|
|
 عداد (دفع الهواء) المقدم
|
أصل الحكاية :
بدأت الحكاية بخبر صغير نشر فى إحدى الصحف ( الهامشيه ) التى تعتمد على االإثارة والخبر يقول بأن المسئولين وبعد أن إنتهوا من تركيب عدادات الدفع المقدم للمياه فأنهم بصدد تركيب عدادات (الدفع المقدم للهواء) وذلك عن طريق جهاز يثبت على أنف كل مواطن يقوم بحساب كميات الهواء التى تدخل الى رئتيه.
لم يتفاعل الموطنون مع ذلك بأعتبار أن الصحيفه تعمد إلى الإثارة وتحاول ( تخفيف دمها ) وأن الخبر لا أساس له من الصحه ولكن وبعد أقل من شهر من نشر ذلك الخبر جاء على لسان أحد المسئولين الكبار فى إحدى كبريات الصحف بأن ( هيئة هواء ولاية الخرطوم ) تدرس مشروع ( دفع الهواء المقدم ) وأن التجربه سوف تعمم بشكل أولى على سكان ولاية الخرطوم ثم بعد ذلك لبقية أنحاء البلاد . توقع الجميع أن يصاحب تصريح ذلك المسئول إستنكاراً وشجباًً وتظاهراً من المواطنين الا أن ( المسأله ) مرت مرور الكرام كما سبق أن مرت مسأله (عدادات الدفع المقدم للمياه) .
على الرغم من كل ذلك الا أن المواطنين قد إاستبعدوا ذلك تماماً أى أن يكون فى نية (الحكومه ) بيع الهواء للمواطن ، ليس لأن الحكومة (تتورع) عن فعل ذلك (لأن الحكومة لو لقت طريقة تبيع المواطن ذاتو) و لكن لأن الأمركما يراه المواطنون يستحيل تنزيله الى أرض الواقع عملياً ولم يعلم المواطنين بأن التكنولوجيا الحديثه لا تعرف المستحيل وأنه كما أن هنالك عدادات دفع مقدم للمياه فهنالك أيضاً نوع آخر للهواء .
على شاشة الفضائية السودانية جلس ثلاثة مسئولين ( المسئول هو من إنتفخت أوداجه شحماً وإزدادت بشرته لمعاناً وأشرق النور من وجهه المشع ما عدا دائرة غامقه قطرها 2 سم هى علامة الجودة )
المذيع : يسرنا أن يشرفنا اليوم فى هذا اللقاء السيد المدير العام لهيئة هواء ولاية الخرطوم والسيد مساعد المدير العام للمبيعات والسيد مساعد المدير العام للهندسة والصيانة وذلك من أجل تعريف المواطنين بمشروع عدادات الدفع المقدم للهواء (المذيع مواصلاً) :
- بداية سعادة المدير العام لهيئة هواء ولاية الخرطوم ممكن نعرف الدوافع والأسباب وراء المشروع ؟
- بسم الله الرحمن الرحيم والحمد لله رب العالمين والصلاة والسلام على أشرف خلق الله أجمعين وعلى من إتبعه بإحسان إلى يوم الدين أما بعد : والله الحقيقة المشروع دا ماجديد ونحنا بدينا فيهو من زمان وهو موجود فى (الإستراتيجية الشاملة) لكن بس قلنا أحسن أول حاجة ننتهى من قصة الكهرباء وبعدين المويه ( حتين ) نجى للهواء (يضحك) يعنى (نمزمز) بيكم شوية شوية
- يعنى ممكن نقول إنتو عاوزين تبيعوا ( الهواء ) للناس ؟
