دعواتكم لزميلنا المفكر د.الباقر العفيف بالشفاء العاجل
|
|
 ليلة وداع الفنان ياسر مبيوع بحضور محجوب شريف ..تغطية شاملة ..
|
اقام امس اعضاء سودانيز حفل وداع للاستاذ ياسر مبيوع
بمجمع حدائق الخليج بالدوحة ..واكتظت القاعة بالحضور
الذى جاء وفاء لياسر مبيوع الذى كان مشاركا فى جميع
الفعاليات الثقافية والفنية والاجتماعية التى اقيمت طوال
تواجده بالدوحة ..وفى هذه الليلة ابدع ياسر مبيوع فى
تقديم الوصلات الغنائية حتى الساعات الاولى من صباح
اليوم الثانى ..وقد اشتمل الحفل على عدد من الفقرات ..
سيوافيكم الاستاذ فيصل الزبير بتغطية شاملة للحفل ..
وحتى موعد قدوم فيصل..نقدم الشكر لكل من ساهم
فى انجاح هذه الليلة ...ونخص بالشكر عبدالجليل
نادوس وابنوسته الذين فتحا دارهم وشرفونا
بأقامة الحفل فى دارهم ..والشكر لكل من حضر
مشاركا لنا فى هذه الليلة من الضيوف الكرام ..
|
|
 
|
|
|
|
|
|
|
|
Re: ليلة وداع الفنان ياسر مبيوع بحضور محجوب شريف ..تغطية شاملة .. (Re: بورداب الدوحة)
|
شكرا ياسر ..
نادوس ..
ابنوسة ..
معتصم ..
وكل اؤلئك الرائعون بالامس
واللسة ما فكوا منى
كان طقسا اليفا جدا ..
وكان ( الشافع ) يا معتصم ما شافع نصاح
كان غناءا شاهق الحضور , اخدر ووسيم
والفيصلان وود رملية ذنبهم فى رقبتك ياسر مبيوع ..
ممثلى حق men in black كانوا اكثر وجاهة و .. الق
ولا شنو يا عوض حمزة وبهاء
الا ما غنوا ليهم يا سمير بى نظرتك .. وذلك أرفق بهم
عمر سعد انا فكرت الصباح امشى لى نادوس افقدك ..
امكن الاقى منك كراع
كل الحضور .. حضورا
والغائبون .. حضورا
مصطفى ,خليل اسماعيل , سيد خليفة
و ,, وطن
تسللنا اليه خلسة عبر حزمة حبال صوتية , وطرب اصيل و...
بالسلامة ياسر
| |
|
|
|
|
|
|
|
|
|
Re: ليلة وداع الفنان ياسر مبيوع بحضور محجوب شريف ..تغطية شاملة .. (Re: محمد حيدر المشرف)
|
Quote: ممثلى حق men in black كانوا اكثر وجاهة و .. الق
ولا شنو يا عوض حمزة وبهاء |
فاتك ان (تجزى) جزيل الشكر للاخ عوض حمزه
على لمساته الظاهرة التى ارتقت بذوق
الاخ (نسيبنا) وكدا ..
بالمناسبة من اشراقات الحفل واضافاته الاخ
(محمد حيدر المشرف ) ..و(كدا) ..كتر خيرك
والقصيدة كانت جميلة ..مرحبا بك اضافة
ثرة (لاولاد قلبا)(اولاد ام درمان ) داخل بورداب
الدوحة ..والمؤجرين فى ام درمان يمتنعون ..
| |
|
|
|
|
|
|
|
|
|
Re: ليلة وداع الفنان ياسر مبيوع بحضور محجوب شريف ..تغطية شاملة .. (Re: محمد عبدالرحمن)
|
من الفقرات المميزة والتى نالت اعجاب الجميع
الاتصال التلفونى الذى اجراه الاستاذ لقمان همام
مع الاستاذ محجوب شريف ..وقد شارك محجوب شريف
ياسر مبيوع فى ليلة وداعه ..وابدى اعجابه وشكره
لياسر مبيوع ..وكلنا نتذكر تلك الليلة الجميلة
التى اقيمت تكريما لمحجوب شريف فى الدوحة
والتى شارك فيها الاستاذ ياسر مبيوع مشاركة فعالة
والتى بعدها غنى ياسر مبيوع النص المهدى له من
محجوب شريف والذى كان بأسم (تحدى) على مااعتقد ..
