دعواتكم لزميلنا المفكر د.الباقر العفيف بالشفاء العاجل
|
|
 ساخر سبيل : فاكى فلتر !
|
صحيفة الرأى العام
عدد الأحد الموافق 28 سبتمبر 2008م
موقع الكاتب (مؤقتاً) : www.sudanona.wordpress.com
_________________________________________________________________________________________
أثناء فترة تواجدى بالقاهرة فى شهر مايو الماضى لإجراء عملية (قسطرة) بالقلب قدم لى (قاسم) مرافقى المقيم بمصر الدعوة للجلوس على محل (قهوة سودانية) كما أطلق عليه قائلاً :
- تعال يا استاذ عشان تشوف السودانيين هنا عايشين كيف
كانت القهوة تقع فى (وسط البلد) وكان الوقت عصراً ..معظم الرواد شباباً ما عدا قلة من (العجائز) .. الجو سودانى تماما .. هذا يضع (طبلية) عليها سجائر (البينسون) والبرنجى وآخر يضع أمامة (تربيزة) عليها ( حقت سعوط) وقد قام برص أكياس (التمباك) أمامها .. بينما ست (الشاى) تلبس (فستاناً) محذقاً ذو ألوان صارخة وتنتعل (سفنجه كحلية) وقد (مشطت) رأسها (مشاط أفريقى) وهى تجيب على طلبات الزبائن ذوى السحنات والألوان والأزياء المختلفة .
- الناس ديل شغالين شنو هنا؟
- والله يا أستاذ الغالبية منهم عندهم لجؤ؟
- هو اللجؤ بقى شغل ؟
- يعنى بيدوهم قرشين تلاته كل شهر يعيشو منها
- بتكفيهم ؟
- ما بتكفيهم عشان كده بيقومو يشتغلو حاجات كده !
وأخبرنى (قاسم) بالحاجات (البشتغلوها) الجماعه ديل والتى لم أندهش لها .. ولم أستبعدها (كما يفعل البعض) وذلك لعلمى بأن (الجوع كافر) وأن (الإقتصاد) يتناسب (طرديا) مع الأخلاق ! ولكن أكثر ما إندهشت له هو قوله لى بأن فئة كبيرة منهم (عاوزة تفك فلاتر) !
- أجبته متسائلاً فى إستغراب : يعنى شنو (تفك فلاتر) ؟
- أجابنى فى (بساطة) : يعنى عاوزين يبيعو (الكلى) بتاعتهم ! يعنى الواحده كده بتجيب ليها ذى (كم ألف جنيه) إحتمال (يصرفا) لمن تحصل ليهو (مضاعفات) !
وهنا فقط ... فقط.. أدركت حجم المأساة .. مأساة أن يبدأ الإنسان فى (تشليح) نفسة , المرة دى (كلية) وبكرة (شويت بنكرياس) وبعد بكرة (حتت فص كبد) ويلا .. لا (جمارك) ولا يحزنون (الزول) يكون شايل بضاعتو جواهو وماشى بيها لا من شاف لا من درى ! لم يقطع حبل تفكيرى إلا صوت (قاسم) وهو يقول لى :
- شنو يا استاذ ؟ الحكاية دى شغلتك وإلا أيه؟
- هى من ناحية شغلتنى شغلتنى لكن يا قاسم (سوق الكلى) ده وين؟
- (ضاحكا) : سوق شنو يا أستاذ السماسرة ديل بيعملو فى شنو؟
- (مندهشا) : سمااااسرة ؟
- أيوه يا استاذ مش فى سماسرة (شقق) وعقارات .. وسماسرة (عربات) كمان فى سماسرة (كلى) وسماسرة (كبد) وبنكرياس !
- يعنى هو البيطلع بالكلية (تيستا) اقصد هو البتأكد من إنو شغاله كويس !
- أيوه يا أستاذ ما (السمسار) ده بيودى (البائع) يفحص بضاعنو ويعمل تحليلاتو عشان تكون أوراقو جاهزة !
ولمن يظهر(زبون) والبيعه تتم يمشى لأقرب (حته بتعامل) معاها ويسلم الزبون البضاعه ! والزول البائع بعد داك بيقولو عليهو (فاكى فلتر) !