- المسأله ما مسألة بيع ... إنتو لازم تعرفوا إنو فى ناس بتستغل مسأله مجانيه الهواء دى إستغلال بشع وبتتعامل معاها بطريقه بشعه يعنى إتصور زول قاعد يشرب فى شاى مش يشرب وبس؟ لا كمان تلقاهو قاعد يتنفس .. أو تلقى واحد قاعد يتكلم فى الموبايل وكل كلمة والتانية تلقاهو (يجر) ليهو نفس….دا استغلال بشع لواحد من مصادر الحياة الهامة وهو الهواء .. هسع الزول القاعد يتكلم فى الموبايل أو الزول القاعد يشرب فى الشاى دا كان كانوا قاعدين يدفعوا قروش الهواء دى كان عملوا كده؟؟ خليك من دا .. يا أخى شوف بتاعين (البناشر) بينفخو ليهم كم لستك فى اليوم ؟ معقول دا كلو مجانى والدولة ماعندها نصيب فيهو ؟
المذيع : طيب ممكن السيد / مساعد المدير العام للهندسة والصيانة يشرح للمواطنين عمل الجهاز؟
- بسم الله الرحمن الرحيم والحمد لله رب العالمين والصلاة والسلام على أشرف خلق الله أجمعين وعلى من إتبعه بإحسـان إلى يوم الدين أما بعد (يقوم بعرض الجهاز على الشاشة .. ويواصل) ذى ماشايفين الجهاز هو عبارة عن جهاز صغير يوضع على الأنف ( ذى الكمامة) يعنى وبيخرج منو أنبوب يمر على ( عداد رقمى ) يقوم بحساب كمية الهواء المستنشقة حيث يقوم بخصمها من الرصيد ويوجد (ذى ماشايفين) لوحة مفاتيح رقمية تستخدم لإدخال ( العشرين رقم السرية ) المفروض ينزلها الزول بعد ما يشترى الكمية العاوزها من (مكتب البيع) ثم ينتهى الأنبوب (ذى ما شايفين) بفتحة يدخل منها الهواء المستنشق .
وعاوز أقوم بتنبيه الموطنين إنو يضعوا الشاشة فى مكان بارز ليسهل قراءتها من قبل المراقبين ( يقوم بوضع الكمامه على انفه وشبك الشاشه على جيبه الأيسر للقميص ثم يخاطب المشاهدين) يعنى بالشكل دا.
المذيع : طيب الحقيقه عندنا كمية من (المحادثات) لموطنين عندهم إستفسارات
-. آلو.. آلو إتفضل ... معاى منو .
- معاك (عكاشة) من الدويم
- إتفضل ياعكاشه وجه أسئلتك معاك ( هيئة هواء ولاية الخرطوم)
- السلام عليكم
- وعليكم السلام إتفضل
-والله أنا عندى سؤالين السؤال الأول : الزول لو ما إشترى الجهاز دا بيحصل ليهو شنو ؟ والحاجه التانيه هل جهاز زول ممكن يشيلو زول تانى يستخدمو؟
- والله دىأسئله وجيهة .. أول حاجه أى زول (يتمسك ) وهو ما (خاتى ) الجهاز دا (حتى لو عندو ونسى يلبسو) ح يغرم خمسين ألف جنيه لأنو الجهاز دا مفروض الزول يكون (مركبو ) وما يطلعوا لحدى مايموت والحاجة التانية أى زول يطلع الجهاز بعدها ما نركبوا ليهو نحن بنعرفوا طوالى لأنو الاجهزة دى (موصله) لاسلكياً عن طريق (الموبايل) مع كمبيوتر (هيئة هواء ولاية الخرطوم) وفى الحاله دى ح يغرم الشخص غرامه باهظه .
المذيع : أفتكر كان عندو سؤال تانى
- أيوه .. أما فيما يختص بأنو زول يستخدم جهاز الزول التانى فدا ما ممكن لسببين السبب الأول إنو لو فى زول إستخدم جهاز زول تانى معناها الزول التانى دا ح يضطر يطلع الجهاز بتاعو وبى كدا (الكمبيوتر) ح يعرفوا لينا ذى ماسبق وقلنا ... الشئ التانى إنو الزول لمن يمشى يشترى جهاز عداد الهواء المقدم هنالك لجنه طبية بتخضعو لفحص عشان تحدد إستهلاكو من الأوكسجين ويتم على هذا الأساس (تشفير) الجهاز بتاعو عشان يسمح بمرور كمية (الهواء) بتاعتو بس .. يعنى ببساطة الجهاز بس معمول للزول الإشتراهو.