نتمنى ان يتم انزال كلمة الاستاذ محجوب شريف كاملة
فى هذا البوست ..
| |
|
|
|
|
|
|
|
|
|
Re: ليلة وداع الفنان ياسر مبيوع بحضور محجوب شريف ..تغطية شاملة .. (Re: محمد حيدر المشرف)
|
أحبابي وإخوتي الأعزاء
صديقي أ . ياسر مبيوع
في تمام السابعة تماماً حضرت وزميلي أبو الريش لحضور ولو جزء من هذا الوداع الهام فوجدنا (نادوس الخير) وزوجته الطيبة (أبنوسه) أهل الكرم والضيافة الأصيلة ، واستقبلانا بكل حفاوة وانتظرنا حتى السابعة والثلث فحضر أ .مبيوع فودعناه ورجعنا لاستقبال ضيوف ليلة السمر الصيفية .
والله كان بودي حضور كل الفعالية لمعزة الجميع في نظري .
وتمنياتي كل تمنياتي للاخ ياسر مبيوع بصول سليم وإقامة طيبة .
وكانت أمنيتي ايضاً أن ألاقي أخي وحبيبي م . معتصم الطاهر لأتمنى له السلامة من (اللوز)
أخوكم
عادل التجاني
الدوحة
| |
|
|
|
|
|
|
|
|
|
Re: ليلة وداع الفنان ياسر مبيوع بحضور محجوب شريف ..تغطية شاملة .. (Re: بورداب الدوحة)
|
Quote: فاتك ان (تجزى) جزيل الشكر للاخ عوض حمزه
على لمساته الظاهرة التى ارتقت بذوق
الاخ (نسيبنا) وكدا ..
بالمناسبة من اشراقات الحفل واضافاته الاخ
(محمد حيدر المشرف ) ..و(كدا) ..كتر خيرك
والقصيدة كانت جميلة ..مرحبا بك اضافة
ثرة (لاولاد قلبا)(اولاد ام درمان ) داخل بورداب
الدوحة ..والمؤجرين فى ام درمان يمتنعون .. |
Quote: محمد عبدالرحمن
الزول الماهل و,, وب الراحه
وكدا
اولاد قلبا حأجيب ليهم صكوك ملكيه حلتين فى امدرمان .. وعشق خرافى
ياخى انا فرحان بيك جدا .. اما بهاء
فجزى الله عوض حمزه عن اناقتة كل خير ..
فقد اصلح ما افسد الدهر |
ود المشرف انت ود قلبا يدقسوك اهل العوض ...... انا ماعارف عمر الفاروق بيرجع متين لانو نحن اولاد قلبا عايزين نشوف اهل العوض ديل موضوعهم شنو ........ كدي خلينا نتكلم عن هذه الامسية الجميلة ونسيبي ده برجع ليهو بعدين .....
اخونا الدكتور ياسر مبيوع ده فنان عديل كده وود قلبا برضو وان شخصيا كنت مبسوط جدا وانا بسمع فيهو وبيني وبينك كلامكم الكتير بتاع الشعر الحديث والعواسة العملتوها ديك ماعجبتني يعني خصمتو مننا كم اغنية ومن هسع ياود المشرف تاني فيصل عباس ده يقعد يسمع بس .......... بعدين نادوس ماصدق سالوه اظنو اتكلم ليهو ساعتين عن الشعر العامي والفصيح ..... ياجماعة نحن ناس غنا ساكت كلام المثقفاتية ده شبعنا منو .......... طبعا ناس محمد عبدالرحمن ديل عشان يكونوا قريبين من اولاد قلبا لازم يعملوا مثقفاتية ويزايدوا علينا لكن الكلام ده مابمشي فينا ........... الغريبة انا قلت ليهو ماعندنا مانع ندخلك قلبا ونشوف ليهو عروس من بناتنا .............. وبيني وبينك انا كان قروشي تمت ماكنت بعرفوا ليك ظاتو
| |
|
|
|
|
|
|
|
|
|
Re: ليلة وداع الفنان ياسر مبيوع بحضور محجوب شريف ..تغطية شاملة .. (Re: nadus2000)
|
كانت من اجمل الليالي التي حضرتها في الدوحة ...
ياسر مبيوع ارد ان يكرمنا بدل من تكريمنا له ، فغني كما لم يغني من قبل
غني كل شئ ، الحقيبة ، وردي ، ابراهيم عوض ...
