع الان احسن حالا وفرصة نقلل التدخين
ورمضان داخل اواجه امتحانات الكلية
وربنا يسهل
مودتي لك وللاسرة |
شكرا عزيزنا خالد العبيد ...
تجربة أخرى من ركن آخر من هذه الدنيا ,
صائم من أستراليا ... ونفس المشتركات ,
الصداع والخرم , وربما تكون نفس الأطعمة
هنا وهناك ... أو هكذا فنحن ننقل المائدة السودانية
إلى فضاءآت عالمية ... كما ننقل كذلك مشاعر
إنسانية ودينية وإجتماعية غير مطروقة .
الله إقدرك يا أخوي طالما إمتحاناتك على الأبواب ,
فربما بركات رمضان تقيم لك راية الفلاح .
مع مودتي وتحياتي للعيال
| |
|
|
|
|
|
|
|
|
|
Re: كيف أحوالكم ... بعد إفطار اليوم الأول من رمضان الكريم (Re: Alsa7afa_30)
|
Quote: رمضان خش في العضم( من اول يوم)
الله يحضرنا آخره........ |
أخوي الصغير ... عمر عثمان التوم
رمضانك كريم
قلت لي: Quote: رمضان خش في العضم( من اول يوم)
الله يحضرنا آخره........ |
ضحكتني لاكين ... وإنت حالك الصبي ومانحن نقول شنو .
تعرف يا عمر ليس من الصعوبة أن يتوغل رمضان مباشرة
للعضم ومن أول يوم ... فالإنسان السوداني مشوشو ومقلي
بنار الله الموقدة أينما حل ... إنتزعت لحومنا وشحومنا
الأقدار اللعينة وهي تفرد البؤس والشقاء والجراح والفراق
على أهل السودان ... ثم ترمي بنا في أركان الدنيا القصية,
فنحن بهذا فى صيام أصبح دائما عن بلدنا وأهلنا وأحبابنا ,
غايتو يا أخوي المغسة ضاربانا ... لكن أحسن نخلى موضوعنا
رمضان ... بحثا أمينا عن الإسترخاء الروحي وطلبا عزيزا
للمغفرة ... وإجتماعا أسريا سودانيا فاخرا ... ومشرفا .
مع مودتي
| |
|
|
|
|
|
|
|
|
|
Re: كيف أحوالكم ... بعد إفطار اليوم الأول من رمضان الكريم (Re: على عمر على)
|
الاخ العزيز حيدر
انشاء الله الصيام بعد مرور يومين بقى اسهل
الليلة اليوم التالت ومع اذان الفجر
قلت: كدة كملنا عُشر الشهر
فقال: ذكرتيني واحد متجررررس من الصيام اول يوم في رمضان قال يااااااااااااااااااحليلك يا رمضان باقيلك عشرتين وتسعة
Quote: هو أرجو ممن تعجبه طريقة معنية لعمل { شوربة } أن
يعلمنا بها هنا .. |
في كم طريقة من الشوربات لكن انا حأوصف ليك الألذ طعما بالنسبة لي ولو عاوز غيرها بس شاور:
بعد عمل اي شوربة بالدجاج او اللحم أو الخضارات (دي طبعا معروفة سلق اللحمة مع بصل وجزر وبطاطسة وبهارات ، أو سلق خضارات بس) يُبل مقدار نص كوب الشاي من الشعير (المعلّب) زي ساعة او اتنين وتصفى شوربة اللحمة وتضع الشعير يغلي معاها في نار هادية زي نص ساعة بتبقى تقيلة بعض الشي وطعمها رووووووووعة عشان طعم الشعير وما تنسى الليمون في الآخر (ناس السودان طبعا عندهم شعير مطحون ودة اسهل ما بيحتاج يتبل)
وبالهناء والشفاء
شَيْماء
| |
|
|
|
|
|
|
|
|
|
Re: كيف أحوالكم ... بعد إفطار اليوم الأول من رمضان الكريم (Re: اساسي)
|
حيدر وضيوفه الجرسة ..
كيف أصبحتو..؟
Quote: يا أخوان قبلما نواصل فى الونسة عندي طلب سغينون,
هو أرجو ممن تعجبه طريقة معنية لعمل {شوربة} أن
يعلمنا بها هنا ... وأتوخي مشاركة أرفع من البنات, دون
قمط العزابة رأيهم {فحقوق الطهي محفوظة}.. يعني
ورينا إسم الشوربة التي تحب وطريقة عملها ما أمكن. |
هاك الوصفة دي لشوربة عدس بالطريقة المغربية.. هسع يجيني عوض جبريل. أوبس طارق جبريل ..
المقادير:
- 100 جرام عدس بتاعنا الأصفر - وربع كيلو لحم عجالي معاهو عضمو - بصلتين وبطاطسايتين وجزرتين - زيت وشمار اخضر وفلفل وملح وليمون وموية..
طريقة التحضير:
أول شئ نخت العدس في موية مغلية لمدة ربع ساعة.. ونقطع اللحم والبصل والخضار لقطع صغيرة.
نخت الحلة في النار ونكب الزيت لغاية ما يقلي نخت اللحم والبصل ونقلب لمدة 10 دقايق ونضيف الفلفل الأسود واللتر ونص موية.
نخلي اللحم ينضج على نار هادية. وبعدين نصفي العدس من الموية المغلية ونضيفه للحم عشان ينجضوا مع بعض لمدة ساعة.
بعد داك نضيف الجزر والبطاطس عشان ينجضوا معاهم. ولو لقيت في حاجة للموية زيد قدر مناسب بشرط إنو الموية المضافة تكون ساخنة.
لما ينضج الخليط ده كله.. نطلع اللحم والعضم.. ونفرزهم. ونخلط العدس والخضار في الخلاط..
نرجع الحلة للنار. وبعد كده نضيف الملح حسب الطعم.. ونضيف اللحم بدون العضام والشمار الأخضر المفروم (أنا شخصيا ما بريد الشمار ولا البقدونس).. والليمون..
