دعواتكم لزميلنا المفكر د.الباقر العفيف بالشفاء العاجل
|
|
 ساخر سبيل : فتة أسلاك
|
صحيفة الرأى العام
الأحد الموافق 16 نوفمبر 2008م
_____________________________________________________________________________________________
عندما عدت بالأمس إلى منزلى بعد يوم عمل شاق والجوع يعتصرنى قمت بسؤال (المدام) ذلك السؤال التقليدى :
- اها الليلة طابخة لينا شنو؟
- والله الليله عاملة ليكم (فتة أسلاك) تاكلو صوابعينكم وراها
- (فى دهشة) : فتة شنو؟
- ما سمعتنى يعنى ؟ آآآيا (فتة أسلاك) ... الأسلاك الواااحده دى وكمان عاملة ليكم معاها
(شوربة بتاعت جاز) ما حصلت ! ومن بكرة ح أحشى للأولاد سندوتشات (فولتات) يمشو بيها
المدرسة !
إقتربت منها قليلا ووضعت يدى على جبهتها وأنا أقول فى نفسى (أكيد الوليه دى جاتا ملاريا) إلا أنها أزاحت يدى وهى تضحك وتناولنى إحدى الصحف قائلة :
- إنت قايلنى (بهظر) كدى أقرأ الكلام الفى الجريده ده !
وأمسكت بالصحيفة وجلست فى أقرب كرسى أقرأ فى الخبر الرئيس والذى يقول بأن مجلس الوزراء قد أجاز فى إجتماعه الدورى (أول أمس) مشروع الموازنة المالية للدولة لسنة 2009م وقد تعهدت (الحكومة) بعدم زيادة أسعار المحروقات والكهرباء .
- طيب الكلام ده ما كويس مالو !
- آآى كلام كويس ما قلنا حاجه لكن باقى الحاجات الكلو يوم زائده دى ما يتعهدوا لينا إنو ما ح
تزيد – مواصلة- هو المواطن ده بياكل (جزولين) ولا بيشرب (كهرباء) !
- تقصدى شنو؟ ما فاهم ؟
- هى دى كمان عاوزة ليها فهم هسه (شن فايدة) عدم رفع أسعار (الكهرباء) والمحروقات القالوها دى
كان (سعر الرغيف) زاد؟
- والله فعلن مافى فائده !
- هو الرغيف براهو شن الفائده أكان أسعار (الخضروات) زادت و(اللحوم) زادت و(حليب الأطفال) و
(الأدوية) زادت و(الإيجارات) والمواصلات زادت ؟ أها الحاجات دى بيضمنو لينا ممن وين إنها ما تزيد؟
- والله كان جيتى للجد ضمان مافى
هنا فقط تأكدت بالفعل أن (حرمنا المصون) لا تعانى من أى أعراض مرضية وأنها فى كامل قواها العقلية والصحية فهى ترى بان التعهد بعدم رفع هاتين السلعتين شيء مهمّ ويطمئن المواطن (الغلبان) كثيراً لكنه ليس كل شيء ، فهنالك (حالة فلتان) فى أسعار السلع التمونية الضرورية تشهدها الاسواق بل أن بعضها يتضاعف سعره أكثر من مرة فى الشهر الواحد بينما (المرتبات) و(المعاشات) و(الدخول عموما) لم ترتفع أكثر من 10% منذ أعوام طويلة ..
- إنت عارف كيلو العدس (أكل الناس الغلابه) بى كم ؟
- لا ما عارف !
- الكيلو يا سيدى بى (تمانية ألف) !
- وعارف ربع البصل الواااحد ده بى كم ؟
- لا ما عارف !
- وحاتك بى سطاشر ألف وماشى على العشرين !
- والله قصه عجيبة .. هسه عم سليمان (جارنا) ده معاشو فى الشهر (مية ألف) يعنى (خمسة أرباع بصل) !!