- معانا محادثه تانى – آلو.. معانا منو ؟
- معاكم (إنعام) من الكدرو
- إتفضلى يا انعام ( هيئة هواء ولاية الخرطوم) معاك
- السلام عليكم
- وعليكم السلام
- والله فى الحقيقة أنا عاوزه أعرف العدادات دى مقاسات يعنى ؟؟؟ والا كلها مقاس واحد ؟؟؟
- شكراً على السؤال ... لا العدادات دى مقاسات على حسب حجم رئة كل مواطن وعندنا خمس مقاسات Small – Medium – Large – X-Large – XX-Large
- آلو .. آلو معليش نسيت قول ليكم (حبوبتى) عندها (ازمه) بتقوم عليها طوالى أها فى الحاله دى نطلع ليها الجهاز عشان نركب ليها جهاز (الأزمة)؟
- ( يضحك فى خبث) .. لا مافى داعى لانو نحنا عملنا حسابنا للمسألة دى – تقومى توصيلى ليها نهاية ( الأنبوب) بتاع الجهاز بنهاية الأنبوب بتاع جهاز الأزمه وبس .
- آلو محادثه ( تانيه) .... معانا منو ؟
- معاك (صابر ) من أبو سعد
- مرحب ( صابر) سؤالك شنو ؟
- أنا عاوز اسأل بس عن (وحدات البيع ) ح تكون شنو ؟ والتسعيره كمان كيف؟
- شكراً صابر .. وحدة البيع هى الرطل / هواء ومسألة التسعيرة دى أنحنا رأينا إنو الهواء يكون فى متناول الجميع يعنى كل شرائح المجتمع على الرغم من إنو الدولة السنة الفاتت دى بس داعماهو بسبعمية مليون دولار ... لسع يا (صابر) ما إتحدد سعر الرطل كم لكن يا (صابر) تأكد تماماً انو ح يكون معقول .
المذيع : ناخد آخر سؤال .. معانا منو ؟
- معاك ( كباشى ) من الدروشاب
- اتفضل ياكباشى
- والله الحقيقة هو ما سؤال أنا عاوز أقول إنو الحديث الشريف بيقول الناس شركاء فى الكلأ والماء والنار (يعنى الكهرباء هسع) إنتو عملتو (جمره) للنار يعنى الكهرباء وجمره للموية وهسع كمان عملتو جمره للهواء ... معقوله بس وين ( الدين) بتاعكم ؟
- أول حاجه يبدو إنو الاخ كباشى منفعل شويه وما عارف تفسير الحديث ... نحن عشان الحديث ذاتو وعشان الناس شركاء فى الحاجات المهمه دى عملنا ليها جمره عشان مامعقول زول يقعد يرش قدام بيتو (ميتين) صفيحة مويه وزول تانى مالاقى يشرب .... وزول مناخيرو كبار ذى
( الليله وبكره) يشفط الهواء كلو وما يخلى ليهو ( نفس) للزول التانى ... يا أخ كباشى (الجمره) للترشيد عشان الناس يكونوا شركاء فعلاً فى الحاجات المهمة دى والمسألة ما تكون (مطلوقة) ساكت .
- (وجه المذيع يملأ الشاشة) أعزائى المشاهدين نكتفى بهذه المداخلات فى هذه الحلقة التنويرية والتى إستضفنا فيها كبار المسئولين ( بهيئة هواء ولاية الخرطوم) وموعدنا معكم فى حلقة أخرى يوم الجمعة القادم نتحدث فيها عن التداعيات الاجتماعية والاقتصادية والسياسية التى سوف يفرزها هذا المشروع .. إلى اللقاء .