وتغرف للتقديم بالهنا..
الوصفة دي أنا كاتباها في كراسة طبخ عملته. وطبعا منقول من مجلة حواء وكتاب أبلة نظيرة..
تحياتي
| |
|
|
|
|
|
|
|
|
 Re: كيف أحوالكم ... بعد إفطار اليوم الأول من رمضان الكريم (Re: Raja)
|
الاخ حيدر وضيوفه الكرام
رمضان كريم
اليوم الاول بالنسبة لى كان عذاب عدييييييييييييييل كدى، رغم انى بشرب النسكافى مرة واحدة الصباح مع قطعتين بسكويت وهى بمثابة فطورى اللى معتاده عليهو، الا انها عملت فينى عمايل عجيبة لدرجة انى بمرن فى نفسى اخليها.
صداع نصفى والذى كثيرا مايصيبنى، والماعارفين الصداع النصفى الله مايويريه ليهم، شلل كامل
غايتو اليوم الاول عدى بالجلالة، يوم طويل وممل واول حاجة عملتها ساعة الافطار بلعت حبتين ومسحت رأسى بدهان الصينين الساحر حتى شربت لى شوية آبرى وشوربة خضار بعدها نمت نومة أهل الكهف بعدما الله هدى الصغار ينموا..
وكل سنة وانت بخير ياحيدر واسرتك طيبة
| |
|
|
|
|
|
|
|
|
|
Re: كيف أحوالكم ... بعد إفطار اليوم الأول من رمضان الكريم (Re: HAYDER GASIM)
|
رمضان الفات وبالصدفة وفي سيدني
وجدنا لفة حلو مر صغيرة
اشتريناها بي عشرة دولار
عذبناها عذاب !
يعني بليناها وشربنا مويته ذي عشرين مرة لمن قالت الروووب
لمن رحعت من السودان شهر يناير الماضي
جبت معاي حلو مر كتيير
في مطار سيدني تمت مصادرته رغم توسلاتي
وشرحي المتواصل لي بتاع الجمارك عن هذا الحلو مر
وحتى لمن غنيت ليه في الوتر الحساس انو ده حاجة دينية عندنا
برضو ما نفع
وطوالي على برميل القمامة
صدقني ياحيدر قلبي قال شحححح
وطبعا صايمين بدون حلو مر
ويا حليل مرقة المغربية مع الصواني !
| |
|
|
|
|
|
|
|
|
|
Re: كيف أحوالكم ... بعد إفطار اليوم الأول من رمضان الكريم (Re: HAYDER GASIM)
|
أخونا حيدر سلام
طبعا يومين مطششة ما شفت البوست والليلة الطشاش زاد مع قطع الكهرباء من صبحت يا دوب حسع حتين جات عليك الله دي حالة دي. الحمد لله ، خلاصة القول:
اول يوم صداع شدييييد
وتاني يوم حر شديييييد
وتالت يوم قطع كهرباء شديييد
اها ما معروفة مفاجات بعده.
غايتو رمضانا متجدد كل يوم بشكل.
وكان للعصاير ديك ما تديك الدرب قتقليز وكركدي وبرتكان وقريبفروت وحلو مر واناناس وفانتا توت
العصاير دي على حسب مزاج كل واحد في البيت
صفية
| |
|
|
|
|
|
|
|
|
|
Re: كيف أحوالكم ... بعد إفطار اليوم الأول من رمضان الكريم (Re: عاصم ابوبكر حامد)
|
العزيز حيدر قاسم
رمضان كريم
وتصوم وتفطر على خير انت و الاسره
وربنا يتقبل منا جميعا الصيام و القيام ويجعلنا من عتقاء هذا الشهر.
انت قلت اول يوم وانا جاياك ثالث يوم.
يازول فطورك احسن مني مليون مره انا بفطر كباية نسكافي باللبن بحاجه حلوه
ومرات بلح لو جبته .وفي الكمبيوتر كمان
وبعدها بخطف روحي اصلي وارجع باك للكمبيوتر ,وده كله عشان انسى اني بفتقد
لمة رمضان ومأكولات رمضان.
لا اصعب من الوحده بهذه البلاد...وكله كوم واولادنا الماقادرين يعرفوا
رمضان ومأكولاته كوم ثاني.ولما اقول الكمبيوتر طبعا لا اعني سودانيز اون
لاين رغم اني اقعد بها كثيراولكن بيكون عندنا اجتماعات عن طريقه واتصالات
بتلفون الياهو لانه الاراخص,ومع فارق التوقيت وحياتك ناشطي دارفور
شيئ من ليبيا وشيئ من الميدان وافلام عجيبه, قالبين حياتي دراما وطبعا
مع غلاء الاتصالات فلما هم بيتصلوا هم بحمد ربي وما بقدر اقول يا جماعه انا بفطر ولا بتنيل.
فيا غالي حلو مر شنو ورقاق شنو حدنا شنمه في بوستاتكم دي وبوست محمد نور التشادي
بالله يا حيد محمد نور عنده بوست لذيذ مروا عليه لو عندكم زمن
بجيب لك اللينك.
صداع اول يوم بعالجه باني بصحه لآخر قهوه مع آخر دقيقه للامساك
واديها بندول واتكل على الله
لكن زي ما قلت في صداع ما بعد الافطار,وده عايز اثنين بندول او تيلانول زي ما بنقول
هنا في كندا.
تحياتي لكم جميعا
وعن الشوربات امسك في وصفة شيماء
وهو اضافة الكويكر او الشعير الجاهز وماركته اسمها كويكر اي معلقتين منه لاي شوربه بتخليها خرافيه.
