|
|
 الاخوات والاخوة : يا جماعة صحــي الكوارع بتخلـي الزول شين ؟؟؟؟؟ !!!!!!!!
|
اولا حمد الله ع سلامة الجميع في المنبر ..
والله بكري عيشنا في غربة ونحنا في السودان رد الله غربتة ..
قبل يومين يا جماعة واحد صحبي شديد عزمني عشاء في (الموناليزا)
ودا مطعم في بري لذيذ جدا !! لاحطوا السودان (الملولو) دا موناليزا
ومطعم كوارع .. المهم قعدت واتفاجا ليك العشاء في صحن كبير جدا
(كوارع) !! يا زول دا شنو قال لي دي احسن اكله في العالم والله الصباح
تقوم زي الفل ( الحركات ديك) المهم قعدنا واخوكم بشرب في الشوربة
ولسة هي ماشة في زيادة !! المهم صحبي دا من ناس يا زول صلي ع النبي
ومد ايدك !! وانا ومواصل اشرب واتنفس زي القاعد اعوم والشوربة في
تزايد مستمر !! فقمت ختيت الملعقة قام صحبي لاحظ وقال لي يا زول حرم تواصل
شنو انت شبعت !! قلت لية لا ابدا بس فترت !! شبكني ليك لا والله لسة
اللحمة وقام غطس يده و طلع لي كراااع كبيرة جدا .. اضرب اضرب يا زول
المهم وخوفا من النقة والالحاح والحليفة مسكت في الكراع الكبيره ورفعتها
فوووق !! قلت لية يا زول دي البقرة دي كان مقاسه 49 ولا شنو !! قام لالالا
ابدا يا زول دي طاعمة جدا ونضيفة وشبكني محاضرة عن البقر والكوارع !!
المهم بديت اكل منها وهي مطاطا جدا تقول طبخوها بالشراب ( ضم الشين)
المهم انتهينا وقال لي بيبسي ولا حليب !! لا حول ولا قوة الا بالله قلت لية
شنو يا اخوي دي تركيبة شنو كوارع وحليب يعني نبدا بالكرعين ونمشي لفوق
ولا شنو !! حليب شنو يا راجل انا لا قاعد اشرب بيبسي لا حليب ومشينا !!
مشيت البيت حاولت انوم غلبني بعد صعوبة نمت وحلمت ببهارات وشوربة ماجي
بقدموها لي حوريات في الجنة !! قمت من النوم الصباح تعبان جدا وزي الاكلت
لي كوارع كلب كل مرة برفع في رجلي مشيت الحمام برضة رفعت رجلي في الحيطة
المهم تعبان شديد وريحة البهار في خشمي !! يا الله .. دي اول مرة اشوف لي
هانق اوفر بتاعت كوارع اصلة كان بتجيني الصباح في ايام جاهليتي التانية
من حاجات تانية حامياني !! انشاء الله ربنا يدوقنا خمرة الجنة .. امييين
المهم بعد تعب كده استحميت وطلعت من البيت فقابلت واحد صاحبنا كده في
العربي هو شين جدا جدا فحكيت ليه انه انا اكلت كوارع امبارح وهسة تعبان
قام قال لي يا زوول الكوارع دي ما بتعمل ليك حاجة عادي جدا وبتبقي كويس
دا وهم منك ساي !! بس هي عندها عيب وااحد قلت لية شنو ( وانا خايف) قال
لي لا ابدا بس لو واصلت فيها بتخليك شين !! شنو !! قال لي لا والله الكوارع
معروفة بتخلي الواحد شين وقام قال لي يا اخي انا قبل ما ادمن اكل الكوارع
والله كنت قيافة ويوم كده بورييك البومي !! والله يا جماعه الزول دا اشنا زول
يمكن في القرن الاقريقي كله وهو مجرب !! فانا خايف شوية عندي باقي وش عاوز اعرس
بيه لما ابلغ النصاب فقمت سالت ناذر وماسا المساء قايلين الموضوع هذاار وقعدوا
يضحكوا !! قابلت نادية السر واشراقة وانعام برضة في بيت حيدر قاسم عملن نايمات
وما سمعن بالكوارع ذاتتتا ونادية دخلت لي في توب الهيلتون ياااي وما عارف شنو
واشراقة قالت لي هو انت خايف من شنو !! يعني ما عندي حاجة اخاف عليها !!
وسجيمان لانة اصلا شين جدا ( ملحوظة: خلقة الله بدون كوارع) قام الحاقد قال لي لا والله
الكوارع ما بتعمل شي وانا بيطري وعمل لي مكناتو ديييك عاوزني ابقا زيووو !!
