|
|
 ســـيناريوهات : مواطن (إفراج مؤقت)
|
صحيفة الرأى العام
الجمعة الموافق 18 مايو 2007م
فى قاعة الإجتماعات الفخيمة جلس مستشار شئون (القرارات الإسترتيجية) مترأساً أحد الإجتماعات الهامة التى دعا إليها كبار المسئولين التنفيذين :
والله أنا جبتكم فى الإجتماع ده علشان أبلغكم بإنو نحنا فى طريقنا لإصدار قرار أملتو علينا ظروف كتيرة
- ظروف ذى شنو سعادتك ؟
- ذى مثلاً أنحنا ما قادرين نعمل للشعب ده (تعداد سكانى) مثلاً !! مستحيل ده يتعمل !!
- مستحيا يتعمل ليه يا سعادتك؟
- نعمل (تعداد سكانى) كيف إذا الناس دى (حايمة) طول اليوم .. ليل نهار الناس دى (لافه)؟ يعدوهم كيف يعنى ؟
- والله فعلاً الناس دى بقت كتيرة كتره شديده .. الشوارع مليانه .. الأسواق مزدحمة التقول بكرة العيد
- بعدين يا جماعه ما تنسوا إنو العاصمة إمتدت وبقت كبيرة وشاسعه جداً والناس كلها جات (إتكبت) هنا !!
- كلامك صاح يا سعادتك والله الخدمات بقت غير متوفره .. أمن وصحة وتعليم وموية وكهرباء
- أها أنا هسع جمعتكم عشان عندى إقتراح نضرب بيهو (كم عصفور) بى حجر واحد
- (فى ترقب) : القرار شنو يا سعادتك؟
وبدأ (المسئول) فى تجهيز عدد من الملفات التى أمامه ووضع نظارته الطبية بعد أن مسح على ذقنه وتنحنح ثم بدا فى شرح الإقتراح :
- شوفو يا جماعه أنحنا ببساطه كده قررنا إنو كل مواطن لازم (يترخص) ويآخد (نمرة) ما مهم يكون لابسا فى (ضهرو) فى (وشو) ده موضوع نجيهو بعدين ... المهم إنو كل مواطن تكون عندو نمرة معلقا فى مكان بارز عشان لو ماشى فى الشارع (الدولة) تكون عارفا ده منو .. أو لو طلع (مظاهرة) أو(مسيرة) أو عمل أى حاجه من الحاجات الضد (القانون) دى نكون عارفنو .. مش الناس ماشة كدا ساااكت وأنحنا ما عارفين (زيد من عبيد) !!
- والله فعلا يا (سعادتك) المشروع ده ح يكون عندو فوائد كتيره أولاً ح نقدر نعمل التعداد (القلت عليهو ده ) وتانى ح يساعد فى الناحية الأمنية وخاصة (المظاهرات والمسيرات) عشان المواطن ح يكون عارف إنو (الدوله) عارفاهو بالإسم أقصد (بالنمرة) .. وكمان فى حاجه تانية – وهو يبتسم فى خبث – ح نطلع لينا منو قرشين تلاته !!!
- لكن المواطنين ديل بيرضو ؟ والله نظرنا فيهم كترت (نظريات) !!
- أيواا عشان المواطنين يرضو وما يعملو لينا (حركات) نحنا ح نقول ليهم إنو الغرض من المشروع ده عشان الإنتخابات الجاية تكون (نزيهه) وعشان ما يكون فى أى (تلاعب) أو (تزوير) فى الإنتخابات والناس تكون معروفه وواضحة وكل زول لابس نمرتو ومعروف ذى لاعب الكورة فى الميدان
- والله يا سعادتك عرفت ليهم تب !!
تنوير إعلامى :
كان لابد من تنوير إعلامى للمواطنين حتى يكونو على علم بأبعاد القرار كعاده الدولة دائما فى إطلاع المواطنين على أبعاد القرارات التى تتخذها لا سيما ان هذا القرار يمس المواطن بصورة مباشرة لذلك فقد قامت إحدى (القنوات التلفزيونية) بالتزامن مع بعض (الإذاعات) بإستضافة (المسئول شخصيا) فى محاولة لتنوير المواطنين على (مشروع ترخيص المواطن) والرد على إستفساراتهم
- يا جماعة أنحنا عاوزين نتعامل مع المواطن بصورة علمية وتقنية يعنى هسع شنو لمن ترسل ليكا شكوى تنتقد فيها أداء (مسئول الأمن) فى الولايه الإنت فيها مثلا وتكتب إسمك (محمد محمود أحمد) مافى مليون زول إسمهم (محمد محمود أحمد) . .. هو ح يقدر يقبض عليهم كلهم؟ بس تفرق لمن تكتب إنك (4227 خ ت ) لأنك إنت الوحيد النمرتك كده وح ينقبض عليك فى أقل من ثانية !!