وبرجع لك بوصفها لما القى وقت.
| |
|
|
|
|
|
|
|
|
|
Re: كيف أحوالكم ... بعد إفطار اليوم الأول من رمضان الكريم (Re: Tragie Mustafa)
|
أحبائي الكرام :
أسعد الريفي
رجوية
لنا مهدي
شيماء
حليمة 2
طارق جبريل
عيدروس حجر
الصحافة تلاتين
غادة عبدالعزيز
على عمر
رجاء { مرة تانية }
إشراقة مصطفي
خالد العبيد { مرة تانية }
صافية محمد
رجوية { مرة تالثة }
عاصم أبوبكر
وتراجي مصطفي
يا أحلى وألطف الناس , كنت داير أتونس
معاكم وأرد عليكم واحد واحد , بإعتبار أن
يومي السبت هذا هو إجازة , لكن أمبارح
{إسلطت} على رئيستي فى العمل وأدتني
عمل إضافي فى الويك إند , فلن أجد بهذا
مرادي معكم ... بكتب ليكم وأنا في فسحة
صغيرة أسع ده وراجع تاني والله يقدرني
لكن البيت بيتكم والحكاية ونسة وليت أحدكم
يتولى الحضور ردا وإستقبالا للضيوف
... رجوية كيف العرض ده معاك ...
أرجعلكم بعد الفطور بإذنه ,
مع فرحي بكم
وعظيم رغبتي فى مواصلة الحضور
... فهنا مائدة رمضانية ... أي مائدة
كل الناس .
ومودتي
| |
|
|
|
|
|
|
|
|
|
Re: كيف أحوالكم ... بعد إفطار اليوم الأول من رمضان الكريم (Re: HAYDER GASIM)
|
غادة وإشراقة ... وكل الذين سال لعابهم لهذا الصحن الفتي ,
مش كان الصحن ده داير ليهو { خرتة } من الأطراف ولحسة
هنئية للأصبع السعيد ... على الأقل قبل عرضه للإسفير ...
وقد ذكرني ذلك بقصة سالفة , على أيامنا فى وكالة التخطيط ,
وبالطبع كان الغالب هو الفطور الجماعي { أقصد الفطور العادي
مش فطور رمضان } ... كنا شلة تؤدي مهمة ملء البطون سويا ,
ومن الضمن كان أخونا أحمد تحضيري وكذلك الأخ على محمد خير,
وقد إعتدنا على إعداد وتناول وجبة الإفطار فى بوفيه الحكومات المحلية
والتي كانت مجاورة للتخطيط , وكان على قيادة مطبخ الحكومات المحلية
طباخ يدعى محمد ضي ... ومع أن أكله طاعم وخدماته سريعة ... إلا
أنه تعود وبعد توضيب صحن الفول أن يخرطه ويحس ما خرط أمام
ناظرينا ... وقد تكرر ذلك المشهد مرارا حتى أصبح فى حكم العادة ,
إشمئز نوعا أخونا على محمد خير , وطلب من الشلة نصح هذا المحمد
ضي بعدم خرط الصحن ... فتصدى له أخونا تحضيري بلا .. موضحا ,
نحن ذاتو كان ما محمد ضي ده خرط الصحن وحاتكم لا بنشبع ولا بنضوق
للأكل طعم ... فكانت مزحة طواها الزمن في مكانها , ليواصل أخونا محمد
ضي طقوسه الغذائية تلك , حتى قضى الله بالتخطيط أمرا كان مقضيا .
أوعى إكون أقرفتكم ... فيما مقصدي الترويح ... فهنا زاد حبان وله مكان .
| |
|
|
|
|
|
|
|
|
|
Re: كيف أحوالكم ... بعد إفطار اليوم الأول من رمضان الكريم (Re: HAYDER GASIM)
|
| Quote: نبقى بس على الشوربات ولا نخرًم على القطايف والكنافة واللذي منه |
والله يا رجوية الظاهر عليك إيدك طاعمة ,
خايف أقول ليك شوفي لينا الكنافة كمان ,
لكن خشيت أن تتسرب { حقوق الطهي }
من بيع أصابعك ... فلو ما عندك مانع
فنحن مؤمنيون وحلوييون بطبيعة الحال
... فما بالك فى رمضان .
يله ناولينا حتة { ضواقة إن شاء الله }
وكان وصفت قدر ما قدرت يا رجوية ,
لكن يا ربي حا أعمل الحاجات ده أنا ول
مرتي { سؤال برئ لا علاقة بالجندر }
خاصة وأن بين ظهرانينا عتاة جندر من
الوزن التقيل { إن شاء إشراقة مصطفي
تكون نايمة أسع ده } لأني فقط كيشة
فى موضوع الطباخة , وربما يكون هناك
{ كيشات } كذلك من النساء وإحساسي
يقول أن غادة من هذا الرهط , إنتو دايرني
أخش معركة الجندر ده براي ... وكمان صايم .
... ونتونس
| |
|
|
|
|
|
|
|
|
|
Re: كيف أحوالكم ... بعد إفطار اليوم الأول من رمضان الكريم (Re: HAYDER GASIM)
|
يا أخوانا ... ربما لاحظتوا بعض الأخطاء الإملائية
وهي بصراحة لا تشبهني , لكنها العجلة والشغف
للأنس السوداني الطيب فى هذا الشهر الحميد ,
وقصدت أن أدع هذه الأخطاء تمر إعتمادا على
حصافتكم , كما أنني على حساسية من موضوع
{ عدل بواسطة ... }
ملاحظة ... القمردين فى بلدنا ده مسيخ وخالي من
خواصه السودانية المعهودة , حيث القوام المتماسك واللون
الأحمر المائل للدكنة والطعم المتميز وخاصية
الإرواء الجيد والنكهة الطيبة وكأنه شراب الملوك ...
فهل هو إحساسكم كذلك .
كده شيلو ليكم رشفة { أي جغمة فى حالة الأقاليم }
وأفتونا من بعد .
| |
|
|
|
|
|
|
|
|
|
Re: كيف أحوالكم ... بعد إفطار اليوم الأول من رمضان الكريم (Re: HAYDER GASIM)
|
حيدر وضيوفه..
صباحاتكم خير..