والله انا قلقان جدا وعاوز راي الاطباء في المسالة دي ضروري جدا جدا ..
الموضوع جاد والله لا يضيع اجر من حافظ علي وجة مؤمن
شكرا وتحياتي
منعم
|
|
 
|
|
|
|
|
|
|
|
Re: الاخوات والاخوة : يا جماعة صحــي الكوارع بتخلـي الزول شين ؟؟؟؟؟ !!!!!!!! (Re: عبد المنعم سليمان)
|
والله ضحكي صحا النايم كلو ...
انا ما حكيت ليك انو في مرة من المرات خالتي عندها رطوبة ووصفوا ليها الكوارع قاموا مشوا اشتروا اظن حلة المرة كلها جابوها مسحوا بيها خالتي ...
بالليل الكدايس حمن الناس النوم وباقي خالتي حارسنها من الكدايس (بس بس ) لمن اصبح الصباح ...
بس قصة تبقى الزول شين دي عايزة ليها دراسة خاصة الزول يمشي لي (زينب الجمل او لي خالتك سعدة ) اشهر بائعات كوارع في الصحافة يسألهن من المقولة دي ...
الله يجازي محنك يا عبد المنعم
كدي يا جماعة النريكم صورتوا وانتوا احكموا من الكوارع ولا من شي تاني !!!
| |
|
|
|
|
|
|
|
|
|
Re: الاخوات والاخوة : يا جماعة صحــي الكوارع بتخلـي الزول شين ؟؟؟؟؟ !!!!!!!! (Re: عبد المنعم سليمان)
|
والله ياعبد المنعم الكوارع دي الذ أكلة
وخاصة مقاس 40
كان عندنا جارتنا زوجها واخوانها واخوان زوجها تجار وبيجيبوا الكوارع كل اسبوع ويرفعوا لينا منها قمنا ادمنا الحكاية وبقينا نجيبها ونقول ليهم اعملوا لينا وبعد فترة اتخصصنا فيها خاصة بعد اضافة زول جديد للأسرة زوج اختي من امدرمان .. وما ادراك ما ناس ام درمان وحب الكوارع والسجك والكمونية .. الخ .. المهم انا بقيت مثقفة جداً في الكوارع ..
في الداخلية في الجامعة جينا برالمة ..
والبرلومات كلو واحدة خاشة في دور حنكشة ..
وانا حالة الشوق جاتني قلت ليهم نفسي امشي البيت آكل كوارع..
البنات يعجبوك قالوا ما بيعرفوها .. اختك زعلت زعل شديد .. قلت ليهم .. انتو ما مثقفات ولا سودانيات ..
وثقافكتم ضحلة وسمعتهم ليك كلام عن المفردات السودانية العتيقة والأكلات الغربيةالبعرفها والما بعرفها .. كلها ..
المهم مشيت محل بتاع كوارع .. وطلبت كوارع بمبلغ كبير وأكبر صحن ..
وطبعاً انا زعلانة ومغيوظة !! جبتها
طقطقت ليك ابواب الغرف كلها وخاصة البنات القالوا ما بيعرفوها .. اطلعو يلا الكوارع جات.. وماف زول يقول لي ما بضوقها.. ولو ما دايرة تضوقيها تجي تشوفيها.. وعشان ما تقولوا ما بنعرفها ...
وأكلتهم ليها .. وضربوا ضرب رهيب ..
وأكلوا الكوارع .. واصبحوا من عشاقها حتى نهاية المدة في الجامعة ..
ولما اتخرجن كن من اجمل بنات الجامعة بل زدن وسامة على وسامتهم..
يعني اطمئن يا عبد المنعم..
| |
|
|
|
|
|
|
|
|
|
Re: الاخوات والاخوة : يا جماعة صحــي الكوارع بتخلـي الزول شين ؟؟؟؟؟ !!!!!!!! (Re: ناذر محمد الخليفة)
|
أخي عبد المنعم:
إنت حقّا زول ظريف. بس الكلاماالبتقولو دا ما ليه أساس علمي. في تقديري أنّ أكل اللحم بشكل عام، و خصوصا الكوارع، غير صحّي و يسبّب مضاعفات صحيّة خطيرة مع تقادم الزمن، مثل أمراض الأوعية الدمويّة المحتلفة، كضغط الدم،التخثّر الدموي، ال plaque و بالذات تلك التي تصيب ال
Carotid Artery الذي يغذّي المخ بالدم المؤكسج. حدوث ال plaque في الكاروتيد اّرتري يسبّب الشلل الوظيفي في بعض أعضاء الجيم المهمّة، كاليد، و صعوبة النطق.