- وبعدين شوفوا المستشفيات دى مليانه مواطنين كيف؟ أها هسع تانى الحكاية بعد القرار ده ح تتنظم مثلاً يوم السبت ناس (خ ب) وناس (ب ك) ويوم الأحد ناس (هـ ع) و( أح) وكده !!
- بعدين أنحنا عاوزين نكون أول بلد Digital يستخدم (التقنية الرقمية) ويتخلص من الأسماء الطويله دى .. يعنى بدل الزول يقول (إسمو وإسم أبوهو وإسم جدو) يكفى يقول إنو (8743 هـ و) !!
- طيب يا سعادتك المواطن حقيقة بيتسائل عن مسألة رسوم (الترخيص واللوحة) وكيف ح يتم تقديرها بعنى هل كل الناس رسوم ترخيصهم واحده ؟
- والله شوف أنحنا فى إجتماعاتنا حول مسألة تقدير الرسوم دى كان فى وجهات نظر مختلفة
- كيف يعنى؟
- أيواا أقول ليك .. فى مسئولين قالو الترخيص يتم بالعمر .. يعنى عمرك 40 سنة ترخيصك يكون بى 40 ألف دينار .. 20 سنة بى 20 ألف دينار يعنى السنة بى ألف دينار ... والإتجاه التانى وهو الإتجاه البقينا عليهو هو إنو المسألة تكون بالوزن يعنى وزنك 50 كيلو رسوم ترخيصك تكون 50 ألف دينار والإتجاه بتاع الوزن ده (فاز) لأنو شايفين (الشعب) ده قامت ليهو شوية (كضيمات) فمسألة (الرسوم على أساس الوزن) دى ح تخليهم (يخسو) شوية !! أما مسألة (اللوحة) ف ح نديها للمواطن هدية (مجاناً) !!!
- وهل ح يكون فى (فحص آلى) ؟
- أيواا والله ده سؤال مهم جداً لأنو واحده من أهداف المشروع ده (غير مسألة النمر واللوحات) إنو الدوله تعرف المواطن (العيان) من (الشديد) عشان توفر ليهو العلاج وتعرف (الأمراض) البشتكى منها بالضبط وعشان كده عملنا (فحص آلى) وفى شركة متخخصة فى (الفحص الآلى ) جبناها من (هولندا) مخصوص عشان تفحص المواطنين لأنو عندهم أجهزة متقدمة وبالكمبيوتر (المواطن) يدخل بى جاى و(الكمبيوتر) يطبع (أمراضو) أتوماتيكياً بى غادى !!
- والفحص ده رسومو كيف؟
- والله حسب (الأمراض) البتطلع من (الكمبيوتر) فى (الفحص الآلى) ... كل مرض عملنا ليهو (رسوم) – مواصلاً- بالمناسبة الناس ما تخاف من الحته دى لأنو آخر دراسة طبية عملتا الدولة أثبتت إنو غالبية (الشعب الفضل) أصحاء وما عندهم حاجة !!
- ممكن بس يا سعادتو تدينا فكرة عن رسوم (الأمراض) دى؟ والفلسفة القامت عليها ؟
- أيواا ده سؤال جميل .. نحنا (رأفة) بالمواطن خلينا الأمراض الغير متفشية ذى (الملاريا) و(فقر الدم) و(الإسهالات المائية) وكده رسوما عالية شويه يعنى حوالى عشرين ألف للمرض الواحد والأمراض المتفشية بين المواطنين ذى ( القاوت) و(البرجم) و(الثعلبه) رافة بالمواطنين عملنا ليها رسوم بسيطة ً !!