Quote: لكن البيت بيتكم والحكاية ونسة وليت أحدكم
يتولى الحضور ردا وإستقبالا للضيوف
... رجوية كيف العرض ده معاك ... |
طبعا عرض في السلك.. هو أنا في ديك الساعة لما أستقبل ضيوف شهم زيك..
يا غادة.. كل ما أفكر في القطايف والكنافة.. أقول ح أجيبها بعد الفطور.. أها بعد الفطور وحاتك سيرة الموية ما بريد أجيبها ..
ودي ذكرتني بحكاية. قالوا في بيت العرس خالة العروس كانت قاعدة مع الطباخين في الخيمة بتاعتهم. وكانت جعانة شديييد.. أها أي صحن ختوهو هي قالت ليهم لازم تزيدوه.. ليه القصار ده؟ ما لكم دايرين تفضحونا؟ النبي كما ختيت حتة لحمة تاني.. السمك ده ما دايرين نفطر بيه بكره. زيد الصحن ده...الخ من التوجيهات
أها كان في طباخ ذكي. قال لأصحابه: زولتكم دي جعانة. خلوني اديها تاكل وشوفو حتقول شنو .
قام دنكل ليها صحن تمااام.. وقعدت اكلته كله لما حمدت ربها. ورجعت تقيف معاهم..
بقت تطلب منهم إنهم ينقصو اي صحن وقعت عينها عليهو.. الصحن ده مستفينه كده اصلو اصلو لي زول ولا اسرة؟ السمك ده احنا لاقينو في واقع مالين بيهو الصحون دي.. الخ
اها ده الحاصل معاي بالضبط
ودي
| |
|
|
|
|
|
|
|
|
|
Re: كيف أحوالكم ... بعد إفطار اليوم الأول من رمضان الكريم (Re: Raja)
|
Quote: حظك يا صحن الفول بغزل غادة واشراقة
وانا كيتا فيهن ما حاقول حاجة في الفول المدنكل دا
اما انت يا حيدر فموضوعك براه
(كلامك دا تقولوا لواحد ما عندو حديدة)
فاتح بوست طويل وعريض عايز تدردق الجماعة عشان يعلموك تعمل الشوربة كيف؟؟
|
عزيزي شمس الدين السنوسي
سلمات وطابت أوقاتك ... والعيال
ربما فعلا كان مزاجي فى شوربة كاربة , وحيث توفرن الحسان من كل
مناحي الإسفير للإداء بالأفكار الصانعة لتلك الشوربة , يكون بهذا قد
{ عم } الخير , وصارت الشوربة فى متناول يد الكل ... وإمكن كده تكون
طبقت هذه الوصفة الحسائية قبلي ... تنفعك إن شاء الله .
رجوية ... حكاية العروس طلعت ظريفة , ومصداقا لحالها فقد قلت فى
صدر هذا البوست وعبر تجربة شخصية { أن يمتنع الناس عن الشوبنق
وهم على جوع } ... فالعين تطير عندما تشقشق عصافير البطن .
مع مودتي
| |
|
|
|
|
|
|
|
|
|
Re: كيف أحوالكم ... بعد إفطار اليوم الأول من رمضان الكريم (Re: HAYDER GASIM)
|
أستاذي/ حيدر قاسم .. رمضان كريم .. أعتق الله رقابنا من النار.
لقد آثرت منذ بدايات رمضان "المتاوقة" من بعيد على بوستكم هذا الممتلئ شحما ودسامة، والإستمتاع من مقاعد المتفرحين على دردشة كل الجميلين هنا، خاصة وأننا نشرف على بوست صديق مجاور لبوستكم هذا عن رمضان في تشاد. إلا أن المتاوقة صارت لا تمتع بالقدر المطلوب، فكثيرا ما أجد حالي كالمتفرح على مبارة ممتعة، يركل أحيانا ويرفس أحيانا أخرى وكأنه لو كان مكان ذاك الهداف لأحرز الهدف الذي عجز هذا المهاجم عن إحرازه لمبررات فنية ومنطقية مقبولة جدا لدى الحميع ما عداه هو، فقررت أن أخرج من دزر المشاهد لدور اللاعب، وأعلن إنضمامي للكوكبة الرمضانية في بوستك هذا الجميل..
يصادف رمضان هذه المرة الذكرى الأولى لقدومي إلى أمريكا .. ولذلك ما زال من العسير علي استساغة الوضع والتأقلم عليه ، مع أنه ليست لدي مشكلة كبيرة في صيام رمضان بعيدا عن الأهل فقد سبق أن صمت 8 رمضانات متتالية ما بين السودان والسعودية من غير أن أشعر بفارق يذكر، لكن أن يصل الأمر للصيام في أمريكا والإضطرار للفطور أخيانا بالفاست فود أو الإحتماء بالمسجد تفاديا للفاست فود لهو أمر جد محزن.
(الجاب صحن الفول المدنكل الفوق ده .. أسألوه لي لو في أي طريقة لأي بريد سريع نتحمل نحنا تكاليفه؟).
كده برضو زورونا تجدونا .. دعوة لإفطار تشادي..
رمضان في تشاد .. مدخل للتعريف بعادات وتقاليد تشادية
تحياتي ومودتي
___________________________________________________________________________________________________________
والله يا أستاذ/ حيدر اللغة العربية دي تقيلة خلاص، لمن أكتب بيها بحس روحي زي الزول المكتف، إنت صابر عليها كيفن .. عندك عربي ما شاءالله رصين رصانة تحير..
| |
|
|
|
|
|
|
|
|
|
Re: كيف أحوالكم ... بعد إفطار اليوم الأول من رمضان الكريم (Re: محمد نور أحمد)
|
عزيزي محمد نور
تحياتي الموفورات والسامقات ... كما قامتك .