وفوق كدا القي قصيدة حلمنتشية اجمل من كدا ما سمعت وكدا
الحضور كان كثيفا وجميلا ، ومنسجما .... الجميع رقص وطرب ....
وساهم
شكرا لمعتصم الطاهر ومحمد عبدالرحمن وعبدالجليل
ويييييييييييين الصور
| |
|
|
|
|
|
|
|
|
|
Re: ليلة وداع الفنان ياسر مبيوع بحضور محجوب شريف ..تغطية شاملة .. (Re: بهاء بكري)
|
| Quote: ود المشرف انت ود قلبا يدقسوك اهل العوض ...... انا ماعارف عمر الفاروق بيرجع متين لانو نحن اولاد قلبا عايزين نشوف اهل العوض ديل موضوعهم شنو ........ كدي خلينا نتكلم عن هذه الامسية الجميلة ونسيبي ده برجع ليهو بعدين ..... |
هانت الزلابية ..ام درمان دى اصلا كان سكانها منو غيرنا؟
بعد كررى جددودنا مرقوا منها (كايسين) مكان آخر عشان يواصلوا
حربهم ضد المستعمر ..وجو بعد داك الناس الانت (مأجر ) منهم
ديل استلموا اراضينا وعملوا (اولاد قلبا) ..وبعدين شيء طبيعى
انك تستنجد بعمر الفاروق لتشكلوا حلف (المستأجرين ) ضد
(القطعو شجرا وكتلو دبيبا ) اللهم نحن و(كدا) ...
غايتو ماشه معاك حلاوه بعد ماناسبتنا ..ان شاء الله
ناس عمر سعد ديل يشوفو ليك واسطة عشان الجماعة يبيعوا
ليك البيت دا وترتاح ..الله يقطع سنين الايجار ...
| |
|
|
|
|
|
|
|
|
|
Re: ليلة وداع الفنان ياسر مبيوع بحضور محجوب شريف ..تغطية شاملة .. (Re: بورداب الدوحة)
|
اليوم الاول :_______________
تثاقلت خطواتى الى المطار ...لكن رغما عن ذلك ذهبنا سريعا كانت الدوحة تعودنا ان اقل مشوار ياخد منا ساعات لكن نكاية بى اخذ الشوار فقط عشرة دقائق او اقل حاولت ان ادخل معة الى الوزن قال لى بمشى بسرعة وبجى كان تلك الدقايق دهور ...اتى فشربنا القهوة وليس كعادتة فهو يحب القهوة جدا والشاى ويشرب عادة الشاى قبل الذهاب الى النوم ....لكنة رفض القهوة كانة يستعجلنى ...
ودعتة كثيرا واستقبلتة اكثر ...........لكن هذة المرة ...كان مازن يسالنى سؤال بسيط جدا
خلاص مبيوع سافر ......وكنت اعجز عن الاجابة ..........تعودت علية طيلة 5 شهور يذهب وياتى
كنت اكون اعلم تاريخ جيتة قبل ذهابة كنا من المطار الى (الشاى الكرك ) بالكورنيش حتى اننا
عندما انتهت الحفل يومها ذهبنا مباشرة الى الكورنيش لنشرب اخر كرك كانيحب الكورنيش جدا
كان يتمشى فية يوميا ................كانت ظروف عملى تمنعنى من الذهاب معة يوميا كان يسال
عن رفيق دائما لة قلت لة الان اصبحت تعرف درب الكورنيش يمكنك ان تذهب وحيدا كان يقول لى ناس الدوحة والسودانيين لية ما بحبو المشى........يبدو ان خطواتة تلك كانت خصما على انا
احب الدوحة حب حتى الثمالة احب ناسها وكان يقول لى انتو اسعد ناس شفتهم فى محطاتى الكثيرة التى زرتها ...........كان دائما يسالنى عن اناس يكون صادفهم مرة واحدة او مرتين .....
سالنى امس عن خليل ولم ادرى لماذا خليل وبالكاد يكون اتونس معة يوم واحد او اثنين..
يحفظ الدروب جيدا ...دائما بيضع نفسو انو متلوم ...يسال انا يا عمر متلوم مع بكرى .