ممكن ناخد مكالمة : آلو .. آلو منو معاى
- معاك 6578 أ ز
- ياخى لو سمحت أدينا إسمك (العديل) وما (تستهبل) لأنو الترخيص لسه ما بدأ
- طيب أنا ( أ ز) !! عرفتنى؟؟
- لا طبعاً .. ما عرفتك
- أنا المواطن ( أب زرد ) !! وقول للقاعد معاك ده .. جوع جوعتونا .. عطش عطشتونا .. كهرباء قطعتونا .. جن جننتونا وهسع رخيص (رخصتونا) والله بس ما ...(تيت ... تيت .. تيت.. تيت) يبدو إنو الإرسال قطع ... نآخد مكالمة تانية ... معانا منو:
- (صوت أنثوى مايع) : معاكا ...(إنتى سار) من (السااافيا )
- أهلا يا (إنتصار) من (الصافية) .. عندك سؤال؟؟ المسئول معاكى
- واللاهى .. أنحنا ... ما ..عندنا .. إعتراض .. على .. (النمر) .. دى... وكده .. بس .. عاوزين ..الأرقام تكون ... مميزه ... وكده
- لا إن شاء الله نحنا نضم صوتنا لى صوتك ونطلب من المسئولين إنو يوفرو ليكم أرقام مميزه
- معليش بس ممكن أهدى؟
- لا معليش يا (إنتصار) لأنو البرنامج ده مخصص بس لمناقشة (قرار الترخيص) عشان نسلط (النور) عليهو
- يعنى شنو ؟ ما برضو أنا عاوزة أطلب أغنية (النور) .........الجيلانى !!
نرجع يا سعادتك نتكلم شوية عن (تداعيات) القرار المتوقعة من قبل المواطنين ومدى تفاعلهم معاهو وبعدين ناخد مكالمة
- والله انحنا بنتوقع تفاعل كبير من (المواطنين) وأكيد المواطن كالعاده ما ح يخذلنا ورايح يكون متعاون لأقصى درجه لأنو اساسا نحنا عملنا القرار ده من أجل مصلحتو ... يعنى هسع إتصور إنو إنت راقد فى البيت ونط عليك حرامى قمت صحيت لقيتو طالع فى الحيطه ؟ قبل القرار ده ما ينفذ ح تقعد تكورك (حرامى ... حرامى) عشان تلم الجيران ويقوموا الجيران يعملو (نايمين) وتقوم إنت تخاف تمشى عليهو أحسن يكون شايل ليهو (سكين) وإلا مصيبة .. أها بعد القرار ده .. بس تشيل نمرتو المعلقا وترجع تتغطى بالبطانية تنوم والصباح تديها لينا نقبضو ليك فى نص دقبقة !!!
- والله فعلاً يا سعادتك القرار ده إتأخر كتير كان مفروض يكون من عشرة خمستاشر سنه !!
ألو ناخد مكالمة أخيرة :
- آلو؟ معاى منو؟؟
- معاك مواطن
- عارفنك مواطن .. إسمك منو؟
- إسمى ده خليهو لمن تعملوا نمركم دى ح تعرفوهو
- لا لازم عشان تداخل تقول لينا إسمك ؟
- طيب أنا إسمى (حسين أنفاس) .. ممكن أدخل ؟
- أيوا ممكن تتداخل .. عندك سؤال ؟
- طبعا عندى سؤال يعنى جايب (جواب) ؟؟
- طيب بالله بى سرعة عشان ما فضل وكت كتير
- جداً .. أنا كنت بس عاوز أسأل (سعادتو) ده هل المسئولين (الفوق) ديل ح يترخصو (ذنا) وإلا برضو ح يمشو (بدون نمر) !!
- (المسئول يتنحنح) : والله الحقيقة ما ح أقدر أجاوب ليكا على السؤال ده إلا بعدما نرجع لمذكرة (تفسير القانون) !!
- والله أنا بقترح إنو (المسئولين) ديل تدوهم (إفراج مؤقت) عشان ما دوامه وكده !!
طيب يا سعادتك قبلما نختم اللقاء التنويرى ده فى سؤال بيفرض نفسو وهو إنكم هل ح (تغرمو) المواطن (البيخالف) وما بمشى (يترخص) ؟
- هو أنحنا المواطن القاعد ساااكت ما بنسيبو لامن المواطن البيخالف وما يمشى يترخص؟؟ أكيد ح نغرمو 30 ألف وعشان المواطن من هسه يعرف يعنى الزول لو سائق عربيتو وما (مرخصها) وهو فى نفسو ما عندو نمر وما (مرخص) معنى كده يحضر ليهو 60 ألف !!!