لسبب ما دخلت فؤآدي { تووووش } وليس للأمر
علاقة بدخولك من هنا ... لكنها حادثة يعلم الله على
صدقها ... فربنا يديم الود والمحبة , خاصة فى هذا
الزمن الجزافي والذي يريد أن يغير إهابنا الإنساني
ومركوزنا الإجتماعي ومدخورنا التاريخي , ليحيلنا
إلى حيوانات سياسية تتناطح وتفترس بعضها البعض
كما يحدث فى الغابة ... فليهدنا الله جميعا ويعيدنا إلى
أنساقنا الإنسانية الحميدة المفقودة , ويجعل الصبر من
خواصنا الأبدية والإحترام من لزومايتنا الفارعة والعيش
المشترك من بداهاتنا المحسوسة ... والسودان فى أعماقنا
الحريزة ... اللهم آمين ... ببركة هذا الشهر الكريم .
| Quote: لقد آثرت منذ بدايات رمضان "المتاوقة" من بعيد على بوستكم هذا الممتلئ شحما ودسامة |
كما قمت أن كذلك بدور مشابه من على بوستكم المشابه ...
خاصة بعد أن لفتت الأخت تراجي نظري إلى ذلك , فوجدته
بوستا قيما رفيع المستوي , أي من مداخلاتك فيه هي عبارة
عن مقال بحاله ... طولا وعرضا ومحتوى ... وهو عرض
أقرب إلى الدراسة الإجتماعية للظاهرة الرمضانية فى الأحوال
التشادية , كلام سلس ومتماسك ومدعم بالتفاصيل إلى جانب خفة
روح البوست وقفشاته وطرافاته اللذيذة ... فعصرت ضنبي وقلت
يا زول هوي ده كلام كبار ... أحسن نشوف صحن فولنا وشورباتنا
وشاهينا وقهاوينا ... وآبرينا الذي ما يزال { مكوجن }
مرحب بك آخي محمد نور فى صالة كبار الزوار , فقد أضفيت على
مطرحنا هذا عمقا وأضفت له معنى وطرافة ... فوالله تعجبني كتاباتك
وهي تتنزه عن الكلفة والحزلقة فيما تصيب المعني بكياسة وبساطة ,
فهنا موهبة أرجو أن تجد منك الرعاية التي تستحق .
| Quote: يصادف رمضان هذه المرة الذكرى الأولى لقدومي إلى أمريكا .. ولذلك ما زال من العسير علي استساغة الوضع والتأقلم علي |
عييييييييك ... ده أنت بدري عليك خالص ... لأن أعسر
سنين الغربة هي العشرة الأوائل ... وتقول لي لسع فى سنة أولي
هجرة ... مع إنو ما ظاهر عليك برلوم ... بل تفتيحة وزي
زول كده عندو حديدة ... وربنا إشد عزم الجميع .
| Quote: الجاب صحن الفول المدنكل الفوق ده |
هذا صحن الجميع وأنت بيننا ... بس جيب معاك الرغيف عشان
ما نضطر { نبوزوا }
أما حكاية اللغة العربية ... فيا عمي أنت الأنجض والأبرع , إذ
يتحول القلم بين يديك إلى صوفي فى حضرة شيخه ... مطاوعا
خفيفا ومبدعا ... أما أن تقول بغير ذلك فهو تواضع منك ... لا غير.
وعن حكاية العروس { وده شمشرة مني ساكت } فربما يكون فى
هذا البورد بختك ... وقد حدث من قبل ... لكن هذا حديث الفطر ,
... ورمضان كريم .
مع آلق مودتي
(عدل بواسطة HAYDER GASIM on 09-18-2007, 01:22 AM)
| |
|
|
|
|
|
|
|
|
|
Re: كيف أحوالكم ... بعد إفطار اليوم الأول من رمضان الكريم (Re: HAYDER GASIM)
|
أستاذي/ حيدر قاسم .. تحياتي النواضر ..
أن أحظى بمحبتك فذاك مقام أشكر ربي عليه، مشهدا إياه أنني أبادلك المحبة بأحسن منها، وأسأله أن يديم علي نعمته هذي التى لا أبالغ إن زعمت أنها من مواضع الحسد المباح.
لقد كنت موقنا منذ أن ولجت هذا المنبر أول الأمر أن هناك حتما قوة خارقة تحفط لهذا الإسفير الملتهب اتزانه واتساقه وصيرورته، ولم يدر بخلدي أنها قوة بشرية عادية أبعد ما تكون عن الخرافة والأسطورة ، حتى قرأت لك بعضا من الدرر التي تتثرها بين الفينة والأخرى ، كمن يضخ عبيرا بين أرجاء المكان ليحيله إلى جنة من جنان الأرض، وحينها فقط أدركت كم هو عظيم وجود قلم سامي القامة عاليها بيننا، شفيف كشغاف الروح، نظيف كطهارة الأبدان ، لا يماري ولا يداري، يخاطب الألباب والأفئدة، يغوص في أعماق أرواحنا فيحيلنا إلى كائنات جديدة تمشي بين الناس حبا، وفي الكون إعمارا.
أما ما نخطه هنا فهو بعض مما تعلمناه من تجاربنا المتواضعة في هذه الحياة الدنيا، و كثير مما حرصنا على قراءاته وتفهمه في أرجاء هذا المنبر، فإن نال إعجابكم فهو بلا شك سيعد دافعا للتجويد والإتقان، فقط أشيروا إلينا بمواضغ الزلل والنقصان عل الله يجعل منكم سببا في تميز لنا في قادمات الأيام.
حديثكم عن عامنا هذا اليتيم الذي قضيناه لهثا وراء تكوين الذات وإكسابها سر الحياة هنا وجمالها، يجعلنا نذرف دمعا سخينا مدرارا على مآلات الحياة وتصارفها على مستويات عديدة، ليس البعد الشخصي منتهاها ولا أوطاننا تلك المغتصبة مبتداها.
Quote: وعن حكاية العروس { وده شمشرة مني ساكت } فربما يكون فى
هذا البورد بختك ... وقد حدث من قبل ... لكن هذا حديث الفطر , |
مستعجل من قبببببببببببيل أصل هنا كيف .. هسع بس يعني قلت لي نقرض على كده وننتظر بوستات العيد.. غايتو العيد ما بعيد .. نلوك الصبر ساي .. رمضان باقي ليه 24 يوما حسوما.. الله يجيبك يا العيد..