(لم تبث حلقة الجمعة والتى كان من المفترض أن تناقش التداعيات والآثار المترتبة على قيام المشروع وذلك بسبب سفر المسئولين الذين تمت إستضافتهم فى البرنامج
إلى اليابان لحضور الورشة العلمية التى ينظمها الإتخاد العالمى لمصنعى (الجمرات) والتى بعنوان – وماذا بعد جمرة الهواء- ) لذلك فسوف أقوم بتخمين بعض أنواع التداعيات –
تداعيات إجتماعية (1) :
لأن عداد الهواء المقدم يوضع على الصدر وكل الناس (شايفاهو) فقد أصبحت مكانتك الإجتماعية ووضعك المالى تحدده كمية الهواء المجودة فى العداد والتى يحددها رصيدك ، فهذا هو (عادل) يخاطب أفراد أسرته وهم متوجهين لطلب يد زميلته (هاله) من أسرتها :
- معقول هسع يا بوي نمشى للناس ديل و(جمراتنا) دى كلها لو جمعوها ما تعمل ليها هواء بى عشرين ألف ؟
- أها وانت عاوزنا نعمل شنو ؟
- والله حقو الناس الماشين ديل كل واحد منهم نملأ ليهو هواء بى خمسين ألف
- إنت يا ود (مطرطش) ونجيب ليهم قروش من وين ؟
- ما مشكلة أنا شلت ليا مرابخة من البنك
بينما كان (عادل) يقوم بانزال أرقام ( الجمره الهوائيه) لأفراد أسرته والذاهبين معه لطلب زميلته (هاله) كانت أسرة هاله (رقيقة الحال) يدور بين أفرادها الحوار التالى.
هاله: هسع يا أبوى ناس عادل ديل معقوله يجو ويشوفوا(شاشتك) (مصفره) كدا وما فيها هواء بى خمسه ألف ؟
أبو هاله : وعاوزانى أعمل شنو يعنى؟ البيت مافيهو ولا مليم عملتوها ليا كلها جاتوهات وبرتكان وتفاح وماكنتوش
وهنا نط) حماده شقيق هاله الصغير قائلاً :
- أنا عندى ليكم فكره يا ابوى أيه رايكم (أظلل) ليكم شاشاتكم دى كلها وزول يشوف عامله كم مافى ... وبعد ما يطلعوا نشيل التظليل.
تداعيات إجتماعية (2) :
- يا أبو محمد .. عاوزه ليا مية الف
- تعملى بيها شنو ياوليه إنتى قايله عندى خزنه .
- انا ما كلمتك من امبارح قلت ليك ماشه ( أعزى ) ناس (فوزيه) ديل .
- وما تمشى تعزيهم أنا ما سكك ..
- أمشى أعزيهم والناس كلها تشوف جمرتى التعبانه دى .. والله بكاء ناس (عزيزة) الفات داك (فوزيه) دى جات ماليه ليها (هواء) بى تسعمائة الف وخاته الجمره فوق صدرها ذى البرواز وتتقدل ..
تداعيات رياضية :
أفرز مشروع (جمرةالهواء) بعض الوظائف التى لم تكن موجودة مثل وظيفة (مراقب جمرة لاعبين) وهو مسئول عن مراقبة (جمره) اللاعبين عند ادائهم للمباريات والتأكد من ان كل لاعب لديه رصيد يكفيه لاداء المباراة.
بعد أن إنهزم فريق ( الصقور) من فريق( الثعالب ) ألقى فريق (الصقور) باللائمة على مراقب جمرات اللاعبين .