ياأخي أصبح نباتي مثلي، و ستعيش، بإذن الله، حياة صحية جيّدة و مديدة.
طارق الفزاري
ود زينب
| |
|
|
|
|
|
|
|
|
|
Re: الاخوات والاخوة : يا جماعة صحــي الكوارع بتخلـي الزول شين ؟؟؟؟؟ !!!!!!!! (Re: Abdelmuhsin Said)
|
السلام عليكم
عبد المنعم
شخصياً وعلمياً أظن أن لقول صاحبك الشين نصيب من الصحة
بس ما عارف الEffect ده حيحصل ليك من First Dose ؟
انا ما عندي علم بالكوارع تحديداً
لكني سأجتهد بالقياس
قرأت أن الأديب جمال الغيطاني يحكي أنه قابل رجلاً من الصين عندما كان يستعد لإصدار صحيفة أدبية ، وشجعه اتقان الرجل للعربية واطلاعه الجيد على الأدب العربي أن يطلب منه أن يكتب معه في صحيفته كي تتواصل وتتلا قح الثقافة الصينية والعربية
وحينها رد الرجل بغضب ( من قال لك أنني صيني ..أنا مصري أعيش في الصين منذ 20 سنة )
عندما تطلع الأديب لملامح الرجل وجد أنه لم يكن مخطئاً
فقد كانت ملامح الرجل صينية تماماً .. العيون الضيقة والأنف والتقاطيع عموماً صينية
وتكونت للأديب قناعة أن اللغة تساهم في تشكيل وجه الإنسان فاللغة الصينية كي تنطقها يجب أن تدرب تقاطيع وجهك وعضلاتك على تشكيل معين يتخذ طابعاً دائماً بمرور الوقت
ويخلص أن من يتكلم العربية بصورة دائمة تتشكل لديه ملامح عربية ( الحمد لله بشاشا كسح)
ومن ينطق الصينية كذلك
بخصوص الكوارع فأظن والله أعلم أن لها طريقة معينة في الأكل
فيجب عليك مد الرفارف و كضم العين الشمال وصَر الجبهة ( يعني تعمل الشنا الكنا بنقولها لأطفالنا زمان)
ومداومتك على ذلك حتما ستقودك لشناة (سجيمان)
وربما لو زدت الجرعة لفقت ( المر)
ولكن برضو يجب أن نري الأصل
فربما كنت أصلاً شين وتريد أن تضع السبب في الكوارع ( البريئة )
هذا اجتهادي في القضية
........................
وما الناس إلا هالك وأبن هالك *** وذو نسب في الهالكين عريق
| |
|
|
|
|
|
|
|
|
|
Re: الاخوات والاخوة : يا جماعة صحــي الكوارع بتخلـي الزول شين ؟؟؟؟؟ !!!!!!!! (Re: عبد المنعم سليمان)
|
Quote: وتكونت للأديب قناعة أن اللغة تساهم في تشكيل وجه الإنسان
فاللغة الصينية كي تنطقها يجب أن تدرب تقاطيع وجهك وعضلاتك على
تشكيل معين يتخذ طابعاً دائماً بمرور الوقت
ويخلص أن من يتكلم العربية بصورة دائمة تتشكل لديه ملامح عربية
( الحمد لله بشاشا كسح) |
سجمك يا تروتسكي!
...هههههه
غايتو يا منعم (كوارع كلب) ذكرتني بنكتة صاحبك ..يوم الخميس عبأ الفيهو النصيب
و بدأ مشروع المزة.. اها بوش من هنا و كبدة من هناك و سجك من بيجاي وفلافل
مع الفرد.... لمن وصل شارع بيتم كان قشا ليهو (صفرة).. اها هاجمتو ليك نوبة
(عزف) قام اتكل على الحيطة و دور في السيمفونية... المهم أثناء الشغلانة جا
جريو مهوي و برضو عايز يمز .. صاحبنا لمن انتهى عاين كدا
و بدا يحسب : الكبدة دي ضربتها مع ناس فلان و الطعمية في المطعم داك
والسجوك في الحلة ديك.. لكن يا ربي الجريو ده لهطتو وين!!
| |
|
|
|
|
|
|
|
|
|
Re: الاخوات والاخوة : يا جماعة صحــي الكوارع بتخلـي الزول شين ؟؟؟؟؟ !!!!!!!! (Re: عبد المنعم سليمان)
|
الزوول ..