انا يا عمر متلوم مع كيكى ...انا يا عمر اتلومت مع وليد انا يا عمر اتلومت مع نادوس
اذا سمع ان هنالك شخص يحبة ناس الدوحة تلقائيا يحبة ويقول لى الزول داك زول عظيم جدا يا عمر اقول لية انتة شفتو وين يقول لى الناس لو اتكلمو عن شخص اكيد زول عظيم ويصر فلان دة بجيك
اقول لية الا مناسبات طيب نمشى نزورو اقول ليهو طيب .اتناسى الموضوع فيذكرنى
بتعب جدا من مجاملة شخص لية فى اى حاجة يقول لى يا عمر انا فلان دة اعمل ليهو شنو
يقول لى فلان دة عمل معاى كدة انا لازم ارد الدين رايك شنو نشيل العود ونمشى يوم نقعد معاهو فى البيت مرات اقول ليهو ما بتعرف ظروف الناس ممكن تتقبل كدة انك تجى تغنى ليهم فى البيت ولا لا
يقول لى طيب نعزم د اسامة عبد الحليم ويكن لة ود من نوع خاص ..........
يتذكر اشياء انا بقول ليس هذا وقتها ....جانى اليوم الصباح وقال لى يا عمر انا هامى للجالية
وقلقان عليها قلت ليهو ما تخاف سنكون باحسن حال وساتصل بك مؤكدا ذلك يسالنى يريد ان يقدم عمل
للجالية ما حصل فى منطقة الخليج ويدعمها اقول ليهو هون عليك هون عليك افكارك اكبر من امكانياتنا بيقول لى انا جاى ازيد ليكم امكانياتكم ما انقصة ..........
اليوم حين سالة عمار ابو الحسن عن التمرين قال ليهو التمرين من غيرك بايخ قال خلاص هسة بياجل
السفر ........وتاثر غاية التاثر وكنت اعلم انة جاد فى ذلك ......احب فريق الكرة
احب عمر عبود ولم يرة فلا حياتة ..يوم قلت ليهو بعد جينا من جولة دخات قلت ليهو اكرمونا غاية الكرم كان مصر يوم نمشى ليهم ويغنى ليهم هناك عشان اكرمو وفد اللجنة التنفيذية للجالية
يحب الدكتور ابو الحسن جدا ...يحب كمال سالم جدا وعادل اخية ..يصحى من النوم يقول لى انتة كيكى وين ....الاسبوع الاخير كان بيسال هل فى زول زعلان منو ولا لا ...
راحة وساواصل
| |
|
|
|
|
|
|
|
|
|
Re: ليلة وداع الفنان ياسر مبيوع بحضور محجوب شريف ..تغطية شاملة .. (Re: بورداب الدوحة)
|
اليوم الثانى:------------------------
كنا حين نساهر حتى صباحات نستمتع بها فى السودان وننتظر شروق الشمس وزقزقة الطيور وصياح الديوك
وحركة خفيفة نلحظها فى الموردة لجوار سوق السمك من منزلنا فياتى السماكة والسمسارة باكرا
لسوق السمك نلحظ حركتهم .ولكن فى الدوحة فقط اسمع صوت المكيف وصوت ياسر فقط يقول لى امشى نوم
ساعة وكعادتة لاينوم يظل صاحيا يوقظنى للدوام قاتل اللة الدوام اذهب للحمام واتى اجدة متكى
على عودة فتلك احب اللحظات الية لمسك العود ويسالنى رايك شنو فى اللحن دة دى غنية نانسى قربت
تخلص فاداعبة واقول لة دعنى اقلد لك صوت نانسى فى اللحن حتى تتاكد فيضحك ضحكتة البريئة
بعدها اقول لة بل اريد ان اسمع لحنك لاغنية عافية لو انتهيت منو ......يضحك يقول لى خايفك تحفظو تقوم من وراى تديها الاغنية جاهزة كلمات والحان عمر ويردف قائلا يا زول ما مشكلة ما خسارة فيك
شيلة فاقول لة راى ان تغنيها انت وحدك لا تعطيها لها فيضحك ويقول لى انا عندى 30 غنية ما عارف
اصرفة وين خلى الشباب يبتهجو .........اظل على هذة الحالة فاقول ليهو انتة تصحينى وتاخرنى انا
ماشى يقول لى خلاص لمن تجى صحينى ...ما وجدتة اليوم لاصحية ...اول سؤال طبعا حا تسوى شاى مش
باللة كباية لاخوك معاك .........اقول لة طيب نعضى فى الاول ... يقول لى كدى نشرب كباية شاى
مرات بيحلم بالالحان فيقول لى تعرف قصيدة قرنق دى كان ما لحنتها ما برتاح وكان يمنى نفسة
بان يغنيها فى ذكراه لكن شاء ت الظروف ....فيسال عن الجديد وكان اول سؤال اها كمال سالم كيف
ويضحك طويلا لانة يعرف ان جاء كمال سالم لعمل الجالية تانى ما بلقانى فى البيت بخليهو براهو وبمشى
ويقول لى الجالية دى شغلة ما بخلص انت وكمال غايتو اللة يعينكم...فاقول لة رايك شنو تمشى الكورنيش
ونحنا بعد نخلص نجى نسوقك فيضحك يقول لى انتة وكمال ممكن تكونو فى اجتماع وتنسونى ويزيد
العجب لو كان معاكم ابو الحسن ويضحك ضحكة طويلة ..................