قلت فى نفسى (أما شغلانية وسخة بشكل) والله (السماسرة) ديل خطرين خلاص عرفنا الواحد يقنعك تبيع (بيتك) الفى (الواحة) عشان يجيب ليك بيت فى (زقلونا) وتطلع ليك بشويه (فرق) يريحك شويه وبعد شويه يقنعك تبيع بيت (زقلونا) عشان يجيب ليك بيت فى حى (أخنق فطس) وتطلع ليك بقرشين حلوين تسدد بيهم (الديون) العليك وتدفع للأولاد رسوم (المدارس والجامعات) وآخر حاجه يقنعك بأنو (البيت) لزومو شنو؟ بيعو عشان الأولاد ما يموتو بالجوع وأجر ليك بيت فى (الربع الخالى) ! لكن يسمسرو فى (أعضاء بشرية) ؟ يعنى الواحد يقتعك (تفك فلتر) وبعد شويه سماعه ( أضان) وشويتين لمبة أمامية يمين (عين يمين) ... لا .. لا دى شغلانية وسخة شديد !
بعد أن أفقت من مخاطبة نفسى قلت (لقاسم) :
- والسماسرة ديل بيكونو قاعدين وين؟
- شوف يا استاذ ديل بيكونو (بيشركو) للضحايا قدام معامل (التحاليل) و(المستوصفات) وكمان فى (القهاوى) – مستطرداً- هسه شفت الزول القاعد هناك بيعاين لينا داك و بيشرب فى الشيشة ولابس ليهو (ساعه دهبية) داااك ونضارة سوداء ؟
- أيوه مالو ؟
- ده متمركز فى (القهوة) دى وبشيل زباينو من هنا !
لدهشتى ما أن إنتهى (قاسم) من جملته الأخيرة حتى قام ذلك الشخص بإرتشاف (فنجان القهوة) الذى أمامه وقام بزح ً (الشيشة ) جانباً ونهض متوجهاً نحونا وهو يرسم على وجهه إبتسامة مصطنعه وقال يخاطبنى:
- البيه مش برضو عاوز (يفك فلتر)؟
- لا والله أنا بس جاى (أسلك فونيه) وراجع بلدى !
كسرة :
ما مشكلة (ربع) الشعب الفضل (يفك فلاتر) ويفضلو (التلتين) – أو كما قال !
|
|
 
|
|
|
|
|
|
|
|
Re: ساخر سبيل : فاكى فلتر ! (Re: الفاتح يوسف جبرا)
|
شيخ الفاتح ..
عيدك سعيد يا مواطن ..
الكلام على المقنيتا و البوبينا ..
ديل أنا ما بفرّط فيهم ..
الدنيا ما معروفة ياخوي ..
أما الجربوكس .. فده رميت طوبتو من زمان .
الواحد مع ناس ( يفكون ) ديل .. بقى شاقي راس مكنة ..
الله لا كسّب العطشقية .
إنا لله ..
بلد حوش خردة صحي .
| |
|
|
|
|
|
|
|
|
 Re: ساخر سبيل : فاكى فلتر ! (Re: الفاتح يوسف جبرا)
|
البروف ابو ناجي
*** كل سنه وانت والاسره الكريمه بصحه وعافيه***
حــســبي الله ونـعم الوكيل.. حــســبي الله ونـعم الوكيل.. حــســبي الله ونـعم الوكيل.. حــســبي الله ونـعم الوكيل.. حــســبي الله ونـعم الوكيل..