Quote: فيجب عليك مد الرفارف و كضم العين الشمال وصَر الجبهة ( يعني تعمل الشنا الكنا بنقولها لأطفالنا زمان)
|
والله ما قلت إلا الحق ..
طبعا الكوارع لمن لا يفقهون فائدتها عندها مزايا كتيرة .. صراحة يا عبد المنعم أنا كنت زمان بطني بتطم من الكوارع ولا حتى باكلا لكن في فترة معينة من فترات الجهل .. عندي أصحابي كدة إتسلطوا علي وأقنعوني بي فائدتا وإنها بتثبت الأمور (نسأل الله الثبات) !! وفعلا جربتها ومن ديك وليبيا فتحت .. بقيت مرضان مرضة شديدة للكوارع .. العشا أساسي جدا .. خاصة عند قدورة بتاع الديم وعشة بتاعت الصحافة ديك وأظنو أي زول بيعرفا ومرة مرة في نادي الخرطوم تلاتة .
الغريبة إنو الكوارع رغم إنها اكلة شعبية لكن الكتير من المطاعم الراقية في الخرطوم بقت تقدم الكوارع ضمن أطباقا .. عندك مثلا لذيذ في نمرة إتنين .. بقى يعمل كوارع بطريقة راقية جدا ويقدما ليك بي الشوكة والسكين لمن تستغرب !!..
من فوائد الكوارع إنها أأأأ اللا ......... إحم !!!!!!
ما عارف أعبر ليك كيف لكن الراسخون في العلم بياكلو صحنين كوارع يوم الدخلة بيقولو إنها بتثبت الرُكب وبتساعد كتير (فياغرا بلدية وكدة) !!
صنفرة :
الغريبة أنا مما إتعلمت أكل الكوارع طوالي زايد في الوجاهة !! ما عارف الشغلة مشت مع عبد المنعم بالعكس لييه !! أمكن المشكلة في طريقة الإستعمال !!
| |
|
|
|
|
|
|
|
|
 ياخوي البتجيك في وشك سامحتك (Re: ناذر محمد الخليفة)
|
منعم
ياخوي البتجيك في وشك سامحتك
كعب تجيك في محلة ثاتية تحميك
المشي وتبقى زي الشقي لمن يعترو ليهّّّ @@
___________________________
في برضو حاجة لذيذة في السودان
اسمها مديدة العريس وهي خليط من
العسل و الطحنية و مديدة الحلبة
و الكاستر و البسبوسة و السمن البلدي
تخلط في صحن واحد .. تقول الواحد داير
(......) روما
| |
|
|
|
|
|
|
|
|
|
Re: الاخوات والاخوة : يا جماعة صحــي الكوارع بتخلـي الزول شين ؟؟؟؟؟ !!!!!!!! (Re: عبد المنعم سليمان)
|
الأخ منعم
سلاماً من الله عليك
والله يامنعم الله يديم النعمة ذكرتني واحد زمن الجامعة بتاع كوارع في بانت مدني بالقرب من أبو جبل كنا لمن نمشي ناكل الكوارع وطبعاً الأكلة دي بالأسبوع اول حاجة عشان تعرف الكوارع بتاعتو عزيزة لازم تغسل الصحن وتحلب الليمون وتنظف التوم لانو بيعمل ليك القدحة قدامك كان راجل ديكتاتور لكن كوارعو بتجبرك اما حكاية الشنا دي ما عارفه لكن واحد جزار قال بتكبر الخشم نتيجة للمجهود الكبير واللياقة بتاعته..
خالص الود
| |
|
|
|
|
|
|
|
|
|
Re: الاخوات والاخوة : يا جماعة صحــي الكوارع بتخلـي الزول شين ؟؟؟؟؟ !!!!!!!! (Re: عبد المنعم سليمان)
|
| Quote: والله بكري عيشنا في غربة ونحنا في السودان رد الله غربتة .. |
عشان كدة يا منعم ما لقيت موضوع و مشيت أكلت الكوارع...
| Quote: جدا وزي الاكلت لي كوارع كلب كل مرة برفع في رجلي مشيت الحمام برضة رفعت رجلي في الحيطة |
جــرجـر .. أوعا تبقى زي إيبولا داك...
| Quote: والله يا جماعه الزول دا اشنا زول يمكن في القرن الاقريقي كله وهو مجرب !! |
الظـاهر عليــك حاتبقى زيووو ...
| Quote: فانا خايف شوية عندي باقي وش عاوز اعرس بيه لما ابلغ النصاب |
| Quote: واشراقة قالت لي هو انت خايف من شنو !! يعني ما عندي حاجة اخاف عليها !! |
إنت كدي جيب وشك دة و تعال بعـداك بنحكـم ... و لا نحرش إشـراقة حيمورة تنزل صــورتك الخــايف عليهـا (بشيلا في ...)