فجأة جلست (حرمنا المصون) ثم نظرت نحوى فى حزم وهى تقول متسائلة :
- هسه (ثورة التعليم) دى تاكل شنو؟
فاجأنى سؤالها (الغريب) وقربت تاانى (أخت إيدى أشوف حرارتا) لولا أنها واصلت حديثا قائلة :
- إنت عارف إنو الميزانية دى ما فيها أى فرص عمل جديدة للخريجين العواطلية الـ بالألاف (الملو
الشوارع) ديل ؟ طيب ديل ياكلو شنو ؟
أجبتها والجوع يعتصرنى : تسألينى أنا ؟ أسألى ناس (الحكومة) ديل ! كدى أمشى جيبى لينا (فتة الأسلاك) دى خلينا ناكل الجوع قطع مصارينا !
|
|
 
|
|
|
|
|
|
|
|
Re: ساخر سبيل : فتة أسلاك (Re: الفاتح يوسف جبرا)
|
Quote: أجبتها والجوع يعتصرنى : تسألينى أنا ؟ أسألى ناس (الحكومة) ديل ! كدى أمشى جيبى لينا (فتة الأسلاك) دى خلينا ناكل الجوع قطع مصارينا !
|
ألأخ/ألأستاذ/الفاتح يوسف جبرا
السلام عليكم ورحمة الله
التحية لك وانت تتحفنا بهذا الجمال..صورة لاذعة لساخر سبيل..
ده إنت بتعمل من الفسيخ شربات والمدام من ألأسلاك فتة..المهم الحمدالله إنو فى النهاية المدام طلعت نصيحة وانت وافقت على أكل فتة ألأسلاك.منورين
مودتى..إسماعيل محمد أحمد عباس..
| |
|
|
|
|
|
|
|
|
 Re: ساخر سبيل : فتة أسلاك (Re: الفاتح يوسف جبرا)
|
| Quote: - والله قصه عجيبة .. هسه عم سليمان (جارنا) ده معاشو فى الشهر (مية ألف) يعنى (خمسة أرباع بصل) !! |
الشكية لله يا صديقي...
زي ناس عمك سليمان ديل ليهم الله بس...
ياااااااااااارب تتولانا وتتولى عم سليمان وكل من على شاكلته برحمتك وعفوك ورزقك النعيم يااااااااااااارب...
لك قواسيب مودتي يا رجل يا إبداع...
أبو الحُسين...
| |
|
|
|
|
|
|
|
|
|
Re: ساخر سبيل : فتة أسلاك (Re: الفاتح يوسف جبرا)
|
Quote: الأخ الحبيب إسماعيل
التحيات الطيبات
الناس ديل باقى ليك مش بياكلونا (حنك) ساااكت ؟ أنا خايف المدام الليلة تغدينا بى حلة (فيوزات) !
مودتى |
بس يا ريس أعمل حسابك ما تضرب فيوزات
وردودك ايضآ جميلة وليها معنى..تسلم على مساحة الفكاهة التى تفردها لنا
إسماعيل محمد احمد عباس....
| |
|
|
|
|
|
|
|
|
|
Re: ساخر سبيل : فتة أسلاك (Re: الفاتح يوسف جبرا)
|
أستادنا العزيز جبرا
لكم خالص التحايا
طيب بي طريق الوصفات الغدائية دي
لو يوم تجرأت ومشيت الأسكراب تجيب ليك اسبير لعربيتك
قول مثلا ( بوبينا) بتاع الإسكراب ح يقول ليك والله خلصت
أخر إتنين شالم واحد قدامك قال عندو قعدة
وعايز يعملم نيفا
وكل اليايات ح تلحق امات طـــــــــه لأنون ح يعملوها كوارع
لكم ودي المقيم
| |
|
|
|
|
|
|
| |
الفاتح يوسف جبرا
ismeil abbas
Safia Mohamed
أبو الحسين
هاشم أحمد خلف الله
Research In Motion BlackBerry 9300(1600x1200).JPG)
نورالدين بابكر بدري
فيس بوك
تويتر
انستقرام
يوتيوب
بنتيريست