Quote: هذا صحن الجميع وأنت بيننا ... بس جيب معاك الرغيف عشان
ما نضطر { نبوزوا } |
أها قلت لي أجيب معاي العيش من الفرن الآلي..؟ .. كدي إتأكد لي من وجود الجبنة ومويتها، الشمار، الطعمية، التونة، الدكوة ، الشطة الخدرا والليمون .. زيت السمسم شايفه عايم وعامل شلالات عديل.
يلا غادة ورجاء .. الحقونا بالكنافة سريع.
| |
|
|
|
|
|
|
|
|
|
Re: كيف أحوالكم ... بعد إفطار اليوم الأول من رمضان الكريم (Re: HAYDER GASIM)
|
| Quote: كان يوما طويلا كما عقابات الصيف فى البلاد الباردة |
أخوي العزيز حيدر
رمضان كريم و كل سنة و انت طيب
مشتاقين و الله
رمضان المرة دي جانا و اليوم لسع طويل
و الجو بقى بارد (البرد البجوِّع داك)
بالنسبة لي أول يوم عادي و الواحد حايم لحدي ما جات مواعيد الفطور
لكن بعد داك شوف .. و الله فطرت و قلت آخد لي تكية و عينك ما تشوف الا النور
غمضت لي غمضة كدة ما فتحت إلا الساعة 12:30 و الغريبة صحيت جعاااان
أفتقد كل شئ من نفحات الفطور في السودان ...
طبعا لا كبكي و لا بليلة ..
الحلومر و الآبري ما خالص كدي من أيام السودان
لكن الفارق معاي بالجد عصير الليمون و الكركدي
الجو البارد ده كان داير ليهو قراصة 4 بوصة بويكة
الحسنة الوحيدة في شوربة العدس !!
الفول أول مرة أكلتو أول أمبارح ...
ما عندي شغلة مع المكيفات ..... حتي الشاي بطلتو
و القهوة كنت بشربها في رمضان بس كعادة ناس البيت في السودان
عملت فيها داير اواظب عليها السنة الفاتت ما قدرت و طعمها راح لي ... و خليتها
و السنة دي ما فكرت فيها أصلاً و الله علبتها لسع مليانة
ما عارف .. بس كل البتزكرو انو بتجيني استغماءة بعد الفطور و بفوق منها على مشارف اليوم الجديد
تحياتي لك و لضيوفك
ورمضان كريم
| |
|
|
|
|
|
|
|
|
|
Re: كيف أحوالكم ... بعد إفطار اليوم الأول من رمضان الكريم (Re: طارق جبريل)
|
الأحباب الفوق كلكم وصاحب البوست الأصلي..
سلامات كتااارات..
طبعا كنت متوقعة عوض.. آآخ طارق يجي يقول كده .. لكن اعمل شنو في المجلة الأشارت لجنس الشوربة..
هسع بدل جيتك إيدك فاضية كنت تجيب لينا كورية (حريرة) ترم العضم ..
غادة ومحمد نور.. أول امبارح اكلت لي شئ عراقي كده إسمو (زند الست).. قريب لباسطتنا الزمااان ديك بس مدغلب ..
أها عندهم حاجة حلوة إسمها (المن والسلوى).. شدة ما سمحة غالية لما مبالغة..
وحاتكم قرًبتا أصور (زند الست) وانزله ليكم.. ح أعملها يوم الجمعة..
ودي
| |
|
|
|
|
|
|
|
|
|
Re: كيف أحوالكم ... بعد إفطار اليوم الأول من رمضان الكريم (Re: Raja)
|
| Quote: مستعجل من قبببببببببببيل أصل هنا كيف .. هسع بس يعني قلت لي نقرض على كده وننتظر بوستات العيد.. غايتو العيد ما بعيد .. نلوك الصبر ساي .. رمضان باقي ليه 24 يوما حسوما.. الله يجيبك يا العيد.. |
اللييييييلة ... أمانة أخونا محمد نور ما جاهز طب ,
موية ونور ... فمن يا تريى تلك { المحظوظة } ... هذا
طي قدر سعيد آمل أن يتحقق كأعجل وأيسر وأبرك ما
يكون ... ومن أسع أنا وزير العريس ... وأرجو عدم
المنازعة في هذا الأمر .
الرغيف الآلي كان إتلقى خير وبركة , لكن بالمقابل رغيف
الروح يكفي ... فدماسة الأخلاق ودسامة الفول وجبة كاملة.
| Quote: حديثكم عن عامنا هذا اليتيم الذي قضيناه لهثا وراء تكوين الذات وإكسابها سر الحياة هنا وجمالها، يجعلنا نذرف دمعا سخينا مدرارا على مآلات الحياة وتصارفها على مستويات عديدة، ليس البعد الشخصي منتهاها ولا أوطاننا تلك المغتصبة مبتداها. |
هذا كلام جميل ... وعميق ومؤثر ... فتأملوه جيدا أيها القراء .
كما تشكر عزيزي على الإطراء والذي أتمني أن أكون متحققا فيه .
ومن ذات القطر تزدهي رياحينك وتفوح عبقا وأريجا طيبا دفوقا .
إخدر ضراعك ... وإديك العافية وسعد الطالع .
مع مودتي
| |
|
|
|
|
|
|
|
|
|
Re: كيف أحوالكم ... بعد إفطار اليوم الأول من رمضان الكريم (Re: HAYDER GASIM)
|
| Quote: أفتقد كل شئ من نفحات الفطور في السودان ... |
وهذا من مواجعنا جميعا ... نوافقك الإحساس ... ونستردفك الأمل .
فما أبقت لنا الغربة من تزاخيم رمضان غير العبادة ... وربنا يقبل صيامنا .