علي من اوصولونا الي هذه المرحله من التشرد والضياع وبيع الاعضاء ,, وبيع ماهو أكثر من الاعضاء ,, وظلوا يمتصون ثروة الوطن ودماء هذا الشعب الفضل بالجبايات والضرائب والزكاه والدمغات وكل مايجلب لهم دخلاً ويزيدنا فقراً ومسغبه…
*** ببركات هذه الايام المُباركات ياعلي ياعظيم أنقذنا ممن أتو لإنقاذنا ,, فما اوصلو اليه شعبنا لم يصله في ظل إى نظام كان من قبل …
| |
|
|
|
|
|
|
|
|
|
Re: ساخر سبيل : فاكى فلتر ! (Re: الفاتح يوسف جبرا)
|
استاذنا الجليل الفاتح جبرا أول حاجة كل سنة وأنت طيب وإن شاء الله العيد هذا يكون مليء بسيناريوهات سعيدة ومليئة بالآمال العراض، وإن كانت هذه أمنية صعبة ولكن على المولى عز وجل ليس هناك شيء صعب، ولكن بالجد من مرارات الحياة أنك تسمع لهذه المآسى قاتل الله الغربة وقاتل الله الفقر فعلاً الجوع قد يجعل الكثيرين أن يتاجروا بأعضائهم البشرية، وبالله عليك الله شوف الشعب السوداني دا لطيف كيف في كثير من الأحيان يتعامل مع المآسي بظرف واستوقفتني عبارة فاكي فلتر لدلالة على بيع أحد كليته، شكراً يا استاذ فعلاً السيناريوهات هي انعكاس عن حالة الشعب السوداني عن نفسه خارجاًوإليك هذا المقطع عشان نشوف منو المتسبب في خروج خيرة الشباب عن الوطن العزيز:هي أبيات جميلة لشاعر الوطن الجميل محجوب شريف من قصيدة الرائعة "غويشاية"
ضاقت ولما استحكمت حلقاتا
ياللاسف ... كم من ولد فاتا
سهولا ، جبالا ، غاباتا
ونيلا جاري
في حزة مفازاتا
هديك لجة موانيها
و فوق رحمة سماواتا
ضاقت و لما استحكمت حلقاتا
كم من ولد فاتا ؟؟
| |
|
|
|
|
|
|
|
|
|
Re: ساخر سبيل : فاكى فلتر ! (Re: Badr Edinn Abdul Rahman)
|
عزيزى بدرالدين
كل سنة وإنت طيب
| Quote: وإن شاء الله العيد هذا يكون مليء بسيناريوهات سعيدة ومليئة بالآمال العراض، وإن كانت هذه أمنية صعبة ولكن على المولى عز وجل ليس هناك شيء صعب، |
هى من ناحية إنها أمنية صعبه فصعبة جدا مع الوضع الحاصل ده لكن (التغيير) ليس على الله بعزيز! تحياتى
| |
|
|
|
|
|
|
|
|
|
Re: ساخر سبيل : فاكى فلتر ! (Re: الفاتح يوسف جبرا)
|
شكرا جزيلا الاستاذ الفاتح يوسف جبرا علي اضاتك المهم لظروف عدد كبير من الشباب السودانيين المقيمين بالقاهر وكيف وصلت بهم سؤ الاحوال ( اسو ما يمكن ان يتصورة انسان هو بيع اعضاك الداخلية حتي تحفظ نوعك من الفنا من
من الفنا
قبل حوالي عشرين كنت في القاهرة لظروف علاج الوالدة ودهشت حتي البله في نفس القصة
اللة يجازى الكان السبب (الكيزان طبعا )
| |
|
|
|
|
|
|
|
|
|
Re: ساخر سبيل : فاكى فلتر ! (Re: ياسر شبيكة)
|
Quote:
ويكفينا شر الفلترة وتفييش الهوامش والتفييص وخلافه
|
ياسر .. كل سنة إنت وأفراد الأسرة الكريمة بألف خير ... غايتو الفلترة دى عرفناها لكن الباقى ده ما عرفناهو بس الله يكفينا شرو !
| |
|
|
|
|
|
|
|
|
|
Re: ساخر سبيل : فاكى فلتر ! (Re: زهير الزناتي)
|
| Quote: تبددت ثروة عادل التي حسبها لن تنتهي في فترة وجيزة ، ولم تتعالج والدته ، ولم تنقل أسرته من خط فقرها ، وفقد كليته ... |
زهير .. كل سنة وإنت طيب .. مثل هذه القصة التى سردتها تتكرر كثيراً .. شوف بالله وصلنا وين ؟
| |
|
|
|
|
|
|
|
|
|
Re: ساخر سبيل : فاكى فلتر ! (Re: الفاتح يوسف جبرا)
|
الاستاذ الفاتح جبرا
كل عام وانت وكل السودان واهله في خير وسلام
والتحية لك وانت تسرح بخيالك في الواقع الذي نصطدم به كل يوم .. فتخرج منه بتلك السيناريوهات وتخرجها بأسلوبك الممتع .. والسهل الممتنع ..