و الله يا منعم يا خوي انا خايف وش الكوارع السمح الفي الصورة التحت دي النزلا الصحافة30 يكون أحسن من وشك...
غايتو يا منعم حكايتك حكاية ... يوم واحدة باصقة فيك ... و يوم واحد يأكلك كوارع ... ما قلنا ليك الشقـي مالــو؟؟؟؟
إنت كدي تعــال جــرب كــوارع عجمـــان و ما تنســى تكلــم هشــام الزول...
| |
|
|
|
|
|
|
|
|
|
Re: الاخوات والاخوة : يا جماعة صحــي الكوارع بتخلـي الزول شين ؟؟؟؟؟ !!!!!!!! (Re: عبد المنعم سليمان)
|
الصحافة 30
العزيز هيثم
ارجو سحب صحن الشنا ده !!
قوانين المنبر العام ولوائحه
ا- يمنع منعاً باتاً التدخل في شؤون إدارة المنتدى. ولإدارة المنتدي كامل الصلاحية في حذف أو تعديل أو نقل أو إغلاق أي موضوع، أو إيقاف عضوية أي مشترك دون
- على جميع الأعضاء الالتزام بأدب الحوار والاختلاف واحترام الرأي الآخر. ولا يجوز لأي عضو أن يسب أو يشتم أي عضو آخر أو يكفره بسبب رأيه أو معتقده او يضع له صحن كوارع
ساتقدم بشكوي رسمية لبكري
ارجو سحب الصحن
توقيعات لسحب الصحن :
منعم
| |
|
|
|
|
|
|
|
|
|
Re: الاخوات والاخوة : يا جماعة صحــي الكوارع بتخلـي الزول شين ؟؟؟؟؟ !!!!!!!! (Re: عبد المنعم سليمان)
|
Quote: ما بعاتي شدييييد شوية حراشيف في الوش والكوارع شالتا !!
لكن عبد المنعم دا داير يرميها في الكوارع ساي !! |
شنو يا ناذر فلجة وشامة ووجنات اعمل شنو عشان اقنعك امثل يعني ولا شنو !!
يا ناذر يولد الانسان في احسن تقويم ووالداة يربيانة ويقابلكم انتم
فتفولانه او تكورعانة او تحرقوا ثيابة !!
اعمل شنو يعني ؟!!
يا ناذر في ذمتك اسرار امس قالت شنو في اخوك واشراقة ذاتها حاضرة !!
الوجاهة بفهموا الفنانين ويا ناذر مفروض تكون انت شايفا !!
منعم
| |
|
|
|
|
|
|
|
|
|
Re: الاخوات والاخوة : يا جماعة صحــي الكوارع بتخلـي الزول شين ؟؟؟؟؟ !!!!!!!! (Re: عبد المنعم سليمان)
|
اخي عبدالماجد
تحياتي
ارجو الالتزام بقوانين المنبر ياااخ واسحب الصور
قوانين المنبر العام ولوائحه
ا- يمنع منعاً باتاً التدخل في شؤون إدارة المنتدى. ولإدارة المنتدي كامل الصلاحية في حذف أو تعديل أو نقل أو إغلاق أي موضوع، أو إيقاف عضوية أي مشترك دون
2- على جميع الأعضاء الالتزام بأدب الحوار والاختلاف واحترام الرأي الآخر. ولا يجوز لأي عضو أن يسب أو يشتم أي عضو آخر أو يكفره بسبب رأيه أو معتقده او يضع له صحن كوارع .
خالد
تحياتنا
| Quote: وبعدين قصة شين كل المتعاطين للكوارع او اغلبهم نقدر نقول الواحد تلقاه صارطبيعي |
بس بتاع صحبي داككك ما وش طبيعي ده فووووق العادة
منعم
| |
|
|
|
|
|
|
|
|
|
Re: الاخوات والاخوة : يا جماعة صحــي الكوارع بتخلـي الزول شين ؟؟؟؟؟ !!!!!!!! (Re: sudania2000)
|
شكرا يا منعم على هذه الوجبة اللذيذة اقصد البوست اللذيذ ..