كانت امنيتة ان ينتج شريط للانتخابات القادمة ..ويقل لى السودان بقى خالى من اى اشرطة تحريضية زى دى للانتخابات
وما شايف زول مممكن يعمل الحاجة دى قلت ليهو دى انتخابات حا تكون لى ناس (بلة ود عشة السائق
الرقشة) وكان بقت الجلابية بيضاء مكوية عز الطلب تدخل البرلمان طوالى .........
يقول معقول الانتخابات دى تجى ويكون شريط حق تحريض وبث الامل فىالجماهير مافى ......
وحين ياتى الليل يبدا النقاش فهذا الرجل يمتلك كم من المعلومات غزير جدا جدا وكم من القصائد هائل
عادة ما نبدا النقاش فيتحول الى دينى وعلاقة الفكرة الجمهورية بما هو قديم ....علاقة الشيعة
الفكرية وخلافها مع السنة ....ومرات نبدا جدل يمتد حتى الصباح فناخذ راحة ....
وانا اخذ راحة ايضا فموعد التمرين الذى يكون قد جهز لة
التحدى منذ امس قد جاءت وسوف اذهب للتمرين وحدى اليوم من دونة لارى شكل التمرين والتحدى
| |
|
|
|
|
|
|
|
|
|
Re: ليلة وداع الفنان ياسر مبيوع بحضور محجوب شريف ..تغطية شاملة .. (Re: بورداب الدوحة)
|
أقف الان خاشعا امام فيوض المحبة الصادقة
والتى تجمع عمر بياسر .. وياسر بعمر ..
وعمر زول سمح شديد ..
كطبع اصلاء السودانية يخبى وراء اهابة شفافية مطلقة
تكاد تفر منه احيانا ..
فيتداركها ..
ولا يدركها , وندركها
لنتركها انا وانتم الان ل.. شيتا كتر بالحيل
وهو لطف العبارة وانسيابيه الحركة السلسة للصورة الشعريه عند استاذنا
معتصم ..( سيكون شغلى الشاغل اقناء دواوين هذا الشاعرالضخم )
تكاد تحس بحلاوة الشعر فى ( حنانك ) ..
تخال ان اللغة عندة عفوية يطلقا عفو لسانه وما هى بذاك ..
هى لغة تم الاعتناء جيدا بها ..
لذا لا يفوتك انتباهها الحريص جدا للمعانى
وسعيها الدؤوب لخدمة الصورة والتى بدورها صورة شديدة الخصوصية
والتفرد .. تماما كتفرد ست البيت ابنوسة وبعلهاوأخوته ..
وعن نادوس فالحديث يطول بطول الود والذى يكنه لعبدالجليل كل من عرفوه
وحتى لا يغضب منى أخى الاكبر بهاء لاطالة الحديث وشغل الباندوث بمساحة
قد تسمح بنشر ما يمكن ان يستقطب لحق فردا
لكم جميعا كل الود
| |
|
|
|
|
|
|
|
|
|
Re: ليلة وداع الفنان ياسر مبيوع بحضور محجوب شريف ..تغطية شاملة .. (Re: معتصم الطاهر)
|
يامعتصم ..
تحياتى ..
طالما الكلام جاب الكلام ..يااخوانا الزول
البستحق الشكر والتقدير والتكريم هو الاستاذ
لقمان همام ...اينما بحث عنه الناس كان حاضرا ..