- والله لو ما اللاعب الجديد ( حسن كدايس) ده جمرتو انتهت والمدرب طلعو من الماتش كان هسع دخل ليهو قون قونين
- دى كلها مسؤليتك يا (مراقب الجمرات )
- ياجماعة والله أنا قبل الماتش شفت جمرتو لقيت عندو هواء ينفخ ليهو (منضاد) نعمل ليهو شنو؟ ده بيجرى ذى ( الطيارة) كمل ليهو 500 رطل هواء كيف ماعارف .. انتو سجلتو ليكم لاعب ولا ( شفاطه)..
تداعيات فنية :
بعد اداء الفنان ( عماد سخانه ) لوصلته الغنائية فى برنامج تلفزيونى على الهواء ( بث مباشر) فوجىء المشاهدون بعازف الساكسفون ( كوكو تيه ) وهو يهرول نحو مايسترو الفرقة :
- والله ياخ الشغل ده معانا بالخساره
- كيف يا كوكو؟
- كيف شنو ؟ أنا قبل ما أجى الأستديو دا مالى ليا هواء (بخمسين الف ) هسع ثلاثه أغنيات بس رصيدى كمل .. دى ماشغلانه لازم تعملوا لينا (علاوة بدل هواء) عشان نعزف تانى معاكم .
تداعيات قانونية :
القاضى – وإنت عرفت المرحوم دا مات كيف ؟
الشاهد – دى عاوزه ليها (عرفه) يامولانا؟ عاينت لى (جمرتو) لقيتها ما بتنقص وقاعدة فى حتتها ؟ عرفت طوالي إنو نفسو قاطع وبقى (أسماء فى حياتنا).
تداعيات طبية :
- ده دكتور شنو شابكنى ليك شيل نفس ... شيل نفس .. شيل نفس لحدى ما كمل جمرتى كلها .. هسع الزول القروش دى يشترى بيها الأدويه الفى (الروشته) والا يشترى بيها (جمره هواء)؟؟؟؟
تداعيات تعليمية :
إقرأ التنبيهات التالية قبل أن تجيب على اسئلة الامتحان
1/ تأكد من إستخدامك لقلم الحبر الجاف
2/ تأكد من الاجابة على جميع الاسئلة ووضع رقم السؤال فى المكان المحدد
3/ لا تكتب على الهوامش
4/ تاكد من أن (جمره الهواء) لديك تكفيك طيلة زمن الإمتحان ا
تحويل رصيد :
بعد أن تلقت (هيئة هواء ولاية الخرطوم ) عدة شكاوى من المواطنين تتحدث عن مشكلة انتهاء (جمره الهواء) فى أوقات متاخره من الليل أو فى أماكن بعيده عن مكاتب بيع الجمره قامت الهيئه بحل المشكله تسهيلاً (للمواطن الكريم ) وذلك عن طريق خدمة تحويل الرصيد من عداد شخص إلى عداد شخص آخر والتى وكما تم الاعلان عنها فى الصحف اليومية تتم كالاتى:
* رقم عداد الشخص المحول # الرصيد المحول بالرطل هواء * رقم عداد الشخص المحول اليه.
بعد أن شاهدت (علوية) المسلسل العربى دخلت إلى مطبخها لتوقد (المبخر) كالعادة لخرق (البخرة) التى أعطاها لها (الفكى أب عصاية) لتطليق ضرتها (التومة) وما أن وضعت المبخر ونفخت فى الجمرة حتى صاحت :
- ( سجم رمادى) جمرتى ماخلاص قربت تكمل ... (وبعد تفكير) كدى النضرب لى (عزيزة) دى تحول ليا رصيد .. (تتناول الموبايل وتتصل ) :
- عليك الله ياعزيزه بلقى ليا رطل رصيد هواء عندك تحويلهم ليا لى عشان رصيد ى قرب ينتهى والواطه إتاخرت والجمرة قفلت؟.
- وحات الله يا علوية ما طالبانى حليفه هسع رسلت (الهواء بتاعى) كلو لى (أمونه ) قالت جات ليها من (سمايه) مهدوده وجمرتا مصفره والله رسلتو ليها وما فضلت لى روحى غير رطلين هواء يقعدونى للصباخ .