بوستك مشكلتة انه داير ليه ناس حرفا بضم الحاء وفتح الراء .. بالله بوست طويل عريض زي ده وفيه ثلاثة حرفا بس؟؟
تعرف يا منعم كوارعك دي بتلخص مشكلتنا نحن السوادنيين، لأننا ما بنعرف نفرز اعدائنا من اصدقائنا كويس، يعني الليلة واحد يعمل معاك شكلة كبيرة وبكرة يرجع ويبقى صاحبك وبعد يومين يشاكلك تاني .. اها انت وضيوفك ديل كلهم عينكم للفيل عديييييييل كده وتطعنوا لي في الكوارع المسكينة دي .. وحتى كوستاوي احرف حريف عمل فيها ما سمع بالكوارع
Quote:
اما حكاية الشنا دي ما عارفه لكن واحد جزار قال بتكبر الخشم |
اها البكبر الخشم ويتقل اللسان ما الكوارع لكن ما قبلها
Quote:
قال لي لا والله الكوارع معروفة بتخلي الواحد شين |
برضو البخلي الواحد شين ما الكوارع لكن ما قبلها لانه الواحد يصر وشه ويمطمط شلاليفة ويزرزر عيونه .. اها كل الحاجات دي لمن تبقى على الزول كل يوم اكيد حايبقى شين
Quote:
ملحوظة: الصورة اخذت بعد اكلة الكوارع بساعتين يعني بالواضح كدة بعد انتشار السم في الجسد والوش والانف والحنجرة |
ده الكلام .. اها ده الفيلم ظاااااتو على قول هباني البسوي الحاجات دي في الجسد والوش والانف والحنجرة لكن رامين اللوم على الكوارع المسكينة دي
Quote:
امس حلمت ببكري شايل لاب توب وداخل مبني الصحيافة !! |
اها شفت الأحلام المزعجة دي سببها كل ما يحدث من فعل يسبق اكل الكوارع
نجي للحرفا
Quote:
دا حسب نوع المزة البتمزها بيها !!! |
ناذر ده حريف لأنه بمز
Quote:
يا خوى يا منعم
إنت وناذر شـابكننا زمن الجاهلية
طيب ماكلين كوارع فوق أم كم
والجايبنا ليكم شـنو |
اها رأفت ميلاد ده مش حريف ده خبير عديل كده كوارع ساكت ما بتجيبه إلا تكون Complete package شوف الخبرة عليك الله ماظاهرة في شيباتة ديل؟
Quote:
و الله دى مش تخلينى ( شين !!! ) كان تخلينى ( قرد !!! ) ما ( انطها !!! ) شبر !!!! |
عبد الماجد ده حرييييييف وقالها ليك عديل كان تخليني قرد ما انطها شبر وهو عارف البخليهو قرد شنو
Quote:
اخوى عبد المنعم الكوارع دى مافيها كلام لكن ات استعملتها قبل والله بعد ومن كلامك على حسب خبرتنا انت استعملتهاقبل00 ولذلك هى اكيد زعلت منك وغلتت عليك شويه0000 دى عندها حرفا00(بضم الحا) وزى ما قال اخونا ناذر تستعمل لعدة اغراض قبل اوبعد عند الضروره00000 وبعدين قصة شين كل المتعاطين للكوارع او اغلبهم نقدر نقول الواحد تلقاه صار وشو طبيعى00000تحياتى |
خالد المحرب ده ما عارف ليه اسمه باقي لي زي اسماء السعوديين كده لكن على كل هو حريف وشخص الداء واعطى الدواء ..
ربما عدت لأحكي لكم بعض القصص الكوارعية التي شهدت احداثها اذا وجدت متسعا من الوقت ..
خالص محبتي
الصاوي
| |
|
|
|
|
|
|
| |
عبد المنعم سليمان
انعام حيمورة
القلب النابض
ناذر محمد الخليفة
Abdelmuhsin Said
الزوول
Yassir Tayfour
Gaafar Ismail
saadeldin abdelrahman
Ahmed Abdallah
Ishraga Haimoura
عبدالعظيم عثمان
Alsa7afa_30
يازولyazoalيازول
Haytham Abdulaziz
Salah Waspa
رأفت ميلاد
سجيمان
عبدالكريم الامين احمد
willeim andrea
Kostawi
elsawi
عصام علي أحمد
فيس بوك
تويتر
انستقرام
يوتيوب
بنتيريست