هاتفته بخصوص مشاركته فى تكريم البروف عمر عبود
وقد كلفت بذلك ..واجابنى (بانى جاهز للمشاركة
سيبنى اراجع جدول العمل ..واذا لقيت يوم التكريم
بتعارض مع الشغل ببدل مع اى واحد من الزملاء عشان
اقدر اشارك ) ..واتى وبصحبته الزول السمح مبيوع
وقدم اجمل واحلى برنامج وكان نجم الليلة ) ..وكان
عند تكريم محجوب شريف حاضرا بصوته الجميل..وعند وداع ياسر
كان احد الاشخاص الذين اخرجوا هذه الليلة الجميلة
لقمان همام ...مليون تحية وشكر ..
| |
|
|
|
|
|
|
|
|
|
Re: ليلة وداع الفنان ياسر مبيوع بحضور محجوب شريف ..تغطية شاملة .. (Re: عوض حمزة)
|
الأعزاء..
نادوس.. وأبنوسة...
لسوء الحظ، تزامن مع هذا الحفل الاسري، الصادق، بوداع الفنان الاصيل، د. ياسر، واجب اجتماعي، باستقبال اخت عزيزة، بمطار الدوحة، ووداعها في ذات الأمسية،....
وكم سعدت بنجاح الوداع، ودفء المشاعر، وخصوبتها، وذلك من انطباعات الحضور المميز، ومشاركتهم الاصيلة لأخ نعرف دوره، ورسالته، ...
عزيزي معتصم...
تقول شنو، قدر.... اخوك منتظر بصالة المطار الاستقبال (بدون كراسي، ولا أعرف السبب)، أكثر من ثلاث ساعات ونصف الساعة.. ..
من خلال الصور، ومشاركات د. الفنان ياسر، والشعراء الأعزاء جدا، المتصم الطاهر، والمشرف، وو... من السرب المتفرد، يظهر بالفعل خسرنا حدث جميل، يزخرف الذاكرة، والخيال..
سلام أخي ياسر...
عميق الشكر، لصالون ابنوسة، ودوره المتفرد....
سلام سلام سلام، ومحبة..
| |
|
|
|
|
|
|
|
|
|
Re: ليلة وداع الفنان ياسر مبيوع بحضور محجوب شريف ..تغطية شاملة .. (Re: بورداب الدوحة)
|
اليوم الثالث :---------
دار نقاش بينى وبين ياسر فى انو غناهو دة موجة لياتو فئة عمرية وهو فنان شاب والسائد
الان من الفنانين الكل يعلمة الما (سنترة ومطرة) مدح ...........ولتلك بوست منفرد..
بدا نقاش ان غناة استايل فوق الثلاثين ...لان كلمات مثل كلمات عبد اللة وداعة-بشرى سليمان-
مدنى النخلى-محجوب شريف-سليمان مبيوع.(والدة)-معز عمر بخيت-هند محمد.
والحان متميزة من وجة نظرى هل ا ذهب الى السودان سيستمع لها الجيل الجديد (جيل الان)
دخل علينا محمد الفادنى وهو جيل مواليد الدوحة بداية العشرينات فطلب من ياسر اغنية
وكانت اغنية لا موعود للمعز عمر بخيت فنظر لى ياسر فهمت معنى نظرتة انة انتصار لة
فى نقاشى لة ................
وايضا ثنى على هذة المسالة طارق الفادنى وابن اختى مجاهد عثمان .........
حقيقة اسال المتداخلين ...وكنت اود ان اسالة ذلك اليوم حتى ياخد النقاش ابعادة
سوالى خرج ياسر من السودان وهو طالب ثانوى ...بداية التسعينات هل يعتبر نفسة امتداد لما قبلة ام لما بعدة وهو لم يكن بالداخل ليرى اى مستوى ؟
هل لو كان بالداخل هل يا ترى كان سيكون بنفس هذة النمطية من الالحان والغنى؟
| |
|
|
|
|
|
|
|
|
|
Re: ليلة وداع الفنان ياسر مبيوع بحضور محجوب شريف ..تغطية شاملة .. (Re: nadus2000)
|
| Quote: نترك المجال لصور الزميل عوض حمزة ، فهو مبدع في التصوير |
والله يا فيصل الزبير دي ياها (غاب أب شنب و ......)(البلد المافيها تمساح .....)