الكشات :
بعد إنتهاء المهلة التى حددتها (السلطات) للمواطنين بدأت (الكشات) والتى تتبع قواتها إلى الإدارة التى تم إستحداثها خصيصاً لهذا الغرض والتى سميت بإدارة (الترخيص الشخصى) فمنذ الصباح الباكر ينتشر منسوبو تلك القوات بأزيائهم (الخضراء الغامقة) على مداخل الكبارى و(الصوانى) والتقاطعات الهامة والأسواق وأماكن العمل وهم (يبحلقون) فى ظهور (العالمين) من أجل رؤية (اللوحات) ومقارنتها مع (الرخصة المدورة) التى تقرر أن يتم تعليقها على (الصدور) !!!
فى إحدى الصوانى قام أفراد (كشة الترخيص الشخصى) بإيقاف إحدى الحافلات المتجه إلى (السوق الشعبى) صعد أحدهم وهو يرتدى الزى الأخضر المميز ووقف على السلم مخاطباً الركاب :
- كل واحد ينزل يورينا (ضهرو) عشان نشوف (لوحاتو) ويورينا (صدرو) عشان نشوف (رخصتو المدورة) !!
... (وهو يشير لأحدهم) إنت يا (أب نضارات) هناك ما (تضاير) أنزل شايفك ما عندك (لوحات) .. وإنتى يا حاجه زحى يدك دى من (صدرك) عشان نشوف رخصتك !!
- هى سجمى يا ولدى ما نسيت ألبسا هم (النسوان) ديل ريحونى شبكونى (يلا بيت البكا) أطلعى بى سرعه .. أطلعى بى سرعه ختيتا فى (السرير) وطلعتا !!!
- ما عاوز كلام كتير أنزلو لينا كلكم وأى زول ما مرخص يقيف بى جاى – وهو يلتفت إلى السائق – وإنت ما تنزل لينا قاعد مالك ؟
- (وهو ينزل من الحافلة فى زهج) : يعنى هو الزول كان جلا من (اللابسين أبيض) يقع فى (اللابسين أخضر) دى (مصيبة) شنو الوقعنا فيها دى !!
- (يدخل يده فى جيبه ويخرج دفتر المخالفات) : إنت هناك .. اللابس (لوحة إستثمار) ده .. أيوه إنت .. هسع عليك الله (شكلك ده) شكل إستثمار ؟
- مالو شكلى كمان ؟ أيوه أنا مستثمر وعندى مصنع (لقيمات) ومرخص (إستثمار) عندك إعتراض ؟؟ وأقول ليك حاجه كمان : أنا مصنعى ده عندو إمتيازات وكمان (أولادى ) كلهم كان ما عاجبك لوحاتهم (إستثمار) !!
لوحات أنواع وأشكال :
بدأ منظر الشارع أكثر فوضى فعلاوة على الملصقات واللافتات (الإعلانية) ذات (الألوان) المتنافرة و(الأشكال) غير (المنتظمة) المنتشرة فى غيرما ترتيب والباعه المتجولين والعربات المتكدسة والحفر والمطبات والأوساخ المتراكمة .. علاوة على كل ذلك فقد بدأ منظر الشارع غريباً وأنت تشاهد الجميع وهم (معلقين) اللوحات على (ظهورهم) والرخص المدورة على (صدورهم)
لافتات (صفراء) تشير إلى أن حاملها (حكومة) ولافتات (حمراء) تشير إلى أن صاحبها مغترب (إفراج مؤقت) ولوحات (ق م ) تشير إلى ان صاحبها (قوات نظامية) وأخرى (ح ش) – حركة شعبية- وأخرى (ح ت) – حركة تحرير- وأخرى (بيضاء) للمواطن العادى وأخرى (إستثمار) تشير إلى أن صاحبها مستثمر فى (الشاورما) على أكثر تقدير !!
أبراج مراقبة :
تم إستئجار مواقع إسترتيجية ذات واجهات زجاجية فى الأسواق وأماكن الإزدحام كيما يتم إستخدامها بواسطة المسئولين وذلك من أجل (بسط الأمن) الشامل وتتبع (المواطنين) المشتبه فيهم وقد زودت هذه الأبراج بأجهزة كمبيوتر تحتوى على (بيانات) المواطنين إذ يكفى فقط أن يتم إدخال (رقم لوحة) المواطن لتظهر بياناته جميعها على الشاشة ، كما تم تزويد هذه المواقع بأجهزة إتصال حديثة وشاشات مراقبة تلفزيونية وعدسات مكبرة .