تداعيات دينية :
- ألو .. آلو .. برنامج فتاوى على الهواء؟
- أيوه .. إتفضل .. معانا منو؟
- معاك (حسن عمرين) من المسالمة
- إتفضل يا حسن .. سؤالك شنو؟
- والله انا بس بسأل لو الواحد ماشى المسجد يصلى قام عاين لى جمرتو لقاها خلاص قربت تكمل (يعنى كم نفس كدا وتقطع) السؤال بتاعى هل الزول يواصل ويمشى يصلى والا يمشى يشترى ليهو جمرة ؟
- أكيد يواصل يمشى يصلى
- أها وبعدين البدفع ليهو الغرامة (للحكومه) منو؟؟
وهنا قام (مولانا ) بإستقبال محادثة جديده !!!!
|
|
 
|
|
|
|
|
|
|
|
Re: عداد (دفع الهواء) المقدم (Re: الفاتح يوسف جبرا)
|
..
رائــــــــــع استاذ الفاتح يوسف جبرا
أسلوب ساخر وجميل و ( مميز ) في انتقاد واقع مؤلم
البعد عن الديار - للأسف - لم يسمح لي بالإطلاع على كتاباتك من قبل
مشكورا سمح لنا الأخ فرانكلي قبل فترة بقراءة " 17 سنة من الانجاز في عمر الانقاذ " - أو شيء من هذا القبيل -
وقد أدهشني أسلوبك ..
شكرا أخي الفاتح
وليتك تتحفنا بالمزيد
تحياتي ،،،
| |
|
|
|
|
|
|
|
|
|
Re: عداد (دفع الهواء) المقدم (Re: Mahadi)
|
..
..
رائع ...رائع ...رائع جدا
الاستاذ الفاتح ...
تداعيات استثمارية :
شركة الهواء منحت توكيلها لبعض شركات (اصحاب السعادة) لتقديم خدمات توريد ملحقات جهاز (جمرة الهواء) من بطاريات وشاحنات وقد تميزت أحدى الشركات الوكيلة بتقديم جهاز (فلتر) لتنقية الهواء من الروائح (الكريهة) وخاصة رائحة (الفساد) المنتشرة هذه الايام وكان قد تمت تجربة هذا (الفلتر) اولا على موظفي شركة الهواء نفسها وقد اثبت الجهاز نجاحة ولم تسجل اي حالات استنشاق لروائح كريهة رغم انبعاثها بشكل كبير في كل المنطقة (المحيطة)...ولان موظفي الشركة وبعض الهيئات والمؤسسات الصديقة لهم اجهزة (اصطاف) اي لافواتير عليها ..كان لابد من تجربة الجهاز في مناطق اخرى لمعرفة تاثير (الفلتر) على استهلاك الرصيد ..وقد تم اخذ عينة عشوائية من منطقة (السوق العربي) المليئة بالروائح المختلفة..واثبتت التجارب ان الجهاز (ينقي الهواء) بدرجة ممتازة ... وقد اثبت الفلتر فاعلية تامة في تقليل نسبة الاضرار النتاجة من دخان (السجائر) و(الشيشة) وقد حزرت الشركة بانها الوكيل الحصري لهذا الفلتر ويمنع منعا باتا الشركات الأخرى من بيع هذا (المنتج) ونبهت المواطنين من اللتاكد من علامة الجودة و العلامة الاصلية فالجهاز لابد ان يكون وارد (مالزيا) .