شكرا عزيزي غباشي
مع { جكوك } من الود , فإن أفرغها الزمان من الحلومر ... فلنعبها بما
تبقى من أحاسيسنا الطيبة ... cheers .
| |
|
|
|
|
|
|
|
|
|
Re: كيف أحوالكم ... بعد إفطار اليوم الأول من رمضان الكريم (Re: HAYDER GASIM)
|
| Quote: أول امبارح اكلت لي شئ عراقي كده إسمو (زند الست).. قريب لباسطتنا الزمااان ديك بس مدغلب |
رجوية ... إن شاء الله إنفعك { زند الست } ... وإن كان أحرى به الرجال { وجه ضاحك }
كده وصفي لينا الشئ ده أكتر ... وعجبتني بالمناسبة كلمة { مدغلب } ... نكتيها من وين ده ؟؟
وشايف { نداء الكنافة } ما يزال متفاعلا ... فهلا إستجبت بوصفة تطعم هؤلاء من جوع
وتأمنهم من شرفة .
يفرحني تدوامك على هذا البوست , فقد خلقت له رونق وأسبلت عليه من روحك الكريمة
قطرا طيبا ... أو هكذا بت العباسي ... تسلمي.
مع مودتي
| |
|
|
|
|
|
|
|
|
|
Re: كيف أحوالكم ... بعد إفطار اليوم الأول من رمضان الكريم (Re: HAYDER GASIM)
|
أستاذ حيدر كيفنك ..
أها قلنا نجي سلم عليكم ونشوف رجاء جابت الصورة ولا ما جابتها .. إحتمال نغيرها بصورة صحن الفول الفوق .. مع الأسف رجا لساتها ما شرفت. .. الزولة دي بقت في تلتلة بعد ده .. شوربتها طلع طارق عنده فيها راي .. وصورة زند الست ما جابتها . . والعجب غادة اللسه مخليا خشومنا سكر سكر من سيرة الكنافة اللا دايرا تجيبها ولا تورينا يسووها كيفن؟
والله اليوم بعد فمت على شوربة المتغالطين المشكوك في هويتها (الشوربة ما رجاء) و مشيت الـ Wallmart جبت حاجاتي وفتحت البوست قدامي فإذا بي أفاجا بأنه الخلاطة اتلجنت امبارح .. و في ظل عدم وجود جيب خلاطة ناس فلان قررنا العودة لشوربتنا البنعرفها .. الحلة تجقجق هسع وأنا بكتب .. فطورنا باقي ليه ساعة تقريبا.
كده نحلل الصيام ونجيكم
| |
|
|
|
|
|
|
|
|
|
Re: كيف أحوالكم ... بعد إفطار اليوم الأول من رمضان الكريم (Re: محمد نور أحمد)
|
| Quote: أها قلنا نجي سلم عليكم ونشوف رجاء جابت الصورة ولا ما جابتها |
عزيزي ... محمد نور
كيف أوقاتك ... وشايف دورة { الشحم } الرمضانية تأخذها طريقها بعجالة
نحو حتفها , لتسلم الراية { للحم } بعد أيام قلائل , وأظنها لامن تصل العظام ,
حا تكون مقرشة ساااااكت ... والله إعظم الأجر .
والله يا أخوي ... رجاء مفقودة ... وآمل ألا تكون قد مشت { بي وشيها } وإن
الغائب عذرو معاه ... أتمناها أن تكون بخير .
كده النجيب البليلة ده جنبي ... وأجيكم صادي .
مع مودتي
| |
|
|
|
|
|
|
|
|
|
Re: كيف أحوالكم ... بعد إفطار اليوم الأول من رمضان الكريم (Re: HAYDER GASIM)
|
أستاذ/ حيدر .. ازيك ..
لي ساعة بفتش على بوستينا الميمون ده وقنعت من لقيانه و قلت يا ربي حيدر ده ما له أرشف لينا البوست .. أتارك قاعد يا الحبيب .. إنشاءالله دارك عامرة طوالي يا رب.
Quote: كيف أوقاتك ... وشايف دورة { الشحم } الرمضانية تأخذها طريقها بعجالة
نحو حتفها , لتسلم الراية { للحم } بعد أيام قلائل , وأظنها لامن تصل العظام ,
حا تكون مقرشة ساااااكت ... والله إعظم الأجر . |
الشئ ده مش يخلينا مقرش .. ده عضامنا ذاتها يسحنها على الطريقة الهندية. . الليلة اتلوم معاي تب .. جاب له حمى بعد المويات حمتني التراويح.
أسوأ حاجة الليلة اكتشفت إني ما زلت أسير لقهوة عمنا Mc Donald الكنت قايل روحي اتمردت عليها وربنا تاب علي منها مما رمضان جا. تخيل يا حيدر ترمس القهوة قدامي والجماعة يشربوا منه ساي .. لكن أنا مضطر أسوق 7 دقائق عشان أشرب قهوة من ماكدونالد.
الله يستر على الليلة من الملاريا .
| |
|
|
|
|
|
|
|
|
|
Re: كيف أحوالكم ... بعد إفطار اليوم الأول من رمضان الكريم (Re: HAYDER GASIM)
|
الأخ العزيز الأستاذ حيدر .
رمضان كريم وكل سنة وانت طيب.
معذرة لدخولي المتأخر للبوست.
بالنسبة للمكيفات لم أشعر بأي فرق لأنني لا أتناولها .
زمن الصيام هنا (اليابان) قصير نسبيا ( حوالي 12 ساعة) .. الجو موش بطال .
لكن بعد الفطور يزعجني الشعور بالنعاس.
أكبر مشكلة صلاة التراويح التي نصليها في مسجد أخواننا الباكستانيين الذين يصلون عشرين ركعة .. لكن بعد ما يدخل الصيام العظم سوف انسحب من الركعة الثامنة.