- كده شوف بيانات الزول (6564 خ م ) الماشى قدام الكشك داك .. اللابس جلالبية (سمنية) وشبشب (مقطع) داك !!
- مالو؟
- لا بس شكلو كده ما عاجبنى .. مثير للريبه يعنى
- (وهو يدخل رقم لوحة المواطن وينظر للشاشة) : يا خى (ريبه) بتاعت شنو؟ البيانات بتاعت الزول ده بتقول إنو كان (نائب وكيل) وشالوهو صالح عام !!
- طيب كدى شوف (الود) اللابس قميص (ضيق مشجر) وبنطلون جينز داك ..أيواا (7676 ش ط) داك!! ... بالله عاين ليهو ماشى كيف؟
- (وهو يدخل رقم لوحة الشاب وينظر للشاشة ثم فى إندهاش ): بالله معقول الشاب ده ما عرفتو؟؟ ياخى ده بياناتو بتقول إنو ده (حماده ساوند) .. الواد العندو فرقة (مديح) وبجيبوهو فى التلفزيون طواالى والإذاعة !!
تداعيات بعد التنفيذ :
تداعيات إجتماعية (1) :
على صفحة (الإجتماعيات) بأحدى الصحف اليومية ظهرت هذه الدعوة :
آل (5453 خ ج ) وآل (7692 خ ب)
يتشرفون بدعوتكم لتناول طعام العشاء بمنزلهم الكائن بزقلونا وذلك بمناسبة تأهيل إبن الأول المهندس (6345 خ ج) على كريمة الثانى الدكتورة (7834 خ ب) والعاقبة عندكم فى المسرات ،،،
تداعيات إجتماعية (2) :
- أها والمولود سميتوهو منو؟
- والله بس منتظرين (السماية) أقصد الترخيص ... غايتو ما معروف لكن إحتمال كبير يكون (حاجة كده) خ ت
- وأكيد ح تجيبو فنان؟
- أيوه والله شايف الشباب ديل كلهم قالو عاوزين 9898 م ع
- إنت (9898 م ع ) ده مش أخو (9899 م ع )؟
- لا .. لا ما أخوهو ده (تشابه لوحات) ساكت لأنى أنا بعرف أخوانو كلهم (إفراج مؤقت)
- طيب ما تنسى لمن تجو للسماية أقصد (الترخيص) كلمنى عشان أنا بعرف زول هناك أخليهو يديكم ليهو إسم أقصد (رقم) مميز !!
تداعيات إجتماعية مستقبلية :
- ده عريس شنو الجايباهو لى بتى يا (نفيسه)؟
- ومالو ما عريس يهز ويرز
- يهز شنو؟ و(يرز) شنو ياختى ؟ والله نحنا سألنا تحت تحت لقيناهو ليهو أربعه سنين ما (مرخص)!!
- مالو ياختى ما كان (مرفوع)
- مرفوع شنو يعنى (فاكين لساتكو) ؟؟ ما بيكون (مفلس) ساكت وما عندو حق الترخيص – مواصلة- برى برى يا بت أمى عريسكم ده ما عاوزنو
- يعنى شنو يا (نعمات) ؟
- يعنى عديل كده أنا بتى دى ما بديها لى عريس إلا يكون (ترخيص السنه) !!
تداعيات كروية :
فى أول نقل حى (بث مباشر) لمباراة كرة قدم بعد تنفيذ القرار :
سيداتى آنساتى سادتى من داخل إستاد الخرطوم يحييكم (8657 خ ل) وينقل لكم وصفاً حياً لمباراة القمة بين فريقى (الذئاب الضارية والنسور المفترسة) تتكون تشكيله فريق (الذئاب الضارية) من (4543 ب ك ) فى حراسة المرمى يعاونه فى خط الظهر (4598 خ ت) ظهير أيسر و(2983 خ ت) ظهير أيمن و ... .................