لقيتوني مافي واتجدعتو
التحايا للغالي ياسر مبيوع وكم أنا حزين على عدم تمكني من حضور وداعه
بس عزانا انو كل الحلوين كانوا في وداعو
تمشي وتجي بالسلامة يا ياسر مع السلامة
كدي جيب عوض حمزة وكل مصوري الخور خليهم يجيبوا لينا صورة زي دي
| |
|
|
|
|
|
|
|
|
|
Re: ليلة وداع الفنان ياسر مبيوع بحضور محجوب شريف ..تغطية شاملة .. (Re: معتز القريش)
|
Quote: كدي جيب عوض حمزة وكل مصوري الخور خليهم يجيبوا لينا صورة زي دي
|
مرحبتين كباااار يا ود قريش..
ابدا وحياتك .. وعارفين العين
ما بتعلى على الحاجب و (كدا)
لكن بس كانت محاولة لسد خانتك
حتى تحضر ولما ما ظهرتة واصلنا
اللعب .. فهل اوفينا ؟؟
تسلم .. وقبل رمضان تجى الخور
ولا حا تغنى خلى الخور حرام ..
ما دام ارى الخط بعيد !!!!
جدعة :
تعال الخور عشان نصورك بكاميرتك
اها ... تجى ولا نجى ؟؟؟
| |
|
|
|
|
|
|
|
|
|
Re: ليلة وداع الفنان ياسر مبيوع بحضور محجوب شريف ..تغطية شاملة .. (Re: بهاء بكري)
|
محمد عبدالرحمن
اها كلامى طلع فى محلة ؟؟
ما قلت ليك نختاه الزول ده .. كلامى اديتة الطرشة
تانى (نطير وين)؟؟ حا يقعد يحاحى فينا لما يطلعنا
الى ما بعد الكبارى الثلاثة.. قايتو الله كريم علينا
لكن عندى معاة محاولة بباقى الليل ده كان (يهجع)
ويروق !!!!
| Quote: عارف يابوالنسب انا فهمت حاجة الان ............ كنت داقس وقتي ده كلو ...... يعني الواحد لازم يتفق مع المصوراتية قبل الفعالية عشان امورو تظبط مع العالمين ديل .......... نادوس يصور في اسرتة الصغيرة والكبيرة وشابكنا ده الدكتور اسامة وهو يتامل ..... اها الدكتور اسامة بقول في قصيدة عصماء ..... الابنوسة تتحدث عن الثقافة وماعارف شنو كمان ...... يعني القصة واضحة ..... وبعدين عوض حمزة انا قلت دي خوة خور ابوعنجة وخور الدوحة لكن اظنو طلع من عمراب جبل ام علي ساكت وقلبا دي اظنو جاها كبير ............ دخلوه المطبخ وشوية سجق علي كراع جدادة من التلاجة زولك طلع يصور في البيت ونحن راجعين شبكني ليك ابنوسة دي ذوقها عالي واختارت الوان للشقة خطيرة والتحف بتاعتها رقيقة .... صدق ماباقي ليهو الا يقول لي نادوس ده زول شفبف او وريف ....... غايتو انت طلعت ليك بصورة من بعيد ومااظنك كنت مقصود وغايتو انا كان ماقميص عبدالله اخوك ماكان عرفتك ................اها لمن نرجع تاني ..........العالم دي كلها عيانة |
الفزعة يا شباب الشايقى شوووووووطن ..
| |
|
|
|
|
|
|
|
|
|
Re: ليلة وداع الفنان ياسر مبيوع بحضور محجوب شريف ..تغطية شاملة .. (Re: بورداب الدوحة)
|
Quote: كدي جيب عوض حمزة وكل مصوري الخور خليهم يجيبوا لينا صورة زي دي
|
المستنير ود القريش .............. يازول والله فقدناك .... اخوك قاعد ليهو مع عصابة كان يازول انا من المغرب هناك وناس عوض بعد صورو خلق الله قبلو علي التحف كمان وانا ونسيبي محمد عبدالرحمن ذي الماحضرنا معاهم ...... يازول تاني نحن انت ماموجود مايقولوا في فعالية ولا خرابيط ......... بعدين تصوير شنو البعرفوه عوض حمزة وعبدالجليل .... والله ود الامير الاشتر ده اخير منهم
| |
|
|
|
|
|
|
|
|
|
Re: ليلة وداع الفنان ياسر مبيوع بحضور محجوب شريف ..تغطية شاملة .. (Re: بورداب الدوحة)
|
تغيرات المناخ جادت علينا بماء فاض عن حاجتنا
وتحول نقمة على البشرية.. كاشفا عن عيوب كثيره
فى البنى التحتيه لعالم لا يأبه بالضعفاء.. وعالم
لايرى ابعد من انفه.. عالم لايقدر قيمة العلم الذى اقام له
مؤسسات تفهم لغة الربح اكثر من بناء الانسان
انا ايضا لم يسلم مناخى من التغير
فامتلأت منابع الحزن والشجن.. فاضت لكنها لم تنساب
نهرا من الافكار لعوائق اعترضت مجراه وسدود اقيمت فيه
دون دراسات وتخطيط فانقلبت وبالا على من سكنوا ضفاف قلبى
وامتلكوا نواصيه
تحية لكم احبابى فى الدوحه بحجم ما ملأتم به دواخلى من مشاعر ومواقف...