ولي تعليق بسيط (زي ما بقولو) على مسألة المتاجرة بالاعضاء .. حيث اعتقد ان تلك الفئة التي ذكرتها على بؤسها الا انها اسعد حظا ممن تسرق منه كليته دون وعي منه ودون ان يتلقى مقابلا لها .. حينما يدخل المريض الى غرفة العمليات لاستئصال الزائدة الدودية ليخرج منها وقد استؤصلت جميع الزوائد ..
وهناك فئة اخرى .. تلك التي تتم نقل عملية اعضاء لها .. وتكون قطعا غير اصلية او تقليد .. كمن تزرع لهم اعضاء من حيوانات ..
عشان كدة يالفاتح ياخوي أصلك ما تفتح بطنك لي دكتور .. الا اذا كانت عملية بدون بنج ... وبكامل قواك العقلية .. وكل واحد يحاسب على لغاليغو
| |
|
|
|
|
|
|
|
|
 Re: ساخر سبيل : فاكى فلتر ! (Re: elfadl abdellatif)
|
Quote: حــســبي الله ونـعم الوكيل.. حــســبي الله ونـعم الوكيل.. حــســبي الله ونـعم الوكيل.. حــســبي الله ونـعم الوكيل.. حــســبي الله ونـعم الوكيل..
علي من اوصولونا الي هذه المرحله من التشرد والضياع وبيع الاعضاء ,, وبيع ماهو أكثر من الاعضاء ,, وظلوا يمتصون ثروة الوطن ودماء هذا الشعب الفضل بالجبايات والضرائب والزكاه والدمغات وكل مايجلب لهم دخلاً ويزيدنا فقراً ومسغبه…
*** ببركات هذه الايام المُباركات ياعلي ياعظيم أنقذنا ممن أتو لإنقاذنا ,, فما اوصلو اليه شعبنا لم يصله في ظل إى نظام كان من قبل … |
آميييييييييين
وعيدكم مبارك
| |
|
|
|
|
|
|
|
|
 Re: ساخر سبيل : فاكى فلتر ! (Re: الفاتح يوسف جبرا)
|
الأستاذ الرائع أبو ناجي..
ما عرفت أبكي و الا أضحك..
ربنا يلطف بالعباد..
Quote: أما الجربوكس .. فده رميت طوبتو من زمان .
الواحد مع ناس ( يفكون ) ديل .. بقى شاقي راس مكنة .. |
عليك الله ما بتلقى لينا جربوكس سكند هاند إستعمال دبلوماسي من ناس (يفكون) ديل ؟؟!!
| |
|
|
|
|
|
|
|
|
|
Re: ساخر سبيل : فاكى فلتر ! (Re: Adel Sameer Tawfiq)
|
عادل إذيك .. كل سنة وإنت طيب وأفراد الأسرة الكريمة ..
| Quote: عليك الله ما بتلقى لينا جربوكس سكند هاند إستعمال دبلوماسي من ناس (يفكون) ديل ؟؟!! |
يعنى ناس (يفكون) ديل (عويرين) يفكو ليهم (جربوكسات إستعمال دبلوماسى) !
| |
|
|
|
|
|
|
|
|
|
Re: ساخر سبيل : فاكى فلتر ! (Re: Adel Sameer Tawfiq)
|
في كتابة سابقة،لك،اندهشت،من هول مايمكن ان يقدمه الترميز.
اليوم،لا اجد شئ يستفز معرفتي السابقة!
هناك بيع للخصية في القاهرة، دي فلاتر برضو؟
ـــــــــــــــــــــــــــــــــــ
مخاطبة الطبقة الوسطي،عبر النت،تحتاج قراءة ما لنجيب محفوظ، مع الاعتذار!
| |
|
|
|
|
|
|
| |
الفاتح يوسف جبرا
Emad Abdulla
عبدالكريم أحمد الامين
Badr Edinn Abdul Rahman
عبد العظيم احمد
Abdlaziz Eisa
Nasr
ياسر شبيكة
طارق جبريل
MAHJOOP ALI
saber alhawatti
زهير الزناتي
elfadl abdellatif
مهيرة
Adel Sameer Tawfiq
عبداللطيف حسن علي
فيس بوك
تويتر
انستقرام
يوتيوب
بنتيريست