يحكم المباراة الحكم الدولى (612 أستثمار) ... يساعده فى الخطوط (656 إفراج مؤقت).. و 432 (مرور كررى) و (8721 خ ب) حكم رابع .. يغيب عن تشكيلة فريق الذئاب الضارية اللاعب (3241 خ ج ) لعدم الترخيص كما يغيب أيضاً اللاعب الدولى ( 7091 خ و) للإصابه !!!
تداعيات فنية :
وقفت الفنانه (عوضية كتاحة) أمام شباك (الترخيص) لإستلام (اللوحة) الخاصة بها وبعد أن قام الموظف بتسليمها (اللوحة) نظرت إليها فى (إزدراء) قائلة :
- شنو يعنى تدونى نمرة (بايخة) ذى دى؟
- مالا ؟ ما كويسة (7646 ك ش) ؟؟
- بس معقول كمان (ك ش) ؟ إنتو عاوزين الناس ينادونى (عوضية َكَشه) ؟ أنا عاوزة ليا حاجه كده ذى (م ك) عشان تحت تحت المعجبين ينادونى (عوضية مس كول) وإلا (س ج ) عشان ينادونى (عوضية سين وجيم)
- طيب خلاص يا (أستاذه) نديك الرقم المميز ده (5522 ق م )
- (تنظر للرقم ثم ترمى باللوحة بعيداً) : برى برى سجمى كمان عاوزين تدونى ( ق م ) عشان الناس (يكوركو) ليا (عوضية قبل الميلاد) !!
موقع الكاتب :
www.alfatihgabra.com
|
|
 
|
|
|
|
|
|
|
|
Re: ســـيناريوهات : مواطن (إفراج مؤقت) (Re: الفاتح يوسف جبرا)
|
جبرا
يا ممتعاً حد الانتشاء.. شكراً جميلاً
الممتع دوماً عندك هو نقلك للصورة من جميع الزوايا.. اذ تجعل من كتابتك صوراً ناطقة تسعى بيننا..
بدأت قراءة الموضوع وبدأ في وجهي طيف ابتسامة كانت يزداد رويداً رويداً.. لكن حينما وصلت إلى:
خ ب)
خ ج) على كريمة خ ب) والعاقبة عندكم فى المسرات ،،،
لم اتمالك نفسي من الانفجار ضحكاً..
شكراً لك على كل ذلك
| |
|
|
|
|
|
|
|
|
|
Re: ســـيناريوهات : مواطن (إفراج مؤقت) (Re: nashaat elemam)
|
الرائع جبرا
تحية طيبة
والله مشتاقين وتقريبا من شهر وشوية اول مرة اقرا السيناريو لانه كنت مشغول في اجراءات سفر مع ناس المعتربين والجوازات والتاشيرة وديل ناس لو قالوا ليك بتلقي معاهم طريقة للاكل ناهيك من الانترنت ما تصدق وعندي مهاهم حكاوي ما تتخيلها
عموما يا ف ج 6090 تحياتي
| |
|
|
|
|
|
|
|
|
|
Re: ســـيناريوهات : مواطن (إفراج مؤقت) (Re: الفاتح يوسف جبرا)
|
الأخ الاستاذ الفاتح
والله ورطتنا ورطة كبيرة ، يقوم واحد يشيل الكلام ده كله ويعرضو على المسئولين ويقوموا من بكره يشبكونا ليك الترخيص السكاني ، وكمان فيها رسوم فحص ورسوم ترخيص واللوحات مجانية وشركات هولندية خليت ليهم شنو ؟ فكرة ما تخلص
تسلم يا رائع ومني لك مليون تقدير ( ش م 99677) رقم مميز بحقو مشتريه بمليون ونصف رأيك شنو بعد الخلو من الأمراض المزمنة والموانع المسجلة بس سوء تغذية وفقر دم وضعف نظر وملاريا وبلهارسيا ورجفة وشوية حاجات ما بقولها هنا ، بس قالوا لي ش م 99699 غير متوفر بالحاسب الآلي لأنه رقم مميز تم حجزه بناء على توجيهات لجنة الرصد والمتابعة مع ملايين الأرقام المميزة لصالح الوزراء والمستشارين بالمركز والولايات
مودتي
الشفيغ
| |
|
|
|
|
|
|
| |
الفاتح يوسف جبرا
الفاتح خليل الفكي
nashaat elemam
محمد عمر الفكي
فيس بوك
تويتر
انستقرام
يوتيوب
بنتيريست