طرحت شركة الهواء (جمرة الزائرين) بعد ومدتها شهر قابلة للتجديد ..وهو جهاز يمنح بالعملة(الصعبة) للاجانب و السياح و الوافدين للبلاد وقد تم فتح مراكز بيع في كافة سفارات البلاد بالخارج وايضا مطار الخرطوم الدولي وميناء بورتسودان ...وقد الزمت الحكومة كل الشركات التي لديها عمالة اجنبية بالسودان بضرورة تركيب عداد الهواء على (انوف) كل منسوبيها الاجانب رغم (انفهم) ...وقد قامت إحدى شركات (ابان دقون) بجلب جهاز فلتر خاص بالاجانب و(الراسمالية الطفيلية) يستطيع هذا الجهاز ان يجعل المستخدم يستنشق الهواء حسب الهواء و المناخ الذي يريده ...يعني يمكن لكل فرد ان يستنشق هواء بلاده وقد فرغت الشركة من تمديد (انبوب الهواء البحري) عبر البحر الاحمر ..وقد كثرت مبيعات الجهاز وخاصة مناخ وهواء (شرق اسيا) ..وايضا هواء ومناخ (البحر الابيض المتوسط) بالنسبة (للراسمالية الطفيلية) .
وقد انتشرت مراكز الصيانة في كافة انحاء ولاية الخرطوم ...فقد عانى سكان المناطق (المهمشة) داخل العاصمة من تاثر الجهاز (بالغبار ) و(الاتربة) و(دخان الركشات) وكذلك (دخان حرق النفايات)..وقد طالبت (اللجان الشعبية) لبعض هذه المناطق بضرورة طرح خدمة (هواء الطواري) اي ان يتوفر (للمستنشق) ان يذهب رصيده (بالسالب) لمدة 24 ساعة لبعد هذه المناطق من مراكز البيع
اما مناطق السيطرة على (الثروة و السلطة) فقد انتشرت فيها المحلات التي تقدم (اغطية) و(اكسسوارات) لجهاز الهواء بكافة(الالوان) ...وهنالك اقبال كبير من النساء في هذه المناطق على الاكسسورات المصنوعة من الذهب الخالص
>>>
| |
|
|
|
|
|
|
|
|
|
Re: عداد (دفع الهواء) المقدم (Re: ناذر محمد الخليفة)
|
يا ناذر يا إبنى إنت عامل كيف؟؟ .. ياأخى (عمكم) ده ما عملتو ليهو (إلتواء) فى (العصب الهضمى) .. أرحموهو شويه وبعدين إنتو ح تقعدو لمتين تطلعو فى (الحاجات) !!!!انا فى الحقيقة أبيت أرد عليك فى محل (المعروضات) وقلت أحسن هنا !!!!!!!
| |
|
|
|
|
|
|
|
|
|
Re: عداد (دفع الهواء) المقدم (Re: Adel Sameer Tawfiq)
|
اهلا و الف مرحب
ب د . الفاتح جبرا
اروع من يكتب في صحف الخرطوم
كده ممكن نقول ان عمود الجمعة الرائع
حنتقل لينا هنا و معاه زيادات كمان
بالله يا بكري عاوزين عضوية
دكتور كمال عبد القادر برضوا
البكتب كلام مختصر و جميل
في الصفحة الاخيرة من السوداني
| |
|
|
|
|
|
|
|
|
|
Re: عداد (دفع الهواء) المقدم (Re: Waly Eldin Elfakey)
|
( المسئول هو من إنتفخت أوداجه شحماً وإزدادت بشرته لمعاناً وأشرق النور من وجهه المشع ما عدا دائرة غامقه قطرها 2 سم هى علامة الجودة )
ونعم ونعم اللهم زيد وبارك
تصدق يا استاذ الفاتح حتي ضحكات المسئولين تختلف عن الناس العاديين
تلقاها مجلجلة وطالعة باندفاع وانبساط حقيقي ... ونعم ونعم اللهم لاحسد
وكل ما يعاين في الناس المساكين يزداد رغبة في الضحك ... ونحن عايزين نموت من الغيظ
| |
|
|
|
|
|
|
|
|
|
Re: عداد (دفع الهواء) المقدم (Re: تولوس)
|
يا خى يا تولوس كيف الجماعة ديل ضحكتم ما تكون مختلفة أنحنا قاعدين نضحك والواحد بفكر فى (حق الفطور) بتاع الأولاد الصباح .. والجمرة العاوزة تقطع وماشه على الزيرو .. والروشته بتاعت (أم الأولاد) العندها شنو ما بعرف ... وسيد البيت الما أديناهو الإيجار ليهو كم شهر .. وشنو ؟؟؟ وشنو ؟؟ وشنو .... عليك الله يا محمد كيفن عاوز ضحكتنا تكون ذى ضحكتم والواحد يقيف قدام بتاع الفواكهه يقول ليهو نزل ليا صندوق العنب داك .. وأدينى بطختين من الكبار ديك .. وكمان صندوق البرتكان داك .. والكمثرى ديك .. والشنو ما بعرف !!!!وشايل ليهو (ربط) من (أبو عشرة) الجديد داك !!!