عاطر مودتي وفائق احترامي.
| |
|
|
|
|
|
|
|
|
|
Re: كيف أحوالكم ... بعد إفطار اليوم الأول من رمضان الكريم (Re: Gaafar Ismail)
|
الأخ جعفر إسماعيل
سلمات عزيزي ... تصوم وتفطر علي خير,
وربنا إقدر الناس على تكلمة هذه الفريضة الجليلة ,
مبروك { لرأسك } وهو ينعم بهدوئه الطبيعي وبعيدا
عم زمهرير المكيفات وتداعياتها الكلِفة .
| Quote: لكن بعد الفطور يزعجني الشعور بالنعاس. |
أعتقد أن هذا شعور عام ونتيجة طبيعة لإمتلاء البطن بعد فراغ طويل,
لتشتغل كل الأجهزة المعنية بالهضم دفعة واحدة ... وهنا يحصل الشعور
بالفتر والنعاس ... لكنه يضمحل مع الزمن .
التراويح من التتمات الطيبة ليوم الصائم , وربنا إقدرك عليها ... فعظامنا
مصقولة بكبرياء الروح الرمضانية ومنسودة بعطف المولى .
وربنا أقبل صيامنا .
مع مودتي
| |
|
|
|
|
|
|
|
|
|
Re: كيف أحوالكم ... بعد إفطار اليوم الأول من رمضان الكريم (Re: عبد المنعم سيد احمد)
|
الأخ عبدالمنعم سيدأحمد
شكرا على الحضور ورمضان كريم
Quote: اتمنى ان اوفق ..لنلتقى يوم سبت
بدار جاليتنا السودانية..لنستعيد بعض
من رمضانات السودان |
من تعاساتي أنني أشتغل حتى فى الويك إند
وهذا سبيل لم أختره ... لكنها المعايش ,
لهذا تراني لم أحضر أي لقاء رمضاني في
دار الجالية حتى الآن ... لكنني سأنافح لأجل
حضو ر السبت القادم .
مع مودتي
| |
|
|
|
|
|
|
|
|
|
Re: كيف أحوالكم ... بعد إفطار اليوم الأول من رمضان الكريم (Re: HAYDER GASIM)
|
أستاذنا/ حيدر قاسم .. الحاصل شنو ؟
بوستينا لقيتوا في صفحات بكري البي وراء؟ قربت أكتب بوست لبكري .. خفت يكون وداه الخور .. مع إني عارف في رمضان مافي خيران . . لكن البركة اللميت فيه..
الحبايب مالهم ما قاعدين يجوا .. في ناس شكلهم طبعا جو وروا أحوالهم بعد اليوم الأول وشكلهم كده تاني ما حيجوا إلا آخر يوم في رمضان.
من هنا أدعو الجميع لإفطار جماعي بكره في هذا البوست .. كده النشوف الناس تجي ولا ما تجي?
____________________________________________
لو جيت لقيت مافي زول أفطر إنت وأمش ..
| |
|
|
|
|
|
|
|
|
|
Re: كيف أحوالكم ... بعد إفطار اليوم الأول من رمضان الكريم (Re: محمد نور أحمد)
|
الصديق الوفي ... محمد نور
تسلم ...عزيزي
الناس الظاهر جارية يا حبيب , وأظنهم إتعودوا علي رمضان
وفتحوا لينا عدييييييل كده , طبعا أنا أسهمت فى { إضعاف }
هذا البوست بإختياري لليوم الأول من رمضان كعنوان , وهذا
يشيع إحساسا بأن مهمته قد إنتهت ... والوكت متأخر لإصلاح
هذا الخطأ ... إن كان هناك طريقة لإصلاحه , لكن عشمي أن
يجده الناس { فوق } ويحسوا بأنه ما يزال متحرك وعلى أمل
يشجعهم ذلك على المشاركة ... لكنك طلعت الأفضل والأحرص
من ناس الدينا ديل ... ربنا إديك العافية .
بالمقابل فألوم نفسي { لوحيدتي } التي عرضت بها فى بوستك
وما تنيتا حتى , فيما زرتني هنا لعدة مرات زكيات طيبات ,
فخجلتين يا أبو العوف ... لكن ده كلو { أجر } ... وأجرنا في
هذه الدنيا كما رزقنا { تلاقيط برضو }
Quote: من هنا أدعو الجميع لإفطار جماعي بكره في هذا البوست .. كده النشوف الناس تجي ولا ما تجي?
|
دعوة كريمة من أخ كريم ... متفضلين من الآن ,
بس يا ريت إجو الشباب عشان إكون فطور طاعم .
مع مودتي
| |
|
|
|
|
|
|
|
|
|
Re: كيف أحوالكم ... بعد إفطار اليوم الأول من رمضان الكريم (Re: HAYDER GASIM)
|
الزعيم ..
ازيك وكيفك ورمضان كريم وكل سنة وانت والعيال وامهم طيبين ..
والله كل يوم اقول ادخل البوست دا لكن من الصيام وموتة الحيل ما بقدر !!!
شفت الاستهبال ..
والله انا من اول يوم صايمة وانا عيااانة عندي التهاب شديد وصوتي رااايح وحكة وحالتي حالة لكن برضو صايمة ..
تصوم وتفطر على خير
تحياتي لزوار البوست وكل سنة وانتو طيبين
| |
|
|
|
|
|
|
| |
HAYDER GASIM
صلاح شعيب
غادة عبدالعزيز خالد
Osman Musa
عبدالرحمن عزّاز
امبدويات
حيدر حسن ميرغني
Hatim Salih
خالد العبيد
omar altom
اسعد الريفى
Raja
lana mahdi
Shayma
Halema2
طارق جبريل
Alsa7afa_30
على عمر على
اساسي
Ishraga Mustafa
عاصم ابوبكر حامد
Tragie Mustafa
Shams eldin Alsanosi
محمد نور أحمد
غباشي
هاشم أحمد خلف الله
Gaafar Ismail
عبد المنعم سيد احمد
انعام حيمورة
فيس بوك
تويتر
انستقرام
يوتيوب
بنتيريست