وجمال ما اعرتم من آذان... وصفاء ما ترجمتم من احاسيس .. وبهاء ما فاضت
به مشاعركم محبة صادقه دون تكلف.. كل لحظة تآلفت فيها نفوسنا'' وتناغمت
رؤانا كان النشيد عاليا والجمع متناسقا يبعث على الطمأنينه ويبشر بالخير
على ضفاف الخليج تنام الدوحة قليلا وتصحو.. تنهض فى ثقة وتخطو بخطى متسارعه
فى خضم هذا العالم اللاهث وراء التطور... هى صغيرة المساحة
كبيرة التفاعل.. عظيمة التأثير.. إطلالتها الجديدة على الخليج تنبئ
بثورة حقيقية... تمتلئ بالجمال...الماء واالوجه الحسن يطالعك
اينما وليت وجهك.. فكل الطرق تؤدى للكورنيش
وكل ما يسلكه ناظريك ينتهى الى جمال.. ولا يخفى عليك الخضره
المتناميه فى وجل
احبتى
قليلة هى المدن التى تطبع فيك طابها منذ الايام الاولى..
ونادرة هىاالاماكن التى يجتمع فيهاالصفوه علما وثقافة
وحملا لهموم ومواجع وطنا نخشى عليه من الضياع..
تلك هى الدوحه احدى اكبر محطاتى.. عايشتها لحظة بلحظه..
نبضة بنبضة.. وبادلت اهلها الفة بالفة.. ومحبة بمحبه
| |
|
|
|
|
|
|
|
|
|
Re: ليلة وداع الفنان ياسر مبيوع بحضور محجوب شريف ..تغطية شاملة .. (Re: حسن طه محمد)
|
بهاء ، يبدو ان وجاهتك ذاك اليوم اثارت كثيرا من الحسد ، خاصة من نسيبك
ووصي نادوس (والذي اصيب بالحسد من وجاهتكمايضا) فعمل بوصية نسيبكم الموقر (التي -اي الوصية- جاتو في جرح..)
لكن عوض حمزة ده مالوا ، المره الجاية ونصيحة من اخوك ، جيب لي مصور ليك انت فقط
يصور مع الناس واحد ورا التاني .... وخليهم يموتوا بغيظهم ... وحسدهم ....
| |
|
|
|
|
|
|
|
|
|
Re: ليلة وداع الفنان ياسر مبيوع بحضور محجوب شريف ..تغطية شاملة .. (Re: بورداب الدوحة)
|
ازدحمت الرؤى فى مخيلتى حتى نالها الارهاق
امشى فى كورنيش دبى كالتائه فى لجة لا نهاية لها...
لم احس بجمال المكان.. حتى تلك الاضواء الفخمه المتغيرة
الالوان فى واجهة برج العرب كانت خالية من الدفء
احسست بمذاق الغربة مرة اخرى...
لم اسمع ضحكه ولم ار حتى شبح ابتسامه..
قال رفيقى "انت ناس الدوحه كتبوك والا شنو؟
ياخى انا لو مكانك كنت رجعت بى ليلى دا"
| |
|
|
|
|
|
|
| |
tarig almakki
محمد أبوالعزائم أبوالريش
محمد عبدالرحمن
محمد حيدر المشرف
Faisal Al Zubeir
nadus2000
عوض حمزة
عادل التجانى
بهاء بكري
رقم صفر
عمر سعد
عبدالغني كرم الله بشير
حسن طه محمد
معتصم الطاهر
معتز القريش
Alsa7afa_30
مبيوع
Ahmed Abdallah
فيس بوك
تويتر
انستقرام
يوتيوب
بنتيريست