تعرف يا تولوز و مقدساتى فى الدنيا نحنا بطيخة للأولاد (لو) إشتريناها ما بنقدر نشتريها أكتر من 3 ألف !!!!!!!!!!!!! وكمان بعد أجاويد !! لكن يا تولوز ناجى ولدى ما ممكن ويستحيل واحد معاهو فى المدرسة يقول ليهو : أبوك حرامى !!!!
| |
|
|
|
|
|
|
|
|
|
Re: عداد (دفع الهواء) المقدم (Re: الفاتح يوسف جبرا)
|
يالروعة الكلام المعسول...........
كلك كلك حلو
أستاذناالفاتح..........
ولكن ناس الانقاذ ديل
عداداتهم مدفوعة القيمة التى هى
تؤثر سلبا علينا كثيرة..........
مارأيك لو بحثنا فى عدادات
تجلب لنا الخلاص منهم...........
لأنه الكلام عبر وسائل الاعلام هى مجرد فضفضة
وهى عدادات أيضا تشكل عبء على المواطن
تسلم أناملك وأفكارك من الخرف المبكر.........
لكم منى جميعا كل الود
[email protected]
| |
|
|
|
|
|
|
|
|
|
Re: عداد (دفع الهواء) المقدم (Re: الفاتح يوسف جبرا)
|
أستاذ الفاتح ..
| Quote: يا ناذر يا إبنى إنت عامل كيف؟؟ .. ياأخى (عمكم) ده ما عملتو ليهو (إلتواء) فى (العصب الهضمى) .. أرحموهو شويه وبعدين إنتو ح تقعدو لمتين تطلعو فى (الحاجات) !!!!انا فى الحقيقة أبيت أرد عليك فى محل (المعروضات) وقلت أحسن هنا !!!!!!! |
وحاتك خلاص بطلنا نطلع أي حاجة تانية ، لكن بس بوستاتي الكاتبا لازم أرد على الناس عشان تعرف حاجة .. والمعروضات كلها وصلناها لمن يهمهم الامر !!
بعدين يا خي ما شيتاً يحرق إنك تدفع خمسمية جنيه في اليوم وفي النهاية تقرا كلام (مضروب) !!
| |
|
|
|
|
|
|
|
|
|
Re: عداد (دفع الهواء) المقدم (Re: ناذر محمد الخليفة)
|
.
..
| Quote: بعدين يا خي ما شيتاً يحرق إنك تدفع خمسمية جنيه في اليوم وفي النهاية تقرا كلام (مضروب) !! |
الكلام (مضروب) و (ملطوش) ياناذر...
بعدين الخمسمية جنيه دي بتقراء بيها (جريدة واحدة) ولا (كل الجرايد)؟؟؟
.
| |
|
|
|
|
|
|
| |
الفاتح يوسف جبرا
abcde
tmbis
Mahadi
gamal elsadig
ناذر محمد الخليفة
Adel Sameer Tawfiq
Waly Eldin Elfakey
تولوس
المسافر
doma
ابن الرشيد
فيس بوك
تويتر
انستقرام
يوتيوب
